ခရီးသွားလာခြင်း အပိုင်း (၄)

ဝမ်ဝေ့က သူ့ဦးတည်ရာသို့ ရောက်လာသည်နှင့် စစ်ပွဲများနှင့် ဖရိုဖရဲများ ပြည့်နှက်နေသည့် ကမ္ဘာတစ်ခုကို မြင်လိုက်ရသည်။ ထိုအရာက သေမျိုးနှလုံးသားကမ္ဘာရှိ အေးချမ်းသည့် လေထုနှင့် လုံးဝကွဲပြားနေသည်။ နေရာတိုင်းတွင် မသေမျိုး ကျင့်ကြံသူများက သူတို့၏ လက်နက်များနှင့် မန္တန်များကို အသုံးပြုကာ တစ်ယောက်နှင့် တစ်ယောက် တိုက်ခိုက်နေကြသည်။ တိုက်ပွဲက ချပ်ဝတ် ဝတ်ဆင်ထားသည့် လူများနှင့် သာမန်အဝတ် ဝတ်ဆင်ထားသည့် လူများကြားတွင် ဖြစ်နေဟန်ပေါ်၏။

ဝမ်ဝေ့၏ ရုတ်တရက် ပေါ်ထွက်လာမှုကို မည်သူကမှ သတိမထားမိပေ။ ထို့ကြောင့် သူက စစ်ပွဲကို ဇာတ်ကားသဖွယ် စောင့်ကြည့်နေလိုက်သည်။

ဒါက သေမျိုးအပိုင်းထဲမှာ ဖြစ်လောက်တယ်။ ဒါပေမဲ့ ဘာမှ အတားအဆီးကို မခံစားမိဘူး။ စစ်ပွဲက သေမျိုး၊ စိတ်ဝိညာဥ်နဲ့ မသေမျိုး လောကအပိုင်းအခြား အတားအဆီးတွေကို ဖျက်ဆီးပစ်လိုက်တာလား …

ဝမ်ဝေ့က ကိစ္စများကို စစ်ဆေးကြည့်လိုက်သည်။

သူက ဤကမ္ဘာရှိ သေမျိုးများသည် ဤစစ်ပွဲမှ ထိခိုက်မှုမရှိကြောင်း မြင်သည့်အခါ ကျေနပ်စွာ ခေါင်းညိတ်လိုက်၏။

ထို့နောက် ဝမ်ဝေ့က မသေမျိုးအပိုင်းဆီ တက်လှမ်းသွားလိုက်သည်။ ထိုနေရာက တိုက်ပွဲအပြင်းထန်ဆုံး နေရာ ဖြစ်၏။ ထင်ထားသည့်အတိုင်း မသေမျိုး အင်အားကြီး ပုဂ္ဂိုလ်များက မရပ်မနား တိုက်ခိုက်နေကာ တစ်ဖက်လူကို တတ်နိုင်သမျှ မြန်မြန်သတ်ဖို့ ကြံရွယ်နေကြသည်။

ကျူးထောင်ကို ချီးကျူးရမှာပဲ။ သူ့ဘက်မှာ ဒီလိုလူတွေအများကြီး ရှိအောင် ဖျောင်းဖျနိုင်လိမ့်မယ်လို့ ထင်မထားခဲ့မိဘူး …

ဝုန်း

တစ်စုံတစ်ယောက်က သူတို့ကိုယ်သူတို့ ဖောက်ခွဲပစ်လိုက်ပြီး ပတ်ဝန်းကျင် အာကာပြင်ထံ ကြောက်မက်ဖွယ် စွမ်းအားလှိုင်း ပျံ့လွင့်လာလေသည်။ ထိုဖြစ်စဥ်အတွင်း လူများစွာကို သတ်ပစ်ခဲ့၏။ သို့သော်လည်း ထိုအရာက အစမျှသာ ရှိသေး၏။ လူတော်တော်များများက နောက်ဆုံးသောအနေဖြင့် ကိုယ့်ကိုယ်ကို ဖောက်ခွဲပစ်နေကြသည်။

“မင်းတို့တွေ ရူးနေလား။” အသက်ရှည်လမ်းစဥ်ကမ္ဘာ၏ ခုံရုံးမှ အံ့ဖွယ်စစ်သူကြီးတစ်ယောက်က အော်ပြောလိုက်သည်။

“မင်းနဲ့ အဲဒီခွေးကောင် ကျူးထောင်က ငါတို့ရဲ့ အင်မော်တယ်လမ်းစဥ်ကို ဖျက်ဆီးပစ်လိုက်တာ။ မင်းက ငါတို့ရဲ့ ဘဝကို ဖျက်ဆီးပစ်လိုက်တာပဲ။ ငါ သေရမယ်ဆိုရင်တောင် မင်းတို့ကို ပြန်လည်ပေးဆပ်အောင် လုပ်ပြမယ်။”

ဝုန်း

ပေါက်ကွဲသံက ထပ်မံထွက်ပေါ်လာကာ အသေအပျောက်များစွာကို ဖန်တီးခဲ့သည်။

အံ့ဖွယ်စစ်သူကြီးက တားဆီးဖို့ ကြိုးစားခဲ့သေး၏။ သတင်းကောင်းကမူ သူက အသက်ရှင်သန်ခဲ့သော်လည်း ဒဏ်ရာများက ပြင်းထန်လွန်းနေသည်။ ထို့ကြောင့် သူက တုံ့ဆိုင်းမနေဘဲ အဆောင်တစ်ခုကို ချေမွကာ ခုံရုံးဆီ ပြန်သွားလိုက်သည်။

ဝမ်ဝေ့က တည်နေရာ ပြောင်းရွေ့ပြီးသည့်နောက်တွင် ပြုံးလိုက်မိသည်။ ရုပ်ချောချော ကျူးထောင်က ပလ္လင်ပေါ်တွင် ထိုင်နေပြီး လက်ဖြင့် မျက်ရိုးကို အသာဖိထားသည်။ သူက ထိုလူများ၏ တင်ပြချက်ကို နားထောင်ရင်း မျက်မှောင်အသာကြုတ်လျက် ရှိနေ၏။ သူ တွေးမိသည့်အရာများက ကိစ္စများသည် မည်သို့ထိန်းချုပ်မှု ကင်းလွတ်သွားကြောင်းသာ ဖြစ်သည်။ သူ့ရည်မှန်းချက်က ထိုစွမ်းအားအခြေပြု ကျင့်ကြံရေးစနစ်ကို အားအနည်းဆုံး မဖြစ်စေဖို့ရာသာ ဖြစ်၏။ ထို့ကြောင့် သူက အောင်းရှန်နှင့် တွေ့ဆုံပြီးသည့်နောက်တွင် စည်းမျဥ်းသဟဇာတဖြစ်ရေး နည်းလမ်းကို မွေးရပ်မြေသို့ ပျော်ပျော်ရွှင်ရွှင် ပြန်လည်ယူဆောင်လာခဲ့သည်။

သို့သော်လည်း သူ့ကမ္ဘာရှိ ကြောက်မက်ဖွယ် အမှန်တရားတစ်ခုက သူ ထင်ထားသည်ထက် ပိုမိုရှုပ်ထွေးနေသည်ကို တွေ့လိုက်ရသည်။ အသက်ရှည်လမ်းစဥ်ကမ္ဘာက နယ်ခြားကမ္ဘာများဖြင့် ဆက်ဆံရာ၌ ရှေးရိုးဆန်သည့် အတွေးအခေါ်များကြောင့် အဆင့်နိမ့် အဖွဲ့သားသာ ဖြစ်နေသော်လည်း ကုန်သွယ်ရေးဗဟိုချက်၏ တစ်စိတ်တစ်ပိုင်း ဖြစ်နေခဲ့သည်။ ကုန်သွယ်ရေးဗဟိုချက်က သူတို့၏ ကျင့်ကြံရေးစနစ်နှင့် ပတ်ဝန်းကျင်ကို ရယူလို၏။ ထိုအကြောင်းအရင်းကမူ သူတို့၏ သက်တမ်းကြောင့် ဖြစ်၏။ ထိုစဥ် သူတို့၏ ဂိုဏ်းက ပျက်သုဥ်းသွားပြီးသော ရှားပါးအရင်းအမြစ်များကို လိုအပ်နေခဲ့သည်။

သို့သော်လည်း ထိုသို့သာ အမှန်ဖြစ်ပါက အသက်ရှည်လမ်းစဥ်ကမ္ဘာသည် စည်းမျဥ်းသဟဇာတဖြစ်ရေးကို သူတို့၏ စနစ်ထဲ အဘယ့်ကြောင့် ပေါင်းမထည့်နိုင်ရမည်နည်း။

သူတို့က ကုန်သွယ်ရေးဗဟိုချက်နှင့် ထိတွေ့ဆက်ဆံနေသော်လည်း ထိုကိစ္စရပ်ကမူ ဘယ်သောအခါမှ မဖြစ်လာခဲ့ပေ။

ထို့နောက် ကျူးထောင်က နောက်ကွယ်မှ ကမ္ဘာကို တိတ်တဆိတ် ထိန်းချုပ်နေသည့် ရှေးဟောင်းအင်အားစုတစ်ခုအကြောင်း သင်ယူခဲ့ရသည်။

ထိုအင်အားစုက ဤကမ္ဘာတွင် အင်မော်တယ်အရင်းအမြစ်ကို ထားရှိခဲ့ပြီး အင်မော်တယ်ကျင့်ကြံရေးစနစ်ထဲ အပြောင်းအလဲ ဖြစ်မလာစေရန် ကာကွယ်ထားကြသည်။ ထို့ကြောင့် ကုန်သွယ်ရေး ဗဟိုချက်က လွှမ်းမိုးမှု များများစားစား မရှိခြင်း ဖြစ်၏။

သူက ထိုသို့သော ကိစ္စမျိုးကို လက်မခံနိုင်ပေ။ ကျူးထောင်က အင်မော်တယ် ကျင့်ကြံရေးစနစ်ကို ပိုမိုအားကောင်းလာစေရုံသာမကဘဲ ထိုအရာကို အပြီးတိုင် ရှင်းထုတ်ပစ်လိုသည်။ သို့သော်လည်း အားလုံးက သူ့ကြိုးစားမှုသည် အသုံးဝင်မည် မဟုတ်ကြောင်း ဖျောင်းဖျကြ၏။ အကြောင်းအရင်းမှာ ယခင် ထာဝရဧကရာဇ်ဟောင်းက ကြိုးစားခဲ့သော်လည်း ဆိုးဆိုးဝါးဝါး ကျရှုံးသွားခဲ့ရသည်။

စစ်ပွဲ မစတင်ခင်က ကျူးထောင်က လက်လျော့တော့မည် ဖြစ်၏။ “နောက်ဆုံးမသေမျိုးအမိန့်” ဟူသည့် ရှေးဟောင်းအင်အားစုက ကုန်သွယ်ရေးဗဟိုချက်နှင့် သဘောတူညီချက်တချို့ ရှိထားဟန်ပေါ်သည်။ ထို့ကြောင့် သူတို့က စစ်ပွဲအတွင်း ပါဝင်ဆင်နွှဲခဲ့၏။ ကျူးထောင်က ဤစစ်ပွဲထဲ သူ့အင်အားကို ချွေတာထားပြီး စောင့်ဆိုင်းနေခဲ့သည်။ သူ ထင်ထားသည့်အတိုင်း ကုန်သွယ်ရေးဗဟိုချက်က ရှုံးနိမ့်သွားခဲ့၏။

သူက အသင်္ချေအင်ပါယာကမ္ဘာထံ ချက်ချင်း အညံ့ခံလိုက်ကာ သူတို့စနစ်ထဲ ပြောင်းလဲဖို့ လိုအပ်သည့်အရာများကို လုပ်ဆောင်ခဲ့သည်။ ထို့နောက် သူက အင်မော်တယ်အရင်းအမြစ်ကို စည်းပိတ်ကာ ယခင်ကျင့်ကြံရေးစနစ် အဟောင်းအစား အစားထိုးမည့် ကျင့်ကြံရေးစနစ်အသစ်ကို ဖြန့်ဝေခဲ့သည်။ သို့သော် “နောက်ဆုံးမသေမျိုးအမိန့်” က တိုက်ပွဲအတွင်း ရှုံးနိမ့်သွားသော်လည်း ဤမျှအားကောင်းနေလိမ့်မည်ဟု ထင်မှတ်မထားခဲ့ပေ။

မြောက်မြားစွာသော အင်အားစုများက သူ့ဆုံးဖြတ်ချက်ကို ဆန့်ကျင်ခဲ့ကြ၍ ကမ္ဘာက စစ်ပွဲ ဖြစ်လာရသည်။ ကျူးထောင်က ထိုအရာကို ထင်မှတ်မထားမိပေ။ မြောက်မြားစွာသော အင်အားစုများက “နောက်ဆုံးမသေမျိုးအမိန့်” ဖြင့် မဟာမိတ်ပူးပေါင်းထားခြင်း သို့မဟုတ် သူတို့ထံ ကံကြွေး တင်ရှိနေခြင်းကြောင့် သူတို့နှင့် ပူးပေါင်းရုံမှအပ ရွေးချယ်စရာ မရှိကြောင်း သိလိုက်ရသည်။

“အရှင် နားထောင်နေရဲ့လား”

“ဘာပြောလိုက်တာလဲ”

အမတ်များက တစ်ယောက်နှင့်တစ်ယောက် ကြည့်လိုက်ကြသည်။

“သူတို့ သုံးသပ်ချက်က ဒီလက်ရှိအခြေအနေမှာ စစ်ပွဲကို အမြန်ဆန်ဆုံး အဆုံးသတ်ပစ်နိုင်မဲ့နည်းလမ်းက အသင်္ချေအင်ပါယာကမ္ဘာရဲ့ ဝင်ရောက်စွက်ဖက်မှုကို တောင်းခံဖို့ပဲ။”

“သူတို့က ဒါက အတွင်းရေးအခြေအနေလို့ ပြောလိုက်တယ် မဟုတ်ဘူးလား။ သေမျိုးတွေအပေါ် သက်ရောက်မှုမရှိသရွေ့ သူတို့က ဝင်ရောက်စွက်ဖက်မှာ မဟုတ်ဘူး။”

“ဟုတ်ပါတယ်။ ဒါပေမဲ့ ကျုပ်တို့က သူတို့ရဲ့ ဧကရာဇ်ဆီ ရက်ရောတဲ့ လက်ဆောင်တစ်ခု ပို့ပေးရင်ရော”

“မင်း ပြောတာ အင်မော်တယ်အရင်းမြစ်လား။”

“ဟုတ်ပါတယ်”

ကျူးထောင်က ညည်းတွားလိုက်သည်။ သူက အင်မော်တယ် အရင်းအမြစ်ကို သူ့ဂိုဏ်းအတွက် လိုချင်သော်လည်း တုံ့ဆိုင်းနေရသည့် အဓိက အကြောင်းအရင်းတော့ မဟုတ်ပေ။ ဤသည်က ထူးကဲပြောင်မြောက်သည့် ခေတ်ကာလ ဖြစ်လေသည်။ ကံဆိုးစွာဖြင့် သူက ဤခေတ်ကာလအတွင်း သေးနုပ်ကာ အရေးမပါသည့် ဧကရာဇ်လေးမျှသာ ဖြစ်နေသည်။ “နောက်ဆုံးမသေမျိုးအမိန့်” ကို သုတ်သင်ပြီး အသက်ရှည်လမ်းစဥ်ကမ္ဘာကို ပြောင်းလဲခြင်းက ဤခေတ်ကာလတွင် သူ့အမှတ်အသားကို ချန်ထားနိုင်မည့်နည်းလမ်း ဖြစ်၏။ သို့သော် သူသာ အကူအညီတောင်းခံလိုက်ပါက သူ့သက်ရောက်မှုသည် သိသိသာသာ အားနည်းသွားလိမ့်မည်။

ငါ့အနေနဲ့ နည်းနည်းတောင့်ခံထားဖို့ လိုတယ်။ ငါ့စွမ်းအားက ထိပ်သီးသုံးဆ တိုက်ခိုက်ရေးအဆင့်ကို ရောက်တော့မှာ။ အဲဒီအခါကျရင် ခရမ်းသရဖူတာအိုဆရာရဲ့ ချီက ဘယ်လောက်ပဲ ထူးကဲထူးကဲ ဂရုမစိုက်တော့ဘူး။ သူက ငါ့လက်ထဲ ရှုံးနိမ့်သွားမှာပဲ။ သူ မရှိရင် ဘယ်သူကမှ ငါ့ကို မတားနိုင်ဘူး …

“ခဏလောက် စောင့်ရအောင်။ ငါတို့တွေ နောက်ထပ် နှစ်နှစ်သောင်း မဟုတ်သေးဘူး။ နှစ်တစ်သောင်းခွဲလောက် စောင့်ရင် ဒီအရာကို အဆုံးသတ်ဖို့ ငါ့မှာ စွမ်းအား ရှိလာလိမ့်မယ်။”

“နောက်ကျလွန်းသွားပြီ” ဝမ်ဝေ့က ပေါ်ထွက်လာကာ ပြောလိုက်သည်။

“အ အ … အရှင်” အမတ်တချို့က တုံ့ဆိုင်းသွားကြသည်။ ဝမ်ဝေ့က သူတို့ကို လျစ်လျူရှုထားပြီး ကျူးထောင်ကို ကြည့်လိုက်၏။ သူက ထိုသူ၏ စိတ်သဘောထားကို ထိုးဖောက်မြင်ကာ နားလည်လေသည်။ ဤဂုဏ်ကျက်သရေ ထွန်းလင်းပြောင်မြောက်ဖွယ် ခေတ်ကာလတွင် မည်သူကများ အမှတ်အသားကို မချန်ထားလိုဘဲ နေမည်နည်း။ သက်ရောက်မှုရှိသည့် အခိုက်အတန့်တိုင်းက ထာဝရဧကရာဇ်များအတွက် အသက်ရှင်နိုင်ခြင်း၏ အခြေခံအုတ်မြစ် ဖြစ်သည့်အကြောင်း ထည့်မပြောရသေးပေ။ သို့သော်လည်း သူက ဤနေရာတွင် ရောက်လာပြီဖြစ်သည့်အတွက် အင်မော်တယ်အရင်းအမြစ်ကို ယူသွားရမည်။

“နောက်ဆုံးမသေမျိုးအမိန့်” အတွက်မူ သူက ထိုအရှုံးသမားများနှင့် ပတ်သက်ပြီး ဂရုမစိုက်ပေ။

တစ်ခါက ဒိုင်မေးရှင်းအမြင့်တွင် ပြောင်မြောက်သည့် ခေတ်ကာလတစ်ခုကို ရှိခဲ့ကြပြီး သူတို့က ဦးဆောင်သည့် အင်အားစုတစ်ခု ဖြစ်ခဲ့ကြသည်။ အင်မော်တယ်လမ်းစဥ်က တခြားသော လမ်းစဥ်များထက် အားမနည်းပေ။ သို့သော်လည်း ထိုအကြောင်းတရားကို ထိခိုက်စေပြီးသည့်နောက် တခြားသော လမ်းစဥ်များက လက်တုံ့ပြန်နိုင်သည်ဟု ယုံကြည်ကာ သူတို့က အင်မော်တယ်လမ်းစဥ်ကို ထိန်းသိမ်းဖို့ရာသာ အာရုံစိုက်ခဲ့ကြသည်။

ထို့ကြောင့် ပင်ကို - ဟော်သဲ့ စစ်ပွဲအတွင်း သူတို့၏ အဖွဲ့အသားများကို ဒိုင်မေးရှင်းအနိမ့်ဆီ ရည်ရွယ်ချက်တစ်ခုအတွက် စေလွှတ်ခဲ့ကြ၏။ သူတို့က စွမ်းအားအခြေပြု ကျင့်ကြံရေးနည်းစနစ်များကို တတ်နိုင်သမျှ များများထိန်းသိမ်းဖို့ ဖြစ်သည်။ သူတို့က ထူးကဲသည့် ချီအရင်းအမြစ်များကိုပင် ပို့ဆောင်ပေးခဲ့ကြသည်။ သူတို့၏ အဖွဲ့ခွဲ အများစုက လက်ရှိခေတ်ကာလတွင် ကျရှုံးသွားကြ၏။ အကြောင်းအရင်းမှာ စွမ်းအင်အခြေပြုစနစ်အားလုံးက တခြားသော ကမ္ဘာများဖြင့် ဆက်နွယ်ပြီးသည့်နောက်တွင် စည်းမျဥ်းအသုံးချမှုတို့ ပါဝင်လာတတ်ကြသည်။

သူတို့က အဆုံးမဲ့လေဟာနယ်တစ်လျှောက် ပြန့်ကျဲနေသည့် အဖွဲ့ခွဲ ၅ခုမျှသာ ကျန်ရှိတော့သည်။ အသက်ရှည်လမ်းစဥ်ကမ္ဘာက သူတို့၏ အကြီးမားဆုံး အောင်မြင်မှု ဖြစ်၏။ သို့သော် ယခုတွင် ထိုအရာပင် ကျရှုံးလုနီးပါး ဖြစ်လာလေသည်။

ဝမ်ဝေ့က ဒိုင်မေးရှင်းအမြင့်ရှိ သူတို့ဂိုဏ်းက အသက်ရှင်လား မသိရပေ။ သို့သော် ကပ်ပါးများက စံပြမျိုးနွယ်များကို မထိကြသော်လည်း အင်မော်တယ်ဘုရင် သို့မဟုတ် တာအိုအုပ်စိုးသူ မျိုးနွယ်များအတွက်မူ အတူတူ ဖြစ်မည် မဟုတ်ပေ။

“ခင်ဗျား ရောက်လာပြီကိုး” ကျူးထောင်က သက်ပြင်းချကာ ပြောလိုက်သည်။

“အင်း”

“ကျုပ် တစ်ခုလောက် ပြောလို့ရမလား။”

“ငါသာ ဒီကနေ အင်မော်တယ် အရင်းအမြစ်နဲ့ ထွက်သွားနိုင်ရင် ဘယ်ဆွေးနွေးမှုမဆို လက်ခံတယ်။ ဒါပေမဲ့ မလွန်လွန်းနဲ့။ ငါက ဒီအတိုင်းယူပြီးတော့လည်း ထွက်သွားနိုင်တယ်”

ကျူးထောင်က သူ့အတွေးများကို စုစည်းကာ ပြောလိုက်သည်။

“ကျုပ်က ဒီစစ်ပွဲကို တစ်ယောက်တည်း အဆုံးသတ်ပစ်ဖို့ အချိန်နဲ့ အရင်းအမြစ်ပဲ လိုချင်ရုံပါ။”

“အဲဒါက လွယ်ပါတယ်။ သံတမန်တစ်ယောက်က တစ်စုံတစ်ယောက်က စည်းမျဥ်းတွေ ချိုးဖောက်ပြီး သေမျိုးတွေကို တိုက်ခိုက်တယ်ဆိုတဲ့ တင်ပြချက်ကြောင့် ဒီကမ္ဘာဆီ ရောက်လာတယ်လို့ ပြောလိမ့်မယ်။ တိုက်ပွဲတွေအားလုံးကို စစ်ဆေးနေစဥ်အတွင်းမှာ ရပ်တန့်ထားရမယ်။”

ကျူးထောင်၏ အကြည့်များက တောက်ပလာ၏။

“အဲဒါက မင်း လိုချင်တဲ့ အချိန်အတွက် လုံလောက်မှာပါ။ အရင်းအမြစ်တွေအတွက်ကတော့ ငါ့ဂိုဏ်းကလူတွေက မင်းအတွက် အလဲအလှယ် လုပ်ပေးလိမ့်မယ်။ ကျေနပ်ရဲ့လား။”

“ကျေနပ်တာထက် ပိုပါတယ်”

“ကောင်းပြီ” ဝမ်ဝေ့က လက်ကို မြှောက်လိုက်သည့်အချိန် သူ့လက်ထဲ သန့်စင်သည့် အရှိန်အဝါရှိသည့် အပြာရောင်သတ္ထုလုံးတစ်ခု ထွက်ပေါ်လာခဲ့သည်။ ထိုရှားပါးအရင်းမြစ်က တာအိုအခွင့်လမ်းဂိုဏ်းအား ကောင်းကင်ဧကရာဇ်ခေတ်ကာလ ပျက်သုဥ်းပြီးသည့်နောက်တွင် အသက်ရှင်သန်ဖို့ရာ ထားရှိခဲ့မည့် လျို့ဝှက်အုတ်မြစ်သာ ဖြစ်၏။

“ငါက အပေးအယူကို ကျေနပ်တယ်ဆိုတော့ မင်းကို လက်ဆောင် ပေးလိုက်မယ်”

ဝမ်ဝေ့က လက်ဖျောက်တီးလိုက်သည်။

“ငါတို့တွေ ဒီစကားဝိုင်း ပြောဖူးတာကို ဘယ်သူကမှ အမှတ်ရမှာ မဟုတ်ဘူး။ ဒါပေမဲ့ မင်းအနေနဲ့ ဒီအင်မော်တယ်အရင်းအမြစ် မရှိတော့ဘူးဆိုတာကို ဖုံးကွယ်ထားရမယ်။”

ကျူးထောင်၏ အကြည့်များက တောက်ပလာလေသည်။ ထိုသို့ရိုးရှင်းလှသည့် အပြုအမူက သူ့မာနကို ကယ်တင်ပေးခဲ့သည်။ သူက အများကြီး မတောင်းဆိုနိုင်ပေ။ သူက အမတ်များကို ကြည့်လိုက်သည်။ ထင်ထားသည့်အတိုင်း မည်သူကမှ ဝမ်ဝေ့ ရောက်လာသည်ကို မမှတ်မိကြပေ။