အခန်း (၈၂၁)

“ဆရာဦးလေး၊ ဒီရေထိန်းချုပ်နည်းစနစ်ကို လေ့ကျင့်ဖို့အတွက် ဘယ်လိုလုပ်ရမလဲ”

ကျန်းယွင်ကျီက မျှော်လင့်နေသောမျက်လုံးအစုံဖြင့် ဟန်မူယဲ့ကို ကြည့်သည်။

ဟန်မူယဲ့က ညင်သာစွာခေါင်းညိတ်သည်။

“ရေက အရမ်းသိမ်မွေ့တယ်။ ဒီတောရိုင်းမြေမှာ မင်းက နှစ်တစ်ရာအချိန်ယူရင်တောင် ဒါကို လေ့ကျင့်နိုင်မှာမဟုတ်ဘူး”

“မင်းက ပြင်းပြင်းထန်ထန်စီးဆင်းနေတဲ့ မြစ်ရေကို မြင်ဖူးလား။ အဆုံးမရှိတဲ့ အပြာရောင်ရေလှိုင်းတွေနဲ့ ကျယ်ပြန့်တဲ့ပင်လယ်ကို မြင်ဖူးလား”

ဟန်မူယဲ့၏ မေးခွန်းများကြောင့် ကျန်းယွင်ကျီ၏မျက်နှာထားက ရှုပ်ထွေးလာသည်။

ဟန်မူယဲ့၏ စကားအဆုံးတွင် ကျန်းယွင်ကျီက ခေါင်းခါလိုက်ပြီး စကားပြောသည်။

“ဆရာဦးလေး၊ ဒီတောရိုင်းမြေမှာ ရွှံ့အိုင်နဲ့ ရေဆိုးကန်တွေပဲရှိတယ်။ မြစ်နဲ့ပင်လယ်တွေ မရှိဘူး”

“ကျွန်တော်အခု နားလည်သွားပြီ။ ရွံ့အိုင်ကိုကြည့်ပြီး ရေထိန်းချုပ်နည်းစနစ်ကို လေ့ကျင့်ချင်တာ ကျွန်တော်ရူးနေလို့ပဲ”

သူက မတ်တပ်ရပ်လိုက်ပြီး ဟန်မူယဲ့ကိုဦးညွတ်၍ ထွက်သွားရန်ပြင်သည်။

ဟန်မူယဲ့က ပြုံးလိုက်ပြီး လက်ထဲတွင်ရှိသော ကျောက်စိမ်းပေလွှာကို ကြည့်သည်။

“မင်းက ရေထိန်းချုပ်နည်းစနစ်ကို ရွှံ့အိုင်မှာ မလေ့ကျင့်နိုင်ဘူးတဲ့လား”

“ဘယ်သူက အဲဒီလိုပြောလဲ”

....

“ဆရာက ရေနဲ့မြက်ပင်တွေပေါတဲ့ ရွှံ့အိုင်ကို ရှာချင်တာလား”

တုစန်ကျန်းက စဉ်းစားကြည့်လိုက်ပြီး ပြောသည်။

“ကျွန်တော်က တစ်နေရာကို သိထားတယ်။ ချင်းယွင်မြို့ရဲ့ အနောက်ဘက် မိုင်သုံးသောင်းအကွာမှာ ယွင်ချီရွှံ့အိုင် ရှိတယ်။ အဲဒီရွှံ့အိုင်က မိုင်ထောင်ချီကျယ်ဝန်းတယ်”

ထိုသို့ကျယ်ဝန်းသော ရွှံ့အိုင်တွင် ရေနှင့် မြက်ပင်များ ပေါကြွယ်ဝနေလိမ့်မည်။

တစ်ရက်အကြာတွင် တုစန်ကျန်းနှင့် တခြားလူများက ယွင်ရှီလိပ်ကို အမဲလိုက်ရန် တာဝန်လက်ခံ၍ ယွင်ချီရွှံ့အိုင်သို့ ထွက်လာကြသည်။

ဟန်မူယဲ့က ပတ်ဝန်းကျင်ကို လေ့လာပြီး ရှုခင်းကြည့်ချင်သည်ဟူသော အကြောင်းပြချက်ဖြင့် သူတို့နှင့်အတူလိုက်ပါရန် ဆုံးဖြတ်ခဲ့သည်။

ဝမ်ကျင်းထိုက်က ဟန်မူယဲ့၏လှုပ်ရှားမှုများကို ကန့်သတ်မထားပေ။ ယခုအချိန်တွင် သူက ရွှေနက်မိုင်းတွင်းဖြင့် အလုပ်ရှုပ်နေသည်။ ဟန်မူယဲ့က ချင်းယွင်မြို့မှ ထွက်သွားမည်ဟု ကြားလိုက်ရသောအခါတွင် သူက လွယ်ကူစွာ သဘောတူလိုက်သည်။

“ဂိုဏ်းတူညီလေးဟန်၊ တောရိုင်းထဲမှာ အားကောင်းတဲ့သားရဲတွေတင်မကဘဲ ဆိုးယုတ်တဲ့ကျင့်ကြံသူတွေလည်း ရှိနေကြတယ်”

ဝမ်ကျင်းထိုက်က တီးတိုးပြောလိုက်ပြီး ဟန်မူယဲ့၏ခါးတွင် ချိတ်ဆွဲထားသော ဝူယွဲ့ဓားကို ညွှန်ပြသည်။

“သန်မာတဲ့ရန်သူတစ်ယောက်နဲ့ ရင်ဆိုင်ရရင် ဒီဓားထဲမှာသိမ်းဆည်းထားတဲ့ ဓားနည်းစနစ်ကို အသက်သွင်းပြီး အရေးပေါ်အချက်ပြလိုက်ပါ”

ထိုအရာသည် တရားဝင်တပည့်များအတွက်သာ ဖြစ်သည်။

ဟန်မူယဲ့ကြောင့်သာမဟုတ်လျှင် ဝမ်ကျင်းထိုက်က ထိုအကြောင်းကို ထုတ်ပြောမည်မဟုတ်ပေ။

ဟန်မူယဲ့က ဂိုဏ်း၏စမ်းသပ်မှုကို မကျော်ဖြတ်ရသေးသော်လည်း ဂိုဏ်း၏ တရားဝင်တပည့်တစ်ယောက် ဖြစ်လာလိမ့်မည်။ ဝမ်ကျင်းထိုက်က ထိုအချက်ကို သတိထားမိသည်။

“ကျေးဇူးပါပဲ ဂိုဏ်းတူအစ်ကိုကြီး”

ဟန်မူယဲ့က ခေါင်းညိတ်လိုက်ပြီး ဓားတို၏ဓားရိုးကို ဆုပ်ကိုင်သည်။

“ရန်သူတစ်ယောက်နဲ့တွေ့လာရင် ဓားချက်ကို အရင်ဆုံး မြည်းကြည့်ခိုင်းလိုက်မယ်”

ထိုစကားကြောင့် ဝမ်ကျင်းထိုက်က ကျယ်လောင်စွာရယ်လိုက်သည်။

ဓားကျင့်ကြံသူတစ်ယောက်သည် ထိုသို့ပင်ဖြစ်သင့်သည်။

ဟန်မူယဲ့က တံခါးဝမှ ထွက်သွားသောအခါတွင် ဝမ်ကျင်းထိုက်၏မျက်နှာထားက ပျော့ပြောင်းသွားသည်။

သူက ဟန်မူယဲ့နှင့် ရန်ငြိုးမရှိပေ။ ရွှေနက်မိုင်းတွင်းကို တူးဖော်ပြီးသောအခါတွင် သူက ဟန်မူယဲ့ကို စမ်းသပ်ပွဲတွင် ပါဝင်ယှဉ်ပြိုင်ရန် လွှတ်ပေးရလိမ့်မည်။ အနာဂတ်တွင် သူက ဂိုဏ်းတွင်း၌ ဆက်သွယ်မှုတစ်ခုကို တည်ဆောက်နိုင်လိမ့်မည်။

....

ဓားပျံ၏အမြန်နှုန်းကြောင့် မိုင်သုံးသောင်းကို နာရီဝက်ဖြင့် ရောက်လာခဲ့သည်။

သူတို့က ဓားပျံများကို ရပ်တန့်လိုက်သောအချိန်တွင် စိမ်းလန်းသောကွင်းပြင်ကို မြင်လိုက်ရသည်။

ရွှံ့အိုင်နေရာများသည် အနည်းငယ်လှိုင်းထသွားပြီး ရေခိုးရေငွေ့နှင့်အတူ မဖော်ပြနိုင်သော အနံ့အသက်တစ်ခုကို သယ်ဆောင်ထားသည်။

အစိမ်းရောင်အင်မော်တယ်စွမ်းအင်သည် ရေခိုးရေငွေ့ဖြင့် ပေါင်းစပ်နေပြီး ပတ်ဝန်းကျင်တွင် တိမ်တိုက်မြူခိုးများသဖွယ် ပြန့်ကျဲနေသည်။

ဤနေရာသည် မိုင်တစ်ထောင်ကျယ်ဝန်းသော ယွင်ချီရွှံ့အိုင် ဖြစ်သည်။

ဟန်မူယဲ့က အောက်သို့ဆင်းလာသောအခါ နောက်တွင်ပါလာသော တုစန်ကျန်းနှင့် တခြားလူများ၏မျက်နှာသည် ဖြူဖျော့နေကြသည်။

သူတို့၏မျက်လုံးထဲတွင် ထိတ်လန့်မှုကို မြင်နိုင်သည်။

ဟန်မူယဲ့၏ ဓားပျံစီးနင်းခြင်းအမြန်နှုန်းသည် အလွန်အံ့အားသင့်ဖွယ်ကောင်းသည်။ တုစန်ကျန်း၏ ဓားပျံကြောင့်သာမဟုတ်လျှင် သူတို့က နောက်တွင် ကျန်နေခဲ့ကြလိမ့်မည်။

အဓိကအချက်သည် ဟန်မူယဲ့က အစွမ်းကုန်သုံး၍ ပျံသန်းနေခြင်းမဟုတ်ပေ။ သူက ပေါ့ပါးစွာ လျှောက်သွားနေသကဲ့သို့ ပုံမှန်အတိုင်း ပျံသန်းခဲ့သည်။

“ငါက ရွံ့အိုင်ထဲကို သွားကြည့်လိုက်အုံးမယ်။ မင်းတို့က အစွန်အဖျားမှာ နေကြပါ”

ဟန်မူယဲ့က တစ်ဒါဇင်ခန့်ရှိသော ကျင့်ကြံသူများကိုကြည့်လိုက်ပြီး ကျယ်လောင်စွာပြောသည်။

“မင်းတို့ရဲ့တာဝန်က အရေးမကြီးဘူး။ ဆုံးရှုံးမှုတွေအားလုံးကို ငါဖြည့်ဆည်းပေးမယ်”

တုစန်ကျန်းနှင့် တခြားလူများက လျင်မြန်စွာ ဦးညွတ်လိုက်ကြသည်။

ဟန်မူယဲ့က သွက်လက်စွာလှုပ်ရှားလိုက်ပြီး တိမ်တိုက်နှင့်မြူခိုးများထဲသို့ ဝင်ရောက်သွားသည်။

“ညီအစ်ကိုတို့၊ ငါက မင်းတို့ကို မလိမ်ဘူးမဟုတ်လား”

ဟန်မူယဲ့ထွက်သွားသောအခါတွင် တုစန်ကျန်းက တစ်ဖက်သို့လှည့်ကြည့်၍ ပြုံးလိုက်သည်။

သူတို့အားလုံးက တစ်ယောက်ကိုတစ်ယောက် ကြည့်လိုက်ကြပြီး ပြုံးသည်။

တုစန်ကျန်း၏အပြုံးက မှိန်ဖျော့သွားပြီး လူတိုင်းကို ကြည့်သည်။ သူက လေးနက်သောမျက်နှာထားဖြင့် ပြောသည်။

“ငါက သတင်းတချို့ရထားတယ်။ သခင်လေးဟန်က ချင်းယွင်မြို့ကနေ မကြာခင်မှာ ထွက်သွားလိမ့်မယ်”

“ငါက သူ့နောက်ကိုလိုက်ဖို့ စီစဉ်ထားတယ်။ သခင်လေးဟန်က အရာအားလုံးကို ကိုယ်တိုင်လုပ်မနေသင့်ဘူး။ သူ့အတွက် အလုပ်လုပ်ပေးမယ့် လူတစ်ယောက် လိုတယ်”

သူ့စကားကြောင့် လူတိုင်း၏မျက်လုံးများက တောက်ပသွားကြသည်။

“ဟားဟား၊ လူအိုကြီးတု။ မုဆိုးမချန်ရဲ့အိမ်မှာ သေရည်သောက်လို့ကောင်းတယ်မဟုတ်လား”

“ညီအစ်ကိုတု၊ ၊ သခင်လေးဟန်ရဲ့နောက်ကိုလိုက်ပြီး ကောင်းကောင်းနေရမယ်ဆိုရင် မင်းအတွက် မိစ္ဆာတစ်ဝက်မိန်းကလေးတစ်ယောက်ကို ကိုယ်လုပ်တော်အဖြစ် ဝယ်ပေးမယ်”

လူတိုင်းက ရယ်သံများဖြင့် ပျော်ရွှင်စွာစကားပြောလိုက်ကြသည်။

အင်မော်တယ်ကမ္ဘာတွင် လူသစ်တစ်ယောက်ဖြစ်သော ဟန်မူယဲ့က ကိစ္စများကို ဆောင်ရွက်ရန်အတွက် လူတချို့လိုအပ်လိမ့်မည်။

သူတို့က ထိုတာဝန်အတွက် အသင့်တော်ဆုံးဖြစ်သည်။

ဟန်မူယဲ့၏နောက်သို့ လိုက်သွားနိုင်လျှင် အခွင့်အရေးကောင်းများကို သေချာပေါက် ရရှိလိမ့်မည်။

ချင်းယွင်မြို့မှ ထွက်ခွာလာခြင်းသည် သူတို့လို အဆင့်နိမ့်ကျင့်ကြံသူများအတွက် ကွာခြားချက်သိပ်မရှိပေ။

လူတိုင်းက သဘောတူလိုက်သောအခါတွင် တုစန်ကျန်းက အပြုံးတစ်ခုနှင့်အတူ လက်ခုပ်တီးသည်။

“အဲဒါဆို ဒီလိုပဲ သတ်မှတ်လိုက်ပြီ”

“ငါတို့က ဘာမှလုပ်စရာမရှိဘူးမဟုတ်လား။ ယွင်ရှီလိပ်တွေကို အမဲလိုက်ကြတာပေါ့”

“ငါတို့က သခင်လေးဆီကနေ အခွင့်အရေးယူနေလို့မဖြစ်ဘူးလေ”

ထိုစကားကြောင့် လူတိုင်းက အပြုံးများနှင့်အတူ ခေါင်းညိတ်ကြသည်။

သူတို့က ဟန်မူယဲ့၏နောက်သို့ မလိုက်ခဲ့လျှင် ဟန်မူယဲ့၏ ဝိညာဉ်ကျောက်တုံးများကို လက်ခံနိုင်သည်။

သို့သော် သူတို့က ဟန်မူယဲ့၏နောက်သို့ လိုက်ချင်သောကြောင့် အနည်းဆုံး ကိုယ်ပိုင်စွမ်းရည်ကို ထုတ်ပြရမည်။

သူတို့က ယွင်ရှီလိပ်ကိုပင် အမဲမလိုက်နိုင်လျှင် တခြားလူများ၏အထင်သေးခြင်းကို ခံရလိမ့်မည်။

“ကောင်းပြီ။ ငါတို့အားလုံးက ဝါရင့်မုဆိုးတွေပဲ။ ဒီခရီးအတွက် တာဝန်ကို ပြည့်စုံအောင်မလုပ်နိုင်ရင် ဟာသဖြစ်သွားလိမ့်မယ်”

အနက်ရောင်ဝတ်စုံနှင့် လူအိုကြီးတစ်ယောက်က ခပ်ဟဟရယ်လိုက်ပြီး တိမ်တိုက်နှင့်မြူခိုးများကို ကြည့်လိုက်သည်။

သူက လက်ကိုဆန့်ထုတ်ပြီး ပြောသည်။

“ဟိုဘက်မှာပဲ”

သူတို့အားလုံးက စကားမပြောဘဲ အငွေ့အသက်များကိုသိမ်းဆည်း၍ တိတ်ဆိတ်စွာ လှုပ်ရှားလိုက်ကြသည်။

ထိုအချိန်တွင် ဟန်မူယဲ့က ရွှံ့အိုင်၏ မိုင်သုံးရာအကွာသို့ ရောက်နေသည်။

“ဂါး ....”

ပေသုံးဆယ်ရှည်လျားသော အနက်ရောင်ပုံရိပ်တစ်ခုသည် ရေဗွက်တစ်ခုကို ဖြစ်ပေါ်စေပြီး ခုန်ထွက်လာသည်။

သားရဲ၏ သွေးဆာသောအငွေ့အသက်သည် အရိုင်းဆန်သောအငွေ့အသက်နှင့်အတူ အရင်ဆုံး ပြေးထွက်လာသည်။

ထိုစွမ်းအားသည် လူတစ်ယောက်၏သွေးကို ရပ်တန့်သွားစေပြီး လှုပ်ရှားနိုင်တော့မည်မဟုတ်ပေ။

ဟန်မူယဲ့က လေထုထဲတွင်ရပ်နေပြီး ချဉ်းကပ်လာသော ပေသုံးဆယ်သားရဲကို ကြည့်သည်။

ထိုသားရဲက ခြေလေးဖက်ရှိပြီး ချွန်ထက်သောသွားများနှင့် အမြီးရှည်တစ်ချောင်းကို ပိုင်ဆိုင်ထားသည်။ အနက်ရောင်ကြေးခွံများက တစ်ကိုယ်လုံးကို လွှမ်းခြုံနေသည်။

ထိုအရာသည် မိချောင်းနှင့်တူသော သာမန်သားရဲတစ်ကောင်သာ ဖြစ်သည်။ သို့သော် ဤနေရာတွင် အနေကြာလာသောကြောင့် မိစ္ဆာစွမ်းအင်တချို့ကို အသုံးပြုနိုင်သည်။

သားရဲ၏ခန္ဓာကိုယ်က အင်မော်တယ်စွမ်းအင်ကို စုပ်ယူသောအခါတွင် မိစ္ဆာစွမ်းအင်က အလိုလျောက် ပေါ်ထွက်လာလိမ့်မည်။

မိချောင်းသားရဲက ပါးစပ်ဖွင့်ပြီး ဟန်မူယဲ့ကို နှစ်ပိုင်းပြတ်သွားအောင် ကိုက်ချရန် ကြိုးစားနေသည်။

“ရွှပ် ....”

ထိုသားရဲက ဟန်မူယဲ့ဆီသို့ မရောက်နိုင်ဘဲ ဓားတစ်ချက်ကြောင့် နှစ်ပိုင်းပြတ်သွားသည်။

သွေးနှင့်ချီသည် နေရာအနှံ့တွင် ပြန့်ကျဲသွားသည်။

မှုန်မှိုင်းနေသောရေပြင်သည် ရုတ်တရက်လှုပ်ရှားလာပြီး မိချောင်းသားရဲများ ပေါ်ထွက်လာကြသည်။

ထိုသားရဲများသည် ပေသုံးဆယ်စီရှည်လျားပြီး သတ်ဖြတ်လိုစိတ်များကို ထုတ်လွှတ်နေသည်။

သူတို့က ဟန်မူယဲ့၏ဓားချက်ကြောင့် နှစ်ပိုင်းပြတ်သွားသောသားရဲကို ကိုက်ဖြတ်နေကြသည်။

တချို့သားရဲများက စိတ်မရှည်တော့ဘဲ ဟန်မူယဲ့ဆီသို့ ခုန်ဝင်လာကြသည်။

ဟန်မူယဲ့၏ဓားက လှုပ်ရှားသွားပြီး ခုန်ဝင်လာသော သားရဲတိုင်းကို သတ်ဖြတ်ပစ်ခဲ့သည်။

ထိုသားရဲများ၏ သေဆုံးမှုသည် တခြားသားရဲများ၏ ကြမ်းတမ်းမှုကို နှိုးဆွနိုင်ခဲ့သည်။ သူတို့အားလုံးက ဟိန်းဟောက်လိုက်ပြီး ဟန်မူယဲ့ကို ခုန်အုပ်ကြသည်။

ဟန်မူယဲ့၏ ဓားအလင်းသည် ကြယ်အလင်းအဖြစ် ပြောင်းလဲသွားပုံရသည်။

သူက သုံးပေအတွင်း၌ ပြိုင်ဘက်ကင်းသည်။

သူက နောက်ထပ်မိုင်တစ်ရာအကွာသို့ ရောက်လာသောအခါတွင် သားရဲအနည်းငယ်ကသာ သူ့ဆီသို့ ချဉ်းကပ်လာရဲတော့သည်။

မိုင်တစ်ရာခရီးသည် သွေးများဖြင့် ပြည့်နှက်နေသည်။

“ဘုတ်”

ပေငါးဆယ်ရှည်လျားသော မြွေတစ်ကောင်က အောက်သို့ ပြုတ်ကျသွားသောအခါတွင် ဟန်မူယဲ့က ပတ်ဝန်းကျင်ကို ကြည့်လိုက်သည်။

တိမ်တိုက်နှင့်မြူခိုးများထဲတွင် ထွက်ပေါ်လာရန် မဝံ့ရဲသော သားရဲတချို့ ပုန်းအောင်းနေကြသည်။

သူက ဆက်လက်မတိုက်ခိုက်ဘဲ တစ်ချက်လှုပ်ရှား၍ မြူခိုးများကြားသို့ ဝင်ရောက်သွားသည်။

သူ့နောက်တွင် ဟိန်းဟောက်သံများပေါ်ထွက်လာပြီး တိမ်တိုက်နှင့်မြူခိုးများသည် လှုပ်ရှားသွားကြသည်။

ထိုသားရဲများက ဟန်မူယဲ့သတ်ဖြတ်ခဲ့သော တခြားနေရာများသို့ ဦးတည်လိုက်ကြသည်။

သူတို့အတွက် စားသောက်ရန် အခွင့်ကောင်းတစ်ခု ဖြစ်သည်။

ရှုပ်ထွေးသောဟိန်းဟောက်သံများကို ကြားလိုက်ရသောအခါတွင် ဟန်မူယဲ့က ပြုံးသည်။ သူက အငွေ့အသက်ကို ထိန်းချုပ်ထားပြီး မိုင်တစ်ရာအကွာတွင်ရှိသော အစစ်အမှန်ရွှံ့အိုင်ဆီသို့ ပြေးသွားလိုက်သည်။

ဤနေရာသည် ကျယ်ဝန်းသောရေကန်တစ်ခုကဲ့သို့ ဖြစ်နေသည်။ မြူခိုးများသည် ပတ်ဝန်းကျင်ကို လွှမ်းခြုံထားပြီး ဆယ်ပေခန့်သာ မြင်ရသည်။

ဟန်မူယဲ့က ရေထဲသို့ ခုန်ဆင်းသွားပြီး နတ်ဘုရားသားရဲပါ့ရှား၏ စွမ်းအားကို ထုတ်ဖော်သည်။

ပါ့ရှားက ရေစွမ်းအားကို ထိန်းချုပ်သည်။ သူက ရေဓာတ်လိုက်ဖက်ညီမှုတွင် အဆုံးစွန်အထိ ရောက်နေသည်။

ယခုအချိန်၌ ရေထဲတွင် နေထိုင်ခြင်းသည် ကုန်းပေါ်တွင် နေထိုင်ခြင်းထက် ပိုမိုသက်တောင့်သက်သာရှိသည်။

ရေသည် ပေတစ်ထောင်ခန့်သာ နက်ရှိုင်းသည်။

သို့သော် သူက မရပ်တန့်ခဲ့ပေ။ ပါ့ရှားစွမ်းအားသည် အလင်းလွှာတစ်ခုအဖြစ် ပြောင်းလဲသွားပြီး ရေနှင့်ရွှံ့များကို တွန်းထုတ်လိုက်သည်။ သူက နောက်ထပ် ပေသုံးထောင်အကွာအထိ ဆက်လက်တိုးဝင်ပြီး ကျောက်သားကြမ်းပြင်တွင် ရပ်တန့်လိုက်သည်။

ဤနေရာသည် ရွှံ့အိုင်၏ အစစ်အမှန်ကြမ်းပြင် ဖြစ်သည်။

ဟန်မူယဲ့၏ ပေတစ်ရာပတ်ဝန်းကျင်သည် ရှင်းလင်းနေပြီး အင်မော်တယ်ချီစွမ်းအင်သာ ဝင်ရောက်နိုင်သည်။

သူက အသက်ပြင်းပြင်းရှူသွင်းလိုက်ပြီး ပတ်ဝန်းကျင်တွင်ရှိသော အင်မော်တယ်ချီစွမ်းအင်များသည် ရေစီးကြောင်းများအဖြစ် ပြောင်းလဲသွားကြသည်။

ရေထိန်းချုပ်ခြင်းနည်းစနစ် ....

အံ့ဖွယ်ဝိညာဉ်ဓားဂိုဏ်း၏ ကျင့်ကြံခြင်းနည်းစနစ် ....

အစစ်အမှန် ကျင့်ကြံခြင်းနည်းစနစ် ဖြစ်သည်။

လှုပ်ရှားနေသော အင်မော်တယ်ချီစွမ်းအင်သည် ရေအဖြစ် ပြောင်းလဲသွားပြီး သူ့ခန္ဓာကိုယ်ထဲသို့ တိုးဝင်လာသည်။ ထိုစွမ်းအားသည် သူ၏ ဝိညာဉ်သွေးကြောထဲတွင်ရှိသော ချီစွမ်းအင်နှင့် ထိတွေ့သွားပြီး ရောယှက်နေသည်။

ဟန်မူယဲ့က မျက်လုံးများကို မှေးကျဉ်းလိုက်သည်။

ထိုအရာသည် အင်မော်တယ်အသွင်ပြောင်းရေကန်သို့ မဝင်ရောက်ခြင်း၏ အားနည်းချက်ဖြစ်သည်။

အင်မော်တယ်အသွင်ပြောင်းရေကန်တွင် နှစ်တစ်ထောင်ကြာအောင် နေထိုင်ပြီး ခန္ဓာကိုယ်ထဲတွင်ရှိသော ချီစွမ်းအင်ကို ပြောင်းလဲပစ်နိုင်မည်ဆိုလျှင် အင်မော်တယ်ချီကို ကျင့်ကြံရာ၌ အတားအဆီးရှိမည်မဟုတ်ပေ။

ထိုသို့မဟုတ်လျှင် ခက်ခဲစွာကျင့်ကြံထားရသော ချီစွမ်းအင်သည် အင်မော်တယ်စွမ်းအင်ကို နှောင့်ယှက်နေသောကြောင့် ကျင့်ကြံရန် အလွန်ခက်ခဲလိမ့်မည်။

‘ချီစွမ်းအင်ကျင့်ကြံခြင်းကို ပယ်ဖျက်ပစ်လိုက်ရမလား’

ဟန်မူယဲ့က ခေါင်းခါသည်။

မဖြစ်နိုင်ပေ။

ချီစွမ်းအင်ကျင့်ကြံခြင်းသည် လူတစ်ယောက်အတွက် အခြေခံအုတ်မြစ် ဖြစ်သည်။

သူက ချီစွမ်းအင်ကို ပယ်ဖျက်လိုက်လျှင် သန်မာသောရုပ်ခန္ဓာနှင့် သာမန်လူတစ်ယောက်သာ ဖြစ်သွားလိမ့်မည်။

ပြန်လည်ကျင့်ကြံရန်အတွက် အလွန်အချိန်ကြာလိမ့်မည်။

ထို့အပြင် သူ၏ ချီစွမ်းအင်ကျင့်ကြံခြင်းသည် အလွန်အားကောင်းသောကြောင့် ပယ်ဖျက်ပစ်ချင်လျှင် အာရုံစိုက်ခံရလိမ့်မည်။

ယွင်ချီရွှံ့အိုင်တွင် ချီစွမ်းအင်ကို ပယ်ဖျက်လိုက်လျှင် မိုင်တစ်သန်းပတ်ဝန်းကျင်သည် တုန်ခါသွားပြီး တောက်ပသောချီစွမ်းအင်အလင်းဖြင့် လွှမ်းခြုံခံရလိမ့်မည်။