အခန်း (၈၃၅)

ဓားအလင်းများသည် မြားတံများနှင့် ရင်ဆိုင်လိုက်ပြီး မြားတံကို ချိုးဖျက်၍ အောက်သို့ ဆင်းသက်လာကြသည်။

ဓားတစ်လက်တည်းသာ မဟုတ်ပေ။ လောကတွင်ရှိသော ဓားများအားလုံးသည် မြားတံများကို ချိုးဖျက်ပြီး ကျဆင်းလာပုံပေါ်သည်။

ဓားကျင့်ကြံသူတစ်ယောက်အနေဖြင့် ထုတ်လွှတ်လိုက်သော ဓားအလင်းများအားလုံးကို မထိန်းချုပ်နိုင်လျှင် ဓားကို ကျင့်ကြံနေရန် မလိုတော့ပေ။

သို့သော် ယခင်က ဓားတစ်သောင်း နည်းစနစ်တစ်သောင်းနှင့် ယှဉ်လိုက်လျှင် ဤဓားချက်က အဆပေါင်းတစ်ရာခန့် ပိုလွယ်သည်။

ဓားအလင်းများသည် မြားတံများကို နှစ်ပိုင်းဖြတ်လိုက်ပြီး အဆင်အခြင်မဲ့စွာ ကျဆင်းလာကြသည်။

ထိုဓားချက်သည် မြားဝင်္ကပါပေါ်သို့ တိုက်ရိုက်ကျဆင်းသွားပြီး ဖျက်ဆီးပစ်ရန် ကြိုးစားနေသည်။

အကယ်၍ မြားဝင်္ကပါ ပျက်စီးသွားလျှင် လေပြင်းဓားပြတစ်သောင်းက သေဆုံးသွားကြလိမ့်မည်။

“ခုခံမယ် ....”

စစ်တပ်ဝင်္ကပါ၏ရှေ့ဆုံးတွင် ရှိနေသော အနက်ရောင်ချပ်ဝတ်နှင့် ခေါင်းဆောင်က ကိုးပေရှည်လျားသောလှံကို ကိုင်ဆောင်ထားပြီး ခုန်ထွက်လာသည်။

လှံရှည်သည် ပေတစ်ထောင်ရှည်လျားသော မြွေတစ်ကောင်အဖြစ် ပြောင်းလဲသွားပြီး ကျဆင်းလာသော ဓားအလင်းများကို ခုခံလိုက်သည်။

မြားဝင်္ကပါကလည်း ပြောင်းလဲသွားသည်။ လူတိုင်းက လေးကြိုးကို တင်းမာနေအောင် ဆွဲထားပြီး လေထုထဲတွင် အလင်းစက်ကွင်းတစ်ခုကို ပေါ်လာစေသည်။

လေပြင်းမြားဝင်္ကပါသည် အဝေးရောက်တိုက်ခိုက်မှုတွင် အားကောင်းရုံသာမက ခုခံနိုင်စွမ်းတွင်လည်း အထင်ကြီးစရာကောင်းသည်။

ဟန်မူယဲ့က တည်ငြိမ်သောမျက်နှာထားဖြင့် ဝင်္ကပါကိုကြည့်သည်။ သူက လက်ထဲတွင်ရှိသော ဓားချက်၏စွမ်းအားကို အနည်းငယ်လျော့ချလိုက်သည်။

“ဘန်း”

ဓားတစ်သောင်းက ခုတ်ချလိုက်သည်။ ပေတစ်ထောင်ရှည်လျားသော မြွေက ပျက်စီးသွားသည်။ ဓားအလင်းသည် ဓားပြခေါင်းဆောင်၏လှံရှည်နှင့် ထိတွေ့သွားပြီး သတ္တုသံကို ထွက်ပေါ်လာစေသည်။

ဓားတစ်ချက် ....

ဓားတစ်သောင်း ....

လှံရှည်သည် ကျိုးပျက်သွားခဲ့သည်။

ဓားအလင်းသည် ရေစီးကြောင်းတစ်ခုကဲ့သို့ သူတော်စင်အဆင့်တွင်ရှိသော ဓားပြခေါင်းဆောင်ကို လဲကျသွားစေသည်။ ထို့နောက် မြားဝင်္ကပါဆီသို့ ဆက်လက်တိုးဝင်သွားသည်။

“ဘန်း”

အလင်းလွှာသည် ပျက်စီးသွားပြီး ဓားအလင်းသည် ပေါက်ကွဲထွက်လာသည်။ လေပြင်းဓားပြများ၏ လက်ထဲတွင်ရှိသော လေးကိုင်းများက ပျက်စီးသွားကြသည်။

သူတို့၏ ခုခံကာကွယ်မှုသည် ဓားတစ်ချက်ကြောင့် ကျိုးပျက်သွားသည်။

လေထုထဲတွင် ဟန်မူယဲ့က တည်ငြိမ်သောမျက်နှာထားဖြင့် ဓားကိုင်ထားသည်။

“လေပြင်းမြားဝင်္ကပါရဲ့ မြားဆယ်ကြိမ်ပစ်ခတ်မှုကို မကြုံရတာ နှမြောစရာပဲ”

သူ၏ ဓားသွားသည် အေးစက်သောအငွေ့အသက်ကို ထုတ်လွှတ်နေသည်။

အောက်တွင် လဲကျသွားသော လေပြင်းဓားပြခေါင်းဆောင်က ဖြည်းဖြည်းချင်း မတ်တပ်ရပ်သည်။ သူက ခေါင်းဆောင်းကို ချွတ်လိုက်ပြီး အမာရွတ်များနှင့် ရာသီဥတုဒဏ်ကို ခံစားထားရသော မျက်နှာတစ်ခုကို ဖော်ပြသည်။

“ငါက လေပြင်းဝင်္ကပါ နံပတ် ၃၇ရဲ့‌ခေါင်းဆောင် ချန်လင်းဟွေပါ။ သူတို့ကို လွှတ်ပေးလိုက်ပါ။ ငါက အပြစ်ဒဏ်အားလုံးကို ခံယူပါ့မယ်”

သူ့စကားအဆုံးတွင် ဓားပြဝင်္ကပါက အသက်စွမ်းအား၊ သွေးချီစွမ်းအားဖြင့် လှုပ်ရှားလာသည်။ လေပြင်းကျားသစ်တစ်ကောင်၏ပုံရိပ် ဖြည်းဖြည်းချင်း ပေါ်လာသည်။

ကျားသစ်၏ခန္ဓာကိုယ်သည် စိမ်းပြာရောင်သန်းနေပြီး ရွှေရောင်အကွက်များကို ပိုင်ဆိုင်ထားသည်။ ခန္ဓာကိုယ်က သွယ်လျပြီး အမြီးရှည်တစ်‌ချောင်းလည်း ရှိနေသည်။ ကျားသစ်၏မျက်လုံးများသည် ဖမ်းစားနိုင်သော ခရမ်းရောင်အလင်းကို ထုတ်ပေးနေသည်။

လေပြင်းကျားသစ်က ဟန်မူယဲ့ကိုကြည့်ပြီး ဟိန်းဟောက်လိုက်သည်။

“သူ့ကို ရန်မစနဲ့”

ချန်လင်းဟွေက အော်ဟစ်လိုက်ပြီး အနက်ရောင်ချပ်ဝတ်ကို ချွတ်ချသည်။

“ငါအညံ့ခံတယ်”

ဟန်မူယဲ့က သူ့ကိုကြည့်လိုက်ပြီး တစ်ချက်လှုပ်ရှား၍ လေထုထဲတွင် ပျောက်ကွယ်သွားသည်။

ချန်လင်းဟွေက စိတ်သက်သာရာရစွာ သက်ပြင်းချလိုက်သည်။ သူ့မျက်နှာက ဖြူဖျော့သွားပြီး နီရဲလာသည်။ ထို့နောက် သွေးတစ်လုပ် အန်ထုတ်လိုက်ရသည်။ သူ့ခန္ဓာကိုယ်က ယိမ်းယိုင်သွားပြီး မြေပြင်တွင် ဒူးထောက်လိုက်ရသည်။

“အထင်ကြီးစရာပဲ။ ဒီလိုမျိုး သန်မာတဲ့ ဓားကျင့်ကြံသူတစ်ယောက် ....”

သူ့နောက်တွင်ရှိနေသော လေပြင်းဓားပြများက သူ့ကို ကူညီပေးရန်အတွက် ပြေးလာကြသည်။ သို့သော် သူက ‌ခေါင်းခါလိုက်ပြီး သူတို့ကို မောင်းထုတ်သည်။

“သွားကြတော့။ ငါက အညံ့ခံမယ်လို့ ပြောခဲ့တယ်”

ထိုဓားပြများက သူ့ကို နားချတော့မည့်အချိန်တွင် ချန်လင်းဟွေက အော်ဟစ်လိုက်သည်။

“ထွက်သွားကြစမ်း။ မင်းတို့က ဒီမှာသေသွားချင်လို့လား”

“အံ့ဖွယ်ဝိညာဉ်ဓားဂိုဏ်းရဲ့ စစ်တပ်က မကြာခင် ရောက်လာတော့မယ်။ မင်းတို့ အခုထွက်မသွားရင် အကုန်သေသွားကြလိမ့်မယ်”

သူ့နောက်တွင်ရှိသော လူများက တစ်ယောက်ကိုတစ်ယောက် ကြည့်လိုက်ကြပြီး လက်နှစ်ဖက်ကိုဆုပ်ကိုင်၍ ဦးညွတ်သည်။ ထို့နောက် ဝင်္ကပါကို အသက်သွင်း၍ လေပြင်းအဖြစ် အသွင်ပြောင်းပြီး ထွက်ပြေးသွားကြသည်။

ထိုအချိန်တွင် ဟန်မူယဲ့က စံအိမ်ထဲသို့ ပြန်ရောက်လာသည်။

သူထွက်သွားသောအချိန်မှ ပြန်ရောက်လာသောအချိန်အထိ အသက်ရှူကြိမ်ဆယ်ခါသာ ကုန်ဆုံးသေးသည်။

“ဒါက အစ်ကိုဟန်ပြောတဲ့ အသက်ရှူကြိမ်ဆယ်ခါလား ....”

ကျောက်ချန်က တောက်ပနေသောမျက်နှာထားဖြင့် တီးတိုးပြောသည်။

သူ့နောက်တွင် လူအိုကြီးချူက ဟန်မူယဲ့ကို ကြည့်လိုက်သည်။ သူ့မျက်နှာက တည်ငြိမ်နေသော်လည်း မျက်လုံးထဲတွင် လေးစားမှုတချို့ ရှိသည်။

ကျန်းကျန်ပေါင်က ရင်ပြင်ထက်တွင် ရပ်နေပြီး ကြည်လင်သွားသော ကောင်းကင်ကို ကြည့်သည်။

‘လူတွေကြားမှာ ကွာခြားမှုက ဒီလောက်တောင် ကြီးမားတာလား’

သူက အံ့ဖွယ်ဝိညာဉ်ဓားဂိုဏ်းတွင် နှစ်ပေါင်း ၈,၃၀၀ ကျင့်ကြံခဲ့ပြီး သူတော်စင်အဆင့်သို့ ရောက်လာသည်။ သူက ကိုယ်ပိုင်နယ်မြေတစ်ခုကို ထိန်းချုပ်ပြီး လွတ်လပ်စွာ နေထိုင်ခဲ့သည်။

လွန်ခဲ့သော နှစ်ထောင်ချီအတွင်း၌ သူ၏ ကျင့်ကြံခြင်းသည် သိသိသာသာ တိုးတက်မလာခဲ့ပေ။

သို့သော် ထိုအရာသည် ကိစ္စမရှိပေ။ ဂိုဏ်းအတွင်း၌ နှစ်သောင်းချီ၊ သိန်းချီ ကျင့်ကြံပြီး တိုးတက်မလာသော သူတော်စင်များ ရှိနေကြသည်။

သူတို့၏အဆင့်တွင် ဆက်လက်တိုးတက်ရန် အလွန်ခက်ခဲသည်။

လူတိုင်းက ထိုသို့ပင် ဖြစ်လိမ့်မည်ဟု သူထင်ခဲ့သည်။

သို့သော် ယနေ့တွင် ဟန်မူယဲ့၏ အသက်ရှူကြိမ်ဆယ်ခါသည် သူ့ကို လူသားများ၏ ကွာခြားမှုအကြောင်း နားလည်သွားစေခဲ့သည်။

သူက တိုက်ခိုက်လိုစိတ်ကို ထုတ်ဖော်လိုက်သည်။

“မြို့ကနေ ထွက်သွားဖို့ အချိန်ကျနေပြီ ....”

သူက တီးတိုးရေရွတ်လိုက်ပြီး ဖြည်းဖြည်းချင်း လှည့်ထွက်သွားသည်။

မြို့အပြင်ဘက်ရှိဖိအားသည် အသက်ရှူကြိမ်ဆယ်ခါအတွင်း၌ ပျောက်ကွယ်သွားသည်။

မြို့ထဲမှ ထွက်ပြေးသွားသော ကျင့်ကြံသူများနှင့် မြို့ထဲတွင် ကျန်နေခဲ့သော ကျင့်ကြံသူများက မယုံကြည်နိုင်စွာ မျက်လုံးပြူးနေကြသည်။

လေပြင်းဓားပြတစ်သောင်း၏ နာမည်ကြီးမြားဝင်္ကပါသည် အသက်ရှူကြိမ်ဆယ်ခါအတွင်း၌ ပျက်စီးသွားခဲ့သည်။

တောက်ပနေသော ဓားအလင်းသည် လေထုထဲတွင် သောင်းကျန်းနေပြီး မြားဝင်္ကပါကို ဖျက်ဆီး၍ လေပြင်းဓားပြများနှင့် တိုက်ခိုက်ခဲ့သည်။

‘ဒါက အံ့ဖွယ်ဝိညာဉ်ဓားဂိုဏ်းရဲ့ အစစ်အမှန်ခွန်အားလား’

‘ကျင့်ကြံခြင်းလောကရဲ့ အင်အားစုကြီးတစ်ခု၊ အင်မော်တယ်ကမ္ဘာရဲ့ အင်အားစုကြီးတစ်ခု ဖြစ်သင့်ပါတယ်’

ဓားတစ်ချက်နှင့် အသက်ရှူကြိမ်ဆယ်ခါသည် အဓိကဂိုဏ်းကြီးတစ်ဂိုဏ်း၏ နည်းလမ်းများကို ဖော်ပြနေသည်။

ယနေ့မှစ၍ အံ့ဖွယ်ဝိညာဉ်ဓားဂိုဏ်း၏ ခွန်အားသည် လူတိုင်း၏နှလုံးသားထဲတွင် စွဲထင်သွားလိမ့်မည်။

ဓားချက်အားထုတ်ဖော်လိုက်သော ကျွမ်းကျင်သူကိုတော့ အံ့ဖွယ်ဝိညာဉ်ဓားဂိုဏ်းမှ ဖြစ်နေကြောင်း သိထားလျှင် လုံလောက်သည်။

အံ့ဖွယ်ဝိညာဉ်ဓားဂိုဏ်း၏ ကျွမ်းကျင်သူတိုင်းသည် နာမည်ကြီး လေပြင်းဓားပြများကို ရှင်းထုတ်ပစ်နိုင်ပုံရသည်။

“အသက်ရှူကြိမ်ဆယ်ခါက တကယ်ကို အသက်ရှူကြိမ်ဆယ်ခါပဲ။ အရမ်းအံ့အားသင့်စရာကောင်းတယ်”

ဓားကိုင်ထားသော လူသန်ကြီးတစ်ယောက်က လေးစားသောမျက်နှာထားဖြင့် အော်ဟစ်လိုက်သည်။

“တကယ်ကို အထင်ကြီးမိတယ်။ အစစ်အမှန်ဓားကျင့်ကြံသူတစ်ယောက်က အဲဒီလိုမျိုးပဲ ဖြစ်နေသင့်တယ်”

အနည်းငယ် ဖရိုဖရဲဖြစ်နေသော ဆံပင်များနှင့် လူအိုကြီးတစ်ယောက်က အဝေးတစ်နေရာသို့ ငေးကြည့်နေပြီး ရေရွတ်လိုက်သည်။

မြို့ထဲတွင် ခံစားချက်အပြည့်ဖြင့် သက်ပြင်းချသံများကို နေရာတိုင်းတွင် ကြားနိုင်သည်။

မမြင်နိုင်သော စွမ်းအင်များသည် လေထုထဲတွင် လွင့်မျောနေပြီး စုစည်းသွားကြသည်။

ထိုအရာသည် ဝိညာဉ်ကျင့်ကြံခြင်းအတွက် အကောင်းဆုံးစွမ်းအား ဖြစ်သည်။

ဟန်မူယဲ့က ငြင်းပယ်မည်မဟုတ်ပေ။

“ဘုန်း”

လေထုထဲတွင် ပေါက်ကွဲသံကို ကြားလိုက်ရသည်။

ဆယ့်ငါးမိနစ်အကြာတွင် ရာချီနေသော ဓားအလင်းများသည် ကောင်းကင်ထက်မှ ဆင်းသက်လာပြီး မြို့ထဲတွင် ပြန့်ကျဲသွားသည်။

မြို့ဂိတ်တံခါး၊ မြို့နံရံနှင့် ဧရာမမီးပြင်းဖိုများသည် ဓားအလင်းကြောင့် ဖိနှိပ်ခံလိုက်ရသည်။

“ဝီ”

လေထုထဲတွင် ဓားအလင်းများသည် ဧရာမဓားမျှော်စင်တစ်ခုအဖြစ် ပြောင်းလဲသွားသည်။

ဓားဝင်္ကပါကို တည်ဆောက်လိုက်သောကြောင့် စန်းဟော်မြို့၏ ကျင့်ကြံသူများက ဘဝသစ်တစ်ခု ရလာသကဲ့သို့ စိတ်သက်သာရာရစွာ သက်ပြင်းချလိုက်ကြသည်။

နေ့ဝက်အကြာတွင် ဓားအလင်းတစ်ခုသည် ပေတစ်ထောင်မြင့်မားသော ပုံရိပ်ကို သယ်ဆောင်၍ စန်းဟော်မြို့၏ ဗဟိုရင်ပြင်ပေါ်သို့ ရောက်လာသည်။

ဓားအလင်း ပျောက်ကွယ်သွားသောအခါတွင် စွမ်းအားတစ်ခုသည် မိုင်တစ်ထောင်ပတ်ဝန်းကျင်ကို လွှမ်းခြုံသွားခဲ့သည်။

ဓားလမ်းစဉ်၏ ထိပ်တန်းအဆင့် ကျွမ်းကျင်သူတစ်ယောက် ဖြစ်သည်။ ထိုဓားအလင်းသည် ကောင်းကင်နှင့်မြေကြီး၏စွမ်းအားကို ဖိနှိပ်နိုင်သည်။

ဆယ့်ငါးမိနစ်အကြာတွင် ကမ္ဘာမြေအား တုန်ခါသွားစေနိုင်သော အော်ဟစ်သံကို ကြားလိုက်ရသည်။

“လေပြင်းဓားပြတွေက စန်းဟော်မြို့ကို တိုက်ခိုက်ပြီး ငါတို့ အံ့ဖွယ်ဝိညာဉ်ဓားဂိုဏ်းကို ရန်စခဲ့တယ်”

“အံ့ဖွယ်ဝိညာဉ်ဓားဂိုဏ်းရဲ့ ခန်းဆောင်အကြီးအကဲ ရှုံးခယ်က တောရိုင်းမြေမှာရှိတဲ့ လေပြင်းဓားပြတွေအားလုံးကို အပြတ်ရှင်းဖို့ အမိန့်ထုတ်တယ်”

ရှစ်ထပ်ဓားမျှော်စင်သည် လေထုထဲတွင် လွင့်မျောပြီး ဓားအလင်းများက နေရာအနှံ့သို့ ဖြာထွက်နေသည်။

အံ့ဖွယ်ဝိညာဉ်ဓားဂိုဏ်းသည် လေပြင်းဓားပြများကို အပြတ်ရှင်းရန်အတွက် အမိန့်ထုတ်ခဲ့သည်။

အံ့ဖွယ်ဝိညာဉ်ဓားဂိုဏ်းက လေပြင်းဓားပြများကို တုံ့ပြန်လိမ့်မည်ဟု စန်းဟော်မြို့၏ ကျင့်ကြံသူများက သိထားသော်လည်း အပြတ်ရှင်းသည်အထိ ပြင်းထန်လိမ့်မည်ဟု ထင်မထားခဲ့ကြပေ။

ထို့အပြင် ခန်းဆောင်အကြီးအကဲတစ်ယောက်က လေပြင်းဓားပြများကို အပြတ်ရှင်းရန် အမိန့်ထုတ်ရဲသည်။ အံ့ဖွယ်ဝိညာဉ်ဓားဂိုဏ်းက လေပြင်းဓားပြများကို အလေးအနက် ထားပုံမရပေ။

မြို့ထဲတွင် ဆွေးနွေးသံအမျိုးမျိုးကို ကြားနိုင်သည်။ သို့‌သော် လူအများအပြားက စိတ်သက်သာနေကြသည်။

အံ့ဖွယ်ဝိညာဉ်ဓားဂိုဏ်း၏ အမည်မသိကျွမ်းကျင်သူက လေပြင်းဓားပြတစ်သောင်း၏ မြားဝင်္ကပါကို ဖျက်ဆီးနိုင်သည်။ ယခုအချိန်တွင် ခန်းဆောင်အကြီးအကဲတစ်ယောက် ထပ်ရောက်လာသည်။ တောရိုင်းမြေ၏ လေပြင်းဓားပြများကို ပြန်လည်တိုက်ခိုက်ခြင်းသည် ဖြစ်သင့်သည်။

မျက်နှာဖြူဖျော့နေသော ကျန်းကျန်ပေါင်က ခန်းဆောင်ထဲတွင် ရပ်နေသည်။

သူ့ရှေ့တွင် အစိမ်းရောင်ဓားတစ်လက်ကို လွယ်ထား‌သော အနက်ရောင်ဝတ်စုံနှင့် လူအိုကြီးတစ်ယောက် ရှိသည်။

လူအိုကြီး၏ မျက်ခုံးများက ဓားနှစ်လက်နှင့်တူပြီး သူ့မျက်လုံးထဲမှ ဓားစွမ်းအင်များ ပေါ်ထွက်လာမည့်ပုံပေါ်သည်။

ခန်းဆောင်၏ ဘေးနှစ်ဖက်တွင် ဓားစွမ်းအင်ကို ထုတ်လွှတ်ထားသော ပုံရိပ်များက တည်ငြိမ်စွာ ရပ်နေကြသည်။

“အကြီးအကဲ၊ ဂိုဏ်းတူအစ်ကိုကျန်းပြောတဲ့ နာမည်ခံတပည့်က ပြုပြင်ထားတဲ့ တည်နေရာရွှေ့ပြောင်းခြင်းဝင်္ကပါကနေ ထွက်သွားပါပြီ”

“လွန်ခဲ့တဲ့ နာရီဝက်ကပဲ ဝမ်ရှန်ကုန်သွယ်ရေးအဖွဲ့ရဲ့ ဇောင်ပိုင်ချွမ်၊ ကျူးကျင်းကုန်သွယ်ရေးအဖွဲ့ရဲ့ ကျောက်ချန်တို့နဲ့အတူ ထွက်သွားခဲ့တာပါ”

ဓားသုံးလက်သယ်ထားပြီး ချပ်ဝတ်တန်ဆာကို ဝတ်ဆင်ထားသော သက်လတ်ပိုင်းအရွယ် ဓားကျင့်ကြံသူက ခန်းဆောင်ထဲသို့ ဝင်လာပြီး ပြောလိုက်သည်။

သူ့စကားကို ကြားလိုက်ရသောအခါတွင် အနက်ရောင်ဝတ်စုံနှင့် အကြီးအကဲက မျက်မှောင်ကြုတ်သည်။

အောက်တွင် ကျန်းကျန်ပေါင်က ခေါင်းငုံ့ထားသည်။ သူ့မျက်လုံးထဲတွင် ပျော်ရွှင်မှုများ ရှိနေသည်။

“ကျန်းကျန်ပေါင်”

လူအိုကြီးက စူးရှသောအကြည့်ဖြင့် ပြောလိုက်သည်။

“အကြီးအကဲ၊ ကျွန်တော်ဒီမှာရှိပါတယ်”

ကျန်းကျန်ပေါင်က ဦးညွတ်သည်။

ရှုံးခယ်သည် ကျန်းရွှမ်ခန်းဆောင်၏ အကြီးအကဲတစ်ယောက် ဖြစ်ပြီး လူသားအင်မော်တယ် အထွတ်အထိပ်အဆင့်တွင် ရှိနေသည်။

သို့သော် ကျန်းကျန်ပေါင်က ကျန်းဟွမ်ခန်းဆောင်မှ ဖြစ်ပြီး ရှုံးခယ်၏အမိန့်ကို နာခံရန်မလိုအပ်ပေ။

ရှုံးခယ်က အကြီးအကဲတစ်ယောက် ဖြစ်ပြီး စန်းဟော်မြို့ကို ကယ်တင်ရန် ရောက်လာသောကြောင့် သူက ရိုသေမှုပြပေးနေခြင်း ဖြစ်သည်။

“ငါတို့ဂိုဏ်းရဲ့ တပည့်တွေက အသက်ဆုံးပါးသွားခဲ့တယ်။ စန်းဟော်မြို့ရဲ့ မြေအောက်မီးတောက်က ကုန်ဆုံးသွားပြီး မြို့ကလည်း ထိခိုက်သွားခဲ့တယ်။ မင်းမှာ တာဝန်ရှိတယ်”

ရှုံးခယ်က ဂရုမစိုက်စွာ ပြောသည်။

ကျန်းကျန်ပေါင်က ပြန်မပြောခဲ့ပေ။ သူက ခေါင်းငုံ့ထားပြီး တိတ်ဆိတ်နေသည်။

အကယ်၍ အကြီးအကဲက သူ့ကို အပြစ်ပေးချင်လျှင် တာအိုသခင်ဖန်းမင်နှင့်အတူ နှိပ်စက်လိမ့်မည်။

ယခုအချိန်တွင် ဟန်မူယဲ့က ထွက်သွားပြီဖြစ်သောကြောင့် အကြီးအကဲက သူ့ကို ဖိနှိပ်ရန် အကြောင်းပြချက် မရှိတော့ပေ။

သူ၏ယူဆချက်သည် အမှန်ပင်ဖြစ်သည်။

“မင်းက ပြစ်ဒဏ်ကင်းလွတ်ခွင့် မရပေမဲ့ မင်းရဲ့ အကျိုးဆောင်မှုက ထင်ရှားတယ်”

ရှုံးခယ်၏အသံက အနည်းငယ် ညင်သာသွားပုံရသည်။

“ကျားမိစ္ဆာအစောင့်တစ်ရာ၊ သေခြင်းကိုးပါးအင်းဆက် အကောင်နှစ်ဆယ်၊ ပြီးတော့ လေပြင်းဓားပြတွေ”

ရှုံးခယ်က ခေါင်းခါလိုက်ပြီး ခံစားချက်များနှင့် ပြောသည်။

“ဒီအခြေအနေမှာ မင်းက မြို့ကို ဘယ်လိုကာကွယ်ခဲ့တာလဲ ငါတွေးလို့တောင်မရဘူး”

သူ့စကားကြောင့် ပတ်ဝန်းကျင်တွင်ရှိသော အံ့ဖွယ်ဝိညာဉ်ဓားဂိုဏ်း၏ တပည့်များက ကျန်းကျန်ပေါင်ကို လေးစားစွာ ကြည့်လိုက်ကြသည်။