အခန်း (၇၄၁)

ဒါဇင်ချီနေသော ပုံရိပ်များသည် အင်မော်တယ်ဝိညာဉ်ကမ္ဘာမှ ပျံသန်းထွက်လာကြသည်။

နတ်ဘုရားခုံရုံးရတနာတိုက်၏ ဖွင့်ပွဲကြောင့် ဖြစ်ပေါ်လာသော ကြားနေနယ်မြေတွင်လည်း လူတစ်ရာခန့်သည် ပြေးထွက်လာကြသည်။

“သူတို့အားလုံးက ကောင်းကင်နဲ့မြေကြီးစာရင်းမှာ ရှိနေကြတဲ့ ကျွမ်းကျင်သူတွေပဲ”

ထိုလူများကို ကြည့်လိုက်ပြီး လူတစ်ယောက်က ရေရွတ်သည်။

“ဟန်မူယဲ့က ကောင်းကင်စာရင်းရဲ့ အဆင့်ကိုးမှာ ရှိနေတယ်။ ပြီးတော့ နတ်ဘုရားသားရဲကိုယ်ပွားလည်း ရှိနေတယ်။ ကောင်းကင်နဲ့မြေကြီးစာရင်းမှာ ရှိနေကြတဲ့ ကျွမ်းကျင်သူတွေ ရောက်လာရင်တောင် အသုံးမဝင်ဘူး”

လူတစ်ယောက်က လျင်မြန်စွာနီးကပ်လာသော နတ်ဘုရားသားရဲကိုယ်ပွားနှင့် ဟန်မူယဲ့၏ မူလခန္ဓာကို ကြည့်လိုက်ပြီး တီးတိုးပြောသည်။

ဟန်မူယဲ့၏ မူလခန္ဓာကိုယ်နှင့် ကိုယ်ပွားက ပေါင်းစပ်သွားပြီး အာကာသကပ်ဘေးကို ကျော်ဖြတ်၍ သူတော်စင်အဆင့်သို့ ဝင်ရောက်ခဲ့မည်ဆိုလျှင် သူ၏ တိုက်ခိုက်နိုင်စွမ်းသည် အဆတစ်ရာခန့်အထိ တိုးသွားလိမ့်မည်။

ဟန်မူယဲ့က သူတော်စင်အဆင့်သို့ ရောက်သွားလျှင် တာအိုပြိုင်ပွဲနယ်မြေတွင် ပြိုင်ဘက်ကင်းသွားနိုင်သည်။

“လာပြီ”

အနက်ရောင်ဝတ်စုံနှင့် တာအိုတန်ခိုးရှင်တစ်ယောက်သည် မူလခန္ဓာ၏လမ်းကို ပိတ်ထားသည်။

ထိုတာအိုတန်ခိုးရှင်က သွေးအငွေ့အသက်များကို ထုတ်လွှတ်နေပြီး မိစ္ဆာနည်းစနစ်များကို ကျင့်ကြံထားပုံပေါ်သည်။

“ငါလုပ်လိုက်မယ်”

အသံတစ်ခုနှင့်အတူ အစိမ်းရောင်ဝတ်စုံနှင့် မော့ယွမ်သည် ဓားတစ်လက်ကိုင်လျက် ရှေ့တက်လာသည်။

“မင်းနဲ့ငါက ဆရာတပည့်ဆက်ဆံရေးကို ဝေမျှထားခဲ့တယ်။ ဒီတိုက်ပွဲပြီးသွားရင် ငါက မင်းနေရာကို ယူလိုက်မယ်”

မော့ယွမ်က ညင်သာစွာပြောသည်။ သူ့ဓားသည် မရေမတွက်နိုင်သော ဓားများအဖြစ် ချက်ချင်းပြောင်းလဲသွားပြီး အနက်ရောင်ဝတ်စုံနှင့် တာအိုတန်ခိုးရှင်ကို တိုက်ခိုက်လိုက်သည်။

သူ၏ အငွေ့အသက်များသည် ဆက်တိုက်စုစည်းနေပြီး ပေါက်ကွဲထွက်သွားမည့်ပုံ ပေါ်သည်။

အနက်ရောင်ဝတ်စုံနှင့် တာအိုတန်ခိုးရှင်သည် အာရုံစိုက်ထားပြီး လက်မြှောက်၍ ဓားအလင်းကို ခုခံသည်။

ဟန်မူယဲ့က သူတို့နှစ်ယောက်၏ တိုက်ပွဲမှ လျင်မြန်စွာ ထွက်လာခဲ့သည်။

ကောင်းကင်အံ့ဖွယ်ကမ္ဘာတွင် ပုံရိပ်များသည် လှုပ်ရှားလာကြသည်။

ကောင်းကင်အံ့ဖွယ်ကမ္ဘာသည် တာအိုပြိုင်ပွဲနယ်မြေ၏ ၉၀%ခန့်ကို အပိုင်သိမ်းထားသည်။ နေရာအသီးသီးမှ အားကောင်းသော ကျင့်ကြံသူများသည် လှုပ်ရှားလိုက်ကြပြီး ဟန်မူယဲ့အား တားဆီးချင်သည့် လူများကို တိုက်ခိုက်လိုက်ကြသည်။

ကြားနေနယ်မြေတွင် မ‌ရေမတွက်နိုင်သောလူများသည် ပျံသန်းထွက်လာကြသည်။

“ငါတို့က တာအိုပြိုင်ပွဲမှာ ဝင်မပါပေမဲ့ ကောင်းကင်အံ့ဖွယ်ကမ္ဘာရဲ့ အမတ်ချုပ်ကြီးဟန်က ငါတို့ပုန်းအောင်းပြီး ကျင့်ကြံနိုင်ဖို့အတွက် ဒီနယ်မြေကို ဖန်တီးပေးခဲ့တယ်”

“ငါတို့က အဲဒီကျေးဇူးကို မေ့ပစ်လိုက်လို့ မဖြစ်ဘူး”

ဓားကျင့်ကြံသူတစ်ယောက်က ဓားတစ်လက်ကို တင်းကျပ်စွာဆုပ်ကိုင်ထားပြီး ဟန်မူယဲ့အား တားဆီးရန်ကြိုးစားနေသော ပုံရိပ်များဆီသို့ ပြေးဝင်သွားခဲ့သည်။

တခြားလူများကလည်း ရဲရင့်စွာ တိုက်ခိုက်လိုက်ကြသည်။

ဟန်မူယဲ့ကို တားဆီးရန် ကြိုးစားနေသော လူများသည် ကျွမ်းကျင်သူများပင် ဖြစ်လိမ့်မည်။ သို့သော် အရပ်မျက်နှာအသီးသီးမှ တခြားလူများက အချိန်ဆွဲပေးရန်အတွက် သူတို့ဆီသို့ ပြေးဝင်လာကြသည်။

ထိုအချိန်တွင် လူတစ်ဒါဇင်ခန့်ကသာ ဟန်မူယဲ့ဆီသို့ ဆက်ပြေးလာနိုင်ကြသည်။

သူတို့အားလုံးသည် ကောင်းကင်စာရင်းတွင် အဆင့်မြင့်ကြသည်။

ယွီလင်တာအိုနန်းတော်၏ စွန်းကျိုးရှန့် ....

တိမ်တိုက်ဖြူဘုရားကျောင်း၏ တာအိုသခင် ယွင်လင်း ....

ဓားသုံးလက်ဂိုဏ်း၏ ရွှမ်မူယွဲ့ ....

....

အစစ်အမှန် ကျွမ်းကျင်သူများကို အစစ်အမှန် ကျွမ်းကျင်သူများကသာ ရင်ဆိုင်နိုင်ကြသည်။

ကံကောင်းစွာဖြင့် ကောင်းကင်အံ့ဖွယ်ကမ္ဘာသည်လည်း သန်မာသူများကို ပိုင်ဆိုင်ထားခဲ့သည်။

ဟွမ်ခြောက်သည် လောကတည်ငြိမ်ခြင်းမြေပုံကို ကိုင်ထားပြီး ကောင်းကင်စာရင်း၏ ထိပ်တန်းအဆင့် ကျင့်ကြံသူသုံးဦးကို တားဆီးနေသည်။

ကျောက်ကျန့်ဟယ်သည် နတ်ဘုရားဧကရာဇ်၏ဓားကျိုးကို ကိုင်ထားပြီး မျက်နှာမဲ့စစ်သည်များကို ထိန်းချုပ်၍ ကျွမ်းကျင်သူနှစ်ဦးကို ဝိုင်းရံထားသည်။

“ဒီလမ်းကို တားဆီးလိုက်ပြီ”

ကျောင်းတော်သားဝတ်စုံနှင့် ယန်ကျန်းချင်က စုတ်တံတစ်ချောင်းကို ကိုင်ထားပြီး လက်ကို ဝှေ့ယမ်းလိုက်သည်။ မင်ရည်သည် ကောင်းကင်နှင့်မြေကြီးတွင် စွန်းထင်သွားခဲ့သည်။ သူ့နောက်တွင် နတ်ဘုရားအမည်စာရင်းသည် တောက်ပနေသည်။

“လောကမှာ ပြည့်နှက်နေတဲ့ ချီစွမ်းအင်တွေ ....”

နတ်ဘုရားအလင်းကို ထုတ်လွှတ်နေသော ဟွမ်တင်းရှုက မင်ရည်ကို တိမ်တိုက်နှင့် မက်မွန်ပင်များအဖြစ် ပြောင်းလဲလိုက်သည်။ မက်မွန်ပင်များသည် ပွင့်လန်းလာပြီး ကောင်းကင်နှင့်မြေကြီးကို လွှမ်းခြုံလိုက်ကြသည်။

“အမတ်ချုပ်ကြီးဟန်ကို တားဆီးချင်ရင် ငါ့လက်ထဲမှာရှိတဲ့ ဓားကို အရင်မေးကြည့်လိုက်”

ချင်စုယန်၏ဓားသည် ထက်မြိသောအသံနှင့် ကောင်းကင်နှင့်မြေကြီးကို ထိုးခွဲသွားသည်။

သူက ဓားတာအိုဖြင့် သူတော်စင်တစ်ပါး ဖြစ်လာခဲ့သည်။ ယခုအချိန်တွင် ချင်စုယန်သည် အာခီမီ၊ ကွန်ဖြူးရှပ်တာအိုနှင့် ဓားတာအို၏ သူတော်စင် ဖြစ်သည်။ သူက အလွန်သန်မာပြီး နယ်မြေတစ်ခုကို ဖိနှိပ်နိုင်သည်။

ကောင်းကင်အံ့ဖွယ်ကမ္ဘာ၏ ကျွမ်းကျင်သူများသည် အာကာသထဲတွင် တစ်ယောက်ပြီးတစ်ယောက် ပေါ်လာကြပြီး ဟန်မူယဲ့ကို တားဆီးချင်သော ကျွမ်းကျင်သူများအား တိုက်ခိုက်လိုက်ကြသည်။

ဟန်မူယဲ့က တည်ငြိမ်သောမျက်နှာထားဖြင့် လျင်မြန်စွာ ပျံသန်းသွားသည်။

“ဘုန်း”

ပေတစ်ထောင်ရှည်လျားသောမြားသည် နတ်ဘုရားသားရဲပါ့ရှားဆီသို့ ပြေးဝင်လာသည်။

“ဘန်း”

မီးလုံးတစ်လုံးကို ကိုင်ထားသော ချီလင်သည် ထိုမြားကို ဖျက်ဆီးပစ်လိုက်သည်။

“ငါက ဒီမှာရှိနေတယ်”

ချီလင်က အာကာသ၏အတွင်းပိုင်းသို့ ကြည့်လိုက်ပြီး ပေါ့ပါးစွာ ပြောသည်။

အင်မော်တယ်ရတနာဖြစ်စေ နတ်ဘုရားဘုရင်ဖြစ်စေ ယနေ့တွင် တားဆီးခံရမည်။

အာကာသထဲတွင် မရေမတွက်နိုင်သော လူများက ပျံသန်းလာကြပြီး မရေမတွက်နိုင်သော လူများက တားဆီးလိုက်ကြသည်။

လျှပ်စီးကြောင်းများနှင့် ပြည့်နှက်နေသော ကောင်းကင်အောက်တွင် ဟန်မူယဲ့၏ မူလခန္ဓာနှင့် ကိုယ်ပွားသည် မိုင်ထောင်ချီကွာဝေးနေပြီး လူသုံးယောက်က လမ်းပိတ်ထားသည်။

ကောင်းကင်စာရင်းတွင် အဆင့်ငါးဖြစ်သော ယွီလင်တာအိုဂိုဏ်း၏ တာအိုသခင် သွမ်ယွင် ....

ကောင်းကင်စာရင်းတွင် အဆင့်ခြောက်ဖြစ်သော ရွှမ်လင်တာအိုဂိုဏ်း၏ ခေါင်းဆောင် တာအိုဘိုးဘေး မင်ရှန့် ....

ကောင်းကင်စာရင်းတွင် အဆင့်ခုနစ်ဖြစ်သော တိမ်တိုက်ဖြူဘုရားကျောင်း၏ ခေါင်းဆောင် တာအိုဘိုးဘေး ယွင်လင်း ....

အထက်ဘုံသုံးပါး၏ ကျွမ်းကျင်သူသုံးဦးသည် အလွန်သန်မာပြီး ကောင်းကင်စာရင်း၏ ထိပ်ဆုံးဆယ်ယောက်ထဲတွင် ရှိနေကြသည်။

သို့သော် သူတို့သုံးယောက်သာ မကပေ။

အာကာသထဲတွင် မှုန်ဝါးနေသော ပုံရိပ်နှစ်ခုလည်း ပေါ်လာခဲ့သည်။

ထိုပုံရိပ်နှစ်ခုသည် တာအိုပြိုင်ပွဲ၏စွမ်းအားကို တွန်းထုတ်လိုက်ပြီး ဗလာနယ်မြေနှင့် လေဟာနယ်ကြားတွင် ရပ်နေသည်။

သူတို့က တာအိုပြိုင်ပွဲတွင် ဝင်မပါဘဲ ဤနေရာတွင် ပေါ်လာနိုင်သောကြောင့် အနည်းဆုံး နတ်ဘုရားဘုရင်များ ဖြစ်နေကြလိမ့်မည်။

“ယွီလင်တာအိုနန်းတော်ရဲ့ မဟာအကြီးအကဲ နတ်ဘုရားဘုရင် ရှင်းတိ”

“လဝိညာဉ်တာအိုဂိုဏ်းရဲ့ ဒုဂိုဏ်းချုပ် နတ်ဘုရားဘုရင် မူရန်”

တာအိုပြိုင်ပွဲကို စောင့်ကြည့်နေသော တာအိုဘိုးဘေးများက အစွမ်းကုန်ထုတ်သုံး၍ တာအိုပြိုင်ပွဲနယ်မြေကို တည်ငြိမ်အောင် ကြိုးစားရုံသာ တတ်နိုင်ကြသည်။

အထက်ဘုံသုံးပါး၏ မဟာကျင့်ကြံသူနှစ်ယောက် ပေါ်လာ‌သောကြောင့် တာအိုပြိုင်ပွဲနယ်မြေသည် ပျက်စီးလုနီးပါး ဖြစ်လာသည်။

အကယ်၍ တာအိုပြိုင်ပွဲနယ်မြေ ပျက်စီးသွားခဲ့လျှင် သူတို့သည် တန်ပြန်စွမ်းအားကြောင့် သေဆုံးသွားနိုင်သည်။

နောက်ကွယ်တွင်ရှိနေသော နတ်ဘုရားဘုရင်များကလည်း ထိခိုက်သွားကြလိမ့်မည်။

“ဝီ”

ဓားအလင်းသည် ဟန်မူယဲ့ဆီသို့ ပြေးဝင်လာသည်။ တိမ်တိုက်ဖြူဘုရားကျောင်း၏ တာအိုဘိုးဘေး ယွင်လင်း ဖြစ်သည်။

ဟန်မူယဲ့က တိမ်တိုက်ဖြူဘုရားကျောင်း၏ ကျွမ်းကျင်သူများကို သတ်ဖြတ်ပစ်ခဲ့သည်။ သူတို့၏ရန်ငြိုးက အလွန်နက်ရှိုင်းနေသည်။

တာအိုဘိုးဘေးယွင်လင်း၏ ဓားသည် လေဟာနယ်စွမ်းအားကို ထုတ်လွှတ်နေသည်။ ဓားသွား၏ အင်မော်တယ်အလင်းသည် အဆုံးမရှိဘဲ ပုံရိပ်ယောင်ဆန်သည်။

“ဒီဓားချက်က မဆိုးဘူး။ ငါယူလိုက်မယ်”

နတ်ဘုရားဘုရင်ချီယန်က ဓားကို ဆွဲထုတ်ပြီး ဓားအလင်းနှင့် ရင်ဆိုင်လိုက်သည်။

ဟန်မူယဲ့က တည်ငြိမ်သောမျက်နှာထားဖြင့် ဓားအလင်းကို ရှောင်တိမ်း၍ မိုင်တစ်ရာအထိ ရှေ့တက်လာသည်။

ရွှေရောင်ပိုက်ကွန်သည် ဟန်မူယဲ့၏ကိုယ်ပေါ်သို့ ဆင်းသက်လာသည်။

ကောင်းကင်စာရင်းတွင် အဆင့်ခြောက်ဖြစ်သော ရွှမ်လင်တာအိုဂိုဏ်း၏ ခေါင်းဆောင် တာအိုဘိုးဘေး မင်ရှန့် ဖြစ်သည်။

တာအိုဘိုးဘေးသည် တာအိုနည်းစနစ်သည် အမှန်တကယ်ပင် ကျွမ်းကျင်သည်။

အလင်းပိုက်ကွန်ကို ဖန်တီးရန်အတွက် ကောင်းကင်နှင့်မြေကြီး၏ စွမ်းအားကို နှစ်တစ်သိန်းကြာအောင် စုစည်းခဲ့ရသည်။ ထိုပိုက်ကွန်သည် အချိန်မြစ်ထဲတွင် ရွေ့လျားနိုင်သော အင်မော်တယ်ရတနာတစ်ခု ဖြစ်သည်။

အလင်းပိုက်ကွန် ကျဆင်းမလာခင် ဟန်မူယဲ့၏ ဦးခေါင်းထက်တွင် မိစ္ဆာအလင်းသည် ပေါက်ကွဲသွားခဲ့သည်။

“ရတနာကောင်းပဲ။ ငါက ဒီလို မိစ္ဆာရတနာမျိုးကို ကြိုက်တယ်”

ဘိုးဘေးမိစ္ဆာ နတ်ဘုရားဘုရင်က ခပ်ဟဟရယ်လိုက်ပြီး မိစ္ဆာအလင်းကို ထုတ်လွှတ်သည်။

ယွီလင်တာအိုနန်းတော်၏ တာအိုသခင် သွမ်ယွင်သည် ရွှေရောင်ချိပ်တံဆိပ်တစ်ခုကို လက်နှစ်ဖက်ဖြင့် ကိုင်ထားပြီး နတ်ဘုရားသားရဲပါ့ရှားကို ကြည့်နေသည်။

“ရပ်စမ်း”

ရွှေရောင်ချိပ်တံဆိပ်သည် ပေသန်းချီကြီးမားသွားပြီး နတ်ဘုရားသားရဲပါ့ရှားကို ရိုက်ချသည်။

သို့သော် ရွှေရောင်ချိပ်တံဆိပ်သည် အောက်သို့ ကျဆင်းမလာနိုင်ခဲ့ပေ။

အစိမ်းရောင်နဂါးတစ်ကောင်သည် ပါ့ရှား၏ဦးခေါင်းထက်တွင် ပေါ်လာခဲ့သည်။ နဂါးက သွေးချီများကို ထုတ်လွှတ်၍ ဟိန်းဟောက်လိုက်သည်။

ကောင်းကင်အံ့ဖွယ်ကမ္ဘာ၏ မှူးမတ်ဝူဖြစ်သော ချန်ချင်းကျစ်သည် အစိမ်းရောင်နဂါး ဖြစ်သည်။ သူက ကောင်းကင်အား ဖျက်ဆီးနိုင်သည့် စွမ်းအားကို ပိုင်ဆိုင်ထားသည်။

ဟန်မူယဲ့၏ရှေ့ မိုင်ရှစ်ရာအကွာတွင် ပုံရိပ်နှစ်ခုသာ ကျန်တော့သည်။

သို့သော် သူတို့သည် ဤလောက၏ ထိပ်တန်းအဆင့် ကျွမ်းကျင်သူများဖြစ်သော အထက်ဘုံသုံးပါး၏ နတ်ဘုရားဘုရင်များပင် ဖြစ်ကြသည်။

သူတို့က နတ်ဘုရားအလင်းများကို ထုတ်လွှတ်၍ အင်မော်တယ်ရတနာများကို ပိုင်ဆိုင်ထားကြောင်း ပြသနေသည်။

ဟန်မူယဲ့က ထိုကျွမ်းကျင်သူများနှင့် ရင်ဆိုင်နိုင်မည်မဟုတ်ပေ။

“ကောင်းကင်စာရင်းရဲ့ နံပတ်တစ် ဝမ်မော့ရှန်က လှုပ်ရှားမှာလား”

တာအိုပြိုင်ပွဲကို စောင့်ကြည့်နေသော တာအိုဘိုးဘေးတစ်ယောက်က ပြောလိုက်သည်။

“ကောင်းကင်စာရင်းရဲ့ အဆင့်တစ်က အခုထိ မလှုပ်ရှားရသေးဘူး။ အခု လှုပ်ရှားမှာလား သိချင်မိတယ်”

“ဒါပေမဲ့ ဦးရီးတော်ချောင်ရီ လှုပ်ရှားလိုက်ရင် အားလုံးကို ဖိနှိပ်နိုင်လိမ့်မယ်”

တာအိုဘိုးဘေးများသည် နှစ်ဖက်အင်အားစု၏ ကျွမ်းကျင်သူများကို တွေးကြည့်နေသည်။

ကောင်းကင်အံ့ဖွယ်ကမ္ဘာ၏ နောက်ကွယ်တွင်လည်း ကျွမ်းကျင်သူများ ရှိနေကြသည်။

“မဖြစ်နိုင်ဘူး။ ဦးရီးတော်ချောင်ရီက လှုပ်ရှားလိုက်ရင် တာအိုပြိုင်ပွဲနယ်မြေက ပျက်စီးသွားလိမ့်မယ်။ မဟာပုဂ္ဂိုလ်ကြီးတွေက အချင်းချင်း တိုက်ခိုက်လာကြလိမ့်မယ်”

“ဒါပေမဲ့ အခုအချိန်မှာ ဦးရီးတော်ချောင်ရီနဲ့ ဝမ်မော့ရှန်က မလှုပ်ရှားရင် ဘယ်သူက လှုပ်ရှားမှာလဲ”

အထက်ဘုံသုံးပါးမှ နတ်ဘုရားဘုရင်များ၏ရှေ့တွင် ဟန်မူယဲ့ကို မည်သူက ကယ်တင်နိုင်မည်နည်း။

အင်မော်တယ်ရတနာကို ထိန်းချုပ်ထားသော အထက်ဘုံသုံးပါး၏ နတ်ဘုရားဘုရင်တစ်ပါးသည် ဤလောကတွင် အသန်မာဆုံး ဖြစ်သည်။

ပုန်းကွယ်နေကြသော ရှေးခေတ်၏ မဟာပုဂ္ဂိုလ်ကြီးများမှ လွဲ၍ အထက်ဘုံသုံးပါးမှ နတ်ဘုရားဘုရင်များသည် လောက၏ အထွတ်အထိပ်တွင် ရှိနေကြသည်။

ဟန်မူယဲ့၏ နောက်ကွယ်တွင်ရှိနေသော ဝမ်မော့ရှန်နှင့် ဦးရီးတော်ချောင်ရီမှလွဲ၍ ထိုနတ်ဘုရားဘုရင်နှစ်ပါးကို မည်သူက ခုခံနိုင်မည်နည်း။

ဟန်မူယဲ့က နတ်ဘုရားသားရဲကိုယ်ပွားနှင့် မိုင်သုံးရာသာ ကွာဝေးတော့သည်။ နတ်ဘုရားဘုရင်နှစ်ပါးသည် အင်မော်တယ်အလင်းကို ထုတ်လွှတ်၍ ပေါ်လာသည်။

အကယ်၍ ဟန်မူယဲ့က ကိုယ်ပွားနှင့် ပေါင်းစပ်နိုင်လျှင် နတ်ဘုရားဘုရင်တစ်ပါးကို ခုခံနိုင်ရုံသာ ရှိလိမ့်မည်။

သို့သော် ယခုအချိန်တွင် နတ်ဘုရားဘုရင်နှစ်ပါးနှင့် ရင်ဆိုင်ရန် မဖြစ်နိုင်ပေ။

“နှမြောစရာပဲ။ ဟန်မူယဲ့က ကပ်ဘေးကို ဖြတ်ကျော်နိုင်ရင် မဟာကျင့်ကြံသူတစ်ယောက် ဖြစ်လာလိမ့်မယ်”

တာအိုဘိုးဘေးတစ်ယောက်က ခေါင်းခါလိုက်ပြီး ညင်သာစွာပြောသည်။

ကျင့်ကြံသူများသည် အခွင့်အ‌ရေးကို ရှာဖွေရသည်။

ကံကောင်းခြင်းသည် အခွင့်အရေးဖြစ်ပြီး ရှင်သန်ခြင်းနှင့် သေဆုံးခြင်းသည်လည်း အခွင့်အရေး ဖြစ်သည်။

အသက်မရှင်နိုင်သော ပါရမီရှင်တစ်ယောက်သည် အသုံးမဝင်တော့ပေ။

ဟန်မူယဲ့က ခေါင်းမော့ကြည့်သည်။

သန်မာသော နတ်ဘုရားဘုရင်များ၏ ရှေ့တွင် သူ၏ သေခြင်းရှင်ခြင်းသည် သူ့ဓားအပေါ်တွင်သာ မူတည်နေသည်။