အခန်း (၆၅၁)

သို့သော် ဟန်မူယဲ့က သူ့ကို အခွင့်အရေးပေးမည် မဟုတ်ပေ။

လေးကြိုးကို လွှတ်လိုက်သည်။

“ဝီ”

လေဟာနယ်အက်ကွဲကြောင်းများက ရေလှိုင်းသဖွယ် ဖြာထွက်သွားသည်။

မြားကို အရင်မြင်လိုက်ရပြီး နားအူလောက်သောအသံကို နောက်မှကြားရသည်။

မြားက အဖြူရောင်ဝတ်စုံဝတ်ထားသော တာအိုတန်ခိုးရှင်နှင့် ဆယ်ပေအကွာတွင် ပေါ်လာခဲ့သည်။

“ဘုန်း”

မြားက ပေါက်ကွဲသွားသည်။

လျှပ်စီးကြောင်းများက တာအိုတန်ခိုးရှင်ကို ရစ်ပတ်သွားသည်။ သူက ရွှေရောင်သန်းနေသော လျှပ်စီးကြောင်းများနှင့်အတူ ဝင်္ကပါထဲမှ လွင့်ထွက်သွားခဲ့သည်။

ကောင်းကင်အဆင့်ကျင့်ကြံသူများက သူ့ကို ကယ်တင်ပေးရန် လှုပ်ရှားလိုက်ကြသည်။

“ဝီ ....”

ပြန့်ကျဲ‌နေသောလျှပ်စီးကြောင်းများက ထိုလူများကို တိုက်ခိုက်လိုက်သည်။

လျှပ်စီးကြောင်းများက အလွန်မာန်ကြီးပြီး ကယ်တင်ခွင့်မပေးခဲ့ပေ။

တာအိုဘိုးဘေးမူချန်က အေးစက်စွာနှာမှုတ်သည်။ သူ့လက်ထဲတွင်ရှိသော ချီစွမ်းအင်အလင်းက အလင်းတိုင်တစ်ခုအဖြစ် ပြောင်းလဲသွားပြီး လျှပ်စီးကြောင်းများကို ဖိနှိပ်လိုက်သည်။

အလင်းတိုင်ကြောင့် လျှပ်စီးကြောင်းများက ဖြည်းဖြည်းချင်း ပျောက်ကွယ်သွားပြီး အဖြူရောင်ဝတ်စုံနှင့် ကျွမ်းကျင်သူအပါအဝင် တွန့်လိမ်နေသော ကျင့်ကြံသူ ခုနစ်ယောက်၊ ရှစ်ယောက်ခန့်ကို ချန်ရစ်ခဲ့သည်။

ဝင်္ကပါထဲတွင် ဟန်မူယဲ့က ကျဆင်းလာသော ရွှေကောင်ကျိုင်းတံကို ဖမ်းယူသည်။

သူက ကျိုင်းတံထဲသို့ ဓားချီနှင့်ဝိညာဉ်စွမ်းအားများကို ထည့်သွင်းလိုက်သည်။

“ဘုန်း”

ချီစွမ်းအင်အလင်းက ပြိုကွဲသွားသည်။ လက်နက်၏အသိစိတ်က ဝမ်းနည်းစွာငိုကြွေးလိုက်ပြီး ပျောက်ကွယ်သွားခဲ့သည်။

ထထိုင်လိုက်သော အဖြူရောင်ဝတ်စုံနှင့် ကျင့်ကြံသူက မျက်လုံးပြူးသွားသည်။ သူက သွေးအန်လိုက်ပြီး မေ့လဲသွားခဲ့သည်။

ဟန်မူယဲ့က ရွှေရောင်ကျိုင်းတံကို ကိုင်ထားပြီး မှတ်ဉာဏ်များကို စစ်ဆေးကြည့်နေသည်။

သူက ယနေ့တိုက်ခိုက်မှု၏ အကြောင်းအရင်းကိုလည်း သိခဲ့ရသည်။

‘နတ်ဘုရားဘုရင်တွေက မိစ္ဆာဘိုးဘေးနတ်ဘုရားဘုရင်ကို ဖိနှိပ်ဖို့အတွက် ပူးပေါင်းတိုက်ခိုက်ကြလိမ့်မယ်’

‘ဒီဝင်္ကပါကို မိစ္ဆာဘုရင်တွေနဲ့ ရင်ဆိုင်ဖို့အတွက် နတ်ဘုရားဘုရင်တစ်ပါးက ချီးမြှင့်ပေးလိုက်တာပဲ’

‘ဒီနေ့တိုက်ပွဲကို ထျန်းမူတာအိုဂိုဏ်းရဲ့ ချီယန်ဓားဂိုဏ်းက ဦးဆောင်ထားတယ်’

အမျိုးမျိုးသောမြင်ကွင်းများက အမျိုးမျိုးသော အကြံအစည်များကို ထုတ်ပြခဲ့သည်။

ဟန်မူယဲ့က တောင်တန်းပေါ်တွင်ရှိနေသော အစိမ်းရောင်ကြေးခွံများနှင့် ချိုတစ်ချောင်းသားရဲကို လှမ်းကြည့်သည်။

“သူတို့က ကျိုးပဲ့ကောင်းကင် အံ့ဖွယ်သစ်သီးပင်နဲ့ စောင့်ကြည့်ဖို့အတွက် အဖိုးတန်သားရဲကိုတောင် ထုတ်သုံးထားတာပဲ။ တကယ်ရက်ရောတယ်”

ဟန်မူယဲ့က ခပ်ဟဟရယ်လိုက်ပြီး လက်မြှောက်၍ ရိုက်ချသည်။

“ဘုန်း”

ရွှေရောင်ကျိုင်းတံက အစိမ်းရောင်ကြေးခွံနှင့် ချိုတစ်ချောင်းသားရဲကို အသားပြားဖြစ်သွားစေသည်။

ထို့ကြောင့် ဝင်္ကပါ၏စွမ်းအင်က ပျက်စီးသွားခဲ့သည်။

တာအိုဘိုးဘေးအဆင့် ကျွမ်းကျင်သူအချို့မှလွဲ၍ ဝင်္ကပါထဲတွင်ဖြစ်ပျက်နေသောအရာကို တခြားလူများ မမြင်နိုင်ကြပေ။

တာအိုဘိုးဘေးမူချန်က မျက်မှောင်ကြုတ်သည်။

သူ့နောက်တွင်ရှိနေသော မဟာကျင့်ကြံသူများကလည်း မျက်နှာထား လေးနက်နေကြသည်။

ဟန်မူယဲ့၏ခွန်အားက သူတို့၏ခန်းမှန်းချက်ကို ကျော်လွန်နေသည်။

ထို့အပြင် ဟန်မူယဲ့၏ ထွင်းဖောက်မြင်နိုင်စွမ်းကလည်း သူတို့ထက် သာသည်။

သူက မြားတစ်ချက်ဖြင့် ကျွမ်းကျင်သူတစ်ယောက်ကို အနိုင်ယူခဲ့သည်။ သူ၏ မိုးကြိုးစွမ်းအားက လူတိုင်းကို ထိတ်လန့်သွားစေသည်။

ထို့အပြင် သူက အစိမ်းရောင်ကြေးခွံနှင့် ချိုတစ်ချောင်းသားရဲကို တိုက်ရိုက်သတ်ဖြတ်လိုက်သောကြောင့် သူတို့က ဝင်္ကပါထဲတွင်ရှိသော အရာများကို မမြင်နိုင်တော့ပေ။

ထိုဝင်္ကပါထဲတွင် ဟန်မူယဲ့သာမက မိစ္ဆာဘုရင်နှစ်ပါးလည်း ရှိနေသည်။

မည်သူက ဝင်္ကပါထဲသို့ဝင်သွားပြီး စုံစမ်းရဲမည်နည်း။

တာအိုဘိုးဘေးမူချန်၏မျက်နှာက လေးနက်နေသည်။ သူက ရွှေရောင်အလင်းတန်းကို ထုတ်ဖော်လိုက်သည်။

ထိုအလင်းတန်းက ဝင်္ကပါနှင့် ထိတွေ့သွားပြီး အနက်‌ရောင်ကျားပုံရိပ်များကို ထုတ်ပေးသည်။ အနက်ရောင်ကျားများက ဝင်္ကပါထဲသို့ ပြေးဝင်သွားကြသည်။

“တာအိုရောင်းရင်းချင်၊ ငါက သတ်ဖြတ်ခြင်းဝင်္ကပါကို ထိန်းချုပ်ထားမယ်။ မင်းက အဲဒီကလေးကို သွားသတ်လိုက်ပါ”

တာအိုဘိုးဘေးမူချန်က အနက်ရောင်ကျားများကိုထိန်းချုပ်၍ ဟန်မူယဲ့ကိုသတ်ဖြတ်ရန် ကြိုးစားနေသည်။

ဝင်္ကပါထဲသို့ အနက်ရောင်ကျားများ ရောက်သွားသောအချိန်တွင် လူတိုင်းက အထဲတွင်ရှိသော မြင်ကွင်းကို ပြန်မြင်လိုက်ရသည်။

တာအိုဘိုးဘေးက ကိုယ်တိုင်လှုပ်ရှားခဲ့ရသည်။

တာအိုဘိုးဘေးမူချန်က ရွေးချယ်စရာမရှိခဲ့ပေ။ ဟန်မူယဲ့က အလွန်သန်မာပြီး ဝင်္ကပါကို တုန်ခါသွားစေခဲ့သည်။ သူက ဟန်မူယဲ့ကို မဖိနှိပ်နိုင်လျှင် ဝင်္ကပါ၏ အချုပ်အနှောင်စွမ်းအားက ပျက်စီးသွားလိမ့်မည်။

မိစ္ဆာဘုရင်နှစ်ပါးက ချက်ချင်းလွတ်မြောက်လာလိမ့်မည်။

သူက မိစ္ဆာဘုရင်နှစ်ပါးနှင့် ထိပ်တိုက်ရင်မဆိုင်ချင်ပေ။

သူ့စကားကို ကြားလိုက်ရသောအခါတွင် ချီယန်ဓားဂိုဏ်း၏ မဟာသူတော်စင်ချင်ကျန်းက ‌ခေါင်းညိတ်သည်။ သူက လှုပ်ရှားလိုက်ပြီး ချက်ချင်းပျောက်ကွယ်သွားခဲ့သည်။

သူက ဟန်မူယဲ့နှင့် ပေတစ်‌ရာအကွာတွင် ပြန်ပေါ်လာသည်။

“ချီယန်ဓားဂိုဏ်းရဲ့ ချင်ကျန်း” သူက ဟန်မူယဲ့၏ ခေါင်းပေါ်တွင်ရှိ‌နေသော မူလဝိညာဉ်ဓားကို ကြည့်လိုက်ပြီး အော်ပြောသည်။

သူက ဓားတာအိုနှင့် သူတော်စင်တစ်ယောက်ဖြစ်လာသော မဟာကျင့်ကြံသူတစ်ဦး ဖြစ်သည်။

သူက ဓားထုတ်လိုက်သောကြောင့် ဟန်မူယဲ့၏ဓားက တုံ့ပြန်သံပေးလိုက်ပြီး ဓားချီများ မတည်မငြိမ် ဖြစ်လာကြသည်။

မူလဝိညာဉ်ဓားကပင် အနည်းငယ်လှုပ်ရှားသွားပုံရသည်။

သူက ဓားထုတ်လိုက်ရုံဖြင့် ထိုသို့ဖြစ်စေခဲ့သောကြောင့် လောက၏ ထိပ်တန်းအဆင့်ဓားကျင့်ကြံသူတစ်ဦး ဖြစ်လိမ့်မည်။

ဟန်မူယဲ့က သူ့ကို နက်ရှိုင်းစွာတောက်ပနေသော မျက်လုံးများဖြင့် ကြည့်သည်။

သူက အစစ်အမှန်ဓားကျင့်ကြံသူတစ်ဦးနှင့် အချိန်ကြာမြင့်စွာ မတိုက်ခိုက်ခဲ့ရပေ။

ပြန့်ကျဲကြယ်ကျွန်းနှင့် အရှေ့ပင်လယ်တွင် သူက အစွမ်းကုန်သုံးရန် မလိုအပ်ခဲ့ပေ။

ထိုအချိန်၌ အနောက်ဘက်နယ်စပ်ကုန်းမြေ၏ ဓားစံအိမ်တွင် တံခါးပိတ်ကျင့်ကြံနေသော အစစ်အမှန်ခန္ဓာကိုယ်က မျက်လုံးဖွင့်လိုက်သည်။

ဟန်မူယဲ့က ဓားတာအိုကျင့်ကြံခြင်းတွင် ပြိုင်ဘက်ကင်းသည်။

သို့သော် သူက ဓားတာအိုဖြင့် ဝိညာဉ်ဖွဲ့စည်းခြင်းအဆင့်သို့ မဝင်ရောက်နိုင်သေးပေ။

သူက ကိုယ်ပိုင်ဓားတာအိုကို ပိုင်ဆိုင်ထားသည်။

ထိုဓားတာအိုက ဓားတစ်သောင်းတို့အိမ်အပြန်နည်းစနစ်မှ ဖြစ်ပေါ်လာသည်။ သူက အရှေ့ပင်လယ်မှ ပြန်လာပြီး ခြေတစ်လှမ်းတွင် ဓားကွက်တစ်ကွက်ဖြင့် ဓားနည်းစနစ်တစ်ခုကို တီထွင်ပြီး သူတော်စင်တစ်ယောက်ဖြစ်လာရန် အခြေခံအုတ်မြစ်ကို တည်ဆောက်ခဲ့သည်။

ယနေ့တွင် သူက ထူးခြားသော ဓားတာအိုကျွမ်းကျင်မှုကို ပြသတော့မည်။

သူက တောင်တန်းတာအိုဓားကို ကိုင်ထားပြီး သူက လက်မြှောက်လိုက်ပြီး ပြန်လည်နှုတ်ဆက်သည်။

“ကောင်းကင်အံ့ဖွယ်ကမ္ဘာရဲ့ ဟန်မူယဲ့”

ချင်ကျန်းက ကောင်းကင်အံ့ဖွယ်ကမ္ဘာကို မသိသော်လည်း ဟန်မူယဲ့က ဓားကျင့်ကြံသူတစ်ယောက်၏ ဓလေ့ထုံးစံဖြင့် အစွမ်းကုန်တိုက်ခိုက်ရန် ကြိုဆိုနေသည်။

“ဝေါင်း ....”

ကျားနက်များက ဟန်မူယဲ့၏နောက်တွင်ရှိသော ပါ့ရှား၏ပုံရိပ်ကို ဝိုင်းရံထားကြသည်။

ကျားနက်များက မတိုက်ခိုက်ခဲ့ကြပေ။ သို့သော် အနက်‌ရောင်ပိုက်ကွန်များကို ထုတ်လွှတ်၍ ပါ့ရှားကို ချုပ်နှောင်ထားကြသည်။

ဝင်္ကပါ၏အပြင်ဘက်တွင် တာအိုဘိုးဘေးမူချန်က ချိပ်စည်းလက်ဟန်များကို ပြုလုပ်နေသည်။ သူ့ထုတ်ဖော်ထားသော ချီစွမ်းအင်အလင်းတိုင်က တလက်လက်တောက်ပနေသည်။

ဝင်္ကပါ၏ ကျားနက်များက တာအိုဘိုးဘေးမူချန်နှင့်ပူးပေါင်း၍ ပါ့ရှား၏ပုံရိပ်ကို ဖိနှိပ်နေသည်။ ဓားသူတော်စင်ချင်ကျန်းက ဟန်မူယဲ့နှင့် ထိပ်တိုက်ရင်ဆိုင်နေသည်။

တာအိုဘိုးဘေးတစ်ယောက်နှင့် တာအိုဘိုးဘေးတစ်ယောက်ကဲ့သို့ အစွမ်းထက်သော သူတော်စင်တစ်ယောက်က သူ့ကို တစ်ပြိုင်နက် တိုက်ခိုက်နေသည်။

ဟန်မူယဲ့ရင်ဆိုင်နေရသော စွမ်းအားသည် မိစ္ဆာဘုရင်နှစ်ပါးထက် ပိုမိုအားကောင်းသည်။

ဟွမ်ခြောက်က ကမ္ဘာမြေဖိနှိပ်မိစ္ဆာဘုရင်ကို ပေတစ်ရာအကွာသို့ တွန်းထုတ်လိုက်ပြီး ဟန်မူယဲ့ကို လှမ်းကြည့်သည်။

ယခုအချိန်တွင် အသက်ရှူကြိမ်အနည်းငယ်ခန့်သာ ကုန်ဆုံးသေးသည်။

‘ဟန်မူယဲ့က တောင့်ခံထားနိုင်ပါ့မလား’

သူတွေးမိသည်။

“ဟူး ....”

ကမ္ဘာမြေဖိနှိပ်မိစ္ဆာဘုရင်က ဟွမ်ခြောက်ကို အခွင့်အရေးမပေးခဲ့ပေ။ သူက ဆေဘာဓားရှည်ကို ကိုင်ထားပြီး ပြေးဝင်လာပြန်သည်။

သူက တာအိုဂိုဏ်းများနှင့် နားလည်မှုရှိနေပုံပေါ်သည်။

ဟွမ်ခြောက်က အံကြိတ်ထားသည်။ သူ့ကိုယ်ပေါ်တွင်ရှိသော နဂါးနက်ချပ်ဝတ်က နီရဲလာခဲ့သည်။ သူ့လက်ထဲတွင်ရှိသော မိစ္ဆာဓားရှည်ကလည်း သွေးနီရောင်သန်းလာသည်။ သူက အဆုံးမရှိသော မိစ္ဆာချီများကို ထုတ်ဖော်၍ ကမ္ဘာမြေဖိနှိပ်မိစ္ဆာဘုရင်ကို တိုက်ခိုက်လိုက်သည်။

သူက မိစ္ဆာလမ်းစဉ်ကို လျှောက်လှမ်းနေသောအချိန်တွင် မိစ္ဆာကျင့်ကြံသူများအား မယုံကြည်သင့်ကြောင်း နားလည်လာခဲ့သည်။

သူက ကမ္ဘာမြေဖိနှိပ်မိစ္ဆာဘုရင်နှင့် ပူးပေါင်း၍ တာအိုဂိုဏ်းများကို တိုက်ခိုက်ခဲ့မည်ဆိုလျှင်ပင် အရေးကြီးသောအချိန်၌ ကမ္ဘာမြေဖိနှိပ်မိစ္ဆာဘုရင်က သူ့နောက်ကျောကို ဓားဖြင့်ထိုးသွားလိမ့်မည်။

သူက ဝင်္ကပါထဲတွင် ပိတ်မိနေသောအချိန်ကို အခွင့်ကောင်းယူ၍ အစွမ်းကုန်တိုက်ခိုက်ရမည်။ သူက ကမ္ဘာမြေဖိနှိပ်မိစ္ဆာဘုရင်ကို တစ်ခါတည်း မသတ်နိုင်လျှင်ပင် ဒဏ်ရာရသွားအောင် လုပ်ရမည်။ ထိုမှသာ ကမ္ဘာမြေဖိနှိပ်မိစ္ဆာဘုရင်က သူနှင့် ယှဉ်ပြိုင်နိုင်တော့မည်မဟုတ်ပေ။

သူ့ကို တခြားမိစ္ဆာဘုရင်သုံးပါးက မုန်းတီးနေခဲ့သည်။ ဆေးပင်ဥယျာဉ်ထဲ၌ ကမ္ဘာမြေဖိနှိပ်မိစ္ဆာဘုရင်က သူ့ကို မျှားခေါ်ပြီး သတ်ဖြတ်ချင်ခဲ့သည်။ အဘယ်ကြောင့်ဆိုသော် သူက မိစ္ဆာဓားနှင့် မိစ္ဆာနဂါးကို ပိုင်ဆိုင်ထားပြီး သူတို့ထက် ပိုမိုသန်မာသောကြောင့် ဖြစ်သည်။

ယနေ့တွင် ဆေးပင်ဥယျာဉ်ထဲ၌ တာအိုဂိုဏ်းများက ဝင်္ကပါတည်ဆောက်၍ သူတို့ကို ဖိနှိပ်ထားခဲ့သည်။

အခွင့်ကောင်းတစ်ခုပင် ဖြစ်သည်။

သူ ဟွမ်လောင်လျှိုက တစ်ဦးချင်းတိုက်ပွဲများတွင် မည်သူ့ကိုမှ မကြောက်ပေ။

သူက တာအိုဂိုဏ်းများအား တားဆီးနေသော ဟန်မူယဲ့ကိုသာ စိတ်ပူမိသည်။

ဟွမ်လောင်လျှိုက သွေးများဆူပွက်လာသည်။ သူက တိမ်မြုံကမ်းပါးသို့ ပြန်ရောက်သွားပြီး ပခုံးချင်းယှဉ်၍ တိုက်ခိုက်နေသည်ဟု ထင်လိုက်မိသည်။

“ဟန်လေး၊ မင်းလုပ်နိုင်သေးလား”

ဟွမ်လောင်လျှိုက အော်ဟစ်လိုက်ပြီး မိစ္ဆာဓားဖြင့် ခုတ်ချသည်။

ဟန်မူယဲ့က ရယ်လိုက်ပြီး ဓားကိုမြှောက်သည်။

“ခင်ဗျားထက်ပိုကောင်းအောင် လုပ်နိုင်တယ်”

ဓားအလင်းက မျဉ်းတစ်ကြောင်းအဖြစ် စုစည်းသွားသည်။

တစ်ဖက်တွင် ချင်ကျန်း၏ အစိမ်းရောင်ဓားအလင်းက သက်တံတစ်ခုအဖြစ် ပြောင်းလဲသွားပြီး ချီစွမ်းအင်လှိုင်းများဖြင့် တိုက်ခိုက်လိုက်သည်။

ထိုးသွင်းခြင်း ....

ဓားအလင်းမျဉ်း ....

ရင်ဆိုင်တိုက်ခိုက်ခြင်း ....

ဟန်မူယဲ့က ပုံကြမ်းရေးဆွဲနေသကဲ့သို့ ဓားဖြင့် ထိုးခုတ်ချလိုက်သည်။

ချင်ကျန်း၏ဓားက အလင်းတန်းတစ်ခုအဖြစ် ပြောင်းလဲသွားပြီး လေဟာနယ်ကို ခုတ်ချသည်။

တာအိုနယ်မြေ ....

ပြိုကွဲသွားသော တည်နေရာအစိတ်အပိုင်းတိုင်းက တာအိုနယ်မြေထဲသို့ ဆွဲသွင်းခံလိုက်ရသည်။

ဟန်မူယဲ့၏ဓားက အလွန်အားကောင်းပြီး လေဟာနယ်ကို ထိုးခွဲသွားသည်။

သို့သော် တာအိုနယ်မြေ၏ရှေ့တွင် ပြိုကွဲသွားသော လေဟာနယ်ကလည်း ပျောက်ကွယ်သွားရသည်။

ဟန်မူယဲ့က သူတော်စင်အဆင့်သို့ မရောက်သေးသောကြောင့် အားနည်းနေသေးသည်။

ဓားသုံးချက်အပြီးတွင် ပတ်ဝန်းကျင်ကို ချင်ကျန်း၏ဓားအလင်းများက လွှမ်းခြုံထားခဲ့သည်။

နောက်ထပ်ဓားချက်ကို ထုတ်ဖော်လိုက်လျှင် ဟန်မူယဲ့က တာအိုနယ်မြေထဲသို့ ရောက်သွားလိမ့်မည်။

သူက တာအိုနယ်မြေထဲသို့ ရောက်သွားလျှင် အသက်ရှင်ရန် မသေချာတော့ပေ။

ဓားအလင်းက ကျဆင်းလာပြန်သည်။

ချီစွမ်းအင်အလင်းက ဟန်မူယဲ့ကို လွှမ်းခြုံသွားသည်။

ဟန်မူယဲ့ကလည်း ဓားဖြင့် ထိုးချလိုက်သည်။

အေးစက်သောအလင်းတစ်ခု ပေါ်ထွက်လာသည်။

အပြင်ဘက်တွင် အာရုံစိုက်ကြည့်နေသော တာအိုတန်ခိုးရှင်များက ပြုံးလိုက်ကြသည်။

အထူးသဖြင့် ဓားကျင့်ကြံသူများအားလုံးက စိတ်အေးလက်အေး ရှိသွားကြပုံပေါ်သည်။

ပြိုင်ဘက်က မည်သို့ပင် သန်မာပါစေ မဟာဓားကျင့်ကြံသူတစ်ဦး၏ တာအိုနယ်မြေထဲသို့ ရောက်သွားလျှင် အသတ်ခံရရန် စောင့်ဆိုင်းနေသော သိုးတစ်ကောင်ကဲ့သို့ ဖြစ်သွားလိမ့်မည်။

“အဲဒီကလေးက စွမ်းရည်ရှိတာပဲ။ လူအိုကြီးချင်ကျန်းက ဓားလေးချက်သုံးခဲ့ရတယ်”

ဓားရှည်တစ်လက်ကိုင်ထားသော အစိမ်းရောင်ဝတ်စုံနှင့် အနက်ရောင်မုတ်ဆိတ်များရှိသည့် လူအိုကြီးတစ်ယောက်က ညင်သာစွာပြောသည်။

“ကောင်းကင်အဆင့်ကို မကျောလွန်သေးဘဲ တာအိုဘိုးဘေးတစ်ယောက်နဲ့ ယှဉ်နိုင်တဲ့ သူတော်စင်ချင်ကျန်းကို ဒီအခြေအနေအထိ တိုက်ခိုက်နိုင်ခဲ့တယ်။ သူက ရှားပါးတဲ့ ဓားတာအိုပါရမီရှင်တစ်ဦးပဲ”

တစ်ဖက်တွင် အရပ်ပုပြီး အနည်းငယ်ဝသော လူအိုကြီးတစ်ယောက်က ခေါင်းခါလိုက်ပြီး ပြောသည်။

ယွမ်မင်ကျဲက ခေါင်းခါလိုက်ပြီး သက်ပြင်းချသည်။

‘နှမြောစရာပဲ’

‘သူက ရှားပါးတဲ့ မဟာမိတ်တစ်ယောက်လေ’

“ရွှပ် ....”

ချင်ကျန်း၏ဓားအလင်းက ဟန်မူယဲ့ကို တာအိုနယ်မြေအတွင်းသို့ ဆွဲယူလိုက်သည်။

ဟန်မူယဲ့က ပျောက်ကွယ်သွားခဲ့သည်။

ချင်ကျန်းက အပြုံးတစ်ခုနှင့်အတူ ဓားသိမ်းပြီး နောက်ပြန်လှည့်လာသည်။