နတ်တောင်တန်းပြိုကျခြင်း

ဓားစွမ်းအင်က ဖန်းမင်ယန်ရဲ့ ခန္ဓာကိုယ်ကို တစ်ချက်ပြီး တစ်ချက် ထိသွားသည်။ ဒီနေရာက တောင်ထိပ်ရောက်လုနီးပါး ရှိပေမယ့် တောင်ခြေက ဓားစွမ်းအင်ထက်တော့ မသက်သာပါဘူး။ အရည်အသွေး ဖြစ်စေ အစွမ်းအစဖြစ်စေ သာလွန်ကောင်းမွန်သည်။

လုရွှမ် ယခုအခါတွင် ဓားသိုင်းပညာတွင် လွန်ကဲစွာ နားလည်ထားသော နတ်ဘုရားတစ်ပါးလို ဖြစ်နေပြီ။ တစ်ခါတစ်ရံ ခုခံရန် လိုအပ်သော်လည်း ရက်စက် ကြမ်းကြုတ်သော စွမ်းအားသည် ​လေထုအတွင်း အက်ကွဲသွားသကဲ့သို့ ထက်မြက်ပြီး ရပ်တန့် မသွားနိုင်ပေ။

ယခုအခါတွင် ဖန်းမင်ယန်သည် ဆက်လက်၍ တွန်းလှန်​နေခဲ့ပြီး သူ့​ခန္ဓာကိုယ်ပေါ်တွင် သွေးစွန်းထင်းမှုများ ရှိနေသည်။

နောက်တစ်ခုက ရူးသွပ်စွာ တိုက်ခိုက်နေတုန်း သူ့မျက်လုံးတွေက သွေးတွေနဲ့ ပြည့်နှက်နေပြီး ပတ်ဝန်းကျင်ကို အစွမ်းကုန် တိုက်ခိုက်နေတယ် ဆိုတာ သိသာပါသည်။

လုရွှမ် ဂူပေါက်ဝကို ပိတ်ဆို့လိုက်ပြီး ဖန်းမင်ယန် ရူးသွပ်သွားတာကို ကြည့်​​နေလိုက်သည်။

မကြာမီတွင် နောက်ထပ် ဓားတစ်ချောင်းက သူ့အား ထိမှန်သွားတာကို တွေ့လိုက်ရပြီး ဖန်းမင်ယန်ရဲ့ ခန္ဓာကိုယ်တစ်ဝက်ကို ကွဲထွက်လုမတတ် နာကျင်သွားစေသည်။ လုရွှမ် ရှေ့သို့လှမ်းကာ ဓားနှင့်ထိုးတော့မယ့် အချိန်မှာပဲ ရုတ်တရက် ဖန်းမင်ယန်ရဲ့ မျက်လုံးများက ပြန်လည် ကြည်လင်လာကာ သူ့ခန္ဓာကိုယ်အောက်သို့ အေးစက်သည့် အလင်းလှိုင်းများ ကျဆင်းသွားကာ တိုက်ခိုက်ခြင်းကို ရပ်လိုက်သည်။

သူက လုရွှမ်ကို ထိတ်လန့်စွာ ကြည့်ကာ ရုတ်တရက် မယုံနိုင်စွာဖြင့်။

"မင်းငါ့ကို ဘာလုပ်လိုက်တာလဲ?"

လုရွှမ်သည် ဖန်းမင်ယန်တစ်ယောက် ယခုအချိန်တွင် စိတ်ငြိမ်ငြိမ် ထားနေနိုင်မည်ဟု မမျှော်လင့်ထားခဲ့ပေ။ ကျိုးရန်က သူ့ကိုယ်ပေါ်မှာ ရတနာများစွာ ချန်ထားခဲ့ပုံရသည်။

"ငရဲကို သွားပေတော့!"

လုရွှမ် အော်ဟစ်လိုက်ပြီး မိုးနတ်ဘုရား ဓားဟာ ထက်မြက်တဲ့ ဓားတစ်ချောင်းလို ထွက်​ပေါ်လာကာ ဖန်းမင်ယန်ဆီ ပစ်လွှတ် ခံလိုက်ရသည်။

ရုတ်တရက် ဖန်းမင်ယန်၏ ခန္ဓာကိုယ်တစ်ဝိုက်တွင် အလင်းတန်းများ စီးဆင်းသွားပြီး နိယာမစွမ်းအင် တစ်ခုက သူ့ကို ဖုံးလွှမ်းသွားသည်။ ဓားသည် သူ့ခန္ဓာကိုယ်ကို ထိုးဖောက်ရန် ရည်ရွယ်ချက် ရှိသော်လည်း အရိပ်တစ်ခုကိုသာ ထိုးမိသွားသည်။

"ဒါက အတွင်းစိတ်နတ်ဆိုးပဲ!"

ဖန်းမင်ယန် ရုတ်တရက် တုံ့ပြန်လိုက်သော်လည်း သူ့မျက်နှာပေါ်ရှိ အနက်ရောင် စွမ်းအင်က တစ်ဖန်ပြန်လည် အားကောင်းလာပြီး သူ့ခန္ဓာကိုယ်ရဲ့ မူလစွမ်းအင် နှင့် တိုက်ခိုက်နေလေသည်။ ဖန်းမင်ယန်ရဲ့ မျက်နှာက ယင်းယန် တစ်လှည့်စီ အသွင်ပြောင်း​နေပြီး ကြည့်လိုက်ရင် အတော်လေး ကြောက်စရာကောင်းတဲ့ပုံ ပေါက်နေသည်။

ဖန်းမင်ယန်၏ ခန္ဓာကိုယ်မှ ဖြာထွက်လာသော အလင်းရောင်သည် ရုတ်တရက် အားကောင်းလာပြီး သူ့ခန္ဓာကိုယ်နှင့်အတူ ပျောက်ကွယ်သွားကာ စကားလေးတစ်ခွန်းပဲ ချန်ထားခဲ့သည်။

"မင်းတို့အားလုံး သေလိုက်ကြတော့"

ရုတ်တရက် ကျယ်လောင်သော အော်မြည်သံတစ်ခု ထွက်ပေါ်လာပြီး လုရွှမ်သည် နတ်တောင်တန်း အောက်မှ စီးဆင်းနေသော နတ်စမ်းရေတွင်းများနှင့် ကြီးမားသော ဝိညာဉ်စွမ်းအင်များ ကောင်းကင်သို့ ထိုးတက်လာတာကို မြင်တွေ့လိုက်ရသည်။ ပတ်၀န်းကျင်ရှိ ဓားစွမ်းအင်နှင့် လှံစွမ်းအင်တို့သည် အာဟာရ ပြည့်ပြည့်ဝဝ ရရှိလိုက်သလိုမျိုး အလွန် အစွမ်းထက်လာသည်။

နတ်တောင်တန်းကြီး တစ်ခုလုံး ရွှေရောင်အလင်းတန်းများ ဖြာထွက်နေပြီး ပြင်းပြင်းထန်ထန် တုန်ခါနေသည်။ အလင်းရောင်တွေကလည်း ကောင်းကင် တစ်ခွင်လုံးကို ဖုံးလွှမ်းလုနီးပါးပင်။

"အား....."

အောက်ဖက်မှ အော်သံများ ဆက်တိုက် ထွက်ပေါ်လာစဥ် ရင်းနှီးသော အသံကို ကြားလိုက်ရသောကြောင့် လုရွှမ်၏ နားရွက်များ လှုပ်ခါသွားသည်။ သူ အောက်ကို အမြန် ပြေးဆင်းကြည့်လိုက်တော့ မကြာခင်မှာပဲ လမ်းပေါ်မှာ ဓားစွမ်းအင်တွေနဲ့ ဝန်းရံခံထားရတဲ့ သူတော်စင်ကြီးတစ်စုကို တွေ့လိုက်ရ၏။

ယခုအချိန်တွင် ဓားစွမ်းအင်၏ ပြင်းထန်​နေမှုသည် အရိပ်မဲ့ စစ်သည်တော်များ ဓားများကို လက်ထဲကိုင်ဆောင်လျက် တိုက်ခိုက်နေသည့် အတိုင်းပင်။

ဓားစွမ်းအင် တစ်ခုက ကောင်းကင်ကို ဖြတ်ပျံသွားကာ လေထုထဲက နေရာလွတ် တစ်ခုကို ဖြိုခွဲပစ်လိုက်သည်။

မဟာသူတော်စင် ၈ယောက် တို့သည် အရပ်ရပ်မှ တွန်းလှန် တိုက်ခိုက်နေသော ဓားများ၊ လှံစွမ်းအင်နှင့် ဓားမြှောင်များကို အစွမ်းကုန် တွန်းလှန်ရင်း တင်းတင်းကြပ်ကြပ် ဝန်းရံထားကြသည်။ သူတို့က တောင်တံတိုင်းဆီသို့ မှီကပ်သွားချင်ကြတာကို တွေ့နိုင်၏။

သို့သော် မြေပြင်ပေါ်တွင် နှစ်ပိုင်းခွဲ ခုတ်ထစ်ခံထားရသော အလောင်းကို ကြည့်၍ သူတို့ရဲ့ ကြိုးစားမှု မအောင်မြင်နိုင်ကြောင်း ရှင်းရှင်းလင်းလင်း ပြသသွားခဲ့သည်။

"အကြီးအကဲ!"

"အကြီးအကဲလုရွှမ်ပဲ"

စိတ်လှုပ်ရှားနေတဲ့ အသံတစ်သံက ထွက်လာခဲ့သည်။ ဒီအချိန်မှာ လုရွှမ်နာမည်ကို အော်ခေါ်ရတာလောက် အရမ်း စိတ်လှုပ်ရှားနေတာမျိုး မဖြစ်ဖူးပေ။

လုရွှမ်သည် သူတို့ကို ထိတ်လန့် ခြောက်ခြားစေသော ဓားစွမ်းအင်နှင့် ဝိညာဥ်စွမ်းအင်များကို အလွယ်တကူ ဖြတ်ကျော် လာနိုင်တာကို မြင်လိုက်ရသဖြင့် အားလုံးက မျှော်လင့်ချက်များကို မြင်လိုက်ရသကဲ့သို့ စိတ်လှုပ်ရှားစွာ အော်လိုက်ကြသည်။

ဟယ့်မင်ဖုန်းက ရှေ့ဆုံးတွင် ရပ်နေကာ အရောင်မဲ့တုတ်က အရောင် သုံးရောင် တောက်ပလျက် ဓားစွမ်းအင်ကို အဆက်မပြတ် ခုခံနေပါသည်။ ကံကောင်းထောက်မစွာ သူ့လက်ထဲက လက်နက်က အားကောင်းလို့ ရှေ့ကနေ ဓားစွမ်းအင်ရဲ့ သက်ရောက်မှုကို ခံနိုင်ရည် ရှိနေခဲ့၏။

တခြား မဟာသူတော်စင် ၈ယောက်တို့သည် လက်နက်​ကောင်းများ မရှိသောကြောင့် အဆင်မပြေသော အခြေအနေတွင် ရှိနေကြသည်။

တစ်ချက် ကြည့်လိုက်တော့ သူတို့အားလုံး ဒဏ်ရာတွေ ရထားပြီး ခါးနဲ့ လက်တွေကနေ သွေးတွေ စီးကျလျက် ရှိသည်။ ဟယ့်မင်ဖုန်းသည် တွန်းလှန်ရန် အရောင်မဲ့တုတ် ရှိသောကြောင့် သူသည် ရှေ့ဆုံး၌ တွန်းလှန်နေလျှင်ပင် သူ့ခန္ဓာကိုယ်က ထိခိုက်မှု အနည်းဆုံး ဖြစ်နေသည်။

လင်ထျန်းဖောင့် နှင့် ယွမ်ဖေးရှန်းတို့ကို နောက်ကွယ်မှ လှမ်းမြင်နေရသည်။ သူတို့ ဒဏ်ရာရသွားသော်လည်း လုရွှမ်အား တိတ်တဆိတ် ကျေးဇူးတင်မိစေသူကတော့ သူတို့ကို ကာကွယ်ခဲ့သူ လျန့်ထျန်းယင်ပဲ ဖြစ်သည်။

"အားလုံး သတိထားကြပါ"

လုရွှမ် လှမ်းအော်လိုက်ပြီး လေလှိုင်းပေါ်သို့ ခြေတစ်လှမ်းတိုးကာ လူတိုင်းရှေ့သို့ အပြေးအလွှားသွားကာ မိုးနတ်ဘုရားဓားကို အထပ်ထပ် အခါခါ ဝေ့ယမ်း၍ ဓားစွမ်းအင်နှင့် လှံစွမ်းအင်များကို ဖြုတ်ချကာ လူရှစ်ယောက်ကို တောင်တံတိုင်းတွေကြားမှာ ကာထားပေးလိုက်သည်။

အဂ္ဂိရတ်ဆေးကို ထုတ်ယူပြီး ဒဏ်ရာရသူအား ပေးပြီးနောက် လုရွှမ်က ဆိုလိုက်၏။

"ငါတို့ ဒီမှာ ဆက်နေလို့ မရတော့ဘူး မြန်မြန် ထွက်သွားရမယ်"

ဒီအမှန်တရားကို လူတိုင်း သိကြသည်။ ဒီနေရာ တစ်ခုလုံးက မြေကြီးတွေ တုန်ခါနေတာကို ကြည့်လိုက်တာနဲ့ ပြိုကျပျက်စီးတော့မှာ သေချာနေပြီမလို့ ကြာကြာ ဆက်နေဖို့က အလွန်အန္တရာယ် များလှသည်။

"လုရွှမ်... ဖန်းမင်ယန်က အလင်းရောင် အားကောင်းတဲ့အခါ ပျက်စီးချိန် ရောက်ပြီလို့ ရံဖန်ရံခါပြောတတ်တာ ကျုပ် ကြားဖူးတယ်.... အဲဒါကို ကျုပ် လုံးဝနားမလည်ခဲ့ဘူး... မဟုတ်မှလွဲ...."

လူတိုင်း နှလုံးသားထဲမှာ ကြောက်ရွံ့စိတ်တွေက ကိန်းအောင်းနေပြီ။ ရင်သပ်ရှုမောဖွယ် ကောင်းတဲ့ အလင်းရောင်က အခုသူတို့ရှေ့မှာ တောက်ပနေပြီ မဟုတ်ပါလား။

လုရွှမ်က ခေါင်းညိတ်​ပြသည်။

"မှန်တယ်... ဒီပတ်ဝန်းကျင်က အခင်းအကျင်း ပုံစံတွေ ပျောက်ကွယ်နေပြီ.... ငါ့ရဲ့ ခန့်မှန်းချက်သာ မှန်မယ်ဆိုရင် ဒီနတ်တောင်တန်းက မြင့်တက်သွားလိမ့်မယ်"

"မြင့်တက်သွားမယ်? ဘယ်အထိလဲ"

လုရွှမ်ရဲ့ စိတ်ကူးနဲ့ မတူတာက ဒီမဟာသူတော်စင်တွေရဲ့ မျက်နှာတွေက ထိတ်လန့်မနေတော့ဘဲ တချို့က ပျော်တောင် ပျော်နေပုံရသည်။

လုရွှမ်က လူတိုင်းကို တစ်ချက် ကြည့်လိုက်ပြီး သူ့ရင်ထဲမှာ အနည်းငယ် အေးစက်သွားသလို ခံစားလိုက်ရ၏။

"ဘယ်လိုလုပ် ဒီလောက်လွယ်မှာလဲ? နတ်တောင်တန်းက မြင့်တက်ဖို့ အလားအလာက အောင်မြင်သွားပြီ.... ဒါပေမဲ့ ဒီတောင်ကြီးကို စွန့်ပစ်ထားတာ ကြာခဲ့ပြီ သူ့ရဲ့မူလ စွမ်းအားကလည်း ပျောက်ကွယ် လာနေတာကြာပြီ.... ဖြစ်နိုင်ချေ အရှိဆုံးအရာက လေထုထဲက အက်ကွဲကြောင်းတွေထဲ ပြုတ်ကျသွားဖို့ များတယ်... ပြုတ်ကျသွားရင် နောက်ဆက်တွဲဆိုးကျိုးတွေကို ငါ ထပ်ရှင်းပြဖို့ မလိုတော့ဘူး ထင်တယ်"

ချက်ချင်းဆိုသလိုပဲ လူတိုင်း ပါးစပ်ကို ပိတ်ထားလိုက်ကြသည်။

လုရွှမ်၏ စိတ်ဝိညာဉ် စွမ်းအားသည် ခွန်အားအပြည့်ဖြင့် ခုန်တက်သွားပြီး အရပ်ရပ်သို့ ပစ်လွှတ်လိုက်သည်။ ဤနေရာသည် နတ်တောင်တန်းကို အခင်းအကျင်း ဗဟိုအဖြစ် သုံးထားခြင်း ဖြစ်၏။ ယခုအခါ နတ်တောင်တန်းသည် မြင့်တက်တော့မလို ဖြစ်သော်လည်း လက်ရှိအရှိန်ဖြင့် ကြည့်လျှင် မြေပြင်ပေါ် ပြိုကျနိုင်ခြေ များသည်။

အဲဒီအခါ စိုးရိမ်ခြင်းမဲ့ပင်လယ်ရဲ့ အခင်းအကျင်း တစ်ခုလုံး ကွဲအက်သွားလိမ့်မည်။ ဂူထဲမှာမြင်ခဲ့ရတဲ့ ကျိုးရန်ရဲ့ ကျန်ခဲ့တဲ့စာမူကို တွေးကြည့်ရင် နတ်တောင်တန်းကြီး အပြောင်းအလဲ ဖြစ်လာတာနဲ့ စိုးရိမ်ခြင်းမဲ့ ပင်လယ်ဟာ အခင်းအကျင်းထဲက ကွဲထွက်သွားနိုင်သည်။

ထိုအခါ နတ်ဆိုး ဘီလူးတွေအားလုံး ထိန်းမနိုင်သိမ်းမရ ဖြစ်လာပြီး ဒီကျဉ်းမြောင်းတဲ့ နေရာကနေ အပြေးအလွှား ထွက်လာတော့မှာ ဖြစ်လေသည်။

စဉ်းစားကြည့်ရင် ကြောက်မက်ဖွယ် ကောင်းသော နတ်ဆိုး စပျစ်နွယ်ပင်များနှင့် ကျားဖြူလို ကောင်းကင်ဘုံသခင် နယ်ပယ်မှာ တန်ခိုးကြီးသော သူတော်စင် သားရဲများသာ စိုးရိမ်ခြင်းမဲ့ ပင်လယ်ပြင်မှ ခွဲထွက်ပြီးသည်နှင့် တိမ်ပင်လယ် နယ်မြေရှိ လူသားမျိုးနွယ် တစ်ခုလုံးအတွက် ကြောက်စရာကောင်းသော လူမျိုးတုံး သတ်ဖြတ်မှု တိုက်ပွဲကြီး ဖြစ်လာမှာ ဖြစ်သည်။

"လုရွှမ်... အကြီးအကဲ ဒီနတ်တောင်တန်း ပြိုကျတာကို ရပ်တန့်ဖို့ နည်းလမ်းရှာနိုင်မလား?"

လျန့်ထျန်းယင် မေးလိုက်သည်။

ဟုန်ချောင်ရဲ့ ဆက်ဆံရေးကို အားကိုးပြီး လုရွှမ်ကို စီနီယာတစ်ယောက်လို မဟုတ်ဘဲ သဘာဝကျကျနဲ့ စကားပြောချင်ခဲ့သည်။ ယခုမူ ယခင်က နတ်ဘုရားလို ပေါ်ထွန်းခဲ့သော လုရွှမ်ကိုကြည့်ရင်း သူတော်စင်ကြီးများ ကြားတွင် လပေါ်ရှိ ကြယ်များကဲ့သို့ပင် သူ၏ ဘုန်းအာနုဘော်သည် လျော့ပါးမသွားခဲ့ပေ။

သူမ၏တူမသည် ဒီလိုလူနှင့် မထိုက်တန်ကြောင်း နောက်ဆုံးတွင် သူမ ဝန်ခံခဲ့ရပြီ။ လုရွှမ်ကို အကြီးအကဲ​လို့ ခေါ်လိုက်ခြင်းက လုရွှမ်ရဲ့ ကိုယ်ပိုင်လက္ခဏာကို အပြည့်အဝ အသိအမှတ် ပြုလိုက်ခြင်းသာ ဖြစ်ပြီး အိမ်ထောင်ရေးကိစ္စ ဆက်ဆံရေးမျိုး မရှိပေ။

"မဟုတ်ဘူး.... ကောင်းကင်ကြီး ဓားမိုးရွာချတော့မယ်... အဲဒါက ရိုးရိုးရှင်းရှင်းပဲ ဒီအချိန်ကစပြီး တိမ်ပင်လယ်နယ်မြေကြီး ဒုက္ခရောက်တော့မယ်"

မဟာသူတော်စင် အပေါင်းတို့လည်း သက်ပြင်းချလိုက်ကြသည်။

"ဒါပေမဲ့ နတ်ဆိုးဂိုဏ်းက တိုက်ခိုက်လာမယ်ဆိုရင် ကျွန်​တော်တို့ အဲဒါကို တကယ် ရပ်တန့်နိုင်ပါ့မလား?"

ဟယ့်မင်ဖုန်းက မေးလိုက်သည်။

ဖန်းမင်ယန်နဲ့ ပဋိပက္ခက ပြည်တွင်းပဋိပက္ခမျှသာ ဖြစ်သော်လည်း နတ်ဆိုးသားရဲတွေ နတ်ဆိုးမျိုးနွယ်တွေ ထွက်ပေါ်လာတာနဲ့ တပြိုင်နက် သူတို့သည် သဘာဝအတိုင်း တိုက်ခိုက်ရန် အတူတကွ လုပ်ဆောင်ရပေလိမ့်မည်။