အခန်း (၅၃၃)

လုကျန်းရှန်းက စကားပြောပြီးသွားသောအခါတွင် သိုလှောင်အိတ်တစ်လုံးကို ထုတ်ပေးသည်။

တခြားလူများ၏လက်ထဲတွင် ဓားအလင်းများ ပေါ်လာသည်။

ထိုဓားများအားလုံးသည် အဆင့်မြင့်ဝိညာဉ်လက်နက်များဖြစ်ကြသည်။

ဓားနှစ်လက်တွင် အသိစိတ်များရှိနေသည်။ ဟန်မူယဲ့က စစ်ဆေးကြည့်လိုက်ပြီး ထိုဓားနှစ်လက်ကို မကြာခဏအသုံးပြုပေးလျှင် မှော်ရတနာများအဖြစ် ပြောင်းလဲသွားမည်ဖြစ်ကြောင်း သိလိုက်ရသည်။

စုစုပေါင်း ဓား ၃၅၆လက် ရှိသည်။

ထိုဓားများကို ဓားစံအိမ်ထဲတွင် ထည့်ထားလိုက်လျှင် ဟန်မူယဲ့၏ခွန်အားက ထပ်မံတိုးတက်လာလိမ့်မည်။

ဓားစံအိမ်စွမ်းအားသည် သူ့အတွက် မရှိမဖြစ်မဟုတ်သော်လည်း ဖော်ထုတ်ရန်လိုအပ်သော လျှို့ဝှက်ချက်များ ထပ်ရှိနေနိုင်သည်။

ဓားစံအိမ်၏စွမ်းအား တိုးတက်လာလျှင် သူ့အတွက်လည်း အဆင်ပြေသည်။

ဟန်မူယဲ့က ဓားများကိုသိမ်းလိုက်ပြီး လက်မြှောက်၍ ကျောက်စိမ်းသေတ္တာတစ်လုံးကို ထုတ်ပေးသည်။

“အားလုံးပဲ ဒါက ဓားအမြုတေတစ်ရာပါ”

တစ်ရာ ....

သူတို့အားလုံးက အံ့အားသင့်ပြီး ပျော်ရွှင်သွားကြသည်။

ဓားအမြုတေတစ်ခုသည် ဝိညာဉ်ကျောက်တုံးသန်းဆယ်ချီ၍ တန်ဖိုးရှိသည်။

ဓားအမြုတေတစ်ရာသည် သူတို့ပေးလိုက်သောဓားများထက် ပိုတန်ကြေးရှိသည်။

လုကျန်းရှန်းနှင့် တခြားလူများက တစ်ယောက်ကိုတစ်ယောက် ကြည့်လိုက်ပြီး ဟန်မူယဲ့ကို ကြည့်သည်။

“မင်းတို့ပြင်ပေးရမယ့် ဓားတစ်လက်ရှိတယ်”

ဟန်မူယဲ့က သူတို့အားလုံးကိုကြည့်လိုက်ပြီး တည်ငြိမ်စွာပြောသည်။

‘ဓားတစ်လက်ပြင်ပေးရမှာလား’

‘ဘယ်လိုဓားမျိုးမလို့ အကြီးအကဲဟန်က အလေးအနက်ထားနေတာလဲ’

သူတို့အားလုံး သေချာမတွေးနိုင်ခင် ဟန်မူယဲ့က လက်မြှောက်လိုက်သည်။

“ဘုန်း”

လေထုထဲတွင် နှစ်ပိုင်းကျိုးနေသော ဧရာမဓားတစ်လက် ပေါ်လာသည်။

တောင်တန်းတာအိုဓား ....

ရှစ်ဟမ်တာအိုဂိုဏ်းက တာအိုဓားကို သန့်စင်ရန်အတွက် အစွမ်းကုန်ကြိုးစားခဲ့သည်။

ထိုဓားသည် ဂိုဏ်းတပည့်သုံးသိန်းကိုသယ်ဆောင်ပြီး အာကာသကိုဖြတ်သန်း၍ ကောင်းကင်အံ့ဖွယ်ကမ္ဘာသို့ ရောက်လာခဲ့သည်။

ဝမ်မော့ရှန်နှင့် ဓားဘုရင်ယွမ်ထျန်းတို့ မရှိခဲ့လျှင် ရှစ်ဟမ်တာအိုဂိုဏ်းက ကောင်းကင်အံ့ဖွယ်ကမ္ဘာသို့ ဝင်ရောက်ပြီး သိမ်းပိုက်နိုင်လိမ့်မည်။

ဓားပေါ်လာသောအခါတွင် စုဝေကမ္ဘာ၏ ဓားကျင့်ကြံသူများအားလုံးက ပါးစပ်အဟောင်းသားဖြစ်ပြီး မျက်လုံးပြူးနေသည်။

“တာအို .... တာအိုလက်နက်”

ပန်းပဲပညာလောကတွင် လူသားများအသုံးပြုသော သာမန်လက်နက်များနှင့် ချီစွမ်းအင်ထည့်သွင်း၍ ဝိညာဉ်ဖြင့်ထိန်းချုပ်နိုင်သော ဝိညာဉ်လက်နက်များကို လူသားအဆင့်နှင့် ကမ္ဘာမြေအဆင့်တွင်ရှိသော ကျင့်ကြံသူများ အသုံးပြုကြသည်။

သို့သော် အရင်းအမြစ်များက အကန့်အသတ်ရှိနေသည်။ ကောင်းကင်အဆင့်ကျင့်ကြံသူများပင်လျှင် အဆင့်မြင့်ဝိညာဉ်လက်နက်အချို့ကိုသာ ပိုင်ဆိုင်နိုင်သည်။ သူတို့အားလုံးတွင် မှော်ရတနာများ မရှိပေ။

လူသားလက်နက်၊ ဝိညာဉ်လက်နက်နှင့် မှော်ရတနာများသည် လူသားအဆင့်၊ ကမ္ဘာမြေအဆင့်၊ ကောင်းကင်အဆင့်တို့နှင့် တူညီသည်။

မှော်ရတနာအဆင့်ကို ဖြတ်ကျော်သွားသောလက်နက်သည် ကောင်းကင်နှင့်မြေကြီး၏ မဟာတာအိုအငွေ့အသက်ကို သယ်ဆောင်ထားသည်။ ထိုအရာသည် လောကတွင်ရှားပါးသော ဝိညာဉ်ရတနာတစ်မျိုးဖြစ်သည်။

ဝိညာဉ်ရတနာသည် သူတော်စင်တစ်ဝက်အဆင့်နှင့် တူညီသည်။

သို့သော် ထိုရတနာမျိုးသည် အင်မော်တယ်ရင်းမြစ်ကမ္ဘာတွင်သာ ပေါ်လာလေ့ရှိသည်။ တခြားနေရာများတွင် မတွေ့နိုင်ပေ။

အကယ်၍ တွေ့ခဲ့လျှင်ပင် မှတ်မိနိုင်မည်မဟုတ်ပေ။

မှော်ရတနာများသည် လူသားအဖြစ် အသွင်ပြောင်းနိုင်သည်။ ဝိညာဉ်ရတနာများက ပိုမိုအစွမ်းထက်သည်။

အင်မော်တယ်ရင်းမြစ်ကမ္ဘာတွင် ဝိညာဉ်ရတနာကို ဘိုးဘေးအဖြစ်သတ်မှတ်ပြီး အမွေအနှစ်ကို ကာကွယ်ထားသောဂိုဏ်းများ ရှိနေကြသည်ဟု ပြောသည်။

ဝိညာဉ်ရတနာများ၏အထက်တွင် သူတို့ ယခုမြင်နေရသော တာအိုလက်နက်ရှိသည်။

တာအိုလက်နက်၏တိုက်ခိုက်နိုင်စွမ်းသည် ဝိညာဉ်ရတနာထက် ပိုမိုအားကောင်းသည်။ ထို့အပြင် တာအိုလက်နက်များက ဂိုဏ်းတစ်ဂိုဏ်းလုံး၏စွမ်းအားကို စုစည်းနိုင်သော အစောင့်အကြပ်ရတနာများ ဖြစ်ကြသည်။

အင်မော်တယ်ဝိညာဉ်ကမ္ဘာတွင် အထက်ဘုံသုံးပါး၏ ဂိုဏ်းအားလုံးနီးပါးတွင် တာအိုလက်နက်များ ရှိကြသည်။

ယခု ဟန်မူယဲ့က ပျက်စီးနေသောတာအိုလက်နက်ကို ထုတ်ပေးသည်။

‘သူက အထက်ဘုံသုံးပါးရဲ့ ဂိုဏ်းကြီးတစ်ဂိုဏ်းကို ဖျက်ဆီးခဲ့တာလား’

‘မဖြစ်နိုင်ပါဘူး’

လုကျန်းရှန်းနှင့်တခြားလူများက လျင်မြန်စွာရှေ့တက်သွားပြီး စစ်ဆေးကြည့်လိုက်သည်။ ထို့နောက် စိတ်သက်သာရာရစွာ သက်ပြင်းချသည်။

ဓားသည် တာအိုလက်နက်ဖြစ်သော်လည်း အခွံလွတ်တစ်ခုသာဖြစ်သည်။

တာအိုရတနာ၏ အရေးအကြီးဆုံးလက်နက်ဝိညာဉ်သည် ယခုအချိန်အထိ ဖြစ်ပေါ်မလာသေးပေ။

လက်နက်သန့်စင်ရာတွင်ကျွမ်းကျင်သော ကျင့်ကြံသူများက ဟန်မူယဲ့ကို ထူးဆန်းစွာ ကြည့်လိုက်သည်။

‘ဘယ်ဂိုဏ်းက တာအိုလက်နက်ကိုသန့်စင်ပြီး လက်နက်ဝိညာဉ်ရလာအောင် ပျိုးထောင်ရမယ့်အစား တိုက်ပွဲမှာ သုံးလိုက်တာလဲ’

ထိုအခြေခံအဆင့်တာအိုလက်နက်ကို အသုံးပြုနိုင်သော်လည်း အဆင့်နိမ့်ဝိညာဉ်ရတနာ၏စွမ်းအားကိုသာ ထုတ်သုံးနိုင်လိမ့်မည်။

‘ဖြုန်းတီးနေတာပဲ’

သူတို့က ထိုသို့တွေးလိုက်ပြီး တက်ကြွလာကြသည်။

အကြီးအကဲဟန်၏စကားအရ ဤတာအိုလက်နက်ကို ပြုပြင်ပေးရမည်။

တာအိုလက်နက်ကို ပြုပြင်နေသောအချိန်တွင် သူတို့က စိတ်ကူးမယဉ်နိုင်လောက်သောအကျိုးအမြတ်များကို ရလိမ့်မည်။

ထိုအကျိုးအမြတ်သည် တာအိုဓားထက် ပိုမိုအဖိုးတန်သည်။

ဓားများက သေဆုံးသွားနိုင်သော်လည်း လူနှင့်အမွေအနှစ်များက ဆက်လက်ရှင်သန်နိုင်သည်။

“အကြီးအကဲဟန်က ကျွန်တော်တို့ကမ္ဘာကိုကာကွယ်ဖို့အတွက် အဝေးကနေ လာခဲ့ရတယ်။ ကျွန်တော်တို့က ဒီဓားကို အလကားပြုပြင်ပေးနိုင်ပါတယ်”

“ဒါပေမဲ့ အချိန်တော့ ယူရလိမ့်မယ်”

ရှစ်ဟမ်တာအိုဂိုဏ်းသည် ဤဓားကိုသန့်စင်ရန်အတွက် နှစ်ပေါင်းရာချီ အချိန်ယူခဲ့ပြီး ဂိုဏ်းတစ်ဂိုဏ်းလုံး၏အရင်းအမြစ်များကို သုံးစွဲခဲ့သည်။

ယခု စုဝေကမ္ဘာက ဤဓားကို ပြုပြင်လိုသည်။ လိုအပ်သောအရင်းအမြစ်များ လျော့နည်းသွားမည်ဖြစ်သော်လည်း အချိန်ကြာလိမ့်မည်။

“ကောင်းပြီ” ဟန်မူယဲ့က ခေါင်းညိတ်၍ သဘောတူလိုက်သည်။

တာအိုဓားသည် သူ့အတွက် အဖိုးတန်သော်လည်း ချက်ချင်းအသုံးပြုနိုင်သောအရာမျိုး မဟုတ်ပေ။

သူက အလျင်မလိုပေ။

လုကျန်းရှန်းနှင့်တခြားလူများက တာအိုဓားကိုယူ၍ ထွက်သွားသည်။ ဟန်မူယဲ့က ပါ့ရှား၏ကျောပေါ်တွင် တင်ပျဉ်ခွေထိုင်လိုက်သည်။ သူ့ခန္ဓာကိုယ်က ချီစွမ်းအင်အလင်းများဖြင့် တောက်ပလာသည်။

သူ့ကျင့်ကြံဆင့်က အများအပြား တိုးတက်မလာသော်လည်း စိတ်အခြေအနေနှင့် ဝိညာဉ်ကျင့်ကြံခြင်းက လျင်မြန်စွာတိုးတက်လာသည်။

ကောင်းကင်ဘုံဝိညာဉ်သူငယ်သည် ဝိညာဉ်ကိုယ်ပွားတစ်ခုကို စုစည်းပြီး အင်မော်တယ်ဝိညာဉ်အဖြစ် ပြောင်းလဲနိုင်သည်။ ဝိညာဉ်ကိုယ်ခွဲအဆင့်တွင် အင်မော်တယ်ဝိညာဉ်ကို ခွဲထုတ်ပြီး ဝိညာဉ်စုစည်းခြင်းအဆင့်အဖြစ် ပြောင်းလဲသွားလိမ့်မည်။ အင်မော်တယ်ဝိညာဉ်နှင့် ဝိညာဉ်သူငယ်သည် ပေါင်းစပ်သွားပြီး တာအိုပေါင်းစည်းခြင်းအဆင့်သို့ တက်ရောက်နိုင်ရန် ကောင်းကင်နှင့်မြေကြီး၏ မဟာတာအိုကို သုံးသပ်လိမ့်မည်။

ဟန်မူယဲ့၏ ချီစွမ်းအင်ကျင့်ကြံခြင်းသည် ကောင်းကင်အဆင့်သို့ မရောက်သေးပေ။ သူ့ဝိညာဉ်ကျင့်ကြံခြင်းက ကောင်းကင်အဆင့်သို့ ရောက်နေပြီး ထက်မြိသောဝိညာဉ်လိပ်ပြာဓားကို စုစည်းခဲ့သည်။

ထိုဓားသည် ဝိညာဉ်ဖွဲ့စည်းခြင်းအဆင့်ကျင့်ကြံသူများ၏ ကနဦးဝိညာဉ်ကို သတ်ဖြတ်နိုင်သည်။

သူက လူသားလောကတွင် နှလုံးသားကို သန့်စင်နေသောအချိန်၌ ဝိညာဉ်ကျင့်ကြံခြင်းတွင် ထပ်မံအဆင့်တက်သွားခဲ့သည်။ ယခုအချိန်တွင် သူ့ဝိညာဉ်က တာအိုပေါင်းစည်းခြင်းအဆင့်တွင်ရှိသော သူတော်စင်တစ်ဝက်အဆင့်များနှင့် ယှဉ်နိုင်သည်။

သို့သော် သူတော်စင်တစ်ဝက်အဆင့်များနှင့်မတူဘဲ ဟန်မူယဲ့က ဝိညာဉ်ကို တာအိုနယ်မြေအဖြစ် မစုစည်းခဲ့ပေ။ သူက တာအိုပေါင်းစည်းခြင်းအဆင့်၏အထက်တွင်ရှိသော ကျင့်ကြံခြင်းကို သုံးသပ်နေသည်။

ကံကြမ္မာ ....

ကံကြမ္မာကို နားလည်လျှင် သူတော်စင်တစ်ပါး ဖြစ်လာလိမ့်မည်။

လူသားအဆင့်တွင် ချီစုဆောင်းခြင်း၊ ချီစုစည်းခြင်းနှင့် အခြေခံအုတ်မြစ်အဆင့်တို့ ပါဝင်သည်။

ကမ္ဘာမြေအဆင့်တွင် မူလရင်းမြစ်သွယ်ဆက်ခြင်း၊ ဝိညာဉ်နိုးထခြင်းနှင့် ရွှေအမြုတေအဆင့်တို့ ပါဝင်သည်။

ကောင်းကင်အဆင့်တွင် ဝိညာဉ်သူငယ်၊ ဝိညာဉ်ကိုယ်ခွဲနှင့် ဝိညာဉ်ဖွဲ့စည်းခြင်းအဆင့်တို့ ပါဝင်သည်။

ကောင်းကင်အဆင့်၏အထက်တွင် အင်မော်တယ်သူတော်စင်များ ရှိသည်။

အင်မော်တယ်ဝိညာဉ်ကမ္ဘာ၏ အဆင့်သတ်မှတ်ချက်များအရ တာအိုပေါင်းစည်းခြင်း၊ ကံကြမ္မာနှင့် ပြန်လည်မွေးဖွားခြင်းအဆင့်တို့ကို လူသားအင်မော်တယ်အဆင့်ဟု ခေါ်ဆိုသည်။

ကောင်းကင်အဆင့်၏အထက်တွင် လူသားအင်မော်တယ်များရှိသည်။

ဟန်မူယဲ့က လူသားအင်မော်တယ်အဆင့်၏ ပြန်လည်မွေးဖွားခြင်းကို နားမလည်နိုင်သေးပေ။

သို့သော် သူ့စိတ်နယ်ပယ်တွင် သမာဓိစွမ်းအားသည် နတ်ဘုရားတာအို၏ ပူဇော်ခြင်းစွမ်းအားများဖြင့် ပေါင်းစပ်နေသည်။ ထို့အပြင် ဓားတာအို၏လမ်းညွှန်မှုဖြင့် သူက ယခုအချိန်တွင် ကံကြမ္မာကို သုံးသပ်နေသည်။ သူက ဓားတစ်လက်ဖြင့် ကံကြမ္မာအဆင့်ကို ထိခိုက်သွားအောင်လုပ်နိုင်သည်။

ထိုအရာသည် သူ၏ အကြီးမားဆုံးလျှို့ဝှက်ချက်ဖြစ်သည်။

ကံကြမ္မာသူတော်စင်တစ်ယောက်က သူ့ကို တိုက်ခိုက်လာမည်ဆိုလျှင်ပင် သူက ဝိညာဉ်လိပ်ပြာဓားဖြင့် ဒဏ်ရာရသွားအောင် လုပ်နိုင်သည်။

သို့သော် ဟန်မူယဲ့က သူတော်စင်တစ်ယောက်နှင့် ရင်ဆိုင်ရလျှင်ပင် ဝိညာဉ်လိပ်ပြာဓားကို လွယ်ကူစွာထုတ်သုံးမည်မဟုတ်ပေ။

သူက နတ်ဘုရားသားရဲပါ့ရှား၏ခန္ဓာကိုယ်ကို ပိုင်ဆိုင်ထားသည်။ သူက ပါ့ရှား၏စွမ်းအားကို အသက်သွင်းပြီး ကိုယ့်ကိုယ်ကိုယ် ကာကွယ်ထားလျှင် သူတော်စင်များပင်‌ ခေါင်းကိုက်သွားရမည်။

ပါ့ရှားသည် ခွန်အားနှင့် ခုခံနိုင်စွမ်းအရ ရှေးခေတ်တွင် အသန်မာဆုံးနတ်ဘုရားသားရဲတစ်ကောင် ဖြစ်သည်။

“ဘုန်း”

စုဝေကမ္ဘာ၏ အရှေ့ပင်လယ်တွင် မိုင်သုံးဆယ်ကျယ်ဝန်းသော ဧရာမခန္ဓာကိုယ်ကြီးတစ်ခု ပျံထွက်သွားသည်။

နတ်ဘုရားသားရဲပါ့ရှားက အာကာသထဲသို့ ဦးတည်နေသည်။

ဟန်မူယဲ့သည် စုဝေကမ္ဘာတွင် ထာဝရနေထိုင်မည်မဟုတ်ပေ။

လွန်ခဲ့သောလပိုင်းခန့်တွင် နတ်ဘုရားသားရဲပါ့ရှားက အာကာသထဲသို့ ထွက်သွားပြီး မိုင်သန်းချီခရီးနှင်၍ သန္ဓေပြောင်းသားရဲအများအပြားကို သတ်ဖြတ်ခဲ့သည်။ သို့သော် ယခုအချိန်တွင် ကောင်းကင်အံ့ဖွယ်ကမ္ဘာသို့ ပြန်သွားမည်ဖြစ်သည်။

ကောင်းကင်အံ့ဖွယ်ကမ္ဘာသည် အငြိုးအတေးမဲ့နယ်မြေနှင့် အင်မော်တယ်ဝိညာဉ်ကမ္ဘာတို့၏ ပူးပေါင်းတိုက်ခိုက်မှုကို ရင်ဆိုင်နေရသည်။ အမတ်ချုပ်ကြီးဝမ် ရှိနေသော်လည်း ကြိုတင်စီစဉ်ထားလျှင် ပိုကောင်းမည်ဟု ဟန်မူယဲ့က ခံစားရသည်။

နတ်ဘုရားသားရဲ၏စွမ်းအားသည် သူ့ကို အကာအကွယ်ပေးနိုင်သည်။ ထို့အပြင် အရေးကြီးသောအချိန်၌ သူက အစွမ်းကုန်ထုတ်သုံးပြီး ကောင်းကင်အံ့ဖွယ်ကမ္ဘာကို ကယ်တင်နိုင်သည်။

လုယွီကျိုး၏ပြောစကားအတိုင်း ကောင်းကင်အံ့ဖွယ်ကမ္ဘာသည် အလွန်လှပသည်။ ပျက်စီသွား၍ မဖြစ်ပေ။

....

တိတ်ဆိတ်နေသောကြယ်သေပေါ်တွင် နေထွက်ချိန်နှင့် နေဝင်ချိန်တို့ မရှိပေ။ သို့သော် မိုင်တစ်ရာပတ်လည် တာအိုနယ်မြေအတွင်း၌ ကောင်းကင်နှင့်မြေကြီးက အလင်းနှင့်အမှောင် ပြောင်းလဲသွားပြီး မဟာတာအိုကို လှုံ့ဆော်ပေးနေသည်။

အရှေ့အရပ်တွင် ခရမ်းရောင်အငွေ့အသက်များ ပေါ်ထွက်လာသောအခါတွင် အာခီမီပညာရှင်များက စုစည်းလိုက်သည်။

ထိပ်ဆုံးတွင်ရပ်နေသော လီစစ်မင်က လက်သီးဆုပ်ထားပြီး ပြုံးနေသည့်ဟန်မူယဲ့ကို ကြည့်သည်။ သူက ခေါင်းညိတ်လိုက်ပြီး ရှေ့တက်သွားသည်။

သူက အရင်ဆုံး ဦးညွှတ်လိုက်ပြီး သိချင်နေသောအာခီမီပညာရှင်များကို ကြည့်သည်။

“အကြီးအကဲနဲ့ တာအိုရောင်းရင်းတို့ ကျွန်တော်က လီစစ်မင်ပါ။ ဓားအမြုတေသန့်စင်မှုကို ကြီးကြပ်ပေးဖို့အတွက် ဆရာမူယဲ့က ကျွန်တော့်ကို တာဝန်ပေးထားပါတယ်”

သူ့စကားအဆုံးသတ်သွားသောအခါတွင် ဆူညံသံများထွက်လာသည်။ လူအများ၏မျက်နှာထားများက မည်းမှောင်နေသည်။

ဓားဆေးလုံးသန့်စင်ခြင်းသည် ကလေးကစားပွဲမဟုတ်ပေ။ လူတိုင်းက ဆေးလုံးသန့်စင်မှုကို ကြီးကြပ်နိုင်မည်မဟုတ်ပေ။

ဆူညံသံများကြားတွင် လီစစ်မင်၏အသံက မြုပ်ဝင်သွားပြီး သူက တစ်ကိုယ်လုံးတုန်ခါလာသည်။

သူက လမ်းပျောက်နေသောမျက်နှာထားဖြင့် ဟန်မူယဲ့ကို လှည့်ကြည့်လိုက်သော်လည်း ဟန်မူယဲ့က ဂရုစိုက်ပုံမရပေ။