အခန်း (၅၂၀)

ကျောက်ယွီက စုဝေကမ္ဘာမှကျင့်ကြံသူတစ်ဦး၏ အကူအညီတောင်းခံမှုကြောင့် မိုင်ပေါင်းမရေမတွက်နိုင်သောအကွာအဝေးမှ ရောက်လာခဲ့သည်ဟု ပြောသည်။

ကံကောင်းစွာဖြင့် စုဝေကမ္ဘာကိုတိုက်ခိုက်နေသော သန္ဓေပြောင်းသားရဲနှင့် မိစ္ဆာသားရဲများ ဆုတ်ခွာသွားခဲ့သည်။

ကျွမ်းကျင်သူများက တစ်ယောက်ကိုတစ်ယောက်ကြည့်လိုက်ပြီး လျင်မြန်စွာကျေးဇူးတင်လိုက်သည်။ ထို့နောက် စုဝေကမ္ဘာ၏ရတနာများကို ထုတ်ပေးသည်။

သူက သူတို့ကို ကယ်တင်ရန်အတွက် ရောက်လာသောကြောင့် အနည်းဆုံး ကျေးဇူးတင်ကြောင်း ပြသင့်သည်။

ကြိုဆိုပွဲအပြီးတွင် ဟန်မူယဲ့နှင့်ကျောက်ယွီက အချိန်ကြာမြင့်စွာ သီးသန့်စကားပြောခဲ့သည်။

ကျောက်ယွီက အင်မော်တယ်ရင်းမြစ်ကမ္ဘာ၏ အပြင်ဘက်တွင် နှစ်ပေါင်းနှစ်ထောင်နီးပါး နေထိုင်ခဲ့သောကြောင့် အာကာသပတ်ဝန်းကျင်နှင့် ရင်းနှီးနေသည်။

အာကာသထဲတွင် စွမ်းအားများ ရှုပ်ထွေးနေသောကြောင့် အားကောင်းပြီးထူးဆန်းသည့် သားရဲနှင့်မိစ္ဆာများ ရှိနေသည်။ ထိုအချက်ကို ပြောင်းလဲရန်မဖြစ်နိုင်ပေ။

အင်မော်တယ်ရင်းမြစ်ကမ္ဘာသည် အာကာသထဲတွင် တိုက်ခိုက်ရန်အတွက် နှစ်တစ်‌သောင်းကြာလျှင်တစ်ကြိမ် တာဝန်ပေးလေ့ရှိသည်။

လွန်ခဲ့သောနှစ်တစ်သောင်းခန့်တွင် နောက်ဆုံးအကြိမ်အဖြစ် တာဝန်ထုတ်ပေးခဲ့သည်။

အင်မော်တယ်ရင်းမြစ်ကမ္ဘာက အာကာသထဲတွင် တိုက်ခိုက်လာလျှင် ထူးဆန်းသော သားရဲနှင့်မိစ္ဆာများက နေရာအနှံ့သို့ ထွက်ပြေးလိမ့်မည်။ ထို့ကြောင့် တခြားကျင့်ကြံခြင်းကမ္ဘာများတွင် ဖရိုဖရဲဖြစ်လာသည်။

ထိုဖြစ်ရပ်သည် ကောင်းကင်အံ့ဖွယ်ကမ္ဘာကို တိုက်ခိုက်ခဲ့သော ထူးဆန်းသည့် သားရဲများ၏တိုက်ပွဲနှင့် တိုက်ဆိုင်နေသည်။

ဟန်မူယဲ့က ကျောက်ယွီနှင့်စကားပြောလိုက်ပြီး ဓားစံအိမ်၏အမွေအနှစ်ကို ပိုမိုနားလည်လာသည်။

ထိုအရာသည် ကောင်းကင်စွမ်းအားဖြစ်သည်။

အထက်ဘုံသုံးပါးသို့ဝင်ရောက်နိုင်သော ဓားစံအိမ်၏အမွေဆက်ခံသူများသည် လောကတွင် အသန်မာဆုံးပုဂ္ဂိုလ်များ ဖြစ်ကြသည်။

ဓားအင်မော်တယ် ....

ဓားတာအိုကျင့်ကြံခြင်းသည် ချီစွမ်းအင်များ အင်မော်တယ်ချီအဖြစ် ပြောင်းလဲသွားခြင်းထက် ပိုမိုသာလွန်သည်။

“ငါတို့ အလယ်ဘုံသုံးပါးမှာ အများဆုံးသုံးတဲ့ ထိပ်တန်းအဆင့်ဝိညာဉ်ကျောက်တုံးတွေကို လူတိုင်းလိုချင်ကြတယ်”

“ဒါပေမဲ့ အထက်ဘုံသုံးပါးက ထိပ်တန်းအဆင့်ဝိညာဉ်ကျောက်တုံးတွေကို လုံးဝစိတ်မဝင်စားဘူး”

“အထက်ဘုံသုံးပါးက အင်မော်တယ်ဝိညာဉ်ကျောက်တုံးတွေကို အသုံးပြုကြတယ်”

“အင်မော်တယ်စွမ်းအင်အချို့ပါနေတဲ့ ဝိညာဉ်ကျောက်တုံးပဲ”

“အထက်ဘုံသုံးပါးကို လူတိုင်းဝင်‌ရောင်ချင်ပေမဲ့ ဘယ်သူမှမရောက်နိုင်ကြဘူး ....”

ကျောက်ယွီက အကူအညီမဲ့စွာ ပြောသည်။

အင်မော်တယ်ရင်းမြစ်ကမ္ဘာ၏ ကျင့်ကြံသူများသည် အထက်ဘုံသုံးပါးတွင်ကျင့်ကြံနိုင်ရန် မျှော်လင့်ကြသည်။

သို့သော် လူတစ်သန်းတွင် လူတစ်ယောက်ပင် ထိုအခွင့်အရေးမျိုးကို မရနိုင်ပေ။

သူတို့နှစ်ယောက်က အင်မော်တယ်ရင်းမြစ်ကမ္ဘာအပြင် ဓားတာအိုဉာဏ်အလင်းများကိုလည်း ဆွေးနွေးခဲ့သည်။

သူတို့က ဓားအချို့ထုတ်ယူပြီး လဲလှယ်ခဲ့သည်။

ကျောက်ယွီ၏ဓားများသည် ဟန်မူယဲ့၏ဓားများထက် အဆင့်ပိုမြင့်ပြီး အရေအတွက်လည်း ပိုများသည်။

ဟန်မူယဲ့က ဓားအမြုတေ ၃၆၁လုံးကို အသုံးပြုပြီး ကျောက်ယွီဆီမှ အဆင့်မြင့်ဝိညာဉ်လက်နက် ဓားသုံးသောင်းနှင့် လဲလှယ်ခဲ့သည်။

ထိုအလဲအလှယ်တွင် ဟန်မူယဲ့က အကျိုးအမြတ်ရခဲ့သည်။

သို့သော် ကျောက်ယွီ၏နောက်ကွယ်တွင် အင်အားစုကြီးတစ်ခုရှိသည်။ ထို့ကြောင့် သူက ဝိညာဉ်လက်နက်ဓားသုံးသောင်းကို စိတ်ထဲတွင်ထည့်မထားပေ။ ထို့အပြင် သူက ဓားဆန္ဒကိုအားဖြည့်ပေးနိုင်သော ဟန်မူယဲ့၏ဓားအမြုတေများကို စိတ်ဝင်စားနေသည်။

ကျောက်ယွီက စုဝေကမ္ဘာတွင် ရက်တစ်ရာနေခဲ့ပြီး မကြာခဏဆိုသလိုပင် ဟန်မူယဲ့နှင့် ဓားရေးဖလှယ်ခဲ့သည်။

သူရှိနေသောအချိန်တွင် တိုက်ခိုက်ရန်ရောက်လာသည့် သန္ဓေပြောင်းသားရဲနှင့် မိစ္ဆာသားရဲများကို ဖိနှိပ်ပေးခဲ့သည်။

ကျောက်ယွီက ထွက်မသွားခင် ဓားအမြုတေများကို ဓမ္မရတနာဖြင့်လဲလှယ်ရန် ကတိပေးသွားခဲ့သည်။

အင်မော်တယ်ရင်းမြစ်ကမ္ဘာမှ ဓားကျင့်ကြံသူကြီးဖြစ်သော ကျောက်ယွီ၏အကူအညီဖြင့် ဟန်မူယဲ့က ရက်တစ်ရာအတွင်း၌ အကျိုးအမြတ်များ ရခဲ့သည်။

ဓားတာအိုနားလည်မှုကလည်း ပိုမိုလေးနက်လာသည်။

သူက ကျောက်ယွီနှင့် ဓားများလဲလှယ်ခဲ့သောကြောင့် ဓားတာအိုအမွေအနှစ်များ ပိုရလာသည်။

ကျောက်ယွီထွက်သွားသောအခါတွင် ဟန်မူယဲ့၏ကျင့်ကြံခြင်းက ရွှေအမြုတေပဥ္စမအဆင့်သို့ ရောက်သွားခဲ့သည်။ သူ့ဒန်ထျန်ထဲတွင်ရှိသော ဓားတာအိုရွှေအမြုတေသည် ရွှေအလင်းငါးခုဖြင့် တောက်ပနေသည်။

သူက ယခုအချိန်တွင် ဝိညာဉ်စွမ်းအားကိုခွဲထုတ်၍ အလုပ်များ ပြိုင်တူလုပ်နိုင်သည်။

နတ်ဘုရားသားရဲပါ့ရှား၏ခန္ဓာကိုယ်ကို သန့်စင်ရာတွင်လည်း တိုးတက်မှုများ ရှိလာခဲ့သည်။

စုဝေကမ္ဘာ၏အရှေ့ပင်လယ်တွင်ပုန်းအောင်းနေသော ပါ့ရှား၏ခန္ဓာကိုယ်သည် မိုင်ရှစ်ဆယ်အထိ ကျုံ့ဝင်သွားခဲ့သည်။

ကျောက်ယွီနှင့်ဟန်မူယဲ့က ဓားကျင့်ကြံသူကြီးတစ်ဦး၏နေရာကို ရှာဖွေရန် သဘောတူခဲ့သည်။

ထိုဓားကျင့်ကြံသူကြီး၏ ဝိညာဉ်မီးအိမ်သည် လွန်ခဲ့သောနှစ်တစ်သောင်းတွင် ငြိမ်းသက်သွားခဲ့သည်။ ကျင့်ကြံသူများအားလုံးက သူနှင့်ပတ်သတ်၍ သတင်းများ ရှာဖွေနေခဲ့သည်။

ကျောက်ယွီက လွန်ခဲ့သောနှစ်အနည်းငယ်ခန့်တွင် သတင်းအချို့ရခဲ့ပြီး စစ်ဆေးကြည့်ရန် ပြင်ဆင်နေသည်။ သူက ဟန်မူယဲ့နှင့် တွေ့လိုက်ရသောကြောင့် ပူးပေါင်း၍ စစ်ဆေးကြည့်နိုင်သည်။

ကျဆုံးသွားခဲ့သော ဓားကျင့်ကြံသူကြီး၏ လျှို့ဝှက်နယ်မြေတွင် ဓမ္မရတနာများအပါအဝင် ရတနာအများအပြားရှိသည်ဟု ပြောကြသည်။ သူ့အမွေအနှစ်ကလည်း အလွန်အားကောင်းသည်။

ကျောက်ယွီအတွက် နောက်ခံမရှိသောဟန်မူယဲ့သည် ပူးပေါင်းရန်အတွက် အကောင်းဆုံးရွေးချယ်မှုဖြစ်သည်။

ထိုကိစ္စကို နှစ်တစ်ရာအကြာတွင် ဆောင်ရွက်မည်ဖြစ်သည်။

နှစ်တစ်ရာအတွင်း၌ ကောင်းကင့်အဆင့်သို့ရောက်ရန် လွယ်ကူလွန်းသည်။

ကျောက်ယွီထွက်သွားသောအခါတွင် ဟန်မူယဲ့က စုဝေကမ္ဘာတွင် ဆက်လက်ကျင့်ကြံနေခဲ့သည်။

စုဝေကမ္ဘာ၏အရင်းအမြစ်နှင့် အမွေအနှစ်နည်းစနစ်များကို ဟန်မူယဲ့က လိုအပ်သည်။

အာကာသထဲတွင် ပါ့ရှားနှင့် လှည့်ပတ်သွားလာနေခြင်းထက် စုဝေကမ္ဘာတွင် ခဏတာကျင့်ကြံနေလိုက်လျှင် ပိုကောင်းသည်။

....

ကောင်းကင်အံ့ဖွယ်ကမ္ဘာမှ နန်းမြို့တော်၏ လကြည့်မြို့တွင် အာခီမီကံကြမ္မာစံအိမ်၏ ခြံဝိုင်းအတွင်း၌ ဟန်မူယဲ့က မျက်လုံးဖွင့်လိုက်သည်။ သူ့နောက်တွင်ရှိသော ပါ့ရှား၏ပုံရိပ်သည် ပျောက်ကွယ်သွားသည်။

သူက ခြံဝိုင်းထဲမှ ထွက်လာသောအခါတွင် မူဝမ်ကို မမြင်ရပေ။

ကျောက်စိမ်းရှားစောင်းပန်းစာပေဆွေးနွေးပွဲ အဆုံးသတ်ပြီး ဆယ်လကြာသွားခဲ့သည်။

ထိုအချိန်အတွင်း၌ မူဝမ်က အာခီမီကံကြမ္မာစံအိမ်နှင့် ပိုင်လီရှင်းလင်၏မိသားစုတွင် ကူးသန်းနေခဲ့သည်။

မူဝမ်၏ကြိုးစားအားထုတ်မှုနှင့် ပါရမီသည် ပိုမိုထင်ပေါ်လာသည်။ သူမ၏ အာခီမီတိုးတက်မှုကလည်း ပိုမိုလျင်မြန်လာသည်။

ပိုင်လီရှင်းလင်၏ပြောစကားအရ မူဝမ်သည် အာခီမီဆရာသခင်အဆင့်နှင့် သိပ်မဝေးတော့ပေ။

သူမက ပိုင်လီရှင်းလင်နှင့်အတူ ကျောက်စိမ်းသက်တံကမ္ဘာသို့လိုက်သွားပြီး ကျင့်ကြံနိုင်မည်ဆိုလျှင် သူမ၏ အာခီမီကျင့်ကြံခြင်းသည် အကန့်အသတ်မဲ့နေလိမ့်မည်။

ဟန်မူယဲ့က ဆေးဆိုင်ထဲသို့ ဝင်လာသောအခါတွင် ဇူအော်ယုထင်က ပြေးလာပြီး တီးတိုးပြောလိုက်သည်။

ဟန်မူယဲ့က ခေါင်းညိတ်သည်။

သူက တောင်ပိုင်းကုန်းမြေသွားရည်စာဆိုင်သို့ သွားလိုက်ပြီး ‘ဆိုင်ပိတ်သည်’ဟူသော စာသားကို မြင်လိုက်ရသည်။

စွေ့စွေ့က မီးဖွားတော့မည်ဖြစ်သည်။ ဆိုင်ကို လဝက်ခန့်ကြာသည်အထိ ပိတ်ထားခဲ့သည်။

အဝေးတစ်နေရာတွင် ဇူအော်လင်းက မြင်းလှည်းမောင်းလာသည်။ ရှောက်တထျန်းက မြင်းလှည်းပေါ်မှခုန်ချလိုက်ပြီး ခပ်သွက်သွက်ပြေးလာသည်။

ဟန်မူယဲ့ကို မြင်လိုက်ရသောအခါတွင် သူက ပြုံးလိုက်ပြီး သခင်‌လေးဟုခေါ်၍ ဆိုင်ထဲသို့ ဝင်သွားသည်။

ခဏအကြာတွင် သူက သနားစရာကောင်းသောပုံစံဖြင့် ပြန်ထွက်လာသည်။

စွေ့စွေ့က မီးဖွားတော့မည်ဖြစ်ပြီး မူဝမ်နှင့် လက်သည်နှစ်ယောက်က အထဲတွင် ရှိနေသည်။

“ဒီနေ့တိုက်ပွဲက ဘယ်လိုလဲ” ရှောက်တထျန်း၏ ဖူးယောင်နေသောမျက်နှာထားကို မြင်လိုက်ရ‌သောအခါတွင် ဟန်မူယဲ့က ခပ်ဟဟရယ်လိုက်ပြီး မေးသည်။

တောင်ပိုင်းကုန်းမြေသွားရည်စာဆိုင်၏ဝင်ငွေသည် စွေ့စွေ့ကိုထောက်ပံ့ရန် မလုံလောက်ပေ။ ရှောက်တထျန်းက ဟန်မူယဲ့တို့ကို အကူအညီမတောင်းဘဲ ပေါင်မင်ချန်ကို သွားရှာခဲ့သည်။

သူက ယခုအချိန်တွင် ကင်းလှည့်တပ်ဖွဲ့၏ လေ့ကျင့်ရေးမှူးတစ်ယောက်ဖြစ်သည်။

သို့သော် လေ့ကျင့်ရေးမှူးထက် တိုက်ခိုက်ဖော်တစ်ယောက်ဖြစ်သည်။

တိကျစွာပြောရလျှင် ပစ်မှတ်တစ်ခု ဖြစ်သည်။

ရှောက်တထျန်းက အရပ်ရှည်ပြီး အခြေခံအုတ်မြစ်သွေးမျိုးဆက်ကို ပိုင်ဆိုင်ထားသော်လည်း တိုက်ခိုက်ရေးနည်းစနစ်များကို မလေ့ကျင့်ခဲ့ပေ။

ကင်းလှည့်တပ်ဖွဲ့တွင် သူက စစ်သားအသစ်များကို နေ့စဉ် လေ့ကျင့်ပေးသည်။

ကံကောင်းစွာဖြင့် သူက အကြမ်းခံပြီး ပေါင်မင်ချန်၏ထောက်ပံ့မှုကို ရထား‌သောကြောင့် အပြင်းအထန် မထိခိုက်ခဲ့ပေ။

ထိုအလုပ်သည် ရုပ်ပိုင်းဆိုင်ရာနာကျင်မှုများကို ခံစားရသော်လည်း ဝင်ငွေကောင်းသည်။

သူက တိုက်ပွဲတစ်ပွဲ တိုက်ခိုက်လျှင် ဝိညာဉ်ကျောက်တုံး နှစ်တုံး သို့မဟုတ် သုံးတုံး ရလိမ့်မည်။ တစ်နေ့လျှင် ပွဲနှစ်ဆယ်၊ သုံးဆယ်ခန့် တိုက်ခိုက်ပြီး ဆေးကုသစရိတ်နှင့် ပေါင်းလိုက်လျှင် ဝိညာဉ်ကျောက်တုံးတစ်ရာကျော် ရနိုင်သည်။

ရှောက်တထျန်းက ဝိညာဉ်ကျောက်တုံးအများအပြား ရနိုင်သောကြောင့် ပျော်ရွှင်နေသည်။

စွေ့စွေ့က ရင်နာနေသော်လည်း အလုပ်နားရန် မပြောနိုင်ခဲ့ပေ။

ရှောက်တထျန်းက ဝိညာဉ်ကျောက်တုံးများရလာသောအခါတွင် အာခီမီကံကြမ္မာစံအိမ်သို့ပြေးလာပြီး ဆေးလုံးသန့်စင်ပေးရန် မူဝမ်ကို တောင်းဆိုလေ့ရှိသည်။

သူက တစ်နေ့လျှင် ဝိညာဉ်ကျောက်တုံးတစ်သောင်း ရနိုင်မည်ဆိုလျှင်ပင် စွေ့စွေ့၏ကိုယ်ဝန်ကို ကာကွယ်ရန်အတွက် မူဝမ်အသုံးပြုထားသောဝိညာဉ်ဆေးပင်များနှင့် မယှဉ်နိုင်ပေ။

မူဝမ်က လူသားနှင့်မိစ္ဆာများ၏ သွေးမျိုးဆက်ပေါင်းစပ်မှုနှင့်ပတ်သတ်၍ ပိုမိုနားလည်လာသည်။ ပိုင်လီရှင်းလင်ကပင် သူမကိုကူညီပြီး အာခီမီဌာန၏စာကြည့်တိုက်တွင် စာအုပ်များရှာပေးခဲ့သည်။ တခြားအာခီမီကျင့်ကြံသူများနှင့်လည်း ဆွေးနွေးခဲ့သည်။

သူမက ဝိညာဉ်ဆေးပင်အများအပြားကို တွက်ချက်ပြီး ဆေးလုံးများသန့်စင်၍ စွေ့စွေ့ကို ပေးခဲ့သည်။

စွေ့စွေ့က သာမန်လူသားတစ်ယောက်ဖြစ်သောကြောင့် တိမ်တိုက်ဆေးလုံးများအဖြစ် သန့်စင်ရသည်။

လွန်ခဲ့သောခြောက်လတွင် စွေ့စွေ့က အကျိုးအမြတ်များ ရခဲ့သည်။

သူမက သန္ဓေသား၏အာဟာရစုပ်ယူမှုကို မခံစားရတော့ဘဲ အသားဖြူပြီး ပြည့်တင်းလာသည်။

ဟန်မူယဲ့၏အကူအညီနှင့် မူဝမ်သန့်စင်ထားသောဆေးလုံးများသည် သွေးမျိုးဆက်ပေါင်းစပ်ရန်အတွက် အလွန်အသုံးဝင်သည်။

ထိုဆေးလုံးများ၏ဆေးညွှန်းကို မှတ်တမ်းများထဲတွင် ထည့်သွင်းထားခဲ့သည်။

နန်းမြို့တော်၏ အဆင့်မြင့်အာခီမီပညာရှင်များကြားတွင် မူဝမ်က နာမည်ကြီးနေသည်။

အထူးသဖြင့် တောင်ပိုင်းကုန်းမြေ၏မိစ္ဆာများက‌ ရွှေ့ပြောင်းလာပြီး လူသားများနှင့်အတူ ငြိမ်းချမ်းစွာယှဉ်တွဲနေထိုင်သောကြောင့် ဖြစ်သည်။

မူဝမ်ဖော်ထုတ်ထားသောဆေးလုံးများသည် နည်းဗျူဟာအရ အရေးပါသည်။

မီးတောက်နီစစ်တပ်၏ အဆင့်မြင့်ပုဂ္ဂိုလ်များနှင့် တိုင်းပြည်၏ အမတ်များက ထိုဆေးလုံးများကို အများအပြားထုတ်လုပ်ရန် မေးခဲ့သည်။

သို့သော် မူဝမ်က သွေးမျိုးဆက်စွမ်းအားနှင့်ပတ်သတ်၍ လုံလောက်သောသုတေသနများကို မပြုလုပ်ရသေးသောကြောင့် ငြင်းဆိုခဲ့သည်။ သူမက ပိုမိုသင့်တော်သောဆေးညွှန်းကို ဆက်လက်ဖော်ထုတ်ရမည်။

သူမဖော်ထုတ်ခဲ့သော ဆေးလုံးများသည် တစ်လုံးလျှင် ဝိညာဉ်ကျောက်တုံးသိန်းချီ၍ တန်ဖိုးရှိသည်။ ကိုယ်ဝန်ရှိနေသောအချိန်တွင် တစ်လလျှင် ဆေးလုံးသုံးလုံး စားသုံးရမည်။ ထိုဆေးလုံးမျိုးကို အများအပြားထုတ်လုပ်ရန် မဖြစ်နိုင်ပေ။

တောင်ပိုင်းကုန်းမြေသွားရည်စာဆိုင်၏အပေါက်ဝတွင် ရှောက်တထျန်းက စိုးရိမ်စွာစောင့်ဆိုင်းနေခဲ့သည်။

သူက လက်နှစ်ဖက်ကိုပွတ်သပ်ပြီး နှလုံးသားထဲတွင်ရှိသော စိတ်လှုပ်ရှားမှုများကို အကောင်းဆုံးကြိုးစား၍ ဖိနှိပ်နေသည်။

“သခင်လေး၊ စွေ့စွေ့က အဆင်ပြေပါ့မလား”

“ဘာလို့အရမ်းကြာနေတာလဲ။ စွေ့စွေ့ရဲ့ခန္ဓာကိုယ်က တောင့်ခံနိုင်ပါ့မလား”

“သခင်လေး၊ သခင်မလေးက ကျွန်တော့်ကို ကတိပေးထားတယ်။ သူမက စွေ့စွေ့ကို သေချာပေါက်ကာကွယ်ပေးမယ်တဲ့ ....”

ရှောက်တထျန်းက ထိတ်လန့်စွာရေရွတ်နေပြီး ဟန်မူယဲ့အပြင် သူ့ကိုယ်သူလည်း ပြန်ပြောနေပုံရသည်။

ကံကောင်းစွာဖြင့် ခဏအကြာတွင် ဆိုင်ထဲမှ ကျယ်လောင်သောငိုသံကို ကြားလိုက်ရသည်။

ဘဝအသစ် မွေးဖွားလာသည်။

လက်သည်တစ်ယောက်ထွက်လာပြီး ကလေးနှင့်မိခင်က အခြေအနေကောင်းမွန်ကြောင်း ပြောပြခဲ့သည်။ ကလေးသည် ယောင်္ကျားလေးဖြစ်သည်။

မူဝမ်က ပင်ပန်းနေသောမျက်နှာထားဖြင့် အထဲမှထွက်လာသည်။ ရှောက်တထျန်းက သူမကို ဆက်တိုက် အရိုအသေ‌ပေးခဲ့သည်။

မူဝမ်က လက်ကိုဝှေ့ယမ်းပြီး စွေ့စွေ့နှင့်ကလေးကို သွားကြည့်ရန် ပြောလိုက်သည်။

ထို့နောက် သူမက ဟန်မူယဲ့ကို မြင်လိုက်ရသည်။

သူတို့နှစ်ယောက်က စကားမပြောပေ။ တစ်ယောက်နှင့်တစ်ယောက် နီးကပ်သွားပြီး လက်တွဲ၍ ကောင်းကင်တွင်ရှိနေသောနေမင်းကို ကြည့်လိုက်သည်။