အပိုင်း(၈၉၀)

“ယွင်ထန့်တောရိုင်းမြေမှာ ဒီလိုဓားကျင့်ကြံသူမျိုး ရောက်လာတာကို ဘာဖြစ်လို့ သတင်းမပို့ခဲ့တာလဲ”

“သူက မူရုံမိသားစုကို ရောက်လာရင် ယဉ်ယဉ်ကျေးကျေး ကြိုဆိုသင့်တာမဟုတ်ဘူးလား”

“မူရုံမိသားစုက ဘာဖြစ်နေတာလဲ”

....

တာအိုဂိုဏ်း၏ အမြင်ကွဲပြားမှုကို အခွင့်ကောင်းယူ၍ မူရုံမိသားစု၏ သင်္ဘောပျံများက ဒေသသုံးခုကို ကျော်ဖြတ်ပြီး မိုင်သန်းရှစ်ဆယ်အကွာသို့ ရောက်လာခဲ့ကြသည်။

သို့သော် သူတို့က ယွင်ထန့်တောရိုင်းမြေနှင့် မိုင်ဆယ်သန်းအကွာသို့ ရောက်လာသောအခါတွင် တာအိုဂိုဏ်းက သတ်မိန့်ထုတ်လိုက်ပြန်သည်။

“သူပုန်တွေကို အပြတ်ရှင်းပစ်ရမယ်”

သင်္ဘောပျံ၏ရှေ့တွင်ရပ်နေသော အားကောင်းသည့် တာအိုစစ်သည်များက ထိုစကားလုံးများကို ရေရွတ်လိုက်ကြသည်။

မရေ၎တွက်နိုင်သော တာအိုစစ်သည်များ၏ဝင်္ကပါက ရှေ့တိုးလာသည်။

သင်္ဘောပျံဆယ့်နှစ်စင်းပေါ်တွင်ရှိသော မူရုံမိသားစု၏ တပည့်များက မျှော်လင့်ချက်ကင်းမဲ့နေကြသည်။

တာအိုဂိုဏ်းက အဆင့်အမြင့်ဆုံးသတ်မိန့်ဖြစ်သော သူပုန်သတ်ဖြတ်ခြင်းအမိန့်စာကို ထုတ်ပြန်ခဲ့သည်။

မူရုံမိသားစုကို သူပုန်များအဖြစ် သတ်မှတ်လိုက်ကြသည်။

“အကြီးအကဲယွင်လန်၊ ထွက်သွားပါတော့ ....”

မူရုံချီက ပေတစ်ထောင်ကြီးမားသော ကျားနက်ဆယ့်ရှစ်ကောင်အဖြစ် ပြောင်းလဲသွားသည့် စစ်ပွဲဝင်္ကပါများကို ကြည့်လိုက်ပြီး မျှော်လင့်ချက်ကင်းမဲ့နေသည်။

“တာအိုဂိုဏ်းက မူရုံမိသားစုနဲ့ နှစ်ပေါင်းများစွာကြာမြင့်တဲ့ ရင်းနှီးမှုကို ထောက်ထားလိမ့်မယ်လို့ ထင်ထားခဲ့တယ်”

“ဒီတစ်ကြိမ်မှာတော့ မူရုံမိသားစုက တကယ်ပျက်စီးရတော့မှာပဲ”

သူတစ်ယောက်တည်းကသာ ထိုသို့တွေးနေခြင်း မဟုတ်ပေ။

တာအိုဂိုဏ်းသည် ဖူယွီအင်မော်တယ်ကမ္ဘာကို လွှမ်းမိုးထားသော အသန်မာဆုံးအင်အားစုတစ်ခု ဖြစ်သည်။

သူတို့က တာအိုဂိုဏ်း၏ နယ်မြေအတွင်း၌ နေထိုင်ခဲ့သောကြောင့် တာအိုဂိုဏ်း၏ ခွန်အားကို ကောင်းမွန်စွာ နားလည်သည်။

တာအိုဂိုဏ်းက သူတို့ကို သူပုန်အဖြစ် သတ်မှတ်လိုက်သောကြောင့် သူတို့၏ တာအိုနှလုံးသားက ပျက်စီးသွားခဲ့ရသည်။

“ငါ့ရဲ့နှလုံးသားထဲမှာ တရားမျှတမှုကို ထိန်းသိမ်းထားတယ်”

ဟန်မူယဲ့က ရှေ့တွင်ရှိနေသော ကျားနက်များကို ကြည့်လိုက်ပြီး တီးတိုးရေရွတ်သည်။

သူ၏ ဘယ်ဘက်လက်ထဲတွင် ဒုတိယမြောက်ဓားတစ်လက် ပေါ်လာသည်။

အစိမ်းရောင်ကံကြမ္မာဓားနှင့် ခရမ်းရောင်မီးတောက်ဓား ....

ထိုဓားနှစ်လက်သည် ယခုအချိန်တွင် အစစ်အမှန်အင်မော်တယ်ရတနာများ ဖြစ်လာကြသည်။

ဟန်မူယဲ့က ဓားနှစ်လက်ကို ကိုင်ထားပြီး ပေါ်ထွက်လာသော တိုက်ခိုက်ခြင်းဆန္ဒကို အပြည့်အဝ ဖိနှိပ်ခဲ့သည်။

ဓားနည်းစနစ်ကို ကျင့်ကြံ၍ ဓားတာအိုကို သုံးသပ်ပြီး ဓားကျင့်ကြံသူတစ်ယောက် ဖြစ်လာခဲ့သည်။ ထိုကြိုးစားမှုများအားလုံးသည် နှလုံးသားထဲတွင်ရှိသော အမှန်တရားကို ထိန်းသိမ်းထားနိုင်ရန်အတွက် ဖြစ်သည်။

သူက အမတ်ချုပ်ကြီးဝမ်၏ ကြင်နာမှုနှင့် မူရုံကျန်း၏ မျက်နှာသာပေးခြင်းကို ပြန်လည်ပေးဆပ်ရန်အတွက် မူရုံမိသားစုကို ကာကွယ်ပေးချင်သည်။

ထိုအရာသည် ဖြောင့်မတ်မှု ဖြစ်သည်။

မူရုံမိသားစုက အမှားမလုပ်ခဲ့သော်လည်း တာအိုဂိုဏ်းက သူတို့ကို လိုက်ဖမ်းနေသည်။

မူရုံမိသားစုကို ကာကွယ်ခြင်းသည် ဖြောင့်မတ်မှုကို ထိန်းသိမ်းခြင်း ဖြစ်သည်။

ယခုအချိန်တွင် ခိုင်မာသောဓားဆန္ဒက ဟန်မူယဲ့ကို လွှမ်းခြုံထားသည်။

ကောင်းကင်နှင့်မြေကြီးကို ထိုး‌ဖောက်နိုင်သောဓားတစ်လက် ပေါ်ထွက်လာသည်။

သူ့နောက်ကျောတွင်ရှိသော ဓားအိမ်ထဲမှ မရေမတွက်နိုင်သောဓားများ ပျံသန်းထွက်လာပြီး ဧရာမဓားကြီးနှင့် ပေါင်းစပ်သွားကြသည်။

ဓားများသည် မျှော်စင်အဖြစ် ပြောင်းလဲသွားကြသည်။

ဟန်မူယဲ့၏မျက်လုံးများက ပြတ်သားနေကြသည်။ သူ့နောက်ကျောတွင်ရှိသော ဓားမျှော်စင်က ဖြည်းဖြည်းချင်း လည်ပတ်နေပြီး ကိုးထပ်ဓားမျှော်စင်အဖြစ် ပြောင်းလဲသွားသည်။

ထိုရတနာကို ယခုအချိန်တွင် ထုတ်သုံးသင့်သည်။

အကယ်၍ ထိုရတနာပေါ်မလာခဲ့လျှင် အံ့ဖွယ်ဝိညာဉ်ဓားဂိုဏ်းက သူ့ကို အလေးအနက်ထားမည်မဟုတ်ပေ။

အံ့ဖွယ်ဝိညာဉ်ဓားဂိုဏ်းက သူ့ကို အလေးအနက်မထားလျှင် မူရုံမိသားစုကို ခေါ်ထုတ်သွားနိုင်မည်မဟုတ်ပေ။

ကိုးထပ်ဓားမျှော်စင် ....

ကိုးထပ်ဓားမျှော်စင် ပေါ်လာသောအခါတွင် လောကသည် တုန်လှုပ်သွားခဲ့သည်။

ဟန်မူယဲ့က လက်မြှောက်ပြီး ဓားမျှော်စင်ကို တိုက်ရိုက်အသုံးချသည်။

မရေမတွက်နိုင်သော ဓားအလင်းများက လမ်းပိတ်ထားသော ကျားနက်များကို တစ်ပိုင်းတစ်စစီ ဖြစ်သွားစေသည်။

အလုံးစုံစွမ်းအား၏ရှေ့တွင် ဝင်္ကပါစွမ်းအားက အသုံးမဝင်တော့ပေ။

တာအိုစစ်သည်များ၏ တိုက်ပွဲဝင်္ကပါက ဓားဝင်္ကပါနှင့် မယှဉ်နိုင်ခဲ့ပေ။

“ယွင်လန်မြို့ရဲ့ ပြိုင်ဘက်ကင်းဟန်”

ရှေ့တွင် ရွှေရောင်ဝတ်စုံနှင့် တာအိုတန်ခိုးရှင်တစ်ဦးက ရွှေရောင်ချိပ်တံဆိပ်ကို ကိုင်ထားပြီး ဟန်မူယဲ့ကို ကြည့်နေသည်။

“အံ့ဖွယ်ဝိညာဉ်ဓားဂိုဏ်းရဲ့ ကိုးထပ်ဓားမျှော်စင်”

“အံ့ဖွယ်ဝိညာဉ်ဓားဂိုဏ်းက ငါတို့တာအိုဂိုဏ်းတွေကို ရန်စနေတာလား”

တာအိုတန်ခိုးရှင်၏ လက်ထဲတွင်ရှိသော ရွှေရောင်ချိပ်တံဆိပ်က လွင့်မျောလာသည်။

ရွှေရောင်ချိပ်တံဆိပ်က ပေတစ်သိန်းကြီးမားသွားပြီး နတ်ဘုရားသားရဲများ၏ ပုံရိပ်သုံးခုကို စုစည်းသည်။

ချီလင်၊ ကောင်းကင်လင်းတနှင့် ပျက်စီးခြင်းကောင်းကင်မိကျောင်းတို့ ဖြစ်ကြသည်။

ထိုနတ်ဘုရားသားရဲ သုံးကောင်အပြင် တခြားသားရဲများ၏ ပုံရိပ်လည်း ဖြည်းဖြည်းချင်း ပေါ်လာကြသည်။

ရွှေရောင်ချိပ်တံဆိပ်သည် ကမ္ဘာဦးခေတ်၏ နတ်ဘုရားသားရဲနှင့် ထူးခြားသောသားရဲများကို သန့်စင်ပြီး လက်နက်ဝိညာဉ်အဖြစ် ထိန်းချုပ်ထားသည်။

သူတို့က သွေးမျိုးဆက်စွမ်းအားကို ထုတ်ဖော်လိုက်ကြသည်။ သင်္ဘောပျံပေါ်တွင်ရှိသော မူရုံမိသားစုဝင်များက လဲကျသွားကြသည်။

တာအိုစစ်သည်များကလည်း ဖြူဖျော့သွားကြသည်။ သူတို့၏ ထိခိုက်ထားသော အသက်စွမ်းအားကို ရွှေရောင်ချိပ်တံဆိပ်က စုပ်ယူသွားသည်။

ရွှေရောင်ချိပ်တံဆိပ်သည် သွေးမျိုးဆက်စွမ်းအားကို ဖိနှိပ်နိုင်သော ရတနာတစ်ပါး ဖြစ်သည်။

ဟန်မူယဲ့က ဓားနှစ်လက်ကို သွယ်ယှက်ထားပြီး မျက်လုံးများကို မှေးကျဉ်းလိုက်သည်။

ဖိနှိပ်ထားသော ပါ့ရှားသွေးမျိုးဆက်နှင့် ခွေသားရဲသွေးမျိုးဆက်တို့က သူ့ခန္ဓာကိုယ်ထဲတွင် လှုပ်ရှားနေကြသည်။

ဒေါသ ....

သွေးမျိုးဆက်စွမ်းအား၏ ဒေါသ ဖြစ်သည်။

ကမ္ဘာဦးခေတ်၏ နတ်ဘုရားသားရဲများက ကျွန်ပြုခံထားရသောကြောင့် ဒေါသထွက်နေသည်။

“သတ်”

ယခုအချိန်တွင် သူက အမှန်တရားကိုရှာဖွေရန် စိတ်မဝင်စားပဲ သတ်ဖြတ်ခြင်းကိုသာ ပြုလုပ်ချင်သည်။

ဟန်မူယဲ့က ဖျတ်ခနဲလှုပ်ရှားလိုက်ပြီး ချိပ်တံဆိပ်၏အပေါ်သို့ ရောက်သွားသည်။

အစိမ်းရောင်ကံကြမ္မာဓားက ချိပ်တံဆိပ်ကို ခုတ်ချသည်။

တာအိုတန်ခိုးရှင်က ရယ်လိုက်ပြီး လက်မြှောက်သည်။ ရွှေရောင်အလင်းစက်ကွင်းက ဟန်မူယဲ့ကို လွှမ်းခြုံသွားသည်။

“မင်းမှာ နတ်ဘုရားသားရဲသွေးမျိုးဆက် ရှိနေတာကို သိထားလို့ တာအိုဂိုဏ်းက ငါ့ကို လွှတ်လိုက်တယ်”

“ငါ့ရဲ့ သင်္ကေတလေးခု ကမ္ဘာဦးချိပ်တံဆိပ်က ဝိညာဉ်တစ်ခု လိုနေသေးတယ်။ မင်းက လက်နက်ဝိညာဉ် ဖြစ်လာနိုင်တယ်”

တာအိုတန်ခိုးရှင်က တစ်ကိုယ်လုံးတုန်ခါနေပြီး ကမ္ဘာဦးသားရဲများ၏ ပုံရိပ်ကို မြင်နိုင်သော ကမ္ဘာငယ်ကို ဖော်ထုတ်သည်။

ထိုတာအိုတန်ခိုးရှင်က ကမ္ဘာဦးခေတ်၏ တစ်စိတ်တစ်ပိုင်းကို ကိုယ်ပိုင်ကမ္ဘာငယ်အဖြစ် သန့်စင်ထားခဲ့သည်။

“တာအိုဂိုဏ်းရဲ့ ကောင်းကင်အင်မော်တယ်ဝမ်ရှို့က ကောင်းကင်အလင်းဂိုဏ်းရဲ့ ကျွမ်းကျင်သူတစ်ဝက်လောက်ကို တစ်ယောက်တည်း ဖိနှိပ်နိုင်တယ်လို့ ပြောကြတယ်။ ခါးသီးအင်မော်တယ်နယ်မြေနဲ့ ကောင်းကင်အလင်းဂိုဏ်းက သူ့ကို လိုက်ဖမ်းနေတာ ကြာပြီ”

“ကောင်းကင်အင်မော်တယ်ဝမ်ရှို့က ကမ္ဘာဦးခေတ်ရဲ့ ကုန်းမြေအစိတ်အပိုင်းတစ်ခုကို ရှာတွေ့ပြီး ကိုယ်ပိုင်ကမ္ဘာငယ်အဖြစ် သန့်စင်ခဲ့တယ်။ အဲဒီကုန်းမြေအစိတ်အပိုင်းက သားရဲတွေအားလုံးကို ထိန်းချုပ်နိုင်တယ်။ သူက အရမ်းသန်မာပြီး လေဟာနယ်ဖွဲ့စည်းခြင်းအဆင့် ကျင့်ကြံသူနဲ့ တိုက်ခိုက်နိုင်တယ်လို့ ပြောကြတယ်”

“ဝိညာဉ်ဖွဲ့စည်းခြင်းအဆင့်လား။ အရင်တုန်းက လေဟာနယ်ထဲမှာ ကောင်းကင်အင်မော်တယ်ဝမ်ရှို့က လေဟာနယ်ဖွဲ့စည်းခြင်းအဆင့် ကျွမ်းကျင်သူနှစ်ယောက်ကို လိုက်ဖမ်းခဲ့သေးတယ်လေ”

ပတ်ဝန်းကျင်တွင် မရေမတွက်နိုင်သောအသံများ ပေါ်ထွက်လာကြသည်။

တာအိုအင်အားစု၏ အစစ်အမှန်ကျွမ်းကျင်သူတစ်ယောက် ရောက်လာခဲ့သည်။

အံ့ဖွယ်ဝိညာဉ်ဓားဂိုဏ်းက သန်မာသော်လည်း တာအိုဂိုဏ်း၏ ကျွမ်းကျင်သူများကို မတားဆီးနိုင်ပေ။

ကိုးထပ်ဓားမျှော်စင်ပိုင်ရှင်က ကောင်းကင်အင်မော်တယ်ဝမ်ရှို့၏ ဖိနှိပ်မှုကို ခံနေရသည်။

ဟန်မူယဲ့က ရွှေရောင်အလင်းစက်ကွင်းထဲတွင် ချုပ်နှောင်ခံထားရပြီး သွေးအလင်းများကို ထုတ်ပေးနေရသည်။

“ခွေသားရဲရဲ့ စွမ်းအားလား။ ပစ္စည်းကောင်းပဲ”

ဟန်မူယဲ့ဆီမှ ထုတ်ယူလိုက်သော သွေးမျိုးဆက်စွမ်းအားက ဟိန်းဟောက်နေသော ခွေသားရဲတစ်ကောင်အဖြစ် ပြောင်းလဲသွားသောအခါတွင် ကောင်းကင်အင်မော်တယ်ဝမ်ရှို့က ရယ်လိုက်သည်။

သူက လက်မြှောက်ပြီး ခွေသားရဲပုံရိပ်ကို ဖိချသည်။

သို့သော် သူက လက်ဖြင့် ဖိချလိုက်သောအချိန်တွင် ကြောင်အသွားသည်။

ဟန်မူယဲ့ဆီမှ နတ်ဘုရားသားရဲတစ်ကောင်၏ပုံရိပ် ပေါ်ထွက်လာသည်။

“မင်း၊ မင်းမှာ နောက်ထပ် နတ်ဘုရားသားရဲသွေးမျိုးဆက်တစ်ခု ရှိနေသေးတာလား”

သင်္ကေတလေးခုသည် သင်္ကေတငါးခု ဖြစ်မလာနိုင်ပေ။

ပါ့ရှား ....

နတ်ဘုရားသားရဲ ပါ့ရှား ....

ချုပ်နှောင်ခံထားရသော ဟန်မူယဲ့က ဓားနှစ်လက်ကိုင်ထားပြီး လှုပ်ရှားလိုက်သည်။

“ရွှပ်”

ကောင်းကင်အင်မော်တယ်ဝမ်ရှို့၏ ပုံရိပ်က ချက်ချင်းပျက်စီးသွားသည်။

“နတ်ဘုရားသားရဲသွေးမျိုးဆက်ကို ဘယ်လိုနည်းလမ်းနဲ့ ဖိနှိပ်ထားတာလဲ ကြည့်ရအောင်”

ဟန်မူယဲ့က လက်ကို ဝှေ့ယမ်းလိုက်သည်။ ကောင်းကင်အင်မော်တယ်ဝမ်ရှို့၏ ပြန်ကျဲသွားသောအလင်းများသည် ရွှေရောင်စာရွက်များအဖြစ် ပြောင်းလဲသွားကြသည်။

“ကောင်းကင်တက်လှမ်းအင်မော်တယ်ဘုရင်က ငါ့အတွက် ချန်ထားခဲ့တဲ့ အမွေအနှစ်စာရွက်တွေပဲ”

သူက စာရွက်များကို လှမ်းယူပြီး ပါ့ရှား၏ကျောပေါ်တွင်ရှိသော ပျက်စီးနေသည့်ကျောက်ပြားထဲသို့ ထည့်သွင်းလိုက်သည်။

ဟန်မူယဲ့၏မျက်လုံးများက အလင်းရောင်ဖြင့် တောက်ပလာကြသည်။

“ဘုန်း”

သူ့ကိုချုပ်နှောင်ထားသော ရွှေအလင်းက ပေါက်ကွဲပြီး သင်္ကေတလေးခုချိပ်တံဆိပ်က တစ်ပိုင်းတစ်စစီ ဖြစ်သွားသည်။

လူတိုင်း၏ ထိတ်လန့်နေသောအကြည့်အောက်တွင် ဟန်မူယဲ့က ကမ္ဘာဦးခေတ်၏ ကုန်းမြေအစိတ်အပိုင်းမှ ဖြစ်ပေါ်လာသော ကမ္ဘာငယ်ကို ကြည့်သည်။

သူက လက်မြှောက်ပြီး ရိုက်ချလိုက်သည်။

သင်္ကေတလေးခုချိပ်တံဆိပ်ထဲတွင် ချုပ်နှောင်ခံထားရသော သားရဲများအားလုံးက ကမ္ဘာငယ်ထဲသို့ ဝင်ရောက်သွားကြသည်။

ထို့နောက်သူက ဓားရှည်ကိုမြှောက်ပြီး ညင်သာစွာ ရေရွတ်လိုက်သည်။

“ငါက မင်းတို့ကို လွတ်လပ်ခွင့်ပေးမယ်”

နတ်ဘုရားသားရဲနှင့် ထူးခြားသောသားရဲများအားလုံးကို လွတ်လပ်ခွင့်ပေးမည်။

ကမ္ဘာငယ်ထဲသို့ ဝင်ရောက်သွားလျှင် လွတ်လပ်မှုကို မရနိုင်ပေ။

ကမ္ဘာငယ်က အထိန်းအကွပ်မရှိပဲ လေဟာနယ်ထဲသို့ ရောက်သွားလျှင် မည်သို့ ဖြစ်သွားမည်နည်း။

ဟန်မူယဲ့က သားရဲဝိညာဉ်များကို ကမ္ဘာငယ်ထဲသို့ ပို့လိုက်ပြီး ဖြည်းဖြည်းချင်း တစ်ဖက်သို့ လှည့်ကြည့်သည်။

သူ့လက်ထဲတွင်ရှိသော ဓားက အလွန်တောက်ပနေသည်။

ထိုဓားက မျက်နှာဖြူဖျော့နေသော ကောင်းကင်အင်မော်တယ်ဝမ်ရှို့ကို ညွှန်ပြထားသည်။

“မင်း၊ မင်းမှာ နတ်ဘုရားသားရဲတွေရဲ့ သွေးမျိုးဆက် ရှိနေတယ်”

“မင်းက ရှေးခေတ်ကလန်ကြီးတွေနဲ့ ဆက်သွယ်နေတာပဲ”

“မင်းက ခါးသီးအင်မော်တယ်နယ်မြေ ....”

သင်္ကေတလေးခုချိပ်တံဆိပ်ထဲတွင် ကောင်းကင်အင်မော်တယ်ဝမ်ရှို့က ဖြစ်ရပ်အများအပြားကို မြင်ခဲ့ရသည်။

ထိုဖြစ်ရပ်များက ဟန်မူယဲ့၏ လျှို့ဝှက်ချက်နှင့် သက်ဆိုင်နေသည်။

ထို့ကြောင့် ဟန်မူယဲ့က ကောင်းကင်အင်မော်တယ်ဝမ်ရှို့ကို စကားပြောခွင့် မပေးနိုင်ပေ။

သူက နတ်ဘုရားသားရဲနှစ်ကောင်၏ သွေးမျိုးဆက်စွမ်းအားကို ထုတ်ပြခဲ့သောကြောင့် ကောင်းကင်အင်မော်တယ်ဝမ်ရှို့က သေဆုံးသွားရမည်။

သတ်ဖြတ်လိုစိတ်က အကောင်အထည်ဖြစ်တည်နေပြီး ဓားသွားက ဖျတ်ခနဲ လှုပ်ရှားသွားသည်။ အစိမ်းရောင်ဓားအလင်းက လေထုကို ထိုးခွဲပြီး ကောင်းကင်အင်မော်တယ်ဝမ်ရှို့ကို ခုတ်ချလိုက်သည်။

ကောင်းကင်အင်မော်တယ်ဝမ်ရှို့၏ ခန္ဓာကိုယ်က အေးခဲနေသည်။ သူ့ခန္ဓာကိုယ်က နှစ်ပိုင်းပြတ်သွားသည်။ အောက်ပိုင်းက ဗလာအဖြစ် ပျောက်ကွယ်သွားပြီး အပေါ်ပိုင်းက သွေးစွန်းနေသည်။

ချက်ချင်းဆိုသလိုပင် သူက ပေတစ်ထောင်အကွာ၌ ပြန်ပေါ်လာသည်။

“မင်းရဲ့ခွန်အားနဲ့ ငါ့ကိုသတ်နိုင်မယ်လို့ ထင်နေတာလား ....”

သူက စကားပြောလိုက်သောအချိန်တွင် ရုတ်တရက် ရပ်တန့်ပြီး ခေါင်းငုံ့ကြည့်သည်။

ဓားတစ်လက်က သူ့ရင်ဘတ်ကို ထိုးဖောက်သွားသည်။

သူက ကောင်းကင်ပေါ်တွင်ရှိသော ကမ္ဘာငယ်ကို မော့ကြည့်သည်။

“မင်းက ဘယ်လိုလုပ်ပြီး ငါ့ရဲ့ ကမ္ဘာငယ်ထဲမှာ ဓားကို ထည့်ထားနိုင်တာလဲ ....”

ထိုဓားတိုက ကမ္ဘာငယ်ထဲတွင်ရှိနေပြီး ကောင်းကင်အင်မော်တယ်ဝမ်ရှို့ သတိလွတ်နေသောအချိန်ကို အခွင့်ကောင်းယူ၍ လှုပ်ရှားခဲ့သည်။

သို့သော် ကမ္ဘာငယ်၏ပိုင်ရှင်က ကမ္ဘာငယ်ထဲသို့ ခြင်တစ်ကောင်ဝင်လာလျှင်ပင် သတိထားမိသည်။

ဓားတစ်လက်ကို မသိစရာအကြောင်းမရှိပေ။