အခန်း (၇၁၀)

ဟွမ်ကျစ်ဟူက မည်သူ့ကို စွမ်းအားပြချင်သနည်း။ ချိပ်တံဆိပ်ကိုင်ထားသော ဝိညာဉ်ဖွဲ့စည်းခြင်းအဆင့် ကျင့်ကြံသူက မသိချင်ပေ။

သူ တုယွီမင်သည် နာမည်ကြီးလာရန်အတွက် ဤနေရာသို့ လာခဲ့သည်။ သူက ဓားကျင့်ကြံသူများအား ဦးဆောင်မထားသော ဟွမ်ကျစ်ဟူကို အနိုင်ယူချင်သည်။

ကောင်းကင်စာရင်းတွင် ပါဝင်နေသော ကျွမ်းကျင်သူတစ်ယောက်ကို အနိုင်ယူပြီး ကိုယ်ပိုင်စွမ်းရည်ကို ပြသချင်သည်။

ထိုအခွင့်အရေးကို ဆုပ်ကိုင်ထားပြီး အင်မော်တယ်ဝိညာဉ်ကမ္ဘာတွင် ခိုလှုံလိုက်လျှင် သူက အကျိုးအမြတ်များကို ရနိုင်လိမ့်မည်။

သို့သော် ဟွမ်ကျစ်ဟူ၏ ဓားကျင့်ကြံခြင်းက အလွန်နက်နဲနေသည်။

ထို့အပြင် သူက ဟွမ်ကျစ်ဟူကို မသတ်ရဲပေ။

ဟွမ်ကျစ်ဟူသည် ကောင်းကင်အံ့ဖွယ်ကမ္ဘာမှ အမတ်ချုပ်ကြီးဟန်၏ မွေးစားသမီး ဖြစ်သည်။

တုယွီမင်က တာအိုပြိုင်ပွဲနယ်မြေသို့ နောက်ကျမှ ရောက်လာ‌သော်လည်း ရန်မစသင့်သော လူများကို သိထားသည်။

ကောင်းကင်စာရင်းတွင် အဆင့်ကိုး ရထားသော ဟန်မူယဲ့သည် တိုက်ခိုက်နိုင်စွမ်းချင်း ယှဉ်ပြိုင်လျှင် အဆင့်တစ်ရာထဲတွင် ရှိမည်မဟုတ်ပေ။

သို့သော် ကောင်းကင်စာရင်းတွင် ရှိနေသော လူအများစုက ကောင်းကင်အံ့ဖွယ်ကမ္ဘာ၏ အမတ်ချုပ်ကြီးဟန်ကို သေချာပေါက် အနိုင်ရလိမ့်မည်ဟု မပြောရဲကြပေ။

တာအိုပြိုင်ပွဲတွင် ဟန်မူယဲ့သည် အင်မော်တယ်ဝိညာဉ်ကမ္ဘာကို သုံးကြိမ်တိုက်ခိုက်ပြီး အင်မော်တယ်ရတနာသုံးခုကို ယူဆောင်ခဲ့သည်။ သူက နတ်ဘုရားဘုရင်တစ်ပါးကိုပင် နောက်ဆုတ်သွားစေခဲ့သည်။

သူ၏ ပုံစံအရ မွေးစားသမီးဖြစ်သူကို ထိခိုက်အောင်လုပ်ရဲလျှင် အသေသတ်ခံရလိမ့်မည်။

ဟွမ်ကျစ်ဟူက လက်ထဲတွင်ရှိသောဓားကို လှုပ်ရှားသည်။ ဓားဆန္ဒနှင့် ဓားချီများအားလုံးသည် ပျောက်ကွယ်သွားကြသည်။

“ဒီဓားနည်းစနစ်ကို ငါ့ရဲ့မွေးစားအဖေက သင်ပေးလိုက်တယ်။ လူတစ်ယောက်ရဲ့ဝိညာဉ်ကို ထိခိုက်စေနိုင်တယ်”

ဟွမ်ကျစ်ဟူက တည်ငြိမ်သောမျက်နှာထားဖြင့် တုယွီမင်ကို ကြည့်လိုက်ပြီး သတိပေးသည်။

“သတိထားပါ”

သတိထားရမည်။

ဝိညာဉ်ကိုယ်ခွဲ အဌမအဆင့်တွင်ရှိသော လူငယ်တစ်ယောက်က ဓားတစ်လက်ကိုင်ထားပြီး ဝိညာဉ်ဖွဲ့စည်းခြင်း ဆဌမအဆင့်တွင်ရှိသော ကျင့်ကြံသူတစ်ဦးကို သတိထားခိုင်းနေသည်။

တုယွီမင်အပါအဝင် ဝိညာဉ်ဖွဲ့စည်းခြင်းအဆင့် ကျင့်ကြံသူများ၏ မျက်နှာထားက လေးနက်နေကြသည်။

အဘယ်ကြောင့်ဆိုသော် ကောင်းကင်အံ့ဖွယ်ကမ္ဘာမှ အမတ်ချုပ်ကြီးဟန်ကိုယ်တိုင် သင်ကြားပေးလိုက်သော ဓားနည်းစနစ် ဖြစ်သည်။

အကြိမ်ရေအနည်းငယ်သာ လှုပ်ရှားခဲ့ပြီး တာအိုပြိုင်ပွဲနယ်မြေတစ်ခုလုံးကို လှုပ်ခါသွားစေသော ဒဏ္ဍာရီလာပုဂ္ဂိုလ်သည် ဓားအင်မော်တယ်အဖြစ် လူသိများသည်။

“ကျွန်မက ဒီကောင်မလေးကို သိပ်သင်မပေးခဲ့ရဘူး။ အစ်ကိုဟန်က သင်ပေးခဲ့တာ”

အာကာသထဲတွင် လူတစ်ယောက်က အလင်းလွှာကို ကြည့်နေပြီး ညင်သာစွာ သက်ပြင်းချလိုက်သည်။

သူမက အလင်းလွှာမှတစ်ဆင့် ဟွမ်ကျစ်ဟူ၏ပုံရိပ်ကို ကြည့်နေပြီး အနည်းငယ်စိုးရိမ်နေသည်။

“အစ်ကိုလောင်လျှို၊ ကျစ်ဟူက အဆင်ပြေပါ့မလား”

“အဲဒါက ဝိညာဉ်ဖွဲ့စည်းခြင်းအဆင့် ကျင့်ကြံသူတစ်ယောက် မဟုတ်လား”

အစ်ကိုလောင်လျှို ....

ဟွမ်လောင်လျှို၊ ဟွမ်ခြောက် ....

သူက ဆည်ပြင်ပတွင်ရှိနေသော ဘိုးဘေးမိစ္ဆာကြယ်မှ နတ်ဘုရားဘုရင်တစ်ပါး၏ လက်အောက်ခံ ကောင်းကင်နင်းခြေ မိစ္ဆာဘုရင် ဖြစ်သည်။

ယခုအချိန်တွင် ဟွမ်ခြောက်က အနက်ရောင်ချပ်ဝတ်ကို ဝတ်ဆင်ထားသည်။ သူ၏မျက်နှာထားက အေးစက်ပြီး တည်ငြိမ်နေသည်။ သူက လှံတစ်စင်းကဲ့သို့ ဖြောင့်မတ်စွာရပ်နေသည်။

လုချန်းဖျင်၏စကားကို ကြားလိုက်ရသောအခါတွင် ဟွမ်ခြောက်က တည်ငြိမ်စွာပြောသည်။

“ညီမဖျင်၊ စိတ်မပူပါနဲ့။ သူက ဝိညာဉ်ဖွဲ့စည်းခြင်းအဆင့် ကျင့်ကြံသူလေးတစ်ယောက်ပါပဲ”

သူ့နောက်တွင်ရှိနေသော အနက်ရောင်ချပ်ဝတ်နှင့် မိစ္ဆာကျင့်ကြံသူများ၏ကြားတွင် အားအနည်းဆုံးလူသည် ဝိညာဉ်ဖွဲ့စည်းခြင်းအဆင့်တွင် ရှိနေသည်။

ဘိုးဘေးမိစ္ဆာကြယ်၏ မဟာသူတော်စင်သည် နတ်ဘုရားဘုရင်၏ ထောက်ပံ့မှုကို ရရှိထားသည်။ သူက အမိန့်ပေးနိုင်သော မရေမတွက်နိုင်သည့် မိစ္ဆာဂိုဏ်းများကို ပိုင်ဆိုင်ထားသည်။

ဟွမ်ခြောက်က လုံလောက်သောအင်အားစုကို ခေါ်ဆောင်၍ တာအိုပြိုင်ပွဲနယ်မြေသို့ ရောက်လာခဲ့သည်။

အလင်းလွှာပေါ်တွင် လှုပ်ရှားလိုက်သော ဟွမ်ကျစ်ဟူ၏ပုံရိပ်ကို မြင်နိုင်သည်။ သူမ၏ အဝါရောင်ဝတ်စုံသည် လိပ်ပြာတစ်ကောင်သဖွယ် လှုပ်ရှားသွားသည်။ ဓားအလင်းသည် မျက်စိကျိန်းအောင် တောက်ပမနေသော်လည်း အစိမ်းရောင်အလင်းကို ထုတ်လွှတ်ပေးနေသည်။

ဓားသည် အမှတ်အသားတစ်ခု ချန်ရစ်၍ လေဟာနယ်ကို ထိုးခွဲသွားသည်။

ဓားသည် နေရာမှာပင် ရှိနေသည်။ ဓားအရိပ်နှင့် ဓားကွက်သည်လည်း နေရာမှာပင် ရှိနေကြသည်။

ချက်ချင်းဆိုသလိုပင် ပေတစ်ထောင်ပတ်ဝန်းကျင်သည် ဓားအရိပ်များဖြင့် ပြည့်နှက်သွားကြသည်။

ထိုဓားကွက်၏ ဦးတည်ချက်ကို ရှင်းလင်းစွာမြင်နိုင်သည်။

သို့သော် တားဆီးပြီး ချိုးဖျက်ရန်အတွက် မလွယ်ကူပေ။

အပြင်လူများက ထိုဓားချက်ကို ရှင်းလင်းစွာမြင်ရပြီး လက်မြှောက်၍ တားဆီးလိုက်ရုံသာဟု ထင်ကြသည်။

အမှန်တကယ် ရင်ဆိုင်နေရသော တုယွီမင်၏ မျက်နှာထားက လေးနက်နေသည်။ သူက နောက်မဆုတ်ပေ။ သူ့လက်ထဲတွင်ရှိသော ချိပ်တံဆိပ်က ချီစွမ်းအင်ကို ဆက်တိုက်ထုတ်ပေးနေသော်လည်း သိပ်သည်းမသွားခဲ့ပေ။

သူက ခုခံရန် မလုပ်နိုင်ပေ။

သူ့အမြင်တွင် ရပ်တန့်နေသော ဓားအရိပ်များအားလုံးသည် အစစ်အမှန် ဖြစ်သည်။

ထိုဓားအရိပ်များသည် မရေမတွက်နိုင်သော ဖြစ်နိုင်ချေများကို သယ်ဆောင်ထားသည်။

ထိုဓားချက်ကို တားဆီးရန်အတွက် မရေမတွက်နိုင်သော ဖြစ်နိုင်ချေများကို တားဆီးရမည်။

ထိုအရာသည် ကံကြမ္မာ ဖြစ်သည်။ သူတော်စင်တစ်ဝက်အဆင့်ကသာ ကံကြမ္မာစွမ်းအားကို နားလည်နိုင်သည်။

မရေမတွက်နိုင်သော ကံကြမ္မာလှုပ်ရှားမှုများသည် ဓားတစ်လက်၏အောက်တွင် ရှိနေကြသည်။

ထိုဓားချက်ကို မည်သို့ ခုခံနိုင်မည်နည်း။

“တုယွီမင်က ဘာဖြစ်လို့ မတိုက်ခိုက်တာလဲ”

သိပ်မဝေးသောနေရာတွင် အစိမ်းပုပ်ရောင်ဝတ်စုံနှင့် တာအိုတန်ခိုးရှင်တစ်ယောက်က မျက်မှောင်ကြုတ်လျက် မေးသည်။ သူ့ခါးတွင် ရွှေရောင်တံဆိပ်ပြားတစ်ခုကို ချိတ်ဆွဲထားသည်။

သူက အသက်ငါးဆယ်အရွယ်ဟု ထင်ရသည်။ သူ့တစ်ကိုယ်လုံးကို ချီစွမ်းအင်အလင်းဖြင့် လွမ်းခြုံထားသောကြောင့် အပြင်လူများက စစ်ဆေးကြည့်နိုင်မည်မဟုတ်ပေ။

“တိုက်ခိုက်ရမှာလား”

သူ့ဘေးတွင်ရပ်နေသော သက်လတ်ပိုင်းအရွယ် ဓားကျင့်ကြံသူက ရယ်လိုက်ပြီး ခေါင်းခါသည်။

“အဲဒီဓားချက်က ကံကြမ္မာစွမ်းအားနဲ့ ‌ပေါင်းစပ်နေတယ်။ တုယွီမင်က မရေမတွက်နိုင်တဲ့ ဓားအလင်းတွေကို မြင်နေရတယ်။ သူက ဘယ်လိုလုပ်ပြီး တိုက်ခိုက်နိုင်မှာလဲ”

“ဝိညာဉ်ဖွဲ့စည်းခြင်းအဆင့် အဌမအဆင့်မှာရှိနေတဲ့ ဝမ်ကျီတုံကတောင် အဲဒီဓားချက်ကို တားဆီးနိုင်မှာမဟုတ်ဘူး”

ထိုလူက ပြောလိုက်သည်။

‘မတားနိုင်ဘူးတဲ့လား’

တာအိုတန်ခိုးရှင်က နားမလည်နိုင်ဖြစ်နေသည်။

သူက တခြားလူများထက် ကျင့်ကြံဆင့်မြင့်သော်လည်း ဓားကျင့်ကြံသူတစ်ယောက် မဟုတ်ခဲ့ပေ။

ဓားကျင့်ကြံသူတစ်ယောက်ကသာ တခြားလူများ၏ ဓားပညာရပ်ကို ထွင်းဖောက်မြင်နိုင်သည်။

“တကယ့်ကို ကြောက်စရာကောင်းတယ်။ ဓားအင်မော်တယ်ဟန်က ဘယ်လိုလူမျိုးလဲ မသိဘူး။ သူက ကံကြမ္မာစွမ်းအားကို ကောင်းကင်အဆင့် ဓားနည်းစနစ်ထဲမှာ ပေါင်းထည့်နိုင်တယ် ....”

သက်လတ်ပိုင်းအရွယ် ဓားကျင့်ကြံသူက မျက်လုံးပြူးသွားပြီး ရုတ်တရက် ရပ်တန့်လိုက်သည်။

“မဟုတ်သေးဘူး”

သူ၏ ချီစွမ်းအင်အလင်းက တုန်ခါနေပြီး ကိုယ့်ကိုယ်ကိုယ် ဖုံးကွယ်ရန် မေ့လျော့သွားသည်။

သူက မျက်လုံးပြူးသွားပြီး တုယွီမင်၏ရင်ဘတ်သို့ တိုးဝင်လာသော ဓားချက်ကို ကြည့်နေသည်။

“ဓားချက်ထဲမှာ ဝိညာဉ်စွမ်းအားရှိတယ်လို့ ဟွမ်ကျစ်ဟူက ပြောလိုက်တယ်မဟုတ်လား”

တာအိုတန်ခိုးရှင်က ဓားကျင့်ကြံသူ၏ စိတ်လှုပ်ရှားမှုကို နားမလည်သော်လည်း ခေါင်းညိတ်လိုက်သည်။

“ဟုတ်တယ်။ အဲဒီလို ပြောခဲ့တယ်”

ဓားကျင့်ကြံသူက ဓားအလင်းများကို ထုတ်ဖော်၍ ပြေးထွက်သွားသည်။

“အဲဒီဓားချက်က ငါထင်ထားတာထက် ပိုသန်မာတယ်”

“ကံကြမ္မာစွမ်းအားအပြင် ဝိညာဉ်စွမ်းအားလည်း ရှိနေတယ်။ တုယွီမင်က အဲဒီဓားချက်ကို မတားနိုင်ဘူး။ ငါတို့ကလည်း လှည့်စားခံလိုက်ရတယ်”

သူက အာကာသကို ဖြတ်သန်းပြီး ဓားထုတ်၍ ဟွမ်ကျစ်ဟူ၏ဦးခေါင်းကို ခုတ်ချသည်။

သူက အစွမ်းကုန်ထုတ်သုံးထားပြီး ဟွမ်ကျစ်ဟူကို တစ်ခါတည်းသတ်ရန် ရည်ရွယ်သည်။

ထိုဓားချက်သည် လူတိုင်းကို အငိုက်မိသွားစေခဲ့သည်။

အလင်းလွှာပေါ်တွင် ရုတ်တရက်ပေါ်လာသော ဓားချက်ကြောင့် လုချန်းဖျင်က ထိတ်လန့်စွာအော်ဟစ်လိုက်ပြီး မျက်နှာတစ်ခုလုံး ဖြူဖျော့သွားသည်။

“အဆင်ပြေပါတယ်။ အဆင်ပြေပါတယ်။ ညီလေးဟန်ရဲ့ ဓားနည်းစနစ်က အဲဒီလောက် မရိုးရှင်းဘူး”

ဟွမ်ခြောက်က လုချန်းဖျင်၏ပခုံးကို ပုတ်ပေးနေပြီး ညင်သာစွာပြောလိုက်သည်။

ရက်စက်မှုတချို့သည် သူ့မျက်လုံးထဲတွင် ဖြတ်ပြေးသွားသည်။

“ဒါပေမဲ့ ငါ့ရဲ့ အဖိုးတန်သမီး ဟွမ်ကျစ်ဟူကို ဘယ်သူမှ အနိုင်ကျင့်လို့မရဘူး”

ဟွမ်ခြောက်က အာကာသကို ကြည့်လိုက်သည်။

နယ်မြေတစ်ခုလုံးသည် ပြင်းထန်သော မိစ္ဆာချီများနှင့် ပြည့်နှက်သွားပုံရသည်။

“အဲဒါက ဟွမ်ခြောက်လား”

တာအိုဘိုးဘေးတစ်ယောက်က နတ်အာရုံဖြင့် ပြောလိုက်သည်။

“ဟုတ်တယ်။ သူက အနည်းဆုံး တာအိုဘိုးဘေးအဆင့် တိုက်ခိုက်နိုင်စွမ်းကို ပိုင်ဆိုင်ထားတယ်။ တာအိုပြိုင်ပွဲနယ်မြေကို သူဝင်လာတဲ့အချိန်မှာ နတ်ဘုရားဘုရင်တွေကတောင် သတိထားမိသွားကြတယ်”

နတ်အာရုံတစ်ခုက ပြန်ပြောသည်။

တာအိုပြိုင်ပွဲနယ်မြေကို နတ်ဘုရားဘုရင်များက ထိန်းချုပ်ထားသော်လည်း စောင့်ကြည့်စစ်ဆေးမှုများကို ယခင်က တာဝန်ယူထားသော တာအိုဘိုးဘေးများက ဆက်လက်လုပ်ဆောင်ခဲ့ကြသည်။ ထို့အပြင် ဂိုဏ်းကြီးများ၏ တာအိုဘိုးဘေးအချို့လည်း ပါဝင်လာကြသည်။

“သူက ဘယ်ကနေ ရောက်လာတာလဲ မသိဘူး။ သူ့ရဲ့ မိစ္ဆာကျင့်ကြံခြင်းက တကယ်အားကောင်းလွန်းတယ်”

အထက်ဘုံသုံးပါးတွင်လည်း မိစ္ဆာကျင့်ကြံသူ ဟွမ်ခြောက်ကို မကြားဘူးကြပေ။

“ကောင်းကင်အံ့ဖွယ်ကမ္ဘာရဲ့ နောက်ကွယ်မှာ ဘယ်သူရှိနေတာလဲ မသိဘူး။ အဆုံးမဲ့နတ်ဘုရားဘုရင်နဲ့ ချီလင်နတ်ဘုရားသားရဲတို့ ပါဝင်လာကြတယ်။ တကယ့်ကို အံ့အားသင့်စရာပဲ”

“အံ့အားသင့်စရာ ဟုတ်လား။ တကယ်တော့ ထိတ်လန့်စရာပါ”

မိစ္ဆာချီသည် မိုင်ထောင်ချီပတ်ဝန်းကျင်ကို လွှမ်းခြုံလိုက်သည်။

တာအိုပြိုင်ပွဲကို စောင့်ကြည့်နေကြသော တာအိုဘိုးဘေးများ၏အမြင်တွင် ဟွမ်ခြောက်၏ ကိုယ်ထဲမှ မိစ္ဆာချီများသည် ရုတ်တရက် ပေါက်ကွဲထွက်လာကြသည်။

မိစ္ဆာချီသည် ချီစွမ်းအင်ကို ဝါးမြိုလိုက်သည်။

ထို့ကြောင့် ဟွမ်ခြောက်က မိစ္ဆာသူတော်စင်တစ်ယောက် လျင်မြန်စွာ ဖြစ်လာခဲ့သည်။

သူက ကိုယ်ပိုင်စွမ်းအားကို အသုံးပြု၍ လောက၏စွမ်းအားကို ဖိနှိပ်ပြီး ဝါးမြိုနိုင်သည်။

မိုင်တစ်သောင်းပတ်ဝန်းကျင်၍ ကောင်းကင်အဆင့်၊ သူတော်စင်တစ်ဝက်အဆင့်နှင့် သူတော်စင်အဆင့်များသည် ဟွမ်ခြောက်၏ မိစ္ဆာချီကို မခုခံနိုင်ကြပေ။

ထိုမိစ္ဆာချီသည် ချီစွမ်းအင်ထက် သာလွန်နေသော အင်မော်တယ်ချီနှင့် ယှဉ်နိုင်သည်။

အဆုံးမရှိသော လောကကြီးကပင် ဖိနှိပ်မှုကို ခံစားလိုက်ရသည်။

ထိုနေရာသည် ရတနာတိုက်၏ တည်နေရာနှင့် သိပ်မဝေးပေ။ စုစည်းနေသော ကျွမ်းကျင်သူများက ထိတ်လန့်သွားကြသည်။

“တာအိုပြိုင်ပွဲမှာ အားကောင်းတဲ့ မိစ္ဆာကျင့်ကြံသူတစ်ယောက် ပေါ်လာခဲ့တာလား”

လူတစ်ယောက်က တီးတိုးပြောလိုက်သည်။ သူ့မျက်လုံးများက တောက်ပနေကြသည်။

မိစ္ဆာဂိုဏ်းသည် ဤနေရာတွင်ရှိသော ကျင့်ကြံသူအများစုနှင့် အဖွဲ့မတူပေ။ ထို့ကြောင့် ရန်သူဖြစ်သွားနိုင်သလို မိတ်ဆွေလည်း ဖြစ်လာနိုင်သည်။

“ဒီလိုမျိုး လွှမ်းမိုးနိုင်စွမ်းရှိတဲ့ မိစ္ဆာချီတွေ။ အဲဒီလူရဲ့ ကျင့်ကြံဆင့်က အနည်းဆုံး ကောင်းကင်အဆင့်ကို ကျော်လွန်နေလိမ့်မယ်။ အဲဒီလိုလူများက ရတနာတိုက်ကို လာလုတာလား”

လူတစ်ယောက်က စိုးရိမ်စိတ်များနှင့် ပတ်ဝန်းကျင်ကို ကြည့်လိုက်ပြီး ရေရွတ်နေသည်။

မိစ္ဆာဂိုဏ်း၏ ကျင့်ကြံသူအများစုသည် ရက်စက်စွာ သတ်ဖြတ်ကြသည်။ သူတို့က ရတနာတိုက်၏ တိုက်ပွဲတွင် သတ်ဖြတ်မှုများကို ဖြစ်ပေါ်စေလိမ့်မည်။

ထိုသို့ဆိုလျှင် ရတနာတိုက်အတွက် ယှဉ်ပြိုင်မှုသည် အလွန်ဆိုးဝါးနေလိမ့်မည်။

“အဲဒီလိုကျွမ်းကျင်သူမျိုးကို ဘယ်သူက ရန်စလိုက်တာလဲ”

လူအများအပြားက နားမလည်နိုင်ဖြစ်နေကြသည်။