ဦးနှောက်ဆေးခံရခြင်း

အနီရောင်မိုးကြိုးဧကရာဇ်က ထိုးထိုးထောင်ထောင်ဆံပင်နှင့် ခက်ထန်သည့် မျက်နှာရှိထားသည့် လူလတ်အရွယ် အမျိုးသားတစ်ဦး ဖြစ်၏။ ထိုသူက ပတ်ဝန်းကျင်ကို ပြောင်းလဲပြီး သူ့အနီရောင်မိုးကြိုးများ ပြည့်နှက်နေသည့် ပိုင်နက်တစ်ခုအဖြစ် ပြောင်းလဲပစ်ခဲ့သည်။ ထိုအရာက လျှပ်စီးနှင့် တစ်စစီဖြုတ်ခြင်း တာအိုတို့ကို ပေါင်းစည်းထားခြင်း ဖြစ်၏။

ကျိလန်ဖန်းက ထူးဆန်းသည့် နေရာတစ်ခုအတွင်း ရောက်ရှိနေသည်ကို တွေ့လိုက်ရသည်။ အမည်မသိ စွမ်းအားတစ်ခုက သူ့ကို အခြေခံအစိတ်အပိုင်းများဖြစ်သည့် အက်တမ်အဖြစ် တစ်စစီ ဖြုတ်ပစ်ဖို့ ကြိုးစားနေလေ၏။ သူ့ဝိညာဉ်က မိုးမြေကြားမှ သဘာဝစွမ်းအားထံ ပြန်လည်သွားလိုမှု စိတ်ဆန္ဒကို ခုခံနေရသည်။

သူက ဓားကို ဝှေ့ယမ်းလိုက်ပြီး လေဟာနယ်ကို ပိုင်းဖြတ်လိုက်သည်။ သို့သော် ထိုစွမ်းအားက သူ့အရှိန်ကို နှေးကွေးသည့် ဓားချက်မြောက်များစွာအဖြစ် ခွဲထုတ်လိုက်ပြီး သူ့အရှိန်ကို လျှော့ချပစ်လိုက်သည်။

ဝှစ်

အနီရောင်မိုးကြိုးချက်က ကျိလန်ဖန်းဆီ ဦးတည်လိုက်၏။ သူက မြန်ဆန်သည့် ဓားချက်ဖြင့် ရင်ဆိုင်လိုက်သည်။ သို့သော်လည်း သူက လုံလုံလောက်လောက် မမြန်ဆန်သည့်အတွက် လွဲချော်သွားခဲ့ရသည်။ သူ့ခန္ဓာကိုယ်က လှုပ်ရှားကာ ရှောင်ရှားလိုက်ရ၏။ ထိုနည်းစနစ်က သူ့အရှိန်ကို ပိုင်းဖြတ်သည့်အတွက် သူ့ကို တန်ပြန်ရင်ဆိုင်မှုတစ်ခုအဖြစ် မှတ်ယူနိုင်သည်။

အနီရောင်မိုးကြိုးက ပထမစမ်းသပ်ချက် အောင်မြင်သွားသည်ကို မြင်သည့်အခါ အနီရောင်မိုးကြိုးချက်များအား ထပ်မံ ထုတ်လွှတ်လိုက်သည်။ သို့သော်လည်း ကျိလန်ဖန်းက အရှိန်ကို ထပ်မံမြှင့်တင်လိုက်သည့်အခါ ထိုတိုက်ကွက်များကို တားဆီးနိုင်ရုံမျှသာ ဖြစ်၏။

လေဟာနယ်ကြေးမုံဧကရာဇ်ကလည်း ဘေးမှ စောင့်ကြည့်နေပြီး သူ့လက်ကိုဝှေ့ကာ အပြာရောင်အလင်းအား သူ့အပေါင်းအပါ၏ ခန္ဓာကိုယ်အတွင်း ထည့်သွင်းပေးလိုက်သည်။

အနီရောင်မိုးကြိုး၏ အရှိန်အဝါက သူ့စွမ်းအားနှင့်အတူ သိသိသာသာ တိုးမြင့်လာ၏။ သူ့တာအို၏ တစ်စစီဖြုတ်ခြင်းကဏ္ဍကလည်း ပိုမိုသိသာလာခဲ့ပြီး ကျိလန်ဖန်း၏ အရှိန်ကို ပိုင်းခြားနေစဉ် သူ့လျှပ်စီးချက်များ၏ အရှိန်ကမူ သိသိသာသာ မြန်ဆန်လာ၏။

ဓားအပုံလိုက်နည်းစနစ်

ကျိလန်ဖန်း၏ နောက်တွင် ပုံရိပ်ရာချီ ထွက်ပေါ်လာပြီး တစ်ခုချင်းစီက ဓားကိုဝှေ့ယမ်းပြီးသည့်နောက်တွင် သူ့ခန္ဓာကိုယ်ဖြင့် ပေါင်းစည်းသွားကြသည်။ ထို့နောက် တစ်ချက်တည်းဖြင့် သူက မိုးကြိုးချက် ထောင်ချီကို ပိုင်းဖြတ်ပစ်လိုက်သည်။ ဓားချက်များစွာကို စုစည်းထားခြင်းဖြင့် သူ့အရှိန်က နောက်ထပ် အနေအထားတစ်ခုသို့ ရောက်ရှိသွားခဲ့၏။

အနီရောင်မိုးကြိုးဧကရာဇ်၏ အမူအရာက ပြောင်းလဲသွားပြီး အားကုန်ထုတ်သုံးလိုက်သည်။ သူ့ပိုင်နက်အတွင်း အက်တမ်အမှုန်တစ်ခုချင်းစီက အလင်းထက်ပင် အဆများစွာ မြန်ဆန်သည့် အနီရောင်မိုးကြိုးချက် ဖြစ်ကြသည်။ သို့သော်လည်း ကျိလန်ဖန်းက မြန်ဆန်လွန်းသည့်အတွက် မလှုပ်ရှားလိုက်သလိုမျိုး အမြန်အဆန် ပြုမူကာ ထိုလျှပ်စီးမိုးကြိုးများကို ဖြေရှင်းနေလေ၏။

လေဟာနယ်ကြေးမုံဧကရာဇ်ကလည်း လက်ကို မြှောက်ကာ သူ့ခန္ဓာကိုယ်အတွင်း နောက်ထပ် အပြာရောင်အလင်းတစ်လုံးကို ထည့်သွင်းလိုက်သည်။ သို့သော် ထိုအရာက အသုံးမဝင်ခဲ့ပေ။ ကျိလန်ဖန်းက ခြေတစ်လှမ်းဖြင့် တစ်ဖက်လူရှေ့ ရောက်ရှိလာကာ ဓားဖြင့် ပိုင်းခြားလိုက်သည်။

ကြေးမုံက သူ့တိုက်ကွက်ကို တားဆီးထားပြီး ပြန်လည်ခုခံဖို့ ကြိုးစားနေ၏။

သို့သော်လည်း စုစည်းရေးနည်းစနစ်က သူ့ကို ပိုင်းဖြတ်ဖို့ ခွင့်ပြုပေးထားသည်။

အနီရောင်မိုးကြိုးက ထိုအခွင့်အရေးကို ရယူကာ အဖြူစွတ်စွတ် ချပ်ဝတ်တစ်ခုကို ဆင့်ခေါ်လိုက်၏။

ဝုန်း

ကျိလန်ဖန်း၏ ဓားက တစ်ဖက်လူကို ထိတွေ့သွားသော်လည်း လိုချင်သည့် ရလဒ် ထွက်ပေါ်မလာခဲ့ပေ။

“အဆုံးမဲ့သတ္တုနဲ့ လုပ်ထားတဲ့ ချပ်ဝတ်တဲ့လား” ကျိလန်ဖန်းက အံ့အားသင့်မှုကို ဖုံးကွယ်ထားခြင်းမရှိဘဲ မေးလိုက်သည်။

“ကုန်သွယ်ရေးဗဟိုချက်က နှိုင်းယှဉ်လို့မရလောက်အောင် ချမ်းသာတာပဲ”

အဆုံးမဲ့သတ္တုက ထိုအဆင့်တွင် မဖျက်စီးနိုင်ဖွယ်ဟု နာမည်တပ်ခံထားရပြီး အမာကြောဆုံး အဆင့်(၁၀)သတ္တုအဖြစ် မှတ်ယူခံထားရသည်။ ဤသို့သော အရင်းအမြစ်မျိုးက ဒိုင်မေးရှင်းအနိမ့်တွင်ပင် ရှားပါးနေပြီဟု ယူဆ၍ရသော်လည်း ထိုသူများက ချပ်ဝတ်တစ်ခုလုံးကို ထိုအရာဖြင့် ပြုလုပ်ထားခဲ့သည်။

“ငါတို့က ဒီစစ်ပွဲကို ပြင်လာတာ ကြာလှပြီ။ ငါတို့ရဲ့ အာဏာကို ခုခံဖို့ ကြိုးစားတဲ့သူတွေကို ရှင်းထုတ်ပစ်ဖို့ ဘာမဆိုလုပ်မှာပဲ” အနီရောင်မိုးကြိုးက သရော်ကာ ပြောလိုက်သည်။

“မယိုင်လဲတဲ့ သစ္စာခံတွေပါလား။” ကျိလန်ဖန်းက တည်ငြိမ်စွာ ပြောလိုက်၏။

“ဝမ်ဝေ့ ဒီမှာရှိနေတုန်းကတော့ ဘာလို့ အဲ့လိုစကားမပြောရတာလဲ”

“အဲဒါက အရေးကြီးလို့လား။ ဘာပဲဖြစ်ဖြစ် သူက သွားပြီ။ ငါတို့က နောက်ဆုံးအနိုင်ရရှိတဲ့သူတွေပဲ။ ငါတို့ သင့်တော်သလို သမိုင်းကြောင်းကို ပြင်ရေးနိုင်တယ်” အနီရောင်မိုးကြိုးက ပြန်လည်ချေပလိုက်သည်။

ကျိလန်ဖန်းက ခေါင်းအသာယမ်းလိုက်၏။

“ငါပြောတာ မှားလို့လား”

“မင်းတို့လူတွေက အာဏာကို ဆုပ်ကိုင်ထားတာကြာလှပြီဆိုတော့ သက်တောင့်သက်သာ နေလာရမှန်း သိသာတယ်” ကျိလန်ဖန်းက ပြန်ဖြေလိုက်သည်။

“အဲဒါက ဘာကို ပြောချင်တာလဲ” အနီရောင်မိုးကြိုးဧကရာဇ်က ထိုသူသည် အဓိပ္ပာယ်မရှိသည့် အရာများကို ပြောနေကြောင်း ခံစားမိလေ၏။ သူတို့က အမြဲတမ်း သတိကြီးကြီး ထားခဲ့သည့်အတွက် သူ့စကားလိုမျိုး မိမိဘာသာ ကျေနပ်အားရခြင်း မည်သို့ဖြစ်နိုင်မည်နည်း။

“မင်းကို မေးပါရစေဦး။ ကုန်သွယ်ရေးဗဟိုချက်က ဒိုင်မေးရှင်းအနိမ့်ရဲ့ နေရာတိုင်းကို ဘာလို့မဖြန့်ကျက်ရတာလဲ”

“ငါတို့က ဒိုင်မေးရှင်းအနိမ့်ရဲ့ သုံးပုံတစ်ပုံကို ဖြတ်ကျော်ပြီးသွားပြီဆိုတော့ လုံလောက်နေပြီလေ။ ကြီးမားလွန်းတာက ကောင်းတာလို့ ဆိုလိုတာမှ မဟုတ်တာ”

“အဲဒါက မင်းတို့လူတွေ ပြောတဲ့စကားလေ။ ဒါပေမဲ့ မင်းတို့ရဲ့ သမိုင်းကြောင်းတစ်လျှောက် အကြိမ်များစွာ ချဲ့ထွင်ဖို့ ကြိုးစားခဲ့ဖူးတယ်။ ဒါပေမဲ့ တစ်ခေါက်ချင်းစီက အကြောင်းအရင်းအမျိုးမျိုးကြောင့် ကျရှုံးသွားရတာချည်းပဲ။ အဲဒါက သိသာနေတယ် မဟုတ်ဘူးလား။ မင်းတို့ရဲ့ ကြမ္မာက အင်အားစုကြီးဖြစ်လာဖို့ မလုံလောက်လို့ပဲ။ ကံကောင်းမှု ဒါမှမဟုတ် ကြမ္မာရဲ့ အခြေခံစည်းမျဉ်းက ဘယ်နေရာသွားသွား ကျရောက်လာမှာပဲ”

“ဒီစစ်ပွဲက ငါတို့ကို သတိပေးနေတာလို့ ပြောချင်တာလား။ ငါတို့ကံကောင်းမှုရဲ့ တန်ပြန်သက်ရောက်မှု အစတဲ့လား။ ရယ်စရာကောင်းလိုက်တာ”

“ဟုတ်မှာပေါ့။ မင်းတို့တွေက အချိန်အကြာကြီး အုပ်စိုးလာတာ ကြာလှပြီ။ အစောပိုင်းနှစ်တွေတုန်းကတော့ မင်းတို့ရဲ့ တည်ရှိမှုက ဒိုင်မေးရှင်းအနိမ့်ရဲ့ ဖွံ့ဖြိုးတိုးတက်မှုကို အထောက်အကူ ဖြစ်စေခဲ့တယ်။ အဲဒါကြောင့် အစစ်အမှန် ကောင်းကင်တာအိုရဲ့ ကောင်းချီးကိုလည်း ရထားခဲ့တာပေါ့။

ဒါပေမဲ့ အခု မင်းတို့က လွန်လွန်ကြူးကြူး ပြုမူလာပြီးတော့ တစ်ယောက်ချင်းစီကလည်း ကိုယ်ပိုင်အကျိုးအမြတ်အတွက် အားလုံးကို ရက်ရက်စက်စက် ခေါင်းပုံဖြတ် အမြတ်ထုတ်နေကြတာ။ ပြီးတော့ ကမ္ဘာထဲမှာ မင်းတို့က မြစ်ပွားနာလိုမျိုး ဖြစ်လာပြီ။ အဲဒါဆိုတော့ အစစ်အမှန်ကောင်းကင်တာအိုက မင်းတို့ရဲ့ အချိန်ကို ပြောင်းလဲပစ်ဖို့ ဒါမှမဟုတ် ဖျက်စီးပစ်ဖို့ ဆုံးဖြတ်လိုက်တာ နေမှာပေါ့”

“မင်းက အဓိပ္ပာယ် မရှိတာတွေ ပြောနေတာပဲ။ ငါတို့ရဲ့ တည်ရှိမှုက ကမ္ဘာတွေကို အသိပညာ၊ အရင်းအမြစ်၊ ယဉ်ကျေးမှုနဲ့ ဆက်သွယ်မှုကို လဲလှယ်နိုင်အောင် ဖန်တီးပေးထားတာ။ ငါတို့က ဒိုင်မေးရှင်းအနိမ့်ရဲ့ စွမ်းအားကို မြှင့်တင်ပေးတာ။ ဖျက်စီးပစ်တာ မဟုတ်ဘူး”

“မင်းတို့က အဲ့လို ယုံတယ်လား”

“ဒါပေါ့”

“ထာဝရဧကရာဇ်တစ်ယောက်အနေနဲ့ မင်းက ကုန်သွယ်ရေးဗဟိုချက်ရဲ့ ချီကံကောင်းမှု ပျက်ယွင်းလာမှုကို မမြင်ဘူးလား” ကျိလန်ဖန်းက မေးလိုက်သည်။

အကယ်၍ ပြိုင်ဘက်က အကျိုးအမြတ်အတွက် တိုက်ခိုက်နေသည်မှာ ကိစ္စတစ်ခုဖြစ်သော်လည်း သူက တစ်စုံတစ်ခုကို အမှန်အကန်ယုံကြည်နေပါက နောက်ကိစ္စတစ်ခု ဖြစ်သွားလိမ့်မည်။

“မြင်တယ်လေ။ အကောင်းအတိုင်း ရှိနေသေးတာပဲ”

“အဲ့လိုလား” ကျိလန်ဖန်းက ထိုအနေအထားထိ ဦးနှောက်ဆေးခံထားရသည့် မျက်ကန်းလို ဖြစ်နေသည့် အရူးများဖြင့် ဆက်ပြောနေသည်မှာ အကျိုးမရှိကြောင်း ဆုံးဖြတ်လိုက်သည်။ ကုန်သွယ်ရေးဗဟိုချက်က ဤအနေအထားထိ အောင်မြင်မှု ရရှိသည်ကိုချီးကျူးရမည် ဖြစ်၏။ ပြောရလျှင် ထာဝရဧကရာဇ် ဖြစ်လာသည့်သူများက အရူးတစ်ယောက်မှ မပါပေ။

“ဒီလိုဆိုရင် အဆုံးသတ်လိုက်ကြရအောင်” ကျိလန်ဖန်းက စကားဝိုင်းကို အဆုံးသတ်လိုက်၏။

“ကောင်းပြီလေ” အနီရောင်မိုးကြိုးက သူ့လက်ကိုမြှောက်ကာ အနီရင့်ရင့် မိုးကြိုးနှစ်ခုကို ဆင့်ခေါ်ပြီး ရှေ့တိုးလာသည်။ သူက ချပ်ဝတ်က ခုခံမှုအပြည့်ပေးထားသည့်အခါ ပိုမိုယုံကြည်ချက် ရှိနေလေ၏။

ဝှစ်

အနီရောင်မိုးကြိုးဧကရာဇ်က အဖြူရောင်အလင်းကို မြင်လိုက်ရပြီး ဘာမှမတွေးနိုင်ခင် သူ့ခေါင်းက ခန္ဓာကိုယ်မှ ပြတ်ထွက်သွားသည်ကိုသာ မြင်လိုက်ရသည်။

“ဘယ်လိုလုပ်ဖြစ်နိုင်မှာလဲ”

“ငါ့မိတ်ဆွေရဲ့ တာအိုက ပိုင်းဖြတ်ခြင်းလေ။ သူ့ဆီကနေ နည်းနည်း သင်ထားတာပေါ့” ကျိလန်ဖန်းက လေဟာနယ်ကြေးမုံဧကရာဇ်ဘက်လှည့်ကာ ရှင်းပြလိုက်သည်။

“မင်းက စောစောလေးကတည်းက အစီအစဉ် တစ်ခုချနေတာ ဘာလဲ”

“မကြာခင် သိရလိမ့်မယ်”

လေဟာနယ်ကြေးမုံ ဧကရာဇ်ရှေ့တွင် ကြေးမုံတစ်ခု ပေါ်ထွက်လာပြီး သူနှင့် ချွတ်စွပ်တူသည့် ကိုယ်ပွားတစ်ယောက် ပေါ်ထွက်လာသည်။ ထို့နောက် အပြာရောင်အလင်းက ခန္ဓာကိုယ်နှစ်ခုလုံးကို လွှမ်းခြုံသွားလေ၏။

ငါ မှန်နေတာပဲ။ ကုန်သွယ်ရေးဗဟိုချက်က သူတို့ရဲ့ အဆင့်အတန်းနဲ့ စွမ်းရည်ကို အားဖြည့်မဲ့ ထူးကဲတဲ့ ချီကို ပေးထားတာပဲ…

ကျိလန်ဖန်းက ဆက်လက် မတိုက်ခိုက်ခင် တွေးလိုက်မိသည်။ သူ့ဓားချက်က ဒြပ်ထု၊ စွမ်းအင်၊ မြေစွမ်းအား၊ ပွတ်တိုက်မှု၊ ကာလံဒေသံတို့ဖြင့်ပင် ချုပ်နှောင်မှု မရှိသလိုမျိုး လှုပ်ရှားလိုက်သည်။ ပုံမှန်အားဖြင့် ရန်သူက သေဆုံးသွားခြင်း သို့မဟုတ် တားဆီးဖို့ နည်းလမ်းတစ်ခုရှိခြင်းတို့ ဖြစ်တတ်သော်လည်း ဤတစ်ကြိမ်တွင်မူ ထိုသူက လှည့်ကွက်ဖြင့် တုံ့ပြန်လာခဲ့သည်။

ကျိလန်ဖန်း၏ ဓားချက်က ကိုယ်ပွားတစ်ယောက်အပေါ် ကျရောက်လာသည့်အခါ သူ့ဓားချက်က လိပ်တစ်ကောင်ထက်ပင် နှေးကွေးသွားလေ၏။

အရှိန်လျှော့ချရေးလား မဟုတ်သေးဘူး …

သူ့စိတ်ထဲ အလျင်အမြန် တွက်ချက်နေလေ၏။

သူ့တိုက်ကွက်က အာကာပြင်နှင့် ကြေးမုံကို ပေါင်းစည်းထားတာဆိုတော့ ကြေးမုံက ပြောင်းပြန်ဆိုတော့ ငါ့ရဲ့အရှိန်ကို နှေးကွေးသွားအောင် ပြောင်းလဲပစ်လိုက်တာပဲ။

လေဟာနယ်ကြေးမုံဧကရာဇ်က ကျိလန်ဖန်းကို ယာယီချုပ်နှောင်ထားစဉ် တခြားတစ်ယောက်က တိုက်ခိုက်လာခဲ့သည်။ သူ့လက်ထဲတွင် ပြိုလဲသွားသော ဒိုင်မေးရှင်းမှ ပြုလုပ်ထားသည့် ဆူးချွန်နှစ်ခုရှိထားကာ ကြေးမုံများဖြင့် ဖွဲ့စည်းထားသည့် လက်နက်နှင့် တူနေသည်။

ဝုန်း

ဒုတိယကြေးမုံဧကရာဇ်က တိုက်ခိုက်လာသည့်အခါ ကျိလန်ဖန်း၏ ခန္ဓာကိုယ်မှ ဓားတစ်ချောင်း ထွက်ပေါ်လာကာ သူ့အာကာပြင် လက်နက်ကို တားဆီးလာသည်။ ထို့ကြောင့် သူက ထပ်မံကြိုးစားကာ ရိုက်ချက် သို့မဟုတ် ထိုးနှက်ချက်များကို ထပ်မံထုတ်လွှတ်လာခဲ့သော်လည်း ကျိလန်ဖန်း၏ ခန္ဓာကိုယ်က ဓားများဖြင့် ပြုလုပ်ထားသည့် ဆူးချွန်များစွာ ထွက်ပေါ်လာခဲ့သည်။

ဘန်း

ကျိလန်ဖန်း၏ ခန္ဓာကိုယ်က ယင်ယန်နည်းစနစ်ကို အသုံးပြုကာ ထိုနည်းစနစ်၏ အတားအဆီးကို ချိုးဖောက်ပစ်ခဲ့ပြီး သူ့ခန္ဓာကိုယ်မှ ယန်စွမ်းအားများ ထွက်ပေါ်လာပြီး သူ့ဝိညာဉ်မှ ယင်စွမ်းအားတို့ ထွက်ပေါ်လာခဲ့သည်။

“ဒါက ခန္ဓာကိုယ်အံ့ဖွယ်စွမ်းရည်ပဲ။ ဓားသမားတွေက ခန္ဓာကိုယ်လေ့ကျင့်ရတာကို မကြိုက်ဘူးလို့ ထင်နေတာ” လေဟာနယ်ကြေးမုံဧကရာဇ်က လှောင်ပြောင်သံကို ဖုံးကွယ်ထားခြင်း မရှိဘဲ ပြောလိုက်သည်။

“အချိန်က ပြောင်းလဲလာပြီ။ ဘာပဲဖြစ်ဖြစ် နေသားကျအောင် လုပ်ဖို့ လိုတယ်” ကျိလန်ဖန်းက အလေးအနက် မှတ်ယူဖို့ ဆုံးဖြတ်လိုက်၏။ သူက ဓားများဖြင့် ပေါင်းစည်းခြင်း သို့မဟုတ် စုပ်ယူခြင်းဖြင့် ခန္ဓာကိုယ်ကို လေ့ကျင့်ပေးသည့် ကျင့်စဉ်တစ်ခု ဖြစ်သည့် ဓားခန္ဓာတစ်သောင်းနည်းစနစ်ကို အသုံးပြုလိုက်သည်။ သူက ထိုနည်းစနစ်ကို နာမည်ကြီးဓားများ အတွင်း ရှိနေသည့် ဓားဆန္ဒများကို အသုံးပြုကာ လေ့ကျင့်ပေးဖို့ ဖန်တီးထားခြင်း ဖြစ်၏။

ကျိလန်ဖန်းက ဓားကို ကျစ်ကျစ်ဆုပ်ကိုင်ထားလိုက်ပြီး သူ့ခန္ဓာကိုယ်မှ ကြောက်မက်ဖွယ် အင်အားတစ်ခု စုစည်းလိုက်သည်။ သူက သူ့ခန္ဓာကိုယ်ရှိ အင်အားအားလုံးကို သူ့ဓားတာအိုဖြင့် ပေါင်းစည်းခဲ့ပြီး ထိပ်တန်း ငါးဆ တိုက်ခိုက်ရေးအဆင့်သို့ ရောက်ရှိသွားခဲ့သည်။

ထိုဓားချက်က စကားဖြင့် ဖော်ပြ၍ မရပေ။

ကာလံဒေသံ၊ ဒြပ်ထု၊ စွမ်းအင်နှင့် တခြားသော သဘောတရားများကို လျစ်လျူရှုထားတာလား။

မဟုတ်သေးဘူး။ အဲ့လိုတင် မဟုတ်သေးဘူး။ အဲဒီအစား အဲဒီသဘောတရားတွေကို သုံးပြီးတော့ တိုက်ကွက်ရဲ့ အရှိန်ကို မြှင့်တင်ပြီး စကားနဲ့ အလွယ်တကူ ဖော်ပြလို့မရလောက်တဲ့ အနေအထားတစ်ခုကို ဝင်ရောက်သွားခဲ့တာ…

ထိုအရာ၏ အမှန်တကယ် ကြောက်ဖို့ကောင်းသည့်အရာက ထိုအရာမှာ ကျိလန်ဖန်း၏ ကန့်သတ်ချက် မဟုတ်သေးဘဲ သူ့ဓားကို ပိုမိုမြန်ဆန်အောင် ဝှေ့ယမ်းနိုင်ဆဲ ဖြစ်၏။

အတန့်ကို ပယ်ဖျက်လိုခြင်း ဖြစ်သည်။