ငါ့ကို ပစ်စမ်း

မနက်ခင်းတွင် ထန်ရှုက အိပ်ရာမှ နိုးလာသည်။ အချိန်အတော်ကြာ အလုပ်များနေပြီးနောက် ရုတ်တရက် အနားရသဖြင့် သူက အလွန်လန်းဆန်းတက်ကြွနေသည်။ ထို့နောက် သူက အောက်ထပ်သို့ သွားကာ ညအိပ်ခဲ့သည့် ထိုလူများနှင့် မနက်စာစား၏။ ထို့နောက် ထန်ရှု၊ စုပန်နှင့် ကောင်းပိုင်လဲ့တို့က အမာရွတ်မျက်နှာချမ်နှင့်အတူ ခမ်းနားသောထန်စီးပွားရေးလုပ်ငန်းစုထံ ဉီးတည်လိုက်သည်။

ဤမနက်တွင် ယခင်ဝိုင်စက်ရုံဒါရိုက်တာသိုင်ချမ်က အကွက်ချခံရပြီး သူ့ရာထူးအား လက်လွှတ်လိုက်ရသည့်သတင်းက ပျံ့နှံ့သွားသည်။ သို့သော် သူဌေးထန်ရှုက သူ့အား ကိုယ်တိုင်ရှာဖွေခဲ့ပြီး ခမ်းနားသောထန်စီးပွားရေးလုပ်ငန်းစု၏လက်ထောက်မန်နေဂျာရာထူးအား ယုံကြည်စိတ်ချစွာ ပေးအပ်ခဲ့သည်။

ထိုလူကိုယ်တိုင်က မကောင်းသောဂုဏ်သတင်းမရှိသော်ငြား လူများစွာအား ထိတ်လန့်တုန်လှုပ်သွားစေသည်။ ထို့ပြင် သိုင်ချမ်က ထန်ရှုနှင့် အလွန်နီးကပ်သောဆက်ဆံရေးရှိသည်ကို လူတိုင်းက သဘောပေါက်သွားခဲ့သည်။

ညနေခင်းတွင် ထန်ရှုက မြောင်ဝမ်ထန်၊ ရှောင်မင်ကျန်၊ မိသားစုခေါင်းဆောင်အချို့နှင့် တွေ့ဆုံပြီး တောင်တရုတ်ပင်လယ်တွင် ကျွန်းတည်ဆောက်ရန် ပူးပေါင်းခြင်းအား လက်မှတ်ရေးထိုးခဲ့ကြသည်။

****

နောက်တစ်နေ့တွင် ထန်ရှုက ထန်အလန်ကို ခေါ်ကာ တာခလာမာခန်သဲကန္တရာသို့ ထွက်လာခဲ့သည်။ ထိုနေရာတွင် တရုတ်အာဏာပိုင်များ တည်ဆောက်ထားသည့် လျှို့ဝှက်ဌာနချုပ်တည်ရှိပြီး တာဝန်ရှိသူက အထူးစွမ်းရည်ဗျူရိုဒါရိုက်တာသွမ်မုလင်ဖြစ်သည်။ ဤအေဂျင်စီ၏အဖွဲ့ဝင်အများစုပင် ဤနေရာ၌ စခန်းချထားကြ၏။

အချိန်က တရွေ့ရွေ့ကုန်ဆုံးလာသည်။

နောက်ဆုံးတွင် သူတို့က အကြိမ်အနည်းငယ်ကားပြောင်းစီးပြီးနောက် တာခလာမာခန်သဲကန္တရာ၏အစွန်အဖျားပေါ်တွင် ရပ်လိုက်ကြသည်။ ဤနေရာသို့ လာရာလမ်းတွင် ထန်ရှုက အစာနှင့်ရေအပါအဝင် နေ့စဉ်လိုအပ်သည်များအား ဝယ်လာခဲ့ပြီး အားလုံးအား သူ့သိုလှောင်လက်စွပ်ထဲတွင် သိမ်းထားသည်။ ထို့ကြောင့် သဲကန္တရာထဲတွင် ရိက္ခာပြတ်လပ်မည်နှင့်ပတ်သက်၍ သူက စိုးရိမ်စရာမလိုပေ။

နှစ်ရက်ကြာပြီးနောက်။

ဤအချိန်တွင် ထန်ရှုက သဲကန္တရရှိ မြေပြန့်တစ်ခုသို့ ရောက်ရှိလာပြီး ထန်အလန်နှင့်အတူ တည်ငြိမ်စွာ လမ်းလျှောက်နေလျက်ရှိသည်။ နောက်ဆုံးတွင် သူတို့နှစ်ယောက်က အိုအေစစ်တစ်ခု၏အစွန်အဖျား၌ ရပ်တန့်လိုက်သည်။

“နေရာအနေအထားအရ အဲဒါက ဒီနေရာမှာပဲ ဖြစ်ရမယ်၊ ဆရာသခင်”တည်နေရာအား ဂရုတစိုက်လေ့လာကာ သိုလှောင်လက်စွပ်မှ မြေပုံတစ်ခုယူထုတ်ပြီး မြေပုံနှင့် နှိုင်းယှဉ်ကြည့်ပြီးနောက် ထန်အလန်က ပြောလိုက်သည်။

“ဟုတ်တယ်၊ အဲဒါက ဒီနေရာမှာပဲ”ထန်ရှုက ခေါင်းညိတ်လိုက်သည် “မင်း နောက်ထပ်ဘာသတိထားမိသေးလဲ”

ထန်အလန်က ပတ်ဝန်းကျင်အား ဂရုတစိုက်လေ့လာကာ တိတ်တဆိတ်တွေးလိုက်သည်။ ထို့နောက် သူက ပြောလိုက်၏ “ငါ့ဖုန်းက signalမရှိတော့ဘူးဆိုတော့ ဒီနေရာက ဆက်သွယ်ရေးsignalကို ပိတ်ထားတာပဲ၊ ပြီးတော့ သဲလိုက်အိမ်မြောင်က အလုပ်မလုပ်ပုံထောက်ရင် ဒီနေရာကစွမ်းအင်အတက်အကျတွေက အတော်လေးပုံမှန်မဟုတ်တာပဲ။ ဒါ့အပြင် ဒီအိုအေစစ်ကို ငါ လေ့လာပြီးပြီ။ ဒါက အတော်လေးထူးဆန်းတယ်၊ အသက်ရှိတဲ့ဒါမှမဟုတ်ရေအရင်းအမြစ်ရှိတဲ့လက္ခဏာတွေ မပြဘူး။ အခြားတစ်ဖက်မှာ ငါ မျှော်လင့်ထားတာနဲ့ စာရင် ဒီနေရာက စိတ်ဝိညာဉ်ချီက အတော်လေးကြွယ်ဝတယ်။ တည်နေရာအရ ဒီလိုအနေအထားက မဖြစ်သင့်ဘူး။ ဒါ့အပြင် အပူချိန်က အပြင်ကမ္ဘာနဲ့ယှဉ်ရင် အနည်းဆုံး နှစ်ဆယ်ဒီဂရီလောက် ကွာခြားတယ်။ ဒါက မူမမှန်ဘူး”

“မင်းရဲ့လေ့လာမှုက အတော်လေးစေ့စပ်ပေမယ့် မင်းအတွက်က သာမန်လောက်ပါပဲ”ထန်ရှုက ပြုံးလိုက်သည်။

“အခြားရှိသေးတာလား”ထန်အာလန်က ခေါင်းရှုပ်သွားသည်။

“ငါတို့အခုရပ်နေတဲ့နေရာကနေ တစ်ချက်ကြည့်လိုက်ပါ။ ငါတို့ ဒီနေရာကို လမ်းလျှောက်လာတဲ့အချိန်မှာ ဧရိယာက တစ်ခုခုမတူတာကို သတိပြုမိလား”

ထန်အလန်က ခဏစဉ်းစားပြီးနောက် အရှက်ရသောမျက်နှာနှင့် ပြော၏ “မင်းပြောတာ မှန်တယ်၊ ဆရာသခင်။ အပြင်ဘက်ကနေ အိုအေစစ်ကို ငါတို့ ကြည့်လိုက်တဲ့အချိန်မှာ ဧရိယာက အရွယ်အစားအားဖြင့် ဘတ်စကတ်ဘောလေးကွင်းစာလောက်ပဲ ရှိတယ်။ ဒါပေမယ့် ဒီနေရာကို ရောက်လာပြီးနောက် ငါ မြင်နိုင်တဲ့ အကွာအဝေးက အနည်းဆုံးနှစ်ကီလိုမီတာကျော်ပဲ။ နှစ်ကီလိုမီတာအထက်က ဘာတစ်ခုကိုမှ ငါ မမြင်နိုင်ဘူး။ ဒါ့အပြင် ငါတို့က ခဏရပ်လိုက်ပေမဘ့် ငါတို့က ငါးရာမီတာအောက်ခန့်ပဲ လမ်းလျှောက်ခဲ့တာ၊ အပြင်ကနေ ငါတို့ မြင်နိုင်တဲ့ အကွာအဝေးက ဒီနေရာက ဧရိယာရဲ့အစစ်အမှန်အရွယ်အစားနဲ့ မတူဘူးလို့ ဆိုလိုတယ်”

“ဒီနေရာက ကမ္ဘာစိတ်ဝိညာဉ်စွမ်းအင်နဲ့စွမ်းအင်အတက်အကျက အနည်းငယ်ကွဲပြားတယ်လို့ မင်း အရင်က ပြောခဲ့တယ်မလား။ ဘာကြောင့်လဲဆိုတာ မင်း ဖော်ထုတ်ပြီးပြီလား”ထန်ရှုက ထပ်ပြော၏။

ခဏစဉ်းစားပြီးနောက် ထန်အလန်က ရုတ်တရက် ပြောလိုက်သည် “အာ၊ ဒီအိုအေစစ်ကို အစီအရင်တစ်ခုနဲ့ ဖုံးလွှမ်းထားတာပဲ။ အပြင်ကနေ လာတုန်းက အဲဒါကို ငါ အာရုံမခံနိုင်ခဲ့ဘူး”

“မှန်တယ်။ ဒီဧရိယာကို အစီအရင်တစ်ခုက တကယ်ဖုံးလွှမ်းထားတာပဲ၊ ငါက အဲဒါကို ကိုယ်တိုင်စီရင်ခဲ့တဲ့သူပဲ”ထန်ရှုက ပြုံးကာ ပြောလိုက်၏ “ဒီအိုအေစစ်ရဲ့ဧရိယာက အကြမ်းအားဖြင့် တစ်ထောင်စတုရန်းကီလိုမီတာပတ်လည်မှာ ရှိတယ်၊ ဒါပေမယ့် ငါ အစီအရင် ခင်းကျင်းပြီးနောက် အဲဒါက အရွယ်အစားအဆအနည်းငယ်လောက် လျော့ကျသွားပုံပဲ။ နှစ်ထပ်အကာအကွယ်အနေနဲ့ ကီလိုမီတာရာအနည်းငယ်ဧရိယာအတွင်းမှာ ဘယ်လိုဆက်သွယ်ရေးsignalကိုမဆို ပိတ်ထားတယ်၊ ပြီးတော့ အထူးသံလိုက်စက်ကွင်းတစ်ခုကို ခင်းကျင်းထားတယ်။ ဒါကြောင့် အဲဒီဂြိုလ်တုတွေကတောင် ဒီနေရာမှာ ဘာတစ်ခုမှ ရှာမတွေ့နိုင်ဘူး”

“ဒီနေရာမှာ ထူးခြားတာ တစ်ခုခုရှိလို့လား၊ ဆရာသခင်”ထန်အလန်က စိတ်ရှုပ်ထွေးသွားသည်။

“မင်း အဲဒါနဲ့ပတ်သက်ပြီး မကြာခင်သိမှာပါ”ထန်ရှုက ပြုံးလိုက်၏ “ပြီးတော့ နောက်ကျရင် တိတ်တိတ်လေးနေပြီး နားထောင်၊ လေ့လာစူးစမ်း၊ စဉ်းစားပါ။ ကောင်းပြီလေ၊ ဒီနေရာမှာ လူအချို့က ငါတို့ကို လာတွေ့လိမ့်မယ်”

“အမ်”

ဤသည်ကို ကြားပြီးနောက် ထန်အလန်၏အမူအရာက အနည်းငယ်ပြောင်းလဲသွားပြီး သူ့အကြည့်က အဝေးသို့ ရုတ်တရက် ပြောင်းရွှေ့သွား၏။ အရှေ့ရှိ နှစ်ရာမီတာရှိသည့်မြက်ခင်းလွင်ပြင်တစ်ခုတွင် အစိမ်းရောင်ကားတစ်စီးက ထွက်ပေါ်လာသည်။

ဘမ်း…

ကားတံခါးက လျင်မြန်စွာ ပွင့်သွားပြီး ရိုင်ဖယ်ကိုင်ထားသည့်လူငယ်နှစ်ယောက်က ထွက်လာ၏။ သူတို့နှစ်ယောက်က LCD goggleကို ဝတ်ဆင်ထားပြီး ထန်ရှုနှင့်ထန်အလန်တို့အား သေနတ်ဖြင့် ချိန်းထားလိုက်ကြသည်။

“မင်းတို့က ဘယ်သူလဲ၊ ဒီနေရာကို ဘယ်လိုလုပ် ရောက်လာတာလဲ”လူငယ်တစ်ယောက်က နက်ရှိုင်းသောအသံနှင့် အေးစက်စွာ မေးလိုက်သည်။

“မင်းတို့က ငါ့ကို မသိဘူးလား၊ ဒါဆို မင်းတို့က ဒီနေရာမှာ အသစ်တွေပဲ ဖြစ်ရမယ်”ထန်ရှုက ပြုံးလျက် ပြော၏ “သွမ်မုလင်က မင်းတို့ကို

“ဟမ်…”

လူငယ်နှစ်ယောက်က အကြည့်ချင်းဖလှယ်လိုက်ကြပြီး သူတို့က ချက်ချင်းဒေါသထွက်သွားသည်။ စကားပြောခဲ့သည့်တစ်ယောက်က အော်ပြောလိုက်၏ “ငါတို့ခေါင်းဆောင်ရဲ့နာမည်ကို မင်းက ပြောလို့ရမယ်လို့ ထင်တာလား။ မင်းတို့ကောင်တွေက ဘယ်သူလဲ။ ငါ့ကို ဖြေကြစမ်း၊ မဟုတ်ရင် ငါတို့က ကြမ်းတမ်းလို့ အပြစ်မတင်ကြနဲ့”

ထန်ရှုက မျက်မှောင်ကြုတ်ကာ သူတို့လက်ထဲရှိ သေနတ်များအား တစ်ချက်ကြည့်လိုက်သည်။ ထို့နောက် သူက ပြုံးလျက် ပြောလိုက်၏ “ဒါက လေဆာသေနတ်တစ်လက်ဖြစ်ရမယ်။ အဲဒါက အတော်လေးအားကောင်းပြီး အနည်းဆုံးငါးဆယ်စင်တီမီတာခန့်ရှိတဲ့သံနံရံကို ထိုးဖောက်နိုင်တယ်။ ငါ့ကို ပစ်စမ်းကြည့်။ ဒီသေနတ်က ဒေတာထဲမှာ မှတ်တမ်းတင်ထားသလို အားကောင်းသလားဆိုတာကို ငါ မြင်ချင်တယ်”

“ဘာ”

လူငယ်နှစ်ယောက်က အလွန်အံ့အားသင့်သွားသည်။ သူတို့လက်ထဲရှိသေနတ်များက လေဆာသေနတ်ဖြစ်သည်ကို ထန်ရှုက သိလိမ့်မည်ဟု သူတို့က မမျှော်လင့်ထားခဲ့ပေ။ လေဆာသေနတ်က လွန်ခဲ့သောတစ်နှစ်လောက်မှ ထုတ်လုပ်ခဲ့သည်ကို သိထားရမည်။ အဲဒါက အလွန်အမင်းအဝေးပစ်နိုင်စွမ်းရှိသည်။ သူတို့က LCD goggleအား ဝတ်ဆင်ထားသရွေ့ သူတို့က အဝေးပစ်မှတ်များအား မြင်နိုင်သည်။

ဒီကောင်ရဲ့ခေါင်းက တစ်ခုခုများ မှားနေတာလား။ သူက သူတို့ကို ဒီလိုအားကောင်းတဲ့လေဆာသေနတ်နဲ့ ပစ်ခတ်စေချင်တာလား။ သူက သတ်သေချင်တာလားဒါမှမဟုတ်တစ်ခုခုလား။

“ဒီအရူးက ဘယ်နေရာက လာတာလဲ”

သူတို့နှစ်ယောက်က ခေါင်းကိုက်လျက် တုံ့ဆိုင်းသွားလေသည်။

“မင်းတို့နှစ်ယောက်က ဘာစိုးရိမ်နေတာလဲ”ထန်ရှုက ပြုံးကာ ပြောလိုက်သည် “ငါ့ကို ပစ်ဖို့ ငါ မင်းတို့ကို ပြောခဲ့တယ်မလား။ လေဆာသေနတ်က တင်ပြထားသလောက် တကယ်အားကောင်းသလားဆိုတာ ငါ တကယ်သိချင်တယ်”

စကားပြောသောလူငယ်၏မျက်လုံးများက လင်းလက်သွားသည်။ သူ့ရှေ့တွင် ရပ်နေသော လူငယ်က သာမန်မဟုတ်သည်ကို သူက ခပ်ရေးရေးခန့်မှန်းမိသည်။ သူက သူတို့လို စွမ်းရည်အသုံးပြုသူတစ်ယောက်ဖြစ်ဖို့ များသည်။ ထို့ပြင် ဤနေရာက တိုင်းပြည်တွင် အလျှို့ဝှက်ဆုံးနှင့်အရေးကြီးဆုံးစခန်းဖြစ်သည်၊ ဤနေရာသို့ လာနိုင်သူများက သာမန်လူမဖြစ်နိုင်ပေ။

“ပစ်…”

သူက သက်ပြင်းတစ်ချက်ရှိုက်ကာ ခလုတ်ကို နှိပ်လျက် ထန်ရှုအား ပစ်ခတ်လိုက်သည်။

ဇက်…

လေဆာရောင်ခြည်တန်းတစ်ခုက ထန်ရှု၏ရင်ဘက်အား ထိမှန်သွားသည်။ သူ့ရှေ့ရှိအကောင်က မသေလျှင်ပင် ဒဏ်ရာအပြင်းအထန်ရမည်ဟု လူငယ်က မျှော်လင့်ထားသည်။ စွမ်းရည်အသုံးပြုသူတစ်ယောက်ဖြစ်သော်ငြား သူပင် ဒဏ်ရာရလိမ့်မည်ဖြစ်သည်။

သို့သော် နောက်ထပ်ဖြစ်ပျက်သည်ကား သူ့အား လုံးဝင်မှင်တက်သွားစေသည်။ သူ့ရှေ့ရှိ လူငယ်၏ရင်ဘက်အား ထိမှန်ခဲ့သည့် လေဆာရောင်ခြည်တန်းက ရပ်တန့်သွားပြီး ရှေ့သို့ မရွေ့နိုင်တော့။ လေဆာရောင်ခြည်တန်းအား စွမ်းအင်ဒိုင်းကာတစ်ခုက တားဆီးထားပုံရသည်။

“မဖြစ်နိုင်ဘူး…”

လူငယ်၏မျက်လုံးများက ပြူးထွက်မတတ် ဖြစ်သွားသည်။ လေဆာရောင်ခြည်တန်းက ဤလူစိမ်းအား မထိခိုက်စေရုံသာမက ဤလူငယ်၏အဝတ်အစားပေါ်တွင် ခြစ်ရာတစ်ခုပင် မဖြစ်စေခဲ့ပေ။

ဒါက…