နှစ်သုံးဆယ် ကံကောင်းမှု

မိုးပြာမဟာဧကရာဇ် မည်သို့ ဆက်လုပ်ရမည်မသိ ဖြစ်နေသည်။

သူ့ဘဝတွင် ရည်မှန်းချက်နှစ်ခု ရှိသည်။ ထိုရည်မှန်းချက်နှစ်ခုအတွက် သူ့နှလုံးသားကို ချိပ်ပိတ်ကာ အချစ်ကို ဖြတ်တောက်ခဲ့သည်။ သူသည် မည်သည့်သံယောဇဉ်၊ မည်သည့်အားနည်းချက်မှ မရှိလိုခဲ့၍ နှစ်ထောင်ချီ အထီးကျန်နေခဲ့သည်။

သူ၏ဆရာ၊ သူ၏မွေးစားဖင်ဖြစ်သော ပြီးခဲ့သည့်မျိုးဆက်မှ မိုးပြာမဟာဧကရာဇ် ချင်ယန်တွင်လည်း သေသည်အထိ မပြည့်မြောက်နိုင်ခဲ့သော ရည်မှန်းချက်ကြီးတစ်ခု ရှိခဲ့သည်။ ယင်းမှာ လောကထိပ်ဆုံးသို့ တက်၍ ကပ်လောက၏ ကောင်းကင်ဧကရာဇ် ဖြစ်လာရန်ပင်။

မိုးပြာမဟာဧကရာဇ်သည် ချင်ယန်၏ လွှမ်းမိုးမှုကို ခံရကာ ထိုရာထူးနေရာကို အမြဲတပ်မက်ခဲ့၏။ ထိုတပ်မက်မှုမှာ သူ့အတွက် မဟုတ်ဘဲ သူ့ဆရာ၏ မပြီးမြောက်ခဲ့သော ဆန္ဒကို ဖြည့်ဆည်းပေးရန်ဖြစ်သည်။

မိုးပြာမဟာဧကရာဇ်တွင် အခြားရည်မှန်းချက်တစ်ခုလည်း ရှိသေးသည်။ ထိုရည်မှန်းချက်မှာ နောက်ဆုံးအဆင့်ကို ကျော်ဖြတ်၍ မသေမျိုးလောက၏ တံခါးကို ဖွင့်နိုင်ရန်ပင်။ သူသည် စစ်မှန်သော ကောင်းကင်မသေမျိုးတစ်ပါးဖြစ်ကာ ထာဝရအသက်ကို ပိုင်ဆိုင်၍ သိုင်းပညာတာအို၏ အထွတ်အထိပ်ကို ရောက်လိုပေသည်။

ဤလောကထဲတွင် မိုးပြာမဟာဧကရာဇ်၏ ပါရမီမှာ ပြိုင်ဘက်ကင်းပင်။ သူက အလွန်ကြိုးစား ကျင့်ကြံခဲ့ပြီး ကံတရားကောင်းများစွာနှင့်လည်း တွေ့ကြုံခဲ့ရသည်။ သို့သော် သူ့တိုက်ခိုက်စွမ်းအားက ဧကရာဇ်အဆင့်မှာပင် ရပ်တန့်နေခဲ့လေသည်။ နောက်ဆုံးအဆင့်ကို ဖြတ်ကျော်၍ မသေမျိုးလောက၏ တံခါးကို ဖွင့်ရန် မဆိုထားနှင့် ယန်ကိုးပါးကောင်းကင်ဧကရာဇ်နှင့် တမလွန်ဘုံဧကရာဇ်တို့၏ အဆင့်သို့ ရောက်ရန်ပင် ထာဝရကြာနေသလို ခံစားနေရသည်။ သူသည် ဤဘဝတွင် နောက်တစ်ဆင့်သို့ တက်နိုင်တော့မည် မဟုတ်ဟု အကြိမ်များစွာ ခံစားခဲ့ရသည်။ သူ ဤအဆင့်မှာပင် အိုမင်း သေဆုံးသွားပေလိမ့်မည်။

မိုးပြာမဟာဧကရာဇ်သည် သိုင်းပညာလမ်းကြောင်းပေါ်တွင် မျှော်လင့်ချက်အားလုံး ကုန်ဆုံးလုနီးပါး ဖြစ်နေပြီဖြစ်သည်။ ယခုတွင် ယန်ကိုးပါးကောင်းကင်ဧကရာဇ်၏ ဝိညာဉ်အပိုင်းအစက ပြန်ထွက်ပေါ်လာပြီဖြစ်ရာ သူ ကောင်းကင်ဧကရာဇ် ဖြစ်နိုင်မည့် လမ်းက ချိပ်ပိတ်ခံလိုက်ရပြီလည်းဖြစ်သည်။ ထို့ကြောင့် သူ အလွန်စိတ်ဓာတ်ကျနေသည်၊ အလွန်စိတ်ရှုပ်ထွေးနေသည်၊ မည်သို့ဆက်လုပ်ရမည်မသိ ဖြစ်နေသည်။

ယန်ကိုးပါးကောင်းကင်ဧကရာဇ်သည် မည်သူမှ မဖြတ်ကျော်နိုင်သော အဟန့်အတားတစ်ခုပင်။ ယန်ကိုးပါးကောင်းကင်ဧကရာဇ်သည် မီးနဂါးဓားက မိုးပြာမဟာဧကရာဇ်နှင့် မသက်ဆိုင်ကြောင်း ပြောခဲ့သည်။ သူ ၎င်းကို ရလိုက်လျှင်ပင် စွမ်းအားအပြည့်အဝ သုံးနိုင်မည် မဟုတ်ပေ။ ထိုစကား၏ အဓိပ္ပာယ်က အလွန်ရှင်းသည်။ ဤဘဝတွင် သူ ကောင်းကင်ဧကရာဇ် ဖြစ်လာနိုင်တော့မည် မဟုတ်ဟူ၍ပင်။ သူ ပလ္လင်ထက် အတင်းတက်မည်ဆိုလျှင်လည်း လောကကြီးကို အမိန့်ပေးနိုင်မည် မဟုတ်ပါ။

ယန်ကိုးပါးကောင်းကင်ဧကရာဇ်၏ ဝိညာဉ်အပိုင်းအစ ရှိနေသ၍ မိုးပြာမဟာဧကရာဇ်အနေဖြင့် အမှန်ပင် ပလ္လင်ထက်တွင် မထိုင်နိုင်ပါ။ ယန်ကိုးပါးကောင်းကင်ဧကရာဇ်၏ ဂုဏ်သတင်းက အလွန်ကြီးသည်။ သူက မျက်နှာပင် ထွက်မပြဘဲ သတင်းတစ်ခု လွှင့်လိုက်သည်နှင့် လောကထဲရှိ မည်သူကမှ သူ့ကို မနာခံဘဲ နေဝံ့မည် မဟုတ်ချေ။

မိုးပြာမဟာဧကရာဇ်သည် ကောင်းကင်စကြဝဠာဘုံသို့ မသွားခဲ့ပေ။ ထိုအစား မိုးပြာမဟာဧကရာဇ်တောင်ထွတ်သို့ ပြန်သွားခဲ့သည်။ သူ ကျန်းရီကိုပင် ခြေရာခံရန် မကြိုးစားတော့ပေ။ သူ ကြိုးစားလျှင်လည်း မည်သည့်အကျိုး ရှိမည်နည်း။

ယန်ကိုးပါးကောင်းကင်ဧကရာဇ်၏ ဝိညာဉ်အပိုင်းအစ ရှိနေသ၍ မည်သူက ကျန်းရီကို သတ်နိုင်မည်နည်း။ မည်သူကရော ယန်ကိုးပါးကောင်းကင်ဧကရာဇ်၏ ဝိညာဉ်အပိုင်းအစကို တိုက်ခိုက်ဝံ့မည်နည်း။

မိုးပြာမဟာဧကရာဇ်တောင်ထွတ်က အလွန်တိတ်ဆိတ်နေသည်။ တောက်နူနှင့် အခြားသူများက ကောင်းကင်ကြယ်စုဘုံထဲတွင် ရှိနေကြသည်။ သူချစ်ခင်သော တပည့် ရှားယွီမှာလည်း ကောင်းကင်စကြဝဠာဘုံထဲမှ မြို့များကို တိုက်ခိုက်နေဆဲပင်။ ထို့ကြောင့် တောင်ထွတ်ပေါ်တွင် တောက်မျိုးနွယ်မှ အဆင့်နိမ့်မျိုးနွယ်ဝင်အချို့သာ ကျန်ခဲ့သည်။ မိုးပြာမဟာဧကရာဇ်သည် မိုးပြာမဟာဧကရာဇ်တောင်ထွတ်၏ အမြင့်ဆုံးနေရာတွင် ရပ်နေသည်။ သူသည် အဝေးသို့ ငေးကြည့်ကာ သူ့အနာဂတ်နှင့် သူ မည်သို့ဆက်လုပ်ရမည်ကို တွေးတောနေပေသည်။

တစ်ရက်၊ နှစ်ရက်၊ သုံးရက်...

မိုးပြာမဟာဧကရာဇ် တွေးမရသေးပေ။ သို့သော် သူ၏ ကျောက်စိမ်းအဆောင်တစ်ခုက လင်းလက်လာ၏။ ထို့နောက် သူ့မျက်ဝန်းများ ကြည်လင်လာသည်။ သူ ကျောက်စိမ်းအဆောင်ကို ကြည့်လိုက်ပြီး အတန်ငယ် စိတ်အားတက်လာလေသည်။

သတင်းမှာ ယန်မဟာဧကရာဇ်ထံမှ လာခြင်းပင်။ သတင်းကလည်း အောင်ပွဲသတင်းဖြစ်သည်။ ကောင်းကင်စကြဝဠာဘုံကို သိမ်းပိုက်နိုင်လိုက်ပြီဖြစ်ပြီး တမလွန်ဘုံဘုရင်အားလုံး အသတ်ခံလိုက်ရသည်။ တမလွန်ဘုံစစ်တပ်က တစ်ကွဲတစ်ပြား ဖြစ်သွားပြီဖြစ်ရာ ကျန်သော ဘုံများကို သိမ်းပိုက်နိုင်ရန်မှာ အချိန်တစ်ခုသာ လိုပေလိမ့်မည်။

‘ကောင်းကင်စကြဝဠာဘုံကို သိမ်းပိုက်နိုင်လိုက်ပြီလား’

မိုးပြာမဟာဧကရာဇ်၏ မျက်ဝန်းများက လင်းလက်လာ၏။ သူ လျင်မြန်စွာ စိတ်ပိုင်းဖြတ်လိုက်သည်။ လတ်တလောတွင် သူ ကျန်းရီကို အရေးမစိုက်သေးဘဲ အရင်ဆုံး ဘုံသုံးခုကို တည်ငြိမ်အောင် လုပ်ရပေမည်။

ထိုဘုံသုံးခု တည်ငြိမ်သွားသည်နှင့် လူသားစစ်တပ်၏ စိတ်ဓာတ်မှာလည်း အခြေခိုင်သွားပေလိမ့်မည်။ သူ့ဩဇာအာဏာမှာလည်း အမြင့်တစ်ခုသို့ ရောက်သွားမည်ဖြစ်သည်။ မည်သို့ပင်ဖြစ်စေ သူက လူသားမျိုးနွယ်စစ်တပ်၏ ခေါင်းဆောင်တစ်ယောက် မဟုတ်ပါလား။

ထိုအခိုက်တွင် မိုးပြာမဟာဧကရာဇ်သည် မည်သို့လုပ်ရမည်ကို မသိပေ။ ရှေးဦးစွာ သူ ကောင်းကင်စကြဝဠာဘုံကိုသာ တည်ငြိမ်အောင် သွားလုပ်ရပေမည်။ ယန်ကိုးပါးကောင်းကင်ဧကရာဇ်၏ ဝိညာဉ်အပိုင်းအစ ရှိနေသ၍ သူ အလျင်စလို မလုပ်ဆောင်နိုင်ပေ။ သူ ဖြေရှင်းရန် နည်းလမ်းတစ်ခုကိုသာ ဖြည်းဖြည်းချင်း တွေးရပေမည်။ ဤအခိုက်တွင် လူသားစစ်တပ်နှင့် တမလွန်ဘုံမျိုးနွယ်က စစ်ဖြစ်နေသည်။ သို့ဖြစ်ရာ ကျန်းရီက နောက်ကျောကို ဓားနှင့်မထိုးလောက်သည် မဟုတ်လော။

‘ဟုတ်သား... ငါ မသေမျိုးတစ်ပိုင်း ရသေ့ကြီးဆီသွားပြီး ဒီကိစ္စကို ဆွေးနွေးသင့်တယ်။ မသေမျိုးတစ်ပိုင်းမျိုးနွယ်က ကောင်းကင်ဧကရာဇ်ရဲ့ ဖိနှိပ်မှုကို ခံခဲ့ရတာပဲ။ ငါသာ မသေမျိုးတစ်ပိုင်း ရသေ့ကြီးနဲ့ အင်အားပူးပေါင်းလိုက်မယ်ဆိုရင် ကောင်းကင်ဧကရာဇ်ရဲ့ ဝိညာဉ်အပိုင်းအစ ရှိနေသေးရင်လည်း ဘာဖြစ်သေးလဲ။ အချိန်အများကြီး ကြာခဲ့ပြီ၊ အဲ့ဝိညာဉ်အပိုင်းအစမှာ ဝိညာဉ်စွမ်းအင် ဘယ်လောက်များများ ကျန်မှာမို့လို့လဲ’

မိုးပြာမဟာဧကရာဇ်၏ မျက်ဝန်းများ အေးစက်လာသည်။ သူ့နှလုံးသားက သံမဏိကဲ့သို့ မာကြောသွားသည်။ သူ လူသားမျိုးနွယ်၏ ကောင်းကင်ဧကရာဇ် ဖြစ်လာရန် ဆုံးဖြတ်လိုက်ပေပြီ။ အကယ်၍ ယန်ကိုးပါးကောင်းကင်ဧကရာဇ်က သူ့လမ်းတွင် ပိတ်နေဝံ့လျှင် သူ ပုန်ကန်မှု ကျူးလွန်ရန်သာ ရှိပေတော့သည်။

***

ကောင်းကင်စကြဝဠာဘုံမှ အခြေအနေက မဆိုးပါ။ ရှားယွီမှာ အမှန်ပင် ဉာဏ်ကြီးရှင်တစ်ယောက်ဖြစ်သည်။ သူမသည် စစ်တပ်ကို ဦးဆောင်၍ တမလွန်ဘုံအစီအရင်များကို ဖျက်ဆီးကာ တမလွန်ဘုံမျိုးနွယ်ဝင် တပ်သား သန်းသုံးဆယ်ကို သတ်၍ ကောင်းကင်စကြဝဠာမြို့ကို သိမ်းပိုက်ခဲ့သည်။ မြို့ကို သိမ်းပိုက်ပြီးနောက် တပ်မစွဲဘဲ စစ်တပ်ကို ပြန်ဆုတ်စေခဲ့သည်။ ထိုနည်းဖြင့် သူမသည် ကောင်းကင်စကြဝဠာဘုံထဲရှိ တမလွန်ဘုံမျိုးနွယ်ဝင် တပ်သားများ၏ ဝိုင်းရံမှုကို ရှောင်ရှားနိုင်ခဲ့ပေသည်။ သူမသည် ကောင်းကင်စကြဝဠာဘုံထဲတွင် လှည့်ပတ်သွားကာ သူမလမ်းရှိ အရာအားလုံးကို ရှင်းပစ်ခဲ့သည်။ ယန်မဟာဧကရာဇ်နှင့် ရူးသွပ်မဟာဧကရာဇ်တို့က စစ်ကူများနှင့်အတူ ရောက်လာချိန်တွင် သူမသည် သူမ၏တပ်သားသန်းနှစ်ဆယ်ထဲမှ ငါးသန်းကိုသာ ဆုံးရှုံးပေသေးသည်။

ရှားယွီ၏ တိုက်ခိုက်စွမ်းအားက ထိပ်တန်းဟု မဆိုနိုင်ပါ။ အစတွင် လူများသည် သူမက မိုးပြာမဟာဧကရာဇ်၏ ချစ်တပည့်တစ်ယောက် ဖြစ်နေ၍သာ အထင်ကြီးခဲ့ကြခြင်းဖြစ်သည်။ သို့သော် ဤတိုက်ပွဲပြီးနောက်တွင် မည်သူကမှ သူမကို လျှော့မတွက်ဝံ့တော့ပေ။ မိုးပြာမဟာဧကရာဇ်ပင် စစ်ရေးစစ်ရာ၌ သူမလောက် မပြီးပြည့်စုံချေ။ ယန်မဟာဧကရာဇ်နှင့် ရူးသွပ်မဟာဧကရာဇ်တို့သည် ပို၍ပင် အရှက်ရနေကြသည်။ လူသားစစ်တပ်မှာမူ သူတို့ကို တိုက်ပွဲတွင် ဦးဆောင်မည့် ခေါင်းဆောင်တစ်ယောက်ကို ရလိုက်၍ ဝမ်းသာအားရ ဖြစ်နေကြပေသည်။

ယန်မဟာဧကရာဇ်နှင့် ရူးသွပ်မဟာဧကရာဇ်တို့၏ စစ်တပ် ရောက်လာသည်နှင့် ကောင်းကင်စကြဝဠာဘုံက တည်ငြိမ်သွား၏။ တိုက်ပွဲအနည်းငယ် တိုက်ပြီးနောက် တမလွန်ဘုံမျိုးနွယ်၏ အဓိကအင်အားစုများက ကောင်းကင်စကြဝဠာဘုံထဲတွင် တစ်ကွဲတစ်ပြား ဖြစ်သွားကြသည်။ ကျန်သောကိစ္စများမှာ လွယ်ကူပေသည်။ တမလွန်ဘုံအစီအရင်များ ဖျက်ဆီးခံလိုက်ရပြီဖြစ်သဖြင့် တမလွန်ဘုံမျိုးနွယ်က စစ်ကူများ စေလွှတ်၍ မရတော့ပေ။ သို့ဖြင့် ကောင်းကင်စကြဝဠာဘုံက အပြည့်အဝ သိမ်းပိုက်ခံလိုက်ရလေသည်။

မသေမျိုးတစ်ပိုင်း ရသေ့ကြီးသည် ကောင်းကင်စကြဝဠာဘုံသို့ ကိုယ်တိုင်ရောက်လာ၏။ ချီလင်းဧကရီကလည်း ကောင်းကင်ဝိညာဉ်ဘုံတွင် ကောင်းကင်ကိုးပါးကြယ်အစီအရင်ကို ဆင်ပြီးသည်နှင့် ကောင်းကင်စကြဝဠာဘုံသို့ တန်း၍လာခဲ့သည်။ ဘုံတစ်ခုကို သိမ်းပိုက်ပြီးလျှင် အစီအရင်တစ်ခုဆင်ကာ ပတ်ဝန်းကျင်ရှိ တမလွန်ဘုံမျိုးနွယ်ဝင်များကို ရှင်းပစ်ရမည်ဖြစ်သည်။

ကောင်းကင်ဘုရင်ဝေနှင့် ရှန်ကွေ့တို့သည် စစ်တပ်ကို ဦးဆောင်၍ အနီးရှိ ဆန်းကြယ်နယ်မြေထဲမှ တမလွန်ဘုံမျိုးနွယ်ဝင်များကို လိုက်ရှင်းကြသည်။ ကောင်းကင်ဝိညာဉ်ဘုံနှင့် ကောင်းကင်ကြယ်စုဘုံတို့က ကောင်းကင်စကြဝဠာဘုံနှင့် အတော်လေး ဝေးသည်။ ထို့ကြောင်း ကြားတွင် ဆန်းကြယ်နယ်မြေများ သိန်းနှင့်ချီ၍ ရှိနေသည်။ ထိုဆန်းကြယ်နယ်မြေများထဲတွင် တမလွန်ဘုံမျိုးနွယ်ဝင်များ ရှိနေကြသည်။ သူတို့ ကောင်းကင်စကြဝဠာဘုံကို အပြည့်အဝ သိမ်းပိုက်လိုလျှင် ထိုတမလွန်ဘုံမျိုးနွယ်ဝင်များ အားလုံးကို သတ်ရပေမည်။

အရာအားလုံး ချောမွေ့နေခဲ့သည်။ ချောမွေ့လွန်းလှသဖြင့် အိပ်မက်ဟုပင် ခံစားနေရသည်။ တမလွန်ဘုံမျိုးနွယ်က မည်သို့မှ တန်ပြန်မလှုပ်ရှားသဖြင့် လူသားမျိုးနွယ်မှ ပညာရှင်များ နားမလည်နိုင်အောင် ဖြစ်နေကြသည်။ အဘယ်ကြောင့် တမလွန်ဘုံမျိုးနွယ်က တန်ပြန်တိုက်စစ်ဆင်ခြင်း၊ စစ်ကူစေလွှတ်ခြင်းများ မလုပ်ရသနည်း။ အဘယ်ကြောင့် သူတို့က လူသားမျိုးနွယ်ကို ကောင်းကင်စကြဝဠာဘုံကို သိမ်းပိုက်ခွင့် ပေးရသနည်း။

ယန်မဟာဧကရာဇ်၊ ရူးသွပ်မဟာဧကရာဇ်နှင့် အခြားမျိုးနွယ်ခေါင်းဆောင်များ စိတ်မသက်မသာရှိနေကြ၏။ သူတို့သည် မသေမျိုးတစ်ပိုင်း ရသေ့ကြီးဆီ အတူသွားကြ၍ လူသားမျိုးနွယ်၏ ကံကြမ္မာကို မေးခဲ့ကြသည်။

ဤတစ်ခေါက်တွင် မသေမျိုးတစ်ပိုင်း ရသေ့ကြီးက မငြင်းဆန်ခဲ့ပေ။ သူသည် အားလုံး၏ အရှေ့မှာပင် နမိတ်ဖတ်ခဲ့သည်။ ရလဒ်မှာ အံ့အားသင့်လောက်အောင် ကောင်းမွန်နေသည်။ နမိတ်ဖတ်ချက်အရ တမလွန်ဘုံတွင် မူမမှန်မှုတစ်ခု ဖြစ်နေကြောင်း သိရသည်။ လူသားမျိုးနွယ်မှာလည်း နှစ်သုံးဆယ် ကံကောင်းပေလိမ့်မည်။

နှစ်သုံးဆယ်လော။

ထိုနမိတ်ဖတ်ချက်က လူသားပညာရှင်များစွာကို အလွန်စိတ်လှုပ်ရှားသွားစေသည်။ သူတို့ နှစ်သုံးဆယ် ကံကောင်းမှုကို ရမည်ဆိုလျှင် လူသားမျိုးနွယ်က ဘုံသုံးခုမှ အဆုံးမဲ့အရင်းအမြစ်များကြောင့် သန်းရာချီသော တပ်သားများနှင့် သန်းဆယ်ချီသော စွမ်းအားကြီး သိုင်းသမားများကို အလွယ်တကူ မွေးထုတ်နိုင်ပေလိမ့်မည်။ လူသားမျိုးနွယ်မှာ အင်အားကြီးလာမည်ဖြစ်သည်။

နေ့တစ်ဝက်ကြာပြီးနောက် လူသားမျိုးနွယ်သည် တော်ဝင်မိသားစုဝင်တစ်ယောက်ကို ဖမ်းနိုင်ခဲ့သည်။ ထိုတော်ဝင်မိသားစုဝင်မှာ ရီမျိုးနွယ်မှ အရေးပါသူတစ်ယောက်ပင်။ ထိုသူထံမှနေ၍ အလွန်ကောင်းသောသတင်းတစ်ခု ရလိုက်၍ လူသားမျိုးနွယ် အလွန်စိတ်လှုပ်ရှားသွားသည်။

တမလွန်ဘုံမျိုးနွယ်တွင် အမှန်ပင် ပြဿနာတစ်ခု ရှိနေသည်။ မင်တဲက အပြင်းအထန် ဒဏ်ရာရထားသည်။ သူ့ရုပ်ခန္ဓာက ဖျက်ဆီးခံခဲ့ရသည်။ သူ့စိတ်ဝိညာဉ်ကလည်း တမလွန်ချောက်နက်သို့ ပြန်သွားသည်။ သူ ပြန်ကောင်းရန် ဆယ်စုနှစ်အနည်းငယ် ကြာပေလိမ့်မည်။

ထိုသတင်းသည် မသေမျိုးတစ်ပိုင်း ရသေ့ကြီး၏ နမိတ်ဖတ်မှုနှင့် ကိုက်ညီသည်။ ယန်မဟာဧကရာဇ်နှင့် အခြားသူများသည် မသေမျိုးတစ်ပိုင်း ရသေ့ကြီးကို ပို၍ပင် ယုံကြည်လာသည်။ သူတို့ လုံးဝစိတ်အေးသွားကြသည်။

နေ့တစ်ဝက်ထပ်ကြာပြီးနောက် မိုးပြာမဟာဧကရာဇ် ပြန်ရောက်လာ၏။ အခြေအနေကို တည်ငြိမ်အောင် လုပ်ပြီးနေပေပြီ။ သို့သော် မိုးပြာမဟာဧကရာဇ်သည် မသေမျိုးတစ်ပိုင်း ရသေ့ကြီး၏ နမိတ်ဖတ်မှုနှင့် တမလွန်ဘုံမျိုးနွယ်၏ အခြေအနေကို ကြားလိုက်ရသော်လည်း လွန်စွာပျော်ရွှင်ပုံ မပြပေ။

အတိတ်တွင် ကျန်းရီက ခေါင်းပေါ်ဝဲနေသည့် ဓားသွားကို စိုးခဲ့ရသည်။ ဤတစ်ကြိမ်တွင်မူ ခေါင်းပေါ် ဓားဝဲခံရသူမှာ မိုးပြာမဟာဧကရာဇ် ဖြစ်နေပေပြီ။ ယန်ကိုးပါးကောင်းကင်ဧကရာဇ်၏ ဝိညာဉ်အပိုင်းအစမှာ ထိုဓားဖြစ်သည်။ ကျန်းရီကလည်း မိုးပြာမဟာဧကရာဇ်၏ လည်မျိုထဲတွင် စူးနေသော အဆိပ်ဆူးတစ်ချောင်းလိုပင်။ သူ မအိပ်နိုင်၊ မစားနိုင် ဖြစ်နေသည်။

ကောင်းကင်စကြဝဠာမြို့ရှိ အကြီးဆုံးပလ္လင်ပေါ်တွင် ထိုင်နေသော မိုးပြာမဟာဧကရာဇ်၏ မျက်ခုံးများက ကောင်းကင်စကြဝဠာဘုံထဲရှိ ခပ်ရေးရေး တမလွန်ဘုံအရှိန်အဝါကဲ့သို့ ဖြစ်နေ၏။ အနာဂတ်တွင် မည်သို့ ဆက်ဖြစ်လာမည်ကို သူ မသိပေ။ သူ ကျန်းရီနှင့် အနှေးနှင့် အမြန်ဆိုသလို တိုက်ခိုက်ရမည်ကိုသာ သိသည်။

လူသားမျိုးနွယ်တွင် ဧကရာဇ်တစ်ပါးသာ ရှိနိုင်ပေသည်။

***