အခန်း (၇၂၃)

“ဂရုစိုက်ကြ။ သူက ဓားစံအိမ်ကပဲ။ ဒီတိုက်ပွဲကို မြန်မြန်အဆုံးသတ်ရမယ်။ အစွမ်းကုန်ထုတ်သုံးကြ”

အလင်းလွှာ၏တစ်ဖက်တွင် တာအိုတန်ခိုးရှင်တစ်ဦးက အော်ဟစ်လိုက်သည်။

“တိုက်ခိုက်ကြ။ တာအိုပြိုင်ပွဲမှာ ဓားစံအိမ်ရဲ့ကျွမ်းကျင်သူတွေ ရှိနေတယ်။ သူတို့က သူ့ကို သေချာပေါက် လာကယ်ကြမှာပဲ”

တစ်ဖက်တွင် အလင်းလွှာက ရေခဲလှံတစ်ချောင်းကို ဖန်တီး၍ ရေခဲနံရံကို ထောက်ပံ့ပေးလိုက်သည်။ ရေခဲနံရံက လျင်မြန်စွာ ကျဆင်းလာသည်။

ဟန်မူယဲ့၏ မျက်လုံးထဲတွင်ရှိသော အလင်းရောင်သည် ပိုမိုသိပ်သည်းလာခဲ့သည်။ သူ့နောက်တွင်ရှိသော ခုနစ်ထပ်ဓားစံအိမ်၏ အပြင်ဘက်တွင် ကိုးထပ်ဓားစံအိမ်သည် တိတ်ဆိတ်စွာ ပုံပေါ်လာခဲ့သည်။

သို့သော် ထိုဓားစံအိမ်ကို ဟန်မူယဲ့မှလွဲ၍ နတ်ဘုရားဘုရင်များအပါအဝင် မည်သူမှ မမြင်ရပေ။

“ဓား”

ဟန်မူယဲ့က တီးတိုးရေရွတ်လိုက်သည်။ ဓားရှည်တစ်လက်သည် သူ့လက်ထဲသို့ ရောက်လာသည်။

“သတ်”

သူက ဓားဖြင့် ရှေ့သို့ ညွှန်ပြလိုက်သောအခါတွင် ဓားစံအိမ်၏ ဓားအလင်းသည် နဂါးတစ်ကောင်အဖြစ် ပြောင်းလဲသွားသည်။

ဓားစံအိမ်သည် ထောင်ချီနေသော ဓားများ၏ စွမ်းအားကို တစ်ခုတည်းအဖြစ် စုစည်းနိုင်သည်။

ထိုအရာသည် ဓားတစ်သောင်းတို့အိမ်အပြန် နည်းစနစ်နှင့် တူညီသည်။

ရှေ့တွင်ရှိနေသော ရေခဲနံရံသည် နဂါးဓားအလင်းကို မတားဆီးနိုင်ခဲ့ပေ။

ကျွမ်းကျင်သူတစ်ရာဖြင့် ဖွဲ့စည်းထားသော ဝင်္ကပါအစီအရင်သည် ဓားတစ်ချက်ကြောင့် ပျက်စီးသွားရသည်။

“ဘုန်း”

ကောင်းကင်နှင့်မြေကြီးသည် တုန်ခါသွားသည်။ ရေခဲနံရံ၏ ရေခဲအလင်းရောင်သည် မိုင်ထောင်ချီအကွာအထိ ဖြာထွက်သွားခဲ့သည်။

နဂါးသည် ဟိန်းဟောက်လိုက်ပြီး လောကတစ်ခုလုံးကို ဓားမြည်သံဖြင့် ပဲ့တင်ထပ်သွားစေသည်။

နဂါးဓားအလင်းသည် အမြီးကို လှုပ်ရှားလိုက်ပြီး ကျန်ရှိနေသော အလင်းလွှာများကို ဖျက်ဆီးခဲ့သည်။

ထိုအရာသည် အစသာ ရှိသေးသည်။

အင်မော်တယ်ရင်းမြစ်ကမ္ဘာမှ အထက်ဘုံသုံးပါး၏ ဂိုဏ်းများ၊ ဝင်္ကပါအစီအရင်၊ ကျွမ်းကျင်သူများ၊ သူတော်စင်နှင့် သူတော်စင် တစ်ဝက်အဆင့်များသည် ဓားတစ်ချက်၏အောက်တွင် ရှုံးနိမ့်သွားကြသည်။

ထိုအရာသည် ကောင်းကင်စာရင်း၏ အဆင့်ကိုးတွင်ရှိသော ဓားအင်မော်တယ်ဟန်၏ စွမ်းအားပင် ဖြစ်သည်။

သူက တာအိုပြိုင်ပွဲတွင် နှစ်ပေါင်းလေးဆယ်ကြာအောင် ပုန်းအောင်းနေပြီး မတိုက်ခိုက်ခဲ့ပေ။ သို့သော် ယနေ့တွင် သူ၏ ဓားချက်သည် လောကတစ်ခုလုံးကို တုန်လှုပ်သွားစေခဲ့သည်။

ထိုအချိန်တွင် ပုန်းကွယ်နေသော မဟာပုဂ္ဂိုလ်ကြီးများက နတ်အာရုံကို ထုတ်လွှတ်လိုက်ကြသည်။

“မဖြစ်နိုင်ဘူး။ အထက်ဘုံသုံးပါးမှာ ခုနစ်ထပ်ဓားစံအိမ်ကို ပိုင်ဆိုင်ထားတဲ့လူတွေ အများကြီးရှိကြတယ်။ ဒီလိုမျိုး လွှမ်းမိုးနိုင်စွမ်းရှိတဲ့ ဓားချက်ကို တစ်ခါမှ မမြင်ဖူးဘူး ....”

အလင်းလွှာ၏နောက်တွင် ရပ်နေသော တာအိုတန်ခိုးရှင်တစ်ယောက်က နားမလည်နိုင်စွာ ပြောသည်။

တခြားလူများကလည်း ဟန်မူယဲ့၏ လွှမ်းမိုးနိုင်စွမ်းရှိသော ဓားချက်ကြောင့် စိတ်ရှုပ်သွားကြသည်။

သူ၏ ဓားချက်သည် သူတတ်နိုင်သောစွမ်းအားကို ကျော်လွန်နေသည်။

ခုနစ်ထပ်ဓားစံအိမ်သည် ထိုစွမ်းအားမျိုးကို ပိုင်ဆိုင်ထားလျှင် ဓားစံအိမ်သည် အထက်ဘုံသုံးပါးကို ချုပ်ကိုင်ထားနိုင်လိမ့်မည်။

အဝေးတစ်နေရာတွင် ပျံသန်းနေသော ပိုင်ယွီမင်က မျက်နှာထားပြောင်းလဲသွားပြီး ပြန်လှည့်လာသည်။

သူ့ဘေးတွင်ရှိနေသော တခြားဓားကျင့်ကြံသူများကလည်း လှည့်ထွက်သွားကြသည်။

ဓားစံအိမ်၏စွမ်းအား ....

သူတို့၏ ကျင့်ကြံခြင်းနည်းစနစ် ဖြစ်သည်။ သူတို့၏ တာအိုရောင်းရင်းတစ်ယောက်က တိုက်ပွဲနှင့် ရင်ဆိုင်နေရလျှင် ကူညီပေးရမည်။

သို့သော် သူတို့က တိုက်ခိုက်ခံနေရသောလူကို မသိကြပေ။

ဟန်မူယဲ့၏ဓားချက်က ဝင်္ကပါကို ဖျက်ဆီးလိုက်သည်။ သူ၏ အငွေ့အသက်က ပိုမိုသန်မာလာသည်။

သူက ထိုဓားချက်ကို ထုတ်သုံးလိုက်သောကြောင့် ထပ်မံဖုံးကွယ်နေရန် မလိုအပ်တော့ပေ။

သူ့ကိုယ်ပေါ်တွင်ရှိသော ဓားအလင်းသည် မျဉ်းတစ်ကြောင်းအဖြစ် ဖြည်းဖြည်းချင်း စုစည်းသွားသည်။

“သူက သတ်ဖြတ်လိုစိတ်ကို ဖော်ထုတ်နေတယ်”

“ငါတို့က သေဆုံးသွားရမယ်ဆိုရင်တောင် အစွမ်းကုန်ထုတ်ပြီး တိုက်ရမယ်”

ကျင့်ကြံသူအားလုံးက ဓားအလင်း၊ ချီစွမ်းအင်အလင်း၊ ဝင်္ကပါအစီအရင်နှင့် အဆောင်လက်ဖွဲ့များကို ထုတ်သုံးလိုက်ကြသည်။

ဟန်မူယဲ့၏ ပတ်ဝန်းကျင်သည် အက်ကွဲသွားသည်။ ပေတစ်ထောင်နယ်မြေသည် ချီစွမ်းအင်အလင်း၏ ဝဲကတော့တစ်ခု ဖြစ်သွားသည်။

ပေါက်ကွဲထွက်လာသော စွမ်းအင်လှိုင်းသည် အလွန်သန်မာသောကြောင့် အာကာသသည် တောင့်မခံနိုင်တော့ပေ။

တာအိုဘိုးဘေးများကပင် ထိုတိုက်ခိုက်မှုမျိုးကို ခုခံနိုင်ကြမည်မဟုတ်ပေ။

ထိုတိုက်ခိုက်မှုမှ ရှင်သန်ရန် မဖြစ်နိုင်ပေ။

ပြင်ပဘုံတွင်ရှိနေသော မဟာပုဂ္ဂိုလ်ကြီးများ၊ တာအိုပြိုင်ပွဲကို စောင့်ကြည့်နေသော တာအိုဘိုးဘေးများနှင့် ကျွမ်းကျင်သူများက ချီစွမ်းအင်ဝဲကတော့၏ အလယ်တွင်ရှိနေသော ဟန်မူယဲ့ကို အာရုံစိုက်၍ စောင့်ကြည့်နေကြသည်။

သေဆုံးခြင်း ....

ပြိုင်ဘက်ကင်း ပါရမီရှင်တစ်ယောက်သည် ကျဆုံးသွားရတော့မည်။

လောက၏ အဖြစ်အပျက်များကို ခန့်မှန်းမကြည့်နိုင်ပေ။

လူတိုင်းက နှလုံးသားထဲတွင် သက်ပြင်းချလိုက်ကြသည်။

နယ်မြေတစ်ခုကို ထိန်းချုပ်ထားသော ပါရမီရှင်ဖြစ်သည့် မဟာဓားကျင့်ကြံသူတစ်ယောက်သည် ထိုသို့ သေဆုံးသွားလိမ့်မည်ဟု သူတို့က ထင်မထားကြပေ။

ပိုင်ယွီမင်က အနက်ရောင်အလင်းစက်ကွင်း၏ အလယ်တွင် ရှိနေသော ဟန်မူယဲ့ကို လှမ်းကြည့်သည်။ သူ့မျက်နှာထားက ရှုပ်ထွေးနေသည်။

သူက ဟန်မူယဲ့ကို လေးစားခဲ့သည်။

ဟန်မူယဲ့၏ ဓားတာအိုကျင့်ကြံခြင်းတွင် အဆင့်မြင့်ပြီး ရတနာများကို လဲလှယ်ရန်အတွက် စီစဉ်ပေးခဲ့သည်။ သူက ကျွမ်းကျင်သူတစ်ယောက်၏ အရည်အချင်းကို ဖော်ပြခဲ့သည်။

သူ့ဂိုဏ်း၏ ထူးခြားသောပါရမီရှင်တစ်ယောက်သည် ထိုသို့ ကျဆုံးသွားလိမ့်မည်ဟု သူထင်မထားခဲ့ပေ။

“နှမြောစရာပဲ ....”

ပိုင်ယွီမင်က တီးတိုးရေရွတ်သည်။

အဝေးတစ်နေရာတွင် မိစ္ဆာအလင်းသည် တုန်ခါလာခဲ့သည်။

မဟာသူတော်စင် ကောင်းကင်နင်းခြေ မိစ္ဆာဘုရင် ....

သို့သော် သူရောက်လာလျှင်လည်း ဟန်မူယဲ့ကို ကယ်တင်နိုင်မည်မဟုတ်ပေ။

အင်မော်တယ်ရင်းမြစ်ကမ္ဘာ၏ ကျွမ်းကျင်သူတစ်ရာသည် တစ်ပြိုင်နက် တိုက်ခိုက်ခဲ့ကြသည်။ သူတို့၏စွမ်းအားသည် လေဟာနယ်ကိုပင် အက်ကွဲသွားစေခဲ့သည်။ ထိုစွမ်းအားကို မည်သူက တားဆီးနိုင်မည်နည်း။

သိပ်မဝေးသောနေရာတွင် ပုန်းအောင်းနေသည့် ကျောက်ကျန့်ဟယ်၏ မျက်နှာထားက ရှုပ်ထွေးနေသည်။

သူက ဓားရိုးကို တင်းကျပ်စွာ ဆုပ်ကိုင်ထားသော်လည်း မလှုပ်ရှားခဲ့ပေ။

သူက ကိုယ်ပိုင်အကန့်အသတ်ကို နားလည်သည်။

အာကာသထဲတွင် မရေမတွက်နိုင်သော နတ်အာရုံများသည် သွယ်ယှက်နေကြသောကြောင့် ချီစွမ်းအင်ကိုပင် တုန်ခါလာစေသည်။ တာအိုပြိုင်ပွဲကို စောင့်ကြည့်နေသော တာအိုဘိုးဘေးများက ထိတ်လန့်စွာ အသံပြုလိုက်ကြသည်။

“နှမြောစရာပဲ။ ဟန်မူယဲ့က ငါမြင်ဖူးတဲ့ပါရမီရှင်တွေထဲမှာ အသန်မာဆုံးပဲ”

တာအိုဘိုးဘေးတစ်ယောက်က နောက်တများနှင့် သက်ပြင်းချသည်။

“ဟားဟား၊ ပါရမီရှင်တစ်ယောက်ဆိုရင်လည်း အသက်ရှင်နေဖို့ လိုသေးတယ်လေ။ ငါတို့က ပါရမီရှင်တွေကို မြင်ဖူးကြတယ်မဟုတ်ဘူးလား”

လူတစ်ယောက်က လှောင်ပြောင်လိုက်သည်။

“တကယ်လို့ သူက အသက်ရှင်နိုင်မယ်ဆိုရင် တာအိုဘိုးဘေးတစ်ယောက်ဖြစ်တဲ့ ငါက .... စောက်ကျိုးနည်း”

“အဲဒါက ဘာလဲ”

“ငါဘာမြင်လိုက်တာလဲ ....”

“ဒီဓား၊ ဒီဓားက ....”

လူတိုင်းက ရှေ့သို့ ဓားဖြင့် ထိုးလိုက်သော ဟန်မူယဲ့ကို အာရုံစိုက်နေကြသည်။

ဓားအလင်းသည် အစိမ်းရောင်သန်းနေသည်။

ဓားသွားသည် တောက်ပနေခဲ့သည်။

ဓားသည် ပတ်ဝန်းကျင်တွင်ရှိသော ချီစွမ်းအင်အလင်းကို လှုပ်ရှားသွားစေသည်။ ထိုဓားက ကောင်းကင်နှင့် မြေကြီး၏ ချုပ်နှောင်မှုအပြင် အနက်ရောင်ဝဲကတော့၏ ဖိနှိပ်မှုကိုလည်း ချိုးဖောက်နိုင်ပုံရသည်။

သို့သော် ထိုဓားသည် မည်မျှ စွမ်းဆောင်နိုင်သနည်း။

ထိုဓားချက်တွင် ခွန်အားမရှိပေ။

သို့သော် အချိန်စွမ်းအားတချို့ ပါဝင်နေသည်။

ဓားအလင်းသည် ဖျတ်ခနဲလှုပ်ရှားသွားပြီး အချိန်ကို နောက်ပြန်ရစ်လိုက်သည်။

ထိုဓားချက်နှင့်အတူ အာကာသသည် ပုံမှန်အတိုင်း ပြန်ဖြစ်သွားသည်။ ပေတစ်ထောင်အတွင်း၌ရှိသော တိုက်ခိုက်မှုများအားလုံးသည် လေဟာနယ်ကို မချိုးဖောက်ခင်အထိ ပြန်တွန်းထုတ်ခံလိုက်ရသည်။

ဟန်မူယဲ့က ဓားကိုင်ထားပြီး ရပ်တန့်နေသော တိုက်ကွက်များကြားမှ ဖြည်းဖြည်းချင်း လမ်းလျှောက်ထွက်လာသည်။ ထို့နောက် ပေတစ်ထောင်အကွာတွင် ရပ်တန့်လိုက်သည်။

“ဘုန်း”

အချိန်ရပ်တန့်မှုသည် ပြီးဆုံးသွားသည်။

တိုက်ကွက်များသည် ယခင်အတိုင်း ပြန်လည်ပေါင်းစည်းသွားကြသည်။

သို့သော် ဟန်မူယဲ့က ပေတစ်ထောင်အကွာတွင် သက်တောင့်သက်သာ ရှိနေသည်။

ဓားတာအို၊ အချိန်ထိန်းချုပ်ခြင်း ....

ကံကြမ္မာစွမ်းအားကို ထိန်းချုပ်ခြင်းသည် လောကကို ကျော်လွန်ပြီး ထူးခြားသောအဆင့်တစ်ခုတွင် ရှိနေသည်။

လူတစ်ယောက်က ကံကြမ္မာကို နားလည်ထားလျှင် မဖြစ်နိုင်သောအရာကို ဖြစ်လာအောင် လုပ်နိုင်သည်။

အရာအားလုံးသည် ထွင်း‌ဖောက်မြင်နိုင်သော လမ်းကြောင်းတစ်ခုတွင် ဖြစ်ပျက်နေကြသည်။

ဝိညာဉ်ဖွဲ့စည်းခြင်း အထွတ်အထိပ်အဆင့်တွင် ရှိနေသော ကောင်းကင်အဆင့် ကျွမ်းကျင်သူတစ်ဦးသည် အလိုရှိလျှင် လုံလောက်သောစွမ်းအားကို စုစည်း၍ ကောင်းကင်တွင်ရှိသော ကြယ်ကို ခူးဆွတ်နိုင်သည်။ သို့သော် သူတို့က ကိုယ်ပိုင်ကံကြမ္မာကို ထိန်းချုပ်ရန်အတွက် ကံကြမ္မာစွမ်းအားကို ရှာဖွေကြသည်။

ကံကြမ္မာစွမ်းအားကို နားလည်ထားလျှင် သူတော်စင်တစ်ဝက်အဆင့်သို့ ရောက်သွားလိမ့်မည်။

ကံကြမ္မာစက်ဝိုင်းကို ချိုးဖောက်ပြီးလျှင် ပြန်လည်မွေးဖွားခြင်းနှင့် ကြုံတွေ့ရမည်။

ဤလောကတွင် ကံကြမ္မာ၏အထက်တွင် အမြဲသံသရာလည်နေသော ဖြစ်ရပ်တစ်ခု ရှိသည်။

ကံကြမ္မာ၏ ထူးခြားဆန်းကြယ်သော လုပ်ဆောင်ချက်တွင် ကောင်းကင်ဆန္ဒ ပါဝင်နေသည်။

ကောင်းကင်ဆန္ဒသည် ပြန်လည်မွေးဖွားခြင်းစက်ဝိုင်း၊ စကြဝဠာ၏ တာအိုနှင့် ကောင်းကင်နှင့်မြေကြီး၏ လမ်းစဉ် ဖြစ်သည်။

ထိုလမ်းစဉ်ကို နားလည်နိုင်လျှင် သက်ရှိအားလုံးကို ကျော်လွန်၍ ကမ္ဘာလောကနှင့်အတူ ရှင်သန်နိုင်သော သူတော်စင်တစ်ပါး ဖြစ်လာလိမ့်မည်။

သူတော်စင်တစ်ပါးသည် ကောင်းကင်တာအိုကို နားလည်ထားပြီး ဟန်ချက်ညီစွာ နေထိုင်နိုင်သည်။ ပြန်လည်မွေးဖွားခြင်းသံသရာကိုလည်း ထိန်းချုပ်ထားပြီး သေဆုံးသွားတော့မည်မဟုတ်ပေ။

သူတော်စင်အဆင့်သည် အလွန်နက်နဲသည်။

ပြန်လည်မွေးဖွားခြင်းကို ထိန်းချုပ်ထားနိုင်လျှင် သူတော်စင်တစ်ပါး ဖြစ်လာလိမ့်မည်။ ပြန်လည်မွေးဖွားခြင်းစက်ဝိုင်းကို တည်ဆောက်နိုင်လျှင်တော့ တာအိုဘိုဘေးတစ်ပါး ဖြစ်လာလိမ့်မည်။

လောကတွင်ရှိသော တာအိုဘိုးဘေးများအားလုံးသည် ကျင့်ကြံခြင်းတာအိုတစ်ခုကို တည်ဆောက်ထားကြသည်။

ထိုတာအိုကို ခမ်းနားသည်ဖြစ်စေ၊ သေးသိမ်သည်ဖြစ်စေ၊ ကြမ်းတမ်းသည်ဖြစ်စေ၊ လွယ်ကူသည်ဖြစ်စေ တည်ဆောက်ရမည်။

နတ်ဘုရားဘုရင်အဆင့်သို့ ရောက်သွားမှာသာ သက်ရှိအားလုံး၏အထက်တွင် ရှိနေသည်ဟု ဆိုနိုင်မည်။

နတ်ဘုရားဘုရင်တစ်ပါးသည် ကောင်းကင်နှင့်မြေကြီး၏ လေးစားမှုကို ခံယူနိုင်သည်။

တာအိုဘိုးဘေးအဆင့်မှ နတ်ဘုရားဘုရင်အဆင့်သို့ တက်လှမ်းရန်အတွက် မဟာတာအို၁၈ခုကို ထိန်းချုပ်ထားရမည်။

မည်သည့်တာအိုကိုပင် ထိန်းချုပ်ထားပါစေ သေချာပေါက်နားလည်ရမည်ဖြစ်သော တာအိုတစ်ခု ရှိသည်။ အချိန်နှင့် တည်နေရာစွမ်းအား ဖြစ်သည်။

အချိန်နှင့်တည်နေရာစွမ်းအားကို နားလည်မှသာ ပြိုင်ဘက်ကင်းသော နတ်ဘုရားဘုရင်တစ်ပါး ဖြစ်လာနိုင်မည်။

မဟာတာအို၁၈ခုကို စုစည်းပြီး လောကထဲတွင် ပေါင်းစည်းရမည်။

ထိုသို့လုပ်ဆောင်ရန် နည်းလမ်းနှစ်ခု ရှိသည်။

ပထမနည်းလမ်းသည် အချိန်စွမ်းအားကို အသုံးပြု၍ အတိတ်သို့ပြန်သွားပြီး အချိန်မြစ်ထဲတွင် ကိုယ်ပိုင်တာအိုကို ထည့်သွင်းရမည်။

အချိန်နှင့် တည်နေရာစွမ်းအားကို ထိန်းချုပ်နိုင်စွမ်းသည် အဆင့်တက်ပြီးနောက် ကိုယ်ပိုင်ခွန်အားကို ကိုယ်စားပြုသည်။

ရှေးခေတ်အချိန်အထိ ပြန်သွားနိုင်သော ကျွမ်းကျင်သူများသည် နှစ်သုံးရာ၊ ငါးရာခန့်အထိသာ ပြန်သွားနိုင်သော ကျွမ်းကျင်သူများထက် အဆပေါင်းသန်းထောင်ချီ၍ ပိုမိုသန်မာသည်။

အရိပ်နတ်ဘုရားဘုရင် ကျောက်ကျန့်ဟယ်က နတ်ဘုရားဘုရင်အဆင့်သို့ တက်လှမ်းရာတွင် ဖြတ်လမ်းနည်းကို သုံးခဲ့သည်။ သူက တည်နေရာစွမ်းအားပါဝင်သော ရတနာတစ်ခုကို အသုံးပြု၍ ကိုယ်ပိုင်စွမ်းအား၏နေရာတွင် အစားထိုးပြီး လောကနှင့် ပေါင်းစပ်ခဲ့သည်။

ထို့ကြောင့် သူ၏ တိုက်ခိုက်နိုင်စွမ်းသည် နတ်ဘုရားဘုရင်အဆင့်တွင် မရှိပေ။

သူက ကိုယ်ပိုင်စွမ်းရည်ကို နားလည်ပြီး ကိုယ့်ကိုယ်ကိုယ် နတ်ဘုရားဘုရင်အဆင့် ကျွမ်းကျင်သူအဖြစ် သတ်မှတ်မထားခဲ့ပေ။ သူက ရတနာအမျိုးမျိုးကို ရှာဖွေရန် အာရုံစိုက်ထားပြီး အဆင့်နိမ့်ကျင့်ကြံသူများနှင့် သွားလာလေ့ရှိသည်။

တာအိုဘိုးဘေးများက အချိန်နှင့် တည်နေရာစွမ်းအားကို ရှာဖွေနေကြသည်။

ကောင်းကင်နင်းခြေ မိစ္ဆာဘုရင်က တည်နေရာစွမ်းအားကို ထိန်းချုပ်ထားသောကြောင့် ကျွမ်းကျင်သူများက တန်ဖိုးထားကြသည်။

ထိုလူမျိုးသည် နတ်ဘုရားဘုရင်တစ်ပါး ဖြစ်လာလိမ့်မည်။

သန်မာသောလူများသည် အဆင့်တူသောလူများကိုသာ ဂရုစိုက်ကြသည်။

“အချိန်နောက်ပြန်ရစ်ခြင်း၊ ဒါက သန့်စင်တဲ့ အချိန်စွမ်းအားကို ထိန်းချုပ်ထားနိုင်တာပဲ”

အံ့အားသင့်နေသောအသံသည် အာကာသထဲတွင် ပေါ်ထွက်လာသည်။

ယခုအချိန်တွင် တာအိုပြိုင်ပွဲကို စောင့်ကြည့်နေသော တာအိုဘိုးဘေးက ဖုံးကွယ်မထားတော့ဘဲ တိုက်ရိုက် ပြောလိုက်သည်။

“ငါက အခုလေးတင် အသက်ရှူကြိမ်သုံးခါအထိ အချိန်နောက်ပြန်ရစ်ခဲ့တယ်။ ပေတစ်ရာအတွင်းမှာ အချိန်စွမ်းအားက ....”

ထိုအသံက ရပ်တန့်သွားပြီး တုန်ခါနေသောအသံဖြင့် ဆက်ပြောသည်။

“ငါမတွက်ချက်နိုင်ဘူး ....”

အချိန်နောက်ပြန်ရစ်ခြင်း၏ စွမ်းအားသည် အလွန်သန်မာသောကြောင့် တွက်ချက်ကြည့်ရန် မဖြစ်နိုင်ပေ။

နတ်အာရုံဖြင့်ပြောလိုက်သော ထိုစကားကြောင့် ပတ်ဝန်းကျင်သည် ဖိနှိပ်ခံလိုက်ရပုံပေါ်ပြီး အသံထွက်မလာတော့ပေ။

ပေတစ်သောင်းအကွာတွင်ရှိသော ပိုင်ယွီမင်က ပါးစပ်အဟောင်းသားဖြစ်ပြီး ဆွံ့အနေသည်။

သူက ဟန်မူယဲ့ကို သိသည်ဟု ထင်ထားသော်လည်း ယခုဟန်မူယဲ့က ထူးခြားနေသည်။

အထက်ဘုံသုံးပါးတွင်ရှိသော ဓားဂိုဏ်းများမှ လူမည်မျှသည် ထိုနည်းလမ်းမျိုးကို ပိုင်ဆိုင်ထားကြသနည်း။

အင်မော်တယ်ရင်းမြစ်ကမ္ဘာ၏ အပြင်ဘက်တွင် အချိန်စွမ်းအားကို ထိုအဆင့်အထိ လေ့ကျင့်ထားနိုင်သောကြောင့် အလွန်အံ့အားသင့်ဖွယ်ကောင်းသည်။

ထိုလူမျိုးကို သေဆုံးမသွားခဲ့လျှင် နတ်ဘုရားဘုရင်တစ်ပါး ဖြစ်လာလိမ့်မည်။

ဟန်မူယဲ့အပေါ်တွင်ရှိသော အမြင်သည် ချက်ချင်း ပြောင်းလဲသွားသည်။

ကောင်းကင်အံ့ဖွယ်ကမ္ဘာ၏ အမတ်ချုပ်ကြီးဟန်သည် အမှန်တကယ်ပင် ထူးခြားသည်။

ဟန်မူယဲ့က တည်ငြိမ်သောမျက်နှာထားဖြင့် ဓားကိုင်ထားလျက် မတ်တပ်ရပ်နေသည်။

သူ့ကို ဝိုင်းရံထားသော ကျွမ်းကျင်သူများက သွေးဆုတ်သွားပြီး တစ်ကိုယ်လုံး တုန်ခါနေကြသည်။

‘ငါတို့က ဒီမှာ ဘာလုပ်နေကြတာလဲ’