ကျောင်းအုပ်ကြီးရောက်လာပြီ

"ပြင်းထန်စွမ်းအင် ကျင့်စဥ်နည်းလမ်း? အဲဒါကဘာလဲ?"

တစ်ဖက်မှ ဝူယွမ်သည် ဤနာမည်ကို တစ်ခါမျှ မကြားဖူးသေးသဖြင့် သံသယများ ပေါ်လာသည်။

"အဲဒါက...အကယ်ဒမီရဲ့ တားမြစ်ပိတ်ပင်မှု တစ်ခုပဲ! အသုံးပြုပြီးတာနဲ့ အချိန်တိုအတွင်းမှာ စွမ်းအင် နှစ်ဆတိုးလာပေမယ့်... လူတစ်ကိုယ်လုံးက အရူးတစ်ယောက်လို လူသတ်ချင်တာပဲ သိတဲ့အထိ ဖြစ်သွားလိမ့်မယ်...ဒါပေမဲ့ ကျင့်ကြံမှုက ချက်ချင်း ကျဆင်းသွားပြီး ကံမကောင်းရင် ထုံးရွှမ်နယ်ပယ်ကနေ ဖိရွှယ်နယ်ပယ်အထိ ကျဆင်းသွားနိုင်တယ်"

လျောက်ချင်းက တုန်လှုပ်စွာ ပြောသည်။

"အကယ်ဒမီမှာ... ဒီလိုနည်းလမ်း ရှိသေးတယ်လား" ဝူယွမ် အံ့အားသင့်သွားသည်။

အရူးလိုမျိုး သတ်ဖြတ်ဖို့ပဲ သိတာဆိုရင် မိစ္ဆာစိတ်ဝင်သွားတာနဲ့ မတူဘူးလား? အကယ်ဒမီမှာ ဘယ်လိုလုပ် ဒီလိုနည်းလမ်းမျိုး ရှိနေတာလဲ?

"အကယ်ဒမီကို တည်ထောင်ခဲ့တဲ့ ကျန်းဝူ ဘိုးဘေးက ဖန်တီးခဲ့တာလို့ ပြောကြတယ်.... အဲဒီအချိန်မှာ သူ ခက်ခဲတဲ့ အခြေအနေမှာ ရှိနေပုံပဲ ဒီလှည့်ကွက်ကို သုံးပြီး ကံကောင်းစွာနဲ့ လွတ်မြောက်လာခဲ့တယ်.... နောင်လာနောက်သားတွေကို မလေ့ကျင့်ဖို့ ရှင်းရှင်းလင်းလင်း အမိန့်ထုတ်ခဲ့တာ... ဒုကျောင်းအုပ်ချန်က မမျှော်လင့်ဘဲ လေ့ကျင့်ခဲ့ရုံတင်မကဘဲ ဒီမှာပါ ထုတ်သုံးလာပြီ..."

လျောက်ချင်းသည် မယုံနိုင်စွာ တံတွေး မျိုချလိုက်သည်။

"ခွန်အားက သိသိသာသာကို နှစ်ဆတိုးသွားတယ်ဆိုတော့ ဘာပြောပြော... ဒီလူငယ်ကို ချက်ချင်း သတ်ပစ်နိုင်မှာ မဟုတ်ဘူးလား?" ဝူယွမ် တုန်လှုပ်သွား၏။

ထိုလူငယ်သည် ဒုကျောင်းအုပ်ချန်၏ အကူအညီဖြင့် ကိုယ်ခံပညာ တစ်မျိုးမျိုးကို လေ့ကျင့်နေသော်လည်း သူသည် အပြင်းအထန် လှုပ်ရှားနေဆဲ။ ဆိုလိုသည်မှာ သူကိုယ်တိုင် တစ်ဖက်လူ၏ ပြိုင်ဘက်မဟုတ်သေးချေ။

ယခု ဒုကျောင်းအုပ်ချန်၏ ခွန်အားသည် နှစ်ဆတိုးလာသဖြင့် သူ့ကို သတ်ရန် လွယ်ကူသွားပြီ မဟုတ်လော။

"သူ...ထပ်ပြီး တောင့်မခံထားနိုင်တော့ဘူး..."

ဝန်မခံချင်သော်လည်း လျောက်ချင်းက ခေါင်းညိတ်လိုက်သည်။

ပြင်းထန်စွမ်းအင် တားမြစ်နည်းလမ်းကို အသုံးပြုခဲ့သော ဒုကျောင်းအုပ်ချန်၏ ခွန်အားသည် သိသိသာသာ တိုးလာပြီး သူ့ရှေ့မှ လူငယ်သည် တစ်ချက်မျှ မထိန်းနိုင်တော့ဘဲ သေသည်အထိ အရိုက်ခံရနိုင်သည်။

……………………

"ခွန်အားတိုးလာတာလား?"

အဓိက ကိုယ်ခံပညာနှစ်ခုကို တစ်ချိန်တည်းတွင် ဖြတ်ကျော်သွားသော လုရွှမ် စိတ်ကောင်းဝင်နေသည်။ တိုက်ပွဲကို အဆုံးသတ်ခါနီးတွင် ဒုကျောင်းအုပ်ချန်က သူ့အားကို အတင်းအကြပ် တိုးမြင့်ရန် လျှို့ဝှက်နည်းတစ်မျိုးကို အသုံးပြုနေပုံရကြောင်း သူတွေ့လိုက်ရသည်။

နည်းလမ်းကို မသိသော်လည်း အလားတူနည်းလမ်းများစွာကို သူတွေ့ခဲ့ရသောကြောင့် အံ့သြမသွားပေ။

"ဒီနေ့တစ်ဝက်လောက် ကစားပြီးပြီဆိုတော့ မင်းလည်းတိုက်ရတာ လုံလောက်ရောပေါ့!"

လုရွှမ်မျက်နှာ မည်းမှောင်သွားပြီး သူ၏ လက်ဖဝါးကို လှန်လိုက်ပြီး နဂါးဆင် ရွှေလက်ဝါး၏ ဒုတိယအဆင့် စွမ်းအားသည် သူ့ခန္ဓာကိုယ် ခွန်အားနှင့် ပေါင်းစပ်ကာ ထွက်လာ၏။

"သေလိုက်တော့!"

ဒုကျောင်းအုပ်ချန်သည် သူ၏ ခွန်အားကို မြှင့်တင်ရန် ပြီးဆုံးသွားခဲ့ပြီး သံလက်သီးကဲ့သို့ ကြွေးကြော်သံဖြင့် အနိုင်ယူရန် ရှေ့တက်လာသည်။

လက်သီးနှင့် လက်ဝါးတို့ ထပ်မံတိုက်မိပြန်သည်။

"သွားပြီ..."

ဒီမြင်ကွင်းကို မြင်လိုက်ရတော့ လျောက်ချင်းဟာ သူ့ရှေ့က ကောင်လေးတော့ အပိုင်းပိုင်းခွဲပြီး အသတ်ခံရလိမ့်မယ်လို့ ထင်လိုက်ချိန်မှာပဲ သူရုတ်တရက် အေးခဲသွားပြီး ဆိတ်တစ်ကောင်လို တုန်တုန်ယင်ယင် ဖြစ်သွား၏။

"ဒါ...ဒါ...မဖြစ်နိုင်ဘူး!"

ကျယ်လောင်သော အသံဖြင့် အော်ဟစ်ရန် အချိန်အတော် ကြာသွားသည်။

ကြောက်စရာ ကောင်းလိုက်တာ

မဖြစ်နိုင်ဘူးမလား?

သူ့ရှေ့တွင် ရှုံးနိမ့်သွားမည်ဟု ထင်ရသော လူငယ်သည် လုံးဝ မလှုပ်မယှက် ဖြစ်နေပြီး ပြင်းထန်သော အရူးနည်းလမ်းကို အသုံးပြုထားသည့် ဒုကျောင်းအုပ်ချန်၏ ခန္ဓာကိုယ်သည် ကြိုးပြတ်သွားသော စွန်ကဲ့သို့ နံရံဆီ ပစ်ပေါက်ခံလိုက်ရသည်။

ယခင်က ဒုကျောင်းအုပ်ချန်ကို အားပေးခဲ့ကြသည့် အခြားသော ဥပဒေတပည့်များ အားလုံး အံ့အားသင့်သွားကြသည်။

လက်ဝါးတစ်ချက်ကြောင့် လွင့်သွားတယ်....

လုံးဝမဖြစ်နိုင်တဲ့ အရာကဲ့သို့ လူတိုင်းကို အမှောင်ထဲမှာ ထားခဲ့လေသည်။

"ငါတို့ အမြင်မမှားဘူးမလား?"

"ဒါက ဘယ်လိုဖြစ်ရတာလဲ?"

"ဒုကျောင်းအုပ်ချန်က ရှုံးသွားတာလား?"

.......

ဥပဒေအဖွဲ့မှ တပည့်များစွာသည် ၎င်းတို့၏ မျက်နှာတစ်ပြင်လုံးတွင် မယုံကြည်နိုင်သည့် အမူအရာများကို ဆင်မြန်းထားကြသည်။

ဒုကျောင်းအုပ်ချန်က ဘယ်သူလဲ?

အကယ်ဒမီ တစ်ခုလုံးမှာ ထင်ရှားကျော်ကြားတဲ့ အဆင့်မြင့် သိုင်းပညာရှင်ကြီးက ကျောင်းသားတစ်ယောက်ရဲ့ လုပ်ကြံခြင်းကို ခံခဲ့ရပြီး အဲဒီကောင်လေးက အငယ်တန်းက ဖြစ်နေသေးတယ်

ဗုန်း!

လက်သီးတစ်ချက်က ဒုကျောင်းအုပ်ချန်ထံ ပြေးသွားသော်လည်း လုရွှမ် မရပ်တန့်ခဲ့ပေ။

ဒီလူယုတ်မာက သူ့ကိုသတ်ချင်နေတယ် ဆိုတာကို သူ ရှင်းရှင်းလင်းလင်း သိနေတယ် သူ့ကိုဘယ်လိုလုပ် အသက်ရှင်ခိုင်းရမှာလဲ?

ပေါင်းပင်များကို ခုတ်ထစ်သော်လည်း အမြစ်ကို မဖယ်ရှားလျှင် နွေဦးလေညင်းက တိုက်ခတ်လာပြီး ပြန်လည်ရှင်သန်လာမည်။ ဘဝနှစ်ခု၏ လူသားတစ်ဦး အနေဖြင့် ထိုသို့သော အမှားမျိုး ကျူးလွန်မိမည် မဟုတ်ပေ။

သို့သော်လည်း ဒုကျောင်းအုပ်ချန်ထံသို့ မရောက်မီတွင် အသွင်အပြင် တစ်ခုက သူ့ရှေ့ရောက်လာသည်။

"ကျေးဇူးပြုပြီး သက်ညှာပေးပါ!"

ထိုပုံကို ရှင်းရှင်းလင်းလင်း မြင်လိုက်ရတော့ လုရွှမ်သည် ဖန်းရှစ်တွင် သူ့အစေခံအဖြစ် ရပ်တည်လိုခဲ့သော ဥပဒေအဖွဲ့ခေါင်းဆောင် လျောက်ချင်း ဖြစ်သည်ကို မှတ်မိသွားသည်။

"ဖယ်စမ်း!"

လုရွှမ်၏ မျက်နှာသည် မည်းမှောင်သွား၏။

ဒီလူအိုကြီး ငါ့ကို သတ်မယ့်အချိန်က မင်းဘယ်ရောက်နေလဲ?

"သူက အကယ်ဒမီရဲ့ ဒုကျောင်းအုပ်ပါ.... မင်း သူ့ကိုသတ်လိုက်ရင် အကယ်ဒမီတစ်ခုလုံးနဲ့ ရန်သူဖြစ်သွားလိမ့်မယ်..." လျောက်ချင်းက အလျင်စလိုပြောသည်။

သို့သော် သူစကားမဆုံးမီတွင် သူ့ရှေ့မှ လူငယ်၏ မျက်ခုံးများ ကြွလာသည်ကို မြင်လိုက်ရသည်။

"အဲ့တော့ ဘာဖြစ်လဲ?"

အကယ်ဒမီတစ်ခုလုံးရဲ့ ရန်သူဖြစ်တော့ရော ဘာလုပ်ရမှာလဲ?

နတ်ဆိုးဧကရာဇ် ချုံလူကို ခေါင်းဖြတ်သတ်ပြီး ယခင်ဘဝက နတ်ဆိုးမျိုးရိုး တစ်ခုလုံး၏ ရန်သူဖြစ်ခဲ့တာပဲလေ ဘာကြောက်စရာ ရှိမှာလဲ?

ဒီနေရာကလည်း အကယ်ဒမီ သေးသေးလေးပဲ

"ဒါက……"

လူငယ်လေး၏ လျစ်လျူရှုသော မျက်လုံးများကို မြင်လိုက်ရတော့ လျောက်ချကိး တုန်လှုပ်သွားပြီး မည်သို့ဖြေရမည်ကို မသိတော့ပေ။

တခြားသူတွေက ဒီလိုပြောရင် ဟာသအဖြစ်ဖြစ်ဖြစ် ရယ်မောနိုင်ပေမယ့် ဒီလူငယ်လေးရဲ့ ရန်လိုမှုကို သူ့မျက်လုံးနဲ့ မြင်လိုက်ရတော့ ဆက်မပြောရဲတော့ချေ။

တိုက်ပွဲအတွင်း သူ့ကိုယ်သူ တိုးတက်အောင် လေ့ကျင့်ခဲ့ပြီး ဒုကျောင်းအုပ်ချန် အရူးတစ်ယောက်လို အားတိုးလာတာတောင် လက်ဝါး တစ်ချက်တည်းနဲ့ ရိုက်ချပစ်ခဲ့သူပင်။

သူသည် လူငယ်လေး တစ်ဦးဆိုပေမယ့် တစ်ဖက်လူနဲ့ အမှန်တကယ် မယှဥ်နိုင်ပေ။ အကယ်ဒမီ တစ်ခုလုံးကရော ယှဥ်နိုင်ပါ့မလား?

သူ့ရဲ့ ပြိုင်ဘက်မဟုတ်တာ သေချာပါ၏။ ရုတ်တရက် သူ့ခေါင်းထဲမှာ အတွေးတစ်ခု ပေါ်လာသည်။

အကယ်ဒမီကို မယုံတာ မဟုတ်ပေမယ့် သူ့ရှေ့က ကောင်လေးက ဒေါသကြီးလွန်းသည်။

"သက်ညှာပေးပါ...."

လျောက်ချင်း ဘယ်လိုဖြေရမှန်း မသိ စိုးရိမ်သောက ရောက်နေချိန် အသံတစ်ခု ထွက်ပေါ်လာပြီးနောက် အသွင်အပြင်တစ်ခု ပြေးဝင်လာသည်။

ဤပုံသဏ္ဍာန်ကိုမြင်လျှင် ကျောင်းသား အားလုံးသည် တကိုယ်လုံး တုန်တုန်ယင်ယင်နှင့် ခေါင်းငုံ့ထားကြသည်။

"ကျောင်းအုပ်ကြီး!"

လျောက်ချင်းလည်း ထိတ်လန့်သွားသည်။

သူ့ရှေ့မှာ ပေါ်လာတဲ့လူက ကျောင်းအုပ်ကြီး လော်ယန်ချင်းကလွဲလို့ တခြားသူ မဟုတ်ပါ။

သူဖန်းရှစ်မှ ပြန်ရောက်လာသည်နှင့် သတင်း ကြားလိုက်ရချင်း ထိတ်လန့်လွန်းသဖြင့် မရပ်မနား ပြေးလာခဲ့သည်။

"ကျောင်းအုပ်ကြီးက ဝူအဆင့်၇ အထွတ်အထိပ်ပဲ....ကျန်းဝူဧကရာဇ်ကလွဲရင် ကျန်းဝူအင်ပါယာ တစ်ခုလုံးမှာ ဘယ်သူမှ မယှဥ်နိုင်ဘူး"

"ကျောင်းအုပ်ကြီးက စည်းမျဥ်းတွေကို အလေးထားတယ်...ဒီကောင်လေးက စည်းကမ်းဖောက်ဖျက်ပြီး ဒုကျောင်းအုပ်ချန်ကိုတောင် ဒဏ်ရာရစေတယ် ဆိုတော့ အသေသတ်မှာ သေချာတယ်"

"ဟုတ်တယ် ကျောင်းအုပ်ကြီး လာပြီဆိုတော့ ဒီကောင်တော့ သေပြီပဲ!"

……

ကျောင်းအုပ်ကြီး ရောက်လာတာကို မြင်တော့ အားလုံးက ဝမ်းသာအားရဖြင့် တစ်ချိန်တည်း အံ့သြသွားကြသည်။

လူသတ်ရုံသာမက ဥပဒေအဖွဲ့ကို မျက်နှာပျက်စေသည့်အပြင် ဒုကျောင်းအုပ်ချန်ကိုလည်း ပြင်းထန်စွာ ဒဏ်ရာရစေခဲ့လို့ သူတို့အားလုံးက ကျောင်းအုပ်ကြီး လုရွှမ်ကိုသတ်ဖို့ မျှော်လင့်နေကြသည်။

"ကျောင်းအုပ်ကြီး...အဲဒီမကောင်းတဲ့ ကောင်ကို မြန်မြန် သတ်ပစ်လိုက်! ဥပဒေအဖွဲ့ထဲ ဝင်လာပြီး အကြောင်းမဲ့ လူသတ်နေတယ်....ဥပဒေကို မလိုက်နာဘူး သူ့ကိုမသတ်ရင် အကယ်ဒမီရဲ့ မျက်နှာ ဘယ်နားသွားထားတော့မလဲ??"

နံရံမှာ ကပ်နေတဲ့ ဒုကျောင်းအုပ်ချန်က လော်ယန်ချင်း လာနေတာကို မြင်တော့ ရုန်းထွက်ဖို့ ကြိုးစားရင်း ခက်ခက်ခဲခဲ အော်ဟစ်နေပြီး သူ့စကားတွေကလည်း မုန်းတီးမှုတွေ ပြည့်နှက်နေသည်။

သူက ဒီကလေးနဲ့ မယှဉ်နိုင်မှန်း သူသိပေမယ့် ကျောင်းအုပ်ကြီးသာ လှုပ်ရှားလိုက်ရင် သူ့ကို သတ်နိုင်မှာ သေချာ၏။

"ပါးစပ်ပိတ်ထား!"

အော်ဟစ်သံတွေ မဆုံးခင်မှာ လော်ယန်ချင်းက ရုတ်တရက် လှည့်ကြည့်လိုက်ပြီး ကျယ်လောင်စွာ အော်ငေါက်ပစ်သည်။

"ဘာ?"

ကျောင်းအုပ်ကြီးက ဒီလူငယ်ကို တိုက်ရိုက် တိုက်ခိုက်မယ်လို့ တွေးထားပေမယ့် ဒုကျောင်းအုပ်ချန်ကို ကြိမ်းမောင်းမယ်လို့ တစ်ခါမှ အိပ်မက်မမက်ခဲ့ကြ။ ဒါကြောင့် သူတို့အားလုံး အံ့အားသင့်သွားခဲ့သည်။

"လုရွှမ် အဆင်ပြေလား? မင်း ဒဏ်ရာရသွားသေးလား?"

ဒုကျောင်းအုပ်ချန်ကို ကြိမ်းမောင်းပြီးသောအခါ လော်ယန်ချင်းသည် သူ့မျက်နှာပေါ်တွင် အပြုံးတစ်ခုနှင့် မေးလိုက်သည်။ သူ့အမူအယာကို လေးစားမှု အရိပ်အယောင်ဖြင့် သူ့ရှေ့မှ လူငယ်ကို အလျင်အမြန် ကြည့်လိုက်သည်။