အခန်း (၅၆၅)

ဟန်မူယဲ့က အပြင်ဘက်တွင်ရှိနေသော မှောင်ရိပ်သန်းလာသည့်ကောင်းကင်ကိုကြည့်လိုက်ပြီး တည်ငြိမ်စွာပြောသည်။

“အမ်”

ကျန့်တနျိုက ဗလာဖြစ်နေသောမျက်နှာထားဖြင့် ခေါင်းမော့ကြည့်သည်။

သူက အသက်စွန့်ရန်အတွက် ဤနေရာသို့ ရောက်လာခဲ့သည်။

သူတို့၏ရွာတွင် သုံးနှစ်၊ ငါးနှစ်တိုင်း၌ ယဇ်ပူဇော်ခံရသောလူများ အမြဲရှိနေတတ်သည်။

မြို့ပြင်တွင်ရှိသော သာမန်လူသားများအတွက် ထိုကိစ္စသည် ရိုးရာတစ်ခု ဖြစ်လာသည်။

ကျန့်တနျိုက အစေခံတစ်ယောက်ဖြစ်သွားပြီး သုံးနှစ်ကြာသည်အထိ ပြန်လာမည်မဟုတ်ကြောင်း ပြောခဲ့သောအချိန်တွင် သူ့ဇနီးက တစ်ခုခုကို ခန့်မှန်းထားပြီးပုံပေါ်သည်။

“မင်းက မလုပ်ချင်ဘူးလား”

ဟန်မူယဲ့က မျက်မှောင်ကြုတ်သည်။

“မင်းမလုပ်ချင်ဘူးဆိုရင်လည်း မြန်မြန်ထွက်သွားတော့။ မမှောင်ခင် မြို့ပြင်ပြန်ရောက်လိမ့်မယ်”

ကျန့်တနျိုက ကြောင်အနေသည်။

ပိုးစုန်းကြူးကျွန်းပေါ်တွင် ကျင့်ကြံသူတစ်ယောက်၏ အစေခံဖြစ်သွားသောလူများက ကောင်းမွန်သောဘဝကို ပိုင်ဆိုင်နိုင်လိမ့်မည်။

ကျွန်းကို လေပြင်းနှင့်ရေလှိုင်းများက အမြဲတိုက်ခိုက်နေသည်။ သာမန်မိသားစုများသည် နှစ်ဝက်ခန့်အထိ ဝလင်စွာမစားရပေ။

ကျန့်တနျိုက မိသားစုကို တစ်ယောက်တည်း ထောက်ပံ့ပေးခဲ့သည်။ သူက ပင်လယ်ထဲတွင် အသက်စွန့်ထားသောကြောင့် ငွေကြေးတချို့ စုဆောင်းနိုင်ခဲ့သည်။

ပိုးစုန်းကြူးကျွန်းပေါ်တွင် သက်တောင့်သက်သာနေနိုင်သော သာမန်လူအများစုသည် ကျင့်ကြံသူများ၏အစေခံများဖြစ်သည်။

“ကျွန်တော်လုပ်ချင်ပါတယ်။ ကျွန်တော် လုပ်ချင်ပါတယ်”

ကျန့်တနျိုက ဟန်မူယဲ့ကို လျင်မြန်စွာအရိုအသေပေးလိုက်သည်။ သူ့နဖူးက ထုံးကျောက်လှေကားနှင့် ဘန်းခနဲတိုက်မိသွားသည်။

“ကောင်းပြီ။ ဒီနေ့ကစပြီး မင်းက ဆိုင်ရဲ့အောက်ထပ်မှာ အိပ်ရမယ်။ ဆိုင်ကို စောစောဖွင့်ပြီး ညဘက်မှာ ဆိုင်သိမ်းရမယ်။ မလစ်ဟင်းစေနဲ့”

ဟန်မူယဲ့က ဖုန်ထူနေသောဆိုင်ကို ကြည့်လိုက်ပြီး လက်မြှောက်၍ ပြောသည်။

“သန့်ရှင်းရေးလုပ်လိုက်အုံး။ ငါက အိပ်ယာခင်းတွေ သွားရှာလိုက်မယ်”

ကျန့်တနျိုက အိပ်ယာမလိုကြောင်း လျင်မြန်စွာပြောလိုက်သည်။ သူက ပင်လယ်ထဲတွင် လှေပေါ်၌ အိပ်ခဲ့သည်။

ဟန်မူယဲ့က သူ့ကို ဂရုမစိုက်တော့ပေ။ သူက အပြင်ထွက်သွားပြီး အိမ်သုံးပစ္စည်းများရောင်းသောဆိုင်ကို ရှာလိုက်သည်။ သူက ဝိညာဉ်ကျောက်တုံးတစ်တုံး ထုတ်ယူ၍ အိပ်ယာခင်းနှင့် ပရိဘောဂတချို့ကို ဝယ်ယူခဲ့သည်။

သူက သစ်သားစင်တချို့ကိုလည်း စိတ်တိုင်းကျမှာယူခဲ့သည်။

နှစ်သုံးဆယ်ကြာအောင် ပစ်ထားခဲ့သည့်အတွက် ဆိုင်ထဲတွင်ရှိသော ပစ္စည်းအများစုသည် ဆွေးမြည့်နေသည်။

သူက ဝိညာဉ်ကျောက်တုံးတစ်တုံးဖြင့် ပစ္စည်းအများအပြားကို ဝယ်ယူခဲ့သည်။ ဆိုင်ရှင်က မနက်ဖြန်တွင် သစ်သားစင်များကို ပို့ပေးမည်ဟု ကတိပေးခဲ့သည်။ သူက ဆိုင်ရှေ့တွင်ရှိနေသော မဂ္ဂနိုလီယာသစ်ပင်များကို ကိုင်းဖြတ်၍ ပြတင်းပေါက်နှင့် တံခါးမကြီးကို ပြုပြင်ရန်အတွက်လည်း ကူညီပေးခဲ့သေးသည်။

ဟန်မူယဲ့က ဆိုင်သို့ပြန်ရောက်လာသောအခါတွင် ကျန့်တနျိုက ပထမထပ်ကို သန့်ရှင်းရေးလုပ်ပြီးခဲ့သည်။ သစ်သားစင်နှင့်စားပွဲများသည် သန့်ရှင်းနေပြီး သူက တစ်နေရာမှ ရှာတွေ့လာသော တူတစ်လက်ဖြင့် သစ်သားစင်များကို ပြုပြင်နေသည်။

လူတစ်ယောက်၏နားလည်နိုင်စွမ်းက မည်မျှပင်ကောင်းမွန်ပါစေ အရာအားလုံးကို လုပ်ဆောင်နိုင်မည်မဟုတ်ပေ။

ဥပမာအနေဖြင့် သန့်ရှင်းရေးနှင့် သစ်သားစင်များကို ပြုပြင်ခြင်းဖြစ်သည်။

ဟန်မူယဲ့က စားပွဲခုံပေါ်တွင် အိပ်ယာခင်းနှင့် အစားအစာများကို တင်ပေးလိုက်ပြီး အပေါ်ထပ်သို့ တက်သွားသည်။

သူက မနက်ဖြန်တွင် ဒုတိယထပ်ကို သန့်ရှင်းရေးလုပ်ပေးရန်အတွက် ကျန့်တနျိုကို ပြောလိုက်မည်။

ကျန့်တနျိုက တစ်ဖက်သို့လှည့်ပြီး ဦးညွှတ်တော့မည့်အချိန်တွင် ဟန်မူယဲ့က အပေါ်ထပ်သို့ တက်သွားပြီဖြစ်သည်။

မွှေးပျံ့နေသော ပူနွေးသည့်စားစရာများနှင့် အိပ်ယာခင်းကြောင့် ကျန့်တနျိုက လမ်းပျောက်သွားသည်။

သူက ရှေ့တက်လာပြီး လက်နှစ်ဖက်ကို တက်ကြွစွာသုတ်လိုက်သည်။ ထို့နောက် အိပ်ယာခင်းကို ဂရုတစိုက် ထိကြည့်သည်။

သူက ရေပေါ်ကျေးရွာနှင့် လှေပေါ်တွင် ထိုသို့နူးညံ့သောအိပ်ယာခင်းဖြင့် မအိပ်ဘူးပေ။

သူ့အိမ်တွင်ရှိသော နွေးထွေးသည့် တစ်ခုတည်းသောအိပ်ရာသည် ဆယ်လသားကလေးနှင့် ဇနီးဖြစ်သူအတွက် ဖြစ်သည်။

“ဒါက အင်မော်တယ်ကြီးတစ်ယောက်ရဲ့ အစေခံပေါ့”

ကျန့်တနျို၏မျက်လုံးများက တောက်ပနေသည်။

ထိုအချိန်၌ ပိုးစုန်းကြူးကျွန်းနှင့် မိုင်သုံးထောင်အကွာတွင်ရှိသော တခြားကျွန်းတစ်ကျွန်းပေါ်တွင် အဌဂံပုံ အနီရောင်ခုနစ်လွှာစံအိမ်တစ်ခု ရှိနေသည်။ သွေးရောင်ဝတ်စုံနှင့် သက်လတ်ပိုင်းအရွယ်လူကြီးတစ်ယောက်သည် ရှေ့တွင်ရှိနေသော အနက်ရောင်ဝတ်စုံနှင့်လူငယ်ကို စာလိပ်တစ်လိပ်နှင့် ကျောက်စိမ်းသေတ္တာတစ်လုံး ပေးလိုက်သည်။

“ဒီမှာ ဝိညာဉ်ပုလဲလုံး သုံးရာရှိတယ်။ ဒီလူရဲ့ခေါင်းကို ဆယ်ရက်အတွင်းယူလာခဲ့”

အနက်ရောင်ဝတ်စုံနှင့်လူငယ်က ခေါင်းညိတ်လိုက်ပြီး ကျောက်စိမ်းသေတ္တာကို ယူသည်။ သူက စာလိပ်ကို ဖွင့်ကြည့်လိုက်သောအခါတွင် အဖြူရောင်ဝတ်စုံနှင့် လူငယ်ဓားကျင့်ကြံသူတစ်ယောက်ကို မြင်လိုက်ရသည်။

“ဓားကျင့်ကြံသူတစ်ယောက်အတွက် ဝိညာဉ်ပုလဲလုံးသုံးရာလား။ ဒီတစ်ကြိမ်မှာ အိမ်တော်ထိန်းချန်က တကယ်ရက်ရောနေတာပဲ”

လူငယ်က ပြုံးလိုက်ပြီး စာလိပ်ကိုသိမ်း၍ လှည့်ထွက်သွားသည်။

အိမ်တော်ထိန်းချန်က လက်နှစ်ဖက်ကို နောက်ပစ်ထားပြီး အပေါ်ထပ်သို့ တက်သွားသည်။ သူက လမ်းလျှောက်လျက် ရေရွတ်နေသည်။

“ဓားကျင့်ကြံသူတစ်ယောက်ကိုသတ်ဖို့ ဝိညာဉ်ပုလဲလုံးသုံး‌သောင်းတဲ့လား။ ငါ့ရဲ့ အသက်ခိုးယူခြင်းမျှော်စင်က လူတစ်ယောက်ကိုသတ်ဖို့အတွက် အရမ်းခက်နေတာမလို့လား”

ဒုတိယမြောက်နေ့တွင်လည်း ကျန့်တနျိုက ဆိုင်ကို သန့်ရှင်းရေးလုပ်ခဲ့သည်။ သစ်သားစင်များကိုပြုပြင်မည့် လက်သမားဆရာလည်း ရောက်လာသည်။ သူက မဂ္ဂနိုလီယာသစ်ပင်များကို ကိုင်းဖြတ်ပေးခဲ့သောကြောင့် ဒုတိယထပ်တွင် အလင်းရောင်ပိုရသွားသည်။

ပြတင်းပေါက်မှတစ်ဆင့် ကြည့်လိုက်လျှင် လမ်းသွားလမ်းလာများကို လှမ်းမြင်နိုင်သည်။

မွန်းလွဲပိုင်းတွင် ဟန်မူယဲ့က ကျန့်တနျိုကို ဝိညာဉ်ကျောက်တုံးတစ်တုံး ပေးခဲ့သည်။

သူက အစားအစာများကို မလိုအပ်တော့ပေ။ ချီစွမ်းအင်ဖြင့် ခန္ဓာကိုယ်ကိုအားဖြည့်ပေးပြီး သွေးချီများကိုသန့်စင်ရန်သာ လိုအပ်သည်။

သို့သော် လူသားဖြစ်သောကျန့်တနျိုက စားသောက်ရန် လိုအပ်သည်။

ဝိညာဉ်ကျောက်တုံးတစ်တုံးကို ကျွန်းပေါ်တွင်လူသားများအသုံးပြုသော ကျောက်စိမ်းခရုခွံတစ်ထောင်ဖြင့် လဲလှယ်နိုင်သည်။ ဝိညာဉ်ကျောက်တုံးတစ်တုံးသည် ကျန့်တနျိုတစ်ယောက် ဗိုက်ပြည့်အောင်စားသောက်ရန် လိုအပ်သည်။

ကျန့်တနျိုက ဝိညာဉ်ကျောက်တုံးကို မသုံးရက်ပေ။ သို့သော် ဟန်မူယဲ့၏အကြည့်ကြောင့် သူက ဝိညာဉ်ကျောက်တုံးကိုယူပြီး ကျောက်စိမ်းခရုခွံများနှင့် လဲလိုက်ရသည်။ ထို့နောက် ဈေးအပေါဆုံးစားစရာကို ဝယ်လာခဲ့သည်။

ဟန်မူယဲ့က သစ်သားစင်၏ရှေ့တွင် ရပ်နေပြီး ဓားတစ်လက်ကို ဆွဲထုတ်သည်။

သာမန်လက်နက်များသည် အကြိမ်ကြာမြင့်စွာ ပစ်ထားခံရသောကြောင့် သံချေးတက်နေသည်။

ကျွန်း၏ရာသီဥတုသည် စိုစွတ်သည်။

ထိုဓားအတွက်အသုံးပြုထားသော ဝိညာဉ်သတ္တုများသည် အရည်အသွေးမဆိုးပေ။ သန့်စင်ခြင်းနည်းစနစ်ကလည်း ကောင်းမွန်သည်။

ဓားထဲသို့ ဓားချီအချို့ စိမ့်ဝင်သွားပြီး ဟန်မူယဲ့က ဓားသွန်းလုပ်သောဖြစ်စဉ်ကို မြင်လိုက်ရသည်။

“ဟုန်ယွင်ဓားသွန်းစံအိမ်”

မိုင်တစ်သောင်းအကွာတွင်ရှိသော ဓားသန့်စင်ခြင်းစံအိမ်တစ်ခုက ဤဓားကို ပြုလုပ်ခဲ့သည်။

ပြန့်ကျဲကြယ်ကျွန်းတွင် လက်နက်သန့်စင်ခြင်း‌ဈေးသာမက အာခီမီဈေးနှင့် အဆောင်လက်ဖွဲ့ဈေးများကိုလည်း မိသားစုကြီးများက ကိုယ်ပိုင်တပည့်များဖြင့် ဦးဆောင်ထားသည်။ ထို့နောက် သူတို့က ဖြည်းဖြည်းချင်းလူစုပြီး စီးပွားရေးချဲ့ထွင်လိမ့်မည်။

ဓားရှည်ထဲတွင် ဓားချီများလှည့်ပတ်သွားသည်။ အချိန်အတော်ကြာအောင် ပစ်ထားခံရသောဓားရှည်က တုန်ခါလာပြီး အလင်းများဖြင့် တောက်ပနေသည်။

ဟန်မူယဲ့က ဓားရိုးကိုလွှတ်လိုက်ပြီး ဓားချီအချို့ကို ဓားထဲတွင် ချန်ထားခဲ့သည်။

ယခုအချိန်တွင် သူက ဓားချီများကို လိုအပ်မနေပေ။ ဓားရှည်ထဲတွင်ရှိနေသောဓားချီက ဓား၏မူရင်းအခြေအနေကို လျင်မြန်စွာပြန်ကောင်းလာစေလိမ့်မည်။ ထို့အပြင် ပိုမိုသွက်လက်ပြီး ထက်မြိလာစေမည်။

သစ်သားစင်ပေါ်တွင် ဓားရှည်နှင့်ဓားတိုများ သုံးလက်စီသာရှိသည်။ ဟန်မူယဲ့က ထိုဓားများအားလုံးကို စစ်ဆေးကြည့်ခဲ့သည်။

ဓားသုံးလက်သည် ပြန့်ကျဲကြယ်ကျွန်းများမှ ဖြစ်သည်။

ထိုဓားများမှတစ်ဆင့် ဟန်မူယဲ့က ပြန့်ကျဲကြယ်ကျွန်း၏လျှို့ဝှက်ချက်များကို သိလာရသည်။ သို့မဟုတ် စည်းကမ်းများဟု ပြောနိုင်သည်။

ပြန့်ကျဲကြယ်ကျွန်းများသည် လွတ်လပ်စွာရောင်းဝယ်နိုင်သော နေရာတစ်ခုဖြစ်သည်။ အဓိကအင်အားစုများသည် ဤနေရာတွင် စခန်းချပြီး နတ်ဘုရားဘုရင်များနှင့် ကုန်သွယ်ကြသည်။

သူတို့က အဆုံးမဲ့ပင်လယ်၏ သခင်များဖြစ်ကြသည်။

လောက၏ ကံကြမ္မာနှင့် ပြန်လည်မွေးဖွားခြင်းကို ဖိနှိပ်ပြီး မရေမတွက်နိုင်လောက်သောကမ္ဘာများအား ဖျက်ဆီးနိုင်သော အဆုံးမဲ့ပင်လယ်တွင် သခင်များရှိနေလိမ့်မည်ဟု ဟန်မူယဲ့က ထင်မထားခဲ့ပေ။

‘သူတို့က ဘယ်လောက်တောင်သန်မာနေတာလဲ’

ပြန့်ကျဲကြယ်ကျွန်းများပေါ်တွင် အရောင်းအဝယ်ကို ကာကွယ်ပေးထားသည်။ စည်းကမ်းဖောက်ရဲသောလူ မရှိပေ။

သို့သော် ကျွန်းပေါ်မှထွက်သွားပြီး အဆုံးမဲ့ပင်လယ်ထဲသို့ ရောက်သွားလျှင် သေခြင်းရှင်ခြင်းသည် ကိုယ်ပိုင်ခွန်အားနှင့်သာ သက်ဆိုင်တော့သည်။

ပြန့်ကျဲကြယ်ကျွန်း၏စည်းကမ်းများသည် သိသာသည်။

ဥပမာအနေဖြင့် မကောင်းသောအလုပ်များကို လုပ်ဆောင်နေသော အင်အားစုအချို့သည် ကောင်းမွန်စွာရှိနေသည်။

ဟန်မူယဲ့က ဓားကိုပြန်ထားလိုက်ပြီး ကိုယ်ပိုင်ဓားရှည်တချို့ကိုထုတ်ယူ၍ သစ်သားစင်ပေါ်တွင် တင်ထားသည်။

ဟန်မူယဲ့ထုတ်ယူလိုက်သောဓားများသည် သိပ်အဆင့်မမြင့်ပေ။ ကျောက်ယုကျင့်ယူသွားသောဓားများနှင့် အဆင့်တူခန့်သာဖြစ်သည်။

သူက ဝိညာဉ်တစ်ဝက်အဆင့်တွင် အဆင့်မြင့်ဓားသုံးချောင်းနှင့် အလယ်အလတ်ဆင့်ဓား ငါးချောင်းတို့ကို ထုတ်ယူလိုက်သည်။

ထိုဓားများဖြင့်သာ ဆိုင်ကို ပြန်ဖွင့်နိုင်မည်။

သစ်သားစင်ပေါ်သို့ ဓားများတင်လိုက်သောအချိန်တွင် ဆိုင်၏ပုံစံသည် ပြောင်းလဲသွားခဲ့သည်။

ဆိုင်၏ပထမထပ်တွင် ထက်မြိနေသောအရှိန်အဝါတချို့ ရှိလာသည်။

အစားအသောက်ဝယ်ပြီးပြန်လာသော ကျန့်တနျိုက ဆိုင်ထဲသို့ဝင်လာသောအခါတွင် တစ်ကိုယ်လုံးတုန်ခါသွားသည်။

ဟန်မူယဲ့က တစ်ဖက်သို့လှည့်ကြည့်ပြီး စဉ်းစားလိုက်သည်။ သူက ဒုတိယထပ်သို့ ထပ်သွားပြီး စုတ်တံ၊ မင်ခွက်၊ စက္ကူနှင့် မင်တုံးကို ထုတ်ယူလိုက်သည်။ ထို့နောက် စာလုံးတချို့ရေးပြီး မင်ရည်စက်ပန်းချီများကို ဖန်တီးလိုက်သည်။

လက်ရေးလှစာနှင့် ပန်းချီကားများသည် သမာဓိစွမ်းအား၊ ဓားချီများနှင့် ရောနှောနေသည်။ ဆိုင်ထဲတွင် ချိတ်ဆွဲထားလိုက်လျှင် ဆိုင်၏ဓားချီကို ဖိနှိပ်နိုင်လိမ့်မည်။

အံ့ဖွယ်ကိုးပါးတောင်၏ဓားစံအိမ်တွင် လက်ရေးလှစာနှင့်ပန်းချီကားများ ရှိခဲ့မည်ဆိုလျှင် ဓားထိန်းများသည် ဓားချီ၏တိုက်စားမှုကြောင့် သက်တမ်းတိုသွားမည်မဟုတ်ပေ။

ဟန်မူယဲ့က ကျန့်တနျိုကို ဆိုင်တွင်ထားခဲ့ပြီး တစ်ဖက်တွင်ရှိသော ကျားဝူ၏ဆိုင်သို့ သွားလိုက်သည်။

ကျားဝူက ငါးအရိုးနှင့်ကြေးခွံအမျိုးမျိုးကို ရောင်းချသည်။

ငါးအရိုးဖြင့်ပြုလုပ်ထားသော ဓားတိုများ၊ ကြာပွတ်ရှည်များနှင့် လှံများလည်း ရှိနေသည်။

ငါးကြေးခွံဖြင့်ပြုလုပ်ထားသော ချပ်ဝတ်နှင့် တခြားပစ္စည်းများလည်း ရှိနေသေးသည်။

ငါးအရိုးလက်နက်များသည် သန်မာမှုသိပ်မရှိပေ။ နှစ်ခု၊ သုံးခုခန့်သည် ဝိညာဉ်လက်နက်များ ဖြစ်ကြသည်။ အများစုသည် လူသားအဆင့် သို့မဟုတ် ဝိညာဉ်တစ်ဝက်အဆင့်လက်နက်များ ဖြစ်နေသည်။

ကျားဝူက ရတနာအစစ်အမှန်ကို ချပြမထားခြင်းလည်း ဖြစ်နိုင်သည်။

ဟန်မူယဲ့ရောက်လာသောအခါ ဆိုင်ထဲတွင် လူအများအပြားရှိနေသည်။ ကျားဝူက အင်္ကျီလက်တိုနှင့် လူအိုကြီးတစ်ယောက်ယူလာသော ငါးအရိုးကို စစ်ဆေးကြည့်နေသည်။

ဟန်မူယဲ့ကို မြင်လိုက်ရသောအခါတွင် ကျားဝူက နှုတ်ဆက်လိုက်သည်။

ဟန်မူယဲ့က ပန်းချီကားအတွက်ဘောင်များကို မည်သည့်နေရာတွင်ရနိုင်ကြောင်း မေးလိုက်သည်။

ကျားဝူက တွေးလိုက်ပြီး အပြုံးတစ်ခုနှင့်အတူ ပြောသည်။

“ပရိဘောဂဆိုင်တွေအားလုံးက ပန်းချီကားဘောင်တွေကို လုပ်ပေးပါတယ်။ ဒါပေမဲ့ ပြန့်ကျဲကြယ်ကျွန်းပေါ်မှာ ကွန်ဖြူးရှပ်တာအိုကျင့်ကြံသူတွေတော့ သိပ်မရှိဘူး”

ပြန့်ကျဲကြယ်ကျွန်း၏စည်းကမ်းများသည် ခန္ဓာကိုယ်နှင့်စိတ်ကိုကျင့်ကြံသော ကွန်ဖြူးရှပ်တာအိုနှင့် လိုက်ဖက်ညီမှုသိပ်မရှိပေ။ ကွန်ဖြူးရှပ်တာအိုကျင့်ကြံသူများ ရောက်လာခဲ့လျှင်ပင် ကြာမြင့်စွာနေထိုင်ကြမည်မဟုတ်ပေ။

ဟန်မူယဲ့က လက်ရေးလှစာလိပ်နှင့် ပန်းချီစာလိပ်များကို သယ်ထားကြောင်း မြင်လိုက်ရသောအခါတွင် ကျားဝူက ပြုံးလိုက်ပြီး ပြောသည်။

“ညီအစ်ကိုကျောက်က ဆိုင်ကိုဦးစီးနေတဲ့အချိန်မှာ ငါက ဆိုင်ကိုအလှဆင်ဖို့ ပြောခဲ့တယ်။ အဲဒါဆိုရင် ဓားချီကြောင့် ချဉ်းကပ်ရခက်ခဲတာမျိုးတွေ ရှိတော့မှာမဟုတ်ဘူး”