အခန်း (၉၈၁) : စီနီယာအစ်မလား

ဝမ်ဝေ့က ရှုရှစ်၏ ဟောပြောပို့ချချက်ကို နားထောင်နေရင်း ထိုအခွင့်အရေးကို အသုံးပြုကာ ကျင့်ကြံရေးနှင့် ဗဟုသုတများကို ထပ်မံနားလည်အောင် လုပ်ဆောင်ခဲ့သည်။ ထိုဖြစ်စဉ်တစ်ခုလုံးက သုံးနှစ်တာ ကြာမြင့်ခဲ့၏။

သူက ဉာဏ်ပညာပြည့်နှက်နေသည့် မျက်ဝန်းများကို ဖွင့်ကာ အသက်ပြင်းပြင်းရှူလိုက်သည်။ သူနှင့် ကျင့်ကြံဆင့်တူသည့်သူ တစ်ယောက်ဆီမှ ကျင့်ကြံရေးအပေါ် နားလည်မှုအကြောင်း ကြားရသည်က အမြဲတမ်း အထောက်အကူ ဖြစ်လေသည်။

ထုံရို့ပင်း အလှည့်ရောက်ဖို့ သိပ်မကြာလောက်ဘူး…

ဝမ်ဝေ့က တွေးလိုက်မိသည်။ အသင်္ချေအင်ပါယာကမ္ဘာက တူညီသည့်အရာကို အကြိမ်ရေအနည်းငယ် ခံစားရမည်ဖြစ်ကြောင်း တွေးလိုက်မိသည်။ သူက အဝေးတစ်နေရာမှ ရှုရှစ်ကို ကြည့်နေမိ၏။ သူမ ပျောက်ကွယ်သွားပြီးသည့်နောက်တွင် သူမကို လှမ်းဆက်သွယ်လိုက်သည်။

လင်းဖန်ကို အသက်ပြန်သွင်းတာ ဘယ်လိုလဲ…

သူမက ထိုမေးခွန်းကြောင့် အံ့အားသင့်သွားလေသည်။ သို့သော်လည်း အမှန်အတိုင်းပြောဖို့သာ ဆုံးဖြတ်လိုက်၏။

ကျွန်မ နည်းစနစ်ကို သင်ယူနိုင်လုနီးပါးဖြစ်နေပါပြီ…

မင်းအမြန်လုပ်သင့်တယ်

ဘာလို့လဲ

ငါ မျိုးဆက်ကသူတွေကို အခွင့်အရေးကောင်းတစ်ခု ပေးတော့မှာလေ။ တကယ်လို့ သူ့ကို မလွဲချော်စေချင်ဘူးဆိုရင် မြန်မြန်လုပ်ဖို့ လိုတယ်…

အခွင့်အရေးကောင်းလား…

ငါ အများကြီး ပြောလို့မရသေးဘူး။ ဒါပေမဲ့ ပြင်ဆင်ထားသင့်တယ်…

ရှုရှစ်က မျက်မှောင်ကြုတ်လိုက်၏။ အကယ်၍ ဝမ်ဝေ့က အခွင့်အရေးကောင်းဟု ပြောလျှင် ရိုးရှင်းမည် မဟုတ်ပေ။ သို့သော်လည်း သူမအနေဖြင့် သူ့ရည်ရွယ်ချက်များကို စဉ်းစားနေမိ၏။ ကံဆိုးစွာဖြင့် ကောက်ချက်ချဖို့ရာ သတင်းအချက်အလက်အနည်းငယ်သာ ရှိနေသည်။

ကျွန်မ သိပါပြီ

နောက်ထပ် တစ်ခုက ဧကရာဇ်ခုံကို ဆက်သွယ်ဖို့ ကြိုးစားပြီးတော့ ငါက သူ့ကိုတွေ့ချင်တယ်ဆိုတာကို ပြောပေးပါ…

ဝမ်ဝေ့က ထပ်ပြောလိုက်သည်။

အဲဒါက ဘာကိစ္စများကြောင့်လဲ

အခုတော့ မဟုတ်သေးဘူး။ သူနဲ့ တတ်နိုင်သမျှ မြန်မြန်တွေ့ဖို့ အရေးကြီးနေပြီ…

ကျွန်မ ကြိုးစားကြည့်ပါမယ်။ ဒါပေမဲ့ သူ ပြန်ဖြေပါ့မလားဆိုတာကိုတော့ အာမခံချက်မရှိဘူး

ကြိုးစားကြည့်လိုက်ပါ

ဆက်သွယ်ရေးက အဆုံးသတ်သွားပြီး ရှုရှစ်က ကျောင်းတော်ဆီ ပြန်ရောက်လာသည်။ သို့သော်လည်း သူမက ထိုစကားဝိုင်းကြောင့် အနည်းငယ် အာရုံထွေပြားနေလေ၏။ သူမက သူ စီစဉ်နေသည့်အရာကို သိချင်နေမိသည်။

ထိုအရာများကို အဖြေမထုတ်နိုင်သည့်နောက် အစည်းအဝေးတစ်ခုကျင်းပပြီး တခြားသူများက သူမကို ကူစဉ်းစားပေးနိုင်မလားဟု ကြည့်လိုက်သည်။ သူတို့ပြီးမြောက်သွားသည့်အခါ သူမက ဒိုင်မေးရှင်းအမြင့်ကို လှမ်းဆက်သွယ်မည် ဖြစ်၏။

ထိုစဉ် ဝမ်ဝေ့က ဟောပြောပို့ချချက်အပြီးတွင် ခုံရုံးသို့ ပြန်လည်ရောက်ရှိလာသည်။ သူ့လုပ်ငန်းတစ်ခုက ထိုသုံးနှစ်အတွင်း ပြီးမြောက်သွားသည့်အတွက် ဂရုစိုက်ဖို့ လိုအပ်နေသည်။

သူ့ကျင့်ကြံရေးအခန်းအတွင်း လက်ဝါးထဲတွင် ဝိညာဉ်တစ်ခုကို ကိုင်စွဲထား၏။

ထိုအရာက ယွီကျူး၏ ဝိညာဉ် ဖြစ်သည်။

နောက်ဆုံးတော့ ပြီးမြောက်သွားပြီ…

ဝမ်ဝေ့က တွေးလိုက်မိသည်။ ထုံရို့ပင်းဆီမှ ဝိညာဉ်ကို လက်ခံရရှိပြီးသည့်နောက်တွင် သူက ဘာလုပ်ရမလဲဟု စဉ်းစားလိုက်၏။ သူက မှတ်ဉာဏ်များကို ကာကွယ်ထားသည့်အတွက် မှတ်ဉာဏ်များကို မရှာဖွေနိုင်ပေ။ ဝမ်ဝေ့က သူသာ ဝင်ရောက်စွက်ဖက်ဖို့ ကြိုးစားပါက ဝိညာဉ်သည် ကိုယ်တိုင်ဖျက်ဆီးပစ်မည် ဖြစ်ကြောင်း သိနေ၏။

သူက အရင်းအမြစ်အနေဖြင့် ထိုအရာကို မစုပ်ယူရဲပေ။ ခတ္တမျှ သူက ထိုဝိညာဉ်သည် အသုံးမဝင်ကြောင်း တွေးမိ၏။ ထိုအရာက သူ အစီအစဉ်တစ်ခု ရှိမလာခင် အချိန်အထိသာ ဖြစ်သည်။ သူက ဝိညာဉ်နှင့် ဆက်နွယ်နေသည့် ကံကြိုးမျှင်များကို အဆောင်တစ်ခုအဖြစ် သန့်စင်ခဲ့သည်။ ထိုအဆောင်က သူ့အား တခြားကမ္ဘာ့အသိုက်အဝန်းရှိ သစ္စာဖောက်များကို ရှာတွေ့နိုင်ခွင့်ပြုထားသည်။

ဝမ်ဝေ့က သူ့ရှေ့တွင် ရှိနေသည့် ကျောက်စိမ်းရောင် အဆောင်တစ်ခုကို ကြည့်လိုက်သည်။ အကယ်၍ သူသာ ဂရုမစိုက်ဘဲ ဖြစ်စဉ်က နှေးကွေးနေပါက အောင်မြင်မည် မဟုတ်ပေ။ သူက လက်ကိုဝှေ့လိုက်ကာ သူ့ရှေ့တွင် အာကာပြင်မုခ်ပေါက်တစ်ခုကို ဖွဲ့စည်းပြီး ဝမ်ကျူထံ ထိုအဆောင်ကို ပေးပို့လိုက်သည်။

သူက သူမအား ကံကြမ္မာအရိပ်တပ်ဖွဲ့ဝင်များကို လွှတ်ကာ ထိုသစ္စာဖောက်များ၏ ဇစ်မြစ်ကို ရှာဖွေခိုင်းခဲ့၏။ အထူးသဖြင့် တာအိုသက်သေပြထားသည့်သူများကို ဖြစ်သည်။ သူ့အနေဖြင့် ခုံရုံးနှင့် အိပ်မက်လောက ချဲ့ထွင်မှုကို ကြိုတင်ပြင်ဆင်ထားဖို့ လိုအပ်နေသည်။

သူ ပြီးမြောက်သွားသည့်အခါ သူ့မိတ်ဆွေနှင့် မိသားစုများအပေါ် အာရုံစိုက်လာနိုင်ပြီ ဖြစ်၏။ သူ့အဖေနှင့် အဘိုးတို့က သီးသန့်ကျင့်ကြံရေး ဝင်ရောက်နေဆဲဖြစ်ကာ ထပ်ခါတလဲလဲ လေ့ကျင့်နေကြသည်။

ယန်းလီလင်းကလည်း သူမ၏ အင်မော်တယ် သင်္ကေတစနစ်ကို ဖွဲ့စည်းနေပြီး သူမ၏ သွေးမျိုးဆက်အသစ်နှင့် ပေါင်းစည်းပြီးသည့်နောက်တွင် အောင်မြင်မှုကြီး ရရှိလာခဲ့သည်။ လီကျွင်းကလည်း ခက်ခက်ခဲခဲ ကြိုးစားလေ့ကျင့်နေပြီး တာအိုသင်္ချိုင်းမြေမှ သတ်ဖြတ်ရေးအရှိန်အဝါများကို အကောင်းဆုံး အသုံးပြုနေသည်။ သူက ခန္ဓာကိုယ်ကို တာအိုဘိုးဘေးနှင့် ယှဉ်နိုင်အောင် လေ့ကျင့်ခြင်းဖြင့် နဝမအဆုံးစွန်အုတ်မြစ်ကို ရယူဖို့ ရွေးချယ်ခဲ့သည်။

သူ့လက်ရှိပါရမီနဲ့ဆိုရင် ဒီလမ်းစဉ်ကို လျှောက်လှမ်းတာက ပြဿနာတော့ မဟုတ်ဘူး။ ဒါပေမဲ့ ဒီနည်းလမ်းက ဆိုးကျိုးရှိနေပေမဲ့ အခုအတွက် အကောင်းဆုံးပဲ…

အားကောင်းသည့် ခန္ဓာကိုယ်ကို ရှိထားခြင်းက နဝမအဆုံးစွန်အုတ်မြစ်ကို အောင်မြင်စွာ ရရှိထားခြင်းနှင့် မတူပေ။ နဝမအဆုံးစွန်အုတ်မြစ်က ခန္ဓာကိုယ်၊ တာအို၊ စည်းမျဉ်းနှင့် တာအိုနှလုံးသား ကဏ္ဍအားလုံး ပါဝင်နေ၏။

အဆင်ပြေပါတယ်။ သူ့ခန္ဓာကိုယ် အားကောင်းလာတာနဲ့ သူ့သွေးထဲက ယန်စွမ်းအားကို သုံးပြီးတော့ ဝိညာဉ်ကို လေ့ကျင့်ပေးနိုင်တယ်…

အဲဒီနောက်ကျရင် သူက အဆုံးမဲ့လေဟာနယ်ထဲက ကောင်းကင်ရွေးချယ်ခံတွေနဲ့ တိုက်ခိုက်ပြီးတော့ တခြားကဏ္ဍတွေကိုလည်း ဖြည့်စည်းနိုင်လိမ့်မယ်…

ဤလမ်းစဉ်က လီကျွင်း၏ စရိုက်၊ သတ်ဖြတ်ရေးတာအိုနှင့် တိုက်ပွဲလူသား မကောင်းဆိုးဝါးနတ်ဘုရား သွေးမျိုးဆက်အတွက် အသင့်တော်ဆုံး ဖြစ်ပေသည်။

ဝမ်ဝေ့က သူ့အား တိုက်ပွဲမျှော်စင်ကို အသုံးပြုဖို့ သတင်းစကား ပို့ဆောင်လိုက်ပြီးသည့်နောက်တွင် တခြားတစ်ယောက်ကို အာရုံစိုက်လိုက်သည်။ ထိုသူက ထျဲ့ကန် ဖြစ်၏။

ဝမ်ဝေ့က သူ ရှိနေသည့်အနေအထားကို မြင်တွေ့ပြီးသည့်နောက်တွင် မျက်မှောင်ကြုတ်မိသွားသည်။ ထိုသူက သူ တာအိုကို သက်သေပြပြီးကတည်းက စိတ်အေးလက်အေး ဖြစ်နေဟန်ပေါ်၏။

သူက လှုံ့ဆော်မှု လိုနေပြီ။ ဒါတွေအကုန်လုံး လုပ်နေတာက သူ့ရဲ့ ကတိစကားကြောင့်ပဲ လုပ်နေတာ။ သူ့ရဲ့စိတ်က ဒီနေရာမှာ မရှိတော့ပဲနဲ့ ပြန်လည်ဝင်စားဖို့ ပြင်နေပြီ…

ဝမ်ဝေ့က သူသည် ထျဲ့ကန်ကို ထွက်သွားစေပြီး ပြန်လည်ဝင်စားခွင့်ပြုသင့်လားဟု စဉ်းစားမိလိုက်သည်။ သို့သော် သိပ်မကြာခင် သူ၏ ပင်ကိုစွမ်းရည်က နောင်အနာဂတ်တွင် အသုံးဝင်နိုင်ဆဲဖြစ်ကြောင်း သဘောပေါက်သွားခဲ့၏။ ထို့ကြောင့် သူက တိုက်ပွဲမျှော်စင်အတွင်း အဓိကပြိုင်ပွဲအတွက် ပြင်ဆင်ထားဖို့ရာ သတင်းစကား ပို့လိုက်သည်။

အကယ်၍ ထျဲ့ကန်က ထိုစာရင်းတွင် နာမည်တစ်ခုရအောင် လုပ်နိုင်ပါက သူ ရရှိနိုင်သည့် ချီကံကောင်းမှုနှင့် ကြမ္မာသည် သူ့ပြန်လည်ဝင်စားခြင်း၌ အထောက်အကူ ဖြစ်စေလိမ့်မည်။

ဝမ်ဝေ့က သူ့စကားသည် သက်ရောက်မှုတချို့ ရှိလာကြောင်းမြင်၍ ခေါင်းညိတ်လိုက်၏။

သူက တခြားသူများကိုလည်း စစ်ဆေးကြည့်လိုက်သည်။ အတိအကျပြောရလျှင် ဝူမင်နှင့် အထွေထွေသောင်းပြောင်းအရှင် ဖြစ်၏။ ကံဆိုးစွာဖြင့် သူတို့၏ လေ့လာမှုက ပြီးမြောက်လုနီးပါးဖြစ်နေသော်လည်း အပြည့်အဝ မပြီးဆုံးသေးပေ။

သူတို့က ပြီးဆုံးလုနီးပါးဖြစ်နေတာ ကောင်းတယ်…

ငါ့ရဲ့ နောက်သီးသန့်ကျင့်ကြံရေးက ကျွမ်းကျင်အတတ်ပညာတွေကို အာရုံစိုက်ထားရမယ်…

ဝမ်ဝေ့က အကြီးအကဲတန့်ကို ကြည့်ကာ တွေးလိုက်မိသည်။ သူက တာအိုသင်္ချိုင်းမြေမှ အလောင်းအားလုံးကို သူ့ဆီ ပေးထားပြီး ဆေးလုံးအတွက် တိုးတက်နှုန်းကို စစ်ဆေးကြည့်ချင်မိ၏။

နှမြောစရာကောင်းလှသည်က အချိန်နည်းနည်းသာ ကုန်ဆုံးသေးသည့်အတွက် ရလဒ်က နှေးကွေးနေသေးသည်။

နောက်ဆုံးတွင် ဝမ်ဝေ့က ဖျက်ဆီးခြင်းအရှင်ကို စစ်ဆေးကြည့်လိုက်၏။ သူက ထိုသူအောင်မြင်သွားပြီး အခြေခံအုတ်မြစ်ကို အောင်အောင်မြင်မြင် ဖွဲ့စည်းထားနိုင်ကြောင်း မြင်သည့်အခါ အကြည့်များ တောက်ပလာမိသည်။ ထိုသူက ထာဝရဧကရာဇ်နှင့် ယှဉ်နိုင်သည့် စွမ်းအားကို ရယူခဲ့နိုင်သည်။

ဖျက်ဆီးခြင်းအရှင်က ယခုအခါ မကောင်းဆိုးဝါး နတ်ဘုရားဆင့်ကဲပြောင်းလဲခြင်း ၁၂မျိုးကို ကျင့်ကြံနေပြီး သူ့စွမ်းအားကို နောက်ထပ်မြင့်မားသည့် အဆင့်တစ်ခုသို့ တိုးမြင့်အောင် ကြိုးစားနေသည်။

ဂိုဏ်းမှ နောက်ထပ်ထာဝရအဆင့် တိုက်ခိုက်နိုင်သူတစ်ယောက် ရှိလာပြီ…

သူက ကျေနပ်စွာ ခေါင်းညိတ်လိုက်သည်။ အထူးသဖြင့် ဖျက်ဆီးခြင်းအရှင်က သူ့ကျင့်ကြံဆင့်ကို ဖုံးကွယ်ထားပြီး လူသိရှင်ကြား မကြေညာသေးသည့်အတွက် ဂိုဏ်းထဲမှ လူတချို့ကသာ ထိုအကြောင်းကို သိထားကြသည်။

သိုသိုသိပ်သိပ် ဖွံ့ဖြိုးတိုးတက်မှုက အခုကစပြီး ငါတို့ရဲ့ ဆောင်ပုဒ်ပဲ။ သူက ဒီလိုလုပ်နိုင်တာ တော်သေးတယ်…

သူက လက်ဝှေ့လိုက်ပြီးသည့်နောက်တွင် ထိုသူအား အသွင်ပြောင်းပညာရပ်ကို ပုံတူပွားကာ လှမ်းပို့လိုက်သည်။ ဖျက်ဆီးခြင်းအရှင်က ခန္ဓာကိုယ်လေ့ကျင့်ရေးတွင် ပါရမီရှိဟန်ပေါ်ပြီး ထူးထူးဆန်းဆန်းကျင့်စဉ်မှ တစ်စုံတစ်ခု သင်ယူနိုင်လောက်၏။

ဝမ်ဝေ့က ကမ္ဘာကြီးကို အာရုံမစိုက်တော့ဘဲ အိပ်မက်လောကအတွင်း ဝင်ရောက်ကာ ကျန့်ပယ်ဟယ်နှင့် တိုက်ခိုက်လိုက်သည်။ သို့သော်လည်း သိပ်မကြာခင် တစ်စုံတစ်ခုက သူ့အာရုံကို ဖမ်းစားသွားလေ၏။

နောက်ထပ် ကြမ္မာအသစ်က ဒီနေရာမှာ ရှိနေတာလား။ ဘယ်သူများလဲ…

သူက အိပ်မက်လောကတွင် ရှိနေသည့် အာဏာကို အသုံးပြုကာ ကြည့်လိုက်သည်။ အပြာရောင်ဝတ်စုံ ဝတ်ဆင်ထားသည့် အမျိုးသမီးငယ်လေးက ဆေးလုံးတစ်လုံးကို သန့်စင်ဖို့ သရုပ်ဖော်နေသည်။ သူမရှေ့တွင် ပါဝင်ပစ္စည်း ထောင်ချီကာ ရှိနေ၏။

စီနီယာအစ်မ ဟို့ရှုလား…

ဝမ်ဝေ့က သူမသည် မူလဆေးလုံးတာအိုဂိုဏ်းမှ ဖြစ်ကြောင်း အမှတ်ရလိုက်၏။ ထိုသူသည် အနှစ်သာရဆေးဝါးပညာရပ်အတွက် နစ်မြုပ်ထားသူတစ်ဦး ဖြစ်ကာ ဂိုဏ်းက သင်္ကေတဆေးဝါးပညာရပ်ပေါ် အခြေခံထားသည့်အတွက် နှစ်များစွာ အနိုင်ကျင့်မှုများ ခံစားရခဲ့သည်။

သူမက အနှစ်သာရဆေးဝါးပညာရပ်ကို ကမ္ဘာမှာ ပြန်လည်အသက်သွင်းမဲ့ ကြမ္မာကို ရယူနိုင်ခဲ့တာလား…

ဝမ်ဝေ့က တွေးလိုက်မိသည်။

ကမ္ဘာကြီးက ပြောင်းလဲနေတာဆိုတော့ အရင်းအမြစ်တွေကလည်း ပေါကြွယ်ဝလာပြီ။ အိပ်မက်လောကရဲ့ အကူအညီနဲ့ဆိုရင် အနှစ်သာရဆေးဝါးပညာရပ်က ကမ္ဘာ့စင်မြင့်မှာ ပြန်လည်ပေါ်ထွက်လာနိုင်တယ်…

သူက အကြမ်းဖျင်းသုံးသပ်ပြီးသည့်နောက်တွင် ကောင်းကင်တာအိုအနေဖြင့် ဤသို့သော ကမ္ဘာ့ဖွံ့ဖြိုးတိုးတက်လာမှုတွင် ပျောက်ဆုံးသွားသည့် ဆေးဝါးပညာရပ်ကို ပြန်လည်အသက်သွင်းလာကာ အဓိပ္ပာယ်ရှိကြောင်း နားလည်လိုက်၏။

ဝမ်ဝေ့က ခေတ္တမျှ စောင့်ကြည့်နေပြီး အံ့အားသင့်မှုကို ဖုံးကွယ်ထားခြင်းမရှိပေ။ အနှစ်သာရဆေးဝါးပညာရပ်၏ ကန့်သတ်ချက်က မြေကမ္ဘာအဆင့် ဆေးလုံးများ ဖြစ်၏။ အထူးသဖြင့် ဆေးဖော်စပ်နည်း အများစုသည် ဖျက်ဆီးခံလိုက်ရခြင်း သို့မဟုတ် သမိုင်းကြောင်းမှ ပျောက်ဆုံးသွားကြလေသည်။ မည်သူကမှ ထိုဆေးဝါးပညာရပ်မျိုးကို မထောက်ပံ့လိုသည့် အချက်ကိုပါ ထည့်ပေါင်းလိုက်လျှင် ကောင်းကင်အဆင့်ဆေးလုံးကို မည်သူကမှ အောင်အောင်မြင်မြင် မဖန်တီးနိုင်ကြပေ။

သို့သော်လည်း ဝမ်ဝေ့က ဟို့ရှုသည် သူတော်စင်အဆင့် ဆေးလုံးကို ကြိုးစားနေကြောင်း ပြောနိုင်လေ၏။ သူမက လျှို့ဝှက်ဆန်းကြယ်မှု တစ်ခုကို ဖန်တီးထားပြီး မြေကမ္ဘာအဆင့် အနေအထားသို့ ရောက်ရှိလာခဲ့သည်။

ဒီဆေးလုံးက ကျရှုံးနိုင်တယ်…

သူက တွေးလိုက်မိသည်။ ထင်ထားသည့်အတိုင်း မိနစ်ပိုင်းကြာမြင့်ပြီးသည့်နောက်တွင် ဆေးပြင်းမီးဖိုက ပေါက်ကွဲထွက်သွားပြီး ဆေးလုံးက ကျရှုံးသွားသည်။

သို့သော်လည်း ဟို့ရှုက စိတ်ဓာတ်ကျခြင်း မရှိဘဲ ပြုံးလိုက်မိသည်။ သူမက နောက်ထပ် ဆေးပြင်းမီးဖိုတစ်ခုကို ဖွဲ့စည်းကာ အချိန်မဖြုန်းဘဲ ဆက်လက် ဖော်စပ်လိုက်၏။

ဟို့ရှုက မျက်လုံးကို မှိတ်ထားပြီး အကြိမ်ရေ အနည်းငယ် ဆက်လက် လုပ်ဆောင်ခဲ့သည်။ နာရီအနည်းငယ်ကြာမြင့်ပြီးသည့်နောက်တွင် သူမက သူတို့ကို ပြန်လည်ဖွင့်လိုက်ပြီး သန့်စင်လိုက်၏။

အလုပ်ကြိုးစားတယ်၊ စူးစိုက်မှုကောင်းတယ်၊ ကြမ္မာများတယ်၊ ပြီးတော့ အလားအလာကောင်းတဲ့ တာအိုနှလုံးသား ရှိတယ်။ သူမက ပါရမီပဲ လိုအပ်နေတာ…

ဝမ်ဝေ့က သုံးသပ်လိုက်ပြီး တပည့် လက်ခံဖို့ရာအထိ တွေးမိသွားသည်။ သို့သော်လည်း သိပ်မကြာခင် ထိုအတွေးကို ဖယ်ရှားလိုက်၏။

သို့သော်လည်း သူက ထိုမိန်းကလေးနှင့် တွေ့ဆုံဖို့ ရွေးချယ်လိုက်သည်။