အခန်း (၉၇၁)

အကျိုးပြုရမှတ် ၁၃မှတ်ကို စုဆောင်းရန် ခက်ခဲသည်။

သို့သော် အင်မော်တယ်ကမ္ဘာတွင် ရှုချယ်က ချင်းယန်ကျားနက်သွေးမျိုးဆက်ကို မဝယ်ယူနိုင်ပေ။

ယခုအချိန်တွင် အကျိုးပြုရမှတ် ၁၃မှတ်ကိုသာ လိုအပ်သည်။

ဆယ်နှစ် ....

အနှစ်တစ်ရာ ....

သူက ရည်ရွယ်ချက်ထားလိုက်သည်။ နှစ်တစ်ရာအတွင်း၌ ချင်းယန်ကျားနက်သွေးမျိုးဆက်ကို ရအောင်ယူမည်။

သူက ကျန်းယွမ်အင်မော်တယ်ကမ္ဘာသို့ ရောက်လာသောအခါတွင် နတ်ဘုရားကလန်၏ဝင်္ကပါကို တစ်ချက်တည်းဖျက်ဆီးလိုက်သော ကျွမ်းကျင်သူတစ်ယောက်အား မြင်ခဲ့ရသည်။

သို့သော် သူက အာရုံမစိုက်ပေ။

သူက ထိုကျွမ်းကျင်သူမျိုးကို မော့မကြည့်နိုင်သေးပေ။ သူက အကျိုးပြုရမှတ်များ စုဆောင်းရန် အာရုံစိုက်ထားရမည်။

ဝင်္ကပါ ပျက်စီးသွားသောအချိန်တွင် သူနှင့် ဂိုဏ်းတူညီအစ်ကိုများက ဝင်္ကပါဖွဲ့စည်းပြီး အမှောင်မိစ္ဆာသားရဲများကို သတ်ဖြတ်လိုက်ကြသည်။

သူက နတ်စွမ်းအားကျောက်တုံးကို ပထမဆုံးအကြိမ်အဖြစ် ထိကြည့်လိုက်ပြီး နှလုံးသားထဲအထိ နွေးထွေးသွားသည်။

သူက နတ်စွမ်းအားကျောက်တုံးကို ရင်ဘတ်ထဲတွင် ထည့်ထားလိုက်ပြီး အောင်မြင်မှုကို ခံစားရသည်။

ရှုချယ်နှင့် ဂိုဏ်းတူညီအစ်ကိုများက ကောင်းကင်အင်မော်တယ်အဆင့် နတ်ဘုရားကလန်သားနှစ်ဦးကို ပစ်မှတ်ထားလိုက်ကြသည်။ အင်မော်တယ်သတ်ဖြတ်ခြင်းတမန်တော် သုံးလေးယောက်နှင့် ဒါဇင်ချီနေသော အမှောင်မိစ္ဆာသားရဲများက သူတို့ကို ကာကွယ်ပေးထားသည်။

သူတို့က ထွက်ပြေးနေသော နတ်ဘုရားကလန်သားနှစ်ဦးကို အမိဖမ်းရန် တစ်လကြာခဲ့သည်။

သူတို့က အမှောင်မိစ္ဆာသားရဲများကို ဝိုင်းရံပြီး တစ်ကောင်ပြီးတစ်ကောင် သတ်ပစ်ခဲ့ကြသည်။

ထို့နောက် အင်မော်တယ်သတ်ဖြတ်ခြင်းတမန်တော်များကို တိုက်ခိုက်ခဲ့ကြသည်။

သန်မာသော အင်မော်တယ်သတ်ဖြတ်ခြင်းတမန်တော်များကို ရှုချယ်က နှစ်သက်သည်။

သူတို့နှင့် ရင်ဆိုင်တိုက်ခိုက်ပြီး ရုပ်ခန္ဓာကို လေ့ကျင့်နိုင်သည်။

ရှုချယ်နှင့် ခွန်အားအခြေပြုသော သွေးမျိုးဆက်ကို ပိုင်ဆိုင်ထားသည့် ဂိုဏ်းသားများက အင်မော်တယ်သတ်ဖြတ်ခြင်းတမန်တော်များကို သတ်ဖြတ်ရန် တုံ့ဆိုင်းနေခဲ့ကြသည်။

နောက်ဆုံးတွင် ဂိုဏ်းတူအစ်ကိုကြီး၏ တွန်းအားကြောင့် သုံးရက်ခန့် တိုက်ခိုက်ပြီးသောအခါတွင် တုံ့ဆိုင်းစွာ သတ်ပစ်လိုက်ကြသည်။

ထို့နောက် သူတို့က နတ်ဘုရားကလန်သားနှစ်ယောက်ကို ဝိုင်းရံခဲ့ကြသည်။ အခြေအနေက ခက်ခဲ‌သော်လည်း အသက်အန္တရာယ် မရှိပေ။

ထို့အပြင် နတ်ဘုရားကလန်သားတစ်ယောက်က ကိုယ့်ကိုယ်ကိုယ် ဖောက်ခွဲရန် ကြိုးစားခဲ့သည်။ သို့သော် တခြားတစ်ယောက်က ထိန်းချုပ်ထားပြီး အသက်ချမ်းသာပေးရန် တောင်းဆိုခဲ့သည်။

သူတို့နှစ်ယောက်က အငြင်းပွားနေသောကြောင့် ရှုချယ်တို့အဖွဲ့က အကျိုးအမြတ်ရသွားသည်။

သူတို့က သုံးလကြာအောင် လှည့်ပတ်တိုက်ခိုက်ခဲ့ပြီး ကျန်းယွမ်အင်မော်တယ်ကမ္ဘာ၏ ယာယီစခန်းသို့ ရောက်လာသောအခါ တစ်ယောက်လျှင် နတ်စွမ်းအားသလင်းကျောက် ဆယ်ခုကျော်စီ ပါလာခဲ့သည်။

သူတို့က အကျိုးပြုရမှတ်များအဖြစ် ပြောင်းလဲပြီး လိုအပ်သောရတနာကို လဲလှယ်ခဲ့ကြသည်။ ထို့နောက် သူတို့၏ရမှတ်များက ဂိုဏ်း၏ရမှတ်ထဲတွင် ပါဝင်သွားပြီး အဆင့်တက်လာသည်။ ထို့ကြောင့် အင်မော်တယ်တက်လှမ်းစင်မြင့်ကို ထိန်းချုပ်ရန်အတွက် ပိုမိုနီးစပ်လာသည်။

ထိုသို့ဖြင့် ပုံရိပ်ယောင်ဆန်သော ခံစားချက်များသည် လူတိုင်းကို အားတက်စေခဲ့သည်။

အထူးသဖြင့် လိုအပ်‌သောရတနာကို ရရှိပြီး အဆင့်တက်သွားသော ရှုချယ်ကဲ့သို့လူများ ဖြစ်သည်။ သူတို့ကြောင့် ဂိုဏ်းတူညီအစ်ကိုများက ပိုမိုရူးသွပ်လာကြသည်။

ရှုချယ်က လေဟာနယ်သန့်စင်ခြင်းအဆင့်သို့ ရောက်လာပြီး ဂိုဏ်းတူညီအစ်ကိုများနှင့်အတူ အမဲလိုက်ရန် ချက်ချင်းထွက်သွားခဲ့သည်။

သို့သော် ဤတစ်ကြိမ်တွင် သူက ဂိုဏ်းတူညီအစ်ကိုများကြား၌ သိသိသာသာ အဆင့်မြင့်လာသည်။

“ဒီလိုလေ့ကျင့်မှုမျိုးနဲ့ဆိုရင် နောက်ထပ် ၂နှစ်အကြာမှာ ဖြစ်လာမယ့် ကမ္ဘာစစ်ပွဲကို စိုးရိမ်နေစရာမလိုတော့ဘူး ....”

အဖြူရောင်ဝတ်စုံနှင့် လူအိုကြီးတစ်ယောက်က စိတ်အားထက်သန်နေသော လက်ရွေးစင်များကိုကြည့်လိုက်ပြီး ခပ်ဟဟရယ်သည်။

“စိုးရိမ်ရမှာလား”

သူ့ဘေးတွင်ရှိသော အစိမ်းရောင်ချပ်ဝတ်နှင့် ကျင့်ကြံသူက ခေါင်းခါသည်။

“အဲဒီအကြီးအကဲက နတ်ဘုရားကလန်ရဲ့ဝင်္ကပါကို တစ်ချက်တည်းဖျက်ဆီးလိုက်တယ်။ မူယန်အင်မော်တယ်ကမ္ဘာက ကြောက်နေပြီ”

“ဒီစစ်ပွဲက လေ့ကျင့်ဖို့အတွက်ပဲဖြစ်ပြီး အစစ်အမှန်အကျိုးအမြတ်မပါဘူးလို့ သူတို့က တခြားအင်မော်တယ်ကမ္ဘာတွေကို ပြောထားတယ်”

သင်္ချိုင်းအင်မော်တယ်မြို့၏ စောင့်ရှောက်သူက အလွန်သန်မာကြောင်း လူတိုင်းသိကြသည်။ သို့သော် ထိုစောင့်ရှောက်သူက မြို့အပြင်ဘက်သို့ ထွက်မလာပေ။

ယခုအချိန်တွင် နတ်ဘုရားကလန်၏ စစ်တပ်ဝင်္ကပါကို တစ်ချက်တည်း ဖျက်ဆီးပြလိုက်သောကြောင့် ဤလေ့ကျင့်မှုကို အာရုံစိုက်ထားသော အင်မော်တယ်ကမ္ဘာများက ကြောင်အသွားကြသည်။

အကယ်၍ ထိုလူက သူတို့၏ အင်မော်တယ်ကမ္ဘာကို လာရောက်တိုက်ခိုက်လျှင် သူတို့က မည်သို့ ခုခံရမည်နည်း။ မည်သို့ ခုခံနိုင်မည်နည်း။

သူတို၏ခေါင်းကို ဆက်သလိုက်ရုံသာ ရှိသည်။

....

ဟန်မူယဲ့က ကျန်းယွမ်အင်မော်တယ်ကမ္ဘာ၏ လေ့ကျင့်မှုနှင့် အင်မော်တယ်ကမ္ဘာစစ်ပွဲကို စိတ်မဝင်စားပေ။

သူက ကိုးထပ်ဓားမျှော်စင်ရှစ်ခုကို ရရှိထားသည်။

နောက်ဆုံးတစ်ခုသည် လူသားကမ္ဘာတွင် ရှိသည်။

သူက လူသားကမ္ဘာမှ ထွက်လာ‌သောအခါတွင် ကိုးထပ်ဓားမျှော်စင်ကို တာအိုဘိုးဘေးချီယု၏လက်ထဲတွင် အပ်ခဲ့သည်။

ယခုအချိန်တွင် သူက ကိုးထပ်ဓားမျှော်စင်ရှစ်ခုကို ပိုင်ဆိုင်ထားသောကြောင့် ထိုမျှော်စင်များကို ပေါင်းစပ်လိုက်လျှင် နောက်ဆုံးကျန်ရှိနေသော ဓားမျှော်စင်၏ တည်နေရာကို အာရုံခံနိုင်သည်။

တစ်နည်းပြောရလျှင် သူက လူသားကမ္ဘာသို့ ပြန်သွားနိုင်မည်။

သူက ယခုအချိန်ကို အတော်ကြာအောင် စောင့်ဆိုင်းနေခဲ့ရသည်။

အင်မော်တယ်ကမ္ဘာတွင် တစ်နှစ်သည် လူသားကမ္ဘာတွင် နှစ်တစ်ရာ ဖြစ်သည်။ သူက အင်မော်တယ်ကမ္ဘာတွင် နှစ်ပေါင်းနှစ်ဆယ်ခန့် နေထိုင်ခဲ့သောကြောင့် လူသားကမ္ဘာတွင် နှစ်ပေါင်းနှစ်ထောင်နီးပါး ဖြစ်နေလိမ့်မည်။

သူက သူတို့၏အခြေအနေကို သိချင်မိသည်။ ဟွမ်ခြောက်နှင့် တခြားလူများ၏ ကျင့်ကြံခြင်း။ မူဝမ်၏ အာခီမီစွမ်းရည်၊ ကျစ်ဟူ၏ တာအိုလက်တွဲဖော်၊ လုကော၊ လေ့ကျင့်ရေးမှူးလင်း၊ ဆရာမော့ယွမ်နှင့် အကြီးအကဲ ကောင်းချန်ကုန်း ....

နောက်ဆုံးတွင် သူက အိမ်ပြန်သွားနိုင်တော့မည်။

အိမ်က မည်သည့်အရာ ဖြစ်သနည်း။

ကောင်းကင်အံ့ဖွယ်ကမ္ဘာ၏ အနောက်ဘက်နယ်စပ်ကုန်းမြေမှ အံ့ဖွယ်ကိုးပါးတောင် မဟုတ်ပေ။ သုံးထပ်ဓားစံအိမ်လည်း မဟုတ်ပေ။

ကောင်းကင်ရင်းမြစ်ကမ္ဘာ၏ အထက်ဘုံနှင့် နန်းမြို့တော်လည်း မဟုတ်ပေ။

နန်းမြို့တော်တွင်ရှိနေသော အာခီမီကံကြမ္မာစံအိမ်လည်း မဟုတ်ပေ။

အိမ်သည် လူများ ဖြစ်သည်။

သူနှင့်အတူ လျှောက်လှမ်းခဲ့ဖူးသော လူများ ....

ဟွမ်ခြောက်၊ ကောင်းချန်ကုန်း၊ မူဝမ်၊ ကျစ်ဟူ ....

ယခုအချိန်တွင် ဟန်မူယဲ့က ချစ်လှစွာသော အစ်ကိုကြီးလုယွီကျိုး၏ အတွေးများကို အနည်းငယ် နားလည်သွားသည်။

ကျင့်ကြံခြင်းသည် ကောင်းမွန်သော်လည်း လူသားကမ္ဘာသည် ပိုမိုကောင်းမွန်သည်။

နန်းမြို့တော်၏ အပြင်ဘက်တွင်ရှိသော ယုံတင်းမြစ်တွင် သူ့ကိုစောင့်ဆိုင်းနေသော အမျိုးသမီးတစ်ယောက် ရှိသည်။

သူ၏ကျင့်ကြံဆင့်က လျင်မြန်စွာတိုးတက်လာပြီး ကိုးထပ်ဓားမျှော်စင်ကဲ့သို့ ရတနာကို ရရှိထားသော်လည်း သူ့စိတ်အခြေအနေက အနည်းငယ် မငြိမ်မသက် ဖြစ်လာသည်။

သို့သော် ဟန်မူယဲ့က ဂရုမစိုက်ပေ။

သူက ခဏတာ ရူးသွပ်နိုင်သည်။

ထိုသို့ မျှော်လင့်တမ်းတသော ခံစားချက်မျိုးသည် သူ့ကို လူသားတစ်ယောက်ဟု ခံစားရစေသည်။

သူက လက်မြှောက်သည်။ သူ့ရှေ့တွင်ရှိသော ကိုးထပ်ဓားမျှော်စင်က ပျောက်ကွယ်သွားသည်။

သူက ဖြည်းဖြည်းချင်း မတ်တပ်ရပ်လိုက်သည်။ ရွှေရောင်ချပ်ဝတ်နှင့် နတ်ဘုရားသတ်ဖြတ်ခြင်းရုပ်သေးရုပ် ပေါ်လာသည်။

“ငါက တကယ်ပဲ မင်းနဲ့ မလိုက်ခဲ့ရဘူးလား”

ရုပ်သေးရုပ်၏အသံသည် အနည်းငယ် အက်ကွဲနေသည်။

“မင်းရဲ့အခြေအနေက ထူးဆန်းနေတယ် ....”

ရုပ်သေးရုပ်က ရပ်တန့်လိုက်ပြီး ညင်သာစွာ ဆက်ပြောသည်။

“သူထွက်သွားတုန်းက ငါ့ကိုကြည့်ခဲ့တဲ့ ပုံစံအတိုင်းပဲ”

ဟန်မူယဲ့က ညင်သာစွာပြုံးလိုက်ပြီး ခေါင်းခါသည်။

“ကျွန်တော်က လူသားကမ္ဘာကို သွားမှာပါ။ အဲဒီမှာ ကျွန်တော့်ကို အန္တရာယ်ပေးနိုင်တဲ့လူ မရှိဘူး”

သူက ကောင်းကင်အင်မော်တယ် လေဟာနယ်ဖွဲ့စည်းခြင်းအဆင့်တွင် ရှိနေသည်။ သူ၏ဝိညာဉ်နှင့် ရုပ်ခန္ဓာက ရွှေအမြုတေအဆင့်တွင် ရှိသည်။ အကယ်၍ သူက အစွမ်းကုန်ထုတ်သုံးလိုက်လျှင် ရွှေအင်မော်တယ် အထွတ်အထိပ်အဆင့် ကျင့်ကြံသူကိုပင် တိုက်ခိုက်နိုင်သည်။

လွန်ခဲ့သောနှစ်များတွင် သူက အင်မော်တယ်သခင်များကိုပင် သွယ်ဝိုက်၍ သတ်ဖြတ်ခဲ့သည်။

သူ၏ ကျင့်ကြံဆင့်နှင့်ဆိုလျှင် လူသားကမ္ဘာတွင် ကြောက်စရာမရှိပေ။

“ကျွန်တော်က သင်္ချိုင်းအင်မော်တယ်မြို့တော်ကို ခင်ဗျားဆီမှာ အပ်ခဲ့မယ်”

သူက ရုပ်သေးရုပ်ကို ခေါင်းညိတ်ပြလိုက်ပြီး တဲအိမ်ထဲမှ ထွက်သွားသည်။

“အစ်ကိုကြီးက သင်္ချိုင်းအင်မော်တယ်မြို့ကနေ ထွက်သွားတော့မှာလား”

ဟန်မူယဲ့က ကျောက်ချန်ကို ပြောပြလိုက်သောအခါတွင် ကျောက်ချန်က ကြောင်အသွားသည်။

“အခု သင်္ချိုင်းအင်မော်တယ်မြို့က အရမ်းတိုးတက်နေပြီ။ အစ်ကိုကြီးက ဒီမှာပဲ ကျင့်ကြံလို့မရဘူးလား”

ကျောက်ချန်က နားမလည်နိုင်စွာ ပြောသည်။

ရိုးရိုးသားသားပြောရလျှင် သူက ဤသို့ တိုးတက်မှုမျိုးကို တစ်ခါမှ မကြုံတွေ့ဖူးပေ။

သူက အရင်းအမြစ်အများအပြားကို ထိန်းချုပ်ထားပြီး တခြားကျွမ်းကျင်သူများ၏ရှေ့တွင် ယုံကြည်ချက်ရှိစွာ ရပ်နိုင်လိမ့်မည်ဟု မျှော်လင့်မထားခဲ့ပေ။ အဓိကဂိုဏ်းကြီးများကပင် သူ့ကို ဂုဏ်သရေရှိ ဧည့်သည်တော်တစ်ဦးအဖြစ် သတ်မှတ်ကြသည်။

သို့သော် ထိုအရာများအားလုံးသည် သူ့အစ်ကိုကြီး၏ ကျေးဇူးကြောင့်ဖြစ်ကြောင်း နားလည်ထားသည်။

ယွင်လန်ဓားအင်မော်တယ် မရှိလျှင် သူ ကျောက်ချန်က ဘာမှမဟုတ်ပေ။

ဟန်မူယဲ့က ဆုံးဖြတ်ပြီးသားဖြစ်ကြောင်း မြင်လိုက်ရသောအခါတွင် ကျောက်ချန်က အံကြိတ်ထားပြီး ပြောသည်။

“အစ်ကိုကြီးက ဘယ်သွားမှာလဲ။ ကျွန်တော်လည်း လိုက်မယ်”

ဟန်မူယဲ့က ကျောက်ချန်၏ ပြတ်သားသောပုံစံကို မြင်လိုက်ရသောအခါတွင် ပခုံးပုတ်ပြီး ပြောသည်။

“ငါက အိမ်ပြန်ပြီး မင်းရဲ့မရီးကို သွားတွေ့မလို့ပါ။ မင်းက ဘာဖြစ်လို့ လိုက်ချင်ရတာလဲ”

ကျောက်ချန်က အံ့အားသင့်သွားသည်။

ဟန်မူယဲ့က ပြုံးလိုက်ပြီး တံဆိပ်ပြားတစ်ခုကို ပေးသည်။

“ဒါက တရားဝင်အကြီးအကဲတံဆိပ်ပြားပဲ။ ဒါနဲ့ဆိုရင် မင်းက အကြီးအကဲကျီယုတို့ကို သက်သေထားပြီး တခြားဂိုဏ်းတွေနဲ့ စီးပွားရေးလုပ်နိုင်တယ်”

“တကယ်လို့ တစ်ခုခုဖြစ်လာရင် အကြီးအကဲရုပ်သေးရုပ်ကို အကူအညီတောင်းလို့ရတယ်။ ငါက သူ့ကို ပြောထားပြီးပြီ”

ဟန်မူယဲ့က ကြောင်အနေသောကျောက်ချန်ကို ကြည့်လိုက်ပြီး တည်ငြိမ်စွာပြောသည်။

“သင်္ချိုင်းအင်မော်တယ်မြို့မှာ ငါမရှိရင်တောင် မင်းကို ဘယ်သူကမှ မလေးမစားမလုပ်ရဲပါဘူး”

ဟန်မူယဲ့ ထွက်သွားသောအခါတွင် ကျောက်ချန်က တောင့်တင်းနေသောမျက်နှာကို ပွတ်သပ်လိုက်ပြီး လက်ထဲတွင်ရှိသော တံဆိပ်ပြားကို မယုံကြည်နိုင်စွာ ကြည့်သည်။

“အစ်ကိုကြီး၊ ဒီတံဆိပ်ပြားနဲ့ဆိုရင် အကြီးအကဲရုပ်သေးရုပ်ကို အချိန်မရွေး ဆင့်ခေါ်နိုင်တာလား”

“ဟားဟား၊ ဒါက တကယ်ပေါ့”

ထို့နောက် စိတ်လှုပ်ရှားနေသော ကျောက်ချန်က တစ်ကိုယ်လုံး တုန်ခါသွားသည်။ သူက တီးတိုးရေရွတ်သည်။

“မရီးလား”

“မဟုတ်သေးဘူး။ ငါက မရီးအတွက် လက်ဆောင်ပြင်ထားရမယ်။ တူတွေ၊ တူမတွေရော ရှိသေးတာလား”

“ဘာကို လက်ဆောင်ပေးရမလဲ”

....

ဟန်မူယဲ့က သေရည်အိုးကိုင်ထားပြီး အသစ်ပြုပြင်ထားသော မြို့တံတိုင်းဆီသို့ လျှောက်သွားသည်။

ဆံပင်ဖြူနေသော ဝိညာဉ်ဓားအင်မော်တယ်က လှုပ်ရှားလိုက်ပြီး ဟန်မူယဲ့၏ လက်ထဲတွင်ရှိသော သေရည်အိုးကို ဆွဲယူသည်။

ဟန်မူယဲ့က အပြုံးတစ်ခုနှင့်အတူ မြို့တံတိုင်းတွင် ထိုင်လိုက်သည်။

ဝိညာဉ်ဓားအင်မော်တယ်က သေရည်အိုးကိုဖွင့်လိုက်ပြီး မော့သောက်သည်။

“ဖွီ၊ ဒါက ဘာသေရည်လဲ။ အရသာလည်းမရှိဘူး”

ဝိညာဉ်ဓားအင်မော်တယ်က အထင်သေးသောမျက်နှာထားဖြင့် ပြောသည်။

“အသည်းကွဲသေရည်ပါ”

ဟန်မူယဲ့က ညင်သာစွာပြောသည်။

“ကျွန်တော့်ရဲ့ ဂိုဏ်းတူအစ်ကိုတစ်ယောက်က ဂိုဏ်းတူအစ်မတစ်ယောက်ကို ပေးခဲ့တယ်”

“အသည်းကွဲသေရည်လား”

ဝိညာဉ်ဓားအင်မော်တယ်က သေရည်အိုးကို အနံ့ခံကြည့်လိုက်ပြီး တစ်ငုံသောက်သည်။

“ဒါက ရေပဲမဟုတ်ဘူးလား”

သူက ရေရွတ်လိုက်ပြီး သေရည်အိုးကို လှုပ်ခါသည်။

“အသည်းကွဲသေရည်ကို ဝမ်းနည်းနေတဲ့လူတွေပဲ သောက်နိုင်တယ်”

ဟန်မူယဲ့က အပြုံးတစ်ခုနှင့်အတူ တီးတိုးပြောသည်။

“အကြီးအကဲက အသည်းမကွဲဖူးတော့ ဒီသေရည်ကို အရသာခံနိုင်မှာမဟုတ်ဘူး”

သူ့စကားကို ကြားလိုက်ရသောအခါတွင် ဝိညာဉ်ဓားရွှေအင်မော်တယ်၏ မျက်နှာထားက ထူးဆန်းလာသည်။

“အသည်းကွဲတာလား”

“ဘာဖြစ်လို့ အသည်းကွဲရမှာလဲ”

“ငါ .... ငါက ဓားတစ်လက်ပဲမဟုတ်လား ....”

“အကြီးအကဲ၊ ကျွန်တော် ဘယ်ကနေရောက်လာတာလဲ သိလား”

ဟန်မူယဲ့က အဝေးတစ်နေရာကို ကြည့်လိုက်ပြီး ညင်သာစွာပြောသည်။

“ကျွန်တော်က လူသားလောကရဲ့ ကောင်းကင်အံ့ဖွယ်ကမ္ဘာကနေ ရောက်လာခဲ့တာ”

အနောက်ဘက်နယ်စပ်ကုန်းမြေ၊ ဓားစံအိမ် ....

ဟွမ်ခြောက်နှင့် လုချန်းဖျင် ....

ဟွမ်ကျစ်ဟူနှင့် မူဝမ် ....