အခန်း (၆၇၂)

“သူက အရမ်းလောဘကြီးတာပဲ”

အသံတစ်သံသည် အာကာသထဲတွင် ပေါ်ထွက်လာခဲ့သည်။

လွန်ခဲ့သောရက်များတွင် ဟန်မူယဲ့၏ တိုက်ခိုက်နိုင်စွမ်းနှင့် ဆုံးဖြတ်ချက်များသည် အလွန်ကောင်းမွန်ခဲ့ကြသည်။

သို့သော် ယခုအချိန်တွင် သူ၏ ရွေးချယ်မှုကြောင့် တာအိုဘိုးဘေးအများအပြားက ခေါင်းခါလိုက်ကြသည်။

“ဒါက ကျင့်ကြံခြင်းလောကပဲ။ ရတနာတွေက လူသားတွေရဲ့နှလုံးသားကို လှုပ်ရှားစေနိုင်တယ်။ ပိုက်ဆံက မကောင်းမှုအားလုံးရဲ့ အရင်းအမြစ်ပဲဆိုတဲ့ စကားက သာမန်လူသားတွေတင်မကဘဲ ကျင့်ကြံသူတွေအပေါ်မှာလည်း သက်ရောက်မှုရှိတယ်”

“စောင့်ကြည့်ကြရအောင်။ သူ့ရဲ့ရွေးချယ်မှုက နောက်ဆုံးမှာ အလကားဖြစ်သွားလိမ့်မယ်”

တာအိုဘိုးဘေးများက သက်ပြင်းချလိုက်ကြသည်။

ရတနာတစ်ခုက အပြည့်အဝဖြစ်ပေါ်မလာဘဲ ပါရမီရှင်တစ်ဦးကလည်း ကျဆုံးရတော့မည်။

ဟန်မူယဲ့က ရတနာကို ရွေးချယ်လိုက်သောအခါတွင် သူတို့က ရလဒ်ကို ကြိုတင်ဆုံးဖြတ်နိုင်သည်။

ဟန်မူယဲ့က အလွန်လျင်မြန်သည်။ သူက ကြယ်တစ်စင်းကို သယ်ထားသော်လည်း အသက်တစ်ခါရှူကြိမ်အတွင်း၌ မိုင်တစ်ထောင်ကို ခရီးသွားနိုင်သည်။

သို့သော် ထိုအမြန်နှုန်းက မည်မျှ ခံမည်နည်း။

သူက ကျောပေါ်တွင် ကမ္ဘာတစ်ခုကို သယ်ထားနိုင်သော နတ်ဘုရားသားရဲတစ်ကောင် မဟုတ်ခဲ့ပေ။

“ဘုန်း”

အင်မော်တယ်ဝိညာဉ်ကမ္ဘာ၏ ကျွမ်းကျင်သူများသည် သူ့နောက်တွင် လိုက်လာကြသည်။ သူတို့က အလျင်မလိုပေ။ ဟန်မူယဲ့က အားကုန်သွားသောအချိန်တွင် သေဆုံးခြင်းနှင့် ကြုံတွေ့ရလိမ့်မည်။

ကောင်းကင်အံ့ဖွယ်ကမ္ဘာ၏ ကျွမ်းကျင်သူတစ်သောင်းက လေးနက်သောမျက်နှာထားများဖြင့် ဟန်မူယဲ့၏နောက်မှ နီးကပ်စွာလိုက်လာကြသည်။

သူတို့က ဟန်မူယဲ့ကို ယုံကြည်သောကြောင့်သာ မဟုတ်ခဲ့လျှင် စိတ်ဓာတ်ပျက်ပြားသွားလိမ့်မည်။

ဟန်မူယဲ့က အစွမ်းကုန်ထွက်ပြေးမည့်အစား ကြယ်တစ်စင်းကို သယ်ထားခဲ့သည်။ သူက မည်သို့ လွတ်မြောက်နိုင်မည်နည်း။

အာကာသထဲတွင် ဟန်မူယဲ့က ကြယ်တစ်စင်းကိုသယ်ထားပြီး ရှေ့ဆုံးမှ ဦးဆောင်နေသည်။

သူ့နောက်တွင် ကောင်းကင်အဆင့် ကျင့်ကြံသူတစ်သောင်းက လိုက်ပါလာကြသည်။

သူတို့၏နောက်တွင် အင်မော်တယ်ဝိညာဉ်ကမ္ဘာ၏ အဆုံးမရှိသောစစ်တပ်များနှင့် သူတော်စင်များက ပါလာကြသည်။

သူတို့က သုံးရက်ကြာအောင် ပြေးလွှားခဲ့ကြသည်။

သုံးရက်မြောက်နေ့တွင် တာအိုဘိုးဘေးများက တစ်ခုခုမှားယွင်းနေကြောင်း သတိထားမိလိုက်ကြသည်။

ဟန်မူယဲ့က နှေးကွေးမသွားခဲ့ပေ။

သူက ကြယ်တစ်စင်းကို သယ်ထားပြီး မရပ်မနားဘဲ သုံးရက်ကြာအောင် ပြေးလွှားနေခဲ့သည်။

‘သူက လူလား၊ နတ်ဘုရားသားရဲလား’

“ဘုန်း”

သူတို့၏ရှေ့တွင် ပေါက်ကွဲသံကို ကြားနိုင်သည်။

“အဲဒါက ပျက်စီးခြင်းတောရိုင်း ရှိနေတဲ့နေရာပဲ”

လူတစ်ယောက်က ထိတ်လန့်စွာ‌ အော်ပြောလိုက်သည်။

ထိုနေရာတွင် ချီစွမ်းအင်နှင့် သွေးစွမ်းအင်များက လောက၏တစ်ဝက်ကို အလင်းပေးနေသည်။ အချင်းချင်း တိုက်ခိုက်နေကြသော များပြားလှသည့်ဝင်္ကပါများကို မြင်နိုင်သည်။

“အဲဒီတော့ ဒီကလေးက အခြေအနေကိုပြောင်းလဲဖို့ ဒီကိုရောက်လာတာပေါ့”

“သူက ရူးနေတာပဲ။ အကြောက်တရားကိုရော သိရဲ့လား”

အာကာသထဲတွင် နတ်အာရုံများက လှုပ်ရှားသွားကြပြန်သည်။

ဟန်မူယဲ့က ကောင်းကင်အံ့ဖွယ်ကမ္ဘာသို့ ပြန်မသွားဘဲ ကောင်းကင်အဆင့် ကျင့်ကြံသူတစ်သောင်းကို ဦးဆောင်၍ ဝိုင်းရံတိုက်ခိုက်ခံနေရသော ပျက်စီးခြင်းတောရိုင်းသို့ ရောက်လာခဲ့သည်။

ပျက်စီးခြင်းတောရိုင်း၏ပတ်ဝန်းကျင်တွင် သန်းဆယ်ချီသောစစ်တပ်များက တိုက်ခိုက်နေကြသည်။ အချိန်တိုင်းတွင် မရေမတွက်နိုင်သော စစ်သည်များက သေဆုံးသွားကြသည်။

“ဝီ”

ဟန်မူယဲ့၏လက်ထဲတွင်ရှိသော ကြယ်က တုန်ခါသွားပြီး မီးတောက်များက နဂါးတစ်ကောင်အဖြစ် ပြောင်းလဲသွားခဲ့သည်။

သူကိုင်ထားသောကြယ်သည် မိုင်တစ်ရာကျယ်ဝန်းသော သပိတ်တစ်လုံးအဖြစ် ပြောင်းလဲသွားသည်။

သပိတ်ထဲတွင် ဗုဒ္ဓပုံရိပ်တစ်ခုသည် တင်ပျဉ်ခွေထိုင်လျက် ရှိနေခဲ့သည်။ ထိုပုံရိပ်က ရွှေရောင်ဗုဒ္ဓအလင်းများကို ထုတ်လွှတ်ပေးနေသည်။

“ဒီရတနာက အောင်မြင်သွားပြီလား”

ညင်သာသောအသံတစ်သံသည် အာကာသထဲတွင် ပေါ်ထွက်လာသည်။

ထိုအရာသည် ဝိညာဉ်ရတနာအဆင့်ကို ကျော်လွန်နေသော အင်မော်တယ်ရတနာဖြစ်သည်။ ထို့အပြင် သူတော်စင်တစ်ပါးကိုလည်း ရတနာဝိညာဉ်အဖြစ် အသုံးပြုထားသေးသည်။ အောင်မြင်စွာသန့်စင်ရန် လွယ်ကူမည်မဟုတ်ပေ။

“အင်မော်တယ်ရတနာရဲ့ သန္ဓေသားပဲ။ လက်နက်ကို အသုံးပြုဖို့က အင်မော်တယ်ရတနာရဲ့ သူတော်စင်ဝိညာဉ်အပေါ်မှာ မူတည်နေတယ်”

“မဟုတ်ရင် ရတနာကို အသုံးပြုနိုင်ဖို့အတွက် အနည်းဆုံး နှစ်ပေါင်းတစ်ရာအချိန်ယူပြီး လက်နက်ဝိညာဉ်ကို ပြန်လည်သန့်စင်ရလိမ့်မယ်”

ပန်းပဲပညာတွင်ကျွမ်းကျင်သော တာအိုဘိုးဘေးများက ရှင်းပြလိုက်ကြသည်။

လွန်ခဲ့သောရက်များတွင် တာအိုပြိုင်ပွဲကို စောင့်ကြည့်နေသော တာအိုဘိုးဘေးများအားလုံးက ဟန်မူယဲ့ကို အာရုံစိုက်ထားကြသည်။

“ဒီကလေးက တကယ့်ကိုပါရမီကောင်းတာပဲ။ ပန်းပဲပညာ၊ အာခီမီပညာနဲ့ ဓားပညာတို့မှာ အရမ်းထူးချွန်တယ်။ သူက ဒီအခြေအနေကို ဘယ်လိုဖြေရှင်းမလဲ မသိဘူး”

ဟန်မူယဲ့ကို စိတ်ပျက်နေသော တာအိုဘိုးဘေးများက ယခုအချိန်တွင် ပြန်လည်တက်ကြွလာကြသည်။

“ဒီကလေးက ကြိုတင်စီစဉ်ပြီးသား ဖြစ်လိမ့်မယ်။ မဟုတ်ရင် သူက ဒီနေရာကို လာမှာမဟုတ်ဘူး”

တာအိုဘိုးဘေးတစ်ယောက်က ခိုင်မာစွာပြောလိုက်သည်။

“ဒါပေမဲ့ ငါက သူတော်စင်ဝိညာဉ်ကို နာခံလာအောင်လုပ်ဖို့ စဉ်းစားလို့မရဘူး”

ရတနာ၏ သူတော်စင်ဝိညာဉ်ကို နာခံအောင်လုပ်ရန် အလွန်ခက်ခဲသည်။

ယနေ့တွင် ဟန်မူယဲ့က ကောင်းကင်အဆင့် ကျွမ်းကျင်သူတစ်သောင်းကို ဦးဆောင်လာခဲ့သော်လည်း အများဆုံး ကောင်းကင်အံ့ဖွယ်ကမ္ဘာ၏ စစ်တပ်နှင့် ပူးပေါင်းနိုင်ရုံသာ ရှိလိမ့်မည်။ သူတို့က ဤတိုက်ပွဲကို အဆုံးသတ်ပြီး ပျက်စီးခြင်းတောရိုင်းကို ကယ်တင်နိုင်မည်မဟုတ်ပေ။

ထို့အပြင် အင်မော်တယ်ဝိညာဉ်ကမ္ဘာစစ်တပ်ကလည်း နောက်တွင် ပါလာသည်။

တစ်ခုခုမှားယွင်းသွားခဲ့လျှင် သူတို့အားလုံးက အန္တရာယ်ကျရောက်သွားလိမ့်မည်။

ကောင်းကင်အံ့ဖွယ်ကမ္ဘာ၏ သန်းဆယ်ချီသောစစ်သည်များသည် ဤနေရာတွင် စုစည်းနေကြသည်။ ထို့အပြင် ဟန်မူယဲ့နှင့် ကောင်းကင်အဆင့် ကျင့်ကြံသူတစ်သောင်းလည်း ရောက်လာကြသည်။ သူတို့အားလုံး ရှံးနိမ့်သွားခဲ့လျှင် တာအိုပြိုင်ပွဲသည် စောစီးစွာ ပြီးဆုံးသွားလိမ့်မည်။

“ဘုန်း’

အဆုံးမရှိသော မိုးကြိုးလျှပ်စီးများသည် သပိတ်ပေါ်သို့ ကျဆင်းလာခဲ့သည်။

အင်မော်တယ်ရတနာသည် လောက၏ကန့်သတ်ချက်များကို ကျော်လွန်နေသည်။

အင်မော်တယ်ရတနာ၏ စွမ်းအားကို တာအိုဘိုးဘေးတစ်ပါးကပင် ခက်ခဲစွာ ခုခံရသည်။

ထိုရတနာကို ကြယ်တစ်စင်းနှင့် သူတော်စင်တစ်ပါးအား အသုံးပြု၍ သန့်စင်ထားခဲ့သည်။

ဟန်မူယဲ့၏ဦးခေါင်းထက်တွင် အဆုံးမရှိသော လျှပ်စီးပင်လယ်တစ်ခု ဖြစ်ပေါ်လာသည်။

ရွှေနဂါးတစ်ကောင်က သပိတ်ကို ရစ်ပတ်ထားသည်။ အဆုံးမရှိသောလျှပ်စီးများက ရွှေနီရောင်သပိတ်ကို လွှမ်းခြုံထားလိုက်သည်။

ဟန်မူယဲ့က ပျက်စီးခြင်းတောရိုင်းဆီသို့ တိုက်ရိုက်ပျံသန်းလာခဲ့သည်။

သူ့ကို မည်သူမှ မတားဆီးရဲကြပေ။

အင်မော်တယ်ဝိညာဉ်ကမ္ဘာ၏ စစ်တပ်များက လျင်မြန်စွာ နောက်ဆုတ်လိုက်ကြသည်။

မည်သူက ကြယ်တစ်စင်းကို တားနိုင်မည်နည်း။

မည်သူက ကောင်းကင်အဆင့် ကျင့်ကြံသူတစ်သောင်းကို တားနိုင်မည်နည်း။

ကောင်းကင်အဆင့် ကျင့်ကြံသူတစ်သောင်းသည် လေဟာနယ်အား ထိုးခွဲသွားနိုင်သည့် ပြင်းထန်သောအငွေ့အသက်များကို ထုတ်လွှတ်နေကြသည်။

အာကာသသည် တုန်ခါသွားခဲ့သည်။

ထိုအချိန်တွင် စစ်တပ်ဝင်္ကပါများအားလုံးက တိုက်ခိုက်မှုကို ရပ်တန့်လိုက်ကြသည်။

လူတိုင်းက ပျံသန်းလာသောလူကို မော့ကြည့်လိုက်ကြသည်။

“ဘလေး ....”

လုယန်က ပြုံးသည်။

သိပ်မဝေးသောနေရာတွင် ရှန့်လင်းရွှမ်းက လခြမ်းကွေးဓားနှစ်လက်ကို သိမ်းလိုက်ပြီး ခေါင်းမော့ကြည့်သည်။ သူ့မျက်လုံးထဲတွင် စိတ်လှုပ်ရှားမှုများဖြင့် ပြည့်နှက်နေသည်။

“အစ်ကိုကြီးဟန် ....”

ပျက်စီးခြင်းတောရိုင်းတွင် မိစ္ဆာများက ခေါင်းမော့ကြည့်လိုက်ကြသည်။

သူတို့၏အမြင်တွင် ဟန်မူယဲ့က မိုးကြိုးလျှပ်စီးများနှင့်အတူ ဆင်းသက်လာသော နတ်ဘုရားတစ်ပါးနှင့် တူနေသည်။

“မိစ္ဆာတစ်သောင်းဘုရင်၊ မိစ္ဆာတစ်သောင်းဘုရင်ပဲ”

“ဘုရင်က ငါတို့ကိုကယ်ဖို့ ရောက်လာပြီ”

တိတ်ဆိတ်နေသော ပျက်စီးခြင်းတောရိုင်းက ပျော်ရွှင်စွာအော်ဟစ်သံများဖြင့် ပြည့်နှက်သွားခဲ့သည်။

ထိုအချိန်တွင် ပျက်စီးခြင်းတောရိုင်းသာမက ရပ်တန့်သွားသော ကောင်းကင်အံ့ဖွယ်ကမ္ဘာ၏ စစ်တပ်ဝင်္ကပါများကလည်း အော်ဟစ်လိုက်ကြသည်။

“အမတ်ချုပ်ကြီးဟန် ....”

“အမတ်ချုပ်ကြီးဟန်ကို နှုတ်ဆက်လိုက်ပါတယ် ....”

ကောင်းကင်အံ့ဖွယ်ကမ္ဘာ၏ အမတ်ချုပ်ကြီးအသစ်သည် တိမ်တိုက်ချီဆေးလုံးကို တီထွင်ပြီး ဓားအမြုတေများကို သန့်စင်ပေးခဲ့သည်။ အမတ်ချုပ်ကြီးဟန်က ဓားကျွမ်းကျင်သူတစ်ဦးဟူ၍လည်း ပြောကြသည်။ သို့သော် သူတို့က အမတ်ချုပ်ကြီးဟန်ကို မမြင်ဘူးကြပေ။

သို့သော်လည်း အမတ်ချုပ်ကြီးအသစ်က ပြင်းထန်နေသောတိုက်ပွဲအတွင်းသို့ လူကိုယ်တိုင်ရောက်လာလိမ့်မည်ဟု သူတို့အားလုံးက ထင်မထားကြပေ။

ထို့အပြင် သူက ကောင်းကင်အဆင့် ကျင့်ကြံသူတစ်သောင်းကိုလည်း ခေါ်ဆောင်လာခဲ့သည်။ သူ့ခေါင်းထက်တွင် လျှပ်စီးပင်လယ်တစ်ခု ရှိနေပြီး သူက ရှေးခေတ်၏ မိစ္ဆာနတ်ဘုရားတစ်ပါးနှင့် တူနေသည်။

ယခုအချိန်တွင် ကောင်းကင်အံ့ဖွယ်ကမ္ဘာက စိတ်အားတက်ကြွသွားသည်။

“ငါက မင်းတို့အားလုံးကို အိမ်ပြန်ခေါ်သွားမယ်”

ဟန်မူယဲ့က ပျက်စီးခြင်းတောရိုင်း၏ရှေ့တွင် ရပ်တန့်လိုက်ပြီး တည်ငြိမ်စွာပြောသည်။

‘အိမ်ပြန်ကြမယ်’

ပျက်စီးခြင်းတောရိုင်းတွင် မရေမတွက်နိုင်သော မိစ္ဆာများက ဟိန်းဟောက်လိုက်ကြသည်။

စစ်တပ်ဝင်္ကပါများ၏ သွေးနှင့်ချီသည် နဂါးများအဖြစ် ပြောင်းလဲသွားကြသည်။

ဟန်မူယဲ့၏နောက်တွင် ကောင်းကင်အဆင့် ကျင့်ကြံသူတစ်သောင်းက တိတ်ဆိတ်စွာ ကြည့်နေကြသည်။

ယခုအချိန်တွင် သူတို့၏နှလုံးသားများက တုန်ခါသွားကြသည်။ သူတို့က တိုက်ခိုက်လိုစိတ်များဖြင့် နိုးကြွလာကြသည်။

ဤနေရာတွင် သန်းဆယ်ချီသော စစ်သည်များက တိုက်ခိုက်နေကြသည်။ အံ့ဖွယ်ကောင်းကင်ကမ္ဘာ၏ စစ်သည်များက ဝိုင်းရံခံထားရသည်။

သူတို့က ထိုအကြောင်းကို မသိခဲ့ပေ။

တာအိုအင်အားစုက အရှေ့တောင်ပိုင်း၏ ဒေသရှစ်ခုတွင် ပုန်ကန်ခဲ့ကြသေးသည်။

ဤနေရာသည် မဟာတာအို၏ အစစ်အမှန်တိုက်ပွဲပင် ဖြစ်သည်။

“ငါတို့ ကောင်းကင်အံ့ဖွယ်ကမ္ဘာရဲ့ လူတွေကို အိမ်ပြန်ခေါ်သွားကြမယ်”

ဟန်မူယဲ့၏နောက်တွင် ရှိနေသော ကုန်းစွန်းရှုက အော်ဟစ်လိုက်သည်။ သူက ဓားအလင်းတစ်ခုကို ထုတ်ဖော်သည်။

ချီစွမ်းအင်အလင်းနှင့် သမာဓိစွမ်းအင်များက ဓားအလင်းထဲတွင် ပေါင်းစပ်သွားကြသည်။

အဝေးတစ်နေရာတွင် အင်မော်တယ်ဝိညာဉ်ကမ္ဘာ၏ စစ်တပ်က သူတို့ကို ဖြည်းဖြည်းချင်း ဝိုင်းရံထားလိုက်သည်။

သို့သော် ယခုအချိန်တွင် သူတို့က ကြောက်ရွံ့စိတ် ကင်းမဲ့နေကြသည်။

ဤတိုက်ပွဲတွင် သူတို့က နောင်တမရှိဘဲ စစ်သည်များနှင့်အတူ ကောင်းကင်အံ့ဖွယ်ကမ္ဘာသို့ ပြန်သွားကြမည်။

အာကာသထဲတွင် ချီစွမ်းအင်အလင်းများက တုန်ခါလာကြသည်။

တာအိုဘိုးဘေးများက ဆက်လက်ဆွေးနွေးနေကြသည်။

ထိုတိုက်ပွဲသည် တာအိုပြိုင်ပွဲ၏အဆုံးသတ် ဖြစ်နိုင်သည်။

“ကောင်းကင်အံ့ဖွယ်ကမ္ဘာရဲ့ ဝမ်မော့ရှန်နဲ့ ချန်ချင်းကျစ်တို့က ရောက်မလာနိုင်ဘူး။ ဒီတိုက်ပွဲရဲ့ရလဒ်ကို ကြိုတင်ခန့်မှန်းကြည့်လို့ရတယ်”

တာအိုဘိုးဘေးတစ်ယောက်က ပြောလိုက်သည်။

ထိုအချက်သည် မြင်သာသည်။

ကောင်းကင်အံ့ဖွယ်ကမ္ဘာသည် အင်မော်တယ်ဝိညာဉ်ကမ္ဘာထက် အားနည်းသည်။ ယခုအချိန်တွင် သူတို့က အင်မော်တယ်ဝိညာဉ်ကမ္ဘာ၏ ဝိုင်းရံခြင်းကို ခံထားရသောကြောင့် မည်သို့ တိုက်ခိုက်နိုင်မည်နည်း။

“အဲဒီကလေး၊ ကောင်းကင်အံ့ဖွယ်ကမ္ဘာရဲ့ အမတ်ချုပ်ကြီးဟန်က သာမန်မဟုတ်ဘူး”

လူတစ်ယောက်က တီးတိုးပြောသည်။

ထိုတိုက်ပွဲတွင် တစ်ခုတည်းသောအပြောင်းအလဲသည် ဟန်မူယဲ့သာ ဖြစ်နိုင်လိမ့်မည်။

သူက ကောင်းကင်အဆင့် ကျင့်ကြံသူတစ်သောင်းကို ဦးဆောင်ပြီး အာကာသထဲသို့ ရောက်လာ‌သောအချိန်တွင် သူ၏ တိုက်ခိုက်နိုင်စွမ်းနှင့် ဆုံးဖြတ်ချက်များသည် လူတိုင်းကို အံ့အားသင့်စေခဲ့သည်။

သူက ဤနေရာသို့ ရောက်လာသောကြောင့် နောက်ကွယ်တွင် အကြောင်းပြချက်တစ်ခု ရှိနေလိမ့်မည်။

လူတိုင်း၏အကြည့်အောက်တွင် ဟန်မူယဲ့က ဖြည်းဖြည်းချင်း တစ်ဖက်သို့လှည့်ကြည့်သည်။

အင်မော်တယ်ဝိညာဉ်ကမ္ဘာ၏ စစ်တပ်က သူတို့အားလုံးကို ဝိုင်းရံထားသည်။ သူတော်စင်ငါးယောက်၊ ကောင်းကင်အဆင့် ကျင့်ကြံသူ ရှစ်ထောင်နှင့် စစ်သည်သန်းသုံးဆယ်သည် ပျက်စီးခြင်းတောရိုင်း၏ အပြင်ဘက်တွင် ရှိနေကြသည်။

လုယန်၏လက်အောက်တွင်ရှိသော ကောင်းကင်အံ့ဖွယ်ကမ္ဘာ၏ စစ်တပ်သည် စစ်သည်ဆယ်သန်းခန့်သာ ရှိသည်။ ပျက်စီးခြင်းတောရိုင်းတွင် မိစ္ဆာနှင့် ကောင်းကင်အဆင့် ကျွမ်းကျင်သူများ ရှိနေကြသော်လည်း သူတို့က သီးခြားတိုက်ခိုက်ပြီး မပူးပေါင်းနိုင်ကြပေ။

မိစ္ဆာများက စစ်တပ်ဝင်္ကပါကို ပိုင်ဆိုင်မထားသောကြောင့် စစ်သည်တစ်သန်း၏ ပူးပေါင်းတိုက်ခိုက်မှုကို ခုခံနိုင်မည်မဟုတ်ပေ။

သူတို့အတွက် အနိုင်ရရန် အခွင့်အရေးမရှိပေ။

“သူတော်စင်ရှစ်မင်၊ သဘောတူညီချက်တစ်ခု လုပ်ကြရအောင်”

ထိုအချိန်တွင် ဟန်မူယဲ့က ရုတ်တရက် ပြောလိုက်သည်။

‘ရှစ်မင်လား’

‘သူ့ခေါင်းပေါ်က သပိတ်ထဲမှာ ရတနာဝိညာဉ်အဖြစ် သန့်စင်ခံလိုက်ရတဲ့ ရှစ်မင်လေ’

‘သူနဲ့ သဘောတူညီချက်လုပ်မှာလား’

‘မဖြစ်နိုင်တာ’

တာအိုဘိုးဘေးများက တွေးကြည့်နေကြသည်။

သို့သော် သူတို့က စကားမပြောနိုင်ခင်မှာ ဟန်မူယဲ့၏အသံက ဆက်လက်ပေါ်ထွက်လာသည်။

“အဆုံးမဲ့ပင်လယ်မှာ ငါက အဆုံးမဲ့နတ်ဘုရားဘုရင်နဲ့ လွတ်မြောက်ခြင်းလမ်းစဉ်အကြောင်းကို ဆွေးနွေးခဲ့တယ်။ အဆုံးမဲ့နတ်ဘုရားဘုရင်က ငရဲကြီးဆယ့်ရှစ်ထပ်ကို တည်ဆောက်ပြီး အငြိုးအတေးတွေကို ချေဖျက်လိမ့်မယ်။ ငရဲက ဗလာဖြစ်မသွားသ၍ နတ်ဘုရားဘုရင်က ထွက်သွားမှာမဟုတ်ဘူး”

“မဟာတာအိုလမ်းစဉ်မှာ အောင်မြင်ချင်ရင် ဇွဲရှိဖို့ လိုအပ်တယ်”

ဟန်မူယဲ့၏စကားကြောင့် လောကသည် တုန်လှုပ်သွားခဲ့သည်။ တာအိုဘိုးဘေးများ၏ နတ်အာရုံများက ရူးသွပ်စွာ လှုပ်ရှားနေကြသည်။

သပိတ်ကလည်း တုန်ခါလာသည်။

“တာအိုပြိုင်ပွဲအတွင်းမှာ ခင်ဗျားက သပိတ်ကို ထိန်းချုပ်ပေးရမယ်။ တာအိုပြိုင်ပွဲအပြီးမှာ ခင်ဗျားက သပိတ်ရဲ့စွမ်းအားတွေကို အသုံးပြုပြီး တာအိုဘိုးဘေးအဆင့်ကို တက်လှမ်းနိုင်တယ်”

“တာအိုဘိုးဘေးတစ်ယောက် ဖြစ်မလာချင်ဘူးဆိုရင်လည်း ဒီသပိတ်ကို ထာဝရကံကြမ္မာဘုရားကျောင်းဆီ ပို့ပေးလိုက်မယ်”

“ထာဝရကံကြမ္မာဘုရားကျောင်းက အင်မော်တယ်ရတနာတစ်ခုကို ပိုင်ဆိုင်သွားတာကြောင့် သေချာပေါက် တိုးတက်လာလိမ့်မယ်”