အခန်း (၆၀၉)

ထိုဓားသည် သတ်ဖြတ်ရန် ရည်ရွယ်ထားကြောင်း တာအိုတန်ခိုးရှင်က နားလည်လိုက်သည်။

‘တာအိုဂိုဏ်းတွေရဲ့ ဝိညာဉ်ဖွဲ့စည်းခြင်းအဆင့် ကျင့်ကြံသူကို သတ်ဖြတ်ပစ်လိုက်တဲ့အတွက် တာအိုဂိုဏ်းတွေက ပွင့်ပွင့်လင်းလင်းတိုက်ခိုက်လာမှာကို မစိုးရိမ်တော့ဘူးလား။ အရှေ့တောင်ပိုင်းရဲ့ ဒေသရှစ်ခုလုံးက ရှုပ်ထွေးသွားလိမ့်ယ်’

သူသေဆုံးသွားလျှင် တာအိုဂိုဏ်းများ ထကြွလာပြီး မရေမတွက်နိုင်သော ကျင့်ကြံသူများက နန်းမြို့တော်ကို တိုက်ခိုက်လိမ့်မည်။

တာအိုအင်အားစု၏ မဟာကျင့်ကြံသူကြီးများက လက်နှစ်ဖက်ကိုဆုပ်ကိုင်ပြီး သူ့အား လိုက်ပါပို့ဆောင်ပေးနေသည်ကို မြင်ယောင်မိလိုက်သည်။

‘သူက အရာအားလုံးကို တွေးထားပြီးပြီလား’

တာအိုတန်ခိုးရှင်က တွေးမိသည်။

‘ဒီတစ်ကြိမ်မှာ ငါက စတေးခံလိုက်ရတာလား’

“ဘုန်း”

အစိမ်းရောင်ဓားက တာအိုတန်ခိုးရှင်၏ရင်ဘတ်ကို ထိုးဖောက်ပြီး ခန္ဓာကိုယ်ကို ဖျက်ဆီးပစ်လိုက်သည်။

အဆုံးမရှိသော ချီစွမ်းအင်အလင်းရောင်သည် လောကကို အားဖြည့်ပေးလိုက်ပြီး ချီစွမ်းအင်လှိုင်းများကို ဖြစ်ပေါ်လာစေသည်။

မိုင်တစ်သောင်းပတ်ဝန်းကျင်သည် နတ်ဘုရားပင်လယ်အဖြစ် ပြောင်းလဲသွားသည်။

ဝိညာဉ်ဖွဲ့စည်းခြင်းအဆင့် ကျင့်ကြံသူတစ်ယောက် ကျဆုံးသွားခဲ့သည်။

သက်တော်ရှည် မဟာကျင့်ကြံသူကြီးတစ်ယောက် ဖြစ်သည်။

ကောင်းကင်အံ့ဖွယ်ကမ္ဘာတွင် ဝိညာဉ်ဖွဲ့စည်းခြင်းအဆင့် ကျင့်ကြံသူတစ်ယောက် ကျဆုံးခဲ့သော နောက်ဆုံးအချိန်သည် လွန်ခဲ့သော နှစ်တစ်သောင်းတွင် ဖြစ်သည်။

လောက၏ ကျင့်ကြံသူများသည် မဟာကျင့်ကြံသူကြီးများ၏ ထာဝရှင်သန်ခြင်းနှင့် အသားကျနေသည်။

ဝိညာဉ်ဖွဲ့စည်းခြင်းအဆင့် ကျင့်ကြံသူများကို သတ်ဖြတ်နိုင်သောလူ မရှိပေ။

ချီပင်လယ်သည် လှုပ်ရှားနေပြီး ချီစွမ်းအင်က ပတ်ဝန်းကျင်ကို အားဖြည့်ပေးနေသည်။ မြစ်ကမ်းပါးနှစ်ဖက်တွင်ရှိသော သက်ရှိများက ချီစွမ်းအင်၏ လွှမ်းခြုံခြင်းကို ခံလိုက်ရသည်။

ထိုစွမ်းအင်ကြောင့် လူသား၊ အပင်နှင့် သားရဲများသည် အနာဂတ်တွင် ကျင့်ကြံရန် အဆင်ပြေချောမွေ့လာလိမ့်မည်။

လူတစ်ယောက် သေဆုံးသွားပြီး သန်းချီသောလူများအတွက် အကျိုးဖြစ်စေခဲ့သည်။

ထိုအရာသည် ကောင်းကင်နှင့်မြေကြီး၏ စည်းမျဉ်းဖြစ်သည်။

“ယွမ်ဟယ်ကျီက တကယ်သေသွားပြီ ....”

မိုင်သောင်းချီအကွာတွင် ပိန်ပါးသော တာအိုတန်ခိုးရှင်တစ်ယောက်က မျက်နှာထားရှုပ်ထွေးနေသည်။

“နတ်သခင်ရွှယ်မင်၊ ယွမ်ဟယ်ကျီက ငါတို့ တာအိုဂိုဏ်းတွေ နိုးထလာဖို့အတွက် အသက်စွန့်သွားခဲ့တယ်။ သူက ရဲရင့်စွာ သေဆုံးသွားခဲ့တယ်”

တစ်ဖက်တွင် အနက်ရောင်သိုင်းဝတ်စုံနှင့် ရှည်လျားသောမျက်ခုံးများရှိသည့် ကျင့်ကြံသူတစ်ယောက်က မတ်တပ်ရပ်လာသည်။ သူ့ခန္ဓာကိုယ်ပေါ်တွင် ဓားချီများ လှုပ်ရှားနေကြသည်။

“ကောင်းကင်အံ့ဖွယ်တိုင်းပြည်က တာအိုအင်အားစုရဲ့ မဟာကျွမ်းကျင်သူတွေကို အလိုရှိတိုင်း သတ်ဖြတ်နေတယ်။ အရှေ့တောင်ပိုင်းရဲ့ ဒေသရှစ်ခုမှာရှိတဲ့ ကျွမ်းကျင်သူတွေက ဒီလိုမျိုး အသတ်မခံချင်ဘူး။ ငါတို့က အိမ်ရှေ့စံကို ဖမ်းချုပ်ပြီး နန်းမြို့တော်မှာ စုစည်းကြမယ်”

“ဝမ်မော့ရှန်နဲ့ ချန်ချင်းကျစ်တို့ ပြန်မလာခင် နန်းမြို့တော်ကို သိမ်းပိုက်နိုင်မယ်ဆိုရင် ငါတို့က ကောင်းကင်အံ့ဖွယ်ကမ္ဘာရဲ့ ပိုင်ရှင်တွေ ဖြစ်သွားလိမ့်မယ်”

စကားပြောလိုက်သောလူက တာအိုဝတ်စုံကို ဝတ်ဆင်ထားသည်။ သူ့ဆံပင်နှင့် မုတ်ဆိတ်များက ဖြူဖွေးနေပြီး မျက်နှာပေါ်တွင် စိတ်လှုပ်ရှားမှုများ ထင်ဟပ်နေသည်။

သူ့ဘေးတွင်ရှိသော တာအိုတန်ခိုးရှင်ကလည်း မျက်လုံးများတောက်ပနေသည်။

“ဂိုဏ်းတူအစ်ကိုကျူးဝူပြောတာ မှန်တယ်။ ငါတို့က ကောင်းကင်အံ့ဖွယ်ကမ္ဘာကို သိမ်းယူပြီး အံ့ဖွယ်နေမင်းကိုယ်ရံတော်တပ်ဖွဲ့ကို ဖျက်ဆီးနိုင်မယ်ဆိုရင် တာအိုပြိုင်ပွဲမှာ ဝင်ပါလို့ရပြီ။ တာအိုဘိုးဘေးအဆင့်ကိုလည်း တက်ရောက်နိုင်ခွင့်ရှိလိမ့်မယ်။ ဒါမှမဟုတ်ရင် ငါတို့က အင်မော်တယ်ဝိညာဉ်ကမ္ဘာနဲ့ ငြိမ်းချမ်းရေးယူပြီး မဟာတာအိုကို ဆက်လက်ရှာဖွေမယ်။ ငါတို့က လွတ်လွတ်လပ်လပ် လှုပ်ရှားနိုင်လိမ့်မယ်”

“အဲဒါမှန်တယ်။ ဒီနေ့ကစပြီး ငါတို့ တာအိုဂိုဏ်းတွေက လွတ်လပ်သွားလိမ့်မယ်”

တိမ်တိုက်ထဲမှ ပုံရိပ်များပေါ်ထွက်လာပြီး မြစ်ဆီသို့ ပြေးဝင်လာကြသည်။

သူတို့အားလုံးသည် အရှေ့တောင်ဒေသတွင်ရှိသော တာအိုဂိုဏ်းများ၏ အခြေခံအုတ်မြစ်ဖြစ်သည်။

ထိုကျင့်ကြံသူများသည် ကွန်ဖြူးရှပ်တာအို၏ ဖိနှိပ်ခြင်းကို ခံရမည်စိုးသောကြောင့် နှစ်ပေါင်းမရေမတွက်နိုင်အောင် ပုန်းကွယ်နေခဲ့သည်။

ယခုအချိန်သို့ရောက်မှ သူတို့က ထွက်ပေါ်လာခဲ့သည်။

နတ်သခင်ရွှယ်မင်က လေးနက်သောမျက်နှာထားဖြင့် မျက်မှောင်ကြုတ်သည်။

သူ့ဘေးတွင် အစိမ်းရောင်တာအိုဝတ်စုံနှင့် သက်လတ်ပိုင်းအရွယ်လူတစ်ယောက်က တီးတိုးပြောသည်။

“ဂိုဏ်းတူအစ်ကို၊ အကြီးအကဲကျူးဝေ့ချမ်းပြောတာာ မှန်တယ်။ ယွမ်ဟယ်ကျီက ကိုယ့်ကိုယ်ကိုယ်စတေးပြီး တာအိုဂိုဏ်းတွေကို ပူးပေါင်းဆောင်ရွက်ဖို့အတွက် လှုံ့ဆော်သွားခဲ့တယ်။ အခုအချိန်မှာ အရှိန်အဟုန်ရနေပြီ”

ကောင်းကင်အံ့ဖွယ်ကမ္ဘာ၏ ထိပ်တန်းအဆင့် ကျွမ်းကျင်သူများအားလုံးသည် ပြင်ပဘုံတွင် ရှိနေကြသည်။ တာအိုဂိုဏ်းများသည် ဤအခြေအနေကို အခွင့်ကောင်းယူ၍ နန်းမြို့တော်ကို တစ်ခါတည်း သိမ်းပိုက်ပြီး တိုးတက်လာလိမ့်မည်။

ဤအချိန်မျိုးတွင် နက်နဲသောကျင့်ကြံခြင်းကို ပိုင်ဆိုင်ထားသည့် သူ၏ ဂိုဏ်းတူအစ်ကိုက အဘယ်ကြောင့် မျက်မှောင်ကြုတ်နေသနည်း။

“ဝမ်မော့ရှန်က ကောင်းကင်အံ့ဖွယ်ကမ္ဘာကို နှစ်တစ်သောင်းကြာအောင် ဖိနှိပ်ထားခဲ့တယ်။ သူနဲ့ရင်ဆိုင်ဖို့ မလွယ်ဘူး”

နတ်သခင်ရွှယ်မင်က ခေါင်းခါလိုက်ပြီး ရှေ့သို့ကြည့်သည်။

“အဲဒီ ဆရာသခင်မူယဲ့က ထူးခြားဆန်းကြယ်ပြီး နက်နဲလွန်းတယ်။ သူက သမင်ဖြူတောင်တန်းကျောင်းတော်ရဲ့ ကျောင်းအုပ်ဖြစ်လိမ့်မယ်။ ဒီနေ့မှာ သူက ဓားချက်ထုတ်သုံးပြီး အနောက်ဘက်နယ်စပ်ကုန်းမြေရဲ့ ဓားအင်မော်တယ်ဖြစ်တဲ့အကြောင်း ဖော်ပြခဲ့တယ်”

“သူက သူ့ကိုယ်သူ ဖုံးကွယ်မထားတော့ဘူး။ အခြေအနေက ငါတို့ဘက်မှာ မရှိတော့ဘူးထင်တယ် ....”

‘အခြေအနေမကောင်းတော့ဘူးလား’

တာအိုတန်ခိုးရှင်က မျက်နှာထားပြောင်းလဲသွားသည်။

“ဂိုဏ်းတူညီလေး ပြန်သွားလိုက်ပါ။ ငါသေသွားရင် အရုဏ်ဦးတာအိုဂိုဏ်းက နှစ်ပေါင်းသုံးထောင်ကြာသည်အထိ တောင်တံခါးကို ပိတ်ထားရမယ် ....”

သူက အသက်ပြင်းပြင်းရှူသွင်းလိုက်ပြီး တီးတိုးပြောသည်။

‘သေသွားမှာလား’

အစိမ်းရောင်ဝတ်စုံနှင့် တာအိုတန်ခိုးရှင်၏မျက်နှာက ဖြူဖျော့သွားသည်။

“ဂိုဏ်းတူအစ်ကိုက ဒီလောကရဲ့ အထွတ်အထိပ်မှာ ရှိနေတာလေ ....”

“လောကရဲ့အထွတ်အထိပ်လား”

နတ်သခင်ရွှယ်မင်က ခေါင်းခါလိုက်ပြီး ဂရုမစိုက်စွာပြောသည်။

“မင်းက ငါ့ကို အထင်ကြီးနေတာပဲ”

“ဒီလောကမှာ မရေမတွက်နိုင်လောက်တဲ့ ကျွမ်းကျင်သူတွေရှိတယ်။ ငါက ကောင်းကင်အံ့ဖွယ်ကမ္ဘာမှာ ပိတ်မိနေပြီး ဘဝတစ်လျှောက်လုံး ပိုမိုကြီးမားတဲ့ကမ္ဘာကို မမြင်နိုင်ခဲ့ဘူး ....”

ထို့နောက် သူ့ခန္ဓာကိုယ်ထဲမှ အဆုံးမရှိသော ချီစွမ်းအင်အလင်းများ ပေါ်ထွက်လာပြီး ရွှေရောင်ဖီးနစ်တစ်ကောင်အဖြစ် ပြောင်းလဲသွားသည်။

“ငါ ရွှယ်မင်က ဆရာသခင်မူယဲ့ကို ဒီနေရာမှာ စောင့်နေတယ်”

သူ့အသံက မိုင်တစ်သိန်းအထိ ပျံ့နှံ့သွားသည်။ လောကသည် တုန်ခါနေပြီး အဆုံးမရှိသောလေပြင်းများ တိုက်ခတ်လာသည်။

နတ်သခင်ရွှယ်မင်က ဆရာသခင်မူယဲ့ကို စိန်ခေါ်နေသည်။

လမ်းတစ်ဝက်သို့ရောက်နေသော တာအိုဂိုဏ်း၏ကျွမ်းကျင်သူများက ရပ်တန့်လိုက်ပြီး တစ်ယောက်ကိုတစ်‌ယောက် ကြည့်သည်။

“ကောင်းပြီလေ။ ရွှယ်မင်က ငါတို့တာအိုဂိုဏ်းတွေကြားမှာ အထွတ်အထိပ်ကို ရောက်နေတဲ့လူပဲ။ သူက မူယဲ့ကို အနိုင်ယူလိုက်ရင် ငါတို့တွေ သက်သာသွားတာပေါ့”

ရှေ့ဆုံးတွင်ရှိနေသော တာအိုတန်ခိုးရှင်က ညင်သာစွာပြောလိုက်သည်။

ကျန်လူများက ခေါင်းညိတ်လိုက်ပြီး ထွက်ခွာသွားကြသည်။

လူတစ်ယောက်က ဦးဆောင်နိုင်လျှင် သူတို့အတွက် ပိုကောင်းသည်။

နတ်သခင်ရွှယ်မင်၏ စိန်ခေါ်မှု ....

သင်္ဘောပေါ်တွင် မဟာကျင့်ကြံသူများ၏မျက်နှာထားက ပြောင်းလဲသွားသည်။

ချီစွမ်းအင်ပင်လယ်၏ ကောင်းချီး၊ ပြန်လည်တည်ငြိမ်သွားသော မြစ်‌ရေနှင့် ရှေ့ဆက်သွားနေသော သင်္ဘောများသည် ရုတ်ခြည်း ရပ်တန့်သွားသည်။

“နတ်သခင်ရွှယ်မင်ကို သူတော်စင်တစ်ဝက်အဆင့် ဝမ်မူယန်ကတောင် အနိုင်မရခဲ့ဘူး ....”

ကွန်ဖြူးရှပ်တာအို ကျင့်ကြံသူကြီးတစ်ယောက်က ရေရွတ်လိုက်သည်။

ကျန်လူများက စကားမပြောပေ။

ယခုအချိန်တွင် စကားပြောနေလျှင်လည်း အသုံးမဝင်ပေ။

ဆရာသခင်မူယဲ့၏စွမ်းအားသည် သူတို့၏ စိတ်ကူးယဉ်နိုင်စွမ်းထက် ကျော်လွန်နေသည်။

ထို့အပြင် ဆရာသခင်မူယဲ့က ဓားချက်နှစ်ချက်ကို ထုတ်သုံးခဲ့ပြီး ပြတ်သားသောဆုံးဖြတ်ချက်ကို ပြသထားသည်။ သူက နောက်ဆုတ်မည့်လူ မဟုတ်ပေ။

“ဒါက အင်အားစုတွေရဲ့ ရုန်းကန်မှုလား”

မဟာကျင့်ကြံသူကြီးတစ်ယောက်က အပြင်ဘက်သို့ကြည့်လိုက်ပြီး တီးတိုးမေးသည်။

တာအိုတိုက်ပွဲသာမကဘဲ သေခြင်းရှင်ခြင်းအတွက် အဆုံးအဖြတ်တိုက်ပွဲလည်း ဖြစ်သည်။

နှစ်တစ်ရာတာအိုပြိုင်ပွဲသည် တာအိုဘိုးဘေးတစ်ယောက် ပေါ်ထွက်လာရန်အတွက် အလွန်ရက်စက်လိမ့်မည်။

“ကျစ်ဟူ၊ သူလုပ်နိုင်ပါ့မလား”

ယွင်သွမ့်က စိုးရိမ်စိတ်များနှင့် ဟွမ်ကျစ်ဟူ၏အင်္ကျီလက်စကို ဆွဲထားသည်။

ဟွမ်ကျစ်ဟူက ခေါင်းခါလိုက်ပြီး ရေရွတ်သည်။

“ငါက ဘယ်လိုလုပ်သိမှာလဲ”

ထိုလူသည် လောက၏ ထိပ်တန်းအဆင့် မဟာကျင့်ကြံသူကြီးတစ်ယောက်ဖြစ်ပြီး သူတော်စင်တစ်ဝက်အဆင့်ကိုပင် အနိုင်ယူခဲ့သည်။ ဟွမ်ကျစ်ဟူက မွေးစားအဖေအပေါ်တွင် ယုံကြည်မှုသိပ်မရှိပေ။

“အရင်တုန်းက မိစ္ဆာတစ်သောင်း လျှို့ဝှက်နယ်မြေမှာ ငါ့မွေးစားအဖေက ကမ္ဘာဖျက်ကပ်ဘေးကနေ လုံလုံခြုံခြုံ ပြန်ရောက်လာခဲ့တယ်”

ဟွမ်ကျစ်ဟူက လက်သီးဆုပ်ထားပြီး ခေါင်းမော့ကြည့်သည်။

“သူအနိုင်ရဖို့ မျှော်လင့်တယ်”

ယွင်သွမ့်က ခေါင်းညိတ်လိုက်ပြီး လက်ကိုဝှေ့ယမ်းသည်။

“သူအနိုင်ရမယ်ဆိုရင် ငါက ....”

ဟွမ်ကျစ်ဟူက သူမကိုကြည့်လိုက်ပြီး ပြုံးသည်။

“နင်က ဘာလုပ်မှာလဲ”

ယွင်သွမ့်က ရှက်သွားပြီး တီးတိုးပြောသည်။

“ငါက .... သူ့ကို ကောင်းကောင်းဆုချမယ်”

ထိုစကားကို ကြားလိုက်ရသောအခါတွင် ဟွမ်ကျစ်ဟူက နှာမှုတ်သည်။

“နင်လား”

“နင့်ရဲ့ခန္ဓာကိုယ်ကလွဲပြီး ဘာများပေးနိုင်လို့လဲ။ နင့်မိသားစုရဲ့ ပိုင်ဆိုင်မှုတွေကို ငါက အထင်မကြီးပါဘူး”

ထို့နောက် သူမက မျက်လုံးပြူးသွားသည်။

“ယွင်သွမ့်၊ နင်က ငါ့မွေးစားအမေ ဖြစ်ချင်နေတာလား။ လုံးဝမတွေးနဲ့။ ငါ့မှာ ဒေါ်လေးဝမ်တစ်ယောက်ပဲ ရှိတယ်”

ယွင်သွမ့်က ရှက်သွားပြီး စကားပြောတော့မည့်အချိန်တွင် ရုတ်တရက် ရပ်တန့်လိုက်သည်။

အဝေးတစ်နေရာတွင် အဖြူရောင်ဝတ်စုံနှင့် ဓားအိမ်တစ်လက်လွယ်ထားသော ဟန်မူယဲ့က လေထုထဲတွင် လမ်းလျှောက်နေသည်။

“အရှေ့တောင်ဒေသကို ဖျက်ဆီးပစ်ဖို့ လုယန်ကို ပြောလိုက်တော့”

ဟန်မူယဲ့က တည်ငြိမ်စွာပြောသည်။ ထို့နောက် သူက ခြေတစ်လှမ်းဖြင့် ပေတစ်သိန်းအကွာသို့ ရောက်သွားသည်။

“နတ်သခင်ရွှယ်မင်တဲ့လား”

“ကောင်းကင်အံ့ဖွယ်ကမ္ဘာရဲ့ မဟာကျင့်ကြံသူကြီးတစ်ယောက်အနေနဲ့ လောကအတွက် အကျိုးပြုမပေးဘဲ ကောင်းကင်အံ့ဖွယ်ကမ္ဘာကို ဖျက်ဆီးပစ်ဖို့ ကြံစည်နေတယ်”

“ဒီလိုမဟာကျင့်ကြံသူမျိုးက ဆက်ရှိနေရင်လည်း အသုံးမဝင်ဘူး”

ဟန်မူယဲ့၏အသံက တည်ငြိမ်နေသည်။

ထိုအသံသည် မိုင်ထောင်ချီအကွာအထိ ပျံ့နှံ့သွားပြီး တိမ်တိုက်များကို လှုပ်ရှားလာစေသည်။

လေထုထဲတွင်ရပ်နေသော တာအိုတန်ခိုးရှင်များက မျက်နှာထားပြောင်းလဲသွားကြသည်။

သူ၏စကားကြောင့် လောကသည် တုန်ခါသွားခဲ့သည်။ သူက ကောင်းကင်နှင့်မြေကြီး၏ မဟာတာအိုနှင့် လိုက်ဖက်ညီနေသော ကျွမ်းကျင်သူဖြစ်သည်။

နတ်သခင်ရွှယ်မင်၏မျက်နှာထားက ချက်ချင်းပြောင်းလဲသွားသည်။ သူက တီးတိုးအော်ပြောသည်။

“မြန်မြန်သွားတော့။ ဆရာသခင်မူယဲ့က ကောင်းကင်နဲ့မြေကြီးရဲ့စွမ်းအားကို ထိန်းချုပ်ထားတယ်။ သူက မဟာတာအိုရဲ့ထောက်ပံ့မှုကို ရထားတယ်”

ဘေးတွင်ရှိနေသော အစိမ်းရောင်ဝတ်စုံနှင့် တာအိုတန်ခိုးရှင်က လှည့်ထွက်သွားသည်။

တာအိုတန်ခိုးရှင်က မိုင်တစ်ရာအကွာသို့ ရောက်သွားသောအချိန်တွင် နောက်သို့ ပြန်လှည့်ကြည့်မိသည်။ သူ့ဂိုဏ်းတူအစ်ကို၏ ခန္ဓာကိုယ်အား ရစ်ပတ်ထားသော ဓားအလင်းတစ်ခုကို မြင်လိုက်ရသည်။

“ကမ်းခြေက ဘုရင်တွေရဲ့နယ်မြေပဲ”

ထိုအသံနှင့်အတူ အလယ်ပိုင်းကုန်းမြေ၏ ဒေသနှစ်ဆယ်တွင် ရွှေ‌ရောင်ချိပ်တံဆိပ်များ ပေါ်ထွက်လာသည်။

ရွှေရောင်ချိပ်တံဆိပ်သည် ဒေသတစ်ခုမှ တောင်တန်းနှင့်မြစ်များ၏စွမ်းအားကို လှုံ့ဆော်နိုင်သည်။

ယခုအချိန်တွင် နတ်သခင်ရွှယ်မင်ကို ဟန်မူယဲ့၏ဓားက ရစ်ပတ်ထားခြင်းမဟုတ်ဘဲ ကောင်းကင်အံ့ဖွယ်ကမ္ဘာ၏ မဟာတာအိုက ရစ်ပတ်ထားသည်။

မဟာတာအို၏ရှေ့တွင် သေခြင်းရှင်ခြင်းကို ကိုယ်တိုင်မထိန်းချုပ်နိုင်ပေ။

နတ်သခင်ရွှယ်မင်က ရွှေဖီးနစ်တစ်ကောင်အဖြစ် ပြောင်းလဲလိုက်ပြီး တောင်ပံဖြန့်၍ ပျံသန်းနေသည်။ သို့သော် သူက မလွတ်မြောက်နိုင်ပေ။

“မြစ်က အရှေ့အရပ် မိုင်သုံးသောင်းအကွာမှာ ပင်လယ်ထဲကို စီးဝင်သွားတယ်။ တောင်တန်းတွေက ကောင်းကင်ထက်မှာ မိုင်ငါးထောင်အထိ မြင့်မားနေတယ်”

ကောင်းကင်နှင့်မြေကြီးကြားတွင် ကဗျာရွတ်သံ ပေါ်ထွက်လာသည်။

ရှည်လျားသောမြစ်သည် မိုင်ထောင်ချီစီးဆင်းသွားပြီး တောင်တန်းများသည် မြစိမ်းရောင်သန်းနေသည်။

ကောင်းကင်နှင့် မြေကြီး ....

ကောင်းကင်အံ့ဖွယ်ကမ္ဘာတစ်ခုလုံးတွင်ရှိသော တောင်တန်းနှင့်မြစ်များ၏ ဖိနှိပ်မှုအောက်တွင် နတ်သခင်ရွှယ်မင်က ရွှေရောင်ဖီးနစ်ငှက်အဖြစ် အသွင်ပြောင်းထားပြီး တောင်တန်းနှင့်မြစ်များကို ဖျက်ဆီးနေသည်။

သို့သော် မြစ်‌ရေက လှုပ်ရှားလာပြီး ဖီးနစ်ငှက်၏ကိုယ်ပေါ်တွင်ရှိသော မီးတောက်များကို ငြိမ်းသက်လိုက်သည်။ တောင်တန်းက ကျဆင်းလာပြီး ဖီးနစ်ကို ဒဏ်ရာရသွားစေသည်။

ဖီးနစ်ငှက်က ကျယ်လောင်စွာအော်ဟစ်လိုက်ပြီး မီးလုံးတစ်လုံးအဖြစ်‌ ပြောင်းလဲသွားသည်။ ပြန်လည်မွေးဖွားခြင်းစွမ်းအားများ ဖျတ်ခနဲလှုပ်ရှားလာပြီး ပေါက်ကွဲထွက်သွားသည်။

ပြန်လည်မွေးဖွားခြင်း ....

ထိုအရာသည် မသေမျိုးဖီးနစ်ငှက်၏ စွမ်းရည်ဖြစ်သော ရှေးခေတ်မီးတောက်၏ အထွတ်အထိပ်စွမ်းအား ဖြစ်သည်။

ဟန်မူယဲ့က တည်ငြိမ်သောမျက်နှာထားဖြင့် မြစ်ပေါ်တွင် ရှိနေသည်။ သူက လက်မြှောက်လိုက်သောအခါတွင် အေးစက်သောဓားအလင်းတစ်ခု ဖြစ်တည်လာသည်။

“မြစ်က အရှေ့အရပ် မိုင်သုံးသောင်းအကွာမှာ ပင်လယ်ထဲကို စီးဝင်သွားတယ်။ တောင်တန်းတွေက ကောင်းကင်ထက်မှာ မိုင်ငါးထောင်အထိ မြင့်မားနေတယ်။ ရွှေရောင်လေပြင်းက ကောင်းကင်ကပ်ဘေးကို ရှင်းလင်းသွားတယ်။ ဓားက သေခြင်းရှင်ခြင်းကို ဆုံးဖြတ်ပေးတယ်”

ဓားက သေခြင်းရှင်ခြင်းကို ဆုံးဖြတ်ပေးမည်။

ထိုကဗျာ၏အဆုံးတွင် ဓားအလင်းတစ်ခု ပေါ်လာသည်။

ဓားအလင်းသည် မိုင်သုံးသောင်းကို ချက်ချင်းကျော်ဖြတ်သွားပြီး တောင်တန်းနှင့်မြစ်များ၏ ပုံရိပ်ကြားတွင် ပိတ်မိနေသော ဖီးနစ်ငှက်ကို ခုတ်ချလိုက်သည်။

“ဘုန်း”

တောင်တန်းနှင့်မြစ်များ ပြိုကွဲသွားသည်။ ဖီးနစ်ငှက်သည်လည်း နှစ်ပိုင်းပြတ်သွားခဲ့သည်။