အခန်း (၅၅၇)

အောက်တွင် အဆုံးမဲ့ပင်လယ်၏ရေထုသည် နောက်ဆုံးကျန်နေသော ကြယ်အစိတ်အပိုင်းကို ဝါးမြိုသွားသည်။

အားကောင်းသောမိစ္ဆာသားရဲများသည် ရေထဲမှခုန်ထွက်လာပြီး ကျင်းခွန်းနှင့်တခြားလူများကို အဆုံးမဲ့ပင်လယ်ထဲသို့ ပြန်ဆွဲချချင်နေသည်။

ပိုမိုများပြားသော ကောင်းကင်အဆင့်မိစ္ဆာသားရဲများက ဟိန်းဟောက်လိုက်ပြီး ကြယ်နှလုံးသားဆီသို့ ပြေးဝင်လာသည်။

“သွားကြစို့”

ဟန်မူယဲ့က ကျင်းခွန်းနှင့်တခြားလူများကို ကြည့်လိုက်သည်။ သူ့ခြေထောက်အောက်မှ စွမ်းအားများပေါ်ထွက်လာပြီး ဆယ်မိုင်ပတ်လည်ကျယ်ဝန်းသော မြက်ခင်းပြင်သည် အဝေးတစ်နေရာသို့ ပျံသန်းသွားသည်။

မရေမတွက်နိုင်သောမိစ္ဆာသားရဲများက နောက်တွင် ကျန်ရစ်ခဲ့သည်။

“တာအိုရောင်းရင်းမူယဲ့၊ မင်းက ကြယ်နှလုံးသားကို သွားမယူတော့ဘူးလား”

ကျင်းခွန်းက တလက်လက်တောက်ပနေသော ကြယ်နှလုံးသားကို လှည့်ကြည့်လိုက်ပြီး တီးတိုးပြောသည်။

ကြယ်နှလုံးသားသည် အဖိုးတန်ရတနာတစ်ခုဖြစ်သည်။

ကြယ်နှလုံးသားသည် ကျင့်ကြံသူတစ်ယောက်ကို နှစ်ပေါင်းမရေမတွက်နိုင်အောင် ကျင့်ကြံခြင်းတွင် ကူညီပေးနိုင်သည်။

ထိုရတနာမျိုးကို မလိုချင်သောလူ မရှိနိုင်ပေ။

ကျင်းခွန်း၏စကားကို ကြားလိုက်ရသောအခါတွင် ဟန်မူယဲ့က ခပ်ဟဟရယ်လိုက်ပြီး ခေါင်းခါသည်။

“အဆင်ပြေပါတယ်။ သူတို့ကို အရင်တိုက်ခိုင်းလိုက်တာပေါ့”

ထိုသို့ဖြင့် သူက သစ်ပင်မိစ္ဆာများ၏စွမ်းအားကို စုစည်းပြီး အဝေးသို့ ပျံသန်းသွားသည်။

မိုင်တစ်ထောင်ကျော်ခန့် ပျံသန်းပြီးသောအခါ နောက်တွင်ပါလာသော မိစ္ဆာသားရဲများ လိုက်မီလာသည်။

ကြမ်းတမ်းသောမိစ္ဆာသားရဲများက မြက်ခင်းပြင်ပေါ်တွင်ရှိသော သစ်ပင်မိစ္ဆာများကို ခုန်အုပ်လိုက်သည်။

မိစ္ဆာချီများက တိမ်တိုက်များအဖြစ် လှုပ်ရှားနေသည်။ သွေးချီသည် တခြားလူများကို မူးဝေသွားစေသည်။

ကြမ်းတမ်းသော မိစ္ဆာရိုင်းအုပ်စုဖြစ်သည်။

မိစ္ဆာရိုင်းများ၏ရှေ့၌ မြက်ခင်းပြင်ပေါ်တွင်ရှိသော သစ်ပင်မိစ္ဆာနှင့် မိစ္ဆာသားရဲများက တစ်ကိုယ်လုံးတုန်ခါလာပြီး ပျော့ခွေသွားသည်။

သက်ရှိအားလုံးသည် အဆင့်ကျော်၍ တိုက်ခိုက်နိုင်စွမ်းမရှိပေ။

သစ်ပင်မိစ္ဆာနှင့် မိစ္ဆာသားရဲများ၏တုံ့ပြန်မှုသည် အဆင့်နိမ့်သက်ရှိများ၏တုံ့ပြန်မှုပင်ဖြစ်သည်။

ကျင့်ကြံခြင်းလောကတွင် မဟာကျင့်ကြံသူကြီးတစ်ယောက် ဆင်းသက်လာသောအချိန်၌ ဖိအားကြောင့် မရေမတွက်နိုင်သော အဆင့်နိမ့်သက်ရှိများ သေဆုံးကြရသည်။

မဟာကျင့်ကြံသူတစ်ယောက်၏ရှေ့တွင် တိုက်ခိုက်နိုင်သောလူများ အနည်းငယ်သာရှိသည်။

“အမြင်အာရုံဖုံးကွယ်ခြင်း”

ဟန်မူယဲ့က အော်ဟစ်လိုက်သည်။

ကျင်းခွန်းက ခေါင်းညိတ်သည်။ သူက လက်မြှောက်၍ မှော်စွမ်းရည်ကို အသုံးပြုလိုက်သည်။ မရေမတွက်နိုင်လောက်သော ရွှေရောင်သစ်ရွက်များ ပြန့်ကျဲသွားသည်။

ယခုအချိန်တွင် သစ်ရွက်များသည် အဆုံးမဲ့ပင်လယ်၏ မိစ္ဆာသားရဲများကို မတားဆီးခဲ့ပေ။ မြက်ခင်းပြင်ပေါ်တွင်ရှိသော သစ်ပင်မိစ္ဆာနှင့် မိစ္ဆာသားရဲများကို ကာကွယ်ပေးလိုက်သည်။

“အားလုံးပဲ အစွမ်းကုန်ထုတ်သုံးကြ”

ကျင်းခွန်းက အော်ဟစ်လိုက်သည်။

ရွှေသစ်ရွက်များသည် အဆင့်နိမ့်မိစ္ဆာများ၏အမြင်အာရုံကို ဖုံးကွယ်လိုက်သောကြောင့် မည်သည့်အရာကိုမှ မမြင်နိုင်တော့ပေ။

သူတို့က မမြင်နိုင်သောကြောင့် ကြောက်ရွံ့တော့မည်မဟုတ်ပေ။

အမြင်အာရုံဖုံးကွယ်ခြင်းနည်းစနစ်သည် ရန်သူ၏မြင်ကွင်းကို တားဆီးနိုင်ရုံသာမက ရန်သူ၏ဖိအားကိုလည်း ဖုံးကွယ်ပေးနိုင်သည်။

သူတို့၏ စီမံချက်များအရ သစ်ပင်မိစ္ဆာနှင့် မိစ္ဆာသားရဲများသည် ကိုယ်ပိုင်စွမ်းရည်ကို ဖော်ထုတ်လိုက်သည်။

သစ်ရွက်ပျံ၊ ပွင့်ချပ်၊ ဆူးချွန်နှင် သွားစွယ်များ ....

ထိုနည်းစနစ်များသည် အဆင့်နိမ့်ပြီး ဖျက်ဆီးနိုင်စွမ်း သိပ်မရှိပေ။

သို့သော် မြက်ခင်းပြင်ပေါ်တွင် သိန်းချီသော သစ်ပင်မိစ္ဆာနှင့် မိစ္ဆာသားရဲများ ရှိနေသည်။

“ဘုန်း”

ပါးလွှာသောသစ်ရွက်များသည် ကျယ်လောင်စွာ အသံပေးလိုက်သည်။

နူးညံ့သောပွင့်ချပ်များသည် မဟာမိစ္ဆာများ၏ အသားစိုင်နှင့်အရိုးကို ဖြတ်တောက်နိုင်သော သတ္တုပြားများနှင့် တူနေသည်။

အရိုးများ တစ်ခုပြီးတစ်ခု ကျိုးပဲ့သွားသည်။ မိစ္ဆာများ တစ်ကောင်ပြီးတစ်ကောင် ကျဆုံးသွားသည်။

ရွှေသစ်ရွက်များ ပျောက်ကွယ်သွားသောအခါတွင် သစ်ပင်မိစ္ဆာနှင့် မိစ္ဆာသားရဲများအားလုံးက အံ့အားသင့်သွားသည်။

သူတို့၏နောက်တွင် အရာအားလုံး ဗလာဖြစ်နေသည်။

သူတို့၏နောက်သို့လိုက်လာသော မိစ္ဆာသားရဲများသည် အရိပ်အယောင်မကျန်ဘဲ ပျောက်ကွယ်သွားခဲ့သည်။

‘ငါတို့က မိစ္ဆာတွေကို မောင်းထုတ်လိုက်ပြီလား’

ကျင်းခွန်းက တွေးမိသည်။

‘ငါ့ခန္ဓာကိုယ်ပေါ်ကို ချီစွမ်းအင်အလင်းတွေ ကျလာပြန်ပြီ’

ကျင်းခွန်း၏ တောင့်တင်းနေသောခန္ဓာကိုယ်က ဖြည်းဖြည်းချင်း သက်တောင့်သက်သာရှိသွားပြီး သက်ပြင်းချသည်။

‘တာအိုရောင်းရင်းမူယဲ့ရဲ့နည်းလမ်းက တကယ်အသုံးဝင်တာပဲ’

သူတွေးမိသည်။

ရှေ့တွင် ဟန်မူယဲ့က ပြုံးလိုက်သည်။

သစ်ပင်မိစ္ဆာနှင့် မိစ္ဆာသားရဲများသည် အလွန်အားနည်းနေလျှင်ပင် နှစ်ချီကျင့်ကြံလာခဲ့သော မိစ္ဆာများဖြစ်သည်။

တစ်ဦးချင်းစီ၍တိုက်ခိုက်မှုက အယားပြေရုံသာ ရှိမည်ဆိုလျှင်ပင် သိန်းချီသောတိုက်ခိုက်မှုများ ပူးပေါင်းလိုက်သောအချိန်တွင် သေစေနိုင်လောက်သောဒဏ်ရာကို ပေးနိုင်သည်။

သစ်ရွက်နှင့်ပွင့်ချပ်များ၏ ထိုးဖောက်မှုအား ခံလိုက်ရသော မိစ္ဆာသားရဲများကို သူကိုယ်တိုင် မြင်ခဲ့ရသည်။

ထိုမိစ္ဆာများ၏ အရိုး၊ အကြောနှင့် သားမွေးများအားလုံး စုတ်ပြဲနေပြီး ပျောက်ကွယ်သွားခဲ့သည်။

ကောင်းကင်အဆင့် ဝိညာဉ်ကိုယ်ခွဲကျင့်ကြံသူကပင် ထိုတိုက်ခိုက်မှုကို ထိပ်တိုက်ရင်ဆိုင်နိုင်မည်မဟုတ်ပေ။

ထိုတိုက်ခိုက်မှုကြောင့် အဆုံးမဲ့ပင်လယ်၏မိစ္ဆာများသည် ရေနက်ထဲသို့ ပြန်ဆင်းသွားပြီး အချိန်အတော်ကြသည်အထိ ထွက်မလာရဲတော့ပေ။

စိမ်းလန်းသောမြက်ခင်းပြင်ပေါ်တွင် အားပေးသံများ ပေါ်ထွက်လာသည်။ ကျင်းခွန်းက စိတ်လှုပ်ရှားနေပြီး မိစ္ဆာများကိုဦးဆောင်၍ ကျောက်စိမ်းသက်တံကြယ်ဆီသို့ သွားလိုက်သည်။

ဟန်မူယဲ့က သူ့ကိုကြည့်လိုက်ပြီး ပြောသည်။

“နားလည်လိုက်လား”

ကျင်းခွန်းက လျင်မြန်စွာခေါင်းညိတ်လိုက်ပြီး ပြောသည်။

“နားလည်ပါတယ်။ အားကောင်းတဲ့ရန်သူနဲ့တွေ့ရင် မှော်စွမ်းအားကိုအသုံးပြုပြီး သူတို့ရဲ့မျက်လုံးကို ဖုံးကွယ်ပေးလိုက်မယ်။ ပြီးရင် ခွန်အားစုဆောင်းပြီး တိုက်ခိုက်မယ်”

ထိုနည်းလမ်းက အလွန်အသုံးဝင်လိမ့်မည်ဟု သူမျှော်လင့်မထားခဲ့ပေ။

ထိုနည်းလမ်းနှင့်ဆိုလျှင် မိစ္ဆာမျိုးနွယ်သည် ကိုယ့်ကိုယ်ကိုယ် ကာကွယ်နိုင်လိမ့်မည်။

ဟန်မူယဲ့က ခေါင်းညိတ်လိုက်ပြီး ကျောပေါ်တွင်ရှိသောဓားအိမ်ကို နေရာကျအောင် လုပ်လိုက်သည်။ ထို့နောက် အဝတ်များကို ညင်သာစွာ ဆွဲဆန့်သည်။

သူက ဧည့်ခံပွဲတစ်ခုသို့သွားရန် ပြင်နေသကဲ့သို့ လှုပ်ရှားမှုများ ညင်သာနေသည်။

သူ့ပုံစံကို မြင်လိုက်ရသောအခါတွင် ကျင်းခွန်းက လျင်မြန်စွာပြောသည်။

“တာအိုရောင်းရင်းမူ၊ မင်းက ....”

ဟန်မူယဲ့က ခပ်ဟဟရယ်လိုက်ပြီး ဓားရိုးကို ကိုင်သည်။ သူက ညင်သာစွာ ပြောသည်။

“ကြယ်နှလုံးသားကို ဘာဖြစ်လို့ တခြားလူတွေဆီ ပေးလိုက်ရမှာလဲ”

ထို့နောက် သူက ပျံသန်းသွားသည်။

ဟန်မူယဲ့၏ခန္ဓာကိုယ်ပေါ်တွင် ဓားအလင်းနှင့် ရေခိုးရေငွေ့များ စုစည်းလာသည်။

သူ့မျက်လုံးများက သတ်ဖြတ်လိုစိတ်များဖြင့် ပြည့်နေပြီး ခန္ဓာကိုယ်၏ သိပ်သည်းသောတိုက်ပွဲဆန္ဒသည် အကောင်အထည်ပေါ်လုနီးပါး ဖြစ်နေသည်။

မိုင်ထောင်ချီအကွာတွင် ဝိညာဉ်ပုလဲတစ်လုံး တောက်ပနေသည်။ ဆယ်ချီသော ပြင်ပဘုံကျွမ်းကျင်သူနှင့် အဆုံးမဲ့ပင်လယ်၏ မဟာမိစ္ဆာများက တိုက်ခိုက်နေကြသည်။

ကောင်းကင်အဆင့်ကျင့်ကြံသူများ၏တိုက်ပွဲတွင် ရိုက်ချက်တစ်ချက်သည် တောင်တန်းနှင့်မြစ်များကို ပျက်စီးသွားစေနိုင်သည်။

အဆုံးမဲ့ပင်လယ်က ဖိနှိပ်ထားသော်လည်း ကောင်းကင်အဆင့်ကျင့်ကြံသူများသည် လောက၏ ထိပ်တန်းကျွမ်းကျင်သူများ ဖြစ်နေသေးသည်။

လှိုင်းလုံးများပေါ်ထွက်လာပြီး တိမ်တိုက်များကို ဖျက်ဆီးသွားသည်။ တိမ်တိုက်ထဲတွင် မိစ္ဆာချီနှင့် ချီစွမ်းအင်များ ထိတွေ့နေပြီး ပတ်ဝန်းကျင်တွင် ပြန့်ကျဲသွားသည်။

ကောင်းကင်အဆင့်စွမ်းအားမရှိလျှင် တိုက်ပွဲကို စောင့်ကြည့်နိုင်မည်မဟုတ်ပေ။ ပါဝင်နိုင်ရန်အတွက်ဆိုလျှင် ပိုဆိုးသေးသည်။

“ဝီ”

ထိုအချိန်၌ ပြင်ပဘုံကျွမ်းကျင်သူတစ်ဦး၏လက်ထဲတွင်ရှိသော ဓားက ညင်သာစွာ တုန်ခါလာသည်။

သူက အနည်းငယ်အံ့အားသင့်သွားပြီး အဝေးတစ်နေရာသို့ ကြည့်လိုက်သည်။ သူ့နတ်အာရုံသည် မိုင်တစ်ထောင်ကျော်အကွာသို့ ချက်ချင်းရောက်သွားသည်။

မိုင်တစ်ထောင်ကျော်အကွာတွင် အဖြူရောင်ဝတ်စုံနှင့် လူငယ်တစ်ဦးသည် ဓားအိမ်တစ်ခုကို လွယ်ထားပြီး ရေလှိုင်းများကို စီးနင်းလာသည်။

ဓားကျင့်ကြံသူ ....

မိုင်တစ်ထောင်ကျော်အကွာမှ သူ့ဓားကို တုံ့ပြန်စေနိုင်သော ဓားကျင့်ကြံသူ ....

ထိုအချိန်တွင် ကြယ်နှလုံးသားအတွက် တိုက်ခိုက်နေသော တခြားလူများကလည်း အာရုံခံမိသွားပြီး လှည့်ကြည့်လိုက်ကြသည်။

ဟန်မူယဲ့၏တိုက်ခိုက်လိုစိတ်သည် အလွန်သန်မာပြီး သူတို့၏စွမ်းအားများက တုံ့ပြန်လိုက်ကြသည်။

‘လူသား ဓားကျင့်ကြံသူတစ်ယောက်လား’

“မသိတတ်တဲ့ ကလေးတစ်ယောက်ပဲ။ ကိုယ့်အတွက်ကိုယ် မကြည့်တတ်ဘူး”

လက်လေးဖက်နှင့် လူဝံတစ်ကောင်၏မျက်နှာရှိသော ပေသုံးဆယ်မြင့်မားသည့်မိစ္ဆာက ကြမ်းတမ်းစွာ ရယ်မောလိုက်သည်။ သူ့လက်ထဲတွင်ရှိသော ဆေဘာဓားသည် ချီစွမ်းအင်အလင်းများဖြင့် တောက်ပလာသည်။

ထိုအလင်းသည် အေးစက်သော ဆေဘာဓားဆန္ဒအဖြစ် ပြောင်းလဲသွားခဲ့သည်။ ထိုဓားချက်သည် လေဟာနယ်ကို လွယ်ကူစွာ ထိုးခွဲနိုင်သည်။

ထိုကောင်းကင်အဆင့်မိစ္ဆာသည် အဆင့်မြင့်ဓားကျွမ်းကျင်သူတစ်ဦးဖြစ်သည်။

ဟန်မူယဲ့က အလွန်လျင်မြန်စွာ လှုပ်ရှားလာသည်။ သူက အသက်ရှူကြိမ်တစ်ရာအတွင်း၌ ကောင်းကင်အဆင့်မိစ္ဆာနှင့် မိုင်တစ်ရာအကွာသို့ ရောက်လာသည်။

ကြမ်းတမ်းသောမိစ္ဆာအလင်းသည် ဟန်မူယဲ့ကို လွှမ်းခြုံလိုက်ပြီး အားကောင်းသောဆေဘာဓားအလင်းတစ်ခု ကျဆင်းလာသည်။

ထိုဆေဘာဓားသည် အရိုင်းဆန်ပြီး ထိန်းချုပ်ရန် ခက်ခဲသည်။

ဆေဘာဓားအလင်းသည် လေဟာနယ်ကို ထိုးခွဲသွားပြီး ဟန်မူယဲ့၏ မျက်ခုံးနှစ်ဖက်ကြားသို့ ဦးတည်နေသည်။

လူဝံမိစ္ဆာ၏ ရှုံ့တွနေသောမျက်နှာသည် ဆိုးယုတ်စွာ ပြုံးလိုက်သည်။

ဟန်မူယဲ့က ခေါင်းမော့ကြည့်သည်။

သူက ကောင်းကင်အဆင့်မိစ္ဆာနှင့် အကြည့်ချင်းဆုံသွားသည်။

မဟာမိစ္ဆာ၏မျက်လုံးထဲတွင်ရှိသော မောက်မာခြင်း၊ သတိထားခြင်းနှင့် အေးစက်ခြင်းတို့ကို သူမြင်နိုင်သည်။

ရှုပ်ထွေးသောအတွေးများ သွယ်ယှက်နေသည်။

စိတ်အခြေအနေနှင့် ဝိညာဉ်စွမ်းအား တည်ငြိမ်သွားသောအခါတွင် ဟန်မူယဲ့က ပိုမြင်နိုင်လာသည်။

ဥပမာအနေဖြင့် နှလုံးသားဖြစ်သည်။

ဤဓားချက်သည် အလွန်အားနည်းသည်။

နောက်ဆက်တွဲလိုက်လာသော ဓားချက်သုံးချက်သည် လူသတ်ကွက်များဖြစ်သည်။

ထိုမဟာမိစ္ဆာသည် သူ့ကိုသတ်ဖြတ်ရန်အတွက် အစွမ်းကုန်ထုတ်သုံးထားသည်။ သူက ကိုယ်ပိုင်တိုက်ခိုက်နိုင်စွမ်းကို ထုတ်ပြသည့်အပြင် တိုက်ပွဲကိုရှောင်လွှဲ၍ အကျိုးအမြတ်များသိမ်းယူရန် စီစဉ်ထားသည်။

သို့သော် ဟန်မူယဲ့က အကြည့်တစ်ချက်နှင့် ပြောင်းလဲမှုအများအပြားကို မြင်လိုက်ရသည်။

မြူခိုးထုတစ်ခု လွင့်ပျယ်သွားပုံပေါ်သည်။

အဆုံးသတ်တွင် အကြံအစည်များအားလုံးသည် သူ့လက်ထဲတွင်ရှိသောဓားကဲ့သို့ မထက်မြိပေ။

‘ငါ့ရဲ့နှလုံးသားထဲမှာ ဓားတစ်လက်ရှိသလို လက်ထဲမှာလည်း ဓားတစ်လက်ရှိတယ်။ ဘာကို အားထုတ်နေရမှာလဲ’

သူတွေးသည်။

‘ရန်သူနဲ့ ရင်ဆိုင်ရတဲ့အခါမှာ ဓားကို ဆွဲထုတ်လိုက်မယ်’

“ခလွမ် ....”

သူက အစိမ်းရောင်ကံကြမ္မာဓားကို ဆွဲထုတ်လိုက်သည်။ ဓားကို ညာဘက်လက်ဖြင့်ကိုင်ထားပြီး ရှေ့သို့ ညွှန်ပြသည်။

ကမ္ဘာတစ်ခုကို ဖြတ်တောက်နိုင်သည့် အားကောင်းသောဆေဘာဓားအလင်းသည် ဓားသွားနှင့် ထိတွေ့သွားသည်။ ဆေဘာဓားအလင်းသည် ရေထဲသို့ရောက်သွားသကဲ့သို့ နစ်မြုပ်သွားသည်။

ရေဓာတ်မျိုးဆက်၏စွမ်းအားသည် စွမ်းအားအမျိုးမျိုးကို ပေါင်းစပ်နိုင်သည်။

လက်လေးဖက်မိစ္ဆာ၏မျက်နှာထားသည် ပြောင်းလဲမသွားပေ။ ရန်သူကို ဓားတစ်ကွက်ဖြင့်မသတ်နိုင်ကြောင်း ခန့်မှန်းထားပုံရသည်။ သူက ဆေဘာဓားကို ရေပြင်ညီနှင့် ထောင့်ဖြတ်အတိုင်း ခုတ်ချသည်။

လျင်မြန်သည်။

ဆေဘာဓားအလင်းသည် မှိန်ဖျော့နေပြီး အလွန်လျင်မြန်သည်။

ဓား၏ထက်မြိမှုကို အမြန်နှုန်းဖြင့် တိုင်းတာနိုင်သည်။

“ကောင်းလိုက်တဲ့ဆေဘာနည်းစနစ်ပဲ”

မိုင်တစ်ထောင်အကွာတွင် ဓားတစ်လက်ကိုင်ထားသောလူအိုကြီးက အော်ဟစ်လိုက်သည်။

ထိုဓားချက်ကို ဝိညာဉ်သူငယ်ပဥ္စမအဆင့်အောက်တွင်ရှိသော ကျင့်ကြံသူများ ရှောင်တိမ်းနိုင်မည်မဟုတ်ပေ။

လက်လေးဖက်မိစ္ဆာသည် ကျင့်ကြံခြင်း၏အထွတ်အထိပ်တွင် ရှိနေသည်။

“လက်လေးဖက်လူဝံကလန်က ဆေဘာဓားနည်းစနစ်တွေကို အမွေဆက်ခံထားတယ်လေ”

တာအိုဝတ်စုံနှင့်လူအိုကြီးတစ်ယောက်က တီးတိုးပြောလိုက်သည်။

ကြယ်နှလုံးသားအတွက်ရောက်လာသော ကျင့်ကြံသူအများစုသည် ပြင်ပဘုံကျွမ်းကျင်သူများ ဖြစ်ကြသည်။ သူတို့က တာအိုပြိုင်ပွဲတွင် အခွင့်အရေးလာရှာသည်။

ထိုလူများသည် ယနေ့တွင် အဆုံးမရှိတိုက်ခိုက်နေသော်လည်း မနက်ဖြန်တွင် ပူးပေါင်းသွားနိုင်သည်။

သူတို့အားလုံးက ကောင်းကင်အဆင့်ကျင့်ကြံသူများ ဖြစ်ကြသည်။ အဆင့်တူများ၏တိုက်ပွဲကို ကြည့်ရှုပြီး တခြားလူများ၏နည်းစနစ်ကို ပိုမိုနားလည်နိုင်လျှင် သူတို့၏ကျင့်ကြံခြင်းနှင့် တိုက်ခိုက်နိုင်စွမ်းအတွက် အကျိုးရှိလိမ့်မည်။

“အဲဒီကလေးက ဒီတိုက်ခိုက်မှုကို ခုခံနိုင်မှာမဟုတ်ဘူး”

ကျောပေါ်တွင် ဓားတစ်လက်လွယ်ထားသော ဓားတာအိုကောင်းကင်အဆင့်ကျွမ်းကျင်သူတစ်ဦးက ခေါင်းခါသည်။

ဆေဘာဓားအလင်းသည် အလွန်လျင်မြန်သည်။

တိုက်ပွဲကို‌စောင့်ကြည့်နေသော ကောင်းကင်အဆင့်ကျင့်ကြံသူအများစုက ထိုဆေဘာဓားချက်ကို ခုခံနိုင်မည်ဟု ယုံကြည်ချက်မရှိပေ။

ဟန်မူယဲ့က ဆေဘာဓားအလင်းကို မြင်လိုက်ရသောအခါတွင် ညင်သာစွာရွေ့လျားလိုက်သည်။

သူက ထိုဓားချက်ကို ရင်ဆိုင်မည်မဟုတ်ပေ။

သူက ထိုဓားချက်ကိုရင်ဆိုင်ရန်အတွက် အစီအစဉ်မရှိပေ။

ယနေ့တွင် သူ့တိုက်ခိုက်လိုစိတ်သည် ကောင်းကင်အထိ မြင့်တက်နေသည်။ ထိုဆေဘာဓားချက်ကြောင့် လျော့နည်းမသွားသင့်ပေ။

ဟန်မူယဲ့က လက်ထဲတွင်ရှိသော အစိမ်းရောင်ကံကြမ္မာဓားဖြင့် ထိုးချလိုက်သည်။ သူ့လှုပ်ရှားမှုများက အလွန်နှေးကွေးသည်။ သို့သော် သူက ဆေဘာဓားအလင်းထက် ခြေလှမ်းတစ်ဝက် ပိုမြန်သည်။