အခန်း (၉၅၅)

တာအိုတန်ခိုးရှင်က ပတ်ဝန်းကျင်ကို ကြည့်လိုက်ပြီး လက်နှစ်ဖက်ကို ဆုပ်ကိုင်၍ တီးတိုးပြောသည်။

“ဓားအင်မော်တယ်၊ ကျေးဇူးပြုပြီး ကျွန်တော်နဲ့ လိုက်ခဲ့ပါ”

သူက ဟန်မူယဲ့ကို ဦးဆောင်ပြီး မိုင်သိန်းချီအကွာအထိ ပျံသန်းခဲ့သည်။ ထို့နောက် မီးခိုးနှင့် မီးပွားများ ပေါ်ထွက်နေသော တောင်ကုန်းတစ်ခုဆီသို့ ရောက်လာသည်။

“ယွင်လန်ဓားအင်မော်တယ် အလည်ရောက်လာတယ်လို့ ချူချီက ပြောတယ်။ အဲဒါကြောင့် လာကြိုတာပါ”

တောင်ကုန်းပေါ်တွင် အဖြူရောင်ဝတ်စုံနှင့် လူအိုကြီးနှစ်ယောက်က ခပ်ဟဟရယ်လိုက်ပြီး လက်နှစ်ဖက်ကိုဆုပ်ကိုင်၍ နှုတ်ဆက်သည်။

“ကျွန်တော်က ချူကျောက်ယန်ပါ။ ဒါကတော့ ချူယွမ်ကလန်ရဲ့ မဟာအကြီးအကဲ ချူကျန်းထုံပါ”

ဘယ်ဘက်တွင်ရှိသော လူအိုကြီးက လက်မြှောက်သည်။

ဟန်မူယဲ့က ခေါင်းညိတ်ပြီး လက်နှစ်ဖက်ကိုဆုပ်ကိုင်လျက် နှုတ်ဆက်သည်။ ထို့နောက် သူက ရွှေအလင်းကို ထုတ်ဖော်သည်။

ထိုအလင်းကြောင့် လူအိုကြီးနှစ်ယောက်က မျက်လုံးပြူးသွားကြသည်။

ဟန်မူယဲ့က အလွန်အဆင့်မြင့်သော မိစ္ဆာလောကလန်၏စွမ်းအားကို ဖော်ပြနေသည်။

ချူချီ၏မျက်နှာထားက ပြောင်းလဲသွားပြီး ထိတ်လန့်စွာပြောသည်။

“အရှင်”

မိစ္ဆာလောကလန်သည် အင်မော်တယ်ဘုရင်၏ လက်အောက်ခံ ဖြစ်သည်။

အင်မော်တယ်ဘုရင်၏ အမွေဆက်ခံသူက သူတို့၏သခင် ဖြစ်သည်။

ဟန်မူယဲ့က ယွင်လန်မြို့မှ ထွက်လာသောအခါတွင် ရှဲ့ချောင်ယန်က ချူယွမ်ကလန်၏အကြောင်းကို ပြောပြခဲ့သည်။

“ချူကျောက်ယန်နဲ့ ချူကျန်းထုံက အရှင့်ကို အရိုအသေပေးပါတယ်”

ရွှေအင်မော်တယ် အထွတ်အထိပ်အဆင့် ကျွမ်းကျင်သူနှစ်ယောက်က ဟန်မူယဲ့ကို ဦးညွတ်လိုက်သည်။

“ငါက ဖူယွီအင်မော်တယ်ကမ္ဘာကနေ ရောက်လာတာ။ သူတို့က ချူယွမ်ကလန်နဲ့ ပတ်သတ်တဲ့ အချက်အလက်တွေအားလုံးကို ပေးလိုက်တယ်”

ဟန်မူယဲ့က ခေါင်းညိတ်လိုက်ပြီး လက်ကို ဝှေ့ယမ်းသည်။ ထူးခြားသောစွမ်းအားတစ်ခုကြောင့် သူတို့က ခါးမတ်သွားကြသည်။

ချူကျောက်ယန်နှင့် ချူကျန်းထုံက အကြည့်ချင်းဖလှယ်လိုက်ပြီး ခေါင်းညိတ်သည်။

ချူယွမ်ကလန်သည် သင်္ချိုင်းအင်မော်တယ်မြို့တော်တွင် ကလန်ကြီးတစ်ခု ဖြစ်သည်။

သူတို့၏ကလန်တွင် ရွှေအင်မော်တယ်အဆင့် ကျွမ်းကျင်သူဆယ်ယောက်ကျော် ရှိနေသည်။

သူတို့က သင်္ချိုင်းအင်မော်တယ်မြို့တော်တွင် အစွမ်းကုန်တိုက်ခိုက်နေသ၍ မည်သည့်အရာကိုမှ စိုးရိမ်ရန်မလိုပဲ ကောင်းမွန်စွာ ဖွံ့ဖြိုးတိုးတက်နိုင်သည်။

တခြားနေရာများတွင် ထိုသို့ များပြားသော မိစ္ဆာလောကလန်သားများ စုစည်းနေခဲ့လျှင် ဖျက်ဆီးခံရလိမ့်မည်။

ဟန်မူယဲ့က မိစ္ဆာလောကလန်ကို အလိုရှိလျှင် စတေးနိုင်သော လက်အောက်ခံအဖွဲ့အစည်းတစ်ခုအဖြစ် သတ်မှတ်မထားပေ။

မိစ္ဆာလောကလန်က အင်မော်တယ်သခင်ကို သစ္စာရှိသည်။ သို့သော် သူက မိစ္ဆာလောကလန်နှင့် အလွန်အကျွံ မပတ်သတ်ချင်ပေ။

သူက မိစ္ဆာလောကလန်၏ သတင်းအချက်အလက်များကိုသာ လိုအပ်သည်။

“ငါက မြို့ပြင်ကိုထွက်ပြီး တိုက်ခိုက်ဖို့ပြင်နေတယ်။ နတ်ဘုရားကလန်အကြောင်း သတင်းအချက်အလက်တွေ လိုချင်တယ်”

ဟန်မူယဲ့က လျင်မြန်စွာရောက်လာကြသော မိစ္ဆာလောကလန်သားများကို ကြည့်လိုက်ပြီး တည်ငြိမ်စွာပြောသည်။

“ပြီးတော့ နတ်ဘုရားကလန်စစ်တပ်ရဲ့နောက်မှာ ရှိနေတဲ့ ကမ္ဘာတွေအကြောင်းကိုလည်း သိချင်တယ်”

သူက ပျက်စီးနေသောလက်နက်များမှတစ်ဆင့် တချို့အချက်အလက်များကို ရလာခဲ့သည်။ သို့သော် မလုံလောက်ပေ။

သူက နတ်ဘုရားကလန်ကို အမဲလိုက်မည်ဖြစ်သောကြောင့် အပြည့်အဝ ပြင်ဆင်ထားရမည်။

“ကောင်းပါပြီ။ ကျွန်တော်တို့က စုဆောင်းထားတဲ့ သတင်းအချက်အလက်တွေကို ပြင်ဆင်လိုက်ပါမယ်”

ချူကျောက်ယန်က ခေါင်းညိတ်လိုက်ပြီး ပြောသည်။

“ကျွန်တော်က တပ်ဖွဲ့တစ်ခုကို ကိုယ်တိုင်ဦးဆောင်ပြီး မြို့ထဲကနေ ထွက်သွားလိုက်ပါမယ်”

ချူကျန်းထုံက ပြုံးလိုက်ပြီး တခြားအကြီးအကဲများကို ကြည့်သည်။

“မိစ္ဆာလောကလန်က ပုန်းကွယ်တဲ့နေရာမှာ အတော်ဆုံးပါပဲ”

အကယ်၍ မိစ္ဆာလောကလန်က ပုန်းအောင်းနေချင်လျှင် နတ်ဘုရားကမ္ဘာ၏ ကျွမ်းကျင်သူများကလည်း သူတို့ကို ရှာနိုင်မည်မဟုတ်ပေ။

သူတို့က သတင်းအချက်အလက်များကို သေချာစုဆောင်းနိုင်လိမ့်မည်။

ဟန်မူယဲ့က ထိုအရာကို လိုအပ်သည်။

သို့သော် သူထွက်မသွားခင် ချူယွမ်ကလန်က အံ့အားသင့်စရာတစ်ခု ပေးခဲ့သည်။

ချူကျောက်ယန်က ပေတစ်ရာရှည်လျားသော လှံတစ်ချောင်းကို ထုတ်ယူလာသည်။

ထိုလှံက ပေါင်တစ်သိန်းလေးပြီး ရွှေနက်သံမဏိအဆီအနှစ်ဖြင့် ပြုလုပ်ထားသည်။ ထို့အပြင် ချပ်ဝတ်ထိုးဖောက်ပြီး ပေါက်ကွဲနိုင်သော အင်းကွက်များကိုလည်း ထည့်သွင်းထားသည်။

“ဒီတိုက်ပွဲမှာ ဒီလှံက ကောင်းကင်ဖျက်ဆီးဒူးလေးနဲ့ မြားတံတွေကို အစားထိုးနိုင်တယ်”

“ပြီးတော့ ရွှေနက်သံမဏိအဆီအနှစ်က မရှားပါးဘူး။ သန့်စင်ဖို့လည်း လွယ်ကူတယ်။ ဒီလှံအတွက် နတ်ဘုရားသလင်းကျောက် ငါးခုပဲ ကုန်ကျတယ်”

ချူကျောက်ယန်က ရှင်းပြလိုက်သည်။

နတ်ဘုရားသလင်းကျောက်သည် နတ်စွမ်းအားပုတီးစေ့ဖြစ်ပြီး ထိုလှံအတွက် အမှောင်မိစ္ဆာသားရဲငါးကောင်ကို သတ်ဖြတ်နိုင်လျှင် လုံလောက်သည်။

ယခင်က အမှောင်မိစ္ဆာသားရဲများကို သတ်ဖြတ်ရန် ခက်ခဲသည်။ အင်မော်တယ်ကျင့်ကြံသူများက မြို့တံတိုင်းကိုသာ ကာကွယ်ကြသည်။ အကယ်၍ သူတို့က အမှောင်မိစ္ဆာသားရဲနှင့် အင်မော်တယ်သတ်ဖြတ်ခြင်းတမန်တော်များကို သတ်ဖြတ်ခဲ့လျှင်ပင် အကျိုးပြုရမှတ်အများစုသည် နတ်ဘုရားသတ်ဖြတ်ခြင်းရုပ်သေးရုပ်များဆီသို့ ရောက်သွားကြသည်။

သို့သော် ယခုအချိန်တွင် လူအများစုက မြို့အပြင်ဘက်သို့ထွက်ပြီး တိုက်ခိုက်နေသည်။ သူတို့က ဝင်္ကပါကို ဖွဲ့စည်းထားပြီး အမျိုးမျိုးသော လက်နက်များ၏အကူအညီဖြင့် အမှောင်မိစ္ဆာသားရဲများကို သတ်ဖြတ်ရန် လွယ်ကူနေသည်။

အမှောင်မိစ္ဆာသားရဲငါးကောင်အတွက် မြားတံတစ်ချောင်းဆိုလျှင် ထိုက်တန်သည်။

“ကောင်းပြီ။ ဒီပစ္စည်းကိုဝယ်ဖို့ စီစဉ်လိုက်မယ်”

ဟန်မူယဲ့က လှံရှည်ကို သိုလှောင်လက်စွပ်ထဲသို့ ထည့်လိုက်ပြီး ပျံသန်းသွားသည်။

ချူယွမ်ကလန်၏ မြားတံများကြောင့် အနာဂတ်တွင် ပိုမိုကောင်းမွန်စွာ တိုက်ခိုက်နိုင်လိမ့်မည်။

ဟန်မူယဲ့တို့က ကောင်းကင်ဖျက်ဆီးဒူးလေး သုံးထောင်နှင့် မြားတံတစ်သိန်းခန့်သာ ယူလာခဲ့သည်။ ယခုအချိန်တွင် မြားတံတစ်ဝက်ကျော်က ကုန်သွားပြီဖြစ်သည်။

သူက စခန်းသို့ပြန်ရောက်လာပြီး ကျောက်ချန်ကို ချူယွမ်ကလန်၏ မြားတံများအကြောင်း ပြောပြလိုက်သောအခါတွင် ကျောက်ချန်က ညည်းညူခဲ့သည်။

“အစ်ကိုကြီး၊ ဒါက ဆုံးရှုံးမှုကြီးပဲ”

သူက ထိုသို့ပြောလိုက်သော်လည်း ချူယွမ်ကလန်သို့ စိတ်အားထက်သန်စွာ သွားရောက်ပြီး မြားတံများကို ဝယ်ယူရန် ဆွေးနွေးခဲ့သည်။

တစ်ဖက်တွင် ဟန်မူယဲ့က ချူယွမ်ကလန်ပေးလိုက်သော သင်္ချိုင်းအင်မော်တယ်မြို့တော်၏ အပြင်ဘက်ရှိ သတင်းအချက်အလက်များကို ဖြည်းဖြည်းချင်း ဖတ်နေသည်။

သင်္ချိုင်းအင်မော်တယ်မြို့တော်သည် နတ်ဘုရားကမ္ဘာ ကောင်းကင်စက်ဝန်း၏ ဟာကွက်နေရာတွင် တည်ရှိသည်။

ဖူယွီအင်မော်တယ်ကမ္ဘာ၏ တားမြစ်နယ်မြေသုံးခုတွင် သွေးစက်ကျချောက်ကမ်းပါးနှင့် ဝိညာဉ်ဖျက်ဆီးတောင်ကြားတို့က အင်မော်တယ်ကမ္ဘာတွင်သာ တည်ရှိကြသည်။

သင်္ချိုင်းအင်မော်တယ်မြို့တော်က မတူပေ။

သင်္ချိုင်းအင်မော်တယ်မြို့တော်၏ တစ်ဝက်သည် နတ်ဘုရားကမ္ဘာတွင် ရှိနေသည်။

အင်မော်တယ်ကမ္ဘာများတွင် သင်္ချိုင်းအင်မော်တယ်မြို့တော်နှင့် တူညီသောနေရာများ ရှိနေသည်။

တချို့ကို အင်မော်တယ်ကမ္ဘာအား ထိန်းချုပ်ရန်အတွက် နတ်ဘုရားကလန်၏ ကျွမ်းကျင်သူများက တည်ဆောက်ထားကြသည်။ တချို့ကတော့ သင်္ချိုင်းအင်မော်တယ်မြို့တော်နှင့် တူပြီး ရှေးခေတ်ကျွမ်းကျင်သူများက တည်ဆောက်ခဲ့ကြသည်။

သင်္ချိုင်းအင်မော်တယ်မြို့တော်မှ ထွက်သွားလျှင် တခြားအင်မော်တယ်ကမ္ဘာများကို တွေ့နိုင်လိမ့်မည်။

အကယ်၍ နတ်ဘုရားကမ္ဘာသို့ သွားချင်လျှင်လည်း အခွင့်အရေးရှိသည်။

“တိမ်တိုက်စုစည်းအင်မော်တယ်ကမ္ဘာ”

“လေပြင်းစုစည်း အင်မော်တယ်ကမ္ဘာ”

“နှင်းပွင့်အင်မော်တယ်ကမ္ဘာ”

“ရွှေလအင်မော်တယ်ကမ္ဘာ”

....

ဟန်မူယဲ့က ဆက်ဖတ်ကြည့်နေပြီး မျက်လုံးများ တောက်ပသွားခဲ့သည်။

“ကျန်းယွမ်အင်မော်တယ်ကမ္ဘာက နတ်ဘုရားကမ္ဘာနဲ့ နှစ်ပေါင်းသန်းဆယ်ချီအောင် တိုက်ခိုက်ခဲ့ပြီး လွန်ခဲ့တဲ့ နှစ်ပေါင်းတစ်သောင်းမှာ ရှုံးနိမ့်သွားတယ်”

“အခုအချိန်မှာ ကျန်းယွမ်အင်မော်တယ်ကမ္ဘာကို များသောအားဖြင့် နတ်ဘုရားကမ္ဘာက ထိန်းချုပ်ထားတယ်။ ဒါပေမဲ့ အပြည့်အဝ ထိန်းချုပ်နိုင်ဖို့အတွက် နောက်ထပ် နှစ်ပေါင်းတစ်သောင်း လိုအပ်လိမ့်မယ်”

နှစ်ပေါင်းနှစ်သောင်းအကြာတွင် ကျန်းယွမ်အင်မော်တယ်ကမ္ဘာက နတ်ဘုရားကမ္ဘာ၏ လက်အောက်ခံနယ်မြေတစ်ခု ဖြစ်လာလိမ့်မည်။

နတ်ဘုရားကမ္ဘာ၏နည်းလမ်းသည် ထိုသို့ပင်ဖြစ်သည်။

မိစ္ဆာလောကလန်က မြို့အပြင်ဘက်သို့ သိပ်မထွက်သောကြောင့် အသေးစိတ်အချက်အလက်များကို ထောက်ပံ့မပေးနိုင်ပေ။

“ကြည့်ရတာ နတ်ဘုရားကမ္ဘာက ကျန်းယွမ်အင်မော်တယ်ကမ္ဘာကို အပြည့်အဝ မထိန်းချုပ်နိုင်သေးဘူးပဲ”

ဟန်မူယဲ့၏မျက်လုံးများက တောက်ပနေသည်။

သူက ဝိညာဉ်ဓားရွှေအင်မော်တယ်နှင့် အင်မော်တယ်သခင်များကို ထုတ်သုံးမည်ဖြစ်သောကြောင့် လုံလောက်သော ငါးစာတစ်ခုကို လိုအပ်သည်။ ကျန်းယွမ်အင်မော်တယ်ကမ္ဘာက လုံလောက်နိုင်သည်။

ဟန်မူယဲ့က ကျောက်စိမ်းပေလွှာကို သိမ်းလိုက်ပြီး အပြင်ဘက်သို့ ထွက်လာသည်။

တဲအိမ်၏ အပြင်ဘက်တွင် ပိုင်ထူနှင့် တခြားလူများက ပျံသန်းလာကြသည်။

ဟန်မူယဲ့က လက်မြှောက်ပြီး ဝှေ့ယမ်းလိုက်သည်။ ဓားအလင်း ပေါ်ထွက်လာသည်။ သူက လေဝိညာဉ်ဓားအင်မော်တယ် စုကျန်းနှင့် တခြားလူများကို ဦးဆောင်ပြီး မြို့တံတိုင်းဆီသို့ သွားခဲ့သည်။

မြို့တံတိုင်းပေါ်တွင် ဓားဂိုဏ်း၏ လက်ရွေးစင်တပည့်များက နေရာတစ်ခုကို စောင့်ကြပ်ထားသည်။ မြို့အပြင်ဘက်တွင် သောင်းချီသော အင်မော်တယ်ကျင့်ကြံသူများ စုစည်းနေကြသည်။

ဓားဂိုဏ်း၏ တပည့်များသည် အလွန်ကြမ်းတမ်းပြီး အမျိုးမျိုးသော ခုခံကာကွယ်ရေးပစ္စည်းများကို မြို့တံတိုင်းပေါ်တွင် နေရာချထားသည်။

သူတို့၏ လက်နက်များသည် မြို့အပြင်ဘက်သို့ ထွက်သွားသော ကျင့်ကြံသူများအား လုံခြုံသောခံစားချက်ကို ပေးစွမ်းနိုင်သည်။

ယခင်ရက်များတွင် နတ်ဘုရားကလန်သည် အင်မော်တယ်ကျင့်ကြံသူများ၏ ဝင်္ကပါကို ဖျက်ဆီးပစ်ရန် တိုက်ခိုက်လာခဲ့သည်။

အဆုံးတွင် ဓားဂိုဏ်း၏ တပည့်များက ရွှေရောင်လျှပ်စီးလုံးတချို့ကို ထုတ်သုံးခဲ့သည်။

အံ့ဖွယ်ကောင်းကင် မိုးကြိုးပုတီးစေ့ဟုခေါ်သော ရတနာအသစ်ဖြစ်သည်ဟု ပြောကြသည်။

မည်သို့ပင်ဖြစ်စေ ထိုရတနာက ပေါက်ကွဲနိုင်စွမ်းအလွန်ကောင်းပြီး နတ်ဘုရားကလန်၏ဝင်္ကပါကို တားဆီးခဲ့ရုံသာမက အကျိုးအမြတ်လည်း ပြန်ရခဲ့သည်။

ကျောက်ချန်က ဖူယွီအင်မော်တယ်ကမ္ဘာနှင့် ဆက်သွယ်ပြီး ထိုပုတီးစေ့များကို အများအပြားထုတ်လုပ်ရန် ပြောနေခဲ့သည်။

ဟန်မူယဲ့က မြို့တံတိုင်းပေါ်တွင် အချိန်ကြာမြင့်စွာမနေခဲ့ပေ။ သူက စုကျန်းတို့နှင့်အတူ မြို့ထဲမှ တိတ်ဆိတ်စွာထွက်လာပြီး ဖရိုဖရဲဖြစ်နေသော အလင်းစီးကြောင်းများ၏ လွှမ်းခြုံမှုအောက်တွင် အာကာသထဲသို့ ခြေချလိုက်သည်။

ဟန်မူယဲ့နှင့် တခြားလူများက ပထမဆုံးအကြိမ်အဖြစ် သင်္ချိုင်းအင်မော်တယ်မြို့၏ အကာအကွယ်ထဲမှထွက်ပြီး နတ်ဘုရားကလန်၏ နယ်မြေထဲသို့ ရောက်လာခဲ့ကြသည်။

မိုင်တစ်သောင်းအထိ ခရီးသွားပြီးသောအခါတွင် နတ်ဘုရားကလန်၏ စစ်တပ်ဝင်္ကပါများကို မြင်နိုင်သည်။

ထိုစစ်တပ်ဝင်္ကပါတိုင်းတွင် သောင်းချီသော နတ်ဘုရားကလန်သားများ၊ သိန်းချီသော အမှောင်မိစ္ဆာသားရဲနှင့် အင်မော်တယ်သတ်ဖြတ်ခြင်းတမန်တော်များ ပါဝင်ကြသည်။ ဟန်မူယဲ့နှင့် တခြားလူများက ထိုစစ်တပ်ဝင်္ကပါကို ခုခံနိုင်ကြမည်မဟုတ်ပေ။

သင်္ချိုင်းအင်မော်တယ်မြို့တော်က ထိုဝင်္ကပါတစ်ခုကို ခုခံရန်အတွက် အနည်းဆုံး အင်မော်တယ်ကျင့်ကြံသူတစ်သန်း၊ အမျိုးမျိုးသော လက်နက်များနှင့် ကြီးကြပ်ပေးရန်အတွက် အင်မော်တယ်သခင်တစ်ယောက်ကို လိုအပ်လိမ့်မည်။

သို့သော် အာကာသထဲတွင် ထိုဝင်္ကပါများ တစ်ရာခန့် ရှိနေကြသည်။

သင်္ချိုင်းအင်မော်တယ်မြို့တော်၏ ခွန်အားဖြင့် ထိုစစ်တပ်ကို အနိုင်ရမည်မဟုတ်ပေ။

“အူ ....”

ထူးဆန်းသောအော်သံ ပေါ်ထွက်လာသည်။ အမြီးရှည်တစ်ချောင်းနှင့် သုံးပေရှည်လျားသော အနက်ရောင်မြေခွေးတစ်ကောင်က အာကာသထဲတွင် ထွက်ပြေးသွားသည်။

“အချက်ပေးသားရဲပဲ”

တာအိုတန်ခိုးရှင်ခူရှုက ညင်သာစွာရေရွတ်လိုက်ပြီး ဓားအလင်းကို ထုတ်ဖော်သည်။

အစိမ်းရောင်ဓားအလင်းသည် ပေတစ်သိန်းအကွာတွင် ပေါ်ထွက်လာပြီး မြေခွေးကို သတ်ပစ်လိုက်သည်။

မြေခွေးက သေဆုံးသွားသော်လည်း အချက်ပေးမှုကို ပို့လွှတ်ခဲ့သည်။

ပုံရိပ်များ ပျံသန်းလာကြသည်။

“သွားကြစို့”

ဟန်မူယဲ့က အော်ဟစ်လိုက်ပြီး လူတိုင်းကို လျင်မြန်စွာဦးဆောင်သည်။

နတ်ဘုရားကလန်သားများက သူတို့၏နောက်တွင် လိုက်လာကြသည်။

သူတို့က မိုင်တစ်သိန်းအထိ ထွက်ပြေးလာခဲ့သည်။ အာကာသထဲတွင် နတ်ဘုရားကလန်၏ ဝင်္ကပါများကို မတွေ့ရတော့ပေ။ သို့သော် ရွှေအင်မော်တယ်အဆင့် ကျွမ်းကျင်သူများအပါအဝင် နတ်ဘုရားကလန်သားတစ်ရာခန့်က နောက်တွင် ပါလာသည်။

ဟန်မူယဲ့တို့အုပ်စုက ရွှေအင်မော်တယ်အဆင့်သို့ မရောက်သေးကြောင်း သူတို့က အာရုံခံမိကြသည်။

“ဒီဘက်ပဲ”

ဟန်မူယဲ့က အဝေးတစ်နေရာတွင် အင်မော်တယ်အလင်းဖြင့် တောက်ပနေသော အာကာသတစ်ခုကို ညွှန်ပြလိုက်သည်။ သူတို့က ထိုနေရာသို့ ဦးတည်၍ အရှိန်မြှင့်လိုက်ကြသည်။

“သူတို့ကို တားလိုက်။ သူတို့က ကျန်းယွမ်အင်မော်တယ်ကမ္ဘာကို သွားချင်နေကြတယ်”

“ကျန်းယွမ်အင်မော်တယ်ကမ္ဘာရဲ့ သူလျှိုတွေလား”

“ဘာပဲဖြစ်ဖြစ် သူတို့ကို တားရမယ်”

နတ်ဘုရားကလန်သားများက အော်ဟစ်လိုက်ကြပြီး အရှိန်မြှင့်သည်။ တချို့က ခွဲထွက်သွားပြီး ရှေ့မှ ကြိုတင်တားဆီးနိုင်ရန် ကြိုးစားသည်။