သင်းခွေချပ်မြေနဂါး

"ကြားပြီးပြီလား? စီနီယာပိုင်ရှောင်း သေသွားပြီတဲ့"

"ဘာ? အပြင်ခန်းက အဆင့်၃ စီနီယာပိုင်ရှောင်းကို ပြောတာလား? သူက အရမ်းအစွမ်းထက်ပြီး သားရဲထိန်းသူမလား? ဘယ်လိုလုပ် ဖြစ်နိုင်မှာလဲ"

"လုရွှမ်လို့ ခေါ်တဲ့ လူသစ်က သူ့ကို သတ်လိုက်ပုံရတယ်!"

"သူက လူသစ်တစ်ယောက် အနေနဲ့ စီနီယာပိုင်ရှောင်းကို သတ်ပစ်နိုင်တယ်? တကယ်ကြီးလား?"

"ဟုတ်တယ်... သူက ပြိုင်ဘက်မှ မဟုတ်တာ... သေမျိုးအသွင်ပြောင်းခြင်း နယ်ပယ်က အမျိုးသမီးနဲ့ ပူးပေါင်းခဲ့တာလို့ ကြားတယ်... အဲဒါကို လုပ်ခဲ့တဲ့ အမျိုးသမီးပဲ"

"မိန်းကလေးလား? အပြင်လူတွေက အကယ်ဒမီက ကျောင်းသားတွေကို သတ်နေတာလား?"

"ဟုတ်တယ်... သူ့မှာ အရည်အချင်း မရှိဘူးလို့ ငါကြားတယ်.... ဒါပေမဲ့ သူက မိန်းမတွေကို ဆွဲဆောင်တာ အရမ်းကောင်းတယ်။ ဒီနှစ်ရောက်လာတဲ့ အလှမယ်တွေ ဘယ်လောက်ရှိတယ်ဆိုတာ အားလုံးသိကြမှာ သေချာပါတယ်... လော့ရုံနဲ့ လင်ရှောင်းရှောင်းတို့လို နတ်ဘုရားမတွေက သူနဲ့ နေထိုင်နေပြီလို့တောင် ကြားတယ်...."

"ဟင့်! မိန်းမတွေကို အားကိုးတဲ့ လူဆိုးကောင်... ဘာမှ အဖြစ်မရှိဘူး.... နောက်တစ်ကြိမ်တွေ့ရင် သူ့ခေါင်းကို ဖြတ်ပစ်လိုက်မယ်"

ပိုင်ရှောင်း၏ သေဆုံးမှုက ယင်းယန်အကယ်ဒမီ တစ်ခုလုံးကို လေပွေတစ်ခုလို သုတ်သင်ပစ်လိုက်သည်။

ယင်းယန်အကယ်ဒမီသည် ကိုယ်ပိုင်စွမ်းရည်၊ ကြံ့ခိုင်သန်မာမှုနှင့် ကျောင်းသားများ၏ လေးစားမှုကို ခံရသည်။ လုရွှမ်ကဲ့သို့ပင် အတန်းဖော်များကို သတ်ရန် ပြင်ပလူများကို အားကိုးခြင်းက လူတိုင်းကို ဒေါသထွက်စေခဲ့သည်။

ကျောင်းသားတိုင်းသည် လုရွှမ်၏အမည်ကို ကြားလိုက်သောအခါတွင် သူတို့၏ မျက်နှာများသည် ရုပ်ဆိုးသွားကာ သင်ခန်းစာကောင်းတစ်ခုကို သင်ကြားနိုင်စေရန် ဆန္ဒရှိလာကြသည်။

သူဒီလိုပြောပေမယ့် လုရွှမ်က အကယ်ဒမီကို ရောက်တာနဲ့ သူဟာ ဝမ့်ထျန်းနန်းဆောင်ထဲကို အတင်းဝင်ရောက်ပြီး လူရှေ့သူရှေ့မှာ ဟွမ်ချောင်ကို ရိုက်လိုက်တာကို လူတော်တော်များများ သိကြပါ၏။

ဒီလိုမျိုး ခွန်အားတွေကို တွန်းလှန်နိုင်တဲ့ သူတွေလည်း မရှိပါဘူး။

"စီနီယာပိုင်ရှောင်း သေသွားပါပြီ!"

အကယ်ဒမီရဲ့ အပြင်ဘက်ရှိ ရောင်ဝါတွေနဲ့ ပြည့်နေတဲ့ ဝင်းထဲမှာ ကျောင်းသားတစ်ယောက်က လူငယ်တစ်ယောက်ရှေ့မှာ ဦးညွှတ်နေသည်။

"ငါသိပြီးသားပါ!" လူငယ်က အနည်းငယ်ပြုံးပြီး

"လူသစ်တစ်ယောက်က ပြင်ပအခန်းက အဆင့်၃က လူကို တိုက်ရိုက်သတ်ဝံ့တယ် ဆိုတော့ သူက တကယ်ကို သတ္တိရှိတာပဲ!"

"မိန်းမတွေကို အားကိုးနေတဲ့ အမှိုက်ကောင် !”

ကျောင်းသားက သူတို့မျက်လုံးတွေကို အထင်အမြင် သေးစွာဖြင့် ကြည့်ကာ ဟစ်အော်လိုက်သည်။

"မင်းအဲ့လိုပြောလို့ မရဘူး... တိုက်ခိုက်ရဲတယ် ဆိုတော့ သူ့မှာ ယုံကြည်မှု အပြည့်ရှိတယ်လို့ ဆိုလိုတာပဲ... ဒါ့ပြင် ဟွမ်ချောင်ကို တစ်ကြိမ်တည်းနဲ့ အနိုင်ယူလိုက်တဲ့အတွက် သူ့မှာ ခွန်အားတစ်ခုတော့ ရှိရမယ်"

လူငယ်က ပြောလိုက်သည်။

"နည်းနည်းလောက် ရှိတာကို ဘာလုပ်ရမှာလဲ? သခင်လေးချန် နဲ့ ယှဉ်လိုက်ရင် ပုရွက်ဆိတ်တွေလိုပဲ အဲဒါက ပြောဖို့တောင် မထိုက်တန်ဘူး"

ကျောင်းသားကလည်း ပြောသည်။

"ဟားဟားဟား!"

လူငယ်က ရယ်မောလိုက်ပြီး သူ့မျက်လုံးတွေကို ယုံကြည်မှုရှိတဲ့ အလင်းရောင်နဲ့ ကြည့်လိုက်သည်။

"ငါ့နဲ့ ယှဉ်ရင်... သေချာပေါက် မနှိုင်းယှဥ်နိုင်ဘူးပေါ့ ဒါပေမဲ့ အရမ်းရဲရင့်တဲ့ ဒီကလေးကို ငါ နည်းနည်းတော့ စိတ်ဝင်စားတယ်... ဒီကို လာခဲ့.. လူသစ်တွေ့ပွဲကို ငါသွားမယ်...ငါ့မှာ အဲ့လိုလူမျိုး တစ်ယောက် ရှိလာရင် လုံယိဖျင်တို့ မာနကြီးနိုင်ဦးမလား ကြည့်လိုက်ကြရအောင်!"

"ဟုတ်!" ကျောင်းသားက ခေါင်းညိတ်သည်။

ဤလူငယ်သည် တတိယအဆင့်ရှိ ပိုင်ရှောင်းကိုပင် မထီမဲ့မြင် ပြုနိုင်သောကြောင့် သူသည် သဘာဝအတိုင်း သန်မာနိုင်သည်။ ကျန်းရှောက်ချန်ဆိုသည်မှာ ယင်းယန်အကယ်ဒမီ အပြင်ခနိးတွင် ဒုတိယအဆင့် ရရှိသူဖြစ်သည်။

တစ်ချိန်တည်းမှာပင် ကြီးမားသော ရေတံခွန်ကြီး တစ်ခုရှေ့တွင်။

ဗုန်း ဗုန်းဗုန်း!

ရေတံခွန်သည် တည့်တည့် စီးဆင်းသွားပြီး ကြီးမားသော အင်အားသည် ပြင်းထန်သော ထိုးနှက်ချက် တစ်ခုလိုပင် ပျံ့ကျဲသွားသည်။ လူအများသည် ၎င်းတို့ထံ လျှောက်လှမ်းရာတွင် ခြေထောက်များ အားနည်းသွားနိုင်ပြီး အဝေးက လှိုင်းထန်နေသော ရေများကို မြင်ရလျှင်ပင် ခုခံရန် ခွန်အားမရှိသလို ခံစားရလိမ့်မည်။

ထိုအချိန်တွင် သန်မာသော အသွင်ရှိသည့် ၀တ်ရုံဖြင့် လူငယ်သည် ခေါင်းကို မြင့်တင်ကာ ရေတံခွန်အောက်တွင် ရပ်နေပြီး ခြေဖဝါးများ အမြစ်တွယ်နေပြီး မလှုပ်မယှက် ဖြစ်နေသကဲ့သို့ ကျောက်တုံးပေါ်တွင် မတ်တတ်ရပ်နေသည်။

ဝုန်း!

အချိန်မည်မျှ ကြာသည်မသိ မျက်လုံးများ ရုတ်တရက် ပွင့်လာပြီး ကျယ်လောင်သော ပေါက်ကွဲသံနှင့်အတူ လက်နှစ်ဖက်ကို မြှောက်ကာ အပေါ်သို့ ပင့်ရိုက်လိုက်သည်။

ဗုန်း!

ရေတံခွန်သည် ချက်ချင်းပင် လေဟာနယ် ဧရိယာတစ်ခုအဖြစ် လမ်းကြောင်း အားလုံးကို ဖြန်းခနဲ ကွဲဖြာသွားသည်။

ဟူ!

လူငယ်လေးသည် လှုပ်ရှားလိုက်သည်နှင့် သူ့တစ်ကိုယ်လုံးသည် နဂါးတစ်ကောင်လို ရေစီးကြောင်းထဲ ကူးခတ်သွားပြီး မျက်စိတစ်မှိတ်အတွင်း ခုနစ်မီတာ သို့မဟုတ် ရှစ်မီတာသို့ ခုန်ဆင်းသွားသည်။

ဤအချိန်တွင် လေဟာနယ် ဧရိယာတွင် ရေများ တစ်ဖန် ပြည့်နေသော်လည်း ကြောက်ရွံ့မှုမရှိဘဲ အထက်သို့ ဆက်လက် ထိုးတက်နေသည်။

ရေတံခွန်၏ ပြင်းထန်သော ဖိအားသည် သူ့အပေါ် မည်သို့မျှ သက်ရောက်မှု ရှိပုံမပေါ်ဘဲ သူသည် အလွှာကိုးပါးကို ဖြတ်ကျော်ကာ ကောင်းကင်သို့ အချိန်မရွေး သွားနိုင်သကဲ့သို့ သူ၏ ဝိညာဥ်စွမ်းအင်သည် ပိုမိုအားကောင်းလာသည်။

အုန်း!

ရေတံခွန်အထက်မှာ လူငယ်က တည်ငြိမ်တဲ့ အမူအရာနဲ့ ဂုဏ်ယူစွာ ရပ်နေခဲ့သည်။

"သခင်လေးလုံ!"

ကျောင်းသားတစ်ယောက် ရောက်လာပြီး လူငယ်လေးရဲ့ ခန္ဓာကိုယ်ကို ခြောက်အောင်လုပ်ဖို့ မျက်နှာသုတ်ပုဝါ တစ်ထည်ကို ပေးလိုက်သည်။

သူပြောနေသော သခင်လေးလုံသည် ယင်းယန်အကယ်ဒမီ၏ ပြင်ပအခန်းတွင် နံပါတ်တစ်ပုဂ္ဂိုလ် ဖြစ်သော လုံယိဖျင်ပင် ဖြစ်သည်။

"ဘာမှလုပ်စရာ မရှိရင် ငါ့ကျင့်ကြံမှုကို မနှောင့်ယှက်နဲ့လို့ မပြောထားဘူးလား?"

"ဒါက အကယ်ဒမီကျောင်းကို ရောက်လာတဲ့ ကျောင်းသားအသစ်ပါ” ဟု ကျောင်းသားက အမြန်ရှင်းပြသည်။

"ဒါက ကျောင်းသားပဲလေ မင်းငါ့ကို သတင်းပို့စရာ လိုလို့လား" လုံယိဖျင်က မျက်ခုံးပင့်လိုက်သည်။

"သူပိုင်ရှောင်းကို သတ်လိုက်တယ်!"

ကျောင်းသားက ခဏ တုံ့ဆိုင်းသွားပြီးမှ ပြောလိုက်၏။

"ပိုင်ရှောင်းကို သတ်လိုက်တာလား?" လုံယိဖျင်က သူ့မျက်နှာကို လှည့်လိုက်ပြီး

"အသေးစိတ်ပြောပြ!"

"ဒီလိုပါ....."

ကျောင်းသားက ဇာတ်လမ်းကို အမြန်ပြောပြပြီး လုရွှမ်က ဟွမ်ချောင်ကို အကြိမ်တစ်ရာ ပါးရိုက်ခဲ့တဲ့ အကြောင်းကိုလည်း ပြောပြလိုက်သည်။

"စိတ်ဝင်စားစရာပဲ!"

ရှင်းပြချက်ကို နားထောင်ပြီးနောက် လုံယိဖျင်က အနည်းငယ် ပြုံးကာ မျက်လုံးများထဲ အလင်းတစ်ချက် ဖြတ်ပြေးသွားသည်။

"အဲဒီကောင်လေးကို ခေါ်လာခဲ့... ငါတို့နဲ့ အတူတူ ပူးပေါင်းဖို့ ပြောလိုက်... မရရင်တော့ တစ်ခါတည်း ဖျက်ဆီးလိုက်!"

"ဟုတ်ကဲ့!" ကျောင်းသားက မြန်မြန် ခေါင်းညိတ်လိုက်သည်။

ပိုင်ရှောင်းကို သတ်လိုက်ခြင်းဟာ အကယ်ဒမီရဲ့ အပြင်ခန်းမှာ ပထမနဲ့ ဒုတိယနေရာကို စွဲဆောင်နေမိပြီဆိုတာ လုရွှမ် မသိခဲ့ပါဘူး။ သိလည်း ဂရုစိုက်နေမယ့် လူတော့ မဟုတ်ချေ။

ယခုအချိန်တွင် သူသည် ကောင်းကင်အူသံကျားကို လွှတ်ပေးလိုက်ပြီး ဝမ့်ထျန်းနန်းဆောင်သို့ ပြန်လာခဲ့သည်။

ကောင်းကင်အူသံကျားသည် သေမျိုးအသွင်ပြောင်းခြင်းနယ်ပယ် တွင်ရှန ဝိညာဉ်သားရဲတစ်ကောင် ဖြစ်သော်လည်း အခြားသူအား ကတိပေးထားသောကြောင့် ၎င်း၏ကတိကို ဖောက်ဖျက်မည် မဟုတ်ပေ။

"လျောက်ချင်း.... မုယန်ဖုန်း ငါတံခါးပိတ် လေ့ကျင့်မယ် ဘာမှလုပ်စရာမရှိရင် ငါ့ကို မနှောင့်ယှက်စေနဲ့!"

နေအိမ်သို့ ပြန်ရောက်သောအခါ လုရွှမ်သည် ဘာမှမေးရန် စိတ်မ၀င်စားဘဲ တိုက်ရိုက်ပဲ အမိန့်ထုတ်လိုက်သည်။

"ဟုတ်ကဲ့!"

အခန်းထဲကို ဝင်လာပြီးနောက် သူ့ခန္ဓာကိုယ်ကို လှုပ်ရှားလိုက်ကာ ကျောက်စိမ်းပြားထဲသို့ ဝင်လိုက်သည်။

"သံသွား သင်းခွေချပ် ဟားဟား!"

အာကာသ မှော်လက်နက်ထဲမှာ ရပ်နေတဲ့ လုရွှမ်က သူ့ရှေ့မှာ သံပုံးကို ကြည့်ပြီး ရယ်လိုက်သည်။ ဤသံပုံးသည် သံသွားသင်းခွေချပ်ရဲ့ ဗိုက်ကို လှီးဖြတ်ပြီးနောက် စီးဆင်းလာသော သွေးများဖြစ်သည်။

"သင်းခွေချပ်နဂါးက သံသွားသင်းခွေချပ်နဲ့ တူတယ်လို့ ကြားဖူးတယ်။ တစ်ခုတည်းသော ခြားနားချက်က အလွယ်တကူ သတိမထားနိုင်တဲ့ မျက်ခုံးကြားက အကြေးခွံတွေပဲ... ငါသာ သေချာမကြည့်ရင် သတိမထားမိ သလောက်ပဲ!"

ပြုံးပြီး သူ့ကိုယ်သူ ပြန်ပြောလိုက်သည်။

ခန်းမသခင်ဝင်းရှိ ဝိညာဉ်သားရဲသည် သံသွားသင်းခွေချပ် ဝိညာဥ်သားရဲ ဖြစ်ကြောင်း လူတိုင်းထင်ခဲ့ကြသော်လည်း ထိုသို့မဟုတ်ပေ။ ထိုအရာက သင်းခွေချပ်နဂါးပင်။

နဂါးသွေး အစစ်ပါသော မြေနဂါး။

ဤတောင်ကို ဖောက်ထွင်းနိုင်သော သင်းခွေချပ်နဂါးသည် သံသွားသင်းခွေချပ်နှင့် တစ်ထေရာတည်း တူသည်။ တစ်ခုတည်းမှာပင် ကွဲပြားမှာ ၎င်းတွင် နဂါးသွေးပါသောကြောင့် ဝိညာဉ်စွမ်းအားများ နီးကပ်လာသည်နှင့်အမျှ ၎င်းကို တိုက်ရိုက် မျိုချသွားမည် ဖြစ်သည်။

ထို့အတွက်ကြောင့် အကြီးအကဲကောင်းသည် ပြိုင်ဘက်၏ ကြေးခွံပေါ်တွင် စိတ်ဝိညာဉ် ထွင်းထုခြင်းအတွက် သူဆုံးဖြတ်ခဲ့သည်က ကံဆိုးသည်ဟု ဆိုရမည်။

လုရွှမ်လည်း ထိုဝိညာဥ်သားရဲ၏ အထောက်အထားကို အတည်မပြုခင် အချိန်အတော်ကြာ ဂရုတစိုက် ကြည့်ရှုခဲ့ရသည်။

"ဘယ်မှာမှ ရှာမတွေ့ဘူးလို့ ထင်ထားတာ အခုတော့... ရဖို့ အားထုတ်စရာ မလိုဘူး!"

သံပုံးထဲက သွေးတွေကို ကြည့်လိုက်ရင်း လုရွှမ်ရဲ့ မျက်လုံးတွေ တောက်ပလာသည်။

နဂါးသွေးဝယ်ဖို့ သားရဲခန်းမကို သွားခဲ့ပေမယ့် ရခဲ့သမျှအားလုံးက "အတုတွေ" ဖြစ်လို့ နဂါးသွေး အစစ်အမှန်ကို ရှာရခက်မယ်လို့ ထင်ခဲ့ပေမယ့် မတော်တဆ ရလာခဲ့သည်။

သင်းခွေချပ်နဂါးသည် နဂါးမျိုးရိုးတွင် ဘာမှမဟုတ်သော်လည်း ၎င်းတွင် အလွန်ခိုင်မာသော သွေးလိုင်းရှိသည်။ ချောမွေ့စွာ သန့်စင်နိုင်လျှင် သွေးလိုင်းသည် မြင့်မားသော အဆင့်သို့ တိုးမြင့်လာပေလိမ့်မည်။ သွေးနိမ့်သော နဂါးမျိုးရိုးအချို့ထက်တော့ မဆိုးလှချေ။