အခန်း (၉၅၇)

“ဘုန်း”

“ဘုန်း”

“ဘုန်း”

လျှပ်စီးကြောင်းများ ပေါက်ကွဲထွက်လာပြီး နတ်ဘုရားကလန်၏စစ်တပ်ကို ပြိုလဲသွားစေသည်။ အင်မော်တယ်သခင်ကပင် စိတ်ဓာတ်ကျသွားသည်။

သို့သော် လျှပ်စီးကြောင်းများက အင်မော်တယ်သန့်စင်ခြင်းဝင်္ကပါကို မဖျက်ဆီးနိုင်ခဲ့ပေ။

“မင်းက သေချင်နေတာပဲ”

လျှပ်စီးကြောင်းများဖြင့် ဝိုင်းရံခံထားရသော နတ်ဘုရားကလန်၏ အင်မော်တယ်သခင်က ကြမ်းတမ်းစွာ အော်ဟစ်နေရုံသာ တတ်နိုင်ခဲ့သည်။ သို့သော် သူက ရှေ့တက်မသွားရဲပေ။

“တာအိုရောင်းရင်း၊ မြန်မြန်ထွက်သွားပါတော့ ....”

မျက်နှာဖြူဖျော့နေသော ‌ရွှေအင်မော်တယ်တစ်ယောက်က ဟန်မူယဲ့ကို ကြည့်လိုက်ပြီး ညင်သာစွာ ပြောသည်။

“ငါတို့က ဘာမှ မလုပ်နိုင်တော့ဘူး။ မင်းက ကူညီပေးဖို့ ကျန်းယွမ်အင်မော်တယ်ကမ္ဘာကို ရောက်လာတာနဲ့တင် ....”

အဝါရောင်ဝတ်စုံနှင့် ရွှေအင်မော်တယ်အထွတ်အထိပ်အဆင့် ကျင့်ကြံသူက တစ်ခုခု ပြောချင်သော်လည်း မပြောနိုင်တော့ပေ။

သူတို့၏ ကျန်းယွမ်အင်မော်တယ်ကမ္ဘာသည် မျှော်လင့်ချက်မရှိတော့ပေ။

သူတို့၏ ကံကြမ္မာက ဆုံးဖြတ်ပြီးသား ဖြစ်နေသည်။

“တာအိုရောင်းရင်းတို့၊ မင်းတို့က ကျန်းယွမ်အင်မော်တယ်ကမ္ဘာကနေ ထွက်သွားနိုင်ရင် အင်မော်တယ်ကမ္ဘာနဲ့အတူ သေဆုံးသွားတဲ့ ငါတို့အကြောင်းကို ပြောပြပေးပါ”

ဝင်္ကပါထဲမှ အသံတစ်သံထွက်လာသည်။

“ငါရဲ့ လုယန်တာအိုဂိုဏ်းက ဘယ်တော့မှ အညံ့ခံမှာမဟုတ်ဘူး”

နောက်ထပ်အသံတစ်သံ ပေါ်ထွက်လာသည်။

ပတ်ဝန်းကျင်တွင်ရှိနေသော ကောင်းကင်အင်မော်တယ်နှင့် ရွှေအင်မော်တယ်များက တိုက်ခိုက်ခြင်းဆန္ဒကို ထုတ်လွှတ်လိုက်ကြသည်။

နတ်ဘုရားကလန်သည် သူတို့၏ အမွေအနှစ်ကို ဖျက်ဆီးပစ်ချင်သည်။

အနာဂတ်တွင် ဤကမ္ဘာသည် နတ်ဘုရားကလန်၏ လက်အောက်ခံနယ်မြေတစ်ခုသာ ဖြစ်နိုင်မည်။ သူတို့၏ မျိုးဆက်များက ကျွန်များ ဖြစ်လာကြလိမ့်မည်။

“မိတ်ဆွေလေး၊ ဒါက ငါတို့ လုယန်တာအိုဂိုဏ်းရဲ့ ကျင့်ကြံခြင်းနည်းစနစ် အမွေအနှစ်ပါ။ တကယ်လို့ မင်းက ဒီအမွေအနှစ်ကို ယူသွားနိုင်ရင် ငါတို့က ထာဝရ ကျေးဇူးတင်နေမှာပါ”

ရွှေအလင်းတစ်ခုသည် နတ်ဘုရားအလင်းတန်းကို ထိုးဖောက်ပြီး ဟန်မူယဲ့၏ရှေ့သို့ ရောက်လာသည်။

ထိုရွှေအလင်းသည် လုယန်တာအိုဂိုဏ်း၏ လျှို့ဝှက်နည်းစနစ်များအားလုံးကို မှတ်သားထားသော ကျောက်စိမ်းပေလွှာ ဖြစ်သည်။

ထိုကျောက်စိမ်းပေလွှာကို ရွှေရောင်ငှက်မွေးဖြင့် လွှမ်းခြုံထားသည်။

ကမ္ဘာဦးခေတ် နတ်ဘုရားသားရဲတစ်ကောင်၏ ငှက်မွေး ဖြစ်သည်။

ထိုရတနာမျိုးကသာ နတ်ဘုရားအလင်းတန်းကို ထိုးဖောက်နိုင်သည်။

ဟန်မူယဲ့က ကျောက်စိမ်းပေလွှာကို ဆုပ်ကိုင်လိုက်သည်။ သို့သော် အဖြေပြန်မပေးပေ။

သူ့ရှေ့တွင် လျှပ်စီးကြောင်းများနှင့် လွှမ်းခြုံခံထားရသော နတ်ဘုရားကလန်၏ အင်မော်တယ်သခင်က ရှေ့သို့ ခြေတစ်လှမ်းတိုးလာသည်။

ဟန်မူယဲ့က လက်မြှောက်ပြီး မိုးကြိုးပုတီးစေ့တစ်ထောင်ကို ပစ်လွှတ်လိုက်သည်။

သူက ထိုပုတီးစေ့များကို ကိုယ်ပိုင်နတ်ဘုရားစွမ်းအားဖြင့် ဖြည်းဖြည်းချင်း စုစည်းထားခဲ့သည်။

ထိုသို့ များပြားလှသော မိုးကြိုးပုတီးစေ့များကြောင့် ရွှေအင်မော်တယ် အထွတ်အထိပ်အဆင့် ကျင့်ကြံသူကပင် နောက်ဆုတ်ပေးရလိမ့်မည်။

အင်မော်တယ်သခင်က မိုးကြိုးပုတီးစေ့များကို မြင်လိုက်ရသောအခါတွင် ဒေါသထွက်သွားသည်။ သူက ဓားမော့ကို ဖြည်းဖြည်းချင်း မြှောက်သည်။ ဓားမော့၏ ရွှေအလင်းက အေးစက်နေသည်။

သူက အင်မော်တယ်သခင်တစ်ပါး ဖြစ်သည်။ သို့သော် ကောင်းကင်အင်မော်တယ်တစ်ယောက်၏ ဖိနှိပ်မှုကို ခံနေရသည်။ အကယ်၍ ထိုသတင်း ပြန့်သွားလျှင် သူက သေဆုံးသည်အထိ လှောင်ပြောင်ခံရလိမ့်မည်။

“ငရဲကို သွားလိုက်တော့”

ဓားမော့သည် ပေတစ်သောင်းရှည်လျားသော ဓားအလင်းအဖြစ် ပြောင်းလဲသွားပြီး မိုးကြိုးပုတီးစေ့များအားလုံးကို ခုတ်ပိုင်းသည်။

ထိုဓားချက်ကြောင့် မိုးကြိုးပုတီးစေ့များအားလုံး ပေါက်ကွဲပြီး သူ့ဘေးတွင်ရှိနေသော နတ်ဘုရားကလန်သားများကို ထိခိုက်စေလိမ့်မည်။

သို့သော် သူက ထိုအချက်ကို ဂရုမစိုက်တော့ပေ။

ယခုအချိန်တွင် မိုးကြိုးပုတီးစေ့များကို ခုတ်ပိုင်းပြီး အင်မော်တယ်ကျင့်ကြံသူများအားလုံးကို သတ်ဖြတ်နိုင်မှသာ သူက ဒေါသပြေနိုင်မည်။

ဓားသွားအလင်း ပေါ်ထွက်လာသည်။ အဆုံးမရှိသော လေပြင်းနှင့်ဖိအား စုစည်းနေသည်။

ရွှေအင်မော်တယ်အဆင့်အောက်တွင် ရှိနေသော ကျန်းယွမ်အင်မော်တယ်ကမ္ဘာ၏ ကျင့်ကြံသူများက မျှော်လင့်ချက်ကင်းမဲ့စွာ မျက်လုံးမှိတ်ထားလိုက်ကြသည်။

ရွှေအင်မော်တယ် အယောက်သုံးဆယ်ကပင် တစ်ကိုယ်လုံးတုန်ခါနေပြီး ခုခံနိုင်စွမ်း မရှိကြတော့ပေ။

ရွှေအင်မော်တယ်အထွတ်အထိပ်အဆင့် ကျင့်ကြံသူသုံးယောက်က ဟန်မူယဲ့၏ရှေ့သို့ ပျံသန်းလာပြီး ကောင်းကင်နှင့်မြေကြီး၏စွမ်းအားကို အလင်းလွှာတစ်ခုအဖြစ် ဖန်တီး၍ သူ့ကို ကာကွယ်ပေးချင်နေကြသည်။

ရွှေအင်မော်တယ်အထွတ်အထိပ်အဆင့် တခြားကျင့်ကြံသူနှစ်ယောက်က ထွက်ပြေးသွားကြသည်။

ဓားတစ်ချက်၏အောက်တွင် သက်ရှိများ၏တုံ့ပြန်မှုက ကွဲပြားနေသည်။

ဟန်မူယဲ့က တည်ငြိမ်သောမျက်နှာထားဖြင့် ဓားကိုင်ထားသည်။

ရှေ့တွင် ဓားမော့နှင့် ထိတွေ့သွားသော လျှပ်စီးကြောင်းများက ပျောက်ကွယ်သွားကြသည်။

ဓားမော့အလင်းသည် အလွန်သန်မာသည်။

နတ်ဘုရားကလန်၏ အင်မော်တယ်သခင်က ရယ်မောလိုက်ပြီး ဓားမော့အလင်းကို ထပ်မံစုစည်းသည်။

သို့သော် ချက်ချင်းဆိုသလိုပင် ပျက်စီးသွားသော မိုးကြိုးပုတီးစေ့များကြားမှ အရောင်ကိုးမျိုးလျှပ်စီး ပေါက်ကွဲထွက်လာသည်။

ကောင်းကင်ဖျက်ဆီးနတ်ဘုရားမိုးကြိုး ဖြစ်သည်။

ဟန်မူယဲ့ပစ်လွှတ်လိုက်သော မိုးကြိုးပုတီးစေ့တစ်ထောင်ထဲတွင် ကောင်းကင်ဖျက်ဆီးနတ်ဘုရားမိုးကြိုးတစ်ခု ပါနေသည်။

အရောင်ကိုးမျိုးလျှပ်စီးသည် တိမ်တိုက်မြူခိုးထုနှင့် ဆင်တူပြီး နတ်ဘုရားကလန်၏ အင်မော်တယ်သခင်ကို ညင်သာစွာ ရစ်ပတ်လိုက်သည်။ ထို့နောက် ကောင်းကင်အထိ ထိုးတက်နေသော အလင်းတန်းကိုပါ ရိုက်ခတ်သွားသည်။

“ဘုန်း”

ထိုအသံက မကျယ်ပဲ ခပ်အုပ်အုပ်ဖြစ်နေသည်။

သို့သော် နတ်ဘုရားအလင်းတန်းက မျက်စိဖြင့်မြင်နိုင်သော အမြန်နှုန်းဖြင့် ပြိုကျလာသည်။

ကောင်းကင်အင်မော်တယ်နှင့် ရွှေအင်မော်တယ်များ စုပေါင်း၍ မဖျက်ဆီးနိုင်ခဲ့သော အင်မော်တယ်သန့်စင်ခြင်းဝင်္ကပါသည် လျှပ်စီးကြောင်းတစ်ခုကြောင့် ပျက်စီးသွားသည်။ လျှပ်စီးကြောင်း၏ လွှမ်းခြုံမှုကို ခံလိုက်ရသော အင်မော်တယ်သခင်ကလည်း တိတ်ဆိတ်စွာ သေဆုံးသွားသည်။

ကျန်းယွမ်အင်မော်တယ်ကမ္ဘာကို ဖိနှိပ်ထားသော အင်မော်တယ်သန့်စင်ခြင်းဝင်္ကပါသည် ကျိုးပျက်သွားခဲ့သည်။

လူတိုင်းက သေဆုံးသွားသော နတ်ဘုရားကလန်မှ အင်မော်တယ်သခင်နှင့် ပျက်စီးသွားသော နတ်ဘုရားအလင်းတန်းကို ဂရုမစိုက်ခဲ့ကြပေ။

သူတို့အားလုံးက နတ်ဘုရားအလင်းမှ ပြန့်ကျဲထွက်လာသော နတ်စွမ်းအားသလင်းကျောက်များကို ကြည့်နေကြသည်။

နတ်ဘုရားအလင်းတန်းများကို နတ်စွမ်းအားဖြင့် စုစည်းထားသည်။ ယခုအချိန်တွင် ထိုအလင်းတန်းများက ပြိုကွဲသွားပြီး နတ်စွမ်းအားသလင်းကျောက်များက မိုးရွာသကဲ့သို့ ကျဆင်းလာသည်။

ဟန်မူယဲ့က လက်မြှောက်ပြီး ဓားအလင်းများကို ထုတ်လွှတ်၍ နတ်စွမ်းအားသလင်းကျောက်များကို သိမ်းဆည်းလိုက်သည်။

ဤနတ်စွမ်းအားသလင်းကျောက်များဖြင့် ရတနာပစ္စည်းများကို လဲလှယ်ရမည်။

“ဘုန်း”

နတ်ဘုရားအလင်းဖြင့် လွှမ်းခြုံခံထားရသော တောင်တန်းတွင် အင်မော်တယ်အလင်းတန်းများ ပေါ်ထွက်လာသည်။

အင်မော်တယ်သခင်ခုနစ်ပါး၏ ပေတစ်ထောင်မြင့်မားသော ပုံရိပ်ခုနစ်ခုသည် အင်မော်တယ်အလင်းကို ဖြာထွက်လာစေပြီး ပိုမိုများပြားသော နတ်ဘုရားအလင်းတန်းများက ပျက်စီးသွားကြသည်။

အင်မော်တယ်သန့်စင်ခြင်းဝင်္ကပါသည် အပြည့်အဝ ပျက်စီးသွားခဲ့သည်။

“မိတ်ဆွေလေး၊ ကျေးဇူးပါပဲ”

ရှေ့ဆုံးတွင်ရှိနေသော အင်မော်တယ်သခင်က စိတ်လှုပ်ရှားနေသောမျက်နှာထားဖြင့် လက်နှစ်ဖက်ကို ဆုပ်ကိုင်ပြီး ဟန်မူယဲ့ကို နှုတ်ဆက်သည်။

လုယန်တာအိုဂိုဏ်းတွင် ကျန်းယွမ်အင်မော်တယ်ကမ္ဘာ၏ ကျင့်ကြံသူ သန်းသုံးဆယ်ခန့် ပိတ်မိနေခဲ့သည်။

အင်မော်တယ်သခင်ခုနစ်ယောက်၊ ဒါဇင်ချီနေသော ရွှေအင်မော်တယ် အထွတ်အထိပ်အဆင့် ကျွမ်းကျင်သူနှင့် ရာချီနေသော ရွှေအင်မော်တယ်အဆင့် ကျင့်ကြံသူများ ပါဝင်ကြသည်။

သူတို့ကို နတ်ဘုရားကလန်၏ စစ်တပ်က ဝိုင်းရံထားပြီး ဝင်္ကပါတည်ဆောက်၍ ဖြည်းဖြည်းချင်း သန့်စင်နေခဲ့သည်။ နောက်ထပ် နှစ်တစ်ထောင်အကြာတွင် သူတို့အားလုံးက နတ်ဘုရားကလန်၏ကျွန်များ ဖြစ်သွားကြလိမ့်မည်။

ယခုအချိန်တွင် ဝင်္ကပါကို တည်ဆောက်ခဲ့သော နတ်ဘုရားကလန်၏ ကျွမ်းကျင်သူများက ထွက်သွားကြသည်။ နတ်ဘုရားကလန်၏ အင်မော်တယ်သခင်တစ်ယောက်ကသာ စစ်တပ်ကိုဦးဆောင်ပြီး စောင့်ကြပ်နေခဲ့သည်။

သို့သော် ရုတ်တရက်ပေါ်လာသည့် ဓားကျင့်ကြံသူတချို့က အင်မော်တယ်သခင်များ၏ စုပေါင်းခွန်အားဖြင့် မချိုးဖျက်နိုင်သော အင်မော်တယ်သန့်စင်ခြင်းဝင်္ကပါကို ဖျက်ဆီးပစ်လိမ့်မည်ဟု မည်သူက ထင်ထားမည်နည်း။

ဟန်မူယဲ့က ပြုံးလိုက်ပြီး အင်မော်တယ်သခင်များကို ပြန်လည်နှုတ်ဆက်သည်။ ထို့နောက် သူက နတ်စွမ်းအားသလင်းကျောက်များကို စုစည်းနေသောအချိန်တွင် ကျောက်စိမ်းပေလွှာတစ်ခုကို ပြန်လည်ထုတ်ယူလိုက်သည်။

“အကြီးအကဲ၊ လုယန်တာအိုဂိုဏ်းရဲ့ အမွေအနှစ်ကို ပိုင်ရှင်ဆီ ပြန်ပေးလိုက်ပါမယ်”

ကျောက်စိမ်းပေလွှာက ပြန်ရောက်လာသည်။ သို့သော် ကျောက်စိမ်းပေလွှာတွင် ရစ်ပတ်ထားသည့် နတ်ဘုရားသားရဲငှက်မွေးက ပျောက်ကွယ်သွားသည်။

ကျောက်စိမ်းပေလွှာကို ပြန်ယူလိုက်သော အင်မော်တယ်သခင်က ခပ်ဟဟရယ်သည်။ သူက မိုးရွာသကဲ့သို့ ကျဆင်းနေသော နတ်စွမ်းအားသလင်းကျောက်များကို ကြည့်လိုက်ပြီး ခေါင်းညိတ်လျက် ပြောသည်။

“တာအိုရောင်းရင်း၊ လုပ်စရာရှိတာလုပ်ပါ။ ဒီနတ်စွမ်းအားသလင်းကျောက်တွေကို စုစည်းပြီးရင် အသေးစိတ်ပြောကြတာပေါ့”

ထိုသို့ဖြင့် သူက လက်မြှောက်ပြီး အချက်ပြလိုက်သည်။

တခြားအင်မော်တယ်သခင်များက အင်မော်တယ်အလင်းကို ထုတ်လွှတ်သည်။

“ဘုန်း”

အင်မော်တယ်အလင်းလှိုင်းသည် မိုင်သန်းချီပတ်ဝန်းကျင်ကို လွှမ်းခြုံသွားသည်။

ထို့နောက် ပတ်ဝန်းကျင်သည် ကြည်လင်လာပြီး အင်မော်တယ်အလင်းများ ရစ်ဝဲနေကြသည်။

ဟန်မူယဲ့က ဗလာဖြစ်သွားသောကောင်းကင်ကို ကြည့်လိုက်ပြီး ကျိန်ဆဲလုနီးပါး ဖြစ်နေသည်။

‘တစ်ခါတည်းသိမ်းယူလိုက်ကြတာပဲ’

“အကြီးအကဲတို့၊ အခု ဆွေးနွေးတော့မလား”

ဟန်မူယဲ့က စုဆောင်းထားသော နတ်စွမ်းအားသလင်းကျောက်များကို ချိန်ဆကြည့်လိုက်ပြီး နတ်ဘုရားမိုးကြိုးအတွက် ကုန်ကျစရိတ်ကို ကာမိလိမ့်မည်ဟု ခံစားရသည်။ သူက အနည်းငယ် ခံစားချက်ကောင်းလာသည်။

“ဟားဟား၊ ကောင်းပြီ။ တာအိုရောင်းရင်းလေး”

လုယန်တာအိုဂိုဏ်း၏ အင်မော်တယ်သခင်က လက်မြှောက်လိုက်ပြီး အပြုံးတစ်ခုနှင့်အတူ ပြောသည်။

စစ်ပွဲနှင့် ကြုံတွေ့ထားရသောကြောင့် လုယန်တာအိုဂိုဏ်း၏ နေရာအများစုသည် ပျက်စီးနေကြသည်။

ကံကောင်းစွာဖြင့် အဓိကခန်းဆောင်သည် အခြေအနေကောင်းနေသေးသည်။

ဟန်မူယဲ့၊ ပိုင်ထူနှင့် တခြားလူများက မျက်နှာချင်းဆိုင်တွင် ထိုင်လိုက်ကြသည်။ သူတို့က အင်မော်တယ်သခင်များ၏ရှေ့တွင် အားနည်းမသွားကြပေ။

“တာအိုရောင်းရင်းယွင်လန်က တကယ်ဖြောင့်မတ်တာပဲ။ ကျန်းယွမ်ကမ္ဘာရဲ့ မရေမတွက်နိုင်တဲ့ တာအိုရောင်းရင်းတွေကိုယ်စား ငါက ကျေးဇူးတင်ပါတယ်”

စကားပြောလိုက်သောလူက လုယန်တာအိုဂိုဏ်း၏ ဂိုဏ်းချုပ် အင်မော်တယ်သခင် ယန်ယွီ ဖြစ်သည်။

တခြားအင်မော်တယ်သခင် ခြောက်ယောက်ကလည်း လက်နှစ်ဖက်ကို ဆုပ်ကိုင်ပြီး နှုတ်ဆက်လိုက်ကြသည်။

ဟန်မူယဲ့ကလည်း လျင်မြန်စွာ ပြန်လည်နှုတ်ဆက်သည်။

ဟန်မူယဲ့တို့၏ ဖူယွီအင်မော်တယ်ကမ္ဘာသည် ကျန်းယွမ်အင်မော်တယ်ကမ္ဘာနှင့် ကွာဝေးသော်လည်း အချင်းချင်း ဆက်သွယ်ဖူးကြသည်။

ဟန်မူယဲ့တို့က သင်္ချိုင်းအင်မော်တယ်မြို့တော်မှ ဤနေရာအထိ ရောက်လာပြီး အင်မော်တယ်သန့်စင်ခြင်းဝင်္ကပါကို ဖျက်ဆီးနိုင်ခဲ့သောကြောင့် လူတိုင်းက အံ့အားသင့်နေကြသည်။

လူတိုင်းက နေရာယူလိုက်ကြပြန်သည်။ အင်မော်တယ်သခင်ယန်ယွီက ဟန်မူယဲ့ကို ကြည့်လိုက်သည်။

“မိတ်ဆွေလေးယွင်လန်၊ မင်းက ဘယ်လိုလုပ်ပြီး အင်မော်တယ်သန့်စင်ခြင်းဝင်္ကပါကို ဖျက်ဆီးခဲ့တာလဲ”

အင်မော်တယ်ဘုရင်များကပင် အင်မော်တယ်သန့်စင်ခြင်းဝင်္ကပါကို တစ်ချက်တည်း ဖျက်ဆီးနိုင်သည်ဟု မပြောရဲကြပေ။ သို့သော် ဟန်မူယဲ့က ထိုဝင်္ကပါကို တိုက်ရိုက်ဖျက်ဆီးပြီး အင်မော်တယ်သခင်တစ်ယောက်ကိုပင် သတ်ပစ်ခဲ့သည်။

ထိုနည်းလမ်းမျိုးကို မည်သူက တွေးထားမည်နည်း။

“ဖူယွီအင်မော်တယ်ကမ္ဘာရဲ့ လျှို့ဝှက်ရတနာကို အသုံးပြုလိုက်ရတာ ထိုက်တန်ပါတယ်လေ ....”

ဟန်မူယဲ့က ခေါင်းခါလိုက်ပြီး နာကျင်နေသောမျက်နှာထားဖြင့် လက်ကို ဝှေ့ယမ်းသည်။

“ဒါကို ပြောမနေပါနဲ့တော့။ အကြီးအကဲတွေကို ကယ်တင်နိုင်တာနဲ့တင် အဆင်ပြေနေပါပြီ”

သူက အင်မော်တယ်သန့်စင်ခြင်းဝင်္ကပါကို ဖျက်ဆီးလိုက်သောအချိန်တွင် ကျန်းယွမ်အင်မော်တယ်ကမ္ဘာနှင့် နီးစပ်လာသည်ဟု ခံစားရသည်။

သူက ထိုခံစားချက်မျိုးကို ယခင်က ခံစားဖူးသည်။ ကောင်းကင်နှင့်မြေကြီး၏ လိုက်ဖက်ညီမှု ဖြစ်သည်။

အကယ်၍ သူက ကျန်းယွမ်အင်မော်တယ်ကမ္ဘာတွင် ကျင့်ကြံခဲ့လျှင် အဆပေါင်းများစွာ ပိုမိုလျင်မြန်နေလိမ့်မည်။

ဟန်မူယဲ့၏စကားကို ကြားလိုက်ရသောအခါတွင် အင်မော်တယ်သခင် ယန်ယွီက တခြားအင်မော်တယ်သခင်များကို လှည့်ကြည့်သည်။ သူတို့အားလုံးက အသာအယာ ခေါင်းညိတ်လိုက်ကြသည်။

အင်မော်တယ်သခင်ယန်ယွီက ကျောက်စိမ်းသေတ္တာတစ်လုံးကို ထုတ်ယူသည်။ ကျောက်စိမ်းသေတ္တာ၏ အင်မော်တယ်အလင်းက ရွှေရောင်အဆောင်လက်ဖွဲ့အဖြစ် ပြောင်းလဲသွားသည်။

“ဒါက နတ်စွမ်းအားသလင်းကျောက် တစ်သန်းပါ။ မင်းရဲ့ဆုံးရှုံးမှုကို အပြည့်အဝ ဖာထေးမပေးနိုင်ပေမဲ့ ငါတို့ လုယန်တာအိုဂိုဏ်းရဲ့ ကျေးဇူးသိတတ်မှုအဖြစ် ယူဆနိုင်ပါတယ်”

နတ်စွမ်းအားသလင်းကျောက်တစ်သန်းသည် ပြိုကျသွားခဲ့သော နတ်ဘုရားအလင်းတန်းများ၏ ဆယ်ပုံတစ်ပုံခန့် ရှိသည်။

သို့သော် အင်မော်တယ်သခင်ယန်ယွီက နတ်စွမ်းအားသလင်းကျောက်တစ်သန်းကို ထုတ်ပေးခဲ့သည့်အတွက် ရက်ရောသည်ဟု ပြောနိုင်သည်။

ထိုသလင်းကျောက်များသည် ဟန်မူယဲ့အတွက် အသုံးဝင်သည်။

သူက တုံ့ဆိုင်းမနေပဲ သလင်းကျောက်များကို လက်ခံလိုက်ပြီး ပြောသည်။

“အကြီးအကဲတွေက ကျွန်တော့်ကို ဘာပြောချင်သေးလဲမသိဘူး”