အခန်း (၇၀၃)

ဓားဘုရင်ယွမ်ထျန်းက ဓားနတ်ဘုရား၏အကြောင်းကို ပြောလိုက်သောအခါတွင် ဟန်မူယဲ့က ဆက်ပြောသည်။

“ဓားဘုရင်၊ ကောင်းကင်ရင်းမြစ်ကမ္ဘာရဲ့ ဓားနတ်ဘုရားအကြောင်းကို ဘယ်လောက်သိလဲ”

ဓားဘုရင်ယွမ်ထျန်းက ခေါင်းခါသည်။

“အဲဒီအကြီးအကဲက ဒဏ္ဍာရီတစ်ခုပဲ။ ငါက သူနဲ့တွေ့ဖို့ ကံပါမလာတာ နှမြောစရာပဲ”

“သူက ကောင်းကင်အပြင်ဘက်ကို ထွက်သွားပြီး အသက်ရှင်နေသေးလားမသိဘူး”

ဟန်မူယဲ့က သူ့ကိုကြည့်လိုက်ပြီး စကားဆက်မပြောပေ။

ရှင်းမပြနိုင်‌သောအရာများသည် ဤလောကတွင် ရှိနေကြသည်။

သူက ဓားနတ်ဘုရားသည် ဓားဘုရင်ယွမ်ထျန်းနှင့် တူနေသည်ဟု မပြောနိုင်ပေ။ ထို့အပြင် ထိုသို့ သူသိခဲ့သောအကြောင်းကိုလည်း ရှင်းမပြနိုင်ပေ။

ရှေးခေတ်အချိန်၏ မဟာပုဂ္ဂိုလ်ကြီးအချို့မှ လွဲ၍ ဓားဘုရင်ယွမ်ထျန်းနှင့် ဓားနတ်ဘုရားကို ဆက်စပ်ကြည့်ရန် မဖြစ်နိုင်ပေ။

သူက ထိုသို့ တွေးကြည့်လိုက်ပြီး ကြောင်အသွားသည်။

‘ရှေးခေတ်အင်အားစုတွေက ဓားဘုရင်ယွမ်ထျန်းကို တွေ့ပြီးသွားပြီလား’

‘သူတို့က ဓားဘုရင်ယွမ်ထျန်းကို တွေ့သွားရင် ဘယ်လိုထင်ကြမှာလဲ”

‘ဓားဘုရင်ယွမ်ထျန်းက ဓားပညာရပ်ကြောင့် ကျော်ကြားတယ်။ အင်မော်တယ်ရင်းမြစ်ကမ္ဘာမှာ ကွမ်းယွမ်ဓားဂိုဏ်းရဲ့ မဟာအကြီးအကဲတစ်ယောက် ဖြစ်လာတာနဲ့ ပတ်သတ်ပြီး တစ်ခုခု ရှိနေတာလား’

ဟန်မူယဲ့က ဓားဘုရင်ယွမ်ထျန်းကို မေးမကြည့်ခဲ့ပေ။

ကိုယ်ပိုင်အခွင့်အရေးများသည် လူတိုင်းတွင် ရှိကြသည်။ အပြင်လူများက လွယ်ကူစွာ မေးမြန်းမကြည့်သင့်ပေ။

ဟန်မူယဲ့က ထိုအကြောင်းကို စုံစမ်းနေရန် မလိုအပ်ပေ။

“မင်းက တကယ်ပဲ အဲဒီရတနာတွေကို ထုတ်ပေးမှာလား”

ဓားဘုရင်ယွမ်ထျန်းက ဟန်မူယဲ့ကို ကြည့်လိုက်သည်။

နတ်ဘုရားဧကရာဇ်၏ဓားနှင့် နတ်ဘုရားခုံရုံး၏ ရတနာတိုက် ....

ထိုရတနာမျိုးသည် ဤလောက၏ အကောင်းဆုံး အခွင့်အရေး ဖြစ်သည်။

‘ဟန်မူယဲ့က တကယ်ပဲ ထုတ်ပေးမှာလား’

“ရတနာတစ်ခုက ဘယ်လောက်ပဲ အဖိုးတန်ပါစေ ပိုင်ဆိုင်မှုတစ်ခုထက် မပိုပါဘူး”

ဟန်မူယဲ့က တည်ငြိမ်စွာပြောသည်။

သူ၏ ကျင့်ကြံဆင့်တွင် ရတနာများသာမက စိတ်အခြေအနေ၏ ကျင့်ကြံခြင်းကိုလည်း လိုအပ်သည်။

တာအိုပြိုင်ပွဲသည် သူ၏ ကျင့်ကြံခြင်းနှင့် နီးကပ်စွာ ဆက်နွယ်နေသည်။

တာအိုပြိုင်ပွဲသည် သူ၏ သေခြင်းရှင်ခြင်း ဖြစ်သည်။

တာအိုပြိုင်ပွဲနယ်မြေသည် စတေးခံလိုက်ရလျှင် ဟန်မူယဲ့က ရှင်သန်နိုင်သော်လည်း ကျင့်ကြံခြင်းတွင် ဆက်လက်တိုးတက်နိုင်တော့မည် မဟုတ်ပေ။

ဓားဘုရင်ယွမ်ထျန်းက တိတ်ဆိတ်နေသည်။

ဟန်မူယဲ့၏လုပ်ရပ်သည် မှန်ကန်သည်။

ဝမ်မော့ရှန်သည် ကောင်းကင်အံ့ဖွယ်ကမ္ဘာနှင့် ဆက်သွယ်နေသောကြောင့် ထွက်မသွားနိုင်ခဲ့ပေ။

သူက ဟန်မူယဲ့ကို ကောင်းကင်အံ့ဖွယ်ကမ္ဘာနှင့် အလွန်အကျွံမပတ်သတ်ရန် သတိပေးခဲ့ဖူးသည်။ သို့သော် ဟန်မူယဲ့က ကောင်းကင်အံ့ဖွယ်ကမ္ဘာနှင့် မပတ်သတ်ဘဲ တာအိုပြိုင်ပွဲနှင့် ပတ်သတ်သွားသည်။

လောက၏ကိစ္စရပ်များကို မခန့်မှန်းနိုင်ပေ။

“မင်းက အဲဒီရတနာတွေကို ထုတ်သုံးမယ်ဆိုမှတော့ အစွမ်းကုန်သုံးကြတာပေါ့”

ဓားဘုရင်ယွမ်ထျန်းက ဟန်မူယဲ့ကို ကြည့်သည်။

“မင်းက အချိန်နဲ့တည်နေရာစွမ်းအားကိုလည်း နားလည်ထားတယ်”

ဟန်မူယဲ့က သူ့ကို ကြည့်လိုက်ပြီး ညင်သာစွာခေါင်းညိတ်သည်။

....

ဆယ်ရက်အကြာတွင် ရှားပါးသော ဝိညာဉ်သတ္တုရိုင်းအချို့ကို အင်မော်တယ်ရင်းမြစ်ကမ္ဘာ၏ အပြင်ဘက်တွင်ရှိသော ဥက္ကာခဲနယ်မြေအတွင်း၌ ရှာတွေ့ခဲ့သည်။

အောက်ဘုံသုံးပါး၏ ကျင့်ကြံသူများသည် ထိုသတ္တုရိုင်းများကို သာမန်ဟုသာ ထင်ခဲ့ကြသည်။ သို့သော် ဈေးကွက်ထဲသို့ ပို့လိုက်သောအခါတွင် အလယ်ဘုံသုံးပါးနှင့် အထက်ဘုံသုံးပါး၏ အင်အားစုများကိုပါ လှုပ်ရှားသွားစေခဲ့သည်။

နတ်ဘုရားခုံရုံး၏ ရတနာတိုက် ....

ထိုဝိညာဉ်သတ္တုများသည် ဝိညာဉ်ကျောက်တုံး သန်းချီတန်သော ရှေးခေတ်ရတနာများ ဖြစ်နေလိမ့်မည်ဟု သူတို့က ထင်မထားခဲ့ကြပေ။

အဆုံးတွင် ထိုရတနာများကို အထက်ဘုံသုံးပါး၏ ဂိုဏ်းကြီးတစ်ခုက ဝယ်ယူသွားခဲ့သည်။

ထိုဂိုဏ်းသည် ရတနာတစ်ခုစီကို ဝိညာဉ်ကျောက်တုံး သန်းသုံးဆယ်ပေးပြီး ရတနာရှာတွေ့ခဲ့သော အောက်ဘုံသုံးပါး၏ ကျင့်ကြံသူများကိုလည်း ဂိုဏ်းတပည့်အဖြစ် သတ်မှတ်ခဲ့သည်။ သူတို့က အထက်ဘုံသုံးပါးသို့ တိုက်ရိုက်ရောက်သွားကြသည်။

ထိုကျင့်ကြံသူများကို ကာကွယ်ပေးရန်အတွက် ဖြစ်သည်။

ထိုအချိန်တွင် နတ်ဘုရားခုံရုံးရတနာတိုက်၏ သတင်းသည် တောမီးသဖွယ် ပျံ့နှံ့သွားခဲ့သည်။

အင်မော်တယ်ရင်းမြစ်ကမ္ဘာ၏ ဘုံကိုးပါးလုံးသည် ရတနာတိုက်၏သတင်းကို ကြားလိုက်ရသည်။

တစ်လအကြာတွင် အနက်ရောင်ဝတ်စုံနှင့် တာအိုတန်ခိုးရှင်များသည် ရတနာများကို ရှာတွေ့ခဲ့သော ဥက္ကာခဲများကြားတွင် ပေါ်လာကြသည်။

“ဂိုဏ်းတူအစ်ကိုကျူး၊ ကျွန်တော်တို့က ရတနာတစ်ခုကို ဒီနေရာမှာ တွေ့ခဲ့ပါတယ်”

ပိန်ပါးသော သက်လတ်ပိုင်းအရွယ်လူတစ်ယောက်က ညွှန်ပြသည်။

သူ့ဘေးတွင် အငွေ့အသက်များကို သိမ်းဆည်းထားသော တောက်ပနေသည့်မျက်လုံးများနှင့် တာအိုတန်ခိုးရှင်တစ်ယောက်က ခေါင်းညိတ်ပြသည်။

ထိုတန်ခိုးရှင်က ရှေ့တစ်လှမ်းတိုးလိုက်ပြီး ဝင်္ကပါပြားတစ်ခုကို ထုတ်ယူသည်။

ချီစွမ်းအင်အလင်းများသည် ဝင်္ကပါပြားပေါ်တွင် ပေါ်လာကြသည်။ အစိမ်းရောင်အလင်းသည် ချည်မျှင်များအဖြစ် ပြောင်းလဲသွားခဲ့သည်။

“သွားကြစို့”

တာအိုတန်ခိုးရှင်က တီးတိုးပြောသည်။ အားလုံးက သူ့နောက်သို့လိုက်ပြီး ဥက္ကာခဲများကြားတွင် ပြေးလွှားလိုက်ကြသည်။

ဥက္ကာခဲများကို ကျော်ဖြတ်လာသောအခါတွင် အစိမ်းရောင်ချည်မျှင်များက ပိုမိုရှင်းလင်းလာသည်။

တာအိုတန်ခိုးရှင်၏နောက်တွင် ရှိနေသော ကျင့်ကြံသူများက အသက်ရှူအောင့်ထားကြသည်။

“ဝီ”

ဝင်္ကပါပြားက အသံပေးလိုက်ပြီး အစိမ်းရောင်ချည်မျှင်များအားလုံးသည် ပေတစ်ထောင်ကျယ်ဝန်းသော ဥက္ကာခဲကို ဝင်တိုက်လိုက်ကြသည်။

“ဘုန်း”

ဥက္ကာခဲသည် ပေါက်ကွဲသွားပြီး တောက်ပသော ချီစွမ်းအင်အလင်းသည် နေရာအနှံ့သို့ ဖြာထွက်သွားခဲ့သည်။

အစိမ်းရောင်ဝတ်စုံနှင့် တာအိုတန်ခိုးရှင်သည် ရှေ့သို့ ပျံတက်သွားပြီး ရွှေရောင်ဝိညာဉ်သတ္တုတစ်ခုကို ဖမ်းယူသည်။

“ဖီးနစ်ဝိညာဉ်ကျောက်စိမ်း၊ ဖီးနစ်ဝိညာဉ်ကျောက်စိမ်းပဲ”

တာအိုတန်ခိုးရှင်၏ အငွေ့အသက်က မတည်မငြိမ်ဖြစ်လာသည်။

ဖီးနစ်ဝိညာဉ်ကျောက်စိမ်းဖြင့် ပြန်လည်မွေးဖွားခြင်းအဆင့် ကျင့်ကြံသူတစ်ယောက်၏ ကိုယ်ပွားကို တည်ဆောက်နိုင်သည်။

ထိုရတနာမျိုးကို တွေ့ရလျှင် ကျွမ်းကျင်သူများကပင် စိတ်တည်ငြိမ်စွာ နေနိုင်ရန် ခက်ခဲလိမ့်မည်။

သူ့နောက်တွင် တခြားလူများကလည်း ပျံတက်သွားပြီး ရတနာများကို ဖမ်းယူလိုက်ကြသည်။

လမ်းပြပေးသော ပိန်ပါးသည့်ကျင့်ကြံသူက ဝန်ထုပ်ဝန်ပိုးတစ်ခု လျော့ပါးသွားသည့်အလား ပြုံးလိုက်သည်။

သူက ရတနာများကို ရှာပေးနိုင်ခဲ့သည်။ ဂိုဏ်းအတွင်း၌ရှိသော သူ၏ အဆင့်အတန်းသည် တည်ငြိမ်သွားလိမ့်မည်။

“ဝိညာဉ်ကိုးပါးကျောက်စိမ်း”

“ကောင်းကင်သန့်စင်ကျောက်စိမ်းသံမဏိ”

ထိုအချိန်၌ မိုင်တစ်သန်းအကွာတွင်ရှိသော ကြယ်ပေါ်တွင် ဟန်မူယဲ့နှင့်အတူ ရှိနေသော ဓားဘုရင်ယွမ်ထျန်းက အလင်းလွှာပေါ်တွင်ရှိသော ပုံရိပ်များကို ကြည့်လိုက်ပြီး နှုတ်ခမ်းတွန့်သွားသည်။

“ကောင်လေး၊ မင်းက ရတနာတွေကို တကယ်ထုတ်ပေးလိုက်တာပဲ”

သူ့မျက်နှာထားက နာကျင်နေပုံပေါ်သည်။

“မင်းမှာ အဲဒီရတနာတွေ ရှိနေတာကို သိခဲ့ရင် ငါက တစ်ခုခုနဲ့ လဲလိုက်ပါတယ် ....”

သူ့စကားကို ကြားလိုက်ရသောအခါတွင် ဟန်မူယဲ့က အလင်းလွှာပေါ်တွင်ရှိသော ပုံရိပ်များကို ကြည့်လိုက်ပြီး ခပ်ဟဟရယ်သည်။

“လူတိုင်းကို လှုပ်ရှားစေဖို့အတွက် လုံလောက်တဲ့ရတနာတွေကို ထုတ်သုံးရမယ်လို့ ဓားဘုရင်ပဲ ပြောခဲ့တာလေ”

“ဓားဘုရင်က တစ်ခုခုလိုနေရင် ကျွန်တော့်ကို ပြောနိုင်ပါတယ်”

သူ့စကားကြောင့် ဓားဘုရင်ယွမ်ထျန်းက အသက်ရှူနှုန်းမြန်သွားသည်။

သူက စဉ်းစားကြည့်လိုက်ပြီး ခေါင်းခါသည်။

“ငါက ဘာမှမလိုပါဘူး ....”

ဟန်မူယဲ့က ရယ်ချင်နေသော်လည်း ထုတ်မပြောခဲ့ပေ။

ဓားဘုရင်ယွမ်ထျန်းက သူ့ဆီမှ ရတနာများကို တောင်းဆိုရန်အတွက် ရှက်ရွံ့နေသည်။

အဆုံးတွင် သူက အကြီးအကဲတစ်ယောက် ဖြစ်သည်။

“ရောက်လာကြပြီ”

ဓားဘုရင်ယွမ်ထျန်းက ပြောသည်။

အလင်းလွှာပေါ်တွင် ကျင့်ကြံသူများက ပြန့်ကျဲသွားသော ရတနာများကို ဖမ်းယူနေကြသည်။

“ချီမင်တာအိုနန်းတော်က ရတနာရှာဖို့အတွက် ရောက်လာခဲ့တယ်။ ဘယ်တာအိုရောင်းရင်းက ဒီကို ရောက်လာတာလဲ”

ဝင်္ကပါပြားကို ကိုင်ဆောင်ထားသော တာအိုတန်ခိုးရှင်က အော်ဟစ်လိုက်သည်။ သူက အဆုံးမရှိသော ချီစွမ်းအင်အလင်းများကို ထုတ်ဖော်၍ ပတ်ဝန်းကျင်တစ်ခုလုံးကို လွှမ်းခြုံလိုက်သည်။

ဝိညာဉ်ဖွဲ့စည်းခြင်းအဆင့် ကျင့်ကြံသူများ ....

ဝိညာဉ်ဖွဲ့စည်းခြင်း အထွတ်အထိပ်အဆင့် ကျွမ်းကျင်သူများ ....

သူတော်စင်တစ်ဝက်အဆင့်နှင့် သူတော်စင်အဆင့်များ၏ လှုပ်ရှားမှုသည် တခြားအင်အားစုများ၏ အာရုံစိုက်မှုကို ဆွဲဆောင်နိုင်လိမ့်မည်။ ဝိညာဉ်ဖွဲ့စည်းခြင်းအဆင့် ကျင့်ကြံသူများ၏ လှုပ်ရှားမှုသည် မသိသာပေ။

ချီစွမ်းအင်အလင်းများသည် ပတ်ဝန်းကျင်တွင် ပေါ်ထွက်လာကြသည်။ သူတို့က ရတနာများကို တစ်ခုပြီးတစ်ခု သိမ်းယူလိုက်ကြသည်။

ချက်ချင်းဆိုသလိုပင် ရတနာများအားလုံးက သိမ်းဆည်းခံလိုက်ရသည်။

အစိမ်းရောင်ဝတ်စုံနှင့် တာအိုတန်ခိုးရှင်က ပတ်ဝန်းကျင်ကို ကြည့်သည်။ သူက တိုက်ခိုက်လိုစိတ်များကို ထုတ်ဖော်နေသော်လည်း အဆုံးတွင် ဖိနှိပ်လိုက်သည်။

ထွက်ပေါ်လာသော လူများသည် ဝိညာဉ်ဖွဲ့စည်းခြင်းအဆင့်တွင် ရှိနေကြသည်။

ထိုလူများသည် စိမ်းသက်နေပုံပေါ်သော်လည်း အမျိုးမျိုးသော အင်အားစုများမှ မဖြစ်နိုင်ပေ။ ထိုသို့မဟုတ်လျှင် သူတို့က ချီမင်တာအိုဂိုဏ်း၏ လှုပ်ရှားမှုကို စုံစမ်းနိုင်မည်မဟုတ်ပေ။

တာအိုတန်ခိုးရှင်က အသက်ပြင်းပြင်းရှူသွင်းလိုက်ပြီး ပတ်ဝန်းကျင်ကို ကြည့်သည်။

“အားလုံးပဲ၊ ရတနာတွေကို ကံပါတဲ့လူက ရနိုင်တာပဲ။ မင်းတို့က ရတနာတွေကို ယူပြီးပြီဆိုတော့ ထွက်သွားလို့ရပြီ”

သူ့စကားကို ကြားလိုက်ရသောအခါတွင် အနက်ရောင်ဝတ်စုံနှင့် တာအိုတန်ခိုးရှင်တစ်ယောက်က ခေါင်းခါလိုက်ပြီး ဂရုမစိုက်စွာ ပြောသည်။

“ကျူးယုံမင်၊ ချီမင်တာအိုဂိုဏ်းက အများကြီးရပြီးပြီပဲ။ အခု နတ်ဘုရားခုံရုံးရတနာတိုက်ကို ဖွင့်ရမယ့်အချိန်ပဲ”

နတ်ဘုရားခုံရုံး၏ ရတနာတိုက် ....

ထိုလူက ရတနာတိုက်အပြင် သူ့နာမည်ကိုလည်း သိနေသည်။

ကျူးယုံမင်က မျက်လုံးများကို မှေးကျဉ်းလိုက်ပြီး ပတ်ဝန်းကျင်ကို ကြည့်သည်။

ထိုလူများသည် နားလည်မှုယူထားကြသည်။

သူက လက်ထဲတွင်ရှိသော ကျောက်စိမ်းပြားကို တင်းကျပ်စွာဆုပ်ကိုင်လိုက်သည်။

“ညီအစ်ကိုကျူး၊ မင်းရထားတဲ့ပစ္စည်းတွေက ဘဝတစ်လျှောက်လုံးသုံးဖို့ လုံလောက်ပါတယ်”

ပုံရိပ်ယောင်အငွေ့အသက်များနှင့် လွှမ်းခြုံထားသော ကျင့်ကြံသူတစ်ယောက်က ရှေ့သို့ တစ်လှမ်းတိုးသည်။ သူ့ခန္ဓာကိုယ်က ဓားအလင်းများဖြင့် တောက်ပနေသည်။

“မင်းက ကျန်တဲ့ရတနာတွေကို ရချင်ရင် ငါတို့နဲ့ ပူးပေါင်းမှဖြစ်မယ်”

“မင်းက အချိန်ဆွဲနေရင် တခြားလူတွေ ထပ်ရောက်လာလိမ့်မယ်။ ငါတို့က ဝေစုခွဲဖို့ လွယ်တော့မှာမဟုတ်ဘူး”

ရတနာများသည် လူတစ်ယောက်၏ နှလုံးသားကို လှုပ်ရှားစေနိုင်သည်။

ထိုလူသည် ကျူးယုံမင်၏ စိုးရိမ်မှုကို ထောက်ပြခဲ့သည်။

သူက အချိန်ဆွဲနေလျှင် ရတနာများကို မရနိုင်သည့်အပြင် ရရှိထားသော ရတနာများကိုလည်း လက်လွှတ်ရလိမ့်မည်။

သူက အံတင်းတင်းကြိတ်ထားပြီး အော်ပြောသည်။

“အဲဒါဆိုရင်လည်း ငါတို့ရဲ့ကံကို အားကိုးကြတာပေါ့”

သူက စကားအဆုံးတွင် ကျောက်စိမ်းပြားကို တစ်ပိုင်းပြတ်နေသော ကျောက်နံရံပေါ်သို့ ပစ်ပေါက်လိုက်သည်။

“ဘုန်း”

ကျောက်နံရံသည် ပေါက်ကွဲသွားပြီး ဒါဇင်ချီနေသော ရတနာများက ပျံထွက်လာကြသည်။

ချီစွမ်းအင်သည် ကောင်းကင်ကို အလင်းပေးလိုက်သည်။

နတ်ဘုရားခုံရုံး၏ ရတနာတိုက်ကသာ ထိုရတနာမျိုးကို ထုတ်ပေးနိုင်သည်။

လူတိုင်းက ပြေးဝင်သွားပြီး ရတနာများကိုလုယူ၍ ထွက်သွားကြသည်။

သတ်ဖြတ်လိုစိတ်နှင့် ပြည့်နေသော ပုံရိပ်များသည် ထပ်မံပြေးဝင်လာကြသည်။

ပေါက်ကွဲသံ၊ အော်ဟစ်သံနှင့် အကူအညီတောင်းသံသည် မိုင်တစ်ရာပတ်ဝန်းကျင်တွင် ပဲ့တင်ထပ်သွားသည်။

အလင်းလွှာပေါ်တွင် ရှုပ်ထွေးနေသောပုံရိပ်များကို မြင်နိုင်သည်။

တိုက်ပွဲသည် ဆယ်ရက်ကြာခဲ့သည်။ ဝိညာဉ်ဖွဲ့စည်းခြင်းအဆင့် ကျင့်ကြံသူကိုးယောက် သေဆုံးသွားခဲ့သည်။ ကောင်းကင်အဆင့် ကျင့်ကြံသူများ၏ သေဆုံးမှုသည် အယောက်တစ်ရာခန့် ရှိသည်။ ကောင်းကင်အဆင့်အောက်တွင် မရေမတွက်နိုင်သော ကျဆုံးမှုများ ဖြစ်ပေါ်ခဲ့သည်။

အင်မော်တယ်ရင်းမြစ်ကမ္ဘာ၏ အင်အားစုများသည် အဖိုးတန်ရတနာ အခုတစ်ရာကျော်ကို သိမ်းယူသွားခဲ့သည်။

ထိုရတနာများသည် အင်အားစုကြီးတစ်ခုကို တိုးတက်လာစေနိုင်သည်။

သို့သော် သတင်းတစ်ခုသည် ထိုတိုက်ပွဲအပြီးတွင် ပေါ်ထွက်လာခဲ့သည်။

ထိုရတနာများသည် အပေါ်ယံသာဖြစ်သည်။

နတ်ဘုရားခုံရုံး၏ အစစ်အမှန်ရတနာတိုက်သည် ထိုရတနာများထက် အဆတစ်ရာခန့် ပိုမိုအဖိုးတန်သည်။

တိုက်ပွဲတွင် စုတ်ဖြဲခံလိုက်ရသော ပိတ်စပေါ်တွင် ရတနာတိုက်၏မြေပုံကို ရေးဆွဲထားသည်။

ထို့အပြင် ရတနာတိုက်တွင် ပါဝင်သော ပစ္စည်းများကိုလည်း မှတ်သားထားသည်။

“အထက်ဘုံသုံးပါးမှာ လက်ရွေးစင်စာရင်းရှိတယ်။ ဂိုဏ်းတွေက ကိုယ်ပိုင်အဆင့်သတ်မှတ်ချက်ကို ပြုလုပ်ထားကြတယ်”

ဓားဘုရင်ယွမ်ထျန်းက အပြုံးတစ်ခုနှင့်အတူ မှတ်တမ်းကိုဖွင့်လိုက်ပြီး ပြောသည်။

“ကြည့်လိုက်။ ဓားစံအိမ်ရဲ့ တိုက်ရိုက်တပည့် ပိုင်ယွီမင်က ယန်ဓာတ်ဓားကို သန့်စင်နိုင်မယ့် ရတနာတစ်ခု လိုအပ်နေတယ်”

“သူက မင်းရဲ့ ယန်နဂါးသလင်းကျောက်အတွက် မတိုက်ခိုက်ဘူးဆိုရင် ဓားကျင့်ကြံသူတစ်ယောက် မဟုတ်တော့ဘူး”

“ယွီလင်တာအိုနန်းတော်ရဲ့ နံပတ်တစ်တိုက်ရိုက်တပည့် စွန်းကျိုးရှန့်က မဟာကျင့်ကြံသူကြီးတစ်ယောက်ရဲ့ ကိုယ်ပွားအတွက် ဝိညာဉ်ကို တည်ငြိမ်စေမယ့် ရတနာတစ်ခု လိုအပ်နေတယ်။ မင်းရဲ့ ကောင်းကင်ဝိညာဉ် အဆီအနှစ်အရည်က တကယ့်ကို လက်ဆောင်ကောင်းတစ်ခုပဲ”

“ပြီးတော့ ကောင်းကင်တာအို ရွှေအင်းကွက်ကျောက်တုံးကို အထက်ဘုံသုံးပါးမှာရှိတဲ့ တိမ်တိုက်ဖြူတာအိုဘုရားကျောင်းရဲ့ ‌ခေါင်းဆောင်က လိုအပ်နေတယ်”

“ရွှမ်လင်တာအိုဂိုဏ်းက လိုက်ရှာနေတဲ့ ရွှမ်မင်အင်မော်တယ်ဝါးပင်လည်း ရှိသေးတယ် ....”

ဟန်မူယဲ့က ဓားဘုရင်ယွမ်ထျန်းကို လှည့်ကြည့်သည်။

အင်မော်တယ်ရင်းမြစ်ကမ္ဘာတွင် လှည့်ပတ်သွားလာနေသော ဓားတာအို၏ မဟာကျင့်ကြံသူကြီးသည် အင်မော်တယ်ရင်းမြစ်ကမ္ဘာကို သေချာနားလည်ထားသည်။

“အဟွတ်၊ အဟွတ်။ ကွမ်းယွမ်ဓားဂိုဏ်းက ပုန်ကန်ချင်တဲ့လူတွေကို ဆွဲဆောင်ဖို့လေ။ ငါတို့က တခြားလူတွေလိုအပ်တာကို သိဖို့လိုတယ် ....”

ဓားဘုရင်ယွမ်ထျန်းက ပြုံးသည်။

ဟန်မူယဲ့က ခေါင်းညိတ်လိုက်ပြီး ရှေ့တွင်ရှိနေသော အလင်းလွှာကို ကြည့်သည်။

“ဓားဘုရင်၊ အစီအစဉ်ကိုတော့ လုပ်ပြီးသွားပြီ။ ငါးစာလာဟပ်တာကို စောင့်နေဖို့ပဲ လိုတော့တယ်”