အခန်း (၈၃၀)

လူအများအပြားက ဓားကျင့်ကြံသူ ကျန်းကျန်ပေါင်ကို မှတ်မိလိုက်ကြသည်။ ထိုကျင့်ကြံသူက သူတော်စင်တစ်ဝက်အဆင့်သို့ ရောက်နေသော အံ့ဖွယ်ဝိညာဉ်ဓားဂိုဏ်း၏ ကျွမ်းကျင်သူတစ်ယောက် ဖြစ်သည်။

ကျန်းကျန်ပေါင်နှင့် ဖန်းမင်သည် စန်းဟော်မြို့၏ အစောင့်အရှောက်များ ဖြစ်ကြသည်။ ကျန်းကျန်ပေါင်သည် အံ့ဖွယ်ဝိညာဉ်ဓားဂိုဏ်းကို ကိုယ်စားပြုသည်။ တာအိုသခင်ဖန်းမင်က မဟာဝင်္ကပါကို ထိန်းချုပ်ထားပြီး ပန်းပဲပညာရှင်တစ်ယောက် ဖြစ်သည်။

ထိုနှစ်ယောက်သည် အမြဲဆက်ဆံရေးကောင်းခဲ့သည်။ သို့သော် ယနေ့တွင် ရန်သူများ ဖြစ်နေကြသည်။

“ဝီ”

ကျန်းကျန်ပေါင်က ဓားရှည်ကို မြှောက်လိုက်သည်။ ဓားအလင်းသည် စုစည်းသွားပြီး လေးထပ်ဓားမျှော်စင်တစ်ခုကို ဖြစ်ပေါ်လာစေသည်။

ဓားမျှော်စင်သည် ပေတစ်ရာရှည်လျားသော ဓားအလင်း ၁၃ခုကို ထုတ်ပေးပြီး လည်ပတ်နေသော ရွှေရောင်အလင်းလွှာကို တိုက်ခိုက်လိုက်သည်။

ကျန်းကျန်ပေါင်က ဓားရှည်တစ်လက်ကို ကိုင်ဆွဲထားပြီး တာအိုသခင်ဖန်းမင်ဆီသို့ ပြေးဝင်သွားသည်။

ကျန်းကျန်ပေါင်က လှုပ်ရှားလိုက်သောအခါတွင် တာအိုသခင်ဖန်းမင်က အင်္ကျီလက်ကို ခါယမ်းလိုက်ပြီး ပေတစ်သောင်းအကွာသို့ ရောက်သွားသည်။ ထို့နောက် သူက အော်ဟစ်လိုက်သည်။

“မင်းက ဘာဖြစ်လို့ မလှုပ်ရှားသေးတာလဲ”

“ဘုန်း”

သူ့စကားအဆုံးတွင် ပေတစ်ရာရှည်လျားသော ပုံရိပ်တစ်ခုက ပျံသန်းထွက်လာပြီး ကျန်းကျန်ပေါင်၏ဓားရှည်နှင့် ရင်ဆိုင်လိုက်သည်။

ပေါက်ကွဲသံသည် မိုင်တစ်ရာအထိ ပဲ့တင်ထပ်သွားသည်။ ဓားရှည်က ညည်းညူလိုက်ပြီး ကျန်းကျန်ပေါင်က နီရဲနေသော မျက်နှာဖြင့် ပေတစ်သောင်းအကွာသို့ လွင့်စင်သွားသည်။

“မဟာမိစ္ဆာလား”

သူက အံတင်းတင်းကြိတ်လိုက်ပြီး ဟိန်းဟောက်သည်။

ပေတစ်ရာမြင့်မားသောပုံရိပ်သည် ကျားဦးခေါင်းနှင့် လူသားခန္ဓာကိုယ်ကို ပိုင်ဆိုင်ထားသည်။ ကြိတ်ဆုံတစ်ခုနှင့် တူညီသော လက်သီးနှစ်ဖက်တွင် သွေးအလင်းများ ထုတ်ပေးနေသည့် အနက်ရောင်လက်အိမ်ကို ဝတ်ဆင်ထားသည်။

“တက်လှမ်းကျားမိစ္ဆာ”

စံအိမ်ထဲတွင် ဇောင်ပိုင်ချွမ်၏မျက်နှာထားက ပြောင်းလဲသွားပြီး တီးတိုးပြောသည်။

“အဲဒါက ခါးသီးအင်မော်တယ်နယ်မြေမှာရှိတဲ့ တက်လှမ်းအင်မော်တယ်မိစ္ဆာဘုရင်ရဲ့ လက်အောက်က ကိုယ်ရံတော်တွေပဲ”

အင်မော်တယ်မိစ္ဆာဘုရင်သည် မိစ္ဆာဘုရင်နှင့် မတူညီပေ။

မရေမတွက်နိုင်သော မိစ္ဆာဘုရင်များသည် ခါးသီးအင်မော်တယ်နယ်မြေတွင် ရှိနေကြသည်။ သို့သော် နယ်မြေတစ်ခုကို ထိန်းချုပ်နိုင်သော အထွတ်အထိပ်ကောင်းကင်အဆင့် ကျွမ်းကျင်သူကိုသာ အင်မော်တယ်ဟု ‌ခေါ်ဆိုနိုင်သည်။

အထွတ်အထိပ်ကောင်းကင်အဆင့် မိစ္ဆာဘုရင်များသည် နယ်မြေတစ်ခုကို ဖိနှိပ်ထားပြီး အဓိကဂိုဏ်းကြီးများနှင့် ယှဉ်ပြိုင်နိုင်ကြသည်။

“တက်လှမ်းအင်မော်တယ်မိစ္ဆာဘုရင်က ခါးသီးအင်မော်တယ်နယ်မြေရဲ့ ငှက်မျိုးနွယ်ကို ထိန်းချုပ်ထားပြီး ဖီးနစ်သွေး အင်မော်တယ်မိစ္ဆာဘုရင်နဲ့ ယှဉ်ပြိုင်နိုင်တယ်”

ကျောက်ချန်က ဟန်မူယဲ့ကိုကြည့်လိုက်ပြီး တီးတိုးပြောသည်။

“ဖီးနစ်သွေး အင်မော်တယ်မိစ္ဆာဘုရင်က ဖီးနစ်သွေးမျိုးဆက်ကို ပိုင်ဆိုင်ထားတယ်လို့ ပြောကြတယ်”

ဖီးနစ်သွေးမျိုးဆက်ကို ပိုင်ဆိုင်ထားသော ဖီးနစ်သွေး အင်မော်တယ်မိစ္ဆာဘုရင်က ရောက်မလာဘဲ တက်လှမ်းအင်မော်တယ်မိစ္ဆာဘုရင်၏ လက်အောက်ခံတစ်ယောက်က ရောက်လာခဲ့သည်။ ထိုအချက်သည် ထူးဆန်းနေသည်။

တစ်ဖက်တွင် လေပြင်းဓားပြများလည်း ရှိနေသေးသည်။

“အဲဒါဆိုရင် မင်းတို့ရဲ့ ဝမ်ရှန်ကုန်သွယ်ရေးအဖွဲ့က အဲဒီ အင်မော်တယ်မိစ္ဆာဘုရင်နှစ်ပါးအပေါ်မှာ မှီခိုနေတာမဟုတ်ဘူးလား”

ဟန်မူယဲ့က ဇောင်ပိုင်ချွမ်ကို လှည့်ကြည့်သည်။

သူ့စကားကို ကြားလိုက်ရသောအခါတွင် ဇောင်ပိုင်ချွမ်က ခါးသီးစွာပြုံးလိုက်ပြီး ပြောသည်။

“အစ်ကိုဟန်က ကျွန်တော်တို့ ဝမ်ရှန်ကုန်သွယ်ရေးအဖွဲ့ကို အထင်ကြီးနေတာပဲ။ ကျွန်တော်တို့ရဲ့နောက်ကွယ်မှာ ရွှေအင်မော်တယ်တစ်ယောက် ရှိနေရင်တောင် ဒီလောက်အဖြစ်ဆိုးမှာမဟုတ်ဘူး”

လူသားအင်မော်တယ်၊ ကောင်းကင်အင်မော်တယ်၊ ရွှေအင်မော်တယ်၊ အထွတ်အထိပ်ကောင်းကင် ....

အင်မော်တယ်ကမ္ဘာသည် သန်မာသူများ၏လောက ဖြစ်သည်။

ကျွမ်းကျင်သူတစ်ယောက်ကို ပိုင်ဆိုင်မထားလျှင် လုံလောက်သောကြွယ်ဝမှုကို စုဆောင်းနိုင်မည်မဟုတ်ပေ။

ရွှေအင်မော်တယ်အဆင့်၏ အထက်တွင်ရှိသော အထွတ်အထိပ်ကောင်းကင်အဆင့် ကျွမ်းကျင်သူများသည် အမျိုးမျိုးသော အင်မော်တယ်ကမ္ဘာများကို လွှမ်းမိုးနိုင်ကြသည်။ ရွှေအင်မော်တယ်များသည် အင်မော်တယ်ကမ္ဘာ၏ လွှမ်းမိုးနိုင်စွမ်းရှိသော ပုဂ္ဂိုလ်များပင် ဖြစ်ကြသည်။

ခါးသီးအင်မော်တယ်နယ်မြေ၏ အင်မော်တယ်မိစ္ဆာဘုရင်များသည် အထွတ်အထိပ်ကောင်းကင်အဆင့်သို့ ရောက်နေပြီး အင်မော်တယ်ကမ္ဘာတစ်ခုလုံးတွင် သောင်းကျန်းနိုင်သည်။

အံ့ဖွယ်ဝိညာဉ်ဓားဂိုဏ်း၏ နောက်ကွယ်တွင်လည်း အင်မော်တယ်မိစ္ဆာဘုရင်နှင့် ယှဉ်နိုင်သော ပြိုင်ဘက်ကင်းကျွမ်းကျင်သူများ ရှိနေကြလိမ့်မည်။

သို့သော် သူတို့၏အဆင့်တွင် လုံလောက်သောအကျိုးအမြတ် မရှိခဲ့လျှင် လွယ်ကူစွာလှုပ်ရှားမည်မဟုတ်ပေ။

အဆင့်နိမ့်ကျင့်ကြံသူများ အချင်းချင်းတိုက်ခိုက်နေရုံဖြင့် လုံလောက်သည်။

“ဘုန်း”

ကျားမိစ္ဆာက လက်သီးချက်ဖြင့် ထပ်မံတိုက်ခိုက်သည်။ ကျန်းကျန်ပေါင်က အစွမ်းကုန်သုံး၍ ခုခံလိုက်သော်လည်း မျက်နှာနီရဲသွားပြီး ပေတစ်ထောင်အထိ နောက်ဆုတ်လိုက်ရသည်။

ကျားမိစ္ဆာသည် အံ့ဖွယ်ဝိညာဉ်ဓားဂိုဏ်းမှ အစောင့်အကြပ်တပည့်ထက် ပိုမိုသန်မာနေသည်။

“ဝေါင်း”

ဟိန်းဟောက်သံနှင့်အတူ ကျားမိစ္ဆာတစ်ရာသည် စန်းဟော်မြို့တွင် ပေါ်လာကြသည်။

ထိုကျားမိစ္ဆာများသည် ဆယ်ပေရှည်လျားပြီး ကျားဦးခေါင်းနှင့် လူသားခန္ဓာကို ပိုင်ဆိုင်ထားကြသည်။ သူတို့က မီးခိုးပြာရောင်ချပ်ဝတ်ကို ဝတ်ဆင်ပြီး ဓားနှင့်လှံကို ကိုင်ဆွဲထားကြသည်။ သူတို့က ပေတစ်ရာအတွင်း၌ရှိသော လူတိုင်းကို တစ်ချက်တည်း သတ်ဖြတ်ပစ်နိုင်ကြသည်။

ချက်ချင်းဆိုသလိုပင် လုံခြုံပြီဟု ထင်နေသော ကျင့်ကြံသူများက ဖရိုဖရဲဖြစ်သွားကြသည်။

“သတ်”

ကျန်းကျန်ပေါင်က ‌ဒေါသတကြီး ဟိန်းဟောက်လိုက်ပြီး ကိုယ်ပိုင်လုံခြုံမှုကို အလေးမထား‌တော့ပေ။ သူ့ဓားက အစိမ်းရောင်အလင်းကို ထုတ်လွှတ်၍ ပေတစ်ရာမြင့်မားသော ကျားမိစ္ဆာကို ခုတ်ချသည်။

ရွှေရောင်ဓားမျှော်စင်သည် ဓားအလင်း ၁၃ခုနှင့်အတူ ဝင်္ကပါကို ဆက်တိုက်ဖိနှိပ်ထားသည်။

သူက ထူးခြားသောနည်းလမ်းများနှင့် အစောင့်အကြပ်တပည့်တစ်ယောက် ဖြစ်သည်။ အကယ်၍ တာအိုသခင်ဖန်းမင် သို့မဟုတ် တက်လှမ်းကျားမိစ္ဆာကို တစ်ဦးချင်းစီ ရင်ဆိုင်ရမည်ဆိုလျှင် လွယ်ကူစွာ အနိုင်ရလိမ့်မည်။

ကျားမိစ္ဆာက ကျန်းကျန်ပေါင်နှင့် တိုက်ခိုက်နေ‌သောအချိန်တွင် တာအိုသခင်ဖန်းမင်က ထိုင်ကြည့်မနေခဲ့ပေ။

သူက ဓားမျှော်စင်၏ဖိနှိပ်မှုကြောင့် အားနည်းသွားသော်လည်း သေခြင်းကိုးပါးအင်းဆက်နှင့် လေပြင်းဓားပြများကို ဖိနှိပ်နိုင်သေးသည်။ သူက လက်မြှောက်လိုက်သောအခါတွင် အဆောင်လက်ဖွဲ့များက ပြန့်ကျဲသွားပြီး ကြိုးအဖြစ် ပြောင်းလဲ၍ သေခြင်းကိုးပါးအင်းဆက်များကို ချုပ်နှောင်လိုက်ကြသည်။

သူက အင်းဆက်များကို ချုပ်နှောင်လိုက်ပြီး အနက်ရောင်ချပ်ဝတ်နှင့် လေပြင်းဓားပြများကို ကြည့်သည်။

“ဒီအင်းဆက်တွေကို အားကိုးပြီး ငါ့ရဲ့ စန်းဟော်မြို့ကို လာရဲတယ်ပေါ့လေ”

သူက နှာမှုတ်လိုက်ပြီး ပုံရိပ်သုံးခုကို ထုတ်ဖော်သည်။

သူ၏ ကိုယ်ပွားသုံးခုသည် လူသား၊ မိစ္ဆာနှင့် ရွှေသတ္တုအငွေ့အသက်ကို ထုတ်လွှတ်နေသော ရုပ်သေးရုပ်တစ်ရုပ် ဖြစ်သည်။

ပုံရိပ်လေးခုက ပခုံးချင်းယှဉ်လျက် ရပ်နေပြီး တာအိုသခင်ဖန်းမင်က လက်ဝါးရိုက်ချက်နှင့်အတူ အနက်ရောင်အလင်းစီးကြောင်းကို ထုတ်လွှတ်သည်။

ထိုအချိန်တွင် ဝင်္ကပါ၏ဖိနှိပ်မှုကြောင့် လေပြင်းဓားပြများက ခုခံနိုင်စွမ်း ကင်းမဲ့နေကြသည်။ သူတို့က ကျဆင်းလာသော အနက်ရောင်အလင်းစီးကြောင်းကို ကြည့်နေလိုက်ရသည်။

“လေပြင်း ....”

လေထုထဲတွင် ခပ်နိမ့်နိမ့်အော်သံကို ကြားနိုင်သည်။

အပြာဖျော့ရောင်ပုံရိပ်သည် လေထုထဲတွင် ပေါ်ထွက်လာပြီး အနက်ရောင်အလင်းစီးကြောင်းများကို တားဆီးသည်။

သို့သော် ထိုအနက်ရောင်အလင်းစီးကြောင်းများသည် အသိဉာဏ်ရှိပုံပေါ်ပြီး လေပြင်းပုံရိပ်ကို ရှောင်တိမ်းလျက် ဆက်လက်ကျဆင်းလာကြသည်။

အနက်ရောင်ချပ်ဝတ် ဓားပြနှစ်ယောက်က အံတင်းတင်းကြိတ်လိုက်ပြီး အင်မော်တယ်ချီစွမ်းအင်အလင်းကို ထုတ်‌ဖော်သည်။ သူတို့၏ ဝိညာဉ်သူငယ်များက ပိုက်ကွန်တစ်ခုအဖြစ် ပြောင်းလဲသွားပြီး အနက်ရောင်အလင်းစီးကြောင်းများနှင့် ရင်ဆိုင်လိုက်သည်။

သို့သော် သူတို့က အနက်ရောင်အလင်းစီးကြောင်းများနှင့် ထိတွေ့သွားသောအချိန်တွင် အော်ဟစ်လိုက်ရပြီး တစ်ကိုယ်လုံးတုန်ခါလျက် လဲကျသွားသည်။

ထိုအနက်ရောင်အလင်းစီးကြောင်းများသည် နတ်ဘုရားဝိညာဉ်ကို ထိခိုက်စေသည်။

“အဲဒါက သွေးစတေးခြင်းဝိညာဉ်အလင်းပဲ။ သူက ဒီအလင်းတန်းကို ပြီးပြည့်စုံအောင်လုပ်နိုင်ရင် မြို့ထဲမှာရှိတဲ့လူတိုင်း သေဆုံးရလိမ့်မယ်”

ကျန်းကျန်ပေါ်က အော်ဟစ်လိုက်ပြီး ဓားဖြင့်ခုတ်၍ ကျားမိစ္ဆာကို နောက်ဆုတ်သွားစေသည်။ ထို့နောက် အောက်သို့ ဆင်းသက်လာသည်။

“ဘန်း”

သူက အနက်ရောင်အလင်းစီးကြောင်းသုံးခုကို တစ်ချက်တည်းဖျက်ဆီးလိုက်သည့်အတွက် တာအိုသခင်ဖန်းမင်၏မျက်နှာက ဖြူဖျော့သွားသည်။

သို့သော် ချက်ချင်းဆိုသလိုပင် ပေတစ်ရာမြင့်မားသော ကျားမိစ္ဆာက ကျန်းကျန်ပေါင်၏နောက်ကျောကို လက်သီးဖြင့် ထိုးချလိုက်သည်။

ကျန်းကျန်ပေါင်က မြေကြီးထဲသို့ ရိုက်ချခံလိုက်ရသောကြောင့် ဖုန်မှုန့်များ ထလာသည်။

ကောင်းကင်ထက်တွင် ဝင်္ကပါကို ဖိနှိပ်နေသော ဓားမျှော်စင်ကလည်း သနားစရာကောင်းလောက်အောင် ပြုတ်ကျလာခဲ့သည်။

ထိုလက်သီးချက်ကြောင့် ကျန်းကျန်ပေါင်က မသေလျှင်ပင် အပြင်းအထန် ဒဏ်ရာရသွားလိမ့်မည်။

“ဝီ”

လေထုထဲတွင် လေပြင်းများသည် ရွှေရောင်အလင်းနှင့်အတူ လှုပ်ရှားနေကြသည်။

ထိုအရာသည်‌ လေပြင်းဓားပြများ၏ လျှို့ဝှက်ဆက်သွယ်မှု ဖြစ်သည်။

ဇောင်ပိုင်ချွမ်က မည်းမှောင်နေသောမျက်နှာထားဖြင့် ပြောသည်။

“လေပြင်းဓားပြတွေက ကျွမ်းကျင်သူတွေကို လှမ်းခေါ်လိုက်ပြီ။ တကယ်လို့ သွေးစတေးခြင်းကို မတားဆီးနိုင်ရင် လေပြင်းဓားပြ ကျွမ်းကျင်သူတွေက တစ်မြို့လုံးကို သတ်ဖြတ်သွားလိမ့်မယ်”

ကျောက်ချန်က ဒေါသထွက်နေသည်။

သူက အလွန်လောဘကြီးသွားခဲ့သည်။

ထိုသို့မဟုတ်လျှင် ပြဿနာများသော ဤနေရာမှ ထွက်သွားပြီးသား ဖြစ်နေလိမ့်မည်။

“ခလွမ် ....”

မြေပြင်ပေါ်သို့ ပြုတ်ကျလာသော ရွှေရောင်ဓားမျှော်စင်က တောက်ပသော ရွှေအလင်းရောင်ကို ထုတ်လွှတ်၍ ကောင်းကင်ပေါ်သို့ ပြန်တက်သွားသည်။

ဓားမြည်သံကို ကြားနိုင်သည်။

“သူပြောတာ အမှန်ပဲ”

ပြတင်းပေါက်၏ရှေ့တွင် ရပ်‌နေသော ဟန်မူယဲ့က တီးတိုးပြောသည်။

သူက တောက်ပနေသော မျက်လုံးများဖြင့် စုစည်းလာသော တိမ်မည်းများကို ကြည့်သည်။

ရွှေရောင်ဓားမျှော်စင်သည် အကူအညီတောင်းပြီး သတိပေးနေသည်။

ကျန်းကျန်ပေါင်၏ သတိပေးချက်အရ သွေးစတေးခြင်း ပြီးပြည့်စုံသွားလျှင် မြေအောက်မီးတောက်ဖြင့် ဖိနှိပ်ထားသော မဟာမိစ္ဆာ၏ဝိညာဉ်ကို နိုးထစေလိမ့်မည်။

အသက်ကိုးပါးအင်းဆက်ဖြစ်စေ၊ သွေးစတေးခြင်းဖြစ်စေ ထိုမဟာမိစ္ဆာ၏ ဝိညာဉ်အတွက် ဖြစ်သည်။

‘အဲဒါက မြေအောက်မီးတောက်သွေးကြောတွေ စုစည်းနေတဲ့နေရာမှာ ပုန်းနေတဲ့ နတ်ဘုရားသားရဲလား’

‘ဒါမှမဟုတ် ဖိနှိပ်ခံထားရတဲ့ မဟာမိစ္ဆာရဲ့ ဝိညာဉ်လား’

အကယ်၍ နတ်ဘုရားသားရဲတစ်ကောင်ဆိုလျှင် ဟန်မူယဲ့က အထိအခိုက်မရှိဘဲ ထွက်ပြေးနိုင်ရန် ယုံကြည်ချက်ရှိသည်။

သို့သော် မြို့ထဲတွင်ရှိသော ကျင့်ကြံသူများ မည်မျှရှင်သန်နိုင်မည်နည်း။

ဟန်မူယဲ့က ရွှေအလင်းဖြင့် တောက်ပနေသော ဓားမျှော်စင်ကို ကြည့်လိုက်ပြီး အငွေ့အသက်ကို ထိန်းချုပ်ထားသည်။ ဓားဆန္ဒတစ်ခုသည် ဖြတ်ပြေးသွားသည်။

“သခင်လေး၊ အံ့ဖွယ်ဝိညာဉ်ဓားဂိုဏ်းရဲ့ ဓားမျှော်စင်က အမိန့်ထုတ်လိုက်ပါတယ်။ လက်အောက်ခံအင်အားစုတွေအားလုံးက တုံ့ပြန်ပေးရပါမယ်။ မဟုတ်ရင် ပုန်ကန်တယ်လို့ သတ်မှတ်ခံရလိမ့်မယ်”

စံအိမ်၏အောက်တွင်ရှိသော လူအိုကြီးချူက ဖျတ်ခနဲလှုပ်ရှားလိုက်ပြီး ကျောက်ချန်၏ဘေးသို့ ရောက်လာသည်။ သူက တီးတိုးပြောသည်။

ကျောက်ချန်က ခါးသီးစွာပြုံးလိုက်ပြီး ခေါင်းညိတ်သည်။ သူက လက်မြှောက်ပြီး ရွှေရောင်အလံကို ထုတ်ယူသည်။

ယခုအချိန်တွင် သူတို့က ထိုင်ကြည့်မနေနိုင်တော့ပေ။

ရန်သူက အားကောင်းသော တက်လှမ်းကျားမိစ္ဆာနှင့် မဟာဝင်္ကပါကို ထိန်းချုပ်ထားသော တာအိုသခင်ဖန်းမင် ဖြစ်နေလျှင်ပင် လှုပ်ရှားရမည်။

“ဘုန်း”

ဇောင်ပိုင်ချွမ်၏နောက်တွင် လူနှစ်ယောက်က စံအိမ်အပြင်ဘက်သို့ ပြေးထွက်သွားပြီး တိမ်မည်းများကို တိုက်ခိုက်လိုက်ကြသည်။

လူအိုကြီးချူက ကျူကျင်းအလံကို လှမ်းယူလိုက်ပြီး သေခြင်းကိုးပါးအင်းဆက်တစ်ကောင်နှင့် ရင်ဆိုင်သည်။

အလံသည် သေခြင်းကိုးပါးအင်းဆက်ကို ရစ်ပတ်လိုက်သည်။

ထိုအချိန်တွင် စန်းဟော်မြို့မှ ပုံရိပ်များထွက်ပေါ်လာပြီး ဖိနှိပ်ခံထားရသော လေပြင်းဓားပြနှင့် သေခြင်းကိုးပါးအင်းဆက်များကို ဆွဲယူလိုက်ကြသည်။ အနည်းဆုံး ဝိညာဉ်သူငယ်အဆင့်တွင်ရှိသော ကျင့်ကြံသူများက အနက်ရောင်တိမ်မည်းများနှင့် ရင်ဆိုင်နေကြသည်။

မည်သူမှ မသေချင်ကြပေ။

သူတို့က သွေးစတေးမှုတွင်လည်း မပါချင်ကြပေ။ မြို့ပျက်စီးသွားမှာလည်း မမြင်ချင်သလို အံ့ဖွယ်ဝိညာဉ်ဓားဂိုဏ်း၏ ဒေါသနှင့်လည်း ရင်မဆိုင်နိုင်ကြပေ။

အဆင့်နိမ့်ကျင့်ကြံသူများသည် ထိုသို့ပင်ဖြစ်သည်။ သူတို့၏ သနားစရာကောင်းလှသော အသက်အတွက် ရုန်းကန်နေရသည်။