စဥ်းစားစရာ

လူတိုင်း မပြောနှင့် ချင်းယိုးတောင် သူမနှလုံးသားထဲမှာ ရှုပ်ထွေးနေခဲ့သည်။ မတိုင်ခင်က ကျောင်းအုပ်ကြီး ဘာလုပ်ခဲ့လဲ သူမလည်း မသိခဲ့ချေ။ ဉာဏ်ပညာ အလင်းက သူမ၏ စိတ်ထဲသို့ ထိုးဖောက်ဝင်ရောက် လာသော်လည်း ၎င်း၏ တိကျသော သက်ရောက်မှုများကို သူမ မသိပေ။

အရင်ကရော နောက်ရော အပြောင်းအလဲတွေ ရှိခဲ့ရင်တောင် လုံးဝမခံစားရဘူး။ ကျောင်းအုပ်ကြီးထံမှ မယုံကြည်နိုင်လောက်အောင် အံ့သြဖို့ကောင်းသော အသံကို နားထောင်​ကြည့်လိုက်သည်။

"သွား.... ကိုယ့်ကိုကိုယ် ယုံကြည်လိုက်.... စင်မြင့် နံပါတ် ၁၈ ကို ရွေး... မင်း သေချာပေါက် အနိုင်ရလိမ့်မယ်"

ချင်းယိုး စင်မြင့်ဆီသို့ လျှောက်သွားတာကို မြင်တော့ ကျူးချွဲ့ကျောင်းတော်မှ လူ ဆယ်ယောက်စလုံး စိတ်လှုပ်ရှားလာခဲ့ကြပြီး ၎င်းတို့၏ ကိုယ်ပိုင်ခွန်အားကို ပြသလာခဲ့သည်။

ဒီအဆင့်ကို ရောက်ပြီဆိုရင် နောက်ဆုံး ၃၂ ယောက်ထဲ ပါဝင်လာဖို့က ဘယ်သူမှ အတင်းလုပ်ယူလို့ မရဘူး။ တခြားသူတွေ သူတို့ကို သတိပြုမိရင် သူတို့ကလည်း တခြားသူတွေကိုလည်း စောင့်ကြည့်နေရမည်။

ဒီလူတွေ အားလုံးဟာ သူတို့ရဲ့ ပြိုင်ဘက်တွေပဲ။ ထိပ်ပိုင်းကိုရောက်ပြီး သက်ဆိုင်ရာ ခွန်အားအဆင့်တွေမှာ ပထမဆုံးလူ ဖြစ်လာမယ်ဆိုရင် ပြိုင်ဘက်တွေရဲ့ အင်အားကို သဘာဝကျကျ နားလည်လာပါလိမ့်မည်။

ချင်းယိုးရဲ့ အင်အားကို သူတို့ ပြတ်ပြတ်သားသား မြင်နိုင်ပါ၏။ ကျောင်းတော် အသီးသီးရှိ မျိုးဆက်သစ် ကျောင်းသား အနည်းငယ်မှလွဲ၍ ကျန်အားလုံးမှာ အလွန်ပင် အရည်အချင်း ရှိကြသည်။

ပြိုင်ဘက်တွေထဲက ဘယ်သူကမှ ချင်းယိုးဆီက အရွေးမခံချင်ကြဘူး။ နောက်ဆုံးတော့ သူမ နိုင်သည်ဖြစ်စေ ရှုံးသည်ဖြစ်စေ အခြားသူတွေရဲ့အမြင်မှာတော့ ရွေးချယ်ခံရသူက သူတို့ထဲမှာ အညံ့ဆုံးဆိုတာ သိသာလေပြီ။

ကျောင်းအုပ်ကြီး၏ ညွှန်ကြားချက်အတိုင်း ချင်းယိုးသည် တူယွမ်ရှိရာ ကွင်းဆီသို့ ဦးစွာလျှောက်သွားကာ ခဏမျှ တုံ့ဆိုင်းသွားပြီးမှ စင်မြင့် နံပါတ် ၁၈ရှိရာသို့ ရောက်လာကာ စင်မြင့်သခင်ကို နှုတ်ဆက်လိုက်သည်။

"ကျေးဇူးပြုပြီး ညွှန်​ပြပေးပါဦး"

စင်မြင့်ကို သိမ်းပိုက်ထားသူမှာ ကျူးချွဲ့ကျောင်းတော်မှ ကျော်ကြားသော ပါရမီရှင်တစ်ဦး ဖြစ်သည့် နမ်းကုန်းရင် ဟုခေါ်သော အမျိုးသမီး ကျောင်းသူဖြစ်သည်။

ချင်းယိုးက သူမကို အမှန်တစ်ကယ် ရွေးချယ်ခဲ့တာကို မြင်လိုက်ရတော့ ပထမတော့ သူမ အနည်းငယ် ထိတ်လန့်သွားပြီး နောက်တော့ အရှက်ကွဲသလို ခံစားလိုက်ရကာ ဒေါသလှိုင်းတွေ ထိုးတက်လာခဲ့သည်။

သူမက ပြင်းပြင်းထန်ထန် ဒေါသတကြီး ဟစ်အော်လိုက်သည်။

"ညွန်ပြရမယ်ပေါ့?? ဟုတ်ပြီ... ငါ့ကိုရွေးချယ်ခဲ့လို့ မင်းဘယ်လောက် အမှားကြီး လုပ်ခဲ့မိလဲဆိုတာ နားလည်အောင် ညွန်ပြပေးလိုက်မယ်"

လေးလံသော ခြေလှမ်းတို့ဖြင့် သူမ၏ ခန္ဓာကိုယ်မှ အားကြီးသော စွမ်းအားကြီးတစ်ခု ထွက်ပေါ်လာပြီး ထူထဲသော တောင်တန်းတစ်ခုလို ဓားကို ထုတ်ကာ ချင်းယိုးကို ခုတ်ချလိုက်သည်။

အနေအထားကို ကြည့်လျှင် ချင်းယိုးကိုသာ မသတ်ရပါက သူမ၏အရှက်နှင့် ဒေါသကို ထုတ်ပြောရန် မလုံလောက်ကြောင်း ထင်ရှား​လေသည်။

ဟုတ်တယ် ရှက်တာကလည်း ဒေါသကို ပေါက်ကွဲစေတာပဲ။

နမ်းကုန်းရင်သည် သူမ၏ ငွေရောင်သွားများကို ကြိတ်ရင်း သူမ၏ လှပသော ပါးပြင်များ နီမြန်းနေခဲ့သည်။ သူမလက်ဖျံနှင့် နောက်ကျောရှိ သွေးကြောများ ဖောင်းကားနေသည်။ သူမ၏ လက်ဆစ်များ ဖြူဖျော့နေကာ သူမ အလွန်ရှက်ပြီး ဒေါသထွက်နေသည်မှာ သိသာလှသည်။

နမ်းကုန်းရင်၏ ဒေါသကို ခံစားလိုက်ရတဲ့ တခြားသူများ အချင်းချင်း စာနာကြသော်လည်း မှင်တက်သွားကြသည်။

ပထမဆုံးအနေနဲ့ နမ်းကုန်းရင်က ဘယ်သူလဲ?

ယခုအချိန်တွင် ထျန်းလုံမြို့ အတွင်းအပြင်နှင့် အနီးတစ်ဝိုက်တွင် ရေပန်းအစားဆုံး အကြောင်းအရာမှာ ကျောင်းတော် လေးခုကြားက ပြိုင်ဆိုင်မှု ဖြစ်သည်။ ပါဝင်သည့် ကျောင်းသားအားလုံး၏ အချက်အလက်ကို ရှာဖွေခြင်းသည် လူအများအတွက် ရေပန်းအစားဆုံး ဖြစ်လာ၏။

တချို့သော လူများသည် ကျောင်းတော် အသီးသီး၏ မျိုးစေ့သခင်များကို အသေးစိတ် မိတ်ဆက်ပေးသည့် စာရင်းများကို တမင်တကာပင် ပြုလုပ်ခဲ့ကြသည်။ ဘယ်သူက သန်မာပြီး ဘယ်သူက အားနည်းတယ်။ ဘယ်သူက အထူးကျွမ်းကျင်မှုတွေ ရှိပြီး ထူးကဲတဲ့ နေရာတွေ ရှိတယ်။

ဒါတွေ အားလုံးကို စာရင်းမှာ ဖော်ပြထားလေသည်။

ကျူးချွဲ့ကျောင်းတော်တွင် တူယွမ်သည် သဘာဝအားဖြင့် သူတော်စင်တစ်ပိုင်း အဆင့်၆များကြားတွင် နံပါတ်တစ် မျိုးစေ့​ဖြစ်သည့် သိုင်းသမား ဖြစ်သော်လည်း နမ်းကုန်းရင်က နောက်တွင် ရှိနေသည်။

ထို့ကြောင့် ချင်းယိုးသည် နမ်းကုန်းရင်၏ စင်မြင့်ကို အမှန်တကယ် ရွေးချယ်ခဲ့တာကြောင့် ဒါက ဘာကိုဆိုလိုတာလဲ ဆိုတဲ့ အဓိပ္ပာယ်များစွာက စဥ်းစားစရာ ​ဖြစ်နေ၏။

ချင်းယိုးရဲ့ အရည်အချင်းက ထူးထူးခြားခြား ဖြစ်ပြီး သူမ ခွန်အားက မပျော့ပေမယ့် နမ်းကုန်းရင်နဲ့ ယှဉ်ရင် သဘောတူနိုင်တဲ့ လူတွေက နည်းလှသည်။

ချင်းယိုးကိုယ်တိုင်လည်း ဒါကိုသိလေ၏။ ဒါပေမဲ့ အခုက ကျောင်းရဲ့ ဂုဏ်သိက္ခာနဲ့ ကျောင်းအုပ်ကြီးတွေကြားက လောင်းကစား တစ်ခုလည်း ဖြစ်နေတော့ ချင်းယိုး သူမအစွမ်းအစကို ထုတ်ဖော်ပြသဖို့ သိပ်စိတ်မပူဘဲ နမ်းကုန်းရင်ထံ သွားခဲ့သည်။

ဒါပေမဲ့ ချင်းယိုး အခုလို ယုံကြည်မှုရှိနေတာ ထျန်းလုံကျောင်းတော်ရဲ့ ကျောင်းအုပ်ကြီးဆီက ညွှန်ကြားချက်ကြောင့် ဖြစ်နိုင်လား။ နမ်းကုန်းရင်ရဲ့ အားနည်းချက်ကို မြင်လိုက်ရလို့ ချင်းယိုးကို ပြိင်ပွဲမှာ အနိုင်ရဖို့ လမ်းညွှန်ပေးလိုက်တာများလား။

ဒါပေမဲ့ ချင်းယိုးတစ်ယောက် တူယွမ်ရှေ့ကို တမင်ရည်ရွယ်ပြီး လမ်းလျှောက်သွားတာကရော ဘာကိုဆိုလိုတာလဲ? ထျန်းလုံကျောင်းအုပ်က တူယွမ်ရဲ့ အမှားတချို့ကို မြင်ခဲ့တာရော ဖြစ်နိုင်မလား။

ချင်းယိုးသည် တူယွမ်ကို ရင်ဆိုင်ဖို့ ခွန်အားမရှိမှာ စိုးရိမ်သောကြောင့် သူ တုံ့ဆိုင်းသွားပြီး တူယွမ်ကို လက်လွှတ်ခဲ့တာ ဖြစ်နိုင်သည်။

ပရိသတ်၏ သံသယများ မည်သို့ပင် ရှိစေကာမူ နမ်းကုန်းရင်သည် ဒေါသအမျက်ထွက်ကာ အနည်းငယ်မျှ ဂရုမစိုက်ဝံ့ဘဲ ချင်းယိုးကိုပဲ အာရုံစိုက်နေခဲ့သည်။

ချင်းယိုးဟာလည်း ထုံးစံအတိုင်း နမ်းကုန်းရင်ရဲ့ နာမည်ကို ကြားဖူးပြီး တခြားသူများနှင့် တိုက်ခိုက်သည့် ပွဲစဉ်ကို မြင်ဖူးသောကြောင့် သူမသည် နမ်းကုန်းရင်၏ ပြိုင်ဘက် မဟုတ်ကြောင်း သူမ သိလိုက်သည်။

သူမကို ရွေးချယ်ဖို့ စေခိုင်းခဲ့တဲ့ ကျောင်းအုပ်ကြီးရဲ့ စိတ်ကူးက လုံးလုံးလျားလျား အံ့သြစရာ ကောင်းလှသည်။

ကျောင်းအုပ်ကြီးက သူမ သေချာပေါက် အနိုင်ရရမယ်လို့ ပြောတဲ့အတွက် ကောင်းကောင်း ကြိုးစားရမည်သာ။

သူမ နောက်ကျောမှ ဓားတစ်ချောင်းကို အမြန်ဆွဲထုတ်ကာ ဘေးသို့ ခြေတစ်လှမ်း ဆုတ်ကာ နမ်းကုန်းရင်၏ လည်ပင်းကို ဓားထိပ်ဖြင့် ဓားဖြင့်ထိုးလိုက်သည်။

ထုံးစံအတိုင်း သူမသည် နမ်းကုန်ရင်၏ ဓားဖြစ်သော ကော့ရှန်ဓားကို တိုက်ခိုက် ထိတွေ့ခွင့် မပြုဝံ့ချေ။ လူကအမည်ဆို ဓားက အရိပ်ပင်။ ယခင်က နမ်းကုန်းရင်၏ ကော့ရှန်ဓားကို လျှော့တွက်ဝံ့သူတိုင်းသည် အကြိမ်ပေါင်းများစွာ ပြင်းပြင်းထန်ထန် ဒဏ်ရာရခဲ့သည်။

နမ်းကုန်းရင်ကို တိုက်ခိုက်ရန် အလွန်ကောင်းမွန်သော ခံစစ်စွမ်းရည်ကို အားကိုးခဲ့သော ရွှမ်ဝူကျောင်းတော်မှ ကျောင်းသားတစ်ဦး ရှိခဲ့သည်။ သူသည် နမ်းကုန်းရင်နှင့် အမှန်တကယ် ပြင်းပြင်းထန်ထန် တိုက်ခိုက်ခဲ့သော်လည်း သတိလစ်လုနီးပါး ဖြစ်သွားခဲ့သည်။

အကြီးအကဲ တစ်ယောက်သာ ဝင်မပါခဲ့ရပါက သူ့ရဲ့ကျင့်ကြံမှု တစ်ဝက်လောက် ကွဲအက်သွားလိမ့်မည်။

နမ်းကုန်းရင်ရဲ့ လှုပ်ရှားမှုများသည် အလွန် အံ့သြဖွယ် ကောင်းသည်။ သူသည် ချင်းယိုးရဲ့ ဓားချက်ကို လျစ်လျူရှုကာ ကော့ရှန်ဓားဖြင့် သူ၏စွမ်းအင်ကို အကြီးအကျယ် ထုတ်လွှတိလိုက်သည်။ ရုတ်တရက် ချင်းယိုး၏ အကြွင်းအကျန် ရုပ်ပုံမှာကိုသာ ဓားဖြင့် ထိုးမိပြီး ဓားချက်က မြေပြင်ကို ထိမှန်ကာ ကွင်းတစ်ခုလုံး တုန်လှုပ်သွားသည်။

ထိုမြင်ကွင်းကြောင့် လူတိုင်း အံ့အားသင့်သွားကြသည်။ နောက်ဆုံးတွင် ဤ​​ပြိုင်ပွဲစင်​မြင့်များသည် အခင်းအကျင်း ပုံစံများဖြင့် ကာကွယ်ထားလို့ အခင်းအကျင်းတွင် ပြဿနာမရှိလျှင် စင်မြင့်လည်း ဘယ်တော့မှ ဖျက်ဆီးသွားမည် မဟုတ်ပေ။

နမ်းကုန်ရင်သည် သူတော်စင်တစ်ပိုင်း အဆင့်၆ ကျင့်ကြံသူ ဖြစ်ပြီး မျဉ်းစောင်းတစ်ချက်ဖြင့် စွမ်းအင် အသွင်အပြင်ကို အမှန်တကယ် ပြောင်းလဲနိုင်သည်။ သူမခွန်အားက တချို့သော သူတော်စင်တစ်ပိုင်း အဆင့်၉များထက် မနည်းပေ။

ဖွဲ့စည်းမှုကို ပြုပြင်ပြောင်းလဲနိုင်ခဲ့ပြီး တန်ခိုးတော်သည် အချို့သော သူတော်စင် နဝမအဆင့် ပြည့်စုံသော ရဟန်းတော်များထက် မနည်းပေ။

“ဒီကလေးမလေးက ဘယ်လိုလုပ် ဒီလောက်တောင် အစွမ်းထက်လာတာလဲ”

လူတိုင်းအတွက် မေးခွန်းတစ်ခု ဖြစ်လာခဲ့သည်။ ယခင်က ဓားချက်များကို ကြည့်ပြီး နမ်းကုန်းရင်ဟာ သူမခွန်အားကို ဆက်လက် ထိန်းသိမ်းထားဆဲ ဖြစ်ကြောင်း ထင်ရှားလေ၏။

ချင်းယိုး ထိတ်လန့်သွားပြီး နမ်းကုန်းရင်ကို သတိထားပြီး စိုက်ကြည့်ရင်း ရှောင်ဖို့ စင်​မြင့်အစွန်းအထိ နောက်ပြန်ဆုတ်သွားသည်။ တစ်ဖက်လူ လှုပ်ရှားလိုက်သည်နှင့် အန္တရာယ် တစ်စုံတစ်ရာ ရှိလာမည်ကို သူမ သိနိုင်လောက်အောင် ကံကောင်းသော်လည်း သူမသည် နမ်းကုန်းရင်ရဲ့ ပြိုင်ဘက် မဟုတ်မှန်းတော့ သေချာပေါက်သိသည်။

အရှုံးပေးရမှာလား?

ဘယ်လိုလုပ် ဖြစ်နိုင်မှာလဲ? သေရင်တောင် ခေါင်းချင်းဆိုင် တိုက်ခိုက်ဖို့ပဲ လိုတယ်။

ချင်းယိုးရဲ့ မျက်လုံးတွေ ပူလောင်နေပြီး သူမဆံပင်တွေက ရုတ်တရက် လေတိုက်ခတ်သွားသလို လွင့်လူးသွားကာ သူမရဲ့ တိုက်ခိုက်ရေး စိတ်ဓာတ်ကလည်း မြင့်မားလာခဲ့သည်။

သူမလက်ကို လှုပ်ရှားလိုက်သည်နှင့် သူမလက်မှ ရေလှိုင်းများ စီးကျလာသည်။ ခဏကြာတော့ စင်မြင့် တစ်ခုလုံးသည် ရေများပြည့်လျှံနေသကဲ့သို့ ပြာလဲ့သွားသည်။

ချင်းယိုးသည် ရေထဲတွင် ရပ်တန့်လျက် သူမ၏ရုပ်သွင်ဟာ တရိပ်ရိပ် ပျောက်ကွယ်သွားခဲ့သည်။

နမ်းကုန်းရင် အံ့သြသွား၏။ ​စင်မြင့် တစ်ခုလုံးတွင် ဘာအရိပ်အယောင်မှ မရှိပေ။ ချင်းယိုး ရေထဲသို့ လုံးဝ အရည်ပျော်သွားသည်ကို စောင့်ဆိုင်းပြီးနောက် သူမက အေးစက်စွာ ပြောလိုက်သည်။

"ရေအခင်းအကျင်း ပုံစံကိုသုံးမယ်ပေါ့... နင်က မဆိုးပါဘူး ဒါပေမဲ့ နင်ငါ့ကို ရွေးချယ်ခဲ့တာ မှားတာပဲ!"

လူသည် အကြွင်းမဲ့အာဏာနှင့် ရင်ဆိုင်ရလျှင် ရှိသမျှ နည်းလမ်းများ ထုတ်သုံးလျှင်လည်း အသုံးမဝင်နိုင်ပေ။

"ချိုးဖျက်စေ!"

နမ်းကုန်းရင် လက်ထဲမှ ကော့ရှန်ဓားဆီမှ ရွှေရောင် အလင်းတန်းများ တောက်ပလာသည်။ တစ်ဖက်ကို ထောင့်ဖြတ် ခုတ်ထစ်လိုက်ကာ အပြာရောင် ရေထဲတွင် တိတ်တဆိတ် ထွက်ပေါ်လာခဲ့သော ရုပ်ပုံမှာ ချင်းယိုးပဲ ဖြစ်သည်။

ရွှေရောင် အလင်းတန်းသည် ချင်းယိုး၏ ခန္ဓာကိုယ်ကို ဖြတ်ဝင်သွားကာ စင်မြင့်၏ အလင်းမျက်နှာပြင်ကို ရိုက်ခတ်သွားခဲ့သည်။