သွေးချေဖျက်အရိုးငြိမ်း

"သခင်လေး...."

သူရှေ့မရောက်ခင်မှာ မုယန်ဖုန်းက သူ့မျက်နှာမှာ စိတ်လှုပ်ရှားနေတဲ့ အမူအရာနဲ့ ဦးညွှတ်ပြနေတာကို တွေ့လိုက်ရပြီး သူ့ရဲ့ ဝိညာဥ်စွမ်းအင်က ကျယ်ပြောလှပြီး လူကို တစ်ချက်ကြည့်လိုက်ရုံနဲ့ သိမြင်နိုင်သည်။

"ဂိုဏ်းဆရာနယ်ပယ်! အောင်မြင်သွားပြီလား?"

လုရွှမ်၏ မျက်နှာ ကြည်လင်သွားသည်။

ဂိုဏ်းဆရာနယ်ပယ်ကို တိုက်ရိုက် ထိုးဖောက်နိုင်ဖို့ဆိုတာ ၁၀ယောက်မှာ ၁ယောက်ပင် မရှိသလို အတုတံဆိပ်နယ်ပယ် အထွတ်အထိပ် အဆင့်ကို ရောက်နိုင်သူကလည်း ဆယ်ယောက်မှာ တစ်ယောက်က အများဆုံးဖြစ်သည်။

ဒီလိုဖြစ်နိုင်ခြေ နည်းတဲ့အတွက် အစတုန်းကတော့ မမျှော်လင့်ထားပေမယ့် အဆုံးမှာတော့ မုယန်ဖုန်းဟာ ခံနိုင်ရည်ရှိနေခဲ့သည်။

"သခင်လေးရဲ့ ကြင်နာမှုအတွက် ကျေးဇူးတင်ပါတယ်...သခင်လေးသာ မရှိရင် ဒီနေ့ မုယန်ဖုန်းဆိုတာလည်း မရှိနိုင်တော့ပါဘူး!"

သူ့ခန္ဓာကိုယ်ထဲက စွမ်းအားတွေကို ခံစားလိုက်ရတော့ မုယန်ဖုန်းရဲ့ မျက်နှာဟာ စိတ်လှုပ်ရှားပြီး နီရဲသွားခဲ့သည်။ ဂိုဏ်းဆရာနယ်ပယ်ဆိုတာ သူ ငယ်ငယ်တုန်းက မရေမတွက်နိုင်တဲ့ အကြိမ်ပေါင်းများစွာ စောင့်မျှော်ခဲ့ရတဲ့ နယ်ပယ်ဖြစ်ပေမယ့် ရောက်ခါနီး အချိန်မှာတော့ ဒဏ်ရာအပြင်းအထန် ရသွားပြီး လဲကျသွားခဲ့သည်။

ချိုင့်အောက်ခြေမှာ သူ့ဘဝအတွက် မျှော်လင့်ချက် မရှိတော့ဘူးလို့ ထင်ခဲ့လေ၏။

ဒီလိုကြင်နာမှုမျိုးကို တစ်သက်မှာ ဘယ်တော့မှ ပြန်မဆပ်လို့ မကုန်နိုင်တော့ပါ။

"ဒါက ခန္ဓာကိုယ်ပေါ်က ရောင်ဝါကို အပြည့်အ၀ ဖုံးကွယ်ပေးနိုင်တဲ့ ကျင့်ရှီးဆေးပဲ.... ပုံမှန်ဆိုရင် အတုတံဆိပ်နယ်ပယ်ရဲ့ အစွမ်းသတ္တိကို အပြည့်အဝ ကာကွယ်ထားနိုင်တယ်.... ဒါက လူတွေကို သတိလစ်မေ့မြောမှုကို ဖြစ်စေပြီး သေစေနိုင်မယ့် ထိုးနှက်ချက်တစ်ခုလည်း ဖြစ်လာစေလိမ့်မယ်!"

လုရွှမ်က ဆေးလုံးတစ်လုံးကို ထုတ်ယူပြီး ပေးလိုက်သည်။

ကျင်းကျန့်ဝမ်းကိုယ်ပေါ်က ရထားတဲ့ ကျင့်ရှီးမြက်နဲ့ တခြားဆေးပင်တွေကို ပေါင်းစပ်ပြီး ဒီရက်ပိုင်းထဲ သန့်စင်ထားတာ စုစုပေါင်း ဆေးလုံး၃လုံး ရှိလေသည်။

"ဟုတ်ကဲ့ပါ သခင်လေး"

ကျင့်ရှီးဆေးက ဘာလဲဆိုတာ မသိပေမယ့် သူ့ခန္ဓာကိုယ်ပေါ်က ရောင်ဝါကို အပြည့်အ၀ ဖုံးကွယ်ထားနိုင်တယ်လို့ ကြားတော့ မုယန်ဖုန်းရဲ့ မျက်လုံးတွေ တောက်ပလာပြီး အမြန်ယူလိုက်ပြီး မျိုချလိုက်သည်။

သူသည် လောကတစ်ခွင် လေ့ကျင့်ခဲ့ပြီး သူ၏ ကျင့်ကြံမှုအဆင့်ကို ဖုံးကွယ်ခြင်း၏ အရေးပါပုံကို သိခဲ့သည်။

အဂ္ဂိရတ်ဆေးကို မျိုချရင်း မုယန်ဖုန်းသည် ယခင်က မငြိမ်မသက် ဖြစ်နေသော အငွေ့အသက်ကို အလွယ်တကူ မျိုသိပ်ထားနိုင်သည်ဟု ခံစားမိသည်။ အပြင်လူများ၏ အမြင်အရ သူသည် အတုတံဆိပ်နယ်ပယ် ပြီးပြည့်စုံခြင်း အဆင့်သာ ရှိပေမည်။

ဒီလို အပြောင်းအလဲကို ခံစားလိုက်ရတော့ သူ့ရှေ့က ကောင်လေးကို ပိုလို့တောင် သဘောကျသွား၏။

အဂ္ဂိတ်ရတ်ဆိုသည်မှာ ဤကဲ့သို့သော ကောင်းကင်ဘုံကို အန်တုနိုင်သော အရာဖြစ်သည်။ ဝိညာဥ်စွမ်းအင်ကို အပြည့်အဝ ဖုံးအုပ်ထားနိုင်သည်။

သူ ငယ်စဥ်က အင်ပါယာမြို့များစွာကို သွားခဲ့ဖူးပြီး ၎င်းကို တစ်ခါမှ မကြားခဲ့ဖူးပါ။ ဤအချက်ကို အခြေခံ၍ ကောင်လေး၏ နောက်ခံသည် ဝေးကွာလှသော အင်ပါယာမှ ဖြစ်နိုင်သည်။

အနည်းဆုံးတော့ အဲဒီနိုင်ငံတွေကို သူဖြတ်လျှောက်သွားခဲ့ဖူး၏။

"ငါ လေ့ကျင့်လိုက်ဦးမယ်.... မင်းရဲ့စွမ်းအားကို အားကောင်းအောင်လုပ်ရင်း တစ်လတ်စတည်း ငါ့ကို ကာကွယ်ဖို့ ကူညီပေးပါ!"

တစ်ဖက်လူက ဘာတွေတွေးနေမှန်း မသိဘဲ လုရွှမ်က သူ့လက်တွေကို ဝှေ့ယမ်းပြီး ကျောက်ဆောင်ကြီးရဲ့ အနောက်မှာ ထိုင်လိုက်သည်။

ခဏကြာတော့ အဝတ်တွေကို အကုန်ချွတ်ပစ်လိုက်သည်။

[သွေးချေဖျက်အရိုးငြိမ်း နည်းလမ်း]ကို လေ့ကျင့်ခြင်းသည် ခန္ဓာကိုယ် တစ်ခုလုံးကို သားရဲ၏သွေးများဖြင့် လိမ်းကျံရန် လိုအပ်ပြီး အထူး အစီအရင်စာလုံးများ ရေးဆွဲရမည် ဖြစ်သည်။

ရွှေသံချပ် မီးဝံပုလွေထံမှ ရသောသွေးကို ယူကာ သူလိုအပ်သမျှ အရာအားလုံးကို ပြင်ဆင်ပြီးသည်နှင့် သူ့အဝတ်ကို ချွတ်လိုက်ကာ လက်ကောက်ဝတ်က စလို့ တစ်ကိုယ်လုံးကို ပွတ်လိမ်းပစ်သည်။

ဟူး ဟူး!

ခဏကြာတော့ သူ့တစ်ကိုယ်လုံး နီရဲတောက်လာပြီး သွေးသားရဲရဲကြီး ဖြစ်နေကာ အလွန်ကြောက်စရာကောင်းသည့် ပုံပေါက်သွားသည်။

လုရွှမ်သည် ရုပ်ဆင်းသဏ္ဍာန် မည်သို့ပင်ရှိစေကာမူ ဂရုမစိုက်။ ကြမ်းပြင်ပေါ်တွင် ငြိမ်သက်သာ တင်ပျဉ်ခွေထိုင်လျက် သွေးတွင်းရှိ စွမ်းအားများကို စုပ်ယူရန်အတွက် သူ့ခန္ဓာကိုယ်အနှံ့ရှိ အာရုံခံအာရုံများကို စုစည်းလိုက်သည်။

အပ်စိုက်သည့် အမှတ်နေရာများ တစ်လျှောက် ခန္ဓာကိုယ်တွင်းသို့ ပူလောင်သော ခံစားမှု ဝင်ရောက်လာသည်။

"ဘယ်လောက်တောင် အစွမ်းထက်လိုက်တဲ့ တက်ကြွမှုလဲ!"

လုရွှမ်၏ မျက်လုံးများ တောက်ပလာသည်။

မီးဝံပုလွေ သွေးထဲက စွမ်းအားက မရိုးရှင်းပါ။ ပိုဆိုးတာက သက်ရောက်မှုက ဒီလောက်ကောင်းမယ်လို့ တစ်ခါမှ မတွေးခဲ့ဖူးခြင်းပင်။

သွေးထဲတွင် ပြင်းထန်သော အသက်စွမ်းအင် လှုပ်ရှားမှုသည် ခန္ဓာကိုယ်ထဲသို့ စုပ်ယူသွားပြီး ကြွက်သားများ၊ အရွတ်များနှင့် အတွင်းအင်္ဂါများကို အဆက်မပြတ် ဖိအားပေးကာ သူ၏ ကြံ့ခိုင်မှုကို စဉ်ဆက်မပြတ် တိုးတက်လာစေသည်။

အချိန်တစ်ခု ကြာသွားပြီးနောက် လုံးလုံး စုပ်ယူပြီးသွားသကဲ့သို့ သွေးများခြောက်သွားကာ လှုပ်ရှားမှုများလည်း လျော့နည်းသွားသည်။

လုရွှမ်သည် ကျောက်စိမ်းပြားထဲ ဖွက်ထားသော သွေးများကို တစ်ဖန်ပြန်ယူကာ သူ့တစ်ကိုယ်လုံးကို လိမ်းကျံလိုက်သည်။

အကြိမ်ပေါင်းများစွာ အပြန်ပြန် အလှန်လှန် လိမ်းကျံပြီးနောက်တွင် မီးဝံပုလွေ၏ ခန္ဓာကိုယ်မှ စုဆောင်းထားသော သွေးများသည် နောက်ဆုံးမှာ ကုန်ဆုံးသွားခဲ့သည်။

သို့သော် ယခုအချိန်တွင် သူ၏ အရေပြားနှင့် ကြွက်သားများ၊ အရိုးများသည် တုန်ခါနေ၏။

ဝုန်း ဝုန်း ဝုန်း

ခန္ဓာကိုယ် တုန်သွားသည်နှင့် တစ်ပြိုင်နက် ခန္ဓာကိုယ် အပြင်ဘက်ရှိ သွေးများသည် အစိုင်အခဲများ အဖြစ် ကြွေကျလာပြီး အတွင်းပိုင်း ဖြူဝင်းသော အသားအရည်ကို ပေါ်လွင်လညစေသည်။

အရေပြားနဲ့ အရိုးတွေ ပိုသန်မာလာပေမယ့် သွေးကြောင့် ညိုမည်းမသွားဘဲ အဲဒီအစား မြွေဟာ အရေခွံခွာသလိုမျိုး ပိုဖြူပြီး နူးညံ့ကာ အပြစ်အနာအဆာ ကင်းသွားသည်။

ဤအခိုက်အတန့်တွင် သူ၏ခန္ဓာကိုယ်ရှိ သွေးများသည် လုံးဝ စုပ်ယူလို့ပြီးသွားပြီး စေးပျစ်သော သွေးခဲများအဖြစ်သို့ ပြောင်းလဲသွားခဲ့သည်။ သူ့ခန္ဓာကိုယ် တုန်ခါသွားကာ မြေပြင်ပေါ်သို့ ကြွေကျသွားစဥ် အတွင်းဘက်၌ ပြီးပြည့်စုံသော ခန္ဓာကိုယ်ကို ထုတ်ဖော်ပြသလိုက်သည်။

လုရွှမ် မတိုင်ခင် ပြန်လည်မွေးဖွားခဲ့စဉ်က သူ့ခန္ဓာကိုယ်သည် ပိန်လှီပြီး အာဟာရချို့တဲ့သည်ဟု ဆိုရသော်လည်း ယခုတွင် အပေါ်မှအောက်ခြေအထိ ပြီးပြည့်စုံသွားကာ ကြွက်သားများ မကြီးမားသော်လည်း အံ့သြဖွယ်အစွမ်းသတ္တိကို ဖော်ပြထားသည်။

သန့်ရှင်းတဲ့ အဝတ်အစား တစ်ထည်ကို ထုတ်ပြီး ပြောင်းဝတ်လိုက်သလိုပင်။

လုရွှမ်၏လက်များ တုန်ခါသွားပြီး မျက်လုံးများ တောက်ပလာသည်။

လက်ငါးချောင်းကို ဖြန့်ပြီး သူ့ရှေ့က ကျောက်တုံးပေါ်ကို ညင်သာစွာ ပစ်သွင်းလိုက်၏။

ဝုန်း!

အင်အား များများစားစား မသုံးထားဘဲ အနီရောင် ပူနေသောသံသည် အထည်ပေါ် ကျရောက်သွားသကဲ့သို့ ကျောက်တုံးကြီးပေါ်တွင် ကြီးမားသော လက်ဖဝါးပုံ တစ်ခုပေါ်လာသည်။

"အကျိုးသက်ရောက်မှုက မျှော်လင့်ထားတာထက် ပိုကောင်းတယ်.... ဆင်သံချပ် ရွှေကိုယ်ထည်က ပြီးပြည့်စုံတဲ့ ဒုတိယအဆင့်ကို ရောက်နေပါပြီ။ ရုပ်ခန္ဓာရဲ့ ကြံ့ခိုင်မှုလည်း ဆယ်ဆတိုးလာပြီ!"

သူ့လက်ဖဝါးကို ဖယ်လိုက်ပြီး သူ့လက်ဝါးကို ကြည့်ရင်း လုရွှမ်သည် ပျော်ရွှင်မှု အပြည့်နှင့်။

[သွေးချေဖျက်အရိုးငြိမ်း နည်းလမ်း]ရဲ့ အကျိုးသက်ရောက်မှုက ယခင်မှန်းဆထားတာထက် အများကြီး ပိုကောင်းနေသည်။ ဆင်သံချပ် ရွှေကိုယ်ထည်ရဲ့ ဒုတိယအဆင့်ဟာ ကြီးကျယ်ခမ်းနားတဲ့ အောင်မြင်မှုတွေ ရနိုင်မယ်လို့ ထင်ခဲ့ပေမယ့် ပြီးပြည့်စုံတဲ့အဆင့်ကို တိုက်ရိုက်တက်လှမ်းဖို့ မမျှော်လင့်ထားခဲ့ချေ။

ပြီးပြည့်စုံသော ဒုတိယအဆင့်၏ ဆင်သံချပ် ရွှေကိုယ်ထည်သည် သာမန်အဆင့်၏ မှော်လက်နက်တစ်ခုနှင့် ယှဉ်နိုင်နေပြီ ဖြစ်သည်။

တစ်နည်းအားဖြင့် ဆိုရသော် ယခုအချိန်တွင် သူသည် လူသားဆန်သော လက်နက်တစ်ခုဟု ဆိုနိုင်သည်။ သူ၏ ခုခံကာကွယ်မှုသည် ယခင်ရွှေသံချပ် မီးဝံပုလွေထက် ပိုမိုအားကောင်းပြီး ၎င်းတို့ကို ထိရုံမျှဖြင့် အတုတံဆိပ်နယ်ပယ် ပြီးပြည့်စုံသော အဆင့်က လူအချို့ကို သတ်နိုင်သည်။

"ငါ့ရဲ့အရင်က ကြံ့ခိုင်မှုခွန်အားက ၅၀၀...အခု၁၀ဆ တိုးလာပြီဆိုတော့ ခန္ဓာကိုယ်အတွင်းပိုင်းက ခွန်အားက ၅၀၀၀ ရှိနေပြီပေါ့!"

သူစိတ်ထဲတွင် လက်ရှိ ခွန်အားကို တိတ်တဆိတ် ကောက်ချက်ချနေသည်။

"စစ်မှန်တဲ့ ဝိညာဥ်စွမ်းအင် ၄၀၀၀ကို ပေါင်းထည့်လိုက်ရင် အနီးကပ် တိုက်ပွဲမှာဆို ၉၀၀၀လောက် သုံးနိုင်ပြီ....ဂိုဏ်းဆရာနယ်ပယ်ရဲ့ စွမ်းအား၁၀၀၀၀နဲ့ အရမ်းနီးနေပြီ.... တိုက်ခိုက်ရေး အတွေ့အကြုံနဲ့ သေချာ ပြင်ဆင်ထားရင် ဂိုဏ်းဆရာနယ်ပယ်ရဲ့အစောပိုင်းအဆင့်မှာ အားကောင်းတဲ့ သူတွေကို တစ်ချက်တည်းနဲ့ ထိုးသတ်နိုင်လိမ့်မယ်!"

ဂိုဏ်းဆရာနယ်ပယ်၏ အစောပိုင်းကာလတွင် သန်မာသော လူသည် စွမ်းအား တစ်သောင်းသာရှိသော်လည်း ယခုအခါ သူ့တွင် စုစုပေါင်း စွမ်းအား၉၀၀၀ ရှိနေသည်။

သူသည် ဂိုဏ်းဆရာနယ်ပယ်လောက် မတော်သေးသော်လည်း လက်ရှိအင်အားဖြင့် ယခင်က ရွှေသံချပ် မီးဝံပုလွေနှင့် တိုက်ခိုက်ပါက ပြိုင်ဘက်သည် တစ်ချက်မျှပင် ခံနိုင်ရည်မရှိတော့ဘဲ ပွဲချင်းပြီး အရိုက်ခံရမည်ကို သိထားရလိမ့်မည်။

ဆက်တိုက် ထိုးနှက်မှုတွေ အများကြီး လုပ်ပြီးရင် ခွန်အားတွေ ကုန်ခမ်းသွားစရာပင် မလိုချေ။

"ဒီလေ့ကျင့်မှုက သုံးရက်လောက် ကြာသွားမယ်လို့ မမျှော်လင့်ထားဘူး....ဟွာချောင်နဲ့ တခြားသူတွေ စောင့်နေကြတာ စိတ်မရှည်ကြတော့ဘူး ထင်တယ်!"

သူ့ခန္ဓာကိုယ်မှာ အပြောင်းအလဲတွေကို ခံစားပြီးနောက် လုရွှမ်ဟာ ကျောက်ဆောင်နောက်ကနေ ထွက်လာခဲ့၏။

မီးဝံပုလွေရဲ့ သွေးနဲ့လေ့ကျင့်လိုက်တာ သုံးရက်နဲ့ သုံးည ကြာမြင့်သွားသည်။ ဟွာချောင်နဲ့ တခြားသူတွေကို တစ်ရက်စောင့်ဖို့ ပြောခဲ့ပေမယ့် ရလဒ်က သုံးဆတိုးသွား၏။ တကယ်ကို ရှက်စရာကောင်းပေသည်။

"သခင်ငယ်လေး!"

သူထွက်လာတာကို မြင်တော့ မုယန်ဖုန်းက သက်ပြင်းတစ်ချက်ချပြီး ပြုံးလိုက်သည်။

သုံးရက်အတွင်း လုရွှမ်၏ ကျင့်ကြံမှုသည် တိုးလာရုံ သာမက ဂိုဏ်းဆရာနယ်ပယ်၏ အစောပိုင်းအဆင့်တွင် သူ၏ခွန်အားကိုလည်း အပြည့်အဝ စုစည်းကာ တိုက်ခိုက်ရေး စွမ်းရည်လည်း သိသိသာသာ တိုးတက်လာခဲ့သည်။