အခန်း (၇၃၉)

ယခုအချိန်တွင် ရှေ့တန်းတိုက်ပွဲသည် အင်မော်တယ်ဝိညာဉ်ကမ္ဘာ၏ ပျက်စီးမှုနှင့် အဆုံးသတ်လိမ့်မည်။

အကယ်၍ အားကောင်းသောကျင့်ကြံသူများသည် အင်မော်တယ်ဝိညာဉ်ကမ္ဘာတွင် ရှိနေလျှင်ပင် သူတို့က အခြေအနေကို တည်ငြိမ်အောင် ထိန်းသိမ်းရုံသာ တတ်နိုင်ကြလိမ့်မည်။

ထို့အပြင် တန့်ဝူယိုက ကျဆုံးသွားသောကြောင့် အင်မော်တယ်ဝိညာဉ်ကမ္ဘာ၏ စစ်တပ်ကို ဦး‌‌ဆောင်မည့်လူ မရှိတော့ပေ။ သူတို့က ခံစစ်ကို ပြန်လည်တည်ဆောက်နိုင်မည် မဟုတ်ပေ။

“ကောင်းကင်အံ့ဖွယ်ကမ္ဘာကို လက်လျော့လိုက်ရမယ်လို့ ပြောချင်တာလား”

ဟန်မူယဲ့က ရှေ့သို့ကြည့်လိုက်ပြီး ညင်သာစွာပြောသည်။

အင်မော်တယ်ဝိညာဉ်ကမ္ဘာ၏ မဟာကျင့်ကြံသူအများအပြားသည် ကောင်းကင်အံ့ဖွယ်ကမ္ဘာကို လာရောက်တိုက်ခိုက်ကြသည်။ တန့်ဝူယိုက ကျဆုံးသွားလျှင်ပင် သူတို့က လက်လျော့မည်မဟုတ်ပေ။

ဟန်မူယဲ့ကို သတ်ဖြတ်ပြီး ကောင်းကင်အံ့ဖွယ်ကမ္ဘာကို သိမ်းပိုက်နိုင်လျှင် တန့်ဝူယို၏ ကျဆုံးမှုကြောင့် ဖြစ်ပေါ်လာသော အကျိုးဆက်ကို ချေဖျက်နိုင်လိမ့်မည်။

ထိုသို့ဖြင့် အထက်ဘုံသုံးပါးမှ ကျွမ်းကျင်သူအများစုနှင့် ဖွဲ့စည်းထားသော ထိုကျင့်ကြံသူများသည် အင်မော်တယ်ဝိညာဉ်ကမ္ဘာကို ထိန်းချုပ်နိုင်ကြလိမ့်မည်။

“ဟုတ်ပါတယ်။ ကောင်းကင်အံ့ဖွယ်ကမ္ဘာကို စွန့်ပစ်ပြီး ဖြစ်နိုင်သမျှ ဆုတ်ခွာရပါမယ်။ ရှေ့တန်းစစ်တပ်နဲ့ ပူးပေါင်းနိုင်ရင် ဒီစစ်ပွဲကို ရှုံးတော့မှာမဟုတ်ပါဘူး”

ရှုဝေက ရပ်တန့်လိုက်ပြီး တီးတိုးပြောသည်။

“အမတ်ချုပ်ကြီးဟန်က သေသွားလို့မဖြစ်ပါဘူး”

“ငါသေလို့မရဘူးဆိုတော့ တခြားလူတွေသေသွားရင် ဖြစ်တယ်ပေါ့”

ဟန်မူယဲ့က ညင်သာစွာပြောသည်။

ရှုဝေက တိတ်ဆိတ်နေသော်လည်း မျက်နှာထားက ခိုင်မာနေသည်။

“ကောင်းကင်အံ့ဖွယ်ကမ္ဘာက မရေမတွက်နိုင်တဲ့ သက်ရှိတွေအတွက် အိမ်ပဲ။ သာမန်လူတွေရဲ့အသက်က အရေးမပါဘူးလား”

ဟန်မူယဲ့က ခေါင်းခါသည်။

“အဲဒီလိုဆိုရင် ငါတို့က အဲဒီလူတွေနဲ့ ဘာကွာတော့မှာလဲ”

ရှုဝေက စကားမပြောပေ။

လူတစ်ယောက်က ရွေးချယ်ပြီးလျှင် လွယ်ကူစွာ ပြောင်းလဲသွားမည်မဟုတ်ပေ။

ထို့အပြင် ဟန်မူယဲ့က ဓားကျင့်ကြံသူတစ်ယောက် ဖြစ်သည်။

ဓားကျင့်ကြံသူတစ်ယောက်၏ အတွေးကို ပြောင်းလဲလိုလျှင် ဓားကို ချိုးဖျက်ရမည်။

“အမတ်ချုပ်ကြီးက နောက်မဆုတ်ချင်ဘူးဆိုရင် ကောင်းကင်အံ့ဖွယ်ကမ္ဘာမှာရှိတဲ့ ကြယ်တွေရဲ့စွမ်းအားကို စုစည်းလိုက်ပါ။ ယုံကြည်မှုစွမ်းအားတွေ အားလုံးကို စုစည်းလိုက်ပါ”

ရှုဝေက တိတ်ဆိတ်နေပြီး တည်ငြိမ်စွာ ဆက်ပြောသည်။

“ကောင်းကင်နဲ့မြေကြီးကို စတေးလိုက်ပါ”

“အားလုံးက သေရမှာပါပဲ”

အဆုံးတွင် စတေးမှုကို ပြုလုပ်ရန် လိုအပ်သည်။

သို့သော် ထိုစတေးခြင်းသည် မတူညီပေ။

တစ်ခုသည် ပေးအပ်ခြင်းဖြစ်ပြီး တစ်ခုသည် ယဇ်ပူဇော်ခြင်း ဖြစ်သည်။

ဟန်မူယဲ့က ရှုဝေကို လှည့်ကြည့်သည်။

ရှုဝေက စတေးရန် ပြင်ဆင်ထားသောကြောင့် သူကိုယ်တိုင်နှင့် စတင်လိမ့်မည်။

သူက ဟန်မူယဲ့ကို ကြည့်လိုက်ပြီး တီးတိုးပြောသည်။

“အမတ်ချုပ်ကြီးဟန်၊ ကျေးဇူးပြုပြီး ဆုံးဖြတ်ပေးပါ”

သူက တီးတိုးပြောသည်။

“အမတ်ချုပ်ကြီးဟန်က ရွေးချယ်မှုမလုပ်နိုင်ဘူးဆိုရင် ကိုယ်စား အမိန့်ထုတ်ပြန်ပေးပါမယ်”

သူက သေခြင်းရှင်ခြင်းကို ဂရုမစိုက်ပေ။

ရှုဝေသည် ထိုသို့ပင် ဖြစ်သည်။ အခက်အခဲနှင့် ရင်ဆိုင်ရသောအခါတွင် သေခြင်းရှင်ခြင်းကို ဂရုမစိုက်တော့ပေ။

ယခင်က ယုံတင်းမြစ်ပေါ်တွင် သူက ကျင့်ကြံခြင်းကို ဂရုမစိုက်ဘဲ လွယ်ကူစွာ လက်လျော့ခဲ့သည်။

သူ့စိတ်သည် ပြတ်သားနေသ၍၊ စတေးမှုသည် ထိုက်တန်သ၍ သူက တုံ့ဆိုင်းနေမည်မဟုတ်ပေ။

သူသည် နွယ်စိမ်းရှုဝေ ဖြစ်သည်။

“သခင်နွယ်စိမ်း၊ တာအိုပြိုင်ပွဲက အသက်ရှင်ဖို့အတွက် တိုက်ခိုက်ရတာပဲ။ တကယ်လို့ ကောင်းကင်အံ့ဖွယ်ကမ္ဘာမှာရှိတဲ့ သက်ရှိတွေကို စတေးလိုက်မယ်ဆိုရင် ဘာအတွက် တိုက်ခိုက်နေတော့မှာလဲ”

ဟန်မူယဲ့က ရှုဝေကို ကြည့်လိုက်ပြီး ညင်သာစွာ ပြောသည်။

‘ဘာလို့တိုက်ခိုက်နေမှာလဲ’

‘တာအိုပြိုင်ပွဲရဲ့ စွမ်းအားတွေကို ရရှိဖို့လား’

မရေမတွက်နိုင်သော အသက်များကို စတေးပြီး ကိုယ်ပိုင်ကျင့်ကြံခြင်းကို မြှင့်တင်မည်။ ဟန်မူယဲ့က ထိုကိစ္စမျိုးကို မလုပ်နိုင်ပေ။

သူက သက်ရှိများကို ကာကွယ်ရန်အတွက် တာအိုပြိုင်ပွဲတွင် ဝင်ပါခဲ့သည်။

သူက အဝေးတစ်နေရာတွင်ရှိသော အာကာသကို လှမ်းကြည့်သည်။ အင်မော်တယ်ဝိညာဉ်စစ်တပ်သည် ပြန်လည်စုစည်းလာပြီး ချီစွမ်းအင်ဖြင့် ကောင်းကင်နှင့်မြေကြီးကို အလင်းပေးသည်။

အင်မော်တယ်ဝိညာဉ်စစ်တပ်သည် ထပ်မံတိုက်ခိုက်လာသည်။

ဟန်မူယဲ့က ဓားအလင်းများကို ထုတ်လွှတ်၍ ဖြည်းဖြည်းချင်း လက်မြှောက်သည်။

သူက ကောင်းကင်အံ့ဖွယ်ကမ္ဘာကို ပြန်ကြည့်သည်။

“တာအိုပြိုင်ပွဲကို စတင်လိုက်ပြီဆိုမှတော့ ဝှက်ဖဲတချို့ ရှိသင့်တယ်လို့ မထင်ဘူးလား”

သူက တီးတိုးပြောလိုက်ပြီး ဓားကို ဝှေ့ယမ်းသည်။

တည်နေရာစွမ်းအား ....

ဓားအလင်းသည် မရေမတွက်နိုင်သော မိုင်ပေါင်းများစွာကို ဖြတ်ကျော်၍ ကောင်းကင်အံ့ဖွယ်ကမ္ဘာ၏ အနောက်ဘက်နယ်စပ်ကုန်းမြေတွင်ရှိသော တိမ်မြုံကမ်းပါးတွင် ဆင်းသက်သွားခဲ့သည်။

“ဘုန်း”

တိမ်မြုံကမ်းပါးသည် ပေါက်ကွဲသွားပြီး အနက်ရောင်ဝဲကတော့တစ်ခု ပေါ်ထွက်လာသည်။

အာကာသလမ်းကြောင်း ဖြစ်သည်။

ထိုအာကာသလမ်းကြောင်းသည် ရှေးတိမ်တိုက်စကြဝဠာနှင့် ဆက်သွယ်နေသည်။ ယခင်က သူကိုယ်တိုင်ပိတ်ခဲ့သော အာကာသလမ်းကြောင်းကို ယခုအချိန်တွင် သူကိုယ်တိုင် ပြန်ဖွင့်လိုက်သည်။

“ဝီ”

မရေမတွက်နိုင်သော ပုံရိပ်များသည် အာကာသလမ်းကြောင်းထဲတွင် ဝင်္ကပါများကို ဖွဲ့စည်းလိုက်ကြသည်။

စစ်တပ်ဝင်္ကပါများ ဖြစ်ကြသည်။

နတ်ဘုရားဘုရင်ချီယန် ဦးဆောင်ထားသော ဓားဝင်္ကပါများသည် တစ်ခုပြီးတစ်ခု ကောင်းကင်အံ့ဖွယ်ကမ္ဘာသို့ ဝင်ရောက်လာကြသည်။

“ကောင်းကင်ရင်းမြစ်ကမ္ဘာ၊ ဟားဟား။ အတော်ကြာသွားပြီပဲ ....”

ကောင်းကင်ထက်မှ ဆင်းသက်လာသော နတ်ဘုရားဘုရင်ချီယန်သည် ပတ်ဝန်းကျင်ကို ကြည့်လိုက်ပြီး တီးတိုးပြောသည်။

သူ့နောက်တွင် ချီယန်ဓားဂိုဏ်း၏ ဓားဝင်္ကပါများသည် ကောင်းကင်ထက်တွင် တည်ရှိနေကြသည်။

သန်းဆယ်ချီနေသည်။

သန်းဆယ်ချီသော ဓားကျင့်ကြံသူများ၏ နောက်တွင် ဆိုးယုတ်သောအငွေ့အသက်နှင့် မိစ္ဆာဝင်္ကပါများကို မြင်ရသည်။

ဘိုးဘေးမိစ္ဆာကြယ်၏ မိစ္ဆာဝင်္ကပါများ ဖြစ်ကြသည်။

ကောင်းကင်သည် စစ်တပ်ဝင်္ကပါများဖြင့် ပြည့်နှက်သွားသည်။

“ဝီ”

အာကာသလမ်းကြောင်းသည် အသံပေးလိုက်ပြီး တုန်ခါနေသည်။ အနောက်ဘက်နယ်စပ်ကုန်းမြေသည် တုန်လှုပ်သွားသည်။

အားကောင်းလှသော သွေးနှင့်ချီစွမ်းအင်သည် အာကာသလမ်းကြောင်းထဲမှ ပေါ်ထွက်လာသည်။

ရွှေရောင်ချပ်ဝတ်စစ်တပ်သည် ကောင်းကင်အံ့ဖွယ်ကမ္ဘာတွင် ခြေချလိုက်သည်။

အဖြူရောင်ဆံပင်များနှင့် ရွှေရောင်ချပ်ဝတ်ကို ဝတ်ထားသော လူအိုကြီးတစ်ယောက်သည် ထိုစစ်တပ်ဝင်္ကပါများ၏ ရှေ့တွင် ရှိနေသည်။

“ချောင်ရီ”

အာကာသထဲတွင် ထိတ်လန့်သွားသောအသံကို ကြားနိုင်သည်။

“ဟားဟား၊ ဒီလူအိုကြီးကို မှတ်မိတဲ့လူတွေ ရှိနေသေးတာပဲ”

ဆံပင်ဖြူလူအိုကြီးက အေးစက်စွာရယ်လိုက်ပြီး ခေါင်းမော့ကြည့်သည်။

“မင်းတို့က သားသတ်သမားချောင်ကို မှတ်မိတာလား ဒါမှမဟုတ် ဦးရီးတော်ချောင်ရီကို မှတ်မိတာလား”

သူ့အသံသည် ကောင်းကင်ထက်တွင် ပဲ့တင်ထပ်သွားခဲ့သည်။

လေဟာနယ်သည် တုန်ခါသွားသည်။

သို့သော် တုံ့ပြန်သံ ထွက်မလာခဲ့ပေ။

ထိုမဟာပုဂ္ဂိုလ်ကြီးများသည် ဓားဘုရင်ယွမ်ထျန်း၏ ဓားချက်ကြောင့် ထိတ်လန့်နေပြီး ကိုယ်ထင်မပြရဲကြတော့ပေ။

ချောင်ရီက ခေါင်းခါလိုက်ပြီး နှာမှုတ်သည်။

“မင်းတို့အားလုံးက ငကြောက်တွေပဲ”

“နတ်ဘုရားခုံရုံး ပျက်စီးသွားတဲ့အချိန်မှာ ဒီဦးရီးတော် ရှိနေခဲ့ရင် မင်းတို့အားလုံးကို ခွေးတွေလိုမျိုး သတ်ပစ်လိုက်ပြီ”

သူက လက်ကို ဝှေ့ယမ်းလိုက်သောအခါတွင် မရေမတွက်နိုင်သော စစ်သည်များသည် ကောင်းကင်၏အပြင်ဘက်သို့ ချီတက်သွားကြသည်။

စစ်တပ်ဝင်္ကပါများ၏ သွေးချီနှင့် ချီစွမ်းအင်သည် ရွှေကျားများအဖြစ် ပြောင်းလဲသွားကြသည်။

ထိုစစ်တပ်ဝင်္ကပါများ၏ စွမ်းအားသည် ကောင်းကင်နှင့်မြေကြီးကို ဖိနှိပ်လိုက်ပြီး လေဟာနယ်အက်ကွဲကြောင်းများကို ဖြစ်ပေါ်လာစေသည်။

တာအိုပြိုင်ပွဲကို စောင့်ကြည့်နေသော တာအိုဘိုးဘေးများက အစွမ်းကုန်သုံးပြီး လောကကို မပျက်စီးအောင် ထိန်းသိမ်းလိုက်ကြသည်။

ချောင်ရီ၏မျက်နှာထားက တည်ငြိမ်နေပြီး ဟန်မူယဲ့၏ဘေးသို့ ရောက်လာသည်။

“ကောင်လေး၊ မင်းက ငါ့ကို ဧကရာဇ်နဲ့ တွေ့ပေးမယ်လို့ ပြောခဲ့တယ်မဟုတ်လား”

ချောင်ရီက သွေးချီများကို ထုတ်လွှတ်နေသည်။

ဟန်မူယဲ့က ခေါင်းညိတ်လိုက်ပြီး လက်ကို ဝှေ့ယမ်းသည်။

“ဦးရီးတော်က စိတ်ပူစရာမလိုပါဘူး။ ကောင်းကင်အံ့ဖွယ်ကမ္ဘာကို ဖိတ်ခေါ်လိုက်မှတော့ ဧကရာဇ်နဲ့ တွေ့ရမှာပါ”

ချောင်ရီ၏ မျက်လုံးများက တောက်ပသွားကြသည်။ သူက ခေါင်းညိတ်လိုက်ပြီး ရှေ့သို့ ကြည့်သည်။

ယခုအချိန်တွင် အထက်ဘုံသုံးပါး၏ ကျွမ်းကျင်သူများသည် နောက်ဆုတ်သွားကြသည်။

သူတို့၏ အလစ်တိုက်ခိုက်မှုသည် ထိပ်တိုက်ရင်ဆိုင်မှုအဖြစ် ပြောင်းလဲသွားခဲ့သည်။ သူတို့က အဆုံးမရှိသောစစ်တပ်နှင့် ရင်မဆိုင်ချင်ကြပေ။

လူအများအပြားက ဆည်အပြင်ဘက်မှ ရောက်လာသော စစ်တပ်များကို မှတ်မိလိုက်ကြသည်။

အင်မော်တယ်ရင်းမြစ်ကမ္ဘာနှင့် ဆည်ပြင်ပရှိ အင်အားစုများ၏ စစ်ပွဲသည် တစ်ကြိမ်နှစ်ကြိမ်သာ မကပေ။

ဆည်ပြင်ပစစ်တပ်၏ ခွန်အားကို ကောင်းကင်းရင်းမြစ်ကမ္ဘာက မကိုင်တွယ်နိုင်ပေ။

မဟာပုဂ္ဂိုလ်ကြီးများနှင့် ဆည်၏ အတားအဆီးကြောင့်သာ မဟုတ်လျှင် ရှေးတိမ်တိုက်စကြဝဠာ၏ စစ်တပ်သည် အင်မော်တယ်ရင်းမြစ်ကမ္ဘာကို အချိန်ကြာမြင့်စွာ ကျူးကျော်နိုင်ခဲ့လိမ့်မည်။

ထို့အပြင် ယခုအချိန်တွင် ခေါင်းဆောင်များထဲမှ တစ်ယောက်သည် ရှေးခေတ်အချိန်တွင် လောကကို ဖိနှိပ်ခဲ့သော ချောင်ရီ ဖြစ်သည်။

ဦးရီတော်ချောင်ရီသည် စစ်တပ်ကို အမိန့်ပေးပြီး နှစ်ပေါင်းများစွာကြာအောင် အင်မော်တယ်ရင်းမြစ်ကမ္ဘာကို ကျူးကျော်ခဲ့သည်။ ထို့ဖြစ်ရပ်ကြောင့် အင်မော်တယ်ရင်းမြစ်ကမ္ဘာက ဆုံးရှုံးမှုများကို ခံစားခဲ့ရသည်။

ထို့ကြောင့် သူက သားသတ်သမားချောင်ဟူသော နာမည်ကို ရလာခဲ့သည်။

အလစ်တိုက်ခိုက်လာသော အင်မော်တယ်ဝိညာဉ်စစ်တပ်သည် ရွေးချယ်စရာမရှိဘဲ လျင်မြန်စွာ နောက်ဆုတ်သွားရသည်။

ထိုကျွမ်းကျင်သူများကို ကောင်းကင်အံ့ဖွယ်ကမ္ဘာတွင် ရှိနေသော စစ်တပ်များက လိုက်မဖမ်းနိုင်ကြပေ။

သူတို့က စစ်တပ်ကို အားကိုး၍ ထိုကျွမ်းကျင်သူများနှင့် တိုက်ခိုက်နိုင်သော်လည်း လိုက်ဖမ်းမည်ဆိုလျှင် သေလမ်းရှာနေခြင်းသာ ဖြစ်သွားလိမ့်မည်။

ချောင်ရီကပင် လိုက်ဖမ်းရန် မပြောခဲ့ပေ။

လိုက်ဖမ်းရန်လည်း မလိုအပ်ပေ။

တာအိုပြိုင်ပွဲသည် အလုံးစုံအခြေအနေကိုသာ ကြည့်သည်။

သူတို့က အနိုင်ရပြီးသားဖြစ်သည်။ အဘယ်ကြောင့် လိုက်ဖမ်းရမည်နည်း။

ဆယ်ရက်အကြာတွင် ရှေ့တန်းက သတင်းပို့လိုက်သည်။ ဟွမ်ခြောက်နှင့် ကျောက်ကျန့်ဟယ်သည် ပူးပေါင်းပြီး အင်မော်တယ်ဝိညာဉ်ကြယ်ကို ဖျက်ဆီးနိုင်ခဲ့သည်။

ထောင်ချီသောကြယ်များကို ပိုင်ဆိုင်ထားသည့် လောကတစ်ခု၏ အဓိကကြယ်သည် ကျွမ်းကျင်သူနှစ်ဦး၏ ပူးပေါင်းမှုကြောင့် ပျက်စီးသွားခဲ့သည်။

အင်မော်တယ်ဝိညာဉ်ကြယ်က ပျက်စီးသွားသောအခါတွင် ဟွမ်ကျစ်ဟူကို ဝိုင်းရံတိုက်ခိုက်နေသော စစ်တပ်က အောင်မြင်မှုမရှိဘဲ နောက်ဆုတ်သွားရသည်။

သန်းဆယ်ချီသော ဓားကျင့်ကြံသူများသည် ဓားဆေးလုံးတစ်လုံးစီကို ပိုင်ဆိုင်ထားကြသည်။ သူတို့က အဆပေါင်းများစွာ ပိုမိုအားကောင်းသော စစ်တပ်၏ ဝိုင်းရံတိုက်ခိုက်ခြင်းကို ခံခဲ့ရသော်လည်း သူတို့၏ တိုက်ခိုက်လိုစိတ်များသည် ကျိုးပျက်မသွားခဲ့ကြပေ။

နောက်ပိုင်းတွင် ကောင်းကင်အံ့ဖွယ်ကမ္ဘာ၏ ရှေ့တန်းစစ်တပ်က အင်မော်တယ်ဝိညာဉ်စစ်တပ်ကို ဝိုင်းရံထားလိုက်သည်။

ကောင်းကင်အံ့ဖွယ်စစ်တပ်သည် အင်မော်တယ်ရတနာနှစ်ခုကို ဖောက်ခွဲပြီး အင်မော်တယ်ဝိညာဉ်စစ်တပ်၏ ဒါဇင်ချီနေသော စစ်တပ်ဝင်္ကပါများကို ပျက်စီးသွားစေခဲ့သည်။ များပြားလှသော ကျွမ်းကျင်သူများကလည်း မသေဆုံးလျှင် ဒဏ်ရာရသွားကြသည်။

အင်မော်တယ်ဝိညာဉ်စစ်တပ်သည် ရွေးချယ်စရာမရှိဘဲ နောက်ဆုတ်လိုက်ရပြန်သည်။

ထိုအချိန်တွင် တန့်ဝူယို ကျဆုံးသွားခဲ့သော သတင်းသည် ပျံ့နှံ့လာခဲ့သည်။

အင်မော်တယ်ဝိညာဉ်စစ်တပ်သည် တိုက်ခိုက်လိုစိတ် ပျောက်ဆုံးသွားပြီး အပြည့်အဝ ရှုံးနိမ့်သွားခဲ့သည်။

ကောင်းကင်အံ့ဖွယ်ကမ္ဘာမှ ဆုတ်ခွာသွားသော အထက်ဘုံသုံးပါး၏ ကျင့်ကြံသူများသည် ဝိုင်းရံတိုက်ခိုက်နေသော ကောင်းကင်အံ့ဖွယ်စစ်တပ်ကို ချိုးဖောက်ပြီး ရှုံးနိမ့်သွားသော အင်မော်တယ်ဝိညာဉ်စစ်တပ်ကို စုစည်းရုံသာ တတ်နိုင်ခဲ့သည်။ သူတို့က အင်မော်တယ်ဝိညာဉ်ကြယ်ပေါ်မှ ထွက်ပြေးသွားသော ကျင့်ကြံသူများကိုလည်း စုစည်းခဲ့ကြသည်။