အခန်း (၉၂၇)

လီယွင်ကန်းက လက်မြှောက်ပြီး ကိုးထပ်ဓားမျှော်စင်ကို ထုတ်ပေးသည်။

“ကောင်လေး၊ ဒီဓားမျှော်စင်ကို ငှားပေးလိုက်မယ်။ မင်းပြန်လာရင် ငါနဲ့ တိုက်ခိုက်ပါ”

သူက ပြောလိုက်ပြီး ဓားမျှော်စင်ကို ဟန်မူယဲ့ဆီသို့ ပစ်ပေးသည်။

သူက စိန်ခေါ်မှုအတွက် ဆုပေးမည်ဟု ဟန်မူယဲ့ကို ပြောခဲ့သည်။

သူက ကိုးထပ်ဓားမျှော်စင်ကို ပေးရန် သဘောတူထားခဲ့သည်။

သူက ငှားရမ်းသည်ဟု ပြောလိုက်သော်လည်း မဟာကျင့်ကြံသူတစ်ယောက်အနေဖြင့် ပေးပြီးသားပစ္စည်းကို ပြန်ယူမည်မဟုတ်ပေ။

ဟန်မူယဲ့က ပြုံးလိုက်ပြီး ဓားမျှော်စင်ကို ယူသည်။ ထို့နောက် တည်ငြိမ်စွာပြောသည်။

“ခန်းဆောင်သခင်၊ ကျွန်တော်နဲ့ နောက်တစ်ခါတွေ့ရင် ရွှေအင်မော်တယ်အဆင့်စွမ်းအားကို တိုက်ရိုက်သုံးလို့ရတယ်”

ထိုစကားများကြောင့် လီယွင်ကန်း၏မျက်နှာက နီရဲသွားသည်။

သူက အေးစက်စွာနှာမှုတ်လိုက်ပြီး လှည့်ထွက်သွားသည်။

ထို့နောက် ခြေလှမ်းအနည်းငယ်ခန့်အကွာသို့ ရောက်သောအခါ ရပ်တန့်လိုက်ပြီး ပြောသည်။

“မင်းက ကမ္ဘာငယ်ကို မြန်မြန်စုစည်းသင့်တယ်။ မဟုတ်ရင် သင်္ချိုင်းအင်မော်တယ်မြို့တော်မှာ တောင့်ခံနိုင်မှာမဟုတ်ဘူး”

‘ကမ္ဘာငယ်ကို စုစည်းရမှာလား’

လီယွင်ကန်း ထွက်သွားသောအခါတွင် ဟန်မူယဲ့၏ မျက်လုံးများက တောက်ပလာကြသည်။

သူက ကမ္ဘာငယ်ကို စုစည်းရန် ပြင်ဆင်ထားသည်။ သို့သော် တောရိုင်းမြေတွင် ပြုလုပ်မည်မဟုတ်ပေ။

လီယွင်ကန်း ထွက်သွားသောအခါတွင် သူက လက်မြှောက်ပြီး ရွှေရောင်အင်းကွက်တစ်ခုကို ထုတ်လွှတ်လိုက်သည်။

ခဏအကြာတွင် ပုံရိပ်များသည် ခန်းဆောင်၏အပြင်ဘက်တွင် ရောက်လာကြသည်။

ကျောက်ချန်၊ ဇောင်ပိုင်ချွမ်၊ ကျန်းကျန်ပေါင်၊ ရှဲ့ချောင်ယန်နှင့် တခြားလူများက လေးနက်သောမျက်နှာထားဖြင့် ခန်းဆောင်ထဲသို့ ဝင်လာကြသည်။

ဟန်မူယဲ့က သူတို့ကို ကြည့်လိုက်သည်။ ချင်ကျောက်ယွမ်၊ တုချင်နှင့် တခြားလူများလည်း ရှိနေကြသည်။

ခရမ်းရောင်ကျားသစ်နှင့်အတူ ယွင်လန်မြို့သို့ရောက်လာသော သံမဏိချပ်ဝတ်ဂိုဏ်း၏ ဝူချန်ဟယ်နှင့် ဝင်္ကပါအမွေအနှစ်ကို ရရှိထားသော ကျောက်ချင်ကျန်းတို့လည်း ရောက်လာကြသည်။

ဟန်မူယဲ့မသိသော ကောင်းကင်အင်မော်တယ်အဆင့် ကျင့်ကြံသူများလည်း ရှိနေကြသည်။

“မြို့သခင်ကို နှုတ်ဆက်ပါတယ်”

လူတိုင်းက လေးစားသောမျက်နှာထားဖြင့် ဦးညွတ်လိုက်ကြသည်။

ကျင့်ကြံခြင်းလောကသည် ထိုသို့ပင်ဖြစ်သည်။ သန်မာသူကသာ လေးစားမှုကို လက်ခံနိုင်သည်။

ဟန်မူယဲ့၏ ခွန်အားကို သူတို့က မော့ကြည့်နေရုံသာ တတ်နိုင်ကြသည်။

ယွင်လန်ဓားအင်မော်တယ်၏ ခွန်အားကြောင့် ယွင်လန်မြို့သည် တောရိုင်းမြေ၏ မြို့ကြီးတစ်မြို့ ဖြစ်လာခဲ့သည်။

ထို့အပြင် အံ့ဖွယ်ဝိညာဉ်ဓားဂိုဏ်းကလည်း ယွင်လန်မြို့ကို ထောက်ပံ့ပေးနေသည်။

ကျူးလုံကုန်သွယ်ရေးအဖွဲ့နှင့် နောက်ကွယ်တွင်ရှိသော ကောင်းကင်အလင်းဂိုဏ်းကလည်း ယွင်လန်မြို့နှင့် ပူးပေါင်းထားသည်။

ဟန်မူယဲ့၏ စာချုပ်အင်းကွက်က ကောင်းကင်အလင်းဂိုဏ်း၏ ထောက်ပံ့မှုကို ရရှိရန် လုံလောက်သည်။

ဝူချန်ဟယ်ကလည်း ယွင်လန်မြို့တွင် ရှိနေပြီး သံမဏိချပ်ဝတ်ဂိုဏ်းနှင့် ယွင်လန်မြို့၏ အဆက်အသွယ်ကို ဖော်ပြနေသည်။

သံမဏိချပ်ဝတ်ဂိုဏ်းက တခြားအင်အားစုများနှင့် ဘယ်တော့မှ မပူးပေါင်းပေ။ သို့သော် ဝူချန်ဟယ်က ဤနေရာတွင် ရှိနေသောကြောင့် မည်သည့်အရာကိုမှ တွေးနေရန် မလိုတော့ပေ။

ဇောင်ပိုင်ချွမ်က ရှေ့တက်လာပြီး ယွင်လန်မြို့၏ ဖြစ်ရပ်များကို တင်ပြလိုက်သည်။

“မြို့သခင်၊ မြို့ထဲမှာ အင်အားစုအသီးသီးရဲ့ ကျင့်ကြံသူတွေ ဆယ်သန်းလောက် နေ့စဉ်ရှိနေပါတယ်။ အဲဒါကြောင့် ယွင်လန်မြို့က တောရိုင်းမြေရဲ့ ထိပ်တန်းမြို့ဆယ်မြို့ထဲမှာ ပါသွားပါပြီ”

“တခြားနေရာတွေနဲ့ ဆက်သွယ်ထားတဲ့ တည်နေရာရွှေ့ပြောင်းခြင်းဝင်္ကပါလည်း ၁၆၀ ရှိနေပါပြီ”

“မြို့ထဲမှာ ကောင်းကင်အင်မော်တယ် ၃၃၂ယောက် အခြေချနေပါတယ်။ ၄၃ယောက်က လေဟာနယ်သန့်စင်ခြင်းအဆင့်မှာ ရှိနေပြီး ခြောက်ယောက်က လေဟာနယ်ဖွဲ့စည်းခြင်းအဆင့်မှာ ရှိနေပါတယ်။ ရွှေအင်မော်တယ်နှစ်ယောက်ကလည်း ထောက်ပံ့ပေးမယ်ဆိုရင် မြို့ထဲမှာနေထိုင်ဖို့ ဆန္ဒရှိတယ်လို့ ကမ်းလှမ်းလာပါတယ်။ အကြီးအကဲလီယွင်ကန်းက တစ်မြို့လုံးမှာရှိတဲ့ သေရည်ကို လိုချင်ပါတယ် ....”

“မြို့ထဲမှာ သိန်းချီတဲ့ ကုန်သွယ်ရေးအဖွဲ့အမျိုးမျိုးက သန်းထောင်ချီတန်ဖိုးရှိတဲ့ ကုန်ပစ္စည်းတွေကို ရောင်းဝယ်နေကြပါတယ်။ အဓိကဂိုဏ်းကြီးတွေရဲ့ ကုန်သည်အဖွဲ့နဲ့ ခါးသီးအင်မော်တယ်နယ်မြေက ကုန်သည်အဖွဲ့တွေလည်း ပါဝင်ကြပါတယ်”

....

ဇောင်ပိုင်ချွမ်၏ကိုယ်ဟန်နှင့် စကားပြောပုံက ကွဲပြားသွားသည်။

ယခုအချိန်တွင် ဝမ်ရှန်ကုန်သွယ်ရေးအဖွဲ့က သူ့ကို ဆွဲထားနိုင်ရန် အရည်အချင်းမရှိတော့ပေ။

သူက ယွင်လန်မြို့ကို စီမံပေးရပြီး မရေမတွက်နိုင်သော သက်ရှိများ၏ သေခြင်းရှင်ခြင်းကို ထိန်းချုပ်ထားသည်။ သူက ကောင်းကင်အင်မော်တယ်တစ်ပါး၏ သေခြင်းရှင်ခြင်းကို စကားတစ်ခွန်းဖြင့် ဆုံးဖြတ်ပေးနိုင်သော ကျွမ်းကျင်သူတစ်ယောက် ဖြစ်လာသည်။

ထိုအရာသည် သူ၏ ရွေးချယ်မှုနှင့် ဟန်မူယဲ့၏ ထောက်ပံ့ပေးမှုကြောင့် ဖြစ်သည်။

သူတစ်ယောက်တည်းသာမဟုတ်ပဲ ကျန်းကျန်ပေါင်နှင့် ကျောက်ချန်တို့ကလည်း စိတ်ကူးမယဉ်နိုင်သော စွမ်းအားကို ပိုင်ဆိုင်ထားကြသည်။

ကျောက်ချန်က တောရိုင်းမြေနှင့် ဓားဂိုဏ်း၏ ကုန်သွယ်ရေးလမ်းကြောင်းကို ထိန်းချုပ်ထားပြီး သန်းထောင်ချီသော ဝိညာဉ်ကျောက်တုံးများကို ရရှိနေသည်။

လက်ရှိအချိန်တွင် ကျူကျင်းကုန်သွယ်ရေးအဖွဲ့က ယွီကျစ်ဒေသတွင် စိတ်ကြိုက်သောင်းကျန်းနိုင်သော အင်အားစုကြီးတစ်ခု ဖြစ်နေသည်။

ကျန်းကျန်ပေါင်၏ ကျင့်ကြံခြင်းက အဆပေါင်းများစွာ တိုးတက်လာသည့်အပြင် မရေမတွက်နိုင်သော ကျွမ်းကျင်သူများကိုလည်း ထိန်းချုပ်ထားသည်။ သူက စိတ်ကူးမယဉ်နိုင်ခဲ့သော အရင်းအမြစ်များကို လွယ်ကူစွာ သုံးစွဲနိုင်သည်။

ဇောင်ပိုင်ချွမ်က တင်ပြပြီးသောအခါတွင် ဟန်မူယဲ့က ‌ခေါင်းညိတ်လိုက်ပြီး တခြားလူများကို မေးခွန်းတချို့ မေးသည်။

ချင်ကျောက်ယွမ်က မိုးကြိုးဓားပြများကို ဦးဆောင်ပြီး မြို့သခင်ခြံဝိုင်းကို စောင့်ကြပ်ထားသည်။

ချင်ကျီယွဲ့က ပြောင်းပြန်သွေးမျိုးဆက်စွမ်းရည်ကို သုံးစွဲလိုက်သောကြောင့် မိုးကြိုးဝါးမြိုခြင်းခြင်္သေ့ ဖြစ်သွားပြီး လူသားအသွင် ပြန်မပြောင်းနိုင်တော့ပေ။

သို့သော် သူမက ချင်ကျောက်ယွမ်နှင့် စာချုပ်ချုပ်ထားပြီး ခွန်အားပိုကောင်းလာသည်။

သူတို့က ဝူချန်ဟယ်နှင့် ကျီရယ်၏စာချုပ်ကို မြင်သွားပြီး စာချုပ်ချုပ်ရန် ဆုံးဖြတ်ခဲ့ကြသည်။

“ကျီရယ်ရဲ့ကလေးတွေ ကြီးပြင်းလာရင် ဂိုဏ်းကို ပြန်သွားတော့မယ်”

ဝူချန်ဟယ်က ပြုံးလိုက်ပြီး ကျယ်လောင်စွာပြောသည်။

“ဂိုဏ်းက သဘောတူလိုက်တယ်”

“ငါက ဝိညာဉ်ဖျက်ဆီးခြင်းတောင်ကြားမှာ နှစ်တစ်ရာနေရလိမ့်မယ်”

ကျီရယ်နှင့် ကလေးများအတွက် ဝိညာဉ်ဖျက်ဆီးခြင်းတောင်ကြားတွင် နှစ်တစ်ရာ တာဝန်ထမ်းဆောင်ရမည်။

လူသားနှင့် မိစ္ဆာများက ပူးပေါင်းမတည်ရှိနိုင်ဟု မည်သူက ပြောခဲ့သနည်း။

တစ်ခါတလေတွင် စာချုပ်သည် တခြားအရာများထက် ပိုမိုစိတ်ချရသည်။

ယွင်လန်မြို့တွင် ကျူးလုံကုန်သွယ်ရေးအဖွဲ့ ထိန်းချုပ်ထားသော မိစ္ဆာသားရဲဈေးကွက်က တခြားစျေးကွက်များထက် ပိုမိုဆူညံနေသည်။

မိစ္ဆာသားရဲအစောင့်အကြပ်ကို ဝယ်ယူချင်သောလူများက စိတ်ရင်းဖြင့် စာချုပ်ချုပ်ရန်သာ လိုအပ်သည်။ သူတို့၏ ခွန်အားက ချက်ချင်း နှစ်ဆတိုးသွားလိမ့်မည်။

လိုက်ဖက်ညီမှုရှိပြီး စာချုပ်ချုပ်လိုသော မိစ္ဆာသားရဲကို ရှာဖွေဖို့အတွက် လူသားများက အလွန်အားထုတ်လာကြသည်။

ထိုနည်းလမ်းဖြင့် ရရှိလာသော မိစ္ဆာသားရဲများကို မည်သူမှ ကျွန်အဖြစ် မသတ်မှတ်ကြပေ။ သူတို့က သေခြင်းရှင်ခြင်းကို အတူဖြတ်ကျော်မည့် ညီအစ်ကိုများ ဖြစ်ကြသည်။

ကျောက်ချင်ကျန်းက အမွေအနှစ်ကို ဖြည်းဖြည်းချင်းလေ့လာရန် လိုအပ်ပြီး ယွင်လန်မြို့က စီးပွားရေးကောင်းသောကြောင့် ဤနေရာတွင် ဆက်ရှိနေသည်။

သူက ဝင်္ကပါများကို တည်ဆောက်ပေးပြီး လေ့ကျင့်နိုင်သည့်အပြင် အကျိုးအမြတ်လည်း ရခဲ့သည်။

ရှဲ့ချောင်ယန်၏ စီးပွားရေးကလည်း အဆင်ပြေနေသည်။ မြို့ထဲတွင် မိစ္ဆာလောကလန်သားများ နေထိုင်နေကြသည်။

ယွင်လန်မြို့တွင်ရှိနေသော ကောင်းကင်အင်မော်တယ်တစ်ဝက်ခန့်သည် မိစ္ဆာလောကလန်သားများ ဖြစ်ကြသည်။

ဟန်မူယဲ့က မိစ္ဆာလောကလန်၏ အဆင့်မြင့်ပုဂ္ဂိုလ်တစ်ဦးဖြစ်ပြီး ယွင်လန်မြို့က သူတို့၏အိမ် ဖြစ်သည်။

မိစ္ဆာလောကလန်က တောရိုင်းမြေတွင် ကိုယ်ပိုင်အင်အားစုရှိရန် ခက်ခဲသောကြောင့် ယွင်လန်မြို့ကို ကာကွယ်‌ပေးရန် ဆန္ဒရှိကြသည်။

ယွင်လန်မြို့၏ တိုးတက်မှုက ဟန်မူယဲ့၏ စိတ်ကူးများထက် ကျော်လွန်နေသည်။

သူက ယွင်ထန့်တောရိုင်းမြေသို့ ရောက်လာသောအချိန်တွင် ဤသို့ အောင်မြင်လာမည်ဟု ထင်မထားခဲ့ပေ။

ယွင်လန်မြို့က ဖူယွီအင်မော်တယ်ကမ္ဘာတွင် သူ၏ အကြီးမားဆုံး အမှီအခိုတစ်ခု ဖြစ်လာခဲ့သည်။

“အားလုံးပဲ ငါက သင်္ချိုင်းအင်မော်တယ်မြို့တော်ကို ထွက်သွားတော့မယ်”

ဟန်မူယဲ့၏စကားကြောင့် ခန်းဆောင်က တိတ်ဆိတ်သွားသည်။

လူတိုင်းက စကားမပြောရဲဘဲ အကြည့်ချင်းဖလှယ်နေကြသည်။

သူတို့က ထိုကိစ္စများတွင် ဝင်မပါနိုင်ပေ။

ယွင်လန်မြို့က ယွင်လန်ဓားအင်မော်တယ်အပေါ်တွင် မှီခိုနေသည်။ အကယ်၍ ယွင်လန်ဓားအင်မော်တယ်က သန်မာနေလျှင် ယွင်လန်မြို့က တိုးတက်လာလိမ့်မည်။

သာမန်ကျင့်ကြံသူများအတွက် ဖူယွီအင်မော်တယ်ကမ္ဘာ၏ အန္တရာယ်နယ်မြေသုံးခုသည် အလွန်ကြောက်မက်ဖွယ်ကောင်းသည်။

သို့သော် ယွင်လန်ဓားအင်မော်တယ်က ထိုနေရာတွင် ကောင်းမွန်စွာ လေ့ကျင့်နိုင်လိမ့်မည်။

“ငါက ဓားဂိုဏ်းရဲ့ ကျင့်ကြံသူတွေနဲ့ သင်္ချိုင်းအင်မော်တယ်မြို့တော်ကို သွားရမယ်။ ယွင်လန်မြို့ကို မင်းတို့ဆီမှာ အပ်ခဲ့မယ်”

ဟန်မူယဲ့က သူတို့ကိုကြည့်လိုက်ပြီး ညင်သာစွာပြောသည်။

‌‌ဇောင်ပိုင်ချွမ်က ခေါင်းမော့ကြည့်လိုက်ပြီး ဦးညွတ်၍ ပြောသည်။

“မြို့သခင် စိတ်ချပါ။ ကျွန်တော်တို့က ယွင်လန်မြို့ကို သေချာစောင့်ရှောက်ထားပါ့မယ်”

တခြားလူများကလည်း လိုက်ပြောလိုက်ပြီး ဦးညွတ်ကြသည်။

အစည်းအဝေးပွဲသည် သိပ်မကြာခဲ့ပေ။ ဟန်မူယဲ့ကလည်း ချက်ချင်းထွက်သွားမည်မဟုတ်ပေ။

သူက လူတိုင်းကို အမိန့်အာဏာခွဲဝေပေးလိုက်ပြီး စည်းကမ်းများ ချမှတ်ခဲ့သည်။ ထို့နောက် စည်းဝေးပွဲကို အဆုံးသတ်လိုက်သည်။

ဇောင်ပိုင်ချွမ်နှင့် တုချင်က ခန်းဆောင်ထဲတွင် ကျန်နေခဲ့သည်။

“မြို့သခင်၊ ဒါက သိုလှောင်ရုံထဲမှာရှိတဲ့ ရတနာတွေပါ။ မြို့သခင်လိုအပ်တာကို ယူသွားလိုက်ပါ”

ဇောင်ပိုင်ချွမ်က ကျောက်စိမ်းပေလွှာတစ်ခုကို ပေးလိုက်ပြီး ပြောသည်။

“တစ်ခုခု လိုအပ်တာရှိရင်လည်း အမြန်ဆုံး ရှာပေးပါ့မယ်”

တုချင်ကလည် ကျောက်စိမ်းပေလွှာတစ်ခုကို ပေးလိုက်ပြီး ပြုံးသည်။

“တောရိုင်းမြေမှာ ရှိတယ်ဆိုရင် သုံးရက်အတွင်း ရှာပေးနိုင်ပါတယ်”

ထိုအရာသည် မြို့ကြီုးတစ်မြို့၏ ခွန်အားဖြစ်သည်။

အဆုံးမရှိသောကြွယ်ဝမှုကို ပိုင်ဆိုင်ထားရုံသာမက အမိန့်အာဏာလည်း ရှိသည်။

ကျင့်ကြံခြင်းလောကတွင် ထိုအရာများသည် အရင်းအမြစ်ပင် ဖြစ်ကြသည်။

ဟန်မူယဲ့က ယဉ်ကျေးမနေပေ။ သူက ရာချီသော ဝိညာဉ်ဆေးပင်နှင့် ဆေးလုံးများကို ရွေးချယ်လိုက်သည်။ ထို့အပြင် ဝိညာဉ်သတ္တု၊ ဓား၊ ချပ်ဝတ်နှင့် ဝိညာဉ်ကျောက်တုံးတစ်ဝက်ကိုလည်း ယူလိုက်သည်။

ဝိညာဉ်ကျောက်တုံးတစ်ဝက်သည် သန်းရှစ်သောင်း ဖြစ်သည်။

ထိုကြွယ်ဝမှုမျိုးကို အလယ်အလတ်တန်းစား ဂိုဏ်းတစ်ဂိုဏ်းသည် နှစ်သောင်းချီကြာအောင် စုစည်းရလိမ့်မည်။ သို့သော် ယွင်လန်မြို့က အချိန်တိုအတွင်း၌ ရှာဖွေနိုင်ခဲ့သည်။

သူတို့က ကံကောင်းခဲ့သည်။

ခါးသီးအင်မော်တယ်နယ်မြေက ဖရိုဖရဲဖြစ်မနေလျှင် ယွင်လန်မြို့က ကြွယ်ဝလာနိုင်သော်လည်း အလွန်ချမ်းသာနေမည် မဟုတ်ပေ။

“တုချင်၊ ငါနဲ့အတူ သင်္ချိုင်းအင်မော်တယ်မြို့တော်ကို လိုက်လာချင်တဲ့ မိစ္ဆာသားရဲတွေကို လိုအပ်တယ်လို့ အကြီးအကဲကျူးလုံကို ပြောလိုက်ပါ”

ဟန်မူယဲ့က တုချင်ကိုကြည့်လိုက်ပြီး နက်ရှိုင်းသောအသံဖြင့် ပြောသည်။

“ကောင်းကင်အင်မော်တယ်အဆင့်ထက် နိမ့်ကျနေလို့မရဘူး”

ကောင်းကင်အင်မော်တယ်အဆင့် မိစ္ဆာသားရဲများ ....

တုချင်က ထိုအကြောင်းကို စိတ်ကူးမကြည့်ခဲ့ဖူးပေ။

သူက လက်နှစ်ဖက်ကို ဆုပ်ကိုင်လိုက်ပြီး ပြောသည်။

“စိတ်ချပါမြို့သခင်။ ကျွန်တော်တို့ ကျူးလုံကုန်သွယ်ရေးအဖွဲ့က ဒီကိစ္စကို သေချာပေါက် ဖြေရှင်းလိုက်ပါမယ်”

သူတို့နှစ်ယောက် ထွက်သွားသောအခါတွင် ရှဲ့ချောင်ယန်က တိတ်ဆိတ်စွာရောက်လာသည်။

“အရှင်”

သူက ဦးညွတ်လိုက်သည်။

ဟန်မူယဲ့က ခေါင်းညိတ်လိုက်ပြီး သူ့ကို ကြည့်သည်။

“သင်္ချိုင်းအင်မော်တယ်မြို့တော်မှာ မိစ္ဆာလောကလန်သားတွေ ရှိလား”

မိစ္ဆာလောကလန်သည် အင်မော်တယ်ကမ္ဘာတွင် ပျံ့နှံ့နေသည်ဟု ပြောကြသည်။ ထို့ကြောင့် နေရာတိုင်းတွင် ကလန်သားများ ရှိနေနိုင်သည်။

သို့သော် သင်္ချိုင်းအင်မော်တယ်မြို့တော်က အန္တရာယ်များသောကြောင့် ကျွမ်းကျင်သူများသာ နေထိုင်နိုင်သည်။ ထိုနေရာတွင် မိစ္ဆာလောကလန်သားများ ရှိနေရန် မသေချာပေ။

“ရှိပါတယ်။ ဒါပေမဲ့ သိပ်မများပါဘူး”

ရှဲ့ချောင်ယန်က ပြင်ဆင်ထားပြီး ကျောက်စိမ်းပေလွှာတစ်ခုကို ပေးသည်။ ထို့နောက် တီးတိုးပြောသည်။

“အရှင်၊ ကလန်ရဲ့အကြီးအကဲတွေက ကျွမ်းကျင်သူတွေကို စေလွှတ်ဖို့ ဆုံးဖြတ်ထားပါတယ်”

မိစ္ဆာလောကလန်၏ ကျွမ်းကျင်သူများ ....

ဟန်မူယဲ့အတွက် မည်သူပင်ဖြစ်စေ လုံလောက်စွာသန်မာလျှင် အဆင်ပြေသည်။

သူက အပြည့်အဝပြင်ဆင်ပြီး သင်္ချိုင်းအင်မော်တယ်မြို့တော်သို့ သွားမည်။

“ကောင်းတယ်”

ဟန်မူယဲ့က ခေါင်းညိတ်သည်။

မြို့၏ အရေးကိစ္စများကို စီမံပြီးသောအခါတွင် ဟန်မူယဲ့က တိတ်ဆိတ်စွာ ထွက်လာခဲ့သည်။

သူက အဝေးကြီးသို့ မသွားပဲ ရွှေအပိုင်းအစပုရွက်ဆိတ်များ၏ မိုင်းတွင်းသို့ ရောက်လာသည်။

ယခုအချိန်တွင် မိုင်းတွင်းက ယွင်လန်မြို့နှင့် မိုင်ရာချီခန့်သာ ဝေးကွာတော့သည်။ အထဲတွင်ရှိသော သတ္တုများကိုလည်း ရွှေအပိုင်းအစပုရွက်ဆိတ်များက အပြည့်အဝ စားသုံးခဲ့သည်။

ကံကောင်းစွာဖြင့် ဟန်မူယဲ့က ပြင်ဆင်ထားပြီး မူရုံမိသားစု၏ မိုင်းတွင်းမှ သတ္တုရိုင်းများကို ထည့်သွင်းပေးခဲ့သည်။

မိုင်းတွင်းထဲသို့ ဝင်သွားသောအခါတွင် မရေမတွက်နိုင်သော ရွှေအပိုင်းအစပုရွက်ဆိတ်များက တုန်ခါသံပေးပြီး ဟန်မူယဲ့ကို နှုတ်ဆက်နေကြပုံပေါ်သည်။

“ဝီ”

ဟန်မူယဲ့က လက်မြှောက်ပြီး ကျောက်စိမ်းပြားသုံးခုကို ထုတ်ယူသည်။

တာအိုဖန်တီးခြင်းတံဆိပ်ပြား ဖြစ်သည်။

ထိုတံဆိပ်ပြားများဖြင့် ပုရွက်ဆိတ်များကို လွယ်ကူစွာ သိမ်းဆည်းနိုင်သည်။

အစိမ်းရောင်အလင်း ပေါ်ထွက်လာပြီး ပုရွက်ဆိတ်များအားလုံးကို ကျောက်စိမ်းပြားသုံးခုထဲတွင် သိမ်းဆည်းလိုက်သည်။