အခန်း (၆၈၂)

ယခုအချိန်တွင် ထောင်ချီနေသော ချီစွမ်းအင်အလင်းများက အလင်းတန်းတစ်ခုအဖြစ် ရစ်ပတ်နေကြသည်။

ချီစွမ်းအင်က အလွန်သိပ်သည်းသောကြောင့် လူတစ်ယောက်ကို မွန်းကြပ်သွားစေနိုင်သည်။

ကျင့်ကြံဆင့်မလုံလောက်သော ဓားကျင့်ကြံသူများ၏ မျက်နှာက နီရဲသွားကြသည်။

သူတို့က ကျင့်ကြံခြင်းလောကတွင် ချီစွမ်းအင်ကြောင့် မွန်းကျပ်ပြီး သေဆုံးသွားရသော ပထမဆုံးကျင့်ကြံသူများပင် ဖြစ်လာနိုင်ကြသည်။

“ဘုန်း”

အလင်းတန်းများသည် ရတနာစံအိမ်ထဲမှ ပျံထွက်လာကြသည်။

ရတနာများတွင် အသိစိတ်ရှိကြသည်။

ထိုရတနာများသည် အနည်းဆုံး မှော်ရတနာအဆင့်တွင် ရှိနေကြသည်။

ထို့အပြင် ထိုရတနာများသည် ရတနာစံအိမ်အတွင်း၌ နှစ်ပေါင်းများစွာရှိနေခဲ့သော်လည်း အသိစိတ်ကို ထိန်းသိမ်းထားနိုင်ကြသေးသည်။

ဟန်မူယဲ့က ပျံတက်သွားပြီး အစိမ်းရောင်အင်မော်တယ်ချီကို ကြိုးတစ်ချောင်းအဖြစ် ပြောင်းလဲ၍ ရတနာများကို ရစ်ပတ်လိုက်သည်။

ဝင်္ကပါအသက်ဝင်လာသောအချိန်တွင် ဖုံးကွယ်ထားသောနယ်မြေသည် ပြန်ပေါ်လာခဲ့သည်။ မရေမတွက်နိုင်သော ဥက္ကာခဲများက ကျဆင်းလာကြသည်။ တာအိုဘိုးဘေးများကလည်း နတ်အာရုံများကို စေလွှတ်လိုက်ကြသည်။

“နတ်ဘုရားခုံရုံးရဲ့ ရတနာတိုက်ပဲ”

နှစ်ပေါင်းမရေမတွက်နိုင်အောင် အသက်ရှင်ခဲ့ကြသော တာအိုဘိုးဘေးများက ရတနာတိုက်ကို မှတ်မိလိုက်ကြသည်။

“ကောင်းကင်အံ့ဖွယ်ကမ္ဘာရဲ့ အမတ်ချုပ်ကြီးဟန်က နတ်ဘုရားခုံရုံးရဲ့ ရတနာတိုက်ကို ရှာနေတာပဲ”

ထိတ်လန့်နေသောအသံကို ဖုံးကွယ်မထားနိုင်တော့ပေ။

“တာအိုရောင်းရင်းတို့၊ ငါက တာအိုပြိုင်ပွဲနယ်မြေထဲကို တပည့်တွေပို့ဖို့ စီစဉ်ထားတယ်။ မင်းတို့က ငြင်းစရာရှိလား”

အသံတစ်သံက ပြောလိုက်သည်။

လောက၏ ထိပ်တန်းအဆင့်ရတနာများသည် နတ်ဘုရားခုံရုံး၏ ရတနာတိုက်ထဲတွင် ရှိနေကြသည်။ တာအိုဘိုးဘေးများဖြစ်နေသော သူတို့ကပင် လိုချင်တက်မက်ကြသည်။

တာအိုဘိုဘေးတစ်ယောက်က ကိုယ်တိုင်ဝင်မပါနိုင်သော်လည်း တပည့်များကို စေလွှတ်နိုင်သည်။

ထိုတပည့်များသည် တာအိုပြိုင်ပွဲအဆုံးသတ်သည်အထိ နေထိုင်ရလိမ့်မည်။ သူတို့က ရှင်သန်ခြင်းနှင့် သေဆုံးခြင်းကို ကိုယ်တိုင်ရွေးချယ်ရလိမ့်မည်။

သို့သော် သူတို့ရရှိထားသော ရတနာများကို တာအိုပြိုင်ပွဲအား စောင့်ကြည့်နေသော တာအိုဘိုးဘေးများဆီသို့ ပို့ပေးနိုင်ကြသည်။

ချက်ချင်းဆိုသလိုပင် ဒါဇင်ချီနေသောလူများက အာကာသထဲတွင် ပေါ်လာပြီး တာအိုပြိုင်ပွဲနယ်မြေအတွင်းသို့ ဝင်သွားကြသည်။

ထိုအချိန်တွင် ဟန်မူယဲ့က ထွက်ပြေးသွားသော ရတနာများကို သိမ်းယူခဲ့သည်။ ထို့နောက် သူက လက်ကို ဝှေ့ယမ်းလိုက်ပြီး ရတနာတိုက်ထဲတွင် ကျန်ရှိနေသော ရတနာများအားလုံးကို သိမ်းယူလိုက်သည်။

ထိုပစ္စည်းများထဲတွင် မှော်ရတနာများကို သွန်းလုပ်နိုင်သော ဝိညာဉ်သတ္တုများလည်း အပုံလိုက် ပါဝင်နေကြသည်။

ဝိညာဉ်လက်နက်အမျိုးမျိုးနှင့် ဓမ္မရတနာတစ်ဝက်အဆင့် လက်နက်များလည်း ရှိနေကြသည်။

ထိုအရာသည် စိတ်ကူးမယဉ်နိုင်သော ကြွယ်ဝမှုဖြစ်သည်။ ထိုပစ္စည်းတစ်ခုချင်းစီသည် ဂိုဏ်းတစ်ဂိုဏ်းကို ဝယ်ယူနိုင်သည်။

ထိုအချိန်တွင် ကျင့်ကြံသူများက အမတ်ချုပ်ကြီးဟန်၏ ရတနာများအား ဝေမျှထားသော အပြုအမူကို နားလည်သွားကြသည်။

သူက အစစ်အမှန်ကြွယ်ဝမှုကို ပိုင်ဆိုင်ထားသည်။

“ဝီ”

အာကာသထဲတွင် ချီစွမ်းအင်အလင်းတစ်ခုက ဟန်မူယဲ့ဆီသို့ ပြေးဝင်လာသည်။

ကောင်းရှောင်ရွှမ်က ဓားမြှောက်လိုက်ပြီး ချီစွမ်းအင်အလင်းကို ဖျက်ဆီးပစ်ခဲ့သည်။

အင်မော်တယ်ရင်းမြစ်ကမ္ဘာ၏ စစ်တပ်သည် ဤနေရာသို့ ရောက်လာခဲ့သည်။

သူတော်စင်တစ်ပါး၏ ဦးဆောင်မှုအောက်တွင် ကောင်းကင်အဆင့် ကျင့်ကြံသူတစ်ရာနှင့် စစ်သည်ငါးသန်းက ဝင်္ကပါဖွဲ့စည်းထားပြီး ဟန်မူယဲ့တို့ကို ဝိုင်းရံထားသည်။

အကယ်၍ သူတို့က နတ်ဘုရားခုံရုံး၏ ရတနာတိုက်အကြောင်းကို သိထားခဲ့လျှင် စစ်သည်များကို ပိုမိုစုစည်းထားလိမ့်မည်။ သူတို့က မှားယွင်းသွားခဲ့သည်။

ဟွမ်ကျစ်ဟူက ရှေ့သို့တစ်လှမ်းတိုးလိုက်ပြီး အော်ဟစ်သည်။

“ဝင်္ကပါကို ဖွဲ့စည်းလိုက်”

သူမ၏ စကားသံအဆုံးတွင် ဓားဝင်္ကပါက ချက်ချင်းပေါ်လာခဲ့သည်။

ဓားအလင်းတစ်ခု ဖြစ်တည်လာပြီး နဂါးတစ်ကောင်အဖြစ် ပြောင်းလဲသွားသည်။

ထိုအရာသည် ဓားကျင့်ကြံသူသုံးသန်း၏ ဓားဝင်္ကပါဖြစ်သည်။

ထိုအချိန်၌ ဓားအငွေ့အသက်များသည် မိုင်တစ်သောင်းပတ်ဝန်းကျင်တွင် ပြည့်နှက်သွားခဲ့သည်။

စစ်တပ်ဝင်္ကပါ၏ ချီစွမ်းအင်အလင်းသည် ဓားအလင်းကြောင့် ဖိနှိပ်ခံလိုက်ရသည်။ ဓားကျင့်ကြံသူသုံးသန်း၏ ဓားဝင်္ကပါသည် နဂါးတစ်ကောင်သဖွယ် နိုးထလာခဲ့သည်။

သူတို့၏စွမ်းအားသည် လောကကို ဖိနှိပ်နိုင်သည်။

“ဘုန်း”

နဂါးဓားအလင်းသည် ဟိန်းဟောက်လိုက်ပြီး ပြေးထွက်သွားသည်။ ထိုနဂါးဓားအလင်းသည် အဆုံးမရှိသော ဓားဆနန္ဒများကို သယ်ဆောင်ထားပြီး အင်မော်တယ်ဝိညာဉ်ကမ္ဘာ၏ စစ်တပ်ကို ဖျက်ဆီးလိုက်သည်။

သူတော်စင်အဆင့် ဖြစ်စေ ကောင်းကင်အဆင့် ဖြစ်စေ ဓားချက်အပြီးတွင် ချီစွမ်းအင်အလင်းကိုသာ ချန်ရစ်ခဲ့ရတော့သည်။

ဓားအလင်းသည် မိုင်သန်းချီအကွာအထိ ထိုးခွဲသွားသည်။ ကြယ်အစင်းသုံးဆယ်သည် ချက်ချင်းပင် နှစ်ခြမ်းကွဲသွားကြသည်။

လောကသည် တုန်ခါသွားသည်။ တာအိုပြိုင်ပွဲကို စောင့်ကြည့်နေကြသော တာအိုဘိုးဘေးများက ဖြူဖျော့သွားပြီး ချီစွမ်းအင်အလင်းများကို ထုတ်ဖော်လိုက်ရသည်။

တာအိုပြိုင်ပွဲနယ်မြေသည် ဓားအလင်း၏ လှုံ့ဆော်မှုကြောင့် ဖိနှိပ်မှုကို ချိုးဖျက်ချင်နေသည်။

ထိုအရာသည် ကောင်းကင်နှင့်မြေကြီး၏ အပြန်အလှန်ဆက်သွယ်ချက်ပင် ဖြစ်သည်။ အကယ်၍ ဖိနှိပ်မှုစွမ်းအားက ကျိုးပျက်သွားခဲ့လျှင် တာအိုဘိုးဘေးများက တန်ပြန်စွမ်းအားကို ခံစားရလိမ့်မည်။

“ရူးနေတာ၊ အဲဒီကောင်က ရူးနေတာပဲ”

မျက်နှာနီရဲနေသော တာအိုဘိုးဘေးတစ်ယောက်က ဟိန်းဟောက်လိုက်သည်။ သူက ချီစွမ်းအင်ကို အစွမ်းကုန်ထုတ်ဖော်၍ လောကကို တည်ငြိမ်သွားအောင် ကြိုးစားပေးနေသည်။

တာအိုဘိုး‌ဘေးများအားလုံးက ပြိုင်ပွဲနယ်မြေကို တည်ငြိမ်စေရန်အတွက် စွမ်းအားများကို အသုံးပြုနေကြသည်။

တာအိုနယ်မြေသည် ပျက်စီးသွားတော့မည့်အလား လှုပ်ရှားလာခဲ့သည်။

ဓားအလင်းသည် လောကကို ထိုးဖောက်သွားသည်။

ထိုဓားအလင်းကို မည်သူမှ မတားဆီးနိုင်ပေ။

ဓားကျင့်ကြံသူသုံးသန်း၏ စွမ်းအားသည် လောကကို တုန်ခါသွားစေခဲ့သည်။

အင်မော်တယ်ဝိညာဉ်ကမ္ဘာ၏ စစ်တပ်က ဓားတစ်ချက်ကြောင့် ပျက်စီးသွားခဲ့သည်။

ဟန်မူယဲ့က တည်ငြိမ်သောမျက်နှာထားဖြင့် ရတနာစံအိမ်ကို ကြည့်လိုက်သည်။ သူက ဖြည်းဖြည်းချင်းလက်မြှောက်ပြီး ဖိချသည်။

“ဝီ”

လှံရှည်တစ်လက်သည် စံအိမ်အတွင်းမှ ပြေးထွက်လာပြီး ဟန်မူယဲ့၏လက်ဝါးကို တွန်းဖယ်၍ အာကာသထဲသို့ ပျံသန်းသွားခဲ့သည်။

ထိုလှံရှည်သည် အလွန်လျင်မြန်သည်။

“ရွှပ်”

လှံရှည်က ဥက္ကာခဲတစ်ခုကို ထိုးဖောက်ပြီး မိုင်တစ်ရာအကွာတွင် ပြန်ပေါ်လာခဲ့သည်။

“ရပ်စမ်း”

လှံရှည်က ခဏတာ ရပ်တန့်သွားပြီး ဖိနှိပ်မှုကို ချက်ချင်းချိုးဖျက်လိုက်သည်။

သို့သော် ဟန်မူယဲ့က ပိုင်ဝူဟန်၏အကူအညီဖြင့် လှံရှည်၏ရှေ့သို့ ရောက်လာခဲ့သည်။

သူက လှံရှည်ကို ဖမ်းဆုပ်သည်။

“ဘန်း”

လှံရှည်က တုန်ခါသွားပြီး ထွက်ပြေးရန်ကြိုးစားသည်။

ပါ့ရှား၏စွမ်းအားကပင် ထိုလှံရှည်ကို မထိန်းချုပ်နိုင်ပေ။

“အင်မော်တယ်ရတနာ”

အာကာသထဲတွင် တည်ငြိမ်သွားသော တာအိုဘိုးဘေးများက စိတ်လှုပ်ရှားလာကြပြန်သည်။ သူတို့က အထဲသို့ ကိုယ်တိုင်ဝင်ရောက်သွားနိုင်ရန် မျှော်လင့်နေကြသည်။

“ဘုန်း”

အလင်းတန်းသုံးခုသည် ဟန်မူယဲ့ကို တိုက်ခိုက်လိုက်ကြသည်။

ဝိညာဉ်ဖွဲ့စည်းခြင်းအဆင့် ကျင့်ကြံသူသုံးယောက် ဖြစ်ကြသည်။

တာအိုပြိုင်ပွဲနယ်မြေတွင် ဝိညာဉ်ဖွဲ့စည်းခြင်းအဆင့်သည် အထွတ်အထိပ်ဖြစ်သည်။

ဟန်မူယဲ့က တောက်ပနေသောမျက်လုံးများဖြင့် လှံရှည်ကို ကိုင်ထားသည်။

တာအိုဘိုးဘေးများကပင် ရတနာ၏ဆွဲဆောင်မှုကို ခံကြရသည်။

အနာဂတ်တွင် တာအိုပြိုင်ပွဲသည် ပိုမိုအန္တရာယ်များလာလိမ့်မည်။

မရေမတွက်နိုင်သော ကျွမ်းကျင်သူများက ကောင်းကင်အံ့ဖွယ်ကမ္ဘာနှင့် အင်မော်တယ်ဝိညာဉ်ကမ္ဘာသို့ ရောက်လာကြလိမ့်မည်။

တာအိုပြိုင်ပွဲနယ်မြေသည် အမှန်တကယ်ပင် ကျွမ်းကျင်သူများ၏ စုရပ်တစ်ခု ဖြစ်လာလိမ့်မည်။

ဟန်မူယဲ့က လှံကိုင်ထားပြီး အဆုံးမဲ့ညီညွတ်ခြင်းဓားကို ဆွဲထုတ်သည်။

ဓားအလင်းသည် ချီစွမ်းအင်အလင်းသုံးခုကို ချက်ချင်းဖျက်ဆီးပစ်လိုက်သည်။

“သဏ္ဍာန်မဲ့”

ဓားရှည်သည် အစိမ်းရောင်ဝတ်စုံနှင့် ဝိညာဉ်ဖွဲ့စည်းခြင်းအဆင့် ကျင့်ကြံသူတစ်ယောက်၏ရှေ့သို့ ရောက်လာခဲ့သည်။ သူက သွေးရောင်အငွေ့အသက်များကို ထုတ်လွှတ်နေသည်။

ဓားက အလွန်လျင်မြန်သောကြောင့် ထိုကျင့်ကြံသူက မရှောင်နိုင်ခဲ့ပေ။ သူက ချီစွမ်းအင်အလင်းနှင့် ရတနာများကို အသက်သွင်းလိုက်ပြီး ခုခံရုံသာ တတ်နိုင်ခဲ့သည်။

“ရွှပ်”

ခုခံမှုများအားလုံးသည် လွယ်ကူစွာပျက်စီးသွားခဲ့သည်။

ဓားရှည်သည် ဝိညာဉ်ဖွဲ့စည်းခြင်းအဆင့် ကျင့်ကြံသူ၏ ခါးကို ခုတ်ချလိုက်ပြီး ရွှေရောင်သွေးများကို ဖြာထွက်လာစေသည်။

ဝိညာဉ်ဖွဲ့စည်းခြင်းအဆင့် ကျင့်ကြံသူ၏ မျက်နှာက ဖြူဖျော့သွားပြီး နောက်ဆုတ်သွားသည်။

ထိုဓားချက်သည် ခုခံရန်ခက်ခဲသော ဝိညာဉ်စွမ်းအားကိုလည်း သယ်ဆောင်ထားသည်။ ထိုဓားက ခန္ဓာကိုယ်ကိုသာ ထိုးခုတ်သွားသည်ဟု ထင်ရသော်လည်း ဝိညာဉ်ကိုပါ ထိခိုက်သွားစေခဲ့သည်။

သူက ချက်ချင်းထွက်မသွားလျှင် ဝိညာဉ်ပျက်စီးပြီး သေဆုံးရလိမ့်မည်။

ဓားတစ်ချက်ကြောင့် ဝိညာဉ်ဖွဲ့စည်းခြင်းအဆင့် ကျင့်ကြံသူက ဒဏ်ရာရသွားခဲ့သည်။

ထိုစွမ်းအားကို ထုတ်ဖော်ခဲ့သောလူက ကောင်းကင်အံ့ဖွယ်ကမ္ဘာ၏ အမတ်ချုပ်ကြီးဟန် ဖြစ်သည်။

သူက ဤလောကတွင် နေရာတစ်ခုကို ရသင့်သည်။

သူက အင်မော်တယ်ရတနာလှံကို ဆုပ်ကိုင်ထားသည်။ အဆုံးမဲ့ညီညွတ်ခြင်းဓားက သူ့ပတ်ဝန်းကျင်တွင် လှည့်ပတ်နေသည်။

သူ့နောက်တွင် ဓားကျင့်ကြံသူသုံးသန်းက ဝင်္ကပါကို ဖွဲ့စည်းထားသည်။

ယခုအချိန်တွင် ဟန်မူယဲ့က အင်မော်တယ်တစ်ပါးကဲ့သို့ အာကာသထဲတွင် တည်ငြိမ်စွာရပ်နေခဲ့သည်။

‘အင်မော်တယ်ဝိညာဉ်ကမ္ဘာရဲ့ သူတော်စင်တွေ ရောက်လာခဲ့ရင်ရော ဘာဖြစ်လဲ။ သူတို့က ရှုံးနိမ့်သွားရမှာပဲ’

မရေမတွက်နိုင်သော ကျင့်ကြံသူများက ဟန်မူယဲ့ကို ကြည့်လိုက်ပြီး စိတ်လှုပ်ရှားသွားကြသည်။

ကောင်းကင်အံ့ဖွယ်ကမ္ဘာ၏ အမတ်ချုပ်ကြီးဟန်သည် အလွန်အားကောင်းသောကြောင့် ငေးကြည့်နေရုံသာ တတ်နိုင်သည်။

သူက ကောင်းကင်အံ့ဖွယ်ကမ္ဘာတွင် ရှိနေသ၍ မည်သည့်အရာကိုမှ စိုးရိမ်ရန် မလိုအပ်တော့ပေ။

“အင်မော်တယ်”

အောက်တွင် လူတစ်ယောက်က တီးတိုးပြောသည်။

“အင်မော်တယ်”

လူတစ်ယောက်က အော်ဟစ်လိုက်သည်။

“အင်မော်တယ်”

မရေမတွက်နိုင်သော အသံများက ပေါင်းစပ်လာသည်။

ထိုအချိန်တွင် ကျန်ရှိနေသော ဝိညာဉ်ဖွဲ့စည်းခြင်းအဆင့် ကျင့်ကြံသူနှစ်ယောက်က ထိတ်လန့်စွာ နောက်ဆုတ်သွားကြသည်။

သူတို့က မတိုက်ခိုက်နိုင်တော့ဘဲ ရှုံးနိမ့်သွားရသည်။

သူတို့က အနိုင်မရနိုင်ပေ။ ယခုအချိန်တွင် နောက်ဆုတ်မသွားခဲ့လျှင် အသက်အန္တရာယ်နှင့် ရင်ဆိုင်ရလိမ့်မည်။

ဝိညာဉ်ဖွဲ့စည်းခြင်းအဆင့် ကျင့်ကြံသူများက ထွက်ပြေးသွားကြသည်။ ကောင်းကင်အံ့ဖွယ်ကမ္ဘာ၏ ကျင့်ကြံသူများက အရှိန်အဝါများကို အဆုံးစွန်အထိ ထုတ်ဖော်ထားကြသည်။ သူတို့၏ သွေးနှင့် ချီစွမ်းအင်များက ပေတစ်သန်းရှည်လျားသော နဂါးတစ်ကောင်အဖြစ် ပြောင်းလဲသွားပြီး ကောင်းကင်ထက်တွင် ဟိန်းဟောက်နေသည်။

ဟန်မူယဲ့က လက်မြှောက်လိုက်သောအခါတွင် အင်မော်တယ်ရတနာက နဂါးဆီသို့ ရောက်သွားသည်။

လှံရှည်က ထွက်ပြေးချင်သော်လည်း နဂါး၏ ဝါးမြိုခြင်းကို ခံလိုက်ရသည်။

သွေးနှင့် ချီစွမ်းအင်များက လှံရှည်အတွင်းသို့ တိုးဝင်သွားပြီး အသိစိတ်ကို ပယ်ဖျက်လိုက်သည်။ အင်မော်တယ်ရတနာက တိတ်ဆိတ်သွားခဲ့သည်။

နဂါးက ပျောက်ကွယ်သွားသောအခါတွင် ပေတစ်ထောင်ရှည်လျားသော လှံတစ်စင်းသည် အာကာသထဲတွင် ကျန်ရစ်ခဲ့သည်။

“အမတ်ချုပ်ကြီးဟန်က အင်မော်တယ်ရတနာကို လူတိုင်းသုံးနိုင်တဲ့ ရတနာအဖြစ် ပြောင်းလိုက်တာပဲ”

အာကာသထဲတွင် လူတစ်ယောက်က တီးတိုးပြောလိုက်သည်။

“ကောင်းကင်အံ့ဖွယ်ကမ္ဘာရဲ့ ကျင့်ကြံသူတွေမှာ လုံလောက်တဲ့ခွန်အားရှိရင် သူတို့က လှံရှည်ကိုအသုံးပြုပြီး ကျွမ်းကျင်သူတွေကို သတ်ဖြတ်နိုင်လိမ့်မယ်။ တကယ့်ကို ရဲတင်းတာပဲ”

ဟန်မူယဲ့က အလွန်ရှားပါးသော အင်မော်တယ်ရတနာကို ရှာဖွေပြီး လူတိုင်းအသုံးပြုနိုင်သော ရတနာတစ်ခုအဖြစ် ပြောင်းလဲလိုက်သည်။

ကျင့်ကြံခြင်းလောကတွင် မည်သူက ထိုသို့ ရက်ရောနိုင်မည်နည်း။

တောအုပ်ထဲတွင်ရှိသော ငှက်တစ်ရာထက် ဖမ်းမိထားသော ငှက်တစ်ကောင်က ပိုကောင်းသည်။

ကျင့်ကြံသူများအားလုံးသည် တစ်ကိုယ်ကောင်းဆန်ကြသည်။ ထိပ်တန်းအဆင့် ရတနာတစ်ပါးကို မည်သူက ဝေမျှပေးမည်နည်း။

သို့သော် ဟန်မူယဲ့က ထိုသို့ လုပ်ခဲ့သည်။

ယခုအချိန်မှစ၍ အင်မော်တယ်ရတနာဖြစ်သော လှံရှည်သည် ကောင်းကင်အံ့ဖွယ်ကမ္ဘာ၏ ရတနာတစ်ပါး ဖြစ်လာလိမ့်မည်။

ကောင်းကင်အံ့ဖွယ်ကမ္ဘာ၏ ကျင့်ကြံသူများက တောက်ပနေသောမျက်လုံးများဖြင့် ဟန်မူယဲ့ကို ကြည့်လိုက်ကြသည်။

ထိုကျွမ်းကျင်သူမျိုး၏နောက်သို့ မည်သူက မလိုက်ချင်ဘဲ နေမည်နည်း။

ကျင့်ကြံသူများက ခွန်အားကိုလည်း တောင့်တကြသည်။

ယခုအချိန်တွင် သူတို့အားလုံးကို ထိပ်ဆုံးသို့ရောက်သွားအောင် ဟန်မူယဲ့က ဦးဆောင်နိုင်လိမ့်မည်ဟု ယုံကြည်နေကြသည်။

ဟန်မူယဲ့က တည်ငြိမ်သောမျက်နှာထားဖြင့် ကောင်းကင်ကိုကြည့်သည်။