အခန်း (၉၃၇)

“ဘုန်း”

ဓားဝင်္ကပါများ စုစည်းလာပြီး ဟန်မူယဲ့၏နောက်မှ ကောင်းကင်ထက်သို့ နီးကပ်စွာ လိုက်လာကြသည်။

ဤတစ်ကြိမ်တွင် ဓားဝင်္ကပါကိုးခုသာ ကောင်းကင်ပေါ်သို့ ရောက်လာခဲ့သည်။

ခုနစ်လအတွင်း၌ အသန်မာဆုံး ဓားဝင်္ကပါများသည် တိုက်ပွဲများမှ ထွက်ပေါ်လာခဲ့သည်။

ထိုဝင်္ကပါကိုးခုထဲတွင် လက်ရွေးစင်တပည့်များအားလုံးက လေဟာနယ်ဖွဲ့စည်းခြင်းအဆင့်သို့ ရောက်နေပြီး အနည်းဆုံး ခန်းဆောင်သုံးခု၏ တပည့်များ ဖြစ်ကြသည်။

သူတို့က ဓားတာအိုကို လေးနက်စွာ နားလည်ထားပြီး ပြီးပြည့်စုံစွာ ပူးပေါင်းဆောင်ရွက်နေကြသည်။

သူတို့၏ ခွန်အားနှင့် စိတ်ဓာတ်ကြောင့် ဓားဂိုဏ်း၏ အကြီးအကဲများကပင် အံ့အားသင့်သွားရသည်။

ယွင်လန်ဓားအင်မော်တယ် ထောက်ပံ့ပေးခဲ့သော တွန်းအားကြောင့် ဓားဂိုဏ်းသည် ပိုမိုသန်မာလာခဲ့သည်။

“ဟားဟား၊ အဲဒီကလေးက တစ်နှစ်တာကျင့်ကြံမှုအတွင်းမှာ ဘာတွေရခဲ့လဲမသိဘူး”

လီယွင်ကန်းက ညင်သာစွာပြောလိုက်ပြီး သေရည်အိုးကို ဆုပ်ကိုင်သည်။

တခြားလူများကလည်း ပြုံးနေပြီး ဟန်မူယဲ့ကို ကြည့်လိုက်ကြသည်။

“ဘုန်း”

ကောင်းကင်ထက်တွင် ဓားအလင်းက ပြင်းထန်စွာ လှုပ်ရှားနေသည်။

ဟန်မူယဲ့က ကျယ်လောင်စွာ ရယ်လိုက်သည်။ သူ့လက်ထဲတွင်ရှိသော ဓားအလင်းသည် မီးနဂါးအဖြစ် ပြောင်းလဲသွားသည်။

“‌တောင်နဲ့မြစ်ကို လောင်ကျွမ်းခြင်း”

ကျယ်လောင်သောအော်သံနှင့်အတူ မီးနဂါးက မီးတောင်တစ်ခုအဖြစ် ပြောင်းလဲသွားပြီး ကျဆင်းလာခဲ့သည်။

ကောင်းကင်၏ မိုင်တစ်ထောင်ပတ်ဝန်းကျင်သည် အပြည့်အဝပျက်စီးသွားပြီး ဓားအလင်းများအားလုံးကို ဖယ်ရှားလိုက်သည်။

“အဲဒါက ဂိုဏ်းတူအစ်ကိုကျီဝူရဲ့ ကောင်းကင်လောင်ကျွမ်းဓားနည်းစနစ် မဟုတ်လား”

အဝေးတစ်နေရာတွင်ရှိသော လူတစ်ယောက်က ထိတ်လန့်စွာပြောလိုက်သည်။

“ဂိုဏ်းတူအစ်ကိုကျီဝူက ကောင်းကင်လောင်ကျွမ်းဂိုဏ်းကို တည်ထောင်ခဲ့တယ်။ ဒါပေမဲ့ နောက်ပိုင်းမှာ ကျဆုံးသွားပြီး ထိပ်တန်းအဆင့်ဓားနည်းစနစ်လည်း ပျောက်ဆုံးသွားခဲ့တယ်”

“အဲဒါက ကောင်းကင်လောင်ကျွမ်းဓားနည်းစနစ်လား”

လီယွင်ကန်းက ညင်သာစွာပြောသည်။

လူတိုင်းက ဟန်မူယဲ့၏လက်ထဲတွင်ရှိသော ဓားကျိုးကို ကြည့်လိုက်ကြသည်။ ထိုဓားက သံချေးတက်နေပြီး အင်မော်တယ်အင်းကွက်များက အက်ကွဲနေကြသည်။ ထိုဓားသည် သာမန်ဓားတစ်လက်ထက် အနည်းငယ်သာ ပိုသန်မာသည်။

သို့သော် ထိုဓားဖြင့် ကောင်းကင်၏ မိုင်တစ်ထောင်ပတ်ဝန်းကျင်ကို ဖျက်ဆီးခဲ့သည်။

“ဂိုဏ်းတူအစ်ကိုကျီဝူရဲ့ ထိပ်တန်းနည်းစနစ် ပြန်ပေါ်လာပြီ။ ကောင်းတယ်။ ကောင်းတယ်”

လူတစ်ယောက်က သက်ပြင်းချလိုက်ပြီး ရုတ်တရက် မျက်လုံးပြူးသွားသည်။

ဟန်မူယဲ့က လက်ထဲတွင်ရှိသော သံချေးတက်နေသည့်ဓားကို အစိမ်းပုပ်ရောင်ဓားကျိုးတစ်ချောင်းဖြင့် လဲလိုက်သည်။

ထိုဓားကျိုးက အလွန်တောက်ပသော ရွှေအလင်းနှင့်အတူ ဆင်းသက်လာခဲ့သည်။

“ရွှပ်”

လေဟာနယ်သည် ခုတ်ပိုင်းခံလိုက်ရသည်။

“လေဟာနယ်ခုတ်ချက်”

“အဲဒါက ဆရာဦးလေးကျင်းဟောင်ရဲ့ လေဟာနယ်ခုတ်ချက်ပဲ”

“ဆရာဦးလေးကျင်းဟောင်က သင်္ချိုင်းအင်မော်တယ်မြို့တော်မှာ ကျဆုံးသွားတယ်။ သူ့ရဲ့ ထိပ်တန်းနည်းစနစ် လေဟာနယ်ခုတ်ချက်ကလည်း ပျောက်ဆုံးသွားခဲ့တယ်။ ငါတို့တွေက နှမြောနေခဲ့တာ”

ပတ်ဝန်းကျင်က ဆူညံသွားသည်။

ယွင်လန်ဓားအင်မော်တယ်က ပျောက်ဆုံးနေသော ထိပ်တန်းအဆင့် ဓားနည်းစနစ်နှစ်ခုကို ထုတ်ပြလိမ့်မည်ဟု မည်သူမှ ထင်မထားခဲ့ကြပေ။

“အဲဒီကလေးက တံခါးပိတ်ကျင့်ကြံနေတဲ့အချိန်မှာ ပျောက်ဆုံးသွားတဲ့ ဓားနည်းစနစ်တွေကို လေ့လာနေတာလား”

လီယွင်ကန်းက တီးတိုးရေရွတ်လိုက်ပြီး ဆက်တိုက်ပြောင်းလဲနေသော ဟန်မူယဲ့၏ဓားအလင်းကို ကြည့်သည်။

“သူက အဲဒီဓားနည်းစနစ်တွေကို ဘယ်ကနေ သင်လာတာလဲ”

“ဘုန်း”

ကောင်းကင်ထက်တွင် တိမ်တိုက်များစုစည်းနေပြီး ကွဲထွက်သွားသည်။

သွေးရောင်ဓားချက်ကို မြင်လိုက်ရသည်။

အံ့အားသင့်နေသောအသံများ ပေါ်ထွက်လာပြန်သည်။

ဟန်မူယဲ့အသုံးပြုလိုက်သော ဓားနည်းစနစ်တိုင်းသည် ပျောက်ဆုံးနေခဲ့သည်။

တချို့က နာမည်ကြီးဘိုးဘေးများ၏ ဓားနည်းစနစ် ဖြစ်သည်။

တချို့က လူသိများခြင်းမရှိသော ဘိုးဘေးများ၏ ဓားနည်းစနစ် ဖြစ်သည်။ ယခုအချိန်တွင် သူတို့၏ ဓားနည်းစနစ်များသည် ဟန်မူယဲ့၏ လက်ထဲတွင် တောက်ပနေပြီး လက်ရွေးစင်တပည့်များကို ဖိနှိပ်ထားသည်။

“နှစ်ပေါင်း ၃,၈၀၀ကျင့်ကြံပြီး ကောင်းကင်အဆင့်ကိုရောက်လာတဲ့ စုကျန်ရှန့်က ဝိညာဉ်သုံးပါးဓားနည်းစနစ်ကို တီထွင်ခဲ့တယ်”

“ကောင်းကင်အင်မော်တယ်အဆင့်ကို ရောက်နေတဲ့ ပိုင်ယွီဟယ်က ဝိညာဉ်ဖျက်ဆီးခြင်းတောင်ကြားရဲ့ အပြင်ဘက်မှာ သေဆုံးခဲ့တယ်။ သူမက မုန်တိုင်းဓားနည်းစနစ်ကို ကျွမ်းကျင်တယ်”

“ဉာဏ်အလင်းခန်းဆောင်သခင် ကျန်းထျန်းချီက ဘဝတစ်လျှောက်လုံး ကောင်းကင်ညီမျှခြင်းဓားနည်းစနစ်ကို လေ့ကျင့်ခဲ့တယ်။ ပြီးတော့ အင်မော်တယ်သခင်တစ်ပါးနဲ့ ယှဉ်ပြိုင်နိုင်ခဲ့တယ်။ သူက လွန်ခဲ့တဲ့ နှစ်ပေါင်းသုံးသန်းကျော်မှာ သေဆုံးသွားတယ်”

....

ပတ်ဝန်းကျင်တွင် ရှိနေသော လူများက ဟန်မူယဲ့၏ ဓားနည်းစနစ်တိုင်းကို တီးတိုးရေရွတ်လိုက်ကြသည်။

ဟန်မူယဲ့၏ ပတ်ပတ်လည်တွင် ပုံရိပ်များ ရှိနေပုံပေါ်သည်။

ထိုပုံရိပ်များက ဓားဂိုဏ်း၏ မျိုးဆက်သစ်တပည့်များနှင့် ယှဉ်ပြိုင်နေကြသည်။

ဟန်မူယဲ့က စိတ်ကျေနပ်စွာ ရယ်မောနေသောအသံကို ကြားလိုက်ရပုံပေါ်သည်။

ဘိုးဘေးများက ဓားဂိုဏ်း၏ ဂုဏ်ကျက်သရေကို မြင်နိုင်ပြီး မျိုးဆက်သစ်များနှင့် တိုက်ခိုက်ခဲ့သောကြောင့် ကျေနပ်သွားပုံပေါ်သည်။

ဟန်မူယဲ့၏ ဝိညာဉ်စွမ်းအားက ရွှေအင်မော်တယ်အစောပိုင်းအဆင့်မှ လျင်မြန်စွာ တိုးတက်လာသည်။

သုံးရက်ကြာသည်အထိ သူ၏ ဓားအလင်းသည် ပျောက်ကွယ်မသွားခဲ့ပေ။ လက်ရွေးစင်တပည့်များက သူ၏ ဓားဝင်္ကပါကို မချိုးဖောက်နိုင်ခဲ့ကြပေ။

သုံးရက်အတွင်း၌ သူ၏ ဝိညာဉ်သည် ရွှေအင်မော်တယ် အထွတ်အထိပ်အဆင့်သို့ ရောက်သွားသည်။ သူ၏ ကောင်းကင်အင်မော်တယ်အဆင့် ကျင့်ကြံခြင်းကလည်း တိုးတက်လာသည်။

သူ၏ ဝိညာဉ်ကျင့်ကြံခြင်းသည် အင်မော်တယ်ချီကျင့်ကြံခြင်းထက် အဆင့်ကြီးတစ်ဆင့် ပိုသာနေသည်။

ထိုသို့ ထူးခြားသော ကျင့်ကြံခြင်းကို တခြားလူများက စိတ်ကူးကြည့်နိုင်မည်မဟုတ်ပေ။

“ခလွမ်”

ဓားများ ထိတွေ့သွားသည်။ နောက်ဆုံးတွင် ဟန်မူယဲ့က နောက်ဆုတ်ပေးလိုက်သည်။ မရေမတွက်နိုင်သော ဓားဝင်္ကပါများက ကောင်းကင်ပေါ်သို့ ထိုးတက်လာကြသည်။

လက်ရွေးစင်တပည့်များက ဟိန်းဟောက်လိုက်ပြီး ဓားအလင်းကို ထုတ်လွှတ်သည်။

ဓားအလင်းများက သွယ်ယှက်နေပြီး ယွင်လန်ဓားအင်မော်တယ်ကို ခွဲခြားမမြင်နိုင်တော့ပေ။ လက်ရွေးစင်တပည့်များက အကောင်းအတိုင်းရှိနေသော ဓားဝင်္ကပါများကို ဖျက်ဆီးရန်အတွက် ပြေးဝင်လာကြသည်။

ဝင်္ကပါပျက်စီးသွားသော လူများက တခြားလူများဖြင့် ဝင်္ကပါအသစ်ကို လျင်မြန်စွာ ဖွဲ့စည်းလိုက်ကြသည်။

ထိုသို့ဖြင့် ဝင်္ကပါများက ပျက်စီးလိုက် ဖွဲ့စည်းလိုက်ဖြင့် ဖရိုဖရဲ ဖြစ်နေသည်။

ဂိုဏ်း၏ အကြီးအကဲများက သွယ်ယှက်နေသော ဓားအလင်းများကို အာရုံစိုက်၍ ကြည့်နေရုံသာ တတ်နိုင်ခဲ့သည်။

ခုနစ်ရက်အကြာတွင် ဓားဝင်္ကပါတချို့က ဖြည်းဖြည်းချင်း တည်ငြိမ်လာသည်။

အသန်မာဆုံး ဓားဝင်္ကပါသည် တခြားဓားဝင်္ကပါများကို ဖျက်ဆီးပြီး ကောင်းကင်ထက်တွင် သီးသန့်တည်ရှိနေသည်။

ကျန်းရွှမ်ခန်းဆောင်မှ ယွင်လန်ဓားအင်မော်တယ် ပြိုင်ဘက်ကင်းဟန်၊ ရွှင်းထျန်းခန်းဆောင်မှ လေဝိညာဉ်ဓားအင်မော်တယ် စုကျန်း၊ ကျန်းထျန်းခန်းဆောင်မှ ပိုင်ယွဲ့ဓားအင်မော်တယ် ပိုင်ထူ၊ လုဟယ်ခန်းဆောင်မှ ရေကြည်ဓားအင်မော်တယ် ချန်စစ်ရွှေ၊ စန်ကျင်းခန်းဆောင်မှ ရွှေကျောက်စိမ်းဓားအင်မော်တယ် ယွီရှုလင်နှင့် ကျန်းဟွမ်ခန်းဆောင်မှ ကောင်းကင်ဟိန်းသံဓားအင်မော်တယ် ခူရှုတို့ ဖြစ်ကြသည်။

ကျန်းထျန်းခန်းဆောင်သခင် လီယွင်ကန်းကပင် ဓားအင်မော်တယ်ခြောက်ယောက်၏ ဝင်္ကပါကို မချိုးဖျက်နိုင်ခဲ့ပေ။

သူက ကောင်းကင်ကို လွှမ်းမိုးထားသော ဓားဝင်္ကပါများကို မြင်လိုက်ရသောအခါတွင် လက်ယားလာသည်။ ဘေးတွင်ရှိသော လူအိုကြီးများ၏ တွန်းအားပေးမှုကြောင့် သူက ဓားဝင်္ကပါတစ်ခုကို ဖျက်ဆီးရန် လှုပ်ရှားခဲ့သည်။

သို့သော် ဝင်္ကပါကို မချိုးဖျက်နိုင်ပဲ မျက်နှာပျက်သွားခဲ့ရသည်။

ထိုတိုက်ပွဲအပြီးတွင် သင်္ချိုင်းအင်မော်တယ်မြို့တော်သို့ သွားရောက်မည့်လူများကို သတ်မှတ်နိုင်ခဲ့သည်။

ဟန်မူယဲ့ရွေးချယ်ထားသော လူငါးယောက်က အသန်မာဆုံးမဟုတ်သော်လည်း သူနှင့်အတူ ပူးပေါင်းပြီး တခြားလူများကို ဖိနှိပ်ထားနိုင်သည်။

တခြားဝင်္ကပါများကလည်း အတူတူလေ့ကျင့်ထားသော တပည့်များ မဟုတ်ခဲ့ပေ။ အများစုက တစ်ယောက်နှင့်တစ်ယောက် မရင်းနှီးကြပေ။ သို့သော် ယခုအချိန်တွင် သူတို့အားလုံးက ပူးပေါင်းပြီး တိုက်ခိုက်နိုင်ခဲ့ကြသည်။

ထိုတိုက်ပွဲအပြီးတွင် ဓားဂိုဏ်း၏ အမွေအနှစ်များက တစ်ခုနှင့်တစ်ခု လိုက်ဖက်ညီနေကြောင်း သိသွားကြသည်။

ဥပမာအနေဖြင့် ဟန်မူယဲ့က တခြားလူများနှင့် ပူးပေါင်းပြီး ဝင်္ကပါဖွဲ့စည်းလိုက်သောအခါ သူအသုံးပြုနေသော ကျန်းရွှမ်ခန်းဆောင်၏ ဓားနည်းစနစ်က ကျန်းဟွမ်ခန်းဆောင်၏ ဓားအင်မော်တယ်ခူရှုနှင့် လိုက်ဖက်ညီနေပြီး ခွန်အားတိုးလာသည်။

သူတို့နှစ်ယောက်ကြောင့် ဝင်္ကပါ၏စွမ်းအားက နှစ်ဆတိုးသွားသည်။

ထိုတိုက်ပွဲအပြီးတွင် ဓားဂိုဏ်းက ပူးပေါင်းတိုက်ခိုက်မည့်လူကို ရှာဖွေလျက် အလုပ်ရှုပ်သွားသည်။

လူတိုင်းက နှစ်ပေါင်းများစွာကွဲကွာနေသော ရဲဘော်ရဲဘက်များနှင့် ပူးပေါင်းပြီး တိုက်ခိုက်လာကြလိမ့်မည်။

ကျန်းရွှမ်ခန်းဆောင်၏ အပြင်ဘက်တွင် ဓားအလင်းသည် အလင်းလွှာတစ်ခုအဖြစ် ပြောင်းလဲသွားပြီး ကောင်းကင်နှင့်မြေကြီးကို လွှမ်းခြုံလိုက်သည်။

ဟန်မူယဲ့က အင်မော်တယ်အင်းကွက်များ ပါဝင်နေသော အစိမ်းရောင်ဝတ်စုံကို ဝတ်ဆင်ထားသည်။

ထိုဝတ်စုံသည် ကျန်းရွှမ်ခန်းဆောင်၏ ရတနာတစ်ခု ဖြစ်သည်။

လက်ရွေးစင်တပည့်တစ်ရာသည် သူ့ရှေ့တွင် ရှိနေသည်။

သိပ်မဝေးသောနေရာတွင် သူနှင့်အတူပါလာသော မိစ္ဆာတစ်ရာ ရှိနေကြသည်။

“အားလုံးပဲ ဒါက ငါဖန်တီးထားတဲ့ စာချုပ်အင်းကွက်ပဲ”

“ဒါနဲ့ဆိုရင် မင်းတို့က မိစ္ဆာမျိုးနွယ်နဲ့ စာချုပ်ချုပ်ပြီး သွေးနဲ့ချီ ကျင့်ကြံခြင်းကို ဝေမျှနိုင်တယ်။ မင်းတို့ရဲ့ခွန်အားက လျင်လျင်မြန်မြန် တိုးလာလိမ့်မယ်”

ဟန်မူယဲ့၏လက်ထဲတွင် ရွှေရောင်အင်းကွက်များ တစ်ခုပြီးတစ်ခု ပေါ်လာသည်။

စာချုပ်အင်းကွက်များ ဖြစ်ကြသည်။

“စိတ်ဝင်စားတဲ့လူတွေက မိစ္ဆာတွေနဲ့ စာချုပ်ချုပ်နိုင်တယ်”

ဟန်မူယဲ့က လူအုပ်ကိုကြည့်လိုက်ပြီး လေးနက်စွာပြောသည်။

“စာချုပ်ဖြစ်ပေါ်လာရင် သေခြင်းရှင်ခြင်းက အတူတူပဲ ဖြစ်သွားပြီ”

စာချုပ်သည် မိစ္ဆာသားရဲများ၏စွမ်းအားဖြင့် လူတစ်ယောက်ကို ခွန်အားတိုးလာစေသည်။

လက်ရွေးစင်တပည့်များက တစ်ယောက်ကိုတစ်ယောက် ကြည့်လိုက်ကြပြီး များသောအားဖြင့် တိတ်ဆိတ်နေသည်။

ဓားကျင့်ကြံသူများသည် ကိုယ်ပိုင်ဓားကျင့်ကြံခြင်းမှလွဲ၍ တခြားအရာများကို စိတ်မဝင်စားကြပေ။

“ကျွန်တော်ကြိုးစားကြည့်မယ်”

ခဏအကြာတွင် အပြာရောင်ဝတ်စုံနှင့် အသက်သုံးဆယ်အရွယ် ဓားကျင့်ကြံသူတစ်ဦးက လက်မြှောက်ပြီး ရွှေရောင်အင်းကွက်တစ်ခုကို ဆင့်ခေါ်သည်။

သူက အင်းကွက်ကို ကိုင်ထားပြီး မိစ္ဆာများကို ကြည့်လိုက်သည်။

“ငါက ထျဲယွင်ခန်းဆောင်ရဲ့ ဖန်းရှစ်ပဲ။ ငါက လေဟာနယ်သန့်စင်ခြင်းအဆင့်မှာ ရှိနေတယ်။ အမြန်နှုန်းနဲ့ ခွန်အားကောင်းပြီး တိုက်ခိုက်ရတာကို ကြိုက်တယ်”

ဓားအလင်းသည် သူ့လက်ထဲတွင် ရွေ့လျားနေပြီး လေပြင်းနှင့်မိုးကြိုးကို ဖော်ပြသည်။

သူက ရွှေရောင်အင်းကွက်ကို ကိုင်ထားပြီး ရင်ပြင်ထဲသို့ ဝင်ရောက်လာသည်။

“ငါနဲ့စာချုပ်ချုပ်ဖို့ ဘယ်သူက ဆန္ဒရှိလဲ”

မိစ္ဆာများက တစ်ယောက်ကိုတစ်ယောက် ကြည့်လိုက်ကြသည်။ ခဏအကြာတွင် လူသန်ကြီးသုံးယောက် မတ်တပ်ရပ်လာသည်။

“ဂါး ....”

တစ်ယောက်က ရွှေလေပြင်းဟိုသားရဲအဖြစ် ပြောင်းလဲသွားပြီး နတ်အာရုံဖြင့် ပြောလိုက်သည်။

“ငါက ရွှေလေပြင်းဟိုသွေးမျိုးဆက်ကို ပိုင်ဆိုင်ထားတယ်။ ငါတို့က အမြန်နှုန်းကို ပေါင်းစပ်နိုင်လိမ့်မယ်”

တခြားတစ်ယောက်က ရွှေရောင်မျက်လုံးများကို ပိုင်ဆိုင်ထားသော ချပ်ဝတ်ပွေးတစ်ကောင်အဖြစ် ပြောင်းလဲသွားသည်။

“ငါက လေဟာနယ်ဖွဲ့စည်းခြင်းအဆင့် တိုက်ခိုက်မှုကို ခုခံနိုင်တဲ့ ရွှေချပ်ဝတ်ကို ဖန်တီးပေးနိုင်တယ်”

နောက်ဆုံးတစ်ယောက်က ပေသုံးဆယ်ကြီးမားသော နွားသိုးတစ်ကောင်အဖြစ် ပြောင်းလဲသွားသည်။

“ငါက မင်းကို ခွန်အားဖြည့်ပေးနိုင်တယ်”

ဖန်းရှစ်က စဉ်းစားနေပြီး အင်းကွက်ကို ရွှေလေပြင်းဟိုသားရဲဆီသို့ ပေးလိုက်သည်။

ရွှေလေပြင်းဟိုသားရဲက ဟိန်းဟောက်ပြီး အင်းကွက်ကို လက်ခံလိုက်သည်။

ရွှေရောင်စီးကြောင်းနှစ်ခုက သူတို့၏ ခန္ဓာကိုယ်ကြားတွင် ဆက်သွယ်နေသည်။ ရွှေလေပြင်းဟိုသားရဲက ရွှေအလင်းတစ်ခုအဖြစ် ပြောင်းလဲပြီး ဖန်းရှစ်၏လက်ထဲသို့ ရောက်သွားသည်။

“ဝီ”

ဖန်းရှစ်က လှုပ်ရှားလိုက်ပြီး ရင်ပြင်၏ အပြင်ဘက်သို့ ချက်ချင်းရောက်သွားသည်။

“အရမ်းမြန်တာပဲ”

လက်ရွေးစင်တပည့်များက ကြောင်အသွားကြသည်။