အန္တိမမူလ စိတ်ဝိညာဉ်ကျောက်တုံး၊ ကြမ္မာဆိုးစာအုပ် အဆင့်မြှင့်ခြင်း

‘အန္တိမမူလ ကျင့်ကြံမှုစွမ်းရည်က ဘာဖြစ်လို့ ငါ့ရဲ့ အန္တိမမူလကမ္ဘာပေါ်မှာ မတ်တတ်ရပ်နေရတာလဲ’ ဟန်ကျွယ်ဟာ ဝတ်ရုံနက်ကို နားမလည်နိုင်စွာ ကြည့်လိုက်ပါတယ်။

ဝတ်ရုံနက်ဟာ ရှေ့မှာရှိတဲ့ ပဋိပက္ခကို ကြည့်ပြီး မျက်လုံးထဲမှာ ရူးသွပ်မှုတွေ ပြည့်နေပါတယ်။

ဒီအချိန်မှာပဲ ပဋိပက္ခထဲက ဗိုလ်ကျစိုးမိုးတဲ့ ရောင်ဝါတစ်ခု ထွက်ပေါ်လာပါတယ်။ ဟန်ကျွယ်ဟာ ဒီရောင်ဝါကို တော်တော်လေး မရင်းနှီးပါဘူး။

“ဟမ်... အန္တိမမူလ နတ်ဘီလူး... ဘုန်းတန်ခိုးကြီးမားတဲ့ ကောင်းကင်တာအိုပညာရှိရဲ့ အမွေကို ဆက်ခံရတာနဲ့ လုပ်ချင်တိုင်း လုပ်ချင်လို့ရပြီ ထင်နေတာလား”

အေးစက်တဲ့ အသံတစ်သံ ထွက်ပေါ်လာပါတယ်။

ဟန်ကျွယ် လှမ်းကြည့်လိုက်တဲ့အခါ နောက်ရောက်လာတဲ့လူက မဟာတာအို နတ်စိတ်ဝိညာဉ် ဖြစ်နေတာကို တွေ့လိုက်ရပါတယ်။ သူ့ခန္ဓာကိုယ်ကို မဟာတာအို သင်္ကေတတွေ ပတ်လည်ဝိုင်းနေပြီး အချိန် အမှတ်အသားတွေက အောက်ခြေကနေ အပေါ်ကို မီးလျှံလိုမျိုး မြင့်တက်နေပါတယ်။ ခန္ဓာကိုယ်တစ်ခုလုံး နတ်အလင်းရောင် ဖြာထွက်နေတဲ့အတွက် ဒီမဟာတာအို နတ်စိတ်ဝိညာဉ်က အလွန်တရာမှ ဂုဏ်ကျက်သရေရှိပြီး ဩဇာညောင်းလှပါတယ်။

ဒီမဟာတာအို နတ်စိတ်ဝိညာဉ်ဟာ ခေါင်းမှာလည်း ချီလင်ဦးခေါင်းနဲ့ တူတဲ့ ဧကရာဇ်သရဖူကို ဆောင်းထားပါသေးတယ်။ မျက်လုံးတွေကတော့ သွေးရောင် ထုတ်လွှတ်နေပြီး ငရဲပြည်ကနေ သတ်ဖြတ်ပြီး ထွက်လာတဲ့ ရှေးဟောင်း စစ်နတ်ဘုရားတစ်ပါးလိုပါပဲ။

အန္တိမမူလ ကျင့်ကြံမှုစွမ်းရည်ဟာ ဒီမဟာတာအို နတ်စိတ်ဝိညာဉ်ကို အထင်သေးစွာ ငုံ့ကြည့်လိုက်ပါတယ် “မင်းကိုယ်မင်း ဘာထင်နေတာလဲ၊ အန္တိမဒဏ်ခတ်နတ်မင်းနဲ့ ဒဏ်ခတ်သမား ၁၂ ဖော်ကို လာခိုင်းလိုက်၊ ငါ သူတို့ အကုန်လုံးကို သတ်ပစ်မယ်၊ ပဋိပက္ခ၊ လောကဦးပဋိပက္ခ၊ တခြား မဟာတာအိုကမ္ဘာတွေလည်း အန္တိမမူလကမ္ဘာကို အညံ့ခံရမယ်၊ ငါ့လမ်းကို ဘယ်သူတားတား အသက်ပေးရလိမ့်မယ်”

“မောက်မာလိုက်တာ... ရိုင်းစိုင်းလိုက်တာ...” မဟာတာအို နတ်စိတ်ဝိညာဉ်ဟာ ဒေါသတကြီး အော်ဟစ်လိုက်ပါတယ်။

ဟန်ကျွယ်ရဲ့ အမြင်အရ ဒီမဟာတာအို နတ်စိတ်ဝိညာဉ်ဟာ မဟာတာအို အထွတ်အထိပ် ထိပ်ဆုံးအဆင့်မှာပါ။

ဟန်ကျွယ်ဟာ ပဋိပက္ခထဲက ထိပ်ဆုံးအဆင့်ရှိတဲ့ မဟာတာအိုပညာရှိချုပ် အကုန်လုံးကို မြင်ဖူးပါတယ်။ အမှောင်ထဲမှာ ပုန်းနေတဲ့ စွမ်းအားကြီးပုဂ္ဂိုလ်တွေကိုလည်း ထောက်လှမ်းပြီး သူတို့ရဲ့မျက်နှာနဲ့ ရောင်ဝါတွေကိုလည်း မှတ်သားထားပါတယ်။ ဒါပေမဲ့ ဟန်ကျွယ်ဟာ ဒီမဟာတာအို နတ်စိတ်ဝိညာဉ်ကို တစ်ခါမှ မမြင်ဖူးပါဘူး။

ကြည့်ရတာ ဒီမဟာတာအို နတ်စိတ်ဝိညာဉ်က မျိုးဆက်သစ်နဲ့ တူပါတယ်။ လက်ရှိအချိန်က ဟန်ကျွယ်နဲ့ အလွန်တရာ ဝေးကွာလွန်းတာ ဖြစ်ပါလိမ့်မယ်။

မဟာတာအို နတ်စိတ်ဝိညာဉ်ဟာ လက်ဝါးနှစ်ဖက်ကို ရုတ်တရက် တွန်းထုတ်လိုက်တဲ့အခါ မဟာတာအို စွမ်းအားဟာ ရေကာတာ ကျိုးကျသလို ဒလဟော ထွက်ပေါ်လာပါတယ်။ ပဋိပက္ခတစ်ခုလုံးကနေ မြောက်မြားလှစွာသော အလင်းတန်းတွေ တောက်ပလာပြီး မဟာတာအို နတ်စိတ်ဝိညာဉ်ရဲ့ လက်ဝါး ဦးတည်ရာကို တိုက်ခိုက်ကြပါတယ်။ ဒီမြင်ကွင်းက အလွန်တရာ ခမ်းနားထည်ဝါပြီး ကြည့်လို့ကောင်းပါတယ်။ မဟာတာအိုကမ္ဘာတစ်ခုက အန္တိမမူလ ကျင့်ကြံမှုစွမ်းရည်ကို ဖိနှိပ်နေသလိုမျိုးပါပဲ။

“ဟားဟား...”

အန္တိမမူလ ကျင့်ကြံမှုစွမ်းရည်ဟာ အရူးပမာ ရယ်မောလိုက်ပါတယ်။ ကြောက်စရာကောင်းတဲ့ ပဋိပက္ခ မဟာတာအိုရဲ့ ဟာရီကိန်းလို စွမ်းအားကို ရင်ဆိုင်ရတာတောင် အန္တိမမူလ ကျင့်ကြံမှုစွမ်းရည်ဟာ အကြောက်အလန့်မရှိဘဲ ဘယ်လောက်စွမ်းလဲဆိုတာ မြင်ချင်နေပါတယ်။

ပုံရိပ်ယောင် ကွဲကြေသွားပါတယ်။

ဟန်ကျွယ်ဟာ မျက်လုံးဖွင့်ပြီး မကျေနပ် ဖြစ်သွားပါတယ်။ အမြဲတမ်း အဓိကဖြစ်ရပ် မလာခင် ပုံရိပ်ယောင်က ကွဲကြေသွားတယ် မဟုတ်ပါလား။

ကြည့်ရသလောက်တော့ ဒီတိုက်ပွဲက အန္တိမမူလ ကျင့်ကြံမှုစွမ်းရည်ရဲ့ အကန့်အသတ် ထင်ပါတယ်။ ရှုံးရင်ရှုံး မရှုံးရင်လည်း ယိုယွင်းပျက်စီးသွားမှာပါ။

ပဋိပက္ခကို စိန်ခေါ်နိုင်တဲ့အထိ စွမ်းအားကြီးလာတဲ့အတွက် အန္တိမမူလ ကျင့်ကြံမှုစွမ်းရည်က အောင်မြင်တယ်လို့ ပြောလို့ရပါတယ်။ အနည်းဆုံး မျိုးဆက်သစ်တွေက သူ့နာမည်ကို နှစ်ပေါင်း မြောက်များစွာကြာအောင် မှတ်မိနေမယ် မဟုတ်ပါလား။

လောလောဆယ်တော့ ဟန်ကျွယ်ဟာ အန္တိမမူလ ကျင့်ကြံမှုစွမ်းရည်ကို မေ့ထားလိုက်ပါတယ်။ အငယ်တွေ အကုန်လုံးက အထင်ကြီးဖို့ကောင်းတဲ့ အနာဂတ်ကောင်းတွေ ရှိကြတဲ့အတွက် ဟန်ကျွယ် ဝင်ပါဖို့တောင် မလိုပါဘူး။

သူ လမ်းလွဲသွားရင် ကံကြမ္မာက တရားစီရင်ပါလိမ့်မယ်။

အဲဒီနောက် ဟန်ကျွယ်ဟာ မျက်လုံးမှိတ်ပြီး ဆက်ကျင့်ကြံပါတယ်။ မကြာခင်မှာ သူက အသက် သန်းတစ်ရာ ပြည့်တော့မှာပါ။

နှစ်သောင်းချီက လျင်မြန်စွာ ကုန်ဆုံးသွားပါတယ်။

ဒီအချိန်လောက်က ဟန်ကျွယ် တစ်ရေးမှေးရုံပဲ ရှိပါတယ်။

[သင်သည် အသက် သန်း ၁၀၀ ပြည့်ပြီ ဖြစ်သောကြောင့် သင့်ဘဝတွင် နောက်ထပ် ခြေတစ်လှမ်း ထပ်လှမ်းလိုက်ပါပြီ။ သင့်တွင် အောက်ပါရွေးချယ်မှုများ ရှိသည်။]

[၁။ ပဋိပက္ခကို ချက်ချင်း စုပ်ယူပါ။ ဆုလာဘ်အဖြစ် မဟာတာအို အပိုင်းအစ တစ်စ၊ လောကဦး အပိုင်းအစ တစ်စ၊ ဖန်တီးရှင် စိတ်ဝိညာဉ်ကျောက်တုံး တစ်တုံးနှင့် စနစ်၏ လုပ်ဆောင်ချက်တစ်ချက်အား အဆင့်မြှင့်တင်ရန် အခွင့်အရေး တစ်ကြိမ် ရရှိမည်။]

[၂။ သိုသိုသိပ်သိပ် ဆက်ကျင့်ကြံ၍ မူလ ရည်ရွယ်ချက်အတိုင်း နေထိုင်ပါ။ ဆုလာဘ်အဖြစ် မဟာတာအို အပိုင်းအစ တစ်စ၊ လောကဦး အပိုင်းအစ တစ်စ၊ ဖန်တီးရှင် စိတ်ဝိညာဉ်ကျောက်တုံး တစ်တုံး၊ အန္တိမမူလ စိတ်ဝိညာဉ်ကျောက်တုံး တစ်တုံးနှင့် စနစ်၏ လုပ်ဆောင်ချက်တစ်ချက်အား အဆင့်မြှင့်တင်ရန် အခွင့်အရေး တစ်ကြိမ် ရရှိမည်။]

[သင်သည် မိုးကောင်းကင် ပါရမီရှင် ဖန်တီးမှု အခွင့်အရေး တစ်ကြိမ်အား ရရှိပါသည်။]

ဟန်ကျွယ်ဟာ စိတ်လှုပ်ရှားသွားပြီး ချက်ချင်း နံပါတ်နှစ်ကို ရွေးချယ်လိုက်ပါတယ်။

[သင်သည် သိုသိုသိပ်သိပ် ဆက်ကျင့်ကြံမည်ကို ရွေးချယ်ခဲ့သောကြောင့် မဟာတာအို အပိုင်းအစ တစ်စ၊ လောကဦး အပိုင်းအစ တစ်စ၊ ဖန်တီးရှင် စိတ်ဝိညာဉ်ကျောက်တုံး တစ်တုံး၊ အန္တိမမူ စိတ်ဝိညာဉ်ကျောက်တုံး တစ်တုံးနှင့် စနစ်၏ လုပ်ဆောင်ချက်တစ်ချက်အား အဆင့်မြှင့်တင်ရန် အခွင့်အရေးတစ်ကြိမ် ရရှိမည်။]

[အန္တိမမူလ စိတ်ဝိညာဉ်ကျောက်တုံး: ကောင်းကင်တာအို စိတ်ဝိညာဉ်ကျောက်တုံးမှ ဆင့်ကဲ့ပြောင်းလဲလာသော ကျောက်တုံးဖြစ်ပြီး ဓမ္မရတနာများ အဆင့်မြှင့်ရန် ကူညီပေးနိုင်သည်။ အဆင့်မြင့်သွားသော ဓမ္မရတနာသည် မည်မျှပင် စွမ်းအားကြီးစေကာမူ သင့်အား တွယ်တာပြီး အမြဲတမ်း သင်ထိန်းချုပ်မှုအောက်တွင် ရှိလိမ့်မည်။]

ဟန်ကျွယ်ရဲ့ မျက်လုံးတွေဟာ တလက်လက် တောက်ပသွားပါတယ်။

‘ပစ္စည်းကောင်းပဲ’

ဟန်ကျွယ်ဟာ ကောင်းကင်တာအို စိတ်ဝိညာဉ်ကျောက်တုံးကို ကြမ္မာဆိုးစာအုပ်ဆီ မပေးရဲတော့ပါဘူး။ စွမ်းအားကြီးလာပြီး သူ့ကို ပြန်ဝါးမျိုမှာ ကြောက်လို့ပါ။ အခုတော့ ဝါးမျိုခံရမှာကို ကြောက်စရာ မလိုတော့ပါဘူး။

ဟန်ကျွယ်ဟာ ချက်ချင်း ပင်မတာအိုစက်ကွင်းဆီ ရွှေ့ပြောင်းသွားလာပြီး ကြမ္မာဆိုးစာအုပ်နဲ့ အန္တိမမူလ စိတ်ဝိညာဉ်ကျောက်တုံးကို ထုတ်ယူလိုက်ပါတယ်။

အန္တိမမူလ စိတ်ဝိညာဉ်ကျောက်တုံးက ကောင်းကင်တာအို စိတ်ဝိညာဉ်ကျောက်တုံးနဲ့ ပုံစံတူပေမဲ့ သူ့အရောင်က နီရဲပြီးနက်မှောင်နေပါတယ်။

ဟန်ကျွယ်ဟာ အန္တိမမူလ စိတ်ဝိညာဉ်ကျောက်တုံးကို ကြမ္မာဆိုးစာအုပ်နဲ့ ချက်ချင်း ပေါင်းစပ်လိုက်ပါတယ်။

[ကြမ္မာဆိုးစာအုပ်ကို အဆင့်မြှင့်တင်ရန်အတွက် အန္တိမမူလ စိတ်ဝိညာဉ်ကျောက်တုံးကို အသုံးပြုလိုပါသလား။]

အသုံးပြုမည်။

[အဆင့်မြှင့်တင်မှု စတင်ပါပြီ။]

ကြမ္မာဆိုးစာအုပ်နဲ့ အန္တိမမူလ စိတ်ဝိညာဉ်ကျောက်တုံးဟာ တစ်ချိန်တည်း ပျောက်ကွယ်သွားပါတယ်။ ဟန်ကျွယ်ရဲ့ ရင်ထဲမှာ မျှော်လင့်ချက်တွေ ပြည့်သွားပါတယ်။ နောက်ထပ် ဟန်ကျွယ်လုပ်ရမှာက စောင့်ဆိုင်းဖို့ပါ။

ဟန်ကျွယ်ဟာ ကြမ္မာဆိုးစာအုပ်က အန္တိမ အကောင်းစား ရတနာ ဖြစ်သွားရင် ဘယ်လောက် ကြောက်ဖို့ကောင်းမလဲဆိုတာကို စမ်းသပ်ကြည့်ချင်ပါသေးတယ်။

ဒီအချိန်မှာပဲ...

[နဝမပဋိပက္ခသည် သင့်အား အိပ်မက်ပေးလို၏။ လက်ခံမည်လော။]

‘နဝမပဋိပက္ခ... ဒီအချိန်ကျမှလား...’

ဟန်ကျွယ်ဟာ လက်လွတ်စပယ်မလုပ်ဘဲ စနစ်ကို မေးလိုက်ပါတယ် “ငါ ဒီအိပ်မက်ကို လက်ခံရင် အသက်အန္တရာယ် ရှိနိုင်လား”

[သက်တမ်း ၁၀၀ ကွာဒလီယံ ကုန်ဆုံးပါမည်။ ဆက်လက် တွက်ချက်လိုပါသလား။]

ဆက်တွက်မယ်။

[မရှိပါ။]

ဟန်ကျွယ်ဟာ သက်ပြင်းရှည်ကြီးတစ်ချက် ချလိုက်ပါတယ်။ သူ ရင်ဆိုင်နေတာက နဝမပဋိပက္ခ ဖြစ်တဲ့အတွက် ဟန်ကျွယ်ဟာ သတိမထားဘဲ မနေရဲပါဘူး။

ဟန်ကျွယ်ဟာ အိပ်မက်ကို လက်ခံဖို့ ရွေးချယ်လိုက်ပါတယ်။ အိပ်မက်နယ်မြေက ဗလာနယ်မြေပါ။

ဟန်ကျွယ်ဟာ နဝမပပဋိပက္ခကို ကြည့်လိုက်တဲ့အခါ အရင်အတိုင်းပဲ လျှို့ဝှက်ဆန်းကြယ်ပြီး မူလရုပ်သွင်ကို မမြင်နိုင်တာ တွေ့လိုက်ရပါတယ်။

နဝမပဋိပက္ခ “ဟန်ကျွယ်... ငါ မင်းကို တည်ရှိမှုတစ်ခု အကြောင်း မေးချင်တယ်”

“အို... စီနီယာမသိတဲ့ တည်ရှိမှုလည်း ရှိသေးတာလား” ဟန်ကျွယ်က အပြုံးနဲ့ မေးလိုက်ပါတယ်။

ဟန်ကျွယ်အနေနဲ့ ကြောက်သလိုလို ရွံ့သလိုလို လုပ်နေလို့ မရပါဘူး။ ဒီလိုလုပ်နေရင် ချို့ယွင်းချက် ပေါ်သွားနိုင်ပါတယ်။ ဒါပေမဲ့ ဟန်ကျွယ်ဟာ တကယ်ပဲ ဘာဖိအားမှ မခံစားရပါဘူး။ အမှောင်သခင်ကြီးက သက်သက်ရှိတယ်ဆိုတာကို ဆန်းကြယ် ကံတရားစာအုပ်နဲ့ ပြောင်းလဲပြီးပြီ မဟုတ်ပါလား။

“အမှောင်သခင်ကြီး... မင်းလည်း သူ ကျိန်စာတိုက်တာ ခံရတယ်ဆို”

ဟန်ကျွယ်ဟာ မျက်မှောင်ကြုတ်သွားပါတယ် “ဟုတ်တယ်၊ တိတိကျကျ ပြောရရင် ကောင်းကင်တာအိုထဲက ကျင့်ကြံသူ တော်တော်များများ သူ ကျိန်စာတိုက်တာကို ခံခဲ့ရတယ်၊ အရင်တုန်းက အမှောင်သခင်ကြီးကို ပဋိပက္ခ အင်အားစုတွေ စေလွှတ်ထားတဲ့ သူလျှိုတစ်ယောက်လို့ ထင်ထားခဲ့တာ၊ သူက စီနီယာကိုလည်း ကျိန်စာတိုက်လို့လား”

“မဟုတ်ပါဘူး၊ ငါ သူ့ကံတရားကို တွက်ချက်ကြည့်တာ ကပ်ဘေးကို အစပျိုးလိမ့်မယ်လို့ တွက်ချက်မိလို့”

“ဟုတ်လား... သူက ဘယ်သူလဲ… ဒီလောက်ကြမ်းရင် တခြားတာအိုဖန်တီးရှင်တွေ ခေါ်ပြီး နှိမ်နင်းသင့်တယ်၊ ကျွန်တော်လည်း တာအိုဖန်တီးရှင် ဖြစ်လာပြီ၊ ဒါပေမဲ့ ကျွန်တော် သူဘယ်သူလဲ‌ဆိုတာကို တွက်ချက်လို့ မရဘူး၊ တကယ်ကို ထူးဆန်းတယ်၊ သူလည်း တာအိုဖန်တီးရှင်ပဲလား မသိဘူး” ဟန်ကျွယ်ဟာ မျက်မှောင်ကြုတ်ပြီး စိုးရိမ်တဲ့ မျက်နှာနဲ့ ပြောလိုက်ပါတယ်။

နဝမပဋိပက္ခ “အမှောင်သခင်ကြီးက စာအုပ်တစ်အုပ်နဲ့ ကျိန်စာတိုက်တယ်၊ ကောင်းကင်တာအိုထဲမှာ စာအုပ်ကို ဓမ္မရတနာအဖြစ် အသုံးပြုတဲ့ကျင့်ကြံသူတွေ ရှိလား”

“ကောင်းကင်တာအိုထဲမှာ စာအုပ်ကို ဓမ္မရတနာအဖြစ် အသုံးပြုတဲ့ ကျင့်ကြံသူတွေ အများကြီး ရှိတယ်၊ ဒါပေမဲ့ သူတို့တွေရဲ့ ကျင့်ကြံမှုက နိမ့်ပါးလွန်းတယ်၊ သူတို့ထဲမှာ အစွမ်းအထက်ဆုံးက ဖူရှီပဲ၊ ဖူရှီမှာ ပါးကွကားချပ်နဲ့ ရတနာစာအုပ်တစ်အုပ် ရှိတယ်၊ သူက တာအိုဘိုးဘေးရဲ့ တပည့်လည်း ဟုတ်တယ်”

နဝမပဋိပက္ခ “အမှောင်သခင်ကြီးရဲ့ ကျင့်ကြံမှုက သိပ်မမြင့်လောက်ဘူး၊ အန္တိမတာအိုရတနာကို ရသွားတာပဲ ဖြစ်လိမ့်မယ်၊ အန္တိမတာအိုရတနာက ဘယ်လောက် စွမ်းအားကြီးလဲဆိုတာကို မင်းလည်း သိမှာပါ၊ ဒီရတနာက တာအိုဖန်တီးရှင်ကို မခြိမ်းခြောက်နိုင်ပေမဲ့ တာအိုဖန်တီးရှင် အာရုံမခံမိအောင် ကံတရားကို ဟန့်တားနိုင်စွမ်း ရှိတယ်၊ မင်းရဲ့ တာအိုစက်ကွင်းကလည်း အန္တိမတာအိုရတနာ ဖြစ်လိမ့်မယ်၊ အဲဒါကြောင့် မင်း အားနည်းနေတဲ့အချိန်မှာ တခြားလူတွေက မင်းကို မရှာနိုင်တော့ဘူး”

ဟန်ကျွယ်ဟာ ခေါင်းခါလိုက်ပါတယ် “စီနီယာ... စီနီယာက ကျွန်တော်ကို သံသယ ဝင်နေတာလား၊ ကျွန်တော်က စီနီယာကို ဘယ်လိုလုပ်ပြီး တာအိုစက်ကွင်းထဲကနေ ကျိန်စာတိုက်နိုင်မှာလဲ၊ စီနီယာ ကျွန်တော်ဆီကို အိပ်မက်ထဲကနေ လာလည်နိုင်တာပဲ၊ ဒီတာအိုစက်ကွင်းက အဲဒီလောက်ကြီး မဟုတ်ပါဘူး”

နဝမပဋိပက္ခဟာ တိတ်ဆိတ်သွားပါတယ်။

[နဝမပဋိပက္ခသည် သင့်အပေါ် အကောင်းမြင်စိတ် ရှိသွားပါပြီ။ လက်ရှိ မျက်နှာသာပေးမှု: ကြယ်တစ်ပွင့်။]

‘ဘာလဲဟ... သူက ငါ့ကို အကောင်းမြင်စိတ် ရှိသွားတယ်၊ ဒါက တကယ်ကြီး စမ်းသပ်မှုလား...’

ဟန်ကျွယ်ဟာ အံ့အားသင့်သွားပေမဲ့ သတိလက်လွတ် မနေရဲသေးပါဘူး။ ကြယ်တစ်ပွင့် မျက်နှာသာပေးမှုက ဘာမှဟုတ်တာ မဟုတ်ပါဘူး။

နဝမပဋိပက္ခ “အမှောင်သခင်ကြီးကို စုံစမ်းဖို့ ငါ မင်းကို တာဝန်ပေးချင်တယ်၊ သူ ဘယ်သူလဲဆိုတာ ရှာတွေ့ရင် ငါ မင်းကို အခွင့်အရေးတစ်ခု ပေးမယ်၊ တာအိုဖန်တီးရှင်ကို ဒီထက်မြင့်မားတဲ့ အဆင့်ဆီ ဦးတည်ပေးနိုင်တဲ့ အခွင့်အရေးတစ်ခုပဲ”

နဝမပဋိပက္ခရဲ့ အသံက တည်ငြိမ်ပေမဲ့ ယုံကြည်ချက် အပြည့်ပါပဲ။

မြန်မာပြည် ငြိမ်းချမ်းပါစေ။