အခန်း (၇၄၄)

အစီအရင်၏ ရွှေရောင်အလင်းသည် အနည်းငယ်တုန်ခါသွားပြီး တိတ်ဆိတ်သော သေဆုံးခြင်းစွမ်းအားများ၏ မှုန်မှိုင်းနေသော အငွေ့အသက်သည် ပျောက်ကွယ်သွားခဲ့သည်။

သေဆုံးခြင်းစွမ်းအားသည် အင်မော်တယ်တက်လှမ်းစင်မြင့်၏ ချိပ်ပိတ်အစီအရင်အပေါ်တွင် သက်ရောက်မှုမရှိခဲ့ပေ။

“ဝူ ....”

ကောင်းကင်နှင့်မြေကြီး၏ စကားသံသည် လောကကို ထိုးဖောက်သွားသည်။ ထိုအသံကြောင့် အင်မော်တယ်ဝိညာဉ်ကမ္ဘာနှင့် ကောင်းကင်အံ့ဖွယ်ကမ္ဘာမှ ကျင့်ကြံသူများ၏ စိတ်ဝိညာဉ်သည် သက်ရောက်ခံလိုက်ရပုံပေါ်ပြီး သူတို့၏ မျက်နှာထားများက နာကျင်သွားကြသည်။

စစ်တပ်ဝင်္ကပါများ၏ စုစည်းထားသောစွမ်းအားသည် ဖြည်းဖြည်းချင်း လျော့နည်းလာသည်။ သားရဲများ၏ ပုံရိပ်က မှိန်ဖျော့သွားခဲ့သည်။

ဆွဲထုတ်ခံလိုက်ရသော ဝိညာဉ်အမျှင်တန်းများသည် အာကာသထဲတွင် မီးခိုးရောင်တိမ်တိုက်အဖြစ် ပြောင်းလဲသွားပြီး ကောင်းကင်တွင်ရှိသော အစီအရင်ဆီသို့ ပြေးဝင်သွားခဲ့သည်။

မီးခိုးရောင်တိမ်တိုက်များသည် ဤနယ်မြေတွင်ရှိသော မရေမတွက်နိုင်သည့် သက်ရှိများ၏ ဝိညာဉ်အမျှင်တန်းပင် ဖြစ်သည်။ ဝိညာဉ်အမျှင်တန်း တစ်ခုချင်းစီသည် သေးငယ်သော်လည်း အတူတူစုပေါင်းလိုက်သောအခါတွင် ဧရာမစွမ်းအားတစ်ခု ဖြစ်တည်လာသည်။

“ဘုန်း”

ကောင်းကင်ထက်တွင်ရှိသော အစီအရင်သည် တုန်ခါသွားခဲ့သည်။ ရွှေရောင်အလင်းစီးကြောင်းများသည် မီးခိုးရောင်တိမ်တိုက်များကို ထိုးဖောက်ပြီး မြူခိုးများကဲ့သို့ ပျောက်ကွယ်သွားစေသည်။

မီးခိုးရောင်တိမ်တိုက်များ ပျောက်ကွယ်သွားကြသောအခါတွင် ငိုကြွေးသံတစ်ခုသည် အာကာသထဲတွင် ပဲ့တင်ထပ်သွားခဲ့သည်။

ထိုအရာသည် မရေမတွက်နိုင်သော သက်ရှိများ၏ ဝိညာဉ်စွမ်းအားကို တိုက်ရိုက်ဖျက်ဆီးခဲ့ခြင်း ဖြစ်သည်။

ယခုအချိန်တွင် အင်မော်တယ်ဝိညာဉ်ကမ္ဘာ၏ ကျွမ်းကျင်သူများက ဖြူဖျော့နေကြသည်။

ကောင်းကင်နှင့်မြေကြီးသည် စတေးခံနေရသည်။ မည်သူမှ လွတ်မြောက်နိုင်မည် မဟုတ်ပေ။

မဟာပုဂ္ဂိုလ်များသည် သနားညှာတာပြီး လူတစ်ယောက်ကိုမှ လွတ်ပေးမည်မဟုတ်ပေ။

သူတို့အားလုံးသည် ပုရွက်ဆိတ်များပင် ဖြစ်ကြသည်။

ထိုမဟာပုဂ္ဂိုလ်များ၏အမြင်တွင် တာအိုပြိုင်ပွဲနယ်မြေ၏ လူအားလုံးသည် ပုရွက်ဆိတ်များပင် ဖြစ်ကြသည်။

ဝိညာဉ်တိမ်တိုက်သည် ပျောက်ကွယ်သွားသော်လည်း ကောင်းကင်ထက်တွင်ရှိသော အစီအရင်သည် သိသိသာသာ မှိန်ဖျော့သွားခဲ့သည်။

စတေးခြင်းစွမ်းအားသည် အစီအရင်ကို ချိုးဖျက်နိုင်သည်။

“ဝီ”

အာကာသထဲတွင် ဧရာမလက်ကြီးတစ်ဖက်သည် ကောင်းကင်နှင့်မြေကြီးတစ်ခုလုံးကို ဖိချေပြီး အစီအရင်ကို ချိုးဖျက်ရန် ကြံရွယ်၍ ကျဆင်းလာခဲ့သည်။

တာအိုပြိုင်ပွဲနယ်မြေ၏ သက်ရှိများအားလုံးကို စတေးလိုက်လျှင် အင်မော်တယ်တက်လှမ်းစင်မြင့်၏ ချိပ်စည်းကို သေချာပေါက် ဖျက်ဆီးနိုင်လိမ့်မည်။

ဧရာမလက်ကြီး ပေါ်လာသောအခါတွင် ကောင်းကင်နှင့်မြေကြီးသည် တုန်ခါသွားပြီး သက်ရှိများအားလုံးသည် ခန္ဓာကိုယ်ကို မထိန်းချုပ်နိုင်တော့ဘဲ တုန်ခါလာကြသည်။

ထိုအရာသည် သေခြင်းရှင်ခြင်း၏ ကြောက်ရွံ့မှု ဖြစ်သည်။

ဧရာမလက်ကြီး ကျဆင်းလာခဲ့လျှင် ဤနေရာတွင်ရှိသော သက်ရှိများအားလုံးသည် သေဆုံးသွားရလိမ့်မည်။

သေခြင်းရှင်ခြင်းသည် မျဉ်းတစ်ကြောင်းသာ ကွာခြားသည်။

“ပျက်စီးစမ်း”

ဦးရီးတော်ချောင်ရီက ဟိန်းဟောက်လိုက်သည်။ သူ၏ သွေးနှင့်ချီသည် ရောယှက်နေပြီး အင်မော်တယ်အလင်းဖြင့် လွှမ်းခြုံထားသော လှံရှည်သည် ဧရာမလက်ကြီးဆီသို့ တိုးဝင်သွားသည်။

“သတ်”

ကောင်းကင်အံ့ဖွယ်စစ်တပ်သည် ဟိန်းဟောက်လိုက်သည်။

ဓားအလင်းများသည် အာကာသထဲတွင် စုစည်းလာပြီး ဧရာမဓားတစ်လက်အဖြစ် ပြောင်းလဲသွားသည်။ ထိုဓားသည် ကောင်းကင်ထက်တွင်ရှိသော လက်ပုံရိပ်ကို ခုတ်ချလိုက်သည်။

ယခုအချိန်တွင် ကိုယ်ပိုင်ရှင်သန်မှုအတွက် တိုက်ခိုက်ချင်သော သက်ရှိများအားလုံးသည် ခွန်အားစုစည်းလိုက်ပြီး ဧရာမလက်ကြီးနှင့် ရင်ဆိုင်ခဲ့ကြသည်။

သူတို့က မခုခံနိုင်လျှင်ပင် အသက်စွန့်၍ တိုက်ခိုက်နေကြသည်။

သူတို့က အလိုမရှိပေ။

မည်သူက စတေးခံရန်အတွက် လိုလားမည်နည်း။

သို့သော် ချောင်ရီက ဦးဆောင်နေလျှင်ပင် ကောင်းကင်ထက်မှ ကျဆင်းလာသော ပုံရိပ်ယောင်လက်ဝါးချက်ကို တားဆီးရန် မဖြစ်နိုင်ပေ။

လောကတစ်ခုလုံးသည် ပျက်စီးလုနီးပါး ဖြစ်နေသည်။

စတေးခြင်းတွင် ချီ၊ သွေးနှင့် ဝိညာဉ်ကို လိုအပ်သည်။ ယခုအချိန်တွင် ကျယ်ပြန့်သောအာကာသအတွင်း၌ လွတ်မြောက်ရာလမ်းကို မရှာဖွေနိုင်ပေ။

လျှပ်စီးပင်လယ်ထဲတွင်ရှိသော ဟန်မူယဲ့လည်း အတူတူပင် ဖြစ်သည်။

“သစ်သားနတ်ဘုရား၊ ဒါကို မြင်တယ်မဟုတ်လား”

လျှပ်စီးပင်လယ်၏ လှုပ်ရှားနေသော လျှပ်စီးကြောင်းများပေါ်တွင်ရှိသည့် ဟန်မူယဲ့က တီးတိုးပြောလိုက်သည်။

သူ့ရှေ့တွင် မြက်ရိတ်တံက အင်မော်တယ်အလင်းကို ထုတ်လွှတ်ပေးနေသည်။

ယခုအချိန်တွင် သူက ကိုယ်ပွားနှင့် မူလခန္ဓာကို ပေါင်းစပ်ပြီး သူတော်စင်အဆင့်သို့ ရောက်သွားပြီဖြစ်သည်။

သူက လျှပ်စီးပင်လယ်အတွင်းမှ ထွက်မသွားခဲ့ပေ။

သူ၏ စွမ်းအားနှင့် အထက်ဘုံသုံးပါးမှ မဟာပုဂ္ဂိုလ်သုံးဦး ပူးပေါင်းလုပ်ဆောင်ထားသော စတေးခြင်းကို မဖျက်ဆီးနိုင်ပေ။

ယခင်က အင်မော်တယ်တက်လှမ်းစင်မြင့်ကို ချိပ်ပိတ်ရန်အတွက် ရှေးခေတ်ကျင့်ကြံသူများသည် ပျက်စီးခြင်းတောရိုင်း၏တစ်ဝက်ကို စတေးခဲ့ကြသည်။

သူက မျက်လုံးများကို မှေးကျဉ်းလိုက်သည်။

သူက အင်မော်တယ်တက်လှမ်းစင်မြင့်အား ချိပ်ပိတ်ရန် ပေးဆပ်ခဲ့ရသည့် တန်ဖိုးကို စဉ်းစားကြည့်နေခဲ့သည်။

“သစ်သားနတ်ဘုရားက ဒီစတေးမှုကို တားဆီးမယ်လို့ ပြောခဲ့တယ်မဟုတ်လား”

ဟန်မူယဲ့က တီးတိုးပြောသည်။

သူက မြက်ရိတ်တံမှတစ်ဆင့် သစ်သားနတ်ဘုရားကို ထပ်မံဆက်သွယ်ခဲ့သည်။ အဆုံးတွင် ဟန်မူယဲ့က သစ်သားနတ်ဘုရား၏ ကတိကို ရခဲ့သည်။

သစ်သားနတ်ဘုရားက သွေးစစ်ပွဲဂိုဏ်း၏ တိုက်ပွဲဝင်လှံကိုလည်း ဦးရီးတော်ချောင်ရီဆီသို့ ပေးခဲ့သည်။

သို့သော် မဟာပုဂ္ဂိုလ်တစ်ဦးဖြစ်သော သစ်သားနတ်ဘုရားက စိတ်ပြောင်းသွားနိုင်သည်။

ထိုပုဂ္ဂိုလ်မျိုးအတွက် မရေမတွက်နိုင်သော သက်ရှိများသည် ပုရွက်ဆိတ်များသာ ဖြစ်ကြသည်။

‘သစ်သားနတ်ဘုရားက တခြားမဟာပုဂ္ဂိုလ်ကြီးတွေကို ဆန့်ကျင်ပြီး ပုရွက်ဆိတ်တွေကို ကယ်ပါ့မလား’

ဟန်မူယဲ့က ရှေ့တွင်ရှိသော မြက်ရိတ်တံကို စိုက်ကြည့်နေသည်။

အကယ်၍ သစ်သားနတ်ဘုရားက မလှုပ်ရှားလျှင် သူက လောင်းကြေးထပ်ရမည်။

ရတနာတစ်ခုကို ဖောက်ခွဲခြင်း သို့မဟုတ် သူ၏ စွမ်းအားများအားလုံးကို ထုတ်လွှတ်ပေးနိုင်မည့် ရတနာတစ်ခုအား အသုံးပြုခြင်းတို့သည် သက်ရောက်မှုရှိလိမ့်မည်။

“ကောင်လေး၊ အင်မော်တယ်ကမ္ဘာကိုလာဖို့ အခွင့်အရေးရှိရင် ငါ့ကို သွေးစစ်ပွဲဂိုဏ်းမှာ လာရှာပါ”

သစ်သားနတ်ဘုရား၏ ပြတ်သားသောအသံကို ကြားနိုင်သည်။

သွေးစစ်ပွဲဂိုဏ်း ....

သစ်သားနတ်ဘုရားသည် အင်မော်တယ်ကမ္ဘာသို့သွားရန် ဆုံးဖြတ်ထားသည်။

ယခုအချိန်တွင် ဤကမ္ဘာ၏ အင်မော်တယ်အသွင်ပြောင်းရေကန်ကို သွေးစစ်ပွဲဂိုဏ်းက ထိန်းချုပ်ထားသည်။

သစ်သားနတ်ဘုရားသည် ဤလောက၏ ကျွမ်းကျင်သူများကို ခေါ်ဆောင်၍ အင်မော်တယ်ကမ္ဘာသို့ တက်လှမ်းလာရန် ကတိပေးထားသည်။

သွေးစစ်ပွဲဂိုဏ်းသည် လူအင်အားဖြည့်ရန်အတွက် ဤလောက၏ သက်ရှိများကို လိုအပ်နေသည်။

ထိုအရာသည် ဟန်မူယဲ့နှင့် သစ်သားနတ်ဘုရား၏ သဘောတူညီချက် ဖြစ်သည်။

လူတိုင်းသည် အလဲအလှယ်လုပ်နိုင်သော အရာဝတ္ထု ဖြစ်သည်။ ဤလောက၏ သက်ရှိများနှင့် မဟာပုဂ္ဂိုလ်ကြီးများလည်း ပါဝင်သည်။

“ဝီ”

ဟန်မူယဲ့၏‌ ရှေ့တွင်ရှိသော မြက်ရိတ်တံသည် တုန်ခါသွားပြီး အစိမ်းရောင်အင်မော်တယ်အလင်းကို ထုတ်လွှတ်သည်။

သစ်သားနတ်ဘုရား၏ စွမ်းအား ဖြစ်သည်။

သစ်သားနတ်ဘုရားက ရှေးခေတ်၏ မဟာကျင့်ကြံသူကြီးတစ်ယောက် ဖြစ်သောကြောင့် နတ်ဘုရားဘုရင်များထက် သာလွန်သော စွမ်းအားကို ထုတ်လွှတ်နိုင်သည်။

မြက်ရိတ်တံသည် ပေသန်းချီရှည်လျားသော သစ်ကိုင်းတစ်ခုအဖြစ် ပြောင်းလဲသွားပြီး ကောင်းကင်နှင့် ရင်ဆိုင်လိုက်သည်။

“ဘုန်း”

အစိမ်းရောင်သစ်ကိုင်းသည် ကောင်းကင်ထက်တွင်ရှိသော အင်မော်တယ်တက်လှမ်းစင်မြင့်၏ ချိပ်ပိတ်အစီအရင်ကို ချက်ချင်း ရပ်တန့်လိုက်သည်။

ရှေးခေတ်ကောင်းကင်သစ်ပင်၏ စွမ်းအားသည် အစီအရင်ကို ချုပ်နှောင်လိုက်သည်။

“တာအိုရောင်းရင်းတို့၊ သွားကြမယ်”

သစ်သားနတ်ဘုရား၏ အသံကို ကြားနိုင်သည်။ ထို့နောက် မြင့်မားသော စိမ်းလန်းနေသည့် သစ်ပင်သည် လေဟာနယ်အတွင်းသို့ တိုးဝင်သွားသည်။

သစ်ပင်သည် အစီအရင်၏အလင်းလွှာနှင့် ထိတွေ့ပြီး ချိပ်စည်းကိုထိုးဖောက်၍ အင်မော်တယ်တက်လှမ်းစင်မြင့်သို့ ဝင်ရောက်သွားသည်။

“ဒေါင် ....”

ကောင်းကင်နှင့် မြေကြီး၏ကြားတွင် ရွှေခေါင်းလောင်းသံကို ကြားနိုင်သည်။

တက်လှမ်းခြင်းခေါင်းလောင်း ...

အင်မော်တယ်တက်လှမ်းစင်မြင့်၏ ခေါင်းလောင်းသည် လူသားလောက၏ အချုပ်အနှောင်များကို စွန့်လွှတ်၍ အင်မော်တယ်လောကသို့ တက်လှမ်းသွားနိုင်သည့်အတွက် မြည်သံပေးလိုက်သည်။

မရေမတွက်နိုင်‌သော နှစ်ပေါင်းများစွာ ကုန်လွန်ပြီးနောက် တက်လှမ်းခြင်းခေါင်းလောင်းသံကို ဤလောကတွင် နောက်တစ်ကြိမ် ထပ်ကြားလိုက်ရသည်။ နောက်ဆုံးတွင် လူတစ်ယောက်သည် အင်မော်တယ်တက်လှမ်းစင်မြင့်မှတစ်ဆင့် အင်မော်တယ်ကမ္ဘာသို့ ဝင်ရောက်သွားခဲ့သည်။

ပထမဆုံး ထွက်သွားသောလူသည် သစ်သားနတ်ဘုရား ဖြစ်သည်။

နောက်ကွယ်တွင် ပုန်းအောင်းနေသော မဟာပုဂ္ဂိုလ်ကြီးတစ်ယောက်သည် ဤလောကမှ ထွက်ခွာပြီး အင်မော်တယ်တက်လှမ်းစင်မြင့်သို့ ပထမဆုံး ဝင်ရောက်သွားလိမ့်မည်ဟု မည်သူမှ ထင်မထားခဲ့ကြပေ။

စတေးခြင်းကိုလည်း စွန့်ပစ်ခဲ့သည်။

“ကောင်းကင်သစ်ပင်ရဲ့စွမ်းအားက အသက်ရှူကြိမ်တစ်ရာအထိ ထောက်ပံ့ပေးနိုင်တယ်။ အသက်ရှူကြိမ်တစ်ရာ ပြီးသွားရင် စွမ်းအားပြတ်တောက်သွားပြီး အင်မော်တယ်တက်လှမ်းစင်မြင့်က နောက်တစ်ကြိမ် ပြန်ပိတ်သွားလိမ့်မယ်”

ဟန်မူယဲ့က လျှပ်စီးပင်လယ်ထဲမှ ထွက်လာပြီး ကောင်းကင်ကိုကြည့်၍ ကျယ်လောင်စွာ အော်ပြောလိုက်သည်။

သူက သွေး၊ ချီနှင့် ဝိညာဉ်ကို ပေါင်းစပ်၍ ပေတစ်ထောင်ရှည်လျားသော ဓားတစ်လက်ကို စုစည်းထားသည်။

ထိုလူများက ထွက်မသွားခဲ့လျှင် သူက ထပ်မံတိုက်ခိုက်ရမည်။

သူ့ကိုယ်ပေါ်တွင်ရှိသော လျှပ်စီးကြောင်းများသည် ပျောက်ကွယ်မသွားကြသေးပေ။ အဆုံးမရှိသော လျှပ်စီးကြောင်းနှင့် လေပြင်းများသည် လှုပ်ရှားနေကြသည်။

အသက်ရှူကြိမ်တစ်ရာ ....

အသက်ရှူကြိမ်တစ်ရာအတွင်း၌ ကောင်းကင်သစ်ပင်၏စွမ်းအားကို မှီခိုပြီး ဤလောကမှ ထွက်ခွာ၍ အင်မော်တယ်တက်လှမ်းစင်မြင့်သို့ ဝင်ရောက်နိုင်သည်။

ကောင်းကင်ထက်မှ ဆင်းသက်လာသော ဧရာမလက်ဝါးချက်သည် ပြိုကွဲသွားခဲ့သည်။

လူများက အင်မော်တယ်တက်လှမ်းစင်မြင့်သို့ ပြေးဝင်လာကြသည်။

သူတို့က စတေးခြင်းကို မလိုအပ်ဘဲ အင်မော်တယ်တက်လှမ်းစင်မြင့်သို့ ဝင်ရောက်နိုင်လျှင် အလုပ်ရှုပ်ခံနေမည်မဟုတ်ပေ။

သစ်သားနတ်ဘုရားသည် ထွက်ခွာသွားခဲ့သည်။ သူတို့က အဘယ်ကြောင့် နှောင့်နှေးနေရမည်နည်း။

“‌ဒေါင် ....”

“ဒေါင် ....”

....

တက်လှမ်းခြင်းခေါင်းလောင်း၏ မြည်သံသည် အာကာသထဲတွင် ပဲ့တင်ထပ်သွားခဲ့သည်။

နောက်ကွယ်တွင် ပုန်းအောင်းနေကြသော မဟာပုဂ္ဂိုလ်ကြီးများသည် အင်မော်တယ်တက်လှမ်းစင်မြင့်သို့ တစ်ယောက်ပြီးတစ်ယောက် ဝင်ရောက်ပြီး ဤကမ္ဘာမှ ထွက်သွားကြသည်။

အထက်ဘုံသုံးပါး၏ မရေမတွက်နိုင်သော လူများသည် ကောင်းကင်ထက်တွင် ပျံသန်းလာကြသည်။

အင်မော်တယ်တက်လှမ်းစင်မြင့်သည် နှစ်ပေါင်းမရေမတွက်နိုင်အောင် ချိပ်ပိတ်ခံထားရပြီး ဤလောက၏ ကျွမ်းကျင်သူများက ရှေ့ဆက်မသွားနိုင်ခဲ့ကြပေ။

အလင်းတန်းဆယ်ခု၊ အခုတစ်ရာ၊ အခုတစ်ထောင် ....

ရှေးခေတ်၏ မဟာပုဂ္ဂိုလ်ကြီးများ ....

နတ်ဘုရားဘုရင်များ ....

တာအိုဘိုးဘေးများ ....

အလွန်တောက်ပနေသော ပုံရိပ်များသည် ကောင်းကင်ပေါ်သို့ ပျံတက်သွားကြပြီး အစီအရင်အလင်းလွှာကို ဖြတ်ကျော်၍ ဤကမ္ဘာမှ တစ်ယောက်ပြီးတစ်ယောက် ထွက်သွားကြသည်။

“ဝီ”

အာကာသထဲတွင်ရှိသော အစီအရင်သည် စတင်တုန်ခါလာသည်။

မြက်ရိတ်တံမှ ဖြစ်ပေါ်လာသော ကောင်းကင်သစ်ပင်၏ သစ်ကိုင်းသည် ဖိအားကြောင့် အက်ကွဲသံများ ထွက်လာခဲ့သည်။

ဟန်မူယဲ့၏ မျက်လုံးများက တောက်ပသွားကြသည်။

“ဘုန်း”

ကောင်းကင်သစ်ပင်သည် ပျောက်ကွယ်သွားပြီး ကောင်းကင်ထက်တွင်ရှိသော အစီအရင်သည် မရေမတွက်နိုင်သော လူများကို တားဆီးလိုက်သည်။

ကောင်းကင်လမ်းသည် ဖြတ်တောက်ခံလိုက်ရသည်။

အင်မော်တယ်တက်လှမ်းစင်မြင့်သည် ပြန်လည်အိပ်စက်သွားသည်။ အစီအရင်၏ ရွှေရောင်အလင်းသည် ချဉ်းကပ်လာသောလူတိုင်းကို တားဆီးနေသည်။

‘တက်လှမ်းဖို့အတွက် အခွင့်အရေးက ဖြတ်တောက်ခံလိုက်ရပြီလား’

ကောင်းကင်ထက်တွင်ရှိသော လူများက အောက်တွင်ရှိသော စစ်မြေပြင်ကို ငုံ့ကြည့်လိုက်ကြသည်။

တာအိုပြိုင်ပွဲကို စောင့်ကြည့်နေသော နတ်ဘုရားဘုရင်နှင့် တာအိုဘိုးဘေး အများစုက ထွက်သွားကြသောကြောင့် တာအိုပြိုင်ပွဲနယ်မြေကို ဖိနှိပ်မည့်လူ မရှိတော့ပေ။

ပုံရိပ်နှစ်ခု ပေါ်ထွက်လာခဲ့သည်။

ကောင်းကင်အံ့ဖွယ် တာအိုဘိုးဘေး၏ မျက်နှာထားက ရှုပ်ထွေးနေပြီး အင်မော်တယ်ဝိညာဉ် တာအိုဘိုးဘေး၏ မျက်နှာထားက နာကျင်နေသည်။

တာအိုပြိုင်ပွဲသည် စောစီးစွာ ပြီးဆုံးသွားပြီး အနိုင်ရသော အင်အားစုသည် နတ်ဘုရားဘုရင်ဖြစ်လာမည့် အခွင့်အရေးကို မရခဲ့ပေ။ ရှုံးနိမ့်သော အင်အားစုကလည်း ပျောက်ကွယ်မသွားခဲ့ပေ။

တာအိုပြိုင်ပွဲသည် အဓိပ္ပာယ်မရှိခဲ့ပေ။

သူတို့အားလုံးက လေးနက်သောမျက်နှာထားဖြင့် ကောင်းကင်ကို မော့ကြည့်လိုက်ကြသည်။

အစီအရင်စွမ်းအားကြောင့် တားဆီးခံလိုက်ရသော ကျွမ်းကျင်သူများသည် သတ်ဖြတ်လိုစိတ်နှင့် ရူးသွပ်သော ဆုံးဖြတ်ချက်ကို ထုတ်လွှတ်နေကြသည်။

ဟန်မူယဲ့၏ ပတ်ဝန်းကျင်တွင်ရှိသော လျှပ်စီးကြောင်းများသည် လေဟာနယ်ကို ထိုးခွဲနေကြသည်။

ပြန့်ကျဲနေ‌သော စစ်တပ်ဝင်္ကပါများသည် ပြန်လည်စုစည်းလိုက်ပြီး အသင့်ပြင်ထားကြသည်။

“စတေးမယ်”

အလင်းလွှာရှေ့တွင်ရှိနေသော လူတစ်ယောက်က အော်ဟစ်လိုက်သည်။

တခြားလူများက အင်မော်တယ်တက်လှမ်းစင်မြင့်သို့ ဝင်ရောက်ပြီး အင်မော်တယ်ကမ္ဘာသို့ သွားနိုင်လျှင် သူတို့ကလည်း သွားနိုင်ရမည်။

မဟာပုဂ္ဂိုလ်ကြီးများက တာအိုပြိုင်ပွဲနယ်မြေကို စတေးနိုင်သောကြောင့် သူတို့ကလည်း စတေးနိုင်သည်။