အခန်း (၅၅၈)

ဆေဘာဓားအလင်းသည် သူ၏ပုံရိပ်ကိုသာ ထိုးခုတ်သွားခဲ့သည်။

ဓားအလင်းသည် မျဉ်းတစ်ကြောင်းအဖြစ် စုစည်းသွားပြီး လက်လေးဖက်မိစ္ဆာ၏လက်တစ်ဖက်ကို ဖြတ်တိုက်သွားသည်။

“ရွှပ်”

လက်တစ်ဖက် ပြုတ်ကျလာသည်။

ဟန်မူယဲ့က ပေတစ်ထောင်အကွာ၌ ပြန်ပေါ်လာသည်။

သူက လက်ကိုဝှေ့ယမ်းလိုက်ပြီး လက်ပြတ်ထဲတွင်ရှိနေသော ဆေဘာဓားကို လှမ်းယူသည်။

ဆေဘာဓား၏အလေးချိန်ကို ခံစားလိုက်ရသည်။

ဆေဘာဓားသည် အနည်းဆုံး ပေါင်ချိန်တစ်သောင်းလေးသည်။ လက်ကိုင်သည် ဆယ်ပေရှည်လျားပြီး ဓားသွားသည် ၁၂ပေရှည်လျားသည်။ ဓားကိုယ်ထည်တွင် အေးစက်သောရွှေအလင်းတစ်ခုအပြင် မိစ္ဆာအလင်းများလည်း တောက်ပနေသည်။

ဆေဘာဓားထဲသို့ ဓားချီများတိုးဝင်သွားပြီး ဟန်မူယဲ့၏စိတ်ထဲတွင် ပုံရိပ်များပေါ်လာသည်။

နှစ်ထောင်ချီကြာသည်အထိ သန့်စင်ခြင်းနှင့် သွေးသန့်စင်ခြင်းများကို ပြုလုပ်ခဲ့ပြီး ဆေဘာဓားရှည်ဖြစ်တည်လာရန် နှစ်တစ်ရာ အချိန်ယူခဲ့ရသည်။

လက်လေးဖက်လူဝံများက ဆေဘာဓားကို ရရှိလာသောအခါတွင် အသုံးချနိုင်ရန်အတွက် နောက်ထပ်နှစ်တစ်ရာ ပျိုးထောင်ခဲ့သည်။

ဆေဘာဓားကို နွေးထွေးသောသွေးများထဲတွင် စိမ်ထားခဲ့သည်။

ဆေဘာဓားကို နှစ်တစ်ရာပျိုးထောင်ပေးရန်အတွက် သက်ရှိတစ်သိန်းကို သတ်ဖြတ်ခဲ့သည်။

ဟန်မူယဲ့က သတ်ဖြတ်မှုများကို မြင်ခဲ့ရသည်။ ကြမ်းတမ်းပြီးအေးစက်သော လက်လေးဖက်လူဝံများသည် ကျွမ်းကျင်သူများကို ပျိုးထောင်ပေးခဲ့သည်။ ထို့နောက် သူတို့က အချင်းချင်း ပြန်လည်သတ်ဖြတ်ကြသည်။

ဆေဘာဓားရှည်လေးလက်ကို ရရှိနိုင်သောလူများသည် သိန်းချီသောပြိုင်ဘက်များကို အနိုင်ယူခဲ့ရသည်။

ကလန်ထဲတွင် သန်မာသူက အားနည်းသူများကို အနိုင်ကျင့်သည်။

ဟန်မူယဲ့က ဆေဘာဓားရှည်ကို ကိုင်ထားပြီး ဟယ်ထို့ဟုအမည်ရသော လက်လေးဖက်လူဝံကို ကြည့်လိုက်သည်။

ထိုကလန်ထဲတွင် သွေးမစွန်းသောလူများ မရှိပေ။

ထိုအချိန်တွင် မိုင်တစ်ရာအကွာ၌ ပင့်သက်ရှိုက်သံများကို ကြားနိုင်သည်။

ဟန်မူယဲ့၏ဓားသည် ပေတစ်ထောင်အကွာမှ ပျံသန်းလာပြီး လူဝံပျံ၏လက်တစ်ဖက်ကို ဖြတ်တောက်ခဲ့သည်။ ဤနေရာတွင်ရှိနေသောလူများထဲတွင် ထိုနည်းလမ်းမျိုးကိုပိုင်ဆိုင်သောလူများ သိပ်မရှိနိုင်ပေ။

“ဒီကလေးက တကယ်ကြမ်းတာပဲ”

အနက်ရောင်ချပ်ဝတ်နှင့်လူတစ်ဦးက လေးနက်သောမျက်နှာထားဖြင့် ပြောလိုက်သည်။

‘ကြမ်းတာလား’

ကောင်းကင်အဆင့်သို့ ရောက်ရှိလာသောလူအားလုံးတွင် ကြမ်းတမ်းသောနည်းစနစ်များ ရှိသည်။

မဟာကျင့်ကြံသူအများအပြားက အပြုံးတစ်ခုနှင့်အတူ တိတ်ဆိတ်စွာစောင့်ကြည့်နေသည်။

မိုင်တစ်ရာအကွာတွင် ဟန်မူယဲ့က ဓားကို ထပ်မြှောက်လိုက်သည်။

လက်တစ်ဖက်ပြတ်သွားသော လက်လေးဖက်လူဝံမိစ္ဆာ ဟယ်ထို့၏မျက်နှာထားက မည်းမှောင်နေသည်။ လက်ပြတ်သွားသောနေရာတွင် သွေးအချို့စွန်းပေနေပြီး တခြားလက်သုံးဖက်တွင် ဆေဘာဓားအလင်းများ လှုပ်ရှားနေသည်။

သူက ထိုဓားကျင့်ကြံသူမျိုးကို တစ်ခါမှမကြုံဘူးပေ။

ယခုအချိန်တွင် သူက ကြောက်ရွံ့နေသည်။

သို့သော် ဟန်မူယဲ့က ဓားမြှောက်လိုက်သောအခါ သူ့နှလုံးသားထဲတွင်ရှိနေသော လက်ကျန်အသိစိတ်က ပျောက်ဆုံးသွားသည်။

သတ် ....

ရှေ့တွင်ရှိနေသော ဓားကျင့်ကြံသူကိုသတ်ဖြတ်ပြီး လက်စားချေရမည်။

သူ၏ ဆေဘာဓားရှည်သုံးချောင်းသည် ရေလှိုင်းများကို ဖန်တီးလိုက်ပြီး တိမ်တိုက်များကြားတွင် ဆေဘာဓားအလင်းက ဟန်မူယဲ့ကို တိတ်ဆိတ်စွာ တိုက်ခိုက်လိုက်သည်။

ဤတစ်ကြိမ်တွင် ဆေဘာဓားအလင်းက လျင်မြန်ရုံသာမကဘဲ ပင်လယ်နှင့် တိတ်ဆိတ်စွာ ပေါင်းစပ်သွားသည်။

ဓားတစ်ချက်ကြောင့် ရေစီးသည် ရပ်တန့်သွားခဲ့သည်။

ထိုဓားချက်သည် တာအိုစွမ်းအားများကို အသုံးချထားသည်။

ဟန်မူယဲ့၏မျက်လုံးများ တောက်ပသွားသည်။ သူက ခပ်ဟဟရယ်လိုက်ပြီး ဓားဖြင့်ထိုးချသည်။

သူက ထိုဓားချက်ကို မြင်ချင်သောကြောင့် ဝိညာဉ်စွမ်းအားကို အသုံးချပြီး တစ်ဖက်လူကို အရင်တိုက်ခိုက်ရန် လှုံ့ဆော်ပေးခဲ့သည်။

လူဝံမိစ္ဆာဟယ်ထို့က ဆေဘာဓားကိုဆွဲထုတ်လိုက်ပြီး ရေထုကို ခုတ်ဖြတ်သည်။

သူက ကလန်၏ အမွေအနှစ်ဆေဘာဓားနည်းစနစ်ကို အဆုံးစွန်အထိ ကျင့်ကြံပြီး ကိုယ်ပိုင်နားလည်မှုများ ရရှိထားသည်။

ဟန်မူယဲ့က သူ၏ဆေဘာဓားနည်းစနစ်ကို နားလည်သွားပြီဖြစ်သော်လည်း ကိုယ်တိုင်မြင်တွေ့ချင်သည်။

ဆေဘာဓားအလင်းသည် ရေခိုးရေငွေ့များဖြင့် ပေါင်းစပ်သွားပြီး ဟန်မူယဲ့၏နောက် သုံးပေအကွာ၌ တိတ်ဆိတ်စွာပေါ်လာ၍ ဓားတစ်လက်သဖွယ် ထိုးချလိုက်သည်။

ဆေဘာဓားရှည်သုံးလက်သည် ညင်သာသောအလင်းများဖြင့် လှုပ်ရှားနေသည်။

လေးလံသောအရာဝတ္ထုတစ်ခုကို ပေါ့ပါးစွာ ပင့်မြှောက်နိုင်သည်။

မဟာတာအိုပြိုင်ပွဲကြောင့် ကျွမ်းကျင်သူများစုဝေးလာသည့်အတွက် ဟန်မူယဲ့က ထိုကျင့်ကြံသူမျိုးနှင့် တိုက်ခိုက်ခွင့်ရခဲ့သည်။

ဟန်မူယဲ့က ပြုံးလိုက်ပြီး အစိမ်းရောင်ကံကြမ္မာဓားကို နောက်ပြန်ထိုး၍ ဆေဘာဓားအလင်းကို ကာကွယ်လိုက်သည်။

သူ၏ဘယ်ဘက်လက်က လှုပ်ရှားလိုက်ပြီး ရွှေရောင်သမာဓိစွမ်းအားများဖြင့် ရစ်ပတ်ထားသော ခရမ်းရောင်မီးတောက်ဓားသည် ပျံထွက်သွားပြန်သည်။

လက်လေးဖက်လူဝံတွင် လက်နှစ်ဖက်သာ ကျန်တော့သည်။

ဟယ်ထို့က ကြောက်ရွံ့စွာဟိန်းဟောက်လိုက်ပြီး ရူးသွပ်စွာနောက်ဆုတ်သွားသည်။

မိုင်ရာချီအကွာတွင်ရှိနေသော ကောင်းကင်အဆင့်မိစ္ဆာများ တောင့်တင်းသွားသည်။

တိုက်ပွဲသည် မျက်တောင်တစ်ခတ်စာအချိန်အတွင်း၌ လျင်မြန်စွာအဆုံးသတ်သွားသည်။

ဟယ်ထို့က ဟန်မူယဲ့ကိုတိုက်ခိုက်ပြီး လက်နှစ်ဖက်ပြတ်သွားသောအချိန်အထိ အသက်ဆယ်ခါရှုချိန်ခန့်သာ ကြာမြင့်ခဲ့သည်။

ကောင်းကင်အဆင့်သို့ရောက်နေသော ပြိုင်ဘက်ကင်းဓားတာအိုကျင့်ကြံသူတစ်ဦးက ထိုသို့ပင် ရှုံးနိမ့်သွားရသည်။

ဟယ်ထို့က ရူးသွပ်စွာထွက်ပြေးသွားသောအချိန်တွင် ဟန်မူယဲ့က ခေါင်းခါလိုက်ပြီး ပြုတ်ကျလာသော ဆေဘာဓားရှည်များကို ကောက်သိမ်းလိုက်သည်။ သူက ဟယ်ထို့နောက်သို့ လိုက်မသွားတော့ပေ။

ပျက်စီးနေသောစိတ်အခြေအနေနှင့် ကောင်းကင်အဆင့်ကျွမ်းကျင်သူကို ကောင်းကင်အဆင့်ကျွမ်းကျင်သူအဖြစ် မယူဆနိုင်ပေ။

ထိုကောင်းကင်အဆင့်ကျွမ်းကျင်သူကို တတိယအဆင့် သို့မဟုတ် စတုတ္ထအဆင့် ကမ္ဘာမြေအဆင့်ကျင့်ကြံသူနှင့် ရွှေအမြုတေအဆင့်ကျင့်ကြံသူများကပင် သတ်ပစ်နိုင်သည်။

ဤနေရာသည် တာအိုပြိုင်ပွဲဖြစ်သည်။ သူက မည်မျှကြာအောင် ထွက်ပြေးနိုင်မည်နည်း။

အဆုံးမဲ့ပင်လယ်ထဲတွင် များပြားသောမိစ္ဆာများက ဟယ်ထို့၏နောက်သို့ တိတ်ဆိတ်စွာလိုက်သွားသည်။

သူ၏ရှင်သန်မှုသည် ကံကြမ္မာအပေါ်တွင်သာ မူတည်နေသည်။

ဟန်မူယဲ့က ဓားနှစ်လက်ကိုင်ထားပြီး အဝေးတစ်နေရာသို့ ကြည့်လိုက်သည်။

‘အဲဒီနေရာမှာ ဒါဇင်ချီနေတဲ့ ဝိညာဉ်သူငယ်အထွတ်အထိပ်အဆင့်ကျင့်ကြံသူတွေက စမ်းကြည့်ချင်နေတာမဟုတ်ဘူးလား’

သူတွေးမိသည်။

ဟန်မူယဲ့က ကျယ်လောင်စွာရယ်သည်။ သူက ဓားနှစ်လက်ကို ဓားအိမ်ထဲသို့ ပြန်သိမ်းလိုက်ပြီး လက်နှစ်ဖက်ကိုနောက်ပစ်၍ ရှေ့ဆက်လျှောက်သွားသည်။

“ကောင်းကင်အံ့ဖွယ်ကမ္ဘာရဲ့ ဓားကျင့်ကြံသူဟန်မူယဲ့က သင်ပြမှုကိုလက်ခံဖို့ ရောက်လာပါတယ် ....”

ဓားကျင့်ကြံသူ၊ စိန်ခေါ်ခြင်း ....

ကောင်းကင်အဆင့်ကျင့်ကြံသူများက တစ်ယောက်ကိုတစ်ယောက် ကြည့်လိုက်သည်။ လူတချို့က နောက်ဆုတ်သွားချင်ပုံရသည်။

အသက်ရှုကြိမ်ဆယ်ခါတွင်း၌ လက်လေးဖက်လူဝံကို အနိုင်ယူပြီး လက်နှစ်ဖက်ကို ဖြတ်ပစ်ခဲ့သည်။ သူ့ကို အနိုင်ယူနိုင်သောလူများ သိပ်မရှိပေ။

“အနောက်ဘက်နယ်စပ်ကမ္ဘာ ဟွားယန်ဓားဂိုဏ်းရဲ့ ဖုန်းကျီဟယ်က စိန်ခေါ်မှုကို လက်ခံပါတယ်”

တောက်ပနေသောဓားတစ်လက်နှင့် မုတ်ဆိတ်ဖြူလူအိုကြီးတစ်ယောက် ပျံသန်းလာသည်။ သူ့ဓားသည် သန်မာသောလေပြင်းအဖြစ် ပြောင်းလဲသွားပြီး ဟန်မူယဲ့၏ခေါင်းကို လွှမ်းခြုံလိုက်သည်။

ဓားအလင်းပေါ်လာသောအခါတွင် ဟန်မူယဲ့ကို ကြယ်လေပြင်းများက ရစ်ပတ်သွားသည်။

“မှော်ရတနာ”

လူတစ်ယောက်က အော်ဟစ်လိုက်သည်။

ထိုဓားသည် မှော်ရတနာတစ်ခုဖြစ်သည်။

ဓားကျင့်ကြံခြင်းနှင့် မှော်ရတနာစွမ်းအားကို ပေါင်းစည်းလိုက်သောအခါတွင် တိုက်ခိုက်နိုင်စွမ်းများ ဆယ်ဆကျော် တိုးလာလိမ့်မည်။

ဖုန်းကျီဟယ်နှင့်တိုက်ခိုက်ခဲ့သော လူများ၏မျက်နှာက ဖြူဖျော့သွားသည်။

ဖုန်းကျီဟယ်က မှော်ရတနာဓားကိုထုတ်ယူ၍ တိုက်ခိုက်ခဲ့လျှင် သူတို့အားလုံး သေသွားလိမ့်မည်။

လေပြင်းများကြားတွင်ရှိနေသော ဟန်မူယဲ့က မျက်နှာထားပြောင်းလဲမသွားပေ။

ထိုကြယ်လေပြင်းသည် သန်မာသော်လည်း သူ့ကို တိုက်ရိုက်မသတ်နိုင်ပေ။

သို့သော် ထိုဓားတာအိုနည်းစနစ်သည် လေပြင်းကို ဓားသွားအဖြစ် အသုံးပြုသည်။

လေဓာတ်မျိုးဆက် ....

ဟန်မူယဲ့၏အကြည့်က မှုန်ဝါးနေသောကြယ်လေပြင်းများကို ကြည့်လိုက်ပြီး စိတ်ထဲတွင် အဆုံးစွန်အထိ ဖိအားပေးလိုက်သည်။

“ခလွမ် ....”

ဓားရှည်ကို ဆွဲထုတ်သည်။ ဓားအလင်းတစ်ခု တောက်ပလာပြီး အကြိမ်ပေါင်းများစွာချုံ့ထားသော လေဆင်နှာမောင်းတစ်ခု ပေါ်လာသည်။

တစ်ခု၊ နှစ်ခု၊ တစ်ရာ၊ တစ်ထောင် ....

လေပြင်းများ လှည့်ပတ်နေသည်။

လေနှင့်တိမ်တိုက်များ ဆက်သွယ်နေပြီး ပျောက်ကွယ်သွားသည်။

အပြင်လူများသည် သောင်းကျန်းနေသောကြယ်လေပြင်းများကိုသာ မြင်ရသည်။ သူတို့က တည်ငြိမ်နေသောလေထုကို မမြင်နိုင်ပေ။

ဖုန်းကျီဟယ်က မျက်မှောင်ကြုတ်လိုက်ပြီး တုံ့ဆိုင်းမနေတော့ပေ။ သူက ပျံတက်သွားပြီး ဓားဖြင့်ခုတ်ချသည်။

ထိုဓားချက်သည် အလွန်လေးလံသည်။ ဓားချက်ကျဆင်းမလာခင် ကြယ်လေပြင်းများကိုထိုးဖောက်ပြီး သက်တောင့်သက်သာရှိစွာလမ်းလျှောက်နေသော ဟန်မူယဲ့ကို ဖော်ပြလိုက်သည်။

ခုန်ဝင်လာသောဖုန်းကျီဟယ်ကို မြင်ရသောအခါတွင် ဟန်မူယဲ့က ရယ်လိုက်ပြီး ဓားကို လှုပ်ရှားသည်။

လေစီးကြောင်းများ ပေါ်ထွက်လာသည်။

ထောင်ချီသော လေစီးကြောင်းများသည် ဖုန်းကျီဟယ်ကို ရစ်ပတ်သွားသည်။

လေကို လေနှင့်တိုက်ခိုက်သည်။

“အေးမြတဲ့လေပြေလေညင်းက တောင်ကုန်းကိုရစ်ပတ်ပြီး တိမ်တိုက်တွေနဲ့အတူ ဆောင်းဦးလေပြေအဖြစ် ပြောင်းလဲသွားတယ်”

“လေဓာတ်မျိုးဆက်၊ ပထမဓားနည်းစနစ်၊ လွင့်မျောတိမ်တိုက်”

လေသည် တိမ်တိုက်ကိုမှုတ်ထုတ်ပြီး ပြိုကွဲသွားစေသည်။

ဟန်မူယဲ့၏စကား အဆုံးသတ်သွားသောအချိန်တွင် တိမ်တိုက်များလှုပ်ရှားလာပြီး လေပြင်းများ ပျောက်ကွယ်သွားသည်။ ဓားအလင်းပေါ်ထွက်လာသည်။ လေပြင်းသည် ဓားတစ်လက်ဖြစ်သည်။

“ရွှပ်”

ဖုန်းကျီဟယ်က ပတ်ဝန်းကျင်တွင်ပြေးလွှားနေသောဓားအလင်းကို မတားဆီးနိုင်ပေ။ သူက ကိုယ်ပိုင်ဓားအလင်းကိုဖောက်ခွဲ၍ လမ်းဖောက်လိုက်သည်။

သူက ပေတစ်ထောင်အကွာသို့ ပြန်ရောက်လာသောအခါတွင် ချွေးများဖြင့် စိုရွှဲနေသည်။

ဖုန်းကျီဟယ်က လည်ပင်းကို ညင်သာစွာထိကြည့်လိုက်ပြီး မျက်နှာတစ်ခုလုံး ဖြူဖျော့သွားသည်။

ရွှေရောင်သမာဓိစွမ်းအားများ ရောယှက်နေသော ဒဏ်ရာတစ်ခုကြောင့် သူက နှလုံးခုန်မြန်လာသည်။

ထိုဒဏ်ရာက အနည်းငယ်ပိုမိုနက်ရှိုင်းနေလျှင် သူက သေဆုံးသွားလိမ့်မည်။

“ငါအရှုံးပေးတယ်”

ဖုန်းကျီဟယ်က လွင့်မျောနေသော ကြယ်နှလုံးသားကို လှမ်းကြည့်ပြီး လက်နှစ်ဖက်ကိုဆုပ်ကိုင်၍ ဟန်မူယဲ့ကို နှုတ်ဆက်သည်။ ထို့နောက် လှည့်ထွက်သွားသည်။

ဓားတစ်ချက်ဖြင့် ရှုံးနိမ့်ခဲ့ပြီး ဆက်ရှိနေလျှင် သေလမ်းရှာသကဲ့သို့ ဖြစ်နေလိမ့်မည်။

“အနိုင်ပေးတဲ့အတွက် ကျေးဇူးတင်ပါတယ်”

ဟန်မူယဲ့က ပြုံးလိုက်ပြီး လက်ကို ဝှေ့ယမ်းပြသည်။ သူ့ပတ်ဝန်းကျင်တွင်ရှိသော ကြယ်လေပြင်းများသည် သူ့လက်ထဲတွင်ရှိသော အစိမ်းရောင်ဓားတစ်လက်အဖြစ် ပြောင်းသွားသည်။

မှော်ရတနာဓား ....

ဖုန်းကျီဟယ်က ရင်နာနေသော်လည်း လှည့်ထွက်သွားရုံသာ တတ်နိုင်သည်။

‘အဲဒီဓားကို ငါပြန်ရနိုင်သေးလား’

နေရာတွင်ရပ်နေသော ဟန်မူယဲ့က ဓားရိုးကို ဆုပ်ကိုင်၍ သမာဓိစွမ်းအားနှင့် ဓားချီကို တစ်ချိန်တည်း ထည့်သွင်းလိုက်သည်။

ဓားအလင်းများ ပေါ်ထွက်လာပြီး ဓားရှည်သည် တုန်ခါသွားသည်။

အဝေးတစ်နေရာတွင်ပျံသန်းနေသော ဖုန်းကျီဟယ်က ခပ်အုပ်အုပ် ညည်းညူလိုက်ရသည်။ သူ့ပါးစပ်ထဲမှ သွေးများစီးကျလာပြီး မျက်လုံးထဲတွင် ထိတ်လန့်မှုများရှိနေသည်။

‘မှော်ရတနာဓားက ချက်ချင်းသန့်စင်ခံလိုက်ရတာလား’

‘သူက ဘယ်လိုဓားကျင့်ကြံသူမျိုးလဲ’

‘သူက မကောင်းဆိုးဝါးတစ်ယောက်ပဲ’

ဟန်မူယဲ့က မှော်ရတနာဓားကို ကိုင်ထားပြီး စိတ်ထဲတွင် ပုံရိပ်များကိုကြည့်၍ ဖြည်းဖြည်းချင်း ရှေ့ဆက်လျှောက်လာသည်။

အနောက်ဘက်နယ်စပ်ကမ္ဘာသည် ကျွမ်းကျင်သူအများအပြားရှိသော ကမ္ဘာကြီးတစ်ခုဖြစ်သည်။

ဟွားယန်ဓားဂိုဏ်းသည် အဓိက ဂိုဏ်းတစ်ဂိုဏ်း ဖြစ်သည်။ သူတို့၏ဓားပညာရပ်သည် အလွန်ကောင်းမွန်ပြီး ဓားတာအိုကို နားလည်ထားသော မဟာကျင့်ကြံသူများ ရာချီ၍ ရှိနေသည်။

ဓားကိုအသုံးပြု၍ ပြန်လည်မွေးဖွားခြင်းအဆင့်တွင်ရှိနေသော ဓားသူတော်စင်များပင် ရှိသည်။

ဖုန်းကျီဟယ်က ဂိုဏ်း၏ စည်းကမ်းထိန်းသိမ်းရေးမှူးတစ်ယောက်ဖြစ်သည်။ သူ့ကျင့်ကြံဆင့်က အတားအဆီးနှင့်ကြုံတွေ့နေသောကြောင့် တာအိုပြိုင်ပွဲသို့လာရောက်ပြီး အဆင့်တက်နိုင်ရန် အခွင့်အရေးရှာဖွေနေသည်။

ဟန်မူယဲ့က ဟွားယန်ဓားဂိုဏ်း၏ ဓားတာအိုအမွေအနှစ်ကို မြင်လိုက်ရသည်။

လေ ....

လေဓာတ်မျိုးဆက် ဓားနည်းစနစ်ဆယ့်သုံးခုသည် တာအိုကို လမ်းညွှန်ပေးသည်။

ဟန်မူယဲ့က ဓားကို ဓားအိမ်ထဲတွင် ထည့်လိုက်ပြီး တိုက်ခိုက်လိုစိတ်ကြောင့် တောက်ပနေသောမျက်လုံးများဖြင့်‌ မော့ကြည့်သည်။

“ကောင်းကင်အံ့ဖွယ်ကမ္ဘာရဲ့ ဓားတာအိုကျင့်ကြံသူက သင်ပြမှုကိုလက်ခံဖို့ ရောက်လာပါတယ်”

....

ဓားတစ်လက်ဖြင့် လက်လေးဖက်လူဝံပျံကျွမ်းကျင်သူကို အနိုင်ယူခဲ့သည်။ ဓားကွက်တစ်ကွက်ဖြင့် ကောင်းကင်အဆင့် မဟာဓားကျင့်ကြံသူကို ရှုံးနိမ့်သွားစေခဲ့သည်။

ထိုတိုက်ခိုက်နိုင်စွမ်းမျိုးကို မကြောက်ရွံ့သောလူ မရှိပေ။

ကြယ်နှလုံးသား၏အောက်တွင် ပြင်ပဘုံကျွမ်းကျင်သူများ၏မျက်နှာထားက လေးနက်နေသည်။

“ဘုန်း”

အဆုံးမဲ့ပင်လယ်၏ မဟာမိစ္ဆာကြီးတစ်ယောက် ခုန်ထွက်လာပြီး ကောင်းကင်ထက်တွင်ရှိနေသော ကြယ်နှလုံးသားဆီသို့ ဦးတည်လိုက်သည်။

အဆုံးမဲ့ပင်လယ်၏မိစ္ဆာများသည် အသိဉာဏ်နိမ့်ပါးသော်လည်း သွေးမျိုးဆက်စွမ်းအား၏ညွှန်ပြချက်ကို လိုက်နာ၍ အဖိုးတန်ရတနာများကို ရှာဖွေနိုင်သည်။

ကြယ်နှလုံးသားသည် ရတနာတစ်ခုဖြစ်သည်။

“သားရဲကောင်၊ မင်းက သေချင်နေတာပဲ ....”

လူတစ်ယောက်က အော်ဟစ်လိုက်ပြီး ကျောက်စိမ်းရောင်တင်းပုတ်တစ်စုံဖြင့် ထုချသည်။

လူတစ်ယောက်က စကားမပြောဘဲ ရွှေရောင်အလံတိုင်ကို အသက်သွင်း၍ မီးတိမ်တိုက်များကို ဖန်တီးလိုက်သည်။

ချက်ချင်းဆိုသလိုပင် ကြယ်နှလုံးသားတိုက်ပွဲ စတင်လာသည်။