အခန်း (၅၄၀)

“လူကောင်းလေးပဲ။ နတ်ဘုရားသားရဲပါ့ရှားရဲ့စွမ်းအားကို ပိုင်ဆိုင်ထားတယ်။ နတ်ဘုရားကျောက်တိုင်ရဲ့အကူအညီနဲ့ဆိုရင် နတ်ဘုရားသားရဲတစ်ကောင်ရဲ့စွမ်းအားကို အပြည့်အဝပေါင်းစပ်နိုင်လိမ့်မယ်”

“ပျက်စီးခြင်းကမ္ဘာ ပြိုကွဲသွားတဲ့အချိန်ကစပြီး ဒီလို ရှေးခေတ်သွေးမျိုးဆက်ကျွမ်းကျင်သူတစ်ယောက်ကို မမြင်ခဲ့ရတာ ဘယ်လောက်တောင်ကြာပြီလဲ”

“ငါ့ရဲ့ ပျက်စီးခြင်းကမ္ဘာအတွက် အချိန်ကျလာပြီလား ....”

....

သင်္ဘောပျံများက အလွန်လျှို့ဝှက်သော်လည်း လေဟာနယ်သားရဲနှင့် မိစ္ဆာများ၏တိုက်ခိုက်မှုကို အကြိမ်ပေါင်းများစွာ ခံလိုက်ရသေးသည်။

သင်္ဘောပျံကိုထိန်းချုပ်နေသောစစ်သူကြီးက ထိုမိစ္ဆာနှင့်သားရဲများ မတုံ့ပြန်နိုင်ခင် ချက်ချင်းသတ်ဖြတ်ပစ်ခဲ့သည်။

သို့သော် သူတို့က ရှေ့ဆက်သွားလိုက်သောအခါတွင် ပိုမိုများပြားသော နတ်ဘုရားတာအိုကျင့်ကြံသူများနှင့် ရင်ဆိုင်လိုက်ရသည်။

အဆုံးတွင် လူတိုင်းက ဆွေးနွေးထားသောအစီအစဉ်အတိုင်း လူစုခွဲလိုက်သည်။

သင်္ဘောပျံပေါ်တွင်ရှိသောစစ်တပ်က နေရာတစ်ခုတွင်ပုန်းကွယ်ပြီး ဝင်္ကပါတည်ဆောက်၍ ဆင့်ခေါ်ခံရရန် စောင့်ဆိုင်းနေသည်။

တခြားကျွမ်းကျင်သူများက ကိုယ်တိုင်လှုပ်ရှားလိုက်ပြီး ဆုံရပ်သို့ ဦးတည်လိုက်သည်။

“အားလုံးပဲ နတ်ဘုရားဘွဲ့ထူးစင်မြင့်ကို မင်းတို့နဲ့လွှဲထားလိုက်တော့မယ်”

မှူးမတ်ဝူက ကုန်းပတ်ပေါ်တွင်ရပ်နေပြီး လက်မြှောက်၍ အလေးပြုသည်။

ကောင်းကင်အံ့ဖွယ်ကမ္ဘာ၏လူများက ပြန်လည်ဦးညွှတ်လိုက်သည်။

ဟန်မူယဲ့က ယန်ကျန်းချင်၊ ချင်စုယန်နှင့် တခြားလူများကို ကြည့်သည်။

“အကြီးအကဲတို့ ယွင်ချန်ကြယ်ပေါ်မှာ ပြန်တွေ့ကြမယ်”

ထိုသို့ဖြင့် သူက လှုပ်ရှားလိုက်ပြီး ညင်သာသောဓားအလင်းတစ်ခုနှင့်အတူ ပျောက်ကွယ်သွားသည်။

သူက အာကာသထဲတွင် ပြန်ပေါ်လာခဲ့သည်။

ယန်ကျန်းချင်နှင့်တခြားလူများက တစ်ယောက်ကိုတစ်ယောက်ကြည့်လိုက်ပြီး လက်နှစ်ဖက်ကိုဆုပ်ကိုင်၍ နှုတ်ဆက်လိုက်သည်။ ထို့နောက် သူတို့က သက်တံရောင်အလင်းများအဖြစ်ပြောင်းလဲပြီး ပျံသန်းသွားကြသည်။

သူတို့၏ပစ်မှတ်သည် ယွင်ချန်ကြယ်ဖြစ်သည်။

လွန်ခဲ့သောနှစ်တစ်ရာခန့်တွင် နတ်ဘုရင်ယွင်ချန်ကို မှူးမတ်ဝူက သတ်ဖြတ်ခဲ့သည်။ ထိုအချိန်မှစ၍ ယွင်ချန်ကြယ်ပေါ်ရှိကျွမ်းကျင်သူများသည် နတ်ဘုရင်နေရာအတွက် တိုက်ခိုက်နေကြသည်။

ဤတစ်ကြိမ်တွင် နတ်ဘုရင်ဘွဲ့ထူးယဇ်ပလ္လင်ကို တည်ဆောက်ရန်အတွက် ယွင်ချန်ကြယ်ကို ရွေးချယ်ထားသည်။

ဟန်မူယဲ့က အာကာသထဲတွင် ပျံသန်းပြီး ခန္ဓာကိုယ်ထဲတွင် ချီစွမ်းအင်အလင်းများကို ဆက်တိုက်သိမ်းဆည်းနေသည်။ မိုင်တစ်သန်းခန့်ပျံသန်းလာပြီး ဧရာမကြယ်တစ်စင်းကို မြင်လိုက်ရသောအခါတွင် သူ့ကိုယ်ပေါ်၌ နတ်ဘုရားအလင်းများသာ ကျန်ရစ်တော့သည်။

ဟန်မူယဲ့က အငြိုးအတေးမဲ့နယ်မြေတွင်ရှိနေသော နတ်ဘုရားတာအိုကျင့်ကြံခြင်းနည်းစနစ်များနှင့် ရင်းနှီးသည်။ သူက စွန်းယွင်၏မှတ်ဉာဏ်မှတစ်ဆင့် နတ်ဘုရားတာအိုကျင့်ကြံခြင်းနည်းစနစ်ကို နားလည်ခဲ့သည်။

သူကျင့်ကြံခဲ့‌သော အဝါရောင်ခုံရုံးနည်းစနစ်ဖြင့် ပေါင်းစပ်လိုက်လျှင် သူက နတ်ဘုရားတာအို၏နည်းလမ်းများနှင့် အလွန်ရင်းနှီးသွားသည်။

သူက အဝါရောင်ခုံရုံးနည်းစနစ်ဖြင့် ကွန်ဖြူးရှပ်တာအိုနှင့် နတ်ဘုရားတာအိုကို ကျင့်ကြံနိုင်ခဲ့သည်။ ယခုအချိန်တွင် သူက သမာဓိစွမ်းအားနှင့် ချီစွမ်းအင်များကို ထိန်းချုပ်ထားသည်။ သူ့ခန္ဓာကိုယ်တစ်ခုလုံးကို ရွှေရောင်နတ်ဘုရားအလင်းများက လွှမ်းခြုံနေသည်။

သူ့ကိုမြင်လိုက်သောလူတိုင်းက နတ်ဘုရားတာအိုကျင့်ကြံသူတစ်ဦးဟု ထင်သွားကြလိမ့်မည်။

“မင်းက ဘယ်သူလဲ”

ရှေ့တွင် အသံတစ်သံထွက်လာသည်။ ရွှေရောင်ချပ်ဝတ်စစ်သားများက လေထုထဲတွင် ရပ်နေသည်။

သိပ်မဝေးသောနေရာတွင် ရွှေရောင်နတ်ဘုရားအလင်းများကို ထုတ်လွှတ်ပေးနေသော သင်္ဘောပျံတစ်စင်းက ဖြည်းဖြည်းချင်း ချဉ်းကပ်လာသည်။

ထိုစစ်သည်အုပ်စုသည် ကောင်းကင်အဆင့်ကျွမ်းကျင်သူများကို တားဆီးနိုင်သည်။ သင်္ဘောပျံ၏အကူအညီနှင့်ဆိုလျှင် ဝိညာဉ်ကိုယ်ခွဲအဆင့်ကျင့်ကြံသူများကိုပင် ယာယီတားဆီးထားနိုင်သည်။

ယွင်ချန်ကြယ်တွင် ထိုစွမ်းအားမျိုးရှိနေသည်။ အငြိုးအတေးမဲ့နယ်မြေတစ်ခုလုံး၏ခွန်အားကို အထင်မသေးသင့်ပေ။

ဟန်မူယဲ့က လေထုထဲတွင်ရပ်နေပြီး လက်မြှောက်သည်။ သူ့လက်ထဲတွင် ကျောက်စိမ်းပြားတစ်ခု ပေါ်လာသည်။

“နတ်ဘုရင်သွမ်ယွဲ့ရဲ့လက်အောက်ခံ၊ နတ်စစ်သူကြီးစွန်းယွင်က ယွင်ချန်ကြယ်ကို တာဝန်အရလာခဲ့တယ်”

ဟန်မူယဲ့၏အသံက တည်ငြိမ်နေသည်။

ကျောက်စိမ်းပြားနှင့် ဝိညာဉ်အမှတ်အသားသည် အစစ်အမှန်ဖြစ်သည်။

နတ်ဘုရင်သွမ်ယွဲ့သည် စွန်းယွင်ကို အမှန်တကယ်ပင် တာဝန်အချို့ပေးခဲ့သည်။

ဟန်မူယဲ့၏ကျင့်ကြံခြင်းကလည်း စွန်းယွင်နှင့် မတိမ်းမယိမ်းဖြစ်သည်။

တစ်ဖက်တွင်ရှိနေသောစစ်သူကြီးက ကျောက်စိမ်းပြားကိုဖမ်းယူပြီး နတ်အာရုံဖြင့် စစ်ဆေးကြည့်လိုက်သည်။ သူက ပြုံးလိုက်ပြီး လက်နှစ်ဖက်ကိုဆုပ်ကိုင်၍ နှုတ်ဆက်သည်။

“သွမ်ယွဲ့နတ်စစ်သူကြီး စွန်းယွင်ပဲ”

နတ်ဘုရားတာအိုကျင့်ကြံခြင်းတွင် နတ်စစ်သူကြီးများကို အဆင့်သုံးဆင့်ခွဲထားသည်။ ဟန်မူယဲ့က ရွှေအမြုတေ သတ္တမအဆင့်နှင့် အဌမအဆင့်တွင်ရှိသော ဒုတိယအဆင့်စွမ်းအားကို ဖော်ပြထားသည်။

တစ်ဖက်တွင်ရှိသောနတ်စစ်သူကြီးသည် တတိယအဆင့်တွင် ရှိနေသည်။ သူ့ကျင့်ကြံဆင့်နှင့် တိုက်ခိုက်နိုင်စွမ်းက ရွှေအမြုတေအဆင့်သို့ဝင်ရောက်လာသော ကျင့်ကြံသူများကို တားဆီးနိုင်ရုံသာရှိသည်။

ထို့ကြောင့် ထိုနတ်စစ်သူကြီးက ဟန်မူယဲ့ကို ယဉ်ကျေးစွာပြောလိုက်သည်။

“နတ်ဘုရင်သွမ်ယွဲ့ရဲ့လက်အောက်ခံ နတ်စစ်သူကြီးကို ကျွန်တော်တို့ယွင်ချန်ကြယ်က ကြိုဆိုလိုက်ပါတယ်”

ထိုနတ်စစ်သူကြီးက ရှေ့သို့တိုးလိုက်ပြီး ကျောက်စိမ်းပြားကို ပြန်ပေးသည်။

“ကျွန်တော်က နတ်ဘုရင်ထိုက်ယွီရဲ့လက်အောက်ကပါ ....”

ဟန်မူယဲ့က မျက်မှောင်ကြုတ်သည်။ တစ်ဖက်လူက တီးတိုးပြောလိုက်သည်။

“နတ်စစ်သူကြီး ကျေးဇူးပြုပြီး ကျွန်တော့်ကို ခွင့်လွှတ်ပါ။ နတ်သခင်ထိုက်ယွီက ဘွဲ့ထူးကို မဆက်ခံရသေးပေမဲ့ အချိန်တစ်ခုပဲ လိုတော့တာပါ”

နတ်ဘုရင်ယွင်ချန်၏လက်အောက်တွင်ရှိခဲ့သော နတ်သခင်လေးပါးဖြစ်သည့် ထိုက်ယွီ၊ မင်ကျီး၊ ကောင်းစွန်းနှင့် ကျီထိုက်တို့က နတ်ဘုရင်ရာထူးအတွက် တိုက်ခိုက်နေကြသည်။

သူတို့လေးယောက်တွင် နတ်ဘုရင်ချိပ်တံဆိပ် မရှိသောကြောင့် ယွင်ချန်ကြယ်ကို မထိန်းချုပ်နိုင်သေးပေ။

သို့သော် နတ်သခင်ထိုက်ယွီ၏ကျင့်ကြံခြင်းက နတ်ဘုရားတစ်ပိုင်း ဒုတိယအဆင့်တွင် ရှိနေသည်။ သူက အငြိုးအတေးမဲ့နယ်မြေ၏ ဘွဲ့ထူးချီးမြှင့်မှုကို လက်ခံရလျှင် သူ၏ကျင့်ကြံခြင်းနှင့် ယုံကြည်မှုစွမ်းအားများကြောင့် တာအိုပေါင်းစည်းခြင်းအဆင့် တိုက်ခိုက်နိုင်စွမ်းကို ပိုင်ဆိုင်လိမ့်မည်။

လွန်ခဲ့သောနှစ်တစ်ရာခန့်တွင် အငြိုးအတေးမဲ့နယ်မြေ၏ အားကောင်းသောနတ်ဘုရင်တချို့က ယွင်ချန်ကြယ်ကို စောင့်ကြည့်နေခဲ့သည်။

ပထမအချက်အနေဖြင့် ထိုက်ယွီနှင့်တခြားနတ်သခင်များက သူတို့ထက် အားနည်းသောကြောင့် ယွင်ချန်ကြယ်ကို လက်လွှဲမပေးချင်ပေ။

ဒုတိယအချက်အနေဖြင့် ယွင်ချန်ကြယ်ပေါ်တွင် တခြားနတ်ဘုရင်များ၏ အားကောင်းသောနတ်သခင်အချို့ ရှိနေသည်။

“နတ်သခင်မကျီထိုက်ရဲ့ကျင့်ကြံခြင်းက နတ်ဘုရားတစ်ပိုင်းတတိယအဆင့်မှာရှိနေတယ်လို့ ငါတို့နတ်ဘုရင်ဆီကနေ ကြားခဲ့တယ်။ သူမက နတ်သခင်ထိုက်ယွီကို ဖိနှိပ်နိုင်တယ်”

ဟန်မူယဲ့က ပြုံးနေသောမျက်လုံးများနှင့်အတူ တည်ငြိမ်စွာပြောသည်။

တစ်ဖက်လူက သူ့စကားများကို လွယ်ကူစွာလက်မခံ‌ရဲပေ။

သို့သော် သူက ရှက်သွားသည်။

နတ်သခင်များ၏ကျင့်ကြံခြင်းကို သာမန်နတ်စစ်သူကြီးများက မဆွေးနွေးနိုင်ပေ။

ထို့အပြင် ဟန်မူယဲ့က နတ်ဘုရင်သွမ်ယွဲ့၏လက်အောက်တွင်ရှိသော နတ်စစ်သူကြီးစွန်းယွင်အဖြစ် ဟန်ဆောင်ထားသည်။

နတ်ဘုရင်တစ်ပါး၏သဘောထားသည် နတ်သခင်လေးယောက်အတွက် အလွန်အရေးကြီးသည်။

“အဟွတ်၊ အဟွတ်။ စစ်သူကြီးစွန်း၊ နတ်သခင်ထိုက်ယွီရဲ့နတ်နန်းကိုလာပြီး အနားယူပါ။ နတ်သခင်က သီးသန့်ကျင့်ကြံနေရာကနေ ထွက်လာရင် ခင်ဗျားနဲ့ ဆုံတွေ့ပါလိမ့်မယ်”

စစ်သူကြီး၏လေသံက ပိုမိုယဉ်ကျေးလာသည်။

ဟန်မူယဲ့က စဉ်းစားကြည့်လိုက်ပြီး ပတ်ဝန်းကျင်ကိုကြည့်၍ ခေါင်းညိတ်သည်။

တစ်ဖက်လူက စိတ်သက်သာရာရစွာ သက်ပြင်းချလိုက်ပြီး ဟန်မူယဲ့ကို သင်္ဘောပျံဆီသို့ ခေါ်ဆောင်သွားသည်။ သူက ယွင်ချန်ကြယ်သို့ သတင်းပို့ရန်အတွက် လူအချို့လွှတ်လိုက်သည်။

ဟန်မူယဲ့က သင်္ဘောပျံ၏ထိပ်ဆုံးအထပ်တွင် နေလိုက်ရသည်။ ဝိညာဉ်သစ်သီးနှင့် သေရည်အမျိုးမျိုးကို ဟန်မူယဲ့ဆီ ပို့ပေးလိုက်သည်။

ဟန်မူယဲ့က တိတ်ဆိတ်သောအခန်းထဲတွင် တင်ပျဉ်ခွေထိုင်လိုက်ပြီး ညင်သာစွာခေါင်းခါသည်။

ထိုအရာသည် နတ်ဘုရားတာအိုကျင့်ကြံခြင်း၏ အားနည်းချက်တစ်ခုဖြစ်သည်။

နတ်ဘုရားတာအိုသည် တခြားကျင့်ကြံခြင်းနည်းစနစ်များထက် အမွေအနှစ်ကို ပိုမိုအလေးထားသည်။

နတ်ဘုရင်တစ်ပါးသည် အမွှေးနံ့သာပူဇော်ခြင်းစွမ်းအားဖြင့် ကြယ်တစ်စင်းကို ထိန်းချုပ်နိုင်သည်။

နတ်စစ်သူကြီးနှင့် နတ်သခင်များ၏ ဝိညာဉ်နှင့်စွမ်းအားကို နတ်ဘုရင်များက အတိုင်းအတာတစ်ခုအထိ ထိန်းချုပ်နိုင်သည်။

နတ်ဘုရားတာအိုကို ကျင့်ကြံရန် လွယ်ကူသော်လည်း အခြေခံအုတ်မြစ် ခိုင်မာခြင်းမရှိပေ။

နတ်ဘုရင်များ၏အမွေအနှစ်သည် အဆင့်နိမ့်နတ်ဘုရားကျွန်၊ နတ်ဘုရားလက်နက်မှတစ်ဆင့် နတ်စစ်သူကြီးနှင့် နတ်သခင်များအထိ အမျိုးအစားကွဲပြားသွားသည်။ သူတို့၏တိုက်ခိုက်နိုင်စွမ်းက သန်မာသော်လည်း ထာဝရရှင်သန်ခြင်းကို ရနိုင်သော လမ်းစဉ်မဟုတ်ပေ။

နတ်ဘုရင်တစ်ပါးဖြစ်လာမှသာ မဟာတာအိုကို ရရှိနိုင်မည်။

ကံမကောင်းစွာဖြင့် နတ်ဘုရင်များ အနည်းငယ်သာရှိသည်။

“ဘုန်း”

သင်္ဘောပျံက ကောင်းကင်ထက်တွင် ဆင်းသက်လာသည်။ ထိုအချိန်တွင် ဟန်မူယဲ့၏ခန္ဓာကိုယ်ထဲမှ နတ်ဘုရားအလင်းတချို့ ပေါ်ထွက်လာသည်။

သူက အဝါရောင်ခုံရုံးနည်းစနစ်ကို လျင်မြန်စွာလှည့်ပတ်ပြီး နတ်ဘုရားတာအိုစွမ်းအားနှင့် ဝိညာဉ်စွမ်းအားကို ပေါင်းစပ်လိုက်သည်။

သူ့ဝိညာဉ်စွမ်းအားသည် အလွန်သန်မာသည်။ ယခုအချိန်တွင် သူက အဝါရောင်ခုံရုံးနည်းစနစ်ကို အသုံးပြုနေသောကြောင့် ကောင်းကင်နှင့်မြေကြီး၏စွမ်းအားကို ချက်ချင်းလှုံ့ဆော်မိသွားသည်။

သင်္ဘောပျံ၏ကုန်းပတ်ပေါ်တွင် ဟန်မူယဲ့ကိုခေါ်လာခဲ့သော နတ်စစ်သူကြီးက သင်္ဘောပျံ၏ထိပ်ဆုံးအထပ်ကိုလှည့်ကြည့်၍ ပြုံးသည်။

နတ်ဘုရင်တစ်ပါး၏လက်အောက်တွင်ရှိသော နတ်စစ်သူကြီးက ယုံကြည်ချက်မရှိဘဲ တစ်ယောက်တည်းလာမည်မဟုတ်ပေ။

ထိုလူသည် နတ်ဘုရားစွမ်းအားအနည်းငယ်သာရှိ‌သော နတ်စစ်သူကြီးတစ်ယောက်ဟု ထင်ရသော်လည်း အလွန်သန်မာနေသည်။

ကောင်းကင်နှင့်မြေကြီး၏စွမ်းအားကို လှုံ့ဆော်နိုင်သော ဝိညာဉ်သည် အနည်းဆုံး နတ်သခင်တစ်ပိုင်းအဆင့်တွင် ရှိနေလိမ့်မည်။

နတ်ဘုရင်သွမ်ယွဲ့သည် နတ်ဘုရင် ၁၈ပါးထဲတွင် အသန်မာဆုံးမဟုတ်သော်လည်း ထိပ်ဆုံးခြောက်ယောက်ထဲတွင် ပါဝင်သည်။

ထို့ကြောင့် လက်အောက်ခံစစ်သူကြီးမှာလည်း ကိုယ်ပိုင်ထူးခြားချက်များ ရှိနေလိမ့်မည်။

“ဒေါင် ....”

ရှေ့တွင် ကျောက်စိမ်း‌ခေါင်းလောင်းသံကို ကြားရသည်။

နန်းတွင်းအဝတ်အစားများနှင့် အမျိုးသမီးအင်မော်တယ်အုပ်စုသည် မီးအိမ်များကိုင်ထားပြီး ရေလှိုင်းများသဖွယ် ဖြာထွက်လာသည်။

ဟန်မူယဲ့က တိတ်ဆိတ်သောအခန်းထဲမှထွက်လာပြီး သင်္ဘောပျံ၏ပြတင်းတံခါးတွင် ရပ်လိုက်သည်။ သူက လက်နှစ်ဖက်ကို နောက်ပစ်ထားပြီး ပြုံးသည်။

“ညီအစ်ကိုလီ၊ နတ်သခင်ထိုက်ယွီရဲ့ရည်ရွယ်ချက်က ဘာလဲ”

ဟန်မူယဲ့ကိုခေါ်ဆောင်လာသော နတ်စစ်သူကြီး၏နာမည်သည် လီဟွေ့ဖြစ်သည်။ သူက ကောင်းကင်ဘုံတစ်ဝက်အဆင့်ဖြစ်ပြီး နတ်ဘုရားစွမ်းအားများကို စုစည်းထားသည်။

ဟန်မူယဲ့၏စကားကို ကြားလိုက်ရသောအခါတွင် လီဟွေ့က ပြုံးလိုက်ပြီး တီးတိုးပြောသည်။

“ဘာဖြစ်လို့လဲဆိုတော့ နတ်သခင်က ခင်ဗျားရောက်လာတာကို အလေးအနက်ထားလို့ပဲ”

ဟန်မူယဲ့က ဒေါသထွက်သွားပုံပေါ်ပြီး တီးတိုးပြောသည်။

“ကျွန်တော့်ကို အလေးအနက်ထားတာလား။ နတ်ဘုရင်က ကျွန်တော့်ကို တာဝန်ပေး ....”

သူက စကားမပြောတော့ဘဲ အေးစက်နေသောမျက်နှာထားဖြင့် လက်ကိုဝှေ့ယမ်း၍ အခန်းထဲသို့ ပြန်ဝင်သွားသည်။

လီဟွေ့က အားရစွာပြုံးလိုက်ပြီး အင်မော်တယ်အမျိုးသမီးများ၏ လမ်းညွှန်မှုအောက်တွင် နတ်သခင်ထိုက်ယွီ၏နတ်နန်း၌ သင်္ဘောပျံကို ဖြည်းဖြည်းချင်းဆင်းသက်ရန် အချက်ပြသည်။

ထိုဖြစ်ရပ်ကို တခြားနတ်သခင်သုံးယောက်က စစ်ဆေးမကြည့်လျှင် ထူးဆန်းနေလိမ့်မည်။

အခန်းထဲတွင်တင်ပျဉ်ခွေထိုင်လိုက်သောဟန်မူယဲ့က ချက်ချင်းဆိုသလိုပင် တိတ်ဆိတ်စွာဆင်းသက်လာသော နတ်အာရုံများကို ခံစားမိလိုက်သည်။