အခန်း (၅၁၉)

ဓားရှည်သည် နဂါးကြေးခွံအလွှာများကဲ့သို့ ချီစွမ်းအင်အလင်းဖြင့် တောက်ပနေသည်။

ဓားအလင်းထဲတွင် အဆုံးမရှိသော အေးစက်နေသည့်ဓားဆန္ဒ ပါဝင်နေသည်။

ငါးထပ်စံအိမ်နှင့် သုံးထပ်စံအိမ်သည် တစ်ခုနှင့်တစ်ခု ယှဉ်ပြိုင်ပြီး တူညီသောဓားတာအိုစွမ်းအားကို ထုတ်လွှတ်လိုက်သည်။

အစိမ်းရောင်ဝတ်စုံနှင့် သက်လတ်ပိုင်းအရွယ်လူကြီးက ဟန်မူယဲ့၏နောက်တွင်ရှိသော သုံးထပ်စံအိမ်ကို အံ့အားသင့်နေသောမျက်နှာထားဖြင့် ကြည့်သည်။

“မင်းက စမ်းသပ်ချက်ရဲ့အမွေအနှစ်ကို ရထားတာပဲ”

“မင်းက အမွေအနှစ်ကို ဒီအဆင့်ထိကျင့်ကြံထားနိုင်တဲ့အတွက် ဓားစံအိမ်ရဲ့တပည့်တစ်ယောက်အဖြစ် အဆင့်မီတယ်”

သူက နှာမှုတ်လိုက်ပြီး လက်မြှောက်သည်။ ဓားစံအိမ်ထဲမှထွက်ပေါ်လာသော ဓားရှည်သည် ဓားမြစ်တစ်စင်းအဖြစ်ပြောင်းလဲသွားပြီး ဟန်မူယဲ့ကို တိုက်ခိုက်သည်။

“ကောင်းတယ်”

ဟန်မူယဲ့က ကျယ်လောင်စွာရယ်သည်။ သူက ဓားနည်းစနစ်ကို ထုတ်ဖော်ပြီး ဓားစံအိမ်၏ဓားဆန္ဒကို အသက်သွင်းသည်။ နဂါးဓားရှည်သည် လက်သည်းများကိုဆန့်ထုတ်၍ အမြီးရှည်ကိုလှုပ်ရှားပြီး ဓားမြစ်တစ်စင်းအဖြစ် ပြောင်းလဲသွားသည်။

သက်လတ်ပိုင်းအရွယ်လူကြီးက ပြုံးသည်။ သူက အံ့အားသင့်သွားရသည်။

သူ၏ ဓားမြစ်သည် ပြိုင်ဘက်၏ နဂါးဓားကို လွယ်ကူစွာဖိနှိပ်နိုင်လိမ့်မည်ဟု ထင်ထားခဲ့သည်။ သို့သော် နဂါးသည် သူ၏ဓားမြစ်ထဲ၌ သွက်လက်စွာကူးခပ်လာသည်။

ဟန်မူယဲ့၏ဓားစံအိမ်သည် စမ်းသပ်ချက်၏ တပည့်အဆင့်သာရှိပြီး အလွန်သာမန်ဆန်သည်။ ဓားရှည်၏အရည်အသွေးကလည်း အလွန်နိမ့်ကျသည်။ နဂါးဓားအလင်းက ဓားမြစ်ထဲတွင် မည်သို့ကူးခပ်နိုင်သနည်း။

သက်လတ်ပိုင်းအရွယ်လူကြီး၏မျက်လုံးများက အေးစက်သွားပြီး သူ့ရှေ့တွင် ဓားအလင်းများ စုစည်းလာသည်။ သူက လက်မြှောက်ပြီး ဓားအလင်းကို ဆုပ်ကိုင်လိုက်သည်။

အစိမ်းရောင်ဓားရှည်၏အလင်းများသည် သုံးပေအထိ တောက်ပနေသည်။

သူက တစ်ချက်လှုပ်ရှားလိုက်ပြီး ဟန်မူယဲ့၏ရှေ့ ဆယ်ပေအကွာသို့ ရောက်လာသည်။

သူက တုံ့ဆိုင်းခြင်းမရှိဘဲ ခုတ်ချလိုက်သည်။

လျင်မြန်သည်။

ရိုးရှင်းသောဓားအလင်းတစ်ခု ကျဆင်းလာသည်။

ဟန်မူယဲ့က ဓားအလင်းကို မရှောင်နိုင်လျှင် နှစ်ပိုင်းပြတ်သွားလိမ့်မည်။

ဓားတာအို၏အားသာချက်သည် ခွန်အားနှင့် လျင်မြန်မှုဖြစ်သည်။

သက်လတ်ပိုင်းအရွယ်လူကြီးက အရင်ဆုံးတိုက်ခိုက်လိုက်သည်။ ဆယ်ပေအတွင်း၌ ဟန်မူယဲ့က ရှောင်တိမ်းရန် မဖြစ်နိုင်ပေ။

အထက်ဘုံသုံးပါး၏ အားကောင်းသောအမွေအနှစ်တစ်ခု ဖြစ်သင့်သည်။ တစ်ဖက်လူသည် ဓားတစ်ချက်ဖြင့် အာကာသကို ထိုးခွဲနိုင်သည်။

သူ၏ခွန်အားထက် ဓားတွင်ရှိနေသော ဓားဆန္ဒသည် ဓားမာန်ဟုန်တစ်ခုအဖြစ် စုစည်းထားသောကြောင့် ဖြစ်သည်။

နှလုံးသားထဲတွင် ဓားရှိနေသောကြောင့် ထိုဓားသည် လောက၊ နေနှင့်လကို ခုတ်ပိုင်းပစ်နိုင်သည်။ ဓားဆွဲထုတ်လိုက်သောအခါတွင် တောင်နှင့်မြစ်များ ပျက်စီးသွားရမည်။

ထိုဓားချက်သည် ဟန်မူယဲ့မြင်ဖူးသော ဓားကျင့်ကြံသူ ၉၉%ကို ကျော်ဖြတ်သွားသည်။ ဓားဘုရင်ယွမ်ထျန်းနှင့် လူတချို့သာ ယှဉ်ပြိုင်နိုင်သည်။

ဓားအလင်းကျဆင်းလာသောအခါတွင် ဟန်မူယဲ့က မရှောင်ခဲ့ပေ။

သူက ဓားတာအိုကို ကျင့်ကြံခဲ့သောအချိန်မှစ၍ ပြိုင်ဘက်၏ဓားချက်များကို မရှောင်ဘူးပေ။

လောကတွင် သူကြောက်ရမည့်လူ မရှိပေ။

သူ့လက်ထဲတွင် ဓားအလင်းများ စုစည်းလာသည်။ သူက လက်မြှောက်ပြီး ရှေ့သို့ညွှန်ပြလိုက်သည်။

ဓားတစ်ချက်ကြောင့် သောင်းချီသောကြယ်များ ပျက်စီးသွားသည်။

ကောင်းကင်စက်ဝန်းဓားဝင်္ကပါနည်းစနစ်၏ ကြယ်အမှတ် ....

ကြယ်အလင်းတစ်စသည် ဓားနှင့်ဝင်တိုက်လိုက်ပြီး အလင်းစက်ကွင်းတစ်ခုကို ဖြစ်ပေါ်လာစေသည်။

ထိုကြယ်အလင်းပြိုကွဲမသွားခင် ဒုတိယမြောက်ကြယ်က ဓားအလင်းကို တားဆီးလိုက်သည်။

ဓားချက်ကြောင့် ကြယ်အလင်းပျက်စီးသွားသည်။

တတိယကြယ် ....

စတုတ္ထကြယ် ....

သက်လတ်ပိုင်းအရွယ်လူကြီးက မျက်မှောင်ကြုတ်သည်။

သို့သော် သူက ရပ်တန့်ရန် ရည်ရွယ်ချက်မရှိပေ။ သူ့လက်ထဲတွင်ရှိသောဓားအလင်းသည် ပိုမိုသန်မာလာသည်။

ဓားကျင့်ကြံသူတစ်ယောက်အနေဖြင့် သူက ဓားကို အသုံးပြုလိုက်သောအချိန်တွင် နောင်တမရှိပေ။

ဟန်မူယဲ့၏ကြယ်အလင်းသည် ဓားအလင်းနှင့် ပေါင်းစပ်သွားသည်။

တောက်ပနေသောကြယ်အလင်းသည် ဓား၏ရှေ့တွင် စကြဝဠာတစ်ခုကဲ့သို့ ပေါက်ကွဲသွားသည်။

ဓားချက်က ဟန်မူယဲ့နှင့် သုံးပေအကွာတွင် ရပ်တန့်သွားသည်။

ဟန်မူယဲ့က ပြုံးလိုက်ပြီး ကျိုးပဲ့သွားသောဓားသွားကို လှမ်းကိုင်သည်။

ချက်ချင်းဆိုသလိုပင် ဓားဆန္ဒတစ်ခု ဝင်ရောက်သွားသည်။

ဓား၏နာမည်သည် မှိန်ဖျော့လမင်းဖြစ်ပြီး အင်မော်တယ်ရင်းမြစ်ကမ္ဘာ၏ အလယ်ဘုံသုံးပါးမှ ကောင်းမွန်ဓားဂိုဏ်းတွင် တည်ရှိခဲ့သည်။

ထိုဓားသည် ဓမ္မရတနာတစ်ဝက်အဆင့်ဖြစ်ပြီး အသိစိတ်အချို့ ပိုင်ဆိုင်ထားသည်။

သူနှင့်တိုက်ခိုက်နေသော ဓားကျင့်ကြံသူ၏နာမည်သည် ကျောက်ယွီဖြစ်သည်။ သူက အလယ်ဘုံသုံးပါး၏ ဓားစံအိမ်ဆက်ခံသူများထဲမှ တစ်ယောက်ဖြစ်သည်။

ဟန်မူယဲ့က အင်မော်တယ်ရင်းမြစ်ကမ္ဘာ၏ ဓားတစ်လက်ကို အမြဲ လိုချင်နေခဲ့သည်။ ထိုမှသာ သူက ဓား၏မှတ်ဉာဏ်များကိုကြည့်ပြီး အင်မော်တယ်ရင်းမြစ်ကမ္ဘာကို နားလည်နိုင်မည်။

ယခုအချိန်တွင် သူက ကျောက်ယွီ၏ဓားကျိုးမှတစ်ဆင့် သူမြင်ချင်သောကမ္ဘာကို မြင်လိုက်ရသည်။

အင်မော်တယ်ရင်းမြစ်ကမ္ဘာ ....

အင်မော်တယ်နှင့် နတ်ဘုရားများသည် အထက်ဘုံသုံးပါးတွင် နေထိုင်ကြပြီး အင်မော်တယ်နှင့် လူသားများက အလယ်ဘုံသုံးပါးတွင် နေထိုင်သည်။ အောက်သုံဘုံးပါးတွင် သာမန်လူသားများ နေထိုင်ကြသည်။

အထက်ဘုံသုံးပါး၏အင်အားစုများသည် အောက်ဘုံနှင့်အလယ်ဘုံများမှ အရင်းအမြစ်ကို လုယူရန်အတွက် မရေမတွက်နိုင်လောက်သောတပည့်များကို စေလွှတ်လေ့ရှိသည်။

ကျောက်ယွီက အလယ်ဘုံသုံးပါးမှ ဓားစံအိမ်အကြီးအကဲတစ်ယောက်ဖြစ်ပြီး ဝိညာဉ်ကိုယ်ခွဲ အဌမအဆင့်တွင် ရှိနေသည်။

သူက ဓားစံအိမ်၏အကူအညီဖြင့် အာကာသထဲတွင် သောင်းကျန်းရဲသည်။ ဝိညာဉ်ဖွဲ့စည်းခြင်းအဆင့်ကျင့်ကြံသူကိုပင် မကြောက်ပေ။

ဓားကျင့်ကြံသူများ၏လောကတွင် သန်မာသောရန်သူနှင့် ရင်ဆိုင်ရမှ ကိုယ်ပိုင်အစစ်အမှန်စွမ်းအားကို ထုတ်ဖော်နိုင်မည်။

ယခင်က ဟန်မူယဲ့သည် ပြင်ပမှတ်ဉာဏ်များကို မှီခို၍ အင်မော်တယ်ရင်းမြစ်ကမ္ဘာကို လေ့လာခဲ့ရသည်။ ထိုကမ္ဘာသည် ကျင့်ကြံသူများ၏ နောက်ဆုံးရည်မှန်းချက်ဖြစ်သော လှပသည့်နေရာတစ်ခု၊ တော်ဝင်နယ်မြေတစ်ခုဟု ယူဆခဲ့သည်။

ယခု မှိန်ဖျော့လမင်း၏ ဓားမှတ်ဉာဏ်များအရ အင်မော်တယ်ရင်းမြစ်ကမ္ဘာသည် တခြားကျင့်ကြံခြင်းကမ္ဘာများထက် ပိုမိုရက်စက်သောကမ္ဘာတစ်ခုဖြစ်ကြောင်း နားလည်လိုက်ရသည်။

အဓိကဂိုဏ်းများသည် အရာအားလုံးကို ဖျက်ဆီးနိုင်သည်။ အထက်ဘုံသုံးပါးသည် တခြားကျင့်ကြံခြင်းလောကများအားလုံးကို အပြည့်အဝ ထိန်းချုပ်ထားသည်။

ထိုကမ္ဘာမျိုးတွင် အားနည်းသောလူသည် အောက်ကျို့နေရုံသာ တတ်နိုင်သည်။

သဘာဝစွမ်းအင်နှင့် သဘာဝရတနာများ မည်သို့ပင် ပေါများနေပါစေ ရှင်သန်နိုင်ရန် အခွင့်အလမ်းမရှိပေ။ အဆုံးတွင် ထာဝရရှင်သန်နိုင်မည် မဟုတ်ပေ။

ကျင့်ကြံဆင့်မြင့်မားလာသောအခါတွင် တိုးတက်ရန်လမ်းကြောင်းနှင့် အရင်းအမြစ်များကို အဓိကဂိုဏ်းကြီးများက တားဆီးထားလိမ့်မည်။

ဟန်မူယဲ့က မှတ်ဉာဏ်များကိုကြည့်လိုက်ပြီး အနည်းငယ် မျက်နှာထားပြောင်းလဲသွားသည်။

ဓားစံအိမ်သည် အထက်ဘုံသုံးပါး၏ အဓိကဂိုဏ်းတစ်ဂိုဏ်း ဖြစ်သည်။ ဓားစံအိမ်၏ နာမည်အပြည့်အစုံသည် အဆုံးမရှိခမ်းနားသော ဓားတာအိုကောင်းကင်စံအိမ်ဖြစ်ပြီး အတိုချုံးအနေဖြင့် ကောင်းကင်စံအိမ်ဟု သိကြသည်။

ဓားစံအိမ်၏အမွေအနှစ်သည် ဆက်တိုက်လက်ဆင့်ကမ်းပေးပြီး ‌ရွေးချယ်မှုများအပေါ်တွင် မူတည်နေသည်။

အောက်ဘုံသုံးပါး၊ အလယ်ဘုံသုံးပါးနှင့် တခြားကမ္ဘာများတွင် ဓားစံအိမ်၏အမွေအနှစ် ရှိနေသည်။

ဓားစံအိမ်၏ အဆင့်အနိမ့်ဆုံးအမွေအနှစ်သည် ဟန်မူယဲ့၏လက်ထဲတွင်ရှိသော သုံးထပ်စံအိမ် ဖြစ်သည်။

အမွေဆက်ခံသူတပည့်တစ်ယောက်က သုံးထပ်စံအိမ်ကိုရရှိပြီး ဆက်တိုက်ကျင့်ကြံသွားလျှင် အောက်ဘုံသုံးပါးသို့ဝင်ရောက်ရန် အခွင့်အရေးရလိမ့်မည်။

အောက်ဘုံတွင်တာဝန်ကျနေသော ဓားစံအိမ်၏အကြီးအကဲများသည် စမ်းသပ်မှုတစ်ခု စီစဉ်ပေးလိမ့်မည်။ ထိုစမ်းသပ်မှုကို ကျော်ဖြတ်နိုင်လျှင် တရားဝင်တပည့်တစ်ဦး ဖြစ်လာမည်။ ထို့နောက် တာဝန်များဆောင်ရွက်၍ လေးထပ်စံအိမ်အဖြစ်ပြောင်းလဲရန် ဓားရှည်များ စုဆောင်းရမည်။

လေးထပ်စံအိမ်ကို တည်ဆောင်နိုင်လျှင် အဆင်ပြေသွားမည်။

ငါးထပ်စံအိမ်အမွေအနှစ်သည် အလယ်ဘုံသုံးပါးတွင် ရှိနေသည်။

ငါးထပ်စံအိမ်၏ အထပ်တိုင်းတွင် အဆုံးမရှိသောထူးခြားဆန်းကြယ်မှုများနှင့် ပြည့်နေသည်။

ငါးထပ်စံအိမ်၏အထက်တွင် အထက်ဘုံသုံးပါး၏အမွေအနှစ်များ ရှိသည်။

အထက်ဘုံသုံးပါးသို့ဝင်ရောက်ပြီး ဓားစံအိမ်၏ လက်ရွေးစင်တပည့်တစ်ယောက်ဖြစ်လာလျှင် ငါးထပ်စံအိမ်အားကျော်လွန်နေသော အမွေအနှစ်ကို ကျင့်ကြံခွင့်ရှိမည်။

အထက်ဘုံသုံးပါး၏တပည့်များသည် ကိုးထပ်စံအိမ်ကို ထိန်းချုပ်ကြသည်ဟု ပြောသည်။

ဟန်မူယဲ့က မှတ်ဉာဏ်များကို စစ်ဆေးနေသောအချိန်တွင် ကျောက်ယွီက သူ့ကို ကြည့်နေသည်။

စမ်းသပ်ခံတပည့်တစ်ဦးသည် သူ့ဓားရှည်ကို ဖြတ်တောက်နိုင်သည်။

ဟန်မူယဲ့၏တိုက်ခိုက်နိုင်စွမ်းနှင့် ကျင့်ကြံဆင့်အရ အလယ်ဘုံသုံးပါးသို့ဝင်ရောက်ပြီး တရားဝင်တပည့်တစ်ယောက် ဖြစ်လာနိုင်သည်။

“ငါက အင်မော်တယ်ရင်းမြစ်ကမ္ဘာရဲ့ စတုတ္ထထပ်က ကောင်းကင်စံအိမ်ရဲ့ တရားဝင်တပည့်တစ်ယောက်ဖြစ်တဲ့ ‌ကျောက်ယွီပါ”

အင်မော်တယ်ရင်းမြစ်ကမ္ဘာ၏ ဘုံကိုးပါးတွင် ကိုယ်ပိုင်နာမည်များရှိသည်။ သို့သော် လူအများစုက ကိုးထပ်မြောက်ဘုံကို အမြင့်ဆုံးဟုသတ်မှတ်ပြီး ပထမဘုံကို အနိမ့်ဆုံးဟု သတ်မှတ်သည်။

အင်မော်တယ်ရင်းမြစ်ကမ္ဘာ၏ စတုတ္ထထပ်သည် အလယ်ဘုံသုံးပါး၏ ပထမထပ်ဖြစ်သည်။

“အင်မော်တယ်ရင်းမြစ်ကမ္ဘာရဲ့အပြင်ဘက်မှာ ကျင့်ကြံနေတဲ့ စမ်းသပ်ခံတပည့် ဟန်မူယဲ့ပါ”

ဟန်မူယဲ့က လက်နှစ်ဖက်ကိုဆုပ်ကိုင်၍ ပြောလိုက်သည်။

သူက မှိန်ဖျော့လမင်းဓားကို လွှတ်ပေးလိုက်သည်။ ဓားက ကျောက်ယွီဆီသို့ ပြန်သွားသည်။

ကျောက်ယွီက လက်ကိုဝှေ့ယမ်းလိုက်ပြီး ဓားကိုသိမ်းသည်။ သူက ပြုံးသည်။

ကျောက်ယွီက သူ့ကိုစမ်းသပ်ရန်အတွက် အဓိကထား၍တိုက်ခိုက်ခဲ့ကြောင်း ဟန်မူယဲ့က နားလည်ထားသည်။

ဝိညာဉ်ကိုယ်ခွဲအဆင့်ကျင့်ကြံသူတွင် ဓမ္မရတနာများ သေချာပေါက် ရှိနေလိမ့်မည်။

ဓမ္မရတနာနှင့် တိုက်ခိုက်ခဲ့လျှင် ဟန်မူယဲ့က မတားဆီးနိုင်ဘဲ နတ်ဘုရားသားရဲပါ့ရှား၏စွမ်းအားကို မှီခိုရလိမ့်မည်။

တစ်ဖက်တွင် ကျောက်ယွီက သေဆုံးသည်အထိတိုက်ခိုက်ရန် ရည်ရွယ်ချက်မရှိပေ။

ဟန်မူယဲ့၏ဓားတာအိုကျင့်ကြံခြင်းကို သူက အသိအမှတ်ပြုလိုက်သည်။

ဟန်မူယဲ့၏စကားကို ကြားလိုက်ရသောအခါတွင် ကျောက်ယွီက ရယ်လိုက်ပြီး ခေါင်းညိတ်သည်။ သူက မိုင်တစ်ရာအကွာသို့ ပြန်သွားပြီး လက်ကို‌ဝှေ့ယမ်းလိုက်သည်။

ဓားအလင်းမြစ်သည် ငါးထပ်ဓားစံအိမ်ထဲသို့ ပြန်ဝင်သွားသည်။

ဟန်မူယဲ့ကလည်း နဂါးဓားအလင်းကို ဓားစံအိမ်ထဲသို့ ပြန်သိမ်းသည်။

“ဂိုဏ်းတူညီလေးဟန်”

ကျောက်ယွီက လက်နှစ်ဖက်ကို နောက်ပစ်ထားပြီး ခပ်မိုက်မိုက်ပုံစံဖြင့် ပြောလိုက်သည်။

“ငါတို့က ကမ္ဘာတွေမတူညီပေမဲ့ ကောင်းကင်စံအိမ်ရဲ့ တပည့်တွေပဲ။ ငါတို့ကို ဂိုဏ်းတူညီအစ်ကိုတွေအဖြစ် သတ်မှတ်နိုင်တယ်”

‘ဒါက အသိအမှတ်ပြုတာလား’

တစ်ဖက်လူက သူ့ခွန်အားကို အသိအမှတ်ပြုခဲ့သောကြောင့် ဂိုဏ်းတူညီအစ်ကိုအဖြစ် လက်ခံလိုက်ခြင်းဖြစ်သည်။ ထိုသို့မဟုတ်လျှင် ဂိုဏ်းတူညီအစ်ကို၏ရှေ့တွင် ဖြောင့်မတ်သောအကြောင်းပြချက်များ ရှိနေလိမ့်မည်။

“ဟန်မူယဲ့က ဂိုဏ်းတူအစ်ကိုကျောက်ယွီကို နှုတ်ဆက်ပါတယ်”

ဟန်မူယဲ့က အခြေအနေကို အခွင့်ကောင်းယူလိုက်ပြီး လက်နှစ်ဖက်ကိုဆုပ်ကိုင်၍ နှုတ်ဆက်သည်။

“ဂိုဏ်းတူညီလေးက ယဉ်ကျေးနေဖို့မလိုပါဘူး။ အင်မော်တယ်ရင်းမြစ်ကမ္ဘာရဲ့အပြင်ဘက်မှာ ငါတို့က တစ်ယောက်ကိုတစ်ယောက် ကူညီပေးသင့်တယ်”

ကျောက်ယွီက ပြုံးလိုက်ပြီး ခေါင်းညိတ်သည်။

....

စုဝေကမ္ဘာတွင်ရှိသောဂိုဏ်းများက ကောင်းကင်ကို စိုးရိမ်စွာ ကြည့်နေကြသည်။

ဓားစံအိမ်၏အကြီးအကဲဟန်သည် ပျံသန်းသွားပြီး အားကောင်းသောရန်သူနှင့် တိုက်ခိုက်နေသည်။ မျက်စိကျိန်းလောက်သောဓားအလင်းသည် ကောင်းကင်ကို အလင်းပေးခဲ့သည်။

အကြီးအကဲဟန်ကြောင့်သာမဟုတ်လျှင် စုဝေကမ္ဘာသည် ထိုဓားချက်ကို မခုခံနိုင်လောက်ပေ။

ဓားအလင်းကြောင့်ဖြစ်ပေါ်လာသော အာကာသလေပြင်းများသည် စုဝေကမ္ဘာ၏အတားအဆီးကို လှုပ်ခါသွားစေသည်။

ကံကောင်းစွာဖြင့် ထိုတိုက်ပွဲသည် သိပ်မကြာခဲ့ပေ။ နေ့တစ်ဝက်အကြာတွင် ဟန်မူယဲ့က နတ်ဘုရားသားရဲနှင့် အရှေ့ပင်လယ်သို့ ပြန်ရောက်လာသည်။ သူ့နောက်တွင် အစိမ်းရောင်ဝတ်စုံနှင့်ဓားကျင့်ကြံသူတစ်ဦး ပါလာသည်။

အင်မော်တယ်ရင်းမြစ်ကမ္ဘာ၏ ဘုံကိုးပါးမှ မဟာဓားကျင့်ကြံသူတစ်ဦး ဖြစ်သည်။

ထိုဓားကျင့်ကြံသူသည် အကြီးအကဲဟန်၏ ဂိုဏ်းတူအစ်ကိုဖြစ်သည်။

အံ့အားသင့်စရာတစ်ခုပင်ဖြစ်သည်။

စုဝေကမ္ဘာ၏ကျင့်ကြံသူများသည် သူတို့အတွက် ပွဲတစ်ပွဲ ကျင်းပပေးခဲ့သည်။