အခန်း (၈၆၄)

သူက ယွင်လန်မြို့သို့ ရောက်လာသောအချိန်တွင် ပြိုင်ဘက်ကင်းဟန်၏ ပုံပြင်များကို ကြားခဲ့ရသည်။ သို့သော် ပြိုင်ဘက်ကင်းဟန်က အမှန်တကယ်ပင် ဓားနှင့်ရှင်သန်သောလူမျိုး ဖြစ်နေလိမ့်မည်ဟု ထင်မထားခဲ့ပေ။

“ကျွန်တော်က တောရိုင်းမြေရဲ့ ဓားကျွမ်းကျင်သူတွေကို စာရင်းလုပ်ပေးပါမယ်”

ကျင်းကူချန်က ကျောက်စိမ်းပေလွှာများကို လျင်မြန်စွာထုတ်ယူပြီး နတ်အာရုံဖြင့် စစ်ဆေး၍ နာမည်များကို မှတ်သားနေသည်။

အံ့ဖွယ်ဝိညာဉ်ဓားဂိုဏ်းက ဓားဂိုဏ်းတစ်ဂိုဏ်း ဖြစ်သောကြောင့် ဓားကျင့်ကြံသူများကို အလေးထားသည်။

ကိုယ်ပိုင်ဂိုဏ်းသားဖြစ်စေ၊ တခြားလူဖြစ်စေ သိချင်ကြသည်။

ဟန်မူယဲ့က ကျောက်စိမ်းပေလွှာကို ယူလိုက်သောအခါတွင် ကိုယ်ပိုင်နာမည်ကိုပင် မြင်လိုက်ရသည်။

“ယွင်လန်မြို့သခင်၊ ပြိုင်ဘက်ကင်းဓားအင်မော်တယ်ဟန်က တောရိုင်းမြေမှာ ရုတ်တရက်ပေါ်ထွက်လာတဲ့ ကျွမ်းကျင်သူတစ်ယောက်ပဲ။ သူ့ရဲ့ ဓားကျင့်ကြံခြင်းက ကောင်းကင်ကို ဖီဆန်နေတယ်လို့ သံသယရှိတယ်။ သူက ကောင်းကင်အင်မော်တယ်တွေကို သတ်ဖြတ်ခဲ့တယ်။ အဲဒီလူတွေကတော့ ....”

ထိုမှတ်တမ်းတွင် သူအသုံးပြုခဲ့သော ဓားနည်းစနစ်များနှင့် တိုက်ပွဲများအကြောင်း ပါဝင်နေသည်။

“ပြိုင်ဘက်ကင်းဟန်က အံ့ဖွယ်ဝိညာဉ်ဓားဂိုဏ်းရဲ့ တပည့်တစ်ယောက်ဖြစ်လိမ့်မယ်လို့ သံသယရှိတယ်။ ဒါပေမဲ့ အတိအကျ မသိနိုင်ဘူး”

ထိုမှတ်တမ်းသည် စိတ်ဝင်စားဖွယ်ကောင်းသည်။

ဟန်မူယဲ့က ကျောက်စိမ်းပေလွှာကို စစ်ဆေးကြည့်လိုက်ပြီး မျက်လုံးများ တောက်ပသွားသည်။

“ချီယွမ်မြို့ရဲ့ နတ်ဘုရားမဲ့ဓားအင်မော်တယ် ရှကျွင့်က နတ်ဘုရားဝိညာဉ်ကို ပိုင်းဖြတ်နိုင်တယ်လို့ ပြောကြတယ်။ သူက ကောင်းကင်အင်မော်တယ်တွေနဲ့ ယှဉ်ပြိုင်နိုင်တယ်”

“ကျူးဝူမြို့ရဲ့ ဓားအင်မော်တယ် ချန်ဝမ်ယွီက အင်မော်တယ်ရတနာဓားရှည်ကို ကိုင်ဆောင်ထားတယ်။ သူက မိုင်သန်းချီပတ်ဝန်းကျင်ကို လွှမ်းမိုးထားပြီး နှစ်ပေါင်းသုံးထောင်အတွင်းမှာ ရှုံးပွဲမရှိခဲ့ဘူး”

“ပိုင်ကျင်းမြို့သခင် ဝေါ်ပိုင်ကျင်းက ဓားကျင့်ကြံခြင်းမှာ ကောင်းကင်အင်မော်တယ်အဆင့်ကို ရောက်နေတယ်။ သူ့ရဲ့ နေရာလွတ်ထဲမှာ ဓားတစ်သိန်းကို ထည့်သွင်းထားပြီး သူ့ရဲ့ ဓားအလင်းက မိုင်ထောင်ချီပတ်ဝန်းကျင်ကို တုန်ခါသွားစေနိုင်တဲ့ နဂါးတစ်ကောင်နဲ့ တူညီတယ်”

....

ထိုမှတ်တမ်းသည် တောရိုင်းမြေတွင် အချိန်ကြာမြင့်စွာ နာမည်ကြီးခဲ့သော ဓားကျင့်ကြံသူများကို ဖော်ပြထားသည်။

လူတိုင်းက တိုက်ပွဲများကို ကျော်ဖြတ်၍ အစစ်အမှန်ဂုဏ်သတင်းကို ပိုင်ဆိုင်ထားကြသည်။

ထိုဓားသွေးကျောက်မျိုးသည် အလွန်စိတ်ဝင်စားဖွယ်ကောင်းသည်။

ဟန်မူယဲ့က ကျောက်စိမ်းပေလွှာကို သိမ်းလိုက်ပြီး ခေါင်းညိတ်သည်။

“နောက်ကျ တစ်ခုခုလိုတာရှိရင် ကျန်းကျန်ပေါင်ကို ရှာလို့ရတယ်။ သူကလည်း ဓားဂိုဏ်းရဲ့ တပည့်တစ်ယောက်ပဲ”

ထို့နောက် သူက လှည့်ထွက်သွားသည်။

ကျင်းကူချန်က သူ့ကို အောက်ထပ်အထိ လျင်မြန်စွာ လိုက်ပို့ခဲ့သည်။

“အဲဒီတော့ ယွင်လန်မြို့ရဲ့ ပြိုင်ဘက်ကင်းဟန်က ငါတို့ဂိုဏ်းရဲ့ သုံးထပ်ကွမ်းလက်ရွေးစင်ပေါ့။ စိတ်ဝင်စားစရာပဲ”

ကျင်းကူချန်က ဟန်မူယဲ့၏ပုံရိပ်ကို ကြည့်လိုက်ပြီး ပြုံးသည်။

“ကြည့်ရတာ ငါတို့ဂိုဏ်းက ခြေတစ်လှမ်းသာနေတဲ့ပုံပဲ”

ဟန်မူယဲ့က မြို့သခင်ခန်းဆောင်သို့ ပြန်ရောက်လာသောအခါတွင် ကျောက်ချန်က ကျောက်စိမ်းသေတ္တာတစ်လုံးကို ကိုင်ပြီး သူ့ကို လာရှာခဲ့သည်။

“အစ်ကိုဟန်ကို လူတစ်ယောက်က စိန်ခေါ်ချင်နေတယ်”

‘စိန်ခေါ်ပွဲလား’

ဟန်မူယဲ့က အံ့အားသင့်သွားပြီး ပြုံးသည်။

သူက တခြားလူများကို စိန်ခေါ်ရန် စီစဉ်နေသောအချိန်တွင် လူတစ်ယောက်က သူ့ကို စိန်ခေါ်ရန် ရောက်လာခဲ့သည်။

သူက ကျောက်စိမ်းသေတ္တာကို ဖွင့်လိုက်ပြီး စိန်ခေါ်စာကို ကြည့်သည်။

အရေးအသားက တည်ငြိမ်ပြီး ဓားဆန္ဒကို ရှင်းလင်းစွာ မြင်နိုင်သည်။

“ကွေ့ယွမ်မြို့ရဲ့ ဖန်ကျန်းယောင်က ဓားတစ်လက်နဲ့ နှစ်သုံးရာကျင့်ကြံခြင်းကို လောင်းကြေးထပ်ပြီး ယွင်လန်မြို့ရဲ့ ဓားအင်မော်တယ်ဟန်ကို စိန်ခေါ်ချင်ပါတယ်”

စာလုံးများသည် ကျွမ်းကျင်မှုတချို့ကို ဖော်ပြနေသည်။

ထိုကျင့်ကြံသူက ကောင်းကင်အင်မော်တယ်အဆင့်နှင့် သိပ်မဝေး‌တော့ပေ။

“အမှန်အတိုင်းပြောရရင် ဖန်ကျန်းယောင်က ယွင်လန်မြို့ကို ကိုယ်တိုင်လာချင်ခဲ့တယ်။ ဒါပေမဲ့ ကိုယ့်ကိုယ်ကိုယ် မနှိမ့်ချနိုင်ဘူး။ သူက အသိအမှတ်ပြုတာကို လိုချင်နေတယ်”

ကျောက်ချန်က တီးတိုးပြောသည်။

“သူက နောက်ခံကို ထုတ်ပြခဲ့တယ်”

‘အဲဒီလိုလုပ်လို့ရတာလား’

ဟန်မူယဲ့က တွေးမိသည်။

သူက ခေါင်းညိတ်လိုက်ပြီး ‌ကျောက်စိမ်းသေတ္တာကိုသိမ်း၍ အချက်ပြသည်။

“အဲဒါဆိုရင် မင်းစီစဉ်လိုက်လေ”

ကျောက်ချန်က ယွင်လန်မြို့တွင် ကောင်းစားနေသည်။ သူက ဟန်မူယဲ့ကို မှီခိုပြီး အကျိုးအမြတ်များ ရခဲ့သည်။

ဟန်မူယဲ့က ဓားကျင့်ကြံသူတစ်ယောက် ဖြစ်သောကြောင့် ဓားကျင့်ကြံခြင်းကိုသာ အာရုံစိုက်ထားသည်။ ဓားနှင့် မသက်ဆိုင်သော ကိစ္စရပ်များကို တခြားလူများက စီစဉ်ကြလိမ့်မည်။

သူက အင်မော်တယ်ကမ္ဘာတွင် အချိန်ကြာမြင့်စွာ မနေရသေးသော်လည်း တွက်ချက်မှုများကို ဆက်တိုက်ပြုလုပ်နေရသော လူသားလောကထက် ပိုမိုသက်တောင့်သက်သာ ရှိသည်။

သူ၏ဓားက လုံလောက်စွာ ထက်မြိနေလျှင် အရာအားလုံးကို ရရှိနိုင်လိမ့်မည်။

တစ်ရက်အကြာတွင် ယွင်လန်မြို့နှင့် ပတ်ဝန်းကျင်မြို့များတွင် သတင်းပြန့်သွားသည်။ ကွေ့ယွမ်မြို့မှ ဖန်ကျန်းယောင်သည် ပြိုင်ဘက်ကင်းဟန်ကို စိန်ခေါ်ချင်နေသည်။

ယွင်လန်ဓားအင်မော်တယ်က ဆယ်ရက်အကြာတွင် တိုက်ခိုက်မည်ဟု သဘောတူခဲ့သည်။

ထိုသတင်းသည် လူတိုင်းကို လှုပ်ရှားသွားစေခဲ့သည်။

ပြိုင်ဘက်ကင်းဟန်၏ ဂုဏ်သတင်းသည် ဖန်ကျန်းယောင်ထက် ပိုမိုမြင့်မားသော်လည်း ဖန်ကျန်းယောင်က နှစ်ထောင်ချီကြာအောင် နာမည်ကြီးလာခဲ့သည်။

ထိုကျွမ်းကျင်သူနှစ်ယောက်၏ တိုက်ပွဲသည် အလွန်ထူးခြားလိမ့်မည်။

ချက်ချင်းဆိုသလိုပင် အင်အားစုများသည် တစ်နှစ်ကြာအောင် တိတ်ဆိတ်နေသော ယွင်လန်မြို့၏ ပြိုင်ဘက်ကင်းဟန်ကို အာရုံစိုက်ထားလိုက်ကြသည်။

“ဖန်ကျန်းယောင်က နှစ်ပေါင်းများစွာ ကျော်ကြားလာခဲ့တယ်။ ပြိုင်ဘက်ကင်းဟန်ရဲ့ နာမည်က နယ်မြေတစ်ခုကို တုန်လှုပ်သွားစေနိုင်တယ်။ ဒီတိုက်ပွဲက တကယ်ပြင်းထန်မှာပဲ”

လူတစ်ယောက်က ခန့်မှန်းကြည့်သည်။

“ပြိုင်ဘက်ကင်းဟန်က လေဟာနယ်သန့်စင်ခြင်းအဆင့် ကျင့်ကြံသူကိုတောင် သတ်ဖြတ်ခဲ့တယ်။ သူက အခွင့်ကောင်းယူပြီး လှုပ်ရှားလိုက်တာဆိုပေမဲ့ အရမ်းထူးချွန်တယ်”

တခြားလူက ကိုယ်ပိုင်အမြင်ကို ထုတ်ပြောသည်။

ကွမ်ယွဲ့မြို့တိုက်ပွဲတွင် ဟန်မူယဲ့က အနီးကပ်တိုက်ခိုက်ပြီး အနိုင်ရခဲ့သောကြောင့် မျှတမှုမရှိဟု လူအများက အပြစ်တင်ကြသည်။

သူက ယွင်လန်မြို့နှင့် မိုင်နှစ်သောင်းအကွာတွင် မိစ္ဆာအနှစ်သာရဂိုဏ်း၏ ကျွမ်းကျင်သူများကို ဖိနှိပ်ခဲ့သည်။

ထို့ကြောင့် ဟန်မူယဲ့၏ အစစ်အမှန်ခွန်အားသည် လေဟာနယ်လမ်းကြောင်းအဆင့်နှင့် လေဟာနယ်သန့်စင်ခြင်းအဆင့်၏ ကြားတွင် ရှိနေလိမ့်မည်။

“ဖန်ကျန်းယောင်က မိုင်နှစ်သိန်းအကွာမှာ ဓားအရှိန်အဝါကို စုစည်းနေတယ်။ ဒီတိုက်ပွဲက မြန်မြန်ပြီးသွားလောက်တယ်”

သတင်းပြန့်သွားသောအခါတွင် မရေမတွက်နိုင်သော ကျွမ်းကျင်သူများက ယွင်လန်မြို့၏ ပတ်ဝန်းကျင်သို့ ရောက်လာကြသည်။

ဓားလမ်းစဉ်တွင် ဟန်မူယဲ့ကဲ့သို့ နည်းစနစ်များကို အသုံးပြု၍ အနီးကပ်တိုက်ခိုက်သောလူများနှင့် အရှိန်အဟုန်ကို စုစည်းပြီး အပြင်းအထန်တိုက်ခိုက်သောလူများ ရှိကြသည်။

ဖန်ကျန်းယောင်က မိုင်တစ်သိန်းအကွာတွင် ကောင်းကင်နှင့်မြေကြီး၏စွမ်းအားကို လှုံ့ဆော်ပြီး ရုပ်ခန္ဓာကို နတ်ဘုရားသားရဲအဖြစ် အသွင်ပြောင်းခဲ့သည်။ သူ၏ သွေးချီသည် ကောင်းကင်အထိ မြင့်တက်နေသည်။

မိုင်ငါးသောင်းအကွာတွင် ဖန်ကျန်းယောင်၏ ဓားအလင်းက နဂါးတစ်ကောင်အဖြစ် ပြောင်းလဲသွားသည်။

ယွင်လန်မြို့နှင့် မိုင်ထောင်ချီအကွာတွင် ပေတစ်သောင်းကြီးမားသော ကောင်းကင်လင်းတတစ်ကောင်က ဟိန်းဟောက်လိုက်ပြီး ဓားရှည်တစ်လက်သည် လေထုကို ထိုးခွဲသွားသည်။

ဟန်မူယဲ့ကို ယုံကြည်သောလူများ၏ မျက်နှာထားက လေးနက်နေကြသည်။

တစ်ဖက်လူ၏ လွှမ်းမိုးနိုင်စွမ်းရှိသော စွမ်းအားကို ကောင်းကင်အင်မော်တယ်များကပင် ခုခံနိုင်မည်မဟုတ်ပေ။

ကျောက်ချန်၏မျက်နှာထားက ပြောင်းလဲသွားပြီး လင်းတပုံရိပ်ကို ကြည့်သည်။

“သူက အစ်ကိုဟန်နဲ့ တကယ်ပဲ တိုက်ခိုက်ချင်နေတာလား”

သူက မြို့တံတိုင်းတွင်ရပ်နေသော ရှေ့တွင်ရှိသည့် ဟန်မူယဲ့ကို ကြည့်လိုက်ပြီး ခေါင်းကုတ်သည်။

“ငါက ရှုပ်ထွေးသွားအောင် လုပ်မိတာလား”

“ကွေ့ယွမ်မြို့ရဲ့ ဖန်ကျန်းယောင်က ယွင်လန်ဓားအင်မော်တယ်ကို စိန်ခေါ်ဖို့ ရောက်လာပါတယ်။ ငါ့ကို သင်ပြပေးနိုင်မယ်လို့ မျှော်လင့်တယ် ....”

လေထုထဲတွင် ကျယ်လောင်သောအသံကို ကြားနိုင်သည်။

မိုင်ထောင်ချီအကွာတွင်ရှိသော ပုံရိပ်က ရှေ့သို့ ခြေတစ်လှမ်းတိုးသည်။

“ကောင်းပြီ”

ဟန်မူယဲ့က တည်ငြိမ်စွာပြောသည်။ သူ့ခန္ဓာကိုယ်တွင်ရှိသော ဓားအလင်းသည် စုစည်းလာပြီး ဓားတစ်လက်အဖြစ် ပြောင်းလဲ၍ ကောင်းကင်ပေါ်သို့ ထိုးတက်သွားသည်။

မရေမတွက်နိုင်သော နတ်အာရုံများက ကောင်းကင်လင်းတနှင့် ဓားပုံရိပ်ကို အာရုံစိုက်၍ ကြည့်နေကြသည်။

ဤတိုက်ပွဲတွင် မည်သူက အနိုင်ရမည်နည်း။

“ကျန်းထျန်းခန်းဆောင်ရဲ့ ဖန်ကျန်းယောင်က ဂိုဏ်းတူအစ်ကိုဟန်ကို နှုတ်ဆက်ပါတယ်။ ဒီတိုက်ပွဲက အစစ်အမှန်လား၊ အတုအယောင်လား”

ဟန်မူယဲ့က တိုးတိတ်သောရယ်သံကို ကြားလိုက်ရသည်။

ဟန်မူယဲ့က စကားပြန်မပြောဘဲ ရိုးရှင်းစွာ လက်မြှောက်သည်။

ဓားအလင်းသည် ကျဆင်းလာပြီး ကောင်းကင်နှင့်မြေကြီးကို ထိုးခွဲသွားသည်။

အစစ်အမှန်တိုက်ပွဲ ဖြစ်သည်။

ဓား၏လှုပ်ရှားမှုကြောင့် လေပြင်းများ ပေါက်ကွဲထွက်သွားသည်။

ထိုဓားချက်ကြောင့် မိုင်ထောင်ချီပတ်ဝန်းကျင်တွင်ရှိသော အင်မော်တယ်ချီများ စုစည်းလာကြသည်။

သက်ရှိများအားလုံးက အာရုံခံမိပြီး ယွင်လန်မြို့ကို ကြည့်လိုက်ကြသည်။

ကောင်းကင်ထက်တွင် လေဝဲတစ်ခု ဖြစ်တည်လာပြီး မြေပြင်သို့ ကျဆင်းလာသည်။

“ဘုန်း”

ကောင်းကင်နှင့် မြေကြီးကြားတွင် ဓားအလင်းသည် ဟိန်းဟောက်လိုက်သည်။

ဧရာမဓားတစ်လက်သည် ယွင်လန်မြို့၏အထက်တွင် စုစည်းလာပြီး ကောင်းကင်လင်းတနှင့် ရင်ဆိုင်သည်။

ထိုဓား၏စွမ်းအားကြောင့် ကောင်းကင်နှင့်မြေကြီးက တုန်ခါသွားသည်။ လူတိုင်းက မိုးပြိုကျလာသည်ဟု ခံစားလိုက်ရသည်။

ထိုစွမ်းအားကို မည်သူက တားဆီးနိုင်မည်နည်း။

မိုင်နှစ်သိန်းအကွာအဝေးမှ ခွန်အားစုဆောင်းလာသော ဖန်ကျန်းယောင်ကပင် တားဆီးနိုင်မည်မဟုတ်ပေ။

“ရွှပ်”

ဓားအလင်း ဖြတ်သန်းသွားခဲ့သည်။

ပေတစ်သောင်းကြီးမားသော ကောင်းကင်လင်းတက နှစ်ပိုင်းပြတ်ပြီး တိမ်တိုက်မြူခိုးများအဖြစ် ပြောင်းလဲသွားသည်။

ဓားတစ်ချက် ....

ယွင်လန်မြို့နှင့် ဆယ်မိုင်အကွာတွင် ကြောက်ရွံ့နေသော မျက်လုံးများနှင့် မျက်နှာဖြူဖျော့နေသော ဓားကျင့်ကြံသူက ဓားရှည်တစ်လက်ကို ကိုင်ထားသည်။

“ကောင်းကင်နဲ့လူသားရဲ့ ပျက်စီးခြင်းငါးပါးကို ရင်ဆိုင်နေရပေမဲ့ ကံကြမ္မာကို စိန်ခေါ်ရဲတယ်။ တကယ်သတ္တိရှိတာပဲ”

သူက ဟန်မူယဲ့၏အသံကို ကြားလိုက်ရသည်။

ထိုဓားကျင့်ကြံသူက မိုင်နှစ်သိန်းခွန်အားကို စုစည်းလာသော ဖန်ကျန်းယောင် ဖြစ်သည်။

သို့သော် သူ၏ဓားက ယွင်လန်မြို့၏ ပြိုင်ဘက်ကင်းဟန်နှင့် မယှဉ်နိုင်ခဲ့ပေ။

ပြိုင်ဘက်ကင်းဟန်၏ဓားသည် ဖန်ကျန်းယောင်၏ ဓားမာန်ဟုန်ကို ချေဖျက်ပြီး ကောင်းကင်နှင့်မြေကြီးကို တုန်ခါသွားစေခဲ့သည်။ ထိုအချိန်တွင် လူတိုင်းက အံ့အားသင့်စွာ ပင့်သက်ရှိုက်လိုက်မိသည်။

ကောင်းကင်အင်မော်တယ်များနှင့် ယှဉ်နိုင်သော ဖန်ကျန်းယောင်က ပြိုင်ဘက်ကင်းဟန်၏ ဓားတစ်ချက်ကိုပင် မခုခံနိုင်ခဲ့ပေ။

“ငါရှုံးသွားပြီ ....”

ဖန်ကျန်းယောင်က စိတ်ပျက်နေသောမျက်နှာထားဖြင့် ခေါင်းခါသည်။

သူစုစည်းထားသော ဓားမာန်ဟုန်သည် သူ့တာအို၏ အနှစ်သာရ ဖြစ်သည်။

သူက လောကကို လွှမ်းမိုးနိုင်သော ဓားတာမာန်ဟုန်ဖြင့် ကောင်းကင်နှင့်လူသား၏ ပျက်စီးခြင်းငါးပါးကို ကျော်လွှားရန် စီစဉ်ထားခဲ့သည်။

သို့သော် ပြိုင်ဘက်ကင်းဟန်က ထိုအချက်ကို မြင်နိုင်ခဲ့သည်။

ဖန်ကျန်းယောင်က ဓားရှည်တစ်လက်ကို ကိုင်ထားပြီး တစ်လှမ်းချင်းစီ ရှေ့တိုးလာသည်။

ခြေလှမ်းတိုင်းတွင် သူ၏ အရှိန်အဝါက အားနည်းလာသည်။

ခြေလှမ်းဆယ်လှမ်းအကွာတွင် သူက အားနည်းနေပြီး အိုမင်းနေသောလူတစ်ယောက်အဖြစ် ပြောင်းလဲသွားသည်။

“ကောင်းကင်နဲ့လူသားရဲ့ ပျက်စီးခြင်းငါးပါး”

ထိုမြင်ကွင်းကြောင့် လူတိုင်းက ထိတ်လန့်စွာ အသံပြုမိကြသည်။

“သူက ပျက်စီးခြင်းငါးပါးနဲ့ ရင်မဆိုင်ခင်မှာ အသန်မာဆုံးစွမ်းအားကို စုစည်းပြီး ပြိုင်ဘက်ကင်းဟန်နဲ့ သူ့ကိုယ်သူ စိန်ခေါ်ချင်ခဲ့တယ်”

“နှမြောစရာပဲ ....”

ဖန်ကျန်းယောင်၏ အိုမင်းနေသောပုံစံကို ကြည့်လိုက်ပြီး မရေမတွက်နိုင်သော ကျင့်ကြံသူများ၏ မျက်နှာထားက ရှုပ်ထွေးသွားကြသည်။

ထိုအရာသည် အင်မော်တယ်ကျင့်ကြံသူ ၉၉%ကို တားဆီးထားသော ကောင်းကင်နှင့်လူသား၏ ပျက်စီးခြင်းငါးပါးကပ်ဘေး ဖြစ်သည်။

လူသားအင်မော်တယ် အထွတ်အထိပ်အဆင့်သို့ ရောက်သွားသောလူတိုင်းက ထိုကပ်ဘေးနှင့် ရင်ဆိုင်ရလိမ့်မည်။