ကမ္ဘာအမြုတေ

အမှောင်မြောက်အင်မော်တယ်က ထန်ရှုကို အပြည့်အဝမယုံကြည်သော်ငြား သူက အရေအတွက်ကို မစစ်ဆေးဘဲ သိုလှောင်လက်စွပ်ကို တန်းကာ သိမ်းလိုက်သည်။ ထန်ရှုမှာထားသည့်အင်မော်တယ်လက်နက်များ၊ ချပ်ဝတ်များနှင့်အခြားလက်နက်များက သူ့ဂိုဏ်းထဲတွင် ရှိနေသေးသောကြောင့် ဤကိစ္စနှင့် ပတ်သက်၍ ထန်ရှုက သူ့အား မလိမ်လောက်ဟု သူက ယုံကြည်သည်။

“မင်းက ဘယ်သွားမလို့လဲ၊ မဟာထန်အင်မော်တယ်ရောင်းရင်း။ ငါ့ကို မင်းနဲ့အတူ လိုက်သွားစေချင်လား”

“အဲလောက်ထိ မလိုပါဘူး၊ ငါ ကျေးဇူးတင်ပါတယ်”ထန်ရှုက လက်ဝှေ့ယမ်းပြကာ ပြောလိုက်သည် “မင်းရဲ့ဂိုဏ်းကို အင်မော်တယ်ပုံဆောင်ခဲနှစ်သိန်းပေးခဲ့ရတဲ့အတွက် ငါက ထပ်ဆင်းရဲသွားပြန်ပြီ။ ဒါကြောင့် ကြည်လင်ရေကလန်က အနီးနားမှာ ရှိလောက်မယ်လို့ ငါ စဉ်းစားနေတယ်၊ ဟုတ်လား။ ငါတို့ အဲကို သွားမယ်။ သူတို့က ငါတို့လောက် မဆင်းရဲနေဖို့ မျှော်လင့်ပါတယ်”

အမှောင်မြောက်အင်မော်တယ်၏မျက်လုံးများက တောက်ပသွားပြီး သူက နက်ရှိုင်းသောအသံနှင့် ပြန်ဖြေသည် “မင်းက သည့်ပြင်တစ်နေရာကို သွားမယ်ဆိုရင် ငါတို့က ဝင်မစွက်ဖက်ပါဘူး၊ မဟာထန်အင်မော်တယ်ရောင်းရင်း။ ဒါပေမယ့် မင်းက ကြည်လင်ရေကလန်ကို သွားမယ်ဆိုရင် ငါ့ဂိုဏ်းကို လက်စားချေဖို့ အခွင့်အရေးပေးဖို့ ငါ မျှော်လင့်ပါတယ်။ မင်း စိတ်ချပါ၊ သူတို့ရဲ့ကြွယ်ဝမှုတွေအားလုံးကို မင်း ရမှာပါ”

ထန်ရှုက မျက်မှောင်ကြုတ်ကာ ပြောလိုက်သည် “ဒါပေမယ့် လက်ရှိအချိန်မှာ မင်းရဲ့လက်နက်ဂိုဏ်းက သန့်စင်ခြင်းကို အာရုံစိုက်နေရတယ်မလား…”

“ငါ့ဂိုဏ်းမှာ ရွှေအင်မော်တယ်ဘိုးဘေးလေးယောက်ရှိတယ်။ သူတို့အားလုံးက မင်းနဲ့အတူ သွားမယ်ဆိုရင် အချိန်အများကြီး ဖြုန်းတီးလိမ့်မှာ မဟုတ်ဘူး။ လဝက်နဲ့တင် လုံလောက်မယ်လို့ ငါ ထင်တယ်”အမှောင်မြောက်အင်မော်တယ်က ပြန်ဖြေသည်။

ခဏစဉ်းစားပြီးနောက် ထန်ရှုက ခေါင်းညိတ်လိုက်သည် “လက်စားမချေဖို့ မင်းကို တားတာက အတော်လေးမသင့်လျော်ဘူး။ ကောင်းပြီလေ၊ ဒါဆို ငါတို့ အတူတူသွားကြတာပေါ့”

“ဟုတ်ပြီလေ”အမှောင်မြောက်အင်မော်တယ်က ဝမ်းသာအားရ ရယ်လိုက်လေသည်။

သူက ကြည်လင်ရေကလန်ကို မုန်းသည်။ တကယ်တော့ သူက သူတို့၏လက်ထဲတွင် သေလုနီးပါးဖြစ်ခဲ့ရသည်မဟုတ်လော။

ရုတ်တရက် ထန်ရှု၏အမူအရာက ပြောင်းလဲသွားသည်။ ထို့နောက် သူက ကူးယန်အာကို ကြည့်ကာ ပြောလိုက်၏ “ယန်အာ၊ နောက်ကျရင် မင်းက လက်နက်ဂိုဏ်းရဲ့ဘိုးဘေးတွေနဲ့ လိုက်သွားပါ။ ပစ္စည်းအချို့ သန့်စင်ဖို့အတွက် ငါ ဒီနေရာမှာ နေခဲ့မယ်”

ကူးယန်အာက ထန်ရှု၏ဆုံးဖြတ်ချက်ကို မငြင်းပယ်ဘဲ ပြုံးကာ ခေါင်းညိတ်လိုက်သည် “ဒါဆို ငါ့ဆီက သတင်းကောင်းကို စောင့်နေပါ၊ ဆရာသခင်”

နောက်တွင် ကူးယန်အာက လက်နက်ဂိုဏ်း၏ဘိုးဘေးလေးယောက်နှင့်အတူ ထွက်ခွာသွားပြီး ထန်ရှုက အမှောင်မြောက်အင်မော်တယ်၏နွေးထွေးသောဧည့်ခံမှုအောက်တွင် ဆက်နေခဲ့သည်။

ကြက်သွေးရောင်ချောက်ကမ်းပါးစံအိမ်။

ဤလိုဏ်ဂူစံအိမ်က လက်နက်ဂိုဏ်း၏ဂိုဏ်းချုပ်များအတွက် နေထိုင်ရာအဖြစ် သတ်မှတ်ထားသည်မှာ ကြာလှပြီ။ လိုဏ်ဂူတွင် မြေကြောကျောက်ရည်ပူနှင့်၎င်းထဲတွင်မွေးဖွားလာသောယန်ကိုးခုခရမ်းရောင်မီးလျှံရှိသောကြောင့် ဤနေရာက သန့်စင်ဖို့အတွက် အကောင်းဆုံးနေရာတစ်ခုဖြစ်သည်။ ယန်ကိုးခုခရမ်းရောင်မီးလျှံ၏တည်ရှိမှုကြောင့် သန့်စင်သောပစ္စည်းများက တူညီသော်ငြား ဤလိုဏ်ဂူထဲတွင် သန့်စင်သော အသုံးအဆောင်ပစ္စည်းများ၏အရည်အသွေးက အနည်းဆုံးတစ်ဆင့်ပိုမြင့်မားသည်။

အတိအကျပြောရလျှင် လက်နက်ဂိုဏ်း၏သံမဏိစည်းမျဉ်းက အပြင်လူများအတွက် ကြက်သွေးရောင်ချောက်ကမ်းပါးစံအိမ်ကို ဖွင့်ပေးခြင်းမှ တားမြစ်ထားသည်။ သို့သော် အမှောင်မြောက်အင်မော်တယ်နှင့်ဘိုးဘေးလေးယောက်တို့ ဆွေးနွေးပြီးနောက် အကြောင်းပြချက်သုံးချက်ကြောင့် ထန်ရှုကို ဤနေရာကို အသုံးပြုခွင့်ပေးရန် ဆုံးဖြတ်ခဲ့သည်။ ပထမအကြောင်းပြချက်က ထန်ရှု၏အကြီးအကဲက သူတို့ကို ပေးခဲ့သည့် ဂိုဏ်း၏အပြောင်မြောက်ဆုံးသန့်စင်ခြင်းစာလိပ်ကြောင့် ဖြစ်သည်။ ဒုတိယတစ်ခုက ထန်ရှုက အမှောင်မြောက်အင်မော်တယ်နှင့်အပူအပင်မဲ့တို့ကို ကယ်ခဲ့သည့် ကျေးဇူးတရားကြောင့် ဖြစ်၏။ တတိယတစ်ခုက သူတို့က ထန်ရှု၏သန့်စင်ခြင်းကျွမ်းကျင်မှုအဆင့်ကို မြင်ချင်သောကြောင့်ပင်။

ကြက်သွေးရောင်ချောက်ကမ်းပါးစံအိမ်ထဲတွင် အမှောင်မြောက်အင်မော်တယ်က ထန်ရှုကို လမ်းညွှန်ပေးခဲ့ပြီး သန့်စင်ခြင်းအတွက် ပစ္စည်းအချို့ကို စာရင်းပြထားသည်။ သို့သော် သန့်စင်ခြင်းပစ္စည်းစာရင်းကို ရရှိချိန်တွင် အမှောင်မြောက်အင်မော်တယ်၏မျက်နှာပေါ်တွင် ခါးသီးသောအပြုံးမှ လွဲ၍ အခြားအမူအရာမရှိပေ။

“ဒီပစ္စည်းသုံးမျိုး၊ ကြည်လင်ကောင်းကင်သဲ၊ အနီရောင်ရွှေသန့်နဲ့ မဲနယ်ရောင်ပင်ဂွင်းငှက်အကြောမျှင်တွေက အလွန်တန်ဖိုးရှိပြီး ရှားပါးတဲ့ရတနာတွေပဲ။ ငါ့ရဲ့လက်နက်ဂိုဏ်းမှာမပြောနဲ့ မြစ်ကောင်းကင်ပိုက်နက်မှာတောင် ဒီပစ္စည်းတွေ ရှိတဲ့သူရှိမယ်လို့ ငါ မထင်ဘူး။ မဟာထန်အင်မော်တယ်ရောင်းရင်း၊ သူတို့ကို အခြားပစ္စည်းတွေနဲ့ အစားထိုးဖို့ ဖြစ်နိုင်လား”ရှက်ရွံ့သောမျက်နှာနှင့် အမှောင်မြောက်အင်မော်တယ်က ခါးသီးစွာ ပြုံးလျက် မေးလိုက်သည်။ သို့သော် သူက ဂိုဏ်း၏သမိုင်းတစ်ခုကို ရုတ်တရက် အမှတ်ရလိုက်သည်။ ယခင်က ဤမဟာထန်ကောင်းကင်ဘုံအင်ပါယာ၏ဘိုးဘေးဖြစ်သည့်ထိုဆန်းကြယ်သောစွမ်းအားရှင်လည်း သူ့ဂိုဏ်းသို့ လာခဲ့ချိန်တွင် သန့်စင်ခြင်းပစ္စည်းအချို့ကို လိုအပ်ခဲ့သည်။ နောက်ဆုံးတွင် သူတို့က ထိုပစ္စည်းများကို မကြားဖူးသောကြောင့် သူ့ဂိုဏ်း၏အကြီးအကဲများက မထောက်ပံ့ပေးနိုင်ခဲ့ပေ။

မကျေမနပ်အကြည့်တစ်ခုက ထန်ရှု၏မျက်လုံးများထဲတွင် လက်သွား၏ “ဒါဆို ခင်ဗျားရဲ့ဂိုဏ်းမှာ အခြားဘာပစ္စည်းတွေ ရှိလဲ။ ကျုပ်ကို ပြကြည့်ပါ။ ဒါပေမယ့် အမှိုက်ပစ္စည်းတွေကိုတော့ ကျုပ်ကို မပြပါနဲ့”

အမှောင်မြောက်အင်မော်တယ်က တုံ့ဆိုင်းသွားပြီးနောက် နောက်ဆုံးတွင် ခေါင်းညိတ်လိုက်သည်။ သူ့ဂိုဏ်းတွင် အလွန်အမင်းတန်ဖိုးရှိသောသန့်စင်ခြင်းပစ္စည်းခြင်းအချို့ရှိသော်လည်း ထိုပစ္စည်းများ၏တန်ဖိုးက ဘယ်သူ့ကိုမဆို ထိတ်လန့်တုန်လှုပ်စေရန် လုံလောက်သည်။ သို့သော် သူ့ဂိုဏ်း၏တန်ဖိုးကြီးသန့်စင်ခြင်းပစ္စည်းများကို အကြောင်းပြချက်မရှိဘဲ ထန်ရှုက အလွဲသုံးစားပြုလိမ့်မည်မဟုတ်ဟု သူက ယုံကြည်သည်။

“ငါနဲ့ လိုက်လာပါ”

သက်ပြင်းတစ်ချက်ရှိုက်ပြီးနောက် အမှောင်မြောက်အင်မော်တယ်က မီတာရာချီလျှောက်သွားပြီး လိုဏ်ဂူနံရံတစ်ခု၏အရှေ့တွင် ရပ်တန့်လိုက်သည်။ ထို့နောက် သူက မန္တန်တစ်ခုကို ထုတ်ဖော်လိုက်သည်၊ နံရံက ရုတ်တရက် ပွင့်ကာ လူနှစ်ယောက်ဘေးချင်းယှဉ်လျှောက်ရန် လုံလောက်သည့် လမ်းတစ်ခုကို ထုတ်ပြလိုက်၏။

လမ်းက အတွင်းပိုင်းရှိ လျှို့ဝှက်ခန်းတစ်ခုသို့ ဉီးတည်ထားသည်။

လျှို့ဝှက်ခန်းထဲသို့ ဝင်လာပြီးနောက် ထန်ရှု၏မျက်လုံးများက အကာအကွယ်များလွှမ်းခြုံထားသည့်နေရာဆယ်ခုဆီသို့ ရိုက်ခတ်သွားသည်။ ထို့နောက် ချက်ချင်းလျှင်ပင် သူ့မျက်လုံးများက အတွင်းဘက်ထောင့်တစ်ခုရှိ ဘောလုံးအရွယ်အစားဧရိယာတစ်ခုပေါ်သို့ ကျရောက်သွားသည့်အခိုက်တွင် အံ့အားသင့်သောအကြည့်တစ်ခုက သူ့မျက်နှာပေါ်တွင် ရုတ်တရက် ထွက်ပေါ်သွား၏။

ကမ္ဘာအမြုတေလား။

ထန်ရှုက မသိစိတ်အရ လျှောက်လာပြီး အကာအကွယ်၏အရှေ့တွင် ရပ်ကာ ရေရွတ်လိုက်၏။

အမှောင်မြောက်အင်မော်တယ်က ခေါင်းရှုပ်သွားသည်။ သူက ထန်ရှုဘက်သို့ လှည့်ကာ မေး၏ “မဟာထန်အင်မော်တယ်မိတ်ဆွေ၊ ဒီပစ္စည်းနဲ့ ပတ်သက်ပြီး မင်းသိထားတာ တစ်ခုခုရှိလား”

ထန်ရှုက အမှောင်မြောက်အင်မော်တယ်အား ကြည့်ကာ အံ့အားသင့်စွာ မေးလိုက်သည် “ဒီပစ္စည်းနဲ့ ပတ်သက်ပြီး ခင်ဗျား ဘာမှ မသိတာလား”

အမှောင်မြောက်အင်မော်တယ်က ခေါင်းခါယမ်းလိုက်သည် “မသိဘူး။ ငါပဲ မဟုတ်ဘူး၊ ဘိုးဘေးလေးယောက်လဲ ဒါနဲ့ ပတ်သက်ပြီး မသိဘူး။ အရိုးသားဆုံးပြောရရင် ဒီပစ္စည်းက အခြားပစ္စည်းတွေနဲ့ အရမ်းသဟဇာတဖြစ်တယ်။ ယင်နဲ့ယန်ဂုဏ်သတ္တိတွေပါတဲ့ပစ္စည်းတွေကတောင် သန့်စင်ခြင်းဖြစ်စဉ်မှာ အတူတကွ ပေါင်းစပ်နိုင်တယ်။ ဒါကြောင့် ဒီသတ္တုကို အရမ်းတန်ဖိုးရှိတယ်လို့ ငါတို့ ကောက်ချက်ချခဲ့တာပဲ။ ဒါကြောင့် ဒီနေရာမှာ ရတနာတစ်ခုအဖြစ် ထားထားတာ”

ထန်ရှုက အကူအညီမဲ့သလို ခံစားလိုက်ရသည်။ ဒီလိုအန္တိမရတနာတစ်ခုကို အင်မော်တယ်ဂိုဏ်းတွင် သဟဇာတဖြစ်စေရန်အတွက်သာ အသုံးပြုသည်။ ဒါက ရတနာတစ်ခုကို ဖြုန်းတီးခြင်းမည်ပေ၏။

ဒါက ကမ္ဘာအမြုတေ…ဤပစ္စည်းကို အလွန်ကြွယ်ဝသောမြေဒြပ်စင်ရှိသည့်ဂြိုလ်တစ်ခုမှသာ ရရှိနိုင်သည်။ ဒီလိုကမ္ဘာအမြုတေဖြစ်လာသည်နှင့် ထိုဂြိုလ်ပေါ်ရှိ အင်မော်တယ်တစ်ယောက်က နတ်ဘုရားတစ်ယောက်အဖြစ် တက်လှမ်းနိုင်ပေလိမ့်မည်။ အခြားစကားဖြင့်ဆိုရလျင် ဤပစ္စည်းက နတ်ဘုရားများအတွက် အပေါင်းအဖော်တစ်ယောက်ပမာ ဖြစ်၏။

ဤပစ္စည်းကို အခြားအင်မော်တယ်များက သိရှိခဲ့လျှင် အင်မော်တယ်ကမ္ဘာတစ်ခုလုံးက သွေးလွှမ်းမိုးသွားရပေလိမ့်မည်၊ အန္တိမအရှင်များကဲ့သို့ ကြောက်စရာကောင်းသောတည်ရှိမှုများပင် ပါဝင်လာပေလိမ့်မည်။

သိလိုသောမျက်နှာနှင့် အမှောင်မြောက်အင်မော်တယ်က မေးလိုက်သည် “မဟာထန်အင်မော်တယ်မိတ်ဆွေ၊ မင်း ငါ့ကို မပြောရသေးဘူးနော်၊ ဒီပစ္စည်းက အတိအကျဘာလဲ”

ထန်ရှုက သက်ပြင်းတစ်ချက်ရှိုက်ကာ အလေးအနက်ထားလျက် ပြန်ဖြေသည် “ဒီပစ္စည်းက ကြောက်စရာကောင်းတဲ့တည်ရှိမှုတွေကတောင် လိုချင်တဲ့ အံ့ဖွယ်ရတနာတစ်ခုပဲ။ အမှောင်မြောက်အင်မော်တယ်၊ မင်း ဒါကို ငါ့ဆီ ရောင်းချဖို့ မျှော်လင့်တယ်”

“ဒါက…”

အမှောင်မြောက်အင်မော်တယ်က အားတင်းပြုံးလိုက်သည် “မဟာထန်အင်မော်တယ်မိတ်ဆွေ၊ ငါ့ဂိုဏ်းမှာ တန်ဖိုးရှိတဲ့သန့်စင်ခြင်းပစ္စည်းအနည်းငယ်ပဲ ရှိတယ်၊ ပြီးတော့ အခြားပစ္စည်းတွေကို သန့်စင်တဲ့အခါမှာ ဓာတ်ကူပစ္စည်းအနေနဲ့ ဒါကို လိုအပ်တယ်၊ မဟုတ်ရင် သူတို့ကို သန့်စင်ဖို့က ငါတို့အတွက် မဖြစ်နိုင်ဘူး”

“ပစ္စည်းတိုင်းမှာ တန်ဖိုးတစ်ခုရှိတယ်၊ တစ်ခုတည်းသောပြဿနာက ၎င်းရဲ့ကိန်းဂဏန်းပဲ”ထန်ရှုက ခဏစဉ်းစားပြီးနောက် ပြန်ဖြေသည် “ငါ မင်းကို အမှန်တရားကနေ မဖုံးကွယ်ပါဘူး။ ဒီပစ္စည်းက အရမ်းတန်ဖိုးရှိတယ်၊ ဒါပေမယ့် အဲဒါက မင်းရဲ့လက်ထဲမှာ လုံးဝဖြုန်းတီးမှုတစ်ခုပဲ၊ ဒါကြောင့် ငါ့ကို ရောင်းတာ ပိုကောင်းတယ်။ ဒါကို ဝယ်ဖို့ အမြောက်အများပေးဖို့ ငါ ဆန္ဒရှိတယ်”

“တန်ဖိုးက ဒီလောက်တောင် မြင့်တာလား”အမှောင်မြောက်အင်မော်တယ်က အားတင်းပြုံးကာ ပြန်ဖြေ၏ “မင်းမှာ အင်မော်တယ်ကျောက်တုံးတွေ ဒါမှမဟုတ် ပုံဆောင်ခဲတွေ မရှိတော့ဘူးမလား။ မင်းက ဒါကို အခြားတစ်ခုခုနဲ့ အလဲအလှယ်လုပ်ချင်တာလား”

ထန်ရှုက ခဏနှုတ်ဆိတ်သွားပြီးနောက် သိုလှောင်လက်စွပ်တစ်ကွင်းကို လျင်မြန်စွာ ယူထုတ်ကာ ပြောလိုက်၏ “ဒီလက်စွပ်မှာ အင်မော်တယ်ပုံဆောင်ခဲငါးသိန်းရှိတယ်။ ဒီကမ်းလှမ်းမှုက မလုံလောက်ဘူးလို့ မင်း ထင်ရင် ငါ့မှာ အင်မော်တယ်ကျောက်တုံးသန်းနှစ်ဆယ်ရှိတယ်၊ ဒါက အင်မော်တယ်ပုံဆောင်ခဲနှစ်သိန်းရှိမှာပေါ့။ ဒီလိုပမဏက ဒါကို ဝယ်ဖို့ လုံလောက်မယ်ထင်ပါတယ်”

ယခု အမှောင်မြောက်အင်မော်တယ်က လုံးဝတုန်လှုပ်သွားတော့သည်။ သူက ထန်ရှုကို စိုက်ကြည့်ကာ ပြောလိုက်၏ “မင်းက ဒီလောက်များတဲ့အင်မော်တယ်ကျောက်တုံးတွေနဲ့ပုံဆောင်ခဲတွေကို ယူထုတ်နိုင်သေးတာလား။ ပြီးခဲ့တဲ့လအနည်းငယ်အတွင်း မင်း ဘာတွေ လုပ်ခဲ့တာလဲ။ မင်းက စူပါဂိုဏ်းကြီးအချို့ရဲ့ရတနာသိုက်များ ဖောက်ထွင်းခဲ့တာလား”

“ငါတို့က အော်ရစ်ရင်းမြစ်အချို့ကို ရပြီး သူတို့ကို ကောင်းကင်စပျစ်နွယ်စံအိမ်မှာ ရောင်းချခဲ့တယ်”ထန်ရှုက ပြန်ဖြေသည် “အော်ရစ်ရင်းမြစ်ရဲ့တန်ဖိုးကို မင်းလဲ သိမှာပါ”

အမှောင်မြောက်အင်မော်တယ်၏အမူအရာက ပြောင်းလဲသွားကာ ကမန်းကတန်း မေးလိုက်သည် “အော်ရစ်ရင်းမြစ်လား။ မင်းက ဘယ်လောက်ထိ ရခဲ့တာလဲ။ အိုး ဘုရားသခင်…အဲဒီပစ္စည်းက အင်မော်တယ်တွေအားလုံးရရှိဖို့ အိပ်မက်မက်နေတဲ့ တန်ဖိုးအရှိဆုံးပစ္စည်းပဲ။ ဒါက ငါတို့လိုလူတွေ ဝယ်နိုင်တဲ့အရာမဟုတ်ဘူး”

ထူးဆန်းသောအလင်းတစ်ခုက ထန်ရှု၏မျက်လုံးများထဲတွင် လက်သွားကာ သူက မေးလိုက်၏ “ဖြစ်နိုင်တာက မင်းက ဒီအော်ရစ်ရင်းမြစ်ကို လိုအပ်တာလား”

“ဒါပေါ့၊ ငါ အဲဒါကို လိုအပ်တယ်”အမှောင်မြောက်အင်မော်တယ်က အံ့အားသင့်စွာ ပြော၏ “အော်ရစ်ရင်းမြစ်ကို ရမယ်ဆိုရင် နောက်ထောင်စုနှစ်အတွင်းမှာ ငါက ရွှေအမြုတေနှောင်းပိုင်းအဆင့်ကို ချိုးဖြတ်နိုင်ပြီး နောက်ကျရင် ပြီးပြည့်စုံခြင်းရွှေအင်မော်တယ်အဆင့်ကို ရောက်ရှိဖို့တောင် မျှော်လင့်နိုင်တယ်။ မဟာထန်အင်မော်တယ်မိတ်ဆွေ…မင်း…ဒီတန်ဖိုးရှိတဲ့ရတနာကို ဘယ်လိုရောင်းမှာလဲ။ မင်းက ဆန္ဒရှိရင် ငါ့မှာ ရှိသမျှ ကြွယ်ဝမှုအားလုံးကို ပေးပြီး ဝယ်မှာပါ”

“ဒါဆို အော်ရစ်ရင်းမြစ် ဒါမှမဟုတ် အင်မော်တယ်ပုံဆောင်ခဲခုနှစ်သိန်းမှာ ဘယ်တစ်ခုက မင်းအတွက် ပိုအရေးကြီးလဲ”ထန်ရှုက ထူးဆန်းသောလေသံနှင့် မေး၏။

“ဒါပေါ့၊ အင်မော်တယ်ပုံဆောင်ခဲက ပိုအရေးကြီးတာပေါ့”အမှောင်မြောက်အင်မော်တယ်က တုံ့ဆိုင်းခြင်းမရှိ ပြော၏ “မင်းက အင်မော်တယ်ပုံဆောင်ခဲတွေကို ရရှိဖို့ နည်းလမ်းတစ်ခုကို ရှာနိုင်ပေမယ့် အော်ရစ်ရင်းမြစ်ကို လွဲချော်တာက နောက်တစ်ကြိမ်ရောက်လာဖို့အလွန်ခက်ခဲတဲ့အခွင့်အရေးတစ်ခုပဲ”

အနည်းငယ်ပိုအားနည်းသောအင်မော်တယ်များအတွက် အော်ရစ်ရင်းမြစ်၏ကြီးမားသောဆွဲဆောင်မှုကို သူက ကောင်းကောင်းသိသော်လည်း ဆွဲဆောင်မှုက ဒီလောက်ကြီးမားလိမ့်မည်ဟု သူက မမျှော်လင့်ထားခဲ့ပေ။ သူက အော်ရစ်ရင်းမြစ်ကို ကောင်းကင်စပျစ်နွယ်စံအိမ်ထံ ရောင်းချခဲ့သော ဈေးနှုန်းက နိမ့်လွန်းသည်ဟု သူက ရုတ်တရက် ခံစားမိလိုက်သည်။

ထို့နောက် သူက ခေါင်းခါယမ်းကာ သူ့စိတ်ထဲရှိ အတွေးကို မောင်းထုတ်လျက် အမှောင်မြောက်အင်မော်တယ်ကို ပြန်ကြည့်လိုက်သည် “ငါ မင်းကို အခွင့်ကောင်းမယူပါဘူး။ ငါ မင်းကို အော်ရစ်ရင်းမြစ်နှစ်ခုပေးမယ်၊ မင်း ငါ့ကို ဒီပစ္စည်း ပေးပေါ့။ အပေးအယူဖြစ်လား”

“ဘာ…”

အမှောင်မြောက်အင်မော်တယ်က အလွန်တရာအံ့အားသင့်သွားသည်။ ထန်ရှုထံတွင် အော်ရစ်ရင်းမြစ်အချို့ ရှိသေးမည်ဟု သူက မမျှော်လင့်ထားခဲ့ပေ။ အရေးကြီးဆုံးကတော့ အော်ရစ်ရင်းမြစ်က သူ့မျက်လုံးထဲတွင် အင်မော်တယ်ပုံဆောင်ခဲခုနှစ်သိန်းထက် ပိုအရေးကြီးသည်ဟု ပြောခဲ့သော်လည်း ထန်ရှုက အစိတ်အပိုင်းနှစ်ခုကို ထုတ်ကာ သူနှင့် အလဲအလှယ်လုပ်ရန် ဆန္ဒရှိနေသေးခြင်းဖြစ်၏။