ဒုကျောင်းအုပ်ချန်နှင့်တိုက်ပွဲ (ပထမအပိုင်း)

"လုရွှမ်? မင်းက လုရွှမ်?" ဒုကျောင်းအုပ်ချန် အံ့အားသင့်သွားသည်။

သူ့လူတွေကို နေရာတိုင်းမှာ လွှတ်ပြီး ဖမ်းဆီးဖို့ နောက်ဆုံး ရွှေရောင် အမိန့်စာကိုတောင် ထုတ်ပြန်ခဲ့တာကို ဒီကောင်က နည်းနည်းတောင် မမှုဘဲ ဒီအထိရောက်လာတယ်? တကယ်ကြီးလားဟ!!

"မင်းဘာသာ ရောက်လာတော့လည်း ကောင်းတာပေါ့! လာကြစမ်း!! ဒီကောင့်ကိုဖမ်းပြီး သူ့ရဲ့ခြေတွေလက်တွေကို ဖြတ်ထုတ်ပြီး အကျဥ်းထောင်ထဲ ပစ်ထည့်ထားလိုက်!"

ဒုကျောင်းအုပ်ချန်က သူ့လက်ကို ဝှေ့ယမ်းလိုက်သည်။

ဝေ့ချွမ်နှင့် အခြားလူများကို သူ့ရှေ့က လူငယ်လေးက သတ်ခြင်းလို့ မထင်မှတ်ဘဲ သူ့ဘာသာ လက်နက်ချရန် လာသည်ဟု ထင်လိုက်သည်။

သူသိထားတဲ့ အချက်အလက်တွေအရ လုရွှမ်ဟာ အတန်းနိမ့် ကျောင်းသားတစ်ယောက်သာ ဖြစ်လေသည်။ အခွင့်အရေးတစ်ခု ရလောက်အောင် ကံကောင်းသွားပေမယ့် ဝူအဆင့် သိုင်းပညာရှင်ရဲ့ ကြံ့ခိုင်မှု အပြည့်ရှိတဲ့ အခြေအနေကို ရောက်ဖို့ဆိုတာ မဖြစ်နိုင်သလောက်ပဲ။

ဖိရွှယ်နယ်ပယ်မှာ ရှိတဲ့ ဝေ့ချွမ်ကို သူသတ်နိုင်တဲ့ အရည်အချင်း ဘယ်ကရှိမှာလဲ?

"ကောင်လေး....လိမ်လိမ်မာမာနဲ့ လှဲအိပ်လိုက်တော့"

"မင်းက ဘယ်လို အသက်ရှင်ရမယ် သေရမယ်မှန်းကို မသိဘဲ ဥပဒေအဖွဲ့ကို လာရဲတယ်ပေါ့လေ ဒါကမင်းဘဝမှာ မင်းလုပ်ဖူးသမျှ အဆိုးဆုံး ဆုံးဖြတ်ချက်ပဲကွ!"

ဥပဒေအဖွဲ့က အဖွဲ့ဝင်နှစ်ယောက် ဝန်းရံလာပြီး တစ်ချိန်တည်း တိုက်ခိုက်ကြတော့သည်။

ဟူ.....

လေသည် အမဲလိုက်နေ သကဲ့သို့ပင်။ သူတို့နှစ်ဦးသည် တန်းလိနယ်ပယ်ကမို့ တိုက်ကွက်က အမှန်တကယ် ပြင်းထန်နေပြီး တစ်ချိန်တည်းမှာပင် ထွက်လာရာ ပြင်းထန်သော လေသည် ပတ်ပတ်လည်ကို မှုတ်ထုတ်လိုက်ပြီး ပြင်းထန်သော ဖိနှိပ်မှုက လုရွှမ်ဆီသို့ ပြေးဝင်လာသည်။

"သေချင်နေတာပဲ!"

မထင်မှတ်ပဲ သူရောက်လာပြီး ဘာမှ ပြန်မပြောရသေးချိန်မှာ တစ်ဖက်လူက သူ့ခြေလက်တွေကို ဖြတ်တောက်ချင်နေပြီ။ လုရွှမ် မျက်ခုံးပင့်လိုက်ပြီး မရှောင်ဘဲ လက်သီးနဲ့ တိုက်ရိုက်ပြန်တိုက်လိုက်သည်။

ဝုန်း! ဝုန်း!

"အား!"

ဥပဒေတပည့် နှစ်ဦးသည် တုံ့ပြန်ရန် အချိန်ပင်မရှိ ရင်ဘတ်ကို ထိုးကြိတ်ခံလိုက်ရကာ အော်ဟစ်ရင်း နောက်သို့ ပြန်လွင့်သွားကြသည်။

ဗုန်း ဗုန်း

ခန္ဓာကိုယ်က နံရံမှာကပ်ပြီး အသားညှပ်မုန့်ကဲ့သို့ ဖြစ်သွားသည်။

"ဘာ? ဥပဒေအဖွဲ့ကလူကို လူမြင်ကွင်းမှာ သတ်ဝံ့တယ်ပေါ့?"

"တန်းလိနယ်ပယ် နှစ်ယောက်ကို လက်သီးတစ်ချက်နဲ့ ထိုးသတ်လိုက်တာ!! ဒီကောင်က တကယ်အတန်းနိမ့်က ကျောင်းသားလား??"

"သူက ဒုကျောင်းအုပ်ချန်ရှေ့မှာ လူသတ်ရဲတယ်ပေါ့!! သူရူးနေတာလား?"

.......

လုရွှမ်၏ လုပ်ရပ်ကို မြင်လိုက်တဲ့ လူတိုင်းမှာ အံ့အားသင့်သွားကြသည်။

တစ်ယောက်ချင်းစီတိုင်း အံသြသွားကြသည်။

သူက ဥပဒေအဖွဲ့ဆီကို ရောက်ရှိလာတာနဲ့ လူအများရှေ့တွင် လူသတ်ဖြတ်တယ်? ပြီးတော့ အဲဒါကလည်း ဒုကျောင်းအုပ်ချန်ရဲ့ မျက်စိရှေ့မှာပဲ ဒီကလေးက ဝက်ဝံအသည်းကို စားထားလို့ ဒီလောက် သတ္တိကောင်းနေတာလား? ဒါမှမဟုတ် ရူးနေတာလား??

"မင်း သတ်ရဲတယ် ဟား ဟား မင်းတော့သေသွားပြီ။ အရင်က သက်သေ မလုံလောက်ခဲ့ဘူး ဆိုပေမယ့် အခုလူတွေအများကြီး ကြည့်နေတဲ့အတွက် အထောက်အထားက ခိုင်လုံသွားပြီ... လူယုတ်မာ.... မင်းဘယ်လို ရှင်သန်မလဲဆိုတာ ကြည့်ရသေးတာပေါ့"

ဒီမြင်ကွင်းကို သူ့မျက်လုံးထဲမှာ မြင်လိုက်ရတော့ ချိုဝမ့်ထျန်း ခဏလောက် ထိတ်လန့်သွားပြီမှ စိတ်လှုပ်ရှားစွာ ရယ်မောလိုက်၏။

လျေက်ချင်းက သက်သေမရှိဘူးလို့ ပြောခဲ့သည်။ အခုဒီကိစ္စက အမှန်တရားပဲဆိုတာ သူသိသွားပြီ။ ဒီကောင်လေးက လူတွေမြင်ကွင်းမှာ သတ်လိုက်တာကို ဒုကျောင်းအုပ်ချန်လည်း ရှင်းရှင်းလင်းလင်း မြင်လိုက်ရတော့ ဘယ်လိုလုပ် ငြင်းနိုင်တော့မှာလဲ?

ဒီတစ်ခါတော့ သူသေရမယ်ဆိုတာ သံသယဖြစ်စရာ မရှိတော့ဘူး။

သူ့ရှေ့က လူငယ်က သူ့ဆီပေးခဲ့တဲ့ အရှက်တရားတွေကို တွေးပြီး ဒီလူကို အစိတ်စိတ် အမြွှာမြွှာ အပိုင်းပိုင်းဖြတ်ပြီး လုံးလုံး ဖြိုခွဲပစ်ချင်စိတ်တွေ ဖြစ်လာသည်။

"သက်သေ အထောက်အထားတွေ ခိုင်လုံနေပြီလား? ခိုင်လုံနေစရာ မလိုပါဘူး။ ဝေ့ချွမ်၊ တုဖျင်၊ မော့ရှီးနဲ့ ရှင့်မင်တို့အားလုံးကို ငါ့လက်နဲ့ သတ်ပစ်လိုက်တာ...အို...ဟုတ်သားပဲ မေ့နေတာ မင်းလည်း သေမင်းကို ရှာချင်နေတာဆိုတော့ မင်းကို ငါဖြည့်ဆည်းပေးမယ်"

လုရွှမ်သည် ခေါင်းကို မြှောက်လိုက်ပြီး ခန္ဓာကိုယ်ကို တစ်ချက် လှုပ်ရှားလိုက်သည်။

ဟူ.....

နောက်အခိုက်အတန့်တွင် သူသည် ချိုဝမ့်ထျန်း၏ ရှေ့တွင် ပေါ်လာပြီး လက်ဖဝါးကို မြှောက်၍ လည်ပင်းကို ဆွဲညှစ်ထားလိုက်သည်။

"အား.....ဒုကျောင်းအုပ်ချန် ကယ်ပါဦး..."

မမျှော်လင့်ဘဲ တစ်ဖက့လူက တိုက်ရိုက် တိုက်ခိုက်ဖို့အတွက် ဆယ်မီတာကျော် အကွာအဝေးကနေ မျက်စိတစ်မှိတ် အတွင်းမှာပဲ သူ့ဆီရောက်လာ၏။

အရင်က ခွန်အားတွေ ရှိနေသေးရင် တစ်ချက်နှစ်ချက်လောက် ခုခံနိုင်ခဲ့တယ်လို့ ဆိုလို့ရပေမယ့် အခုချိန်မှာတော့ ခွန်အားတွေ ဆုံးရှုံးပြီး လည်ပင်းကလည်း အညှစ်ခံထားလို့ တခြားသူတွေရဲ့ သနားညှာတာမှုကို အပြည့်အဝ ပြေးယူရုံသာ ရှိတော့သည်။

"လူယုတ်မာ! ချိုဝမ့်ထျန်းကို မြန်မြန်ချလိုက်စမ်း!! မင်း သူ့ကို နာကျင်အောင် လုပ်ရဲရင် ငါမင်းရဲ့ဘဝကို သေတာထက် ပိုဆိုးအောင် လုပ်ပစ်မယ်!"

ဒုကျောင်းအုပ်ချန်သည် လုရွှမ် ဤမျှ ပြင်းထန်လိမ့်မည်ဟု မမျှော်လင့်ထားခဲ့။ တစ်ချက်လောက် လှုပ်ရှားပြီးသည်နှင့် တပြိုင်နက် ဥပဒေတပည့်နှစ်ဦးကို သတ်ဖြတ်ကာ ဝေ့ချွမ် နှင့် အခြားသူများကို သတ်ပစ်ခဲ့ကြောင်း ဝန်ခံခဲ့သည်။

ယခုလည်း ချိုဝမ့်ထျန်းကို တိုက်ခိုက်နေပြီ ဖြစ်ရာ ဒုကျောင်းအုပ်ချန်ရဲ့ မျက်နှာလည်း မည်းမှောင်သွားကာ ကြိမ်းမောင်းတော့သည်။

"သူ့ကို နာကျင်အောင် မလုပ်ရင်ရော မင်းကငါ့ကို လွှတ်ပေးမှာမလို့လား?"

တစ်ဖက်လူ၏ ကြိမ်းမောင်းမှုကို လျစ်လျူရှုကာ လုရွှမ် လှောင်ပြောင်လိုက်ရင်း လက်ချောင်းများကို ပြင်းပြင်းထန်ထန် ဖိနှိပ်သည်။

ကျွတ်!

ချိူဝမ့်ထျန်း၏ လည်ပင်းသည် တိုက်ရိုက် ကြေမွသွားပြီး အလောင်းအဖြစ်သို့ ပြောင်းလဲသွား၏။

"မင်း……"

ဒုကျောင်းအုပ်ချန်သည် အဆင့်အတန်း မြင့်မားပြီး အခြားသူများ၏ လေးစားမှုကို ခံရသည်။ သူ့အလိုကို မည်သူမျှ မလွန်ဆန်ဝံ့ပေ။ သူ့ရှေ့မှ လူငယ်သည် သူ့စကားများကို ဆန့်ကျင်ရုံသာမက ပွင့်ပွင့်လင်းလင်း အံတုနေတဲ့အခါ ဒေါသထွက်လာလေသည်။

"ကောင်းပြီ ကောင်လေး...ငါဒီဒေါသကို နှစ်အတော်ကြာ ထိန်းလာခဲ့တာ အခုတော့ ငါမင်းကို လုံးဝ ဒေါသထွက်သွားပြီ!"

မှိုင်းညို့နေသော မျက်နှာဖြင့် မြေပြင်ပေါ်တွင် လဲလျောင်းနေသော အလောင်းကောင်အဖြစ်သို့ ပြောင်းလဲသွားတဲ့ ဝေ့ချွမ်ကို အေးစက်စွာ ကြည့်နေသည်။

"မင်းနောက်ကလူကို ခေါ်လိုက်!"

သူ့ရှေ့က လူငယ်သည် ဝေ့ချွမ်ကို သတ်ပစ်နိုင်မည်ဟု မယုံသေးဘဲ သူ့နောက်ကလူက ထိုသို့ပြုမည်ဟု တွေးနေမိသည်။

"ငါ့နောက်မှာ ဘယ်သူမှမရှိဘူး အဘိုးကြီး... မင်းလုပ်ချင်ရင် လုပ်လိုက်!"

လုရွှမ်က တစ်ဖက်လူ ဘာပြောချင်တယ် ဆိုတာကို သိပြီး ပေါ့ပေါ့ပါးပါး ပြောလိုက်သည်။

"အဲ့လိုဆိုမှတော့...သေလိုက်တော့!!"

ဒုကျောင်းအုပ်ချန်က ကျယ်လောင်စွာ ဟောက်ပြီး လုရွှမ်ကို ဖမ်းဆုပ်လိုက်သည်။

ဗုန်း!

လေထဲတွင် ကျယ်လောင်သော အသံဗလံတစ်ခု ထွက်ပေါ်လာပြီး အားကောင်းသော စွမ်းအင်များ ထွက်ပေါ်လာသည်။ ခန်းမထဲတွင် ပေါက်ကွဲသံများ ပဲ့တင်ထပ်သွားသည်။

ထုံးရွှမ်နယ်ပယ်။

ဒုကျောင်းအုပ်ချန်သည် အမှန်တကယ်ပင် ဝူအဆင့်၆ ထုံးရွှမ်နယ်ပယ်က သိုင်းသမားတစ်ယောက်က ဖြစ်သည်။

ကျင့်ကြံသူများသည် ဖိရွှယ်နယ်ပယ်က အမှတ်များကို ဖွင့်ပြီးနောက် ၎င်းတို့သည် ဤအမှတ်များကို လုံးလုံးလျားလျား ချိတ်ဆက်ထားရမည်ဖြစ်ပြီး စွမ်းရည်အားလုံးကို ပေါင်းစည်းနိုင်မှာ ဖြစ်သလို ကျင့်ကြံမှုအဆင့်သည် အလွန်တိုးမြင့်လာမည် ဖြစ်သည်။

ထုံးရွှမ်နယ်ပယ်သည် လေးနက်သော ဝင်ပေါက်ကို ဖြတ်ပြီး ဖွင့်လှစ်ထားသော အပ်စိုက်ကုထုံး အမှတ်များအား အဆုံးအထိ ချိတ်ဆက်ထားခြင်း ဖြစ်သည်။

အဓိက အမှတ်များသည် ချိတ်ဆက်ထားပြီး စစ်မှန်သော စွမ်းအင်ကို ထိုးဖောက်ထားရင် လူတစ် ဦး၏ ကျင့်ကြံမှုသည် အလွန်တိုးလာမည်ဖြစ်သည်။ သူသည် စစ်မှန်သော အဆင့်မြင့်သူများ အဆင့်သို့ ဝင်ရောက်လိမ့်မည်။

ထို့အတွက်ကြောင့် ဖိရွှယ်နယ်ပယ်သည် ကျောင်းသားဖြစ်ဆဲ ဖြစ်ပြီး ထုံးရွှမ်နယ်ပယ်သည် ကျောင်းတွင် အဆင့်မြင့် ပုဂ္ဂိုလ်ဖြစ်လာခဲ့သည်။

ခွန်အားဖြင့် အကဲဖြတ်ရာတွင် သာမန်ဖိရွှယ်နယ်ပယ် ပြီးပြည့်စုံခြင်းအဆင့်တွင် ၂၀၀ စွမ်းအင်ရှိပြီး ထုံးရွှမ်နယ်ပယ်၏ အစောပိုင်းအဆင့်တွင်မူ ၃၀၀ တိုက်ရိုက်စွမ်းအင်ရှိသည်။

၎င်းသည် အလယ်အလတ် အဆင့်တွင် ၄၀၀၊ နှောင်းပိုင်းအဆင့်တွင် ၅၀၀ နှင့် ထုံးရွှမ်နယ်ပယ်၏ ပြီးပြည့်စုံသော အဆင့်သည် ၇၀၀ အထိ ရောက်ရှိသွားသည်။

ဤကဲ့သို့သော စွမ်းအားဖြင့် သစ်ပင်ကြီးတစ်ပင်ကို အလွယ်တကူ နှုတ်ပစ်နိုင်ပြီး အိမ်တစ်လုံးကိုလည်း အလွယ်တကူ ပြိုလဲသွားနိုင်သည်။ စစ်မှန်သော စွမ်းအားသည် အဆင့်မြင့်များ၏ အဆင့်သို့ ဝင်ရောက်နေပြီဖြစ်သည်။

ဒုကျောင်းအုပ်ချန်သည် ထုံးရွှမ်နယ်ပယ်၏ အစောပိုင်းအဆင့်တွင် ရှိသော်လည်း လုရွှမ်၏စွမ်းအင် ၂၁၀ အားနှင့် ယှဉ်ပြိုင်နိုင်သည့် ကြီးမားသော စွမ်းအင်၃၀၀ အားကိုပိုင်ဆိုင်ထားပြီး ဖြစ်သည်။

ဒါပေမယ့်လည်း တိုက်ပွဲဆိုတာ ခွန်အားပေါ်မှာပဲ မူတည်တာ မဟုတ်ဘူးလေ။ ဒုကျောင်းအုပ်ချန်က သူ့ထက် ခွန်အားပိုကြီးပေမယ့် သူ့ကို တစ်ချက်တည်းနဲ့ သတ်ချင်ရင်တော့ မလုပ်နိုင်သေးပါဘူး။

ဟူ......

ပြိုင်ဘက်၏ ကြံ့ခိုင်မှု အားကောင်းသည်ကို သိသဖြင့် လုရွှမ်သည် ရှောင်ရန် သူ့ခြေဖဝါးကို ပွတ်ဆွဲကာ ပြီးပြည့်စုံသော ပထမအဆင့်ဖြစ်တဲ့ နဂါးဆင်ရွှေလက်ဝါးကို မြှောက်ကာ တစ်ဖက်သို့ လွှဲရိုက်လိုက်သည်။

"ဘယ်လို အသက်ရှင်ရမလဲ မသိတဲ့ကောင်!"

သူ့လက်ဖဝါး ဆန့်ထုတ်လာတာကို မြင်တော့ ဒုကျောင်းအုပ်ချန်က လှောင်ပြောင်ပြီး သူ့လက်သည်းတွေကို လက်သီးတွေအဖြစ် ပြောင်းလိုက်သည်။

ပေါ်ယန်လက်သီး!

သူက ကိုယ်ခံပညာကိုလည်း သုံးလိုက်သည်။

ကျန်းဝူအကယ်ဒမီမှ ပေါ်ယန်ဟုခေါ်သော ဉာဏ်ကြီးရှင်တစ်ဦးမှ ဖန်တီးထားသော ပေါ်ယန် လက်သီးသည် အထွတ်အထိပ်ရောက်နေပြီး ပြီးပြည့်စုံသော နဂါးဆင်ရွှေလက်ဝါး ပထမအဆင့်ဖြစ်နှင့် လုံးဝ နှိုင်းယှဉ်၍မရပါ။

ဗုန်း!

လက်သီးနှင့် လက်ဖဝါးချင်း ထိမိသွားသည့်အခိုက် ဒုကျောင်းအုပ်ချန်သည် မလှုပ်မယှက်ဘဲ ရပ်နေလျပ် လုရွှမ်ကသာ ခုနစ်လှမ်း သို့မဟုတ် ရှစ်လှမ်း ဆက်တိုက် နောက်ပြန်ဆုတ်သွားရသည်။

သန့်စင်သော စွမ်းအား၏ ထိပ်တိုက်ရင်ဆိုင်မှုတွင် လုရွှမ်သည် ယှဉ်နိုင်ခြင်း မရှိသေးပေ။

ကံကောင်းထောက်မစွာ သူ့တွင် ခိုင်မာသော အခြေခံအုတ်မြစ်ရှိပြီး ဆင်သံချပ် ရွှေကိုယ်ထည်ဖြင့် ကာကွယ်ထားနိုင်ခဲ့သည်။ သူ ရှုပ်ပွနေသော်လည်း ထိခိုက်ဒဏ်ရာရခြင်း မရှိပေ။

"ဖိရွှယ်နယ်ပယ် ပြီးပြည့်စုံခြင်း အဆင့်? မင်းဝေ့ချွမ်ကို သတ်လိုက်တာ အံ့ဩစရာ မရှိပါဘူး... မင်းကိုငါတကယ် လျှော့တွက်ခဲ့မိပုံ ရတယ်"

သူတို့နှစ်ဦး အချင်းချင်း တိုက်ခိုက်လိုက်တဲ့အခါ ဒုကျောင်းအုပ်ချန်က လုရွှမ်၏ ဖိရွှယ်နယ်ပယ် ပြီးပြည့်စုံခြင်း ခွန်အားကို မြင်သွားခဲ့သည်။

(လုရွှမ်သည် ဖိရွှယ်နယ်ပယ်၏ ပြီးပြည့်စုံသော စွမ်းအင်၂၀၀ကို ပိုင်ဆိုင်ထားသော်လည်း စွမ်းအင် ၂၁၀နှင့် သိပ်မကွာချေ)

"ဒါပေမဲ့ မင်းရဲ့အင်အားက ဘယ်လောက်ပဲရှိရှိ... မင်းဥပဒေခန်းမမှာ လူသတ်ရဲတယ်..ဝေ့ချွမ်ကိုလည်း သတ်တယ်ဆိုတော့ မင်းသေကိုသေရမယ်!"

ဒုကျောင်းအုပ်ချန်ဆီမှ ဟိန်ဟောက်သံသည် ရူးသွပ်နေသော သားရဲတစ်ကောင်လို ထွက်ပေါ်လာ၏။