အခန်း (၅၃၆)

အာခီမီညီလာခံတွင်ပါဝင်ခဲ့သော သိန်းချီသည့်အာခီမီပညာရှင်များသည် ကိုယ့်ကိုယ်ကိုယ်ကာကွယ်ရန်အတွက် အနည်းဆုံး ဓားဆေးလုံးတစ်လုံး၊ နှစ်လုံးခန့် ရခဲ့သည်။

သူတို့က ဓားဆေးလုံးများနှင့်ရင်းနှီးလာအောင် လေ့ကျင့်နေသောကြောင့် ကောင်းကင်ထက်တွင် ဓားချီများဖြင့် ပြည့်နေသည်။

ပိုင်လီရှင်းလင်၊ ဟန်မူယဲ့နှင့် တခြားလူများက ဘေးတွင်ရပ်နေပြီး သူတို့ကို မတားခဲ့ပေ။

“မူယဲ့၊ ဓားအမြုတေရဲ့စွမ်းအားကို တိုးမြှင့်နိုင်ဖို့ နည်းလမ်းရှိလား”

ပိုင်လီရှင်းလင်က ပြန့်ကျဲနေသောဓားအလင်းများကို ကြည့်လိုက်ပြီး တီးတိုးပြောသည်။

ဓားအလင်းသည် ခမ်းနားပုံပေါ်သော်လည်း အစီအစဉ်မကျဘဲ ဖရိုဖရဲဖြစ်နေသည်။ ကျွမ်းကျင်သူတစ်ယောက် ရောက်လာခဲ့လျှင် ထိခိုက်သွားမည်မဟုတ်ပေ။

ချင်စုယန်ကလည်း ဟန်မူယဲ့ကို ကြည့်သည်။

ဟန်မူယဲ့၏ ဓားတာအိုကျင့်ကြံခြင်းသည် သူ့ထက် သန်မာသည်။

“ဓားအမြုတေရဲ့စွမ်းအားကို တိုးမြှင့်ရမှာလား ....” ဟန်မူယဲ့က တီးတိုးရေရွတ်သည်။

ဓားအမြုတေ၏ဆေးစွမ်းအားကို တိုးမြှင့်လိုက်ခြင်းသည် အရိုးရှင်းဆုံးနည်းလမ်းဖြစ်သည်။

သူ့လက်ထဲတွင်ရှိသော ဓားအမြုတေများသည် ရိုးရှင်းသော ဓားအမြုတေများထက် အဆပေါင်းတစ်ထောင်ခန့် ပိုသန်မာသည်။

သို့သော် ထိုအရာသည် မကောင်းပေ။

ပထမဆုံးအချက်အနေဖြင့် ထိုဆေးလုံးများသည် ကုန်ကျစရိတ်များသည်။ ဆေးလုံးတစ်လုံးလျှင် ဝိညာဉ်ကျောက်တုံးများ သန်းချီ၍ ကုန်ဆုံးလိမ့်မည်။

ဒုတိယအချက်အနေဖြင့် ထိုဆေးလုံးများကို သန့်စင်ရန်အတွက် ဝိညာဉ်စွမ်းအင်အများအပြား လိုအပ်သည်။

အာခီမီညီလာခံတွင်ရှိနေသောလူများသည် ဟန်မူယဲ့ကဲ့သို့ အဆုံးမရှိသောဝိညာဉ်စွမ်းအားများကို မပိုင်ဆိုင်ပေ။

နောက်တစ်ချက်လည်း ရှိနေသေးသည်။ အကယ်၍ ဓားအမြုတေများကို သန်မာသောရန်သူများ လုယူသွားခဲ့လျှင် ပြဿနာတက်လိမ့်မည်။

ထိုသို့ဆိုလျှင် သူက ဓားအမြုတေများကို အဆင့်မြှင့်ပေးရန် မဖြစ်နိုင်ပေ။

အာခီမီပညာရှင်များကိုသာ လေ့ကျင့်ပေးရမည်။

‘အာခီမီပညာရှင်တွေက ဓားနည်းစနစ်တွေလိုလေ့ကျင့်ဖို့ ဖြစ်နိုင်ပါ့မလား’

ဟန်မူယဲ့က အာခီမီပညာရှင်များကိုကြည့်လိုက်ပြီး မျက်လုံးများတောက်ပသွားသည်။

“ကျွန်တော့်မှာ ကျင့်ကြံသူ ၃၆၁ယောက်ကို စုစည်းပေးနိုင်တဲ့ ဝင်္ကပါတစ်ခုရှိတယ်”

“ကျင့်ကြံသူအရေအတွက်ကို ဆယ်ဆ၊ အဆတစ်ရာ၊ အဆတစ်ထောင်အထိ တိုးမြှင့်ပေးနိုင်တယ်”

အာခီမီကျင့်ကြံသူများအားလုံးသည် ကျားစေ့များဖြစ်လာလိမ့်မည်။ သူတို့က ဓားအမြုတေများကို ဓားအဖြစ်အသုံးပြုပြီး ကောင်းကင်စက်ဝန်းဓားဝင်္ကပါကို ဖော်ဆောင်နိုင်မည်။

မဟာဝင်္ကပါတစ်ခုထက်သာလွန်ပြီး လူသိန်းချီပါဝင်နေသော အထူးဝင်္ကပါတစ်ခု ဖြစ်လာလိမ့်မည်။

ဟန်မူယဲ့က မျက်လုံးများတောက်ပနေပြီး ဝင်္ကပါဖွဲ့စည်းထားသော အာခီမီကျင့်ကြံသူ ၃၆၀,၀၀၀ကို မြင်ယောင်ကြည့်သည်။

သူတို့၏တိုက်ခိုက်နိုင်စွမ်းကို တွေးကြည့်လိုက်ရုံဖြင့် လူတစ်ယောက်၏နှလုံးသားကို အေးစက်သွားစေနိုင်သည်။

သူက အလို‌လျောက် ပြုံးလိုက်မိသည်။

သူက မကောင်းဆိုးဝါးတစ်ကောင်ကို လွှတ်ပေးလိုက်မိသည်ဟု ခံစားရသည်။

အာခီမီကျင့်ကြံသူများက ဓားများကို ထိန်းချုပ်နိုင်သည်။

ဓားကျင့်ကြံသူတိုင်းသည် ဓားအမြုတေကို အသုံးချပြီး ဓားကျင့်ကြံသူ သုံးသန်းခြောက်သိန်းကို စုစည်းလိုက်လျှင် ကောင်းကင်စက်ဝန်းဓားဝင်္ကပါသည် ကံကြမ္မာအဆင့်ကို တိုက်ခိုက်နိုင်လိမ့်မည်။

ဟန်မူယဲ့၏ခန္ဓာကိုယ်ပေါ်တွင် ဓားဆန္ဒအချို့ လှုပ်ရှားလာသည်။ သူက ကောင်းကင်အံ့ဖွယ်ကမ္ဘာသို့ ပြန်ရောက်သွားလျှင် အရှေ့ပင်လယ်သို့ သေချာပေါက်သွားကြည့်ရမည်။

အရှေ့ပင်လယ်တွင် သန်းဆယ်ချီသော ဓားကျင့်ကြံသူများ ရှိနေသည်။

ဟန်မူယဲ့က ထိုသို့ တွေးမိသောအခါ သူ့ရှေ့တွင် လမ်းမကြီးတစ်ခုရှိနေသည်ဟု ခံစားလိုက်ရသည်။

ဓားတာအို၊ အာခီမီတာအိုနှင့် ဝင်္ကပါတာအိုကို ပေါင်းစပ်နိုင်သည်။

‘ဒါဆိုရင် တခြားကျင့်ကြံခြင်းနည်းစနစ်တွေကရော’

‘မတူညီတဲ့ စွမ်းအင်တွေကရော’

ဟန်မူယဲ့က လောသည် အရောင်စုံနေသည်ဟု ခံစားလိုက်ရသည်။

ထိုအရာသည် ကျင့်ကြံခြင်း၏ ပျော်ရွှင်မှုဖြစ်သည်။

အသက်ရှည်ရန်အတွက် အကျိုးအကြောင်းမသိဘဲ ကျင့်ကြံနေခြင်းသည် အဓိပ္ပာယ်မရှိပေ။

ကျင့်ကြံခြင်း၏ထူးခြားဆန်းကြယ်မှုများကို ရှာဖွေနိုင်မှသာ အမှန်တကယ် ကျင့်ကြံနိုင်မည်။

ဥပမာအနေဖြင့် သူဖန်တီးခဲ့သောဓားအမြုတေများသည် စိတ်ဝင်စားဖွယ်ကောင်းသည်။

လူတစ်ယောက်၏စွမ်းအားသည် သန်းချီသောလူများကို လှုပ်ရှားစေပြီး နယ်မြေတစ်ခုကို သက်ရောက်နိုင်သည်။

ထိုအရာသည် အစစ်အမှန်ကျင့်ကြံခြင်းဖြစ်သည်။

ဟန်မူယဲ့က နေရာတွင်ရပ်နေသည်။ သူ့စိတ်နယ်ပယ်ထဲတွင်ရှိသော ဓားရှည်သည် ဆက်တိုက်တုန်ခါနေပြီး သုံးပေရှည်လျားသော အစိမ်းရောင်ဓားတစ်လက်အဖြစ် ပြောင်းလဲသွားသည်။

ထိုဓားသည် တည်ငြိမ်ပြီး သာမန်ဓားတစ်လက်နှင့် ကွာခြားမှုမရှိပေ။

သို့သော် ဟန်မူယဲ့၏အမြင်တွင် ထိုဓားသည် အလွန်ပျော်ရွှင်နေသည်။

ဝိညာဉ်လိပ်ပြာဓားသည် အရာဝတ္ထုတစ်ခုအဖြစ် စုစည်းသွားသည်။ ထိုအရာသည် စိတ်စွမ်းအား အပြည့်အဝပြောင်းလဲသွားကြောင်း ဖော်ပြနေသည်။

အနာဂတ်တွင် ကံကြမ္မာအဆင့်ကျွမ်းကျင်သူတစ်ဦးမှလွဲ၍ ဝိညာဉ်လိပ်ပြာဓား၏စွမ်းအားကို ဖိနှိပ်နိုင်သောလူများ ရှိတော့မည်မဟုတ်ပေ။

အမတ်ချုပ်ကြီးဝမ်ပင် ဖိနှိပ်ရန် မဖြစ်နိုင်ပေ။

“ကောင်းကင်စက်ဝန်းဝင်္ကပါလား”

ချင်စုယန်က ဟန်မူယဲ့ကိုလှည့်ကြည့်လိုက်ပြီး ညင်သာစွာပြောသည်။

“အဲဒါက ကောင်းကင်အံ့ဖွယ်တာအိုဘိုးဘေးယူလာတဲ့ အမွေအနှစ်မဟုတ်လား”

“အမတ်ချုပ်ကြီးဝမ်နဲ့ မှူးမတ်ဝူတို့က တာအိုဘိုးဘေးရဲ့အမွေအနှစ်ကို ဆက်ခံခဲ့ကြတယ်”

‘အဲဒါဆိုရင် ကောင်းကင်စက်ဝန်းဓားဝင်္ကပါကိုသိနေတဲ့ ဟန်မူယဲ့ကရော ဘာလဲ’

‘အမတ်ချုပ်ကြီးဝမ်ရဲ့ တိုက်ရိုက်တပည့်လား’

‘ဒါမှမဟုတ် မှူးမတ်ဝူပျိုးထောင်ထားတဲ့ အမွေဆက်ခံသူလား’

ဟန်မူယဲ့က ခပ်ဟဟရယ်လိုက်ပြီး စကားမပြောပေ။

သူက နောက်ခံကို ပြောမပြနိုင်ပေ။

သူက အမတ်ချုပ်ကြီးဝမ်၊ မှူးမတ်ဝူတို့နှင့် တစ်ဂိုဏ်းတည်း ဖြစ်နိုင်သည်။

သို့သော် သူ့တွင် ဓားစံအိမ်အမွေအနှစ် ရှိနေသေးသည်။

သိန်းချီနေသောအာခီမီပညာရှင်များကို အုပ်စုဖွဲ့လိုက်သည်။ သူတို့အားလုံးက ဓားအမြုတေကို အသုံးပြုပြီး ပူးပေါင်းတိုက်ခိုက်နိုင်သည်။

ထိုအစီအစဉ်နှင့် လေ့ကျင့်မှုအတွက် အချိန်ဆယ်ရက်ယူခဲ့ရသည်။

နောက်ဆုံးရလဒ်ကိုတော့ မည်သူမှမသိနိုင်ပေ။

အဘယ်ကြောင့်ဆိုသော် ဟန်မူယဲ့က တွက်ချက်မကြည့်နိုင်ပေ။

သူက မဟာဝင်္ကပါကို အမှန်တကယ် အသက်မသွင်းရဲပေ။

ဝင်္ကပါကို အသက်သွင်းလိုက်လျှင် ကောင်းကင်နှင့်မြေကြီး၏ သဘာဝစွမ်းအင်များ ပြောင်းလဲသွားလိမ့်မည်။ မိုင်သောင်းချီကျယ်ဝန်းသောတည်နေရာသည် တုန်ခါသွားလိမ့်မည်။

ကုန်ကျမှုများ အလွန်များသည်။

ဝင်္ကပါက ပြီးပြည့်စုံသွားသော်လည်း နောက်ပိုင်းတွင် တိတ်ဆိတ်စွာလေ့ကျင့်ရန် လိုအပ်နေသေးသည်။

ဟန်မူယဲ့၏တောင်းဆိုချက်အရ အာခီမီပညာရှင် ၃၆၁ယောက်သည် တစ်နေ့လျှင် နှစ်နာရီသာ လေ့ကျင့်ရမည်။

သူတို့က လူခွဲ၍လေ့ကျင့်လျှင် ဝင်္ကပါ၏စွမ်းအားကို အသက်သွင်းမိမည်မဟုတ်ပေ။

ဟွေမင်ကမ္ဘာတွင် ဆယ်ရက်အတွင်း၌ ချီလမ်းကြောင်းဝိညာဉ်သွေးကြောအားဖြည့်ဆေးများ သန်းချီ၍ ထုတ်လုပ်နိုင်ခဲ့သည်။

ဆေးလုံးအများစုကို စခန်းတွင် သိမ်းထားပြီး တချို့ကို ရှေ့တန်းသို့ ပို့လိုက်သည်။

ဤတစ်ကြိမ်တွင် ဟန်မူယဲ့က သင်္ဘောပျံနှင့်အတူ ရှေ့တန်းသို့ လိုက်လာခဲ့သည်။

ရှေ့တန်းတွင် မူဝမ်နှင့် သောင်းချီသောအာခီမီကျင့်ကြံသူများ ရှိနေသည်။

ပိုင်လီရှင်းလင်က မူဝမ်ကို အာခီမီညီလာခံတွင်နေထိုင်ရန် တောင်းဆိုခဲ့သည်။

သို့သော် မူဝမ်က ဟွေမင်ကမ္ဘာတွင်နေထိုင်လျှင် ကောင်းမွန်စွာလေ့ကျင့်နိုင်မည်မဟုတ်ဟု ခံစားရသည်။ သူမက ချီလမ်းကြောင်းဝိညာဉ်သွေးကြောအားဖြည့်ဆေးကို အလွန်ကျွမ်းကျင်စွာ သန့်စင်နိုင်သည်။

ထို့ကြောင့် တခြားအာခီမီပညာရှင်များနှင့်အတူ ရှေ့တန်းသို့လိုက်သွားလျှင် ပိုအဆင်ပြေလိမ့်မည်။

ဟန်မူယဲ့က သူမကို အကာအကွယ်နည်းလမ်းများ ပေးထားခဲ့သည်။

ထို့အပြင် သူမက ရှေ့တန်းကိုလည်း သွားကြည့်ချင်သည်။

သူမက နှစ်ပေါင်းများစွာကျင့်ကြံလာခဲ့ပြီး ကိုယ်ပိုင်အားနည်းချက်ကို နားလည်လာခဲ့သည်။ သူမက တိုက်ခိုက်နိုင်စွမ်း မကောင်းပေ။

ဟန်မူယဲ့က သူမကို ကာကွယ်ပေးနေသောအချိန်တွင် သူမက ထိုအားနည်းချက်ကို မခံစားရပေ။ သို့သော် ကောင်းကင်အံ့ဖွယ်ကမ္ဘာမှ ထွက်လာပြီး ဟန်မူယဲ့နှင့် လမ်းခွဲလိုက်သောအချိန်တွင် သူမက မထိန်းချုပ်နိုင်သောကြောက်ရွံ့မှုကို ခံစားလိုက်ရသည်။

ထို့ကြောင့် ဟွေမင်ကမ္ဘာသို့ရောက်လာပြီး အချိန်အတော်ကြာအောင် စဉ်းစားပြီးသောအခါတွင် မူဝမ်က ရှေ့တန်းသို့သွားရန် ဆုံးဖြတ်ခဲ့သည်။

သူမက ကျင့်ကြံခြင်းလောကတွင် ရှေ့ဆက်သွားချင်လျှင် ကိုယ့်ကိုယ်ကိုယ် ကာကွယ်နိုင်ရမည်။

“ဝမ်အာကလည်း ကိုယ်ပိုင်အတွေးတွေ ရှိတယ်”

ပိုင်လီရှင်းလင်က ဟန်မူယဲ့ကိုကြည့်လိုက်ပြီး ညင်သာစွာပြောသည်။

“နင့်မှာ မိန်းကလေးတွေအများကြီး ရှိနေလောက်ပေမဲ့ မူဝမ်က မတူဘူး”

“သူမက နင်နဲ့အတူရှိဖို့ တိတ်တိတ်လေးကြိုးစားနေခဲ့တယ်”

ဟန်မူယဲ့က မူဝမ်၏ကြိုးစားမှုများကို သိထားသည်။

သူက သူမ၏ရည်ရွယ်ချက်ကို နားလည်သည်။

ထိုကြောင့် သူက အလွန်သန့်စင်သောရင်းနှီးမှုကို ကျင့်ကြံခြင်းလောကမှ လူသားလောကအထိ ကာကွယ်ထားခဲ့သည်။

သင်္ဘောပျံသုံးစင်းက ရှေ့တန်းသို့ တိုက်ရိုက်ထွက်လာခဲ့သည်။ သူတို့က လမ်းတစ်လျှောက်တွင် ပြန်လည်ဖွဲ့စည်းထားသောစစ်တပ်များကို မြင်နိုင်သည်။

ချင်စုယန်၊ ပိုင်လီရှင်းလင်နှင့် တခြားလူများက အမျိုးမျိုးသောစစ်စခန်းများတွင် ချီလမ်းကြောင်းဝိညာဉ်သွေးကြောအားဖြည့်ဆေးများကို ဝေမျှပေးချင်သည်။ ထို့ကြောင့် ဟန်မူယဲ့က မူဝမ်ရှိသောနေရာသို့ တစ်ယောက်တည်းထွက်လာခဲ့သည်။

ဟန်မူယဲ့က ဓားပျံကိုစီးနင်း၍ မိုင်ပေါင်းသန်းသုံးဆယ်ကို ကျော်ဖြတ်လာခဲ့သည်။ သူက ခါးသီးစွာတိုက်ပွဲဖြစ်နေသော ကြယ်တစ်စင်းပေါ်သို့ရောက်လာရန် ငါးရက်အချိန်ယူခဲ့ရသည်။

မိုင်တစ်သန်းအကွာတွင် ချီစွမ်းအင်အလင်းများကို မြင်နိုင်သည်။

ကြယ်ကောင်းကင်ထက်တွင် ဟန်မူယဲ့က ဤကမ္ဘာ၏ တုန်ခါနေသော ကောင်းကင်တာအိုကို ခံစားမိသည်။

ကြယ်များအားလုံးသည် ကောင်းကင်အံ့ဖွယ်ကမ္ဘာကဲ့သို့ အားကောင်းသောတာအိုစွမ်းအားကို ပိုင်ဆိုင်မထားပေ။

ကြယ်အများစု၏စွမ်းအားသည် ကောင်းကင်အဆင့်ကိုသာ ခုခံနိုင်သည်။ ကံကြမ္မာအဆင့်ကျွမ်းကျင်သူတစ်ယောက်က ကောင်းကင်တာအိုကို ဖျက်ဆီးနိုင်သည်။

အာကာသထဲတွင် မရေမတွက်နိုင်သောကမ္ဘာများရှိသည်။ တချို့ကမ္ဘာများသည် မူလမီးတောက်ကမ္ဘာကဲ့သို့ ကောင်းကင်တာအိုက ကောင်းကင်အဆင့်ကျွမ်းကျင်သူများကို ဖိနှိပ်ထားသည်။

ဤကြယ်သည်လည်း ထိုသို့ပင်ဖြစ်သည်။

ဒါဇင်ချီနေသော ကောင်းကင်အဆင့်ကျွမ်းကျင်သူများက အာကာသထဲတွင် တိုက်ခိုက်နေသည်။ သူတို့က ကြယ်ပေါ်သို့ ဆင်းမသွားပေ။

ကြယ်ပေါ်တွင်တိုက်ခိုက်နေသောလူများက ကောင်းကင်အဆင့်၏အောက်တွင် ရှိနေသည်။

ဟန်မူယဲ့က ကောင်းကင်ထဲသို့ တိုးဝင်သွားပြီး ချီစွမ်းအင်အလင်းများပေါက်ကွဲနေသော စစ်မြေပြင်ကို ကြည့်လိုက်သည်။

“ဝီ”

ရွှေအလင်းစီးကြောင်းတစ်ခုက သူ့ကို လွှမ်းခြုံသွားသည်။

ထိုအလင်းစီးကြောင်းထဲတွင် ဝိညာဉ်ကိုတုန်ခါသွားစေနိုင်သော စွမ်းအားများရှိပြီး သူ့ကို အညံ့ခံရန် တီးတိုးပြောနေသည်။

နတ်ဘုရားတာအိုနည်းစနစ် ....

ဟန်မူယဲ့က မော့ကြည့်လိုက်သောအခါတွင် သိပ်မဝေးသောနေရာ၌ လှံတစ်စင်းကိုင်ထားသော ရွှေရောင်ချပ်ဝတ်ကျင့်ကြံသူတစ်ဦးကို မြင်လိုက်ရသည်။

“ကောင်းကင်အံ့ဖွယ်ကမ္ဘာရဲ့ ကျင့်ကြံသူတစ်ယောက်လား’

နတ်ဘုရားတာအိုကျင့်ကြံသူက ဟန်မူယဲ့ကိုကြည့်လိုက်ပြီး လှံဖြင့်ညွှန်ပြ၍ ဂရုမစိုက်စွာပြောသည်။

“ငါက မင်းကို အခွင့်အရေးပေးလိုက်မယ်။ ငါ့ကိုအညံ့ခံပြီး အစောင့်အရှောက်နတ်စစ်သည်တစ်ပါး ဖြစ်လာရမယ်။ ဒါမှမဟုတ်ရင် ငါက မင်းရဲ့ဝိညာဉ်ကို သန့်စင်ပြီး မင်းကို နတ်အစေခံအဖြစ် ပြောင်းလဲပစ်လိုက်မယ်”

အစောင့်အရှောက်နတ်စစ်သည် ....

နတ်ဘုရားအစေခံ ....

နတ်ဘုရားတာအိုကျင့်ကြံသူများသည် ပြင်ပခွန်အားကိုမှီခို၍ ကျင့်ကြံသောကြောင့် အနည်းငယ်အားနည်းသည်။

သို့သော် ထိုအရာသည် အားနည်းချက်မဟုတ်ပေ။

နတ်ဘုရားတာအိုကျင့်ကြံသူများက အလွန်လျင်မြန်စွာ တိုးတက်လာနိုင်သည်။ သူတို့က အမွှေးနံ့သာပူဇော်ခြင်းစွမ်းအားနှင့် ယုံကြည်မှုစွမ်းအားများကို အသုံးချ၍ ကမ္ဘာမြေအဆင့်ကျွမ်းကျင်သူများကို ဆက်တိုက်ဖန်တီးနိုင်သည်။

ထို့ကြောင့် ကောင်းကင်အံ့ဖွယ်စစ်တပ်က အငြိုးအတေးမဲ့နယ်မြေတွင် အရေးနိမ့်နေရသည်။

ထို့ကြောင့် မှူးမတ်ဝူက မကြာခဏလှုပ်ရှားပြီး နတ်ဘုရင်များကိုသတ်ဖြတ်နိုင်ရန် အခွင့်အရေးရှာနေသည်။

ဟန်မူယဲ့၏ရှေ့တွင်ရှိသော နတ်ဘုရားတာအိုကျင့်ကြံသူသည် ရွှေအမြုတေ အဌမအဆင့်တွင် ရှိနေသည်။ သူ့ခန္ဓာကိုယ်ကို နတ်ဘုရားစွမ်းအားများဖြင့် ဖွဲ့စည်းထားသည်။

နတ်ဘုရားစွမ်းအားသည် တခြားကျင့်ကြံသူများ စုစည်းထားသော ဝိညာဉ်သူငယ်နှင့် ဆင်တူသည်။