ကမ္ဘာ့အပြောင်းအလဲ ပြပွဲ

အသင်္ချေအင်ပါယာကမ္ဘာ၊ ကောင်းကင်ခုံရုံး

ဝမ်ဝေ့က ကုသိုလ်သက်သေပြ နည်းလမ်းကို ထုတ်ကာ နောက်တစ်ကြိမ် ဖတ်ရှုလိုက်သည်။ ဤနည်းစနစ်က ဤမျှကြီးကျယ်လှသည့် ဇစ်မြစ်မျိုး ရှိထားလိမ့်မည်ဟု ထင်မထားမိခဲ့ပေ။ ဝိဇ္ဇာလမ်းစဉ်တွင် မည်သို့သောဆန်းကြယ်မှုမျိုး ရှိနေသည်ကို စဉ်းစားမိနေ၏။ သို့သော် ဝူဟုန် ချန်ထားခဲ့သည့် စာအုပ်ထဲတွင် သတင်းအချက်အလက်က အခြေခံမျှသာဖြစ်ပြီး သူ့ကို နားလည်မှုတချို့သာ ပေးသည်။

သူက ထိုကျင့်စဉ်ကို သိမ်းကာ အဝေးကို လှမ်းကြည့်လိုက်၏။

အခုထိ တုံ့ပြန်မှု မရှိသေးဘူးဆိုတော့ ဒီသက်သေတွေအားလုံးက မေတ္တယျက ငါတို့ဘက်ကနေ ကာကွယ်ပေးနေတယ်ဆိုတာကို ပြနေတာပဲ…

သူက ကောင်းကင်ဘုံအရှင် ကျိမင်နှင့် စကားဝိုင်းက အန္တိမသဟဇာတဆီမှ ဖုံးကွယ်ထားနိုင်လိမ့်မည်ဟု မထင်ပေ။ သို့သော်လည်း တော်လှန်ရေးတပ်ဖွဲ့က ချက်ချင်းပင် ပျက်သုဉ်းမသွားသလို လက်ရှိအခြေအနေအရ သူက ကာကွယ်ပေးခံထားရပြီး ထူးကဲသာလွန်မှုတစ်ပိုင်းအဆင့်၏ အမျက်ဒေါသကို စိုးရိမ်စရာမလိုကြောင်း ညွှန်ပြနေသည်။

ဝမ်ဝေ့က အသက်ပြင်းပြင်းရှူကာ ကမ္ဘာကို စစ်ဆေးကြည့်လိုက်၏။ သူ လေ့လာထားသလောက် ကမ္ဘာ၏ ကျွမ်းကျင်အတတ်ပညာများသည် တဖန်ပြန်လည်ခေတ်စားလာမည် ဖြစ်ကြောင်း သဘောပေါက်လိုက်၏။

ထုံရို့ပင်း၏ အဆောင်လက်နက် ဖန်တီးမှုအပြီးတွင် တခြားသော ကျွမ်းကျင်အတတ်ပညာများကလည်း ဆင့်ကဲပြောင်းလဲဖို့ လိုအပ်သလို ခံစားလိုက်ရကြသည်။ အစီအရင်ဆရာသခင်များက ဝူမင်၏ ထူထန်စစ်သည်တော် လမ်းစဉ်ကို ဝင်ရောက်လာကြပြီး တတ်နိုင်သမျှ မြန်မြန် ပြီးပြည့်စုံအောင် လုပ်ဖို့ ကြိုးစားနေကြသည်။

ဆေးဝါးပညာရှင် သို့မဟုတ် ဆေးလုံးဖော်စပ်သူများကလည်း ဝမ်ဝေ့၏ ယခင်ပြစ်ချက်ရှိ ပင်ကိုဆေးလုံးကို အလေးထားကာ ပြောင်းလဲဖို့ ကြိုးစားနေကြသည်။

သို့သော် ပင်ကိုဆေးလုံးများစွာ ဖန်တီးနိုင်သော်လည်း တိုးတက်မှု မရှိပေ။ နှမြောစရာကောင်းလှသည်က သူတို့၏ အောင်မြင်မှုသည် ပတ်ဝန်းကျင်မှ ပင်ကိုချီစုပ်ယူမှုကြောင့်သာ ဖြစ်၏။ သူတို့သည် မိုးမြေက ပင်ကိုဆေးလုံးကို ဖန်တီးခဲ့သည်အား ပြန်လည်ဖန်တီးခဲ့နိုင်ခြင်းကြောင့် မဟုတ်ပေ။

ရလဒ်အနေဖြင့် ဟို့ရှု၏ အနှစ်သာရဆေးဝါးပညာရပ်က တဖန်ခေတ်စားလာကာ ဆေးဝါးပညာရှင်များက မဖွံ့ဖြိုးသေးသည့်နယ်ပယ်အပေါ် အာရုံစိုက်လာကြသည်။

လက်နက်သန့်စင်သူများက ဖွံ့ဖြိုးတိုးတက်ဖို့ အစီအစဉ် မရှိသည့်အတွက် အားအနည်းဆုံး ဖြစ်နေကြသည်။ ထို့ကြောင့် သူတို့က ချန်းချန်ကို နမူနာပြု၍ လှုံ့ဆော်မှုကို ယူကာ အင်မတန်ကြီးမားသည့် လက်နက်ဖန်တီးမှုများကို အာရုံစိုက်ထားလေ၏။ နမူနာအားဖြင့် မူလလက်နက်ဖြစ်သည့် မြို့တစ်ခုလုံးကို ဖန်တီးဖို့ ဖြစ်သည်။

ရုပ်သေးရုပ်ကဲ့သို့ အသေးစား ကျွမ်းကျင်အတတ်ပညာများကလည်း ခန္ဓာရုပ်သေးရုပ်သဘောတရားက ခေတ်စားလာသည့်အတွက် ကျော်ကြားလာသည်။

ဝမ်ဝေ့က အရာအားလုံးကို ကျေနပ်စွာ ကြည့်လိုက်၏။

“အခု လီလင်းနဲ့ တာအိုအခွင့်အလမ်းဂိုဏ်းက ဝင်ပါရတော့မဲ့အချိန်ပဲ” သူက အမိန့်တစ်ခု ထုတ်လွှတ်လိုက်၏။ သိပ်မကြာခင် ယန်းလီလင်းက သီးသန့်ကျင့်ကြံရာမှ ထွက်လာခဲ့သည်။ သူမ ပေါ်ထွက်လာပြီး သိပ်မကြာခင် အိပ်မက်လောကအတွင်း နောက်ထပ် တစ်လောကလုံးဆိုင်ရာ ကြေညာချက်ကို ထုတ်ဖော်လာ၏။

ကမ္ဘာရှိ ဆေးဝါးပညာရှင်များက စိတ်လှုပ်ရှားနေကြသည်။ ဤမျိုးဆက်တွင် ကျွမ်းကျင်အတတ်ပညာများ၏ နယ်ပယ်တစ်ခုချင်းစီတွင် ထိပ်သီးသို့ ညွှန်ပြနေသည့် ပါရမီရှင်တစ်ယောက်စီ ရှိကြ၏။

ယန်းလီလင်းက ဆေးဝါးပညာအတွက် ဖြစ်ကာ ထုံရို့ပင်းကမူ အဆောင်ပြုလုပ်သူအတွက် ဖြစ်သည်။

ယခု ယန်းလီလင်းက ထုံရို့ပင်းလိုမျိုး ပေါ်ထွက်လာပြီဖြစ်သည့်အတွက် ကြီးကြီးမားမား တစ်စုံတစ်ခု ဖြစ်ပျက်တော့မည်မှန်း သိနေကြသည်။ သူတို့သိသည်က မှန်ကန်နေ၏။

ပထမဦးစွာ သူတို့က ကမ္ဘာထံ အလိုအလျောက်ဆေးပြင်းမီးဖိုကို မိတ်ဆက်ခဲ့သည်။ လူများက ထိုဖန်တီးမှုသည် ကမ္ဘာကို အကောင်းဖက်မှမဟုတ်ဘဲ ပြောင်းလဲစေနိုင်ကြောင်း သိ၍ အံ့အားသင့်သွားကြ၏။

ဆေးဝါးပညာရှင်များက ထိုဖန်တီးမှုကို မြင်သည့်အခါ သူတို့ကို အစားထိုးပေးမည့် တစ်စုံတစ်ခု ပေါ်ထွက်လာတော့မည်ဖြစ်သည့်အတွက် အသုံးမဝင်ဖြစ်သွားတော့မည်ဟု တွေးထင်ကြသည်။ အကယ်၍ ထိုသို့မလုပ်လျှင်ပင် ထိုအရာက သူတို့၏ အဆင့်အတန်းကို နိမ့်ချသွားလိမ့်မည်။

အကယ်၍ ယန်းလီလင်းကသာ ကောင်းကင်ဧကရာဇ် နောက်ခံပြုထားသည့် အားကောင်းသော ဧကရာဇ်အင်အားစုမှ မဟုတ်ပါက သူမကို သတ်ပြီးလောက်ပြီဖြစ်ကာ မိုးမြေစက်ယန္တရားဆေးပြင်းမီးဖိုဟု ခေါ်ဆိုသည့်အရာကို ဖျက်ဆီးပစ်လောက်လေပြီ။

ယန်းလီလင်းက ထိုသူများ ခံစားနေသည်ကို သတိထားမိ၏။ ထို့ကြောင့် သူမက ထိုထုတ်ကုန်သည် ဆေးဝါးပညာရှင်များကို အစားထိုးသွားမည် မဟုတ်ကြောင်း ဖျောင်းဖျခဲ့၏။ အနှစ်ချုပ်အားဖြင့် သူတို့သည် ပို၍ပင် အလေးထားခံရလိမ့်မည်။ ဤပစ္စည်းက ဆေးဖော်စပ်နည်း မရှိဘဲ အလုပ်လုပ်မည် မဟုတ်သည့်အတွက် ဆေးဝါးပညာရှင်များက ထိုဦးတည်ချက်ကို ပို၍ အလေးထားသင့်သည်။

ထို့နောက် သူမက ဆေးပြင်းမီးဖိုသည် အိပ်မက်လောကအတွင်း လုပ်ဆောင်ချက်အသစ်တစ်ခု ဖြစ်လာမည်ဖြစ်ကာ အဂ္ဂိရတ်ပညာဟု ခေါ်ဆိုလိမ့်မည်။ မည်သူမဆို ဆေးလုံးဖော်စပ်ဖို့ တန်ကြေးပေးနိုင်သော်လည်း ယခင်ကဲ့သို့ အိပ်မက်ဒင်္ဂါးပြား အသုံးပြုခြင်းနှင့်မတူဘဲ ဤလုပ်ဆောင်ချက်တွင် တကယ့်ပေးချေမှုကို လိုအပ်ပေသည်။

အထူးသဖြင့် လေလွင့်ကျင့်ကြံသူနှင့် အားနည်းသည့် အင်အားစုများမှ ဆေးဝါးပညာရှင် မဟုတ်သည့်သူများက စိတ်လှုပ်ရှားဆုံး ဖြစ်၏။ ယခုမှစ၍ သူတို့သည် ပစ္စည်းနှင့် ပိုက်ဆံ ရှိနေသရွေ့ သူတို့အတွက် ဆေးလုံးဖော်စပ်ပေးမည့် ဆေးဝါးပညာရှင်ကို ရှာဖွေဖို့ စိတ်ပူစရာ မလိုတော့ပေ။

ဆေးဝါးပညာရှင်များကလည်း သူတို့၏ ဒေါသနှင့် အမုန်းတရားကို ဖုံးကွယ်ထားခြင်း မရှိပေ။ ဤသို့သော ဖွံ့ဖြိုးတိုးတက်မှုအသစ်က သူတို့၏ အတတ်ပညာကို ပစ်မှတ်ထားနေခြင်း ဖြစ်၏။ သို့သော်လည်း ယန်းလီလင်းက သူတို့၏ တုံ့ပြန်မှုကို ဂရုမစိုက်ဘဲ ဆက်ပြောလိုက်သည်။

နောက်ထပ် သူမ ထုတ်လွှတ်သည့် သတင်းက ကမ္ဘာကြီးကို တုန်လှုပ်သွားစေဆဲ ဖြစ်၏။ ထိုအရာက အင်မော်တယ်သင်္ကေတ ဖန်တီးမှု ဖြစ်သည်။ ယခုမှစ၍ ဧကရာဇ်တစ်ပိုင်းအဆင့်ထက်တွင် အင်မော်တယ်အဆင့် ဆေးဝါးပညာရှင် ရှိလာလိမ့်မည်။

ထုံရို့ပင်းက သူမ၏ အင်မော်တယ်သင်္ကေတစနစ်ကို ဖုံးကွယ်ထားခြင်း မရှိဘဲ လူအများဆီ အခြေခံကို ထုတ်ပြခဲ့သည်။ သူမက ထာဝရဦးသျှောင်များကို သူတို့၏ ဆုံးရှုံးသွားသော အင်မော်တယ်ချီများကို အလျင်အမြန် ပြန်ကောင်းစေနိုင်ဖို့ ကူညီပေးနိုင်သည့် ချီပြန်လည်ဖြည့်တင်းရေး ဆေးလုံးဟုခေါ်သည့် အင်မော်တယ်အဆင့် ဆေးလုံး ဖန်တီးသည့် လုပ်ဆောင်ချက်ကို အိပ်မက်လောကအတွင်း မှတ်တမ်းတင်ထားခဲ့သည်။

ဆေးဝါးလောကက တုန်လှုပ်သွားပြီး လူများစွာက ထိုမှတ်တမ်းသည် အတုအယောင် ဖြစ်ကြောင်း ယုံကြည်ကြ၏။ ထိုအရာသည် အိပ်မက်လောကမှ [အိမ်] လုပ်ဆောင်ချက်ဖြင့် ဖန်တီးထားခြင်းသာ ဖြစ်ရမည်။ ကံဆိုးစွာဖြင့် တာအိုအခွင့်အလမ်းဂိုဏ်းဆီ ဆင်းသက်လာသည့် ခရမ်းရောင်ကုသိုလ်က သူတို့ကို အမှန်ဖြစ်ကြောင်း ပြသခဲ့သည်။

ဤနှစ်များစွာတိုင် ဆေးဝါးပညာရှင်များက ကန့်သတ်ချက်ကို ချိုးဖောက်ကာ အင်မော်တယ်အဆင့် ဆေးလုံးကို ဖန်တီးလိုကြသည်။

ပျောက်ဆုံးသွားသည့် မှတ်တမ်းများအရ တချို့သော ပါရမီထူးကဲသည့် ဆေးဝါးပညာရှင်များက အောင်မြင်ကြလေသည်။ ထိုအရာများသည် ဗလာခေတ်ကာလမတိုင်ခင်က ပုံမှန်တွေ့နေကြအရာများသာ ဖြစ်၏။ သို့သော်လည်း ယန်းလီလင်း မတိုင်ခင်အထိ မည်သူကမှ အစားထိုးစနစ်ကို မဖန်တီးနိုင်ခဲ့ကြပေ။

ဤပြပွဲပြီးသည့်နောက် သိပ်မကြာခင် ဆေးဝါးပညာရှင်များ၏ အထက်ပိုင်းက အလိုအလျောက် ဆေးပြင်းမီးဖိုအကြောင်း မေ့လျော့သွားကြ၏။ သူတို့က သူတို့၏ အချိန်နှင့် အားစိုက်ထုတ်မှုအားလုံးကို အင်မော်တယ်အဆင့်ဆေးလုံးဖော်စပ်ဖို့သာ မြှုပ်နှံထားကြသည်။

ယန်းလီလင်းက အင်မော်တယ်အဆင့် ဆေးဝါးပညာရှင်ဖြစ်လာဖို့ လိုအပ်ချက်က အင်မတန် မြင့်မားကြောင်း သတိပေးခဲ့သော်လည်း ထိုသူများက အိပ်မက်လောကကြောင့် ယုံကြည်ချက်ရှိနေကြသည်။

သူတို့က အင်မော်တယ်အဆင့် သရုပ်ဖော်လှုံ့ဆော်မှုအတွက် တန်ကြေးပေးချေရမည် ဖြစ်သော်လည်း ဆေးဝါးပညာရှင်အများစုက ချမ်းသာကြပြီး နောက်ခံပြုထားသည့် အားကောင်းသော အင်အားစုများ ရှိတတ်ကြသည်။ ထို့ကြောင့် သူတို့က အကြိမ်သန်းချီ လေ့ကျင့်ဖို့အတွက် တန်ကြေးကို ပေးချေနိုင်လေ၏။

သူတို့၏ ပါရမီက လိုက်မမှီလျှင်ပင် အလုပ်ကြိုးစားကာ အကန့်အသတ်မဲ့ အရင်းအမြစ်များဖြင့် လေ့ကျင့်ရင်း အင်မော်တယ်အဆင့် ဆေးဝါးပညာရှင် ဖြစ်လာလိမ့်မည်ဟု ယုံကြည်ထားကြသည်။

အကယ်၍ သူတို့သာ အောင်မြင်ပါက ရလဒ်သည် ချမ်းသာကြွယ်ဝမှုနှင့် ဂုဏ်သတင်းများဖြင့် ရိုးရှင်းမည် မဟုတ်ပေ။ မှန်ကန်သည့် ဆေးလုံးဖြင့် သူတို့၏ သက်တမ်းကို သေမျိုးကန့်သတ်ချက်အထိ ဆွဲဆန့်နိုင်လိမ့်မည်။

သူတို့၏ အင်အားက မြင့်မားသည့် နေရာတစ်ခုသို့ ရောက်ရှိသွားပြီး အရေးသာချက်များစွာ ရှိလာမည်ဖြစ်၏။

ဆေးဝါးလောကက သိသိသာသာ ပြောင်းလဲမှုကို ကြုံတွေ့နေစဉ် တာအိုအခွင့်အလမ်းဂိုဏ်းက နောက်ထပ်ပြပွဲတစ်ခု ကျင်းပခဲ့သည်။ သူတို့က မပြီးမြောက်သေးသည့် စီမံကိန်းနှစ်ခုကို ထုတ်ဖော်ခဲ့၏။ အလိုအလျောက် လက်နက်သန့်စင်ရေး ဆေးပြင်းမီးဖိုနှင့် အကြွင်းမဲ့အစီအရင် ဖန်တီးခြင်းတို့ ဖြစ်သည်။

အဂ္ဂိရတ်ပညာရှင် ခေတ်ကာလ အဆုံးသတ်တော့မည် ဖြစ်သည့်အချက်ကြောင့် ပျော်ရွှင်မြူးထူးနေကြသည့် တခြားသော ကျွမ်းကျင်အတတ်ပညာရှင်များက ထိုကြေညာချက်ကို ကြားပြီးသည့်နောက်တွင် တုန်လှုပ်သွားကြ၏။

ကံကောင်းစွာဖြင့် ထိုစီမံကိန်းက မပြီးဆုံးသေးသည့်အတွက် ဖွံ့ဖြိုးတိုးတက်ဖို့ရာ အချိန်ရသေးသည်။

ယခု သူတို့က ဝေခွဲမရဖြစ်နေကြသည်။ သူတို့က ဤစီမံကိန်းအတွင်း ပါဝင်ဆင်နွှဲပြီး ကုသိုလ်ကို ရယူကာ သမိုင်းကြောင်းတွင် သူတို့၏ နာမည်ကို ချန်ထားခဲ့ရမည်လား သို့မဟုတ် ဘယ်တော့မှ မပြီးမြောက်ဖို့ရာအတွက် ဆုတောင်းရမည်လား။

ထိုလူများက ချမ်းသာကြွယ်ဝမှုနှင့် ဂုဏ်သတင်း၏ ဆွဲဆောင်မှုကို တောင့်မခံနိုင်ကြပေ။ ပါရမီထူးကဲကာ အောင်မြင်မှုများစွာ ရထားသည့် အစီအရင်ဆရာသခင်များနှင့် လက်နက်သန့်စင်သူများက ထိုစီမံကိန်းအတွက် ဝင်ရောက်ခွင့်တောင်းဆိုခဲ့ကြသည်။ အစစ်ဆေးခံပြီးသည့်နောက်တွင် တာအိုအခွင့်အလမ်းဂိုဏ်းက အကောင်းဆုံးသူများကို ရွေးချယ်ခဲ့၏။

…………………………………………

ကောင်းကင်ခုံရုံး

“ အာဏာက ဆွဲဆောင်မှုရှိတယ်ဆိုတာ ပြောကြတာအမှန်ပဲ ထင်တယ်။ အစ်ကိုကြီးကို မတွေ့ရတာ ခဏပဲရှိသေးတယ်။ ပိုပြီးတော့ ခန့်ညားလာတယ်” ယန်းလီလင်းက ပြုံးကာ ပြောလိုက်သည်။

“ငါလည်း အဲ့လိုပဲ တွေးမိတယ်။ လတ်တလော ငါ့ကိုယ်ငါ မှန်ထဲကြည့်တာကို မရပ်နိုင်တော့ဘူးလေ” ဝမ်ဝေ့က သူမကို ဖက်ကာ ပြောလိုက်သည်။ ထို့နောက် သူတို့က မျက်နှာချင်းဆိုင် ဝင်ထိုင်ကာ အဖန်ရည် သောက်သုံးလိုက်ကြ၏။

“ပြပွဲက ဘယ်လိုလဲ။ စိတ်လှုပ်ရှားနေလား”

“အဲ့လိုတော့ မဟုတ်ပါဘူး။ အနည်းဆုံးတော့ အဲဒီလူတွေက ကျွန်မကို မသတ်ချင်သေးဘူးလေ” ယန်းလီလင်းက ပြောလိုက်သည်။

“ဒီတုံ့ပြန်မှုကို မျှော်လင့်ထားပေမဲ့ ဒီလောက်ထိ ဖြစ်လာလိမ့်မယ်လို့တော့ ထင်မထားခဲ့မိဘူး။ ကံကောင်းတာက သူတို့ရဲ့ စိတ်ဝင်စားမှုကို အင်မော်တယ်သင်္ကေတစနစ်ဆီ ကူးပြောင်းလိုက်နိုင်တယ်။ မဟုတ်ရင်တော့ ဒီထုတ်ဖော်မှုကနေ တန်ပြန်သက်ရောက်မှုက ပိုပြီးတော့ ဆိုးရွားနိုင်တယ်”

“ဘယ်နယ်ပယ်ပဲဖြစ်ဖြစ် တိုးတက်မှုဆိုတာက ငြိမ်းငြိမ်းချမ်းချမ်း ပြီးမြောက်တာ ရှားတယ်လေ” ဝမ်ဝေ့က ပြောလိုက်သည်။

“အလိုအလျောက် ဆေးပြင်းမီးဖိုက ကမ္ဘာရဲ့အနာဂတ်ပဲ။ အဲဒါက အရင်းအမြစ်တွေ ခွဲဝေပုံ၊ သာမန်ကျင့်ကြံသူတွေ မြင့်တက်လာမဲ့လမ်းစဉ်နဲ့ ငါတို့တိုက်ခိုက်နေတဲ့ အနာဂတ်အပေါ် သက်ရောက်မှု ရှိလာလိမ့်မယ်”

“အဲဒီအတွေးသာ ကမ္ဘာပေါ်မှာ ပေါ်ထွက်လာတာနဲ့ အဲဒီလူတွေက ဖွံ့ဖြိုးတိုးတက်မှုကို တားဆီးဖို့ဆိုတာ ဖြစ်နိုင်မှာမဟုတ်ဘူး”

“အမှန်ပဲ။ တကယ်လို့ အစ်ကိုကြီးရဲ့ စွမ်းအားနဲ့ ထောက်ပံ့မှုကြောင့်သာ သူတို့က နှစ်ထောင်ချီ နှောင့်နှေးထားနိုင်ခဲ့တာ”

ဝမ်ဝေ့က ထိုစကားကို သဘောတူလေသည်။ ထိုအရာက မည်မျှပင် ရှည်ကြာစေကာမူ ကျင့်ကြံရေးလောကက များများစားစား ပြောင်းလဲခြင်း မရှိပေ။ ပထမဦးစွာ ထိုမူမမှန်မှုက ထူးဆန်းလှ၏။ သို့သော် အကျိုးအကြောင်းသင့်သင့် စဉ်းစားကြည့်ပါက နားလည်၍ ရပေသည်။

လူတချို့ကသာ သူတို့ဘဝ၌ ဆက်တိုက် အပြောင်းအလဲကို လက်ခံနိုင်ကြသည်။ ထို့ကြောင့် နှစ်ပေါင်းများစွာ နေထိုင်လာသည့် အင်မော်တယ်သက်ရှိများရှိသည့် ကျင့်ကြံရေးလောကတွင် လူများစွာက ကမ္ဘာကို အလွယ်တကူ ပြောင်းလဲခွင့်မပြုသည်မှာ အဓိပ္ပာယ်ရှိ၏။ သူတို့၏ အာဏာကို ထိန်းသိမ်းထားဖို့ သို့မဟုတ် ရင်းနှီးသည့် ခံစားချက်ကြောင့် အပြောင်းအလဲများက သူတို့အတွက် ကိစ္စကောင်း မဟုတ်ခဲ့ပေ။ ထို့ကြောင့် အများစုက အဆင့်အတန်းကို ထိန်းသိမ်းဖို့ ကြိုးစားဖို့ရာ အချိန်များစွာ အားစိုက်ထုတ်ထားခြင်းဖြစ်၏။

“အဲဒါဆို နောက်အစီအစဉ်က ဘယ်လိုလဲ” ဝမ်ဝေ့က ပြောလိုက်သည်။

“ဂိုဏ်းကို တခြားကျွမ်းကျင်အတတ်ပညာအတွက် အင်မော်တယ်စနစ် ဖန်တီးမှုကို ကူညီပေးရမယ်” ယန်းလီလင်းက ပြောလိုက်သည်။ သူမ၏ အင်မော်တယ်သင်္ကေတများက ဆေးလုံးဖော်စပ်ဖို့အတွက်သာ သီးသန့်ဖန်တီးထားခြင်း ဖြစ်သည့်အတွက် ထပ်မံမွမ်းမံခြင်းဖြင့် တခြားသော ကျွမ်းကျင်အတတ်ပညာများကို ကူညီဖို့ရာအတွက် ပြောင်းလဲနိုင်သည်။

“အဲဒီနောက်ရော”

“အဲဒီနောက်ကျရင်တော့ ကျွန်မ အဆုံးမဲ့လေဟာနယ်ရဲ့ ကောင်းကင်ရွေးချယ်ခံတွေနဲ့ ယှဉ်ပြိုင်ဖို့ ပြင်ဆင်ရမယ်”

သူမ၏ ရည်ရွယ်ချက်က လူငယ်ဆေးဝါးပညာရှင် အဆင့်ဇယားတွင် နံပါတ်တစ်ဖြစ်ပြီး ဒိုင်မေးရှင်းအနိမ့်ရှိ ဆေးဝါးပညာရှင်များအနက် ထိပ်သီးဆယ်ယောက်အတွင်း ပါဝင်ဖို့ ဖြစ်သည်။ ထိုအဆင့်ဇယားနှစ်ခုမှ ကံကောင်းမှုနှင့် ကြမ္မာတို့ဖြင့် သူမသည် တာအိုသက်သေပြပြီးသည့်နောက်တွင် ပြဿနာများစွာ ရှိမည် မဟုတ်ပေ။

“အကြံကောင်းတယ်။ ငါ အဲဒီကျွမ်းကျင်အတတ်ပညာရှင်တွေအတွက် အဆင့်ဇယားကို မဖွင့်သေးခင် ဒိုင်မေးရှင်းအနိမ့်ရဲ့ နာမည်ကျော်ဆေးဝါးဧကရာဇ်တွေရဲ့ အမှတ်အသားကို စုဆောင်းပြီး ပြန်လည်ဖန်တီးပေးမယ်။ မင်း အဲဒီကနေ သင်ယူလိုက်ပေါ့”

ယန်းလီလင်းက ထိုစကားကို ကြားကာ အကြည့်များ တောက်ပလာမိသည်။ အကယ်၍ သူမသာ ဆေးဝါးဧကရာဇ်များစွာ၏ ဆေးလုံဖော်စပ်ပုံကို ကြည့်ရှုပြီး ဟောပြောပို့ချချက်ကို နားထောင်ရပါက သူမ၏ ဆေးပညာတာအိုသည် မယုံနိုင်လောက်ဖွယ် အနေအထားတစ်ခုသို့ ရောက်ရှိလာပြီး ထိုအဆင့်ဇယားနှစ်ခုတွင် လွှမ်းမိုးဖို့ အခွင့်အရေး ရလာလိမ့်မည်။

သူမက ကံကြမ္မာကို ထိန်းချုပ်နိုင်သည့် အစ်ကိုကြီးတစ်ယောက် ရှိသည်က မည်မျှ ထူးဆန်းဖို့ကောင်းကြောင်း တွေးကာ ပြုံးလိုက်မိ၏။ သူ လုပ်နိုင်သည့်အရာများနှင့် သူမကို ပေးနိုင်သည့် အရေးသာချက်များက အံ့ဩဖို့ကောင်းလှပြီ ဖြစ်၏။

နှစ်ဦးသားက စကားစမြည်ပြောရင်း ရက်အနည်းငယ် အချိန်ကုန်ဆုံးပြီးနောက် သူတို့၏ အလုပ်ရှုပ်လှသည့် အချိန်ဇယားကို ပြန်လည်လုပ်ဆောင်လိုက်ကြသည်။