အခြေအနေ

ယခုတစ်ကြိမ်တွင် မန်ဟွမ်နတ်ဘုရား မျှော်စင် မွေးဖွားလာတော့မည့် သတင်းကို ကြားပြီးနောက် ဘယ်သူက စိတ်မလှုပ်ရှားဘဲ မန်ဟွမ်နတ်ဘုရား မျှော်စင်ကို တစ်ရှိန်ထိုး မသိမ်းပိုက်ချင်ဘဲ နေပါ့မလဲ။

လုရွှမ်သည် တစ်စုံတစ်ခုကို လွဲချော်သွားသလို ခံစားလိုက်ရသော်လည်း ထိုခံစားချက်က ချက်ချင်း ပျောက်ကွယ်သွားသည်။

သူ မသိသောအရာမှာ ကောင်းကင်အခွင့်အလမ်းဂိုဏ်းရှိ လူများသည် အသက်စွန့်၍ ယခုတစ်ကြိမ် မွေးဖွားလာမည့် အရာသည် မန်ဟွမ် နတ်ဘုရားမျှော်စင် မဟုတ်တဲ့ ဒြပ်စင်ငါးခု နတ်ပုတီးစေ့ ဖြစ်ကြောင်း တွက်ချက်ခဲ့သည်။ သို့သော် လုရွှမ်သည် ထိုသူစကားမပြောနိုင်မီတွင် သတ်ပစ်ခဲ့သည်။

ထုံးစံအတိုင်း ဒီလိုသတင်း တစ်ပုဒ်ကတော့ လွတ်သွားခဲ့သည်။

"ရှေး​ဟောင်း လျှပ်စီးမြို့တော်မှာရှိတဲ့ အဓိကမိသားစု ရှစ်စုကို အောင့်မိသားစုက ဦးဆောင်တယ်.... ဒါပေမဲ့ အင်အားတွေ အများကြီးပေါ်လာတော့ အောင့်မိသားစုလည်း သူတို့ရဲ့လိုအပ်ချက်တွေကို လုံး၀ မထိန်းထားနိုင်တော့ဘူး... ဟွမ်မိသားစုကလွဲလို့ တခြားမိသားစုတွေက ဝမ့်ကျစ်ကမ္ဘာကလာတဲ့ အင်အားစု၆ခုနဲ့ တွဲနေကြတယ်လို့ ကြားတယ်... အောင့်မိသားစုက သူတို့နဲ့ ယှဉ်ပြိုင်လိုတဲ့ လူတိုင်းကို အနိုင်ယူဖို့ အခွင့်အရေး လုံးဝမရှိသလောက်ပဲ"

နတ်သမီးရှန်းရှဲ့သည် သူမရဲ့ မိသားစုဟာ ​​အောင့်မိသားစုနဲ့ ရင်းနှီးတဲ့ ဆက်ဆံရေးရှိပြီး လျှို့ဝှက်ချက် တချို့ကိုလည်း သိထားတယ်လို့ ဆိုပါ၏။

မိသားစုခြောက်စု အနိုင်ရပြီးသည်နှင့် အောင့်မိသားစုက လူတိုင်းကို သတ်ပစ်မည်မှာ သေချာ​လေသည်။ ၎င်းတို့သည် ရှေးဟောင်းလျှပ်စီးကမ္ဘာကို ဝမ့်ကျစ်ကမ္ဘာရဲ့ လက်အောက်ခံ အဖြစ် ဖြစ်စေမည့် လူများ ဖြစ်ကြသည်။ သို့နှင့် ရှေးဟောင်းလျှပ်စီးကမ္ဘာတွင် နေထိုင်သူအားလုံးသည် ဒုတိယတန်းစား လူသားများ ဖြစ်လာကြလိမ့်မည်။

"​အောင့်မိသားစုက မြို့အားလုံးက နတ်မီးနယ်ပယ်က အကြီးအကဲတွေကို စုစည်းပြီး ဝမ့်ကျစ်ကမ္ဘာက အင်အားကို တိုက်ထုတ်ဖို့ ခေါ်ယူနေတယ်... ဒါပေမဲ့ အခုအချိန်အထိတော့ ငါတို့ ရရှိထားတဲ့ သတင်းက မကောင်းဘူး"

လူတိုင်းက မကူညီနိုင်ဘဲ သက်ပြင်းချလိုက်သည်။ ဒါက ဖြစ်နိုင်ပေသည်။ ကြိုးကြိုးစားစားနဲ့ သေတဲ့အထိ တိုက်ပွဲဝင်ခိုင်းချင်ပေမယ့် အောင်မြင်ဖို့ အခွင့်အလမ်း သိပ်မရှိတော့ ဘယ်သူက လုပ်ချင်မှာတဲ့လဲ။

ဂုဏ်တစ်ခု လေးစားမှုတစ်ခုပဲလေ! နတ်မီးနယ်ပယ်ရဲ့ အောင်နိုင်သူ သခင်တွေက ဒါ​တွေကို မြင်ပြီးပြီ မဟုတ်လား။

အသက်ကြီးလာလေ ဘဝကို ပိုမြတ်နိုးလေ။ သန်မာလေ သတိကြီးလေ၊ အသက်ကြီးလာလေ ရဲရင့်လေလေပါပဲ။ ဒါအမှန်တရားပဲလေ။ လောလောဆယ်တော့ အရာအားလုံးကို အောင်မြင်ဖို့ ရုန်းကန်ရခက်ပေမယ့် လွယ်လွယ်နဲ့ အရှုံးပေးလိုက်ရင်တော့ ဘယ်လိုလုပ် ဖြစ်နိုင်​တော့မလဲ။

"ဒါဆို အောင့်မိသားစုက နောက်ဆုတ်ဖို့ ဆန္ဒရှိလား"

နတ်သမီးရှန်းရှဲ့က သူမကို ခေါင်းခါယမ်းလိုက်ပြီး

"မသိဘူး ဒါပေမယ့် ​​အောင့်မိသားစုမှာ ကျွန်မတို့ မသိနိုင်တဲ့ လျှို့ဝှက်ချက်ကြီးတစ်ခု ရှိနေပုံရတယ်"

အားလုံးက သက်ပြင်းတစ်ချက်ချပြီး အောင့်ယွဲ့ကိုလည်း စိတ်ပူသွားကြသည်။

အောင့်ယွဲ့က အလွန် တာဝန်ယူတတ်သော မိန်းကလေးတစ်ဦး ဖြစ်သည်။ သူမသည် ပထမနေရာတွင် တားမြစ်ထားသောပုံစံကို ဖောက်ဖျက်ရန် ဆန္ဒရှိသကဲ့သို့ မိသားစုဒုက္ခရောက်သောအခါတွင် သူမ လုံးဝထွက်ခွာသွားမည့်သူ မဟုတ်ပေ။ သို့သော် လက်ရှိအခြေအနေကို ကြည့်လျှင် ဖြစ်နိုင်ခြေ အရှိဆုံးမှာ အောင့်ယွဲ့က သူမမိသားစုနောက်သို့ လိုက်၍ မိသားစုနှင့် ပူးပေါင်းသွားမည့်သူပင်။

"တခြားအခွင့်အရေးတွေ ရှိသေးတာလည်း ဖြစ်နိုင်တယ်"

လုရွှမ်သည် တခြားလူများကို ကြည့်ကာ ခေါင်းယမ်းလိုက်သည်။ ထိုအခိုက် ဆက်သွယ်ရေး ကျောက်စိမ်းပြားက တဖန် တောက်ပလာပြန်၏။ လုရွှမ် ၎င်းကို ယူကြည့်သော် ကောင်းကင်အရိပ်ဂိုဏ်းက နတ်သမီးကျင်းဟုန်ထံမှ သတင်းဖြစ်​နေသည်။

ဘာပဲဖြစ်ဖြစ် ဘာမှဖြစ်မလာ​​သေးတဲ့ အတွက် လူငယ်တွေလည်း လုရွှမ်နဲ့အတူ ကောင်းကင်အရိပ်ဂိုဏ်းရဲ့ အိမ်တော်ခွဲဘက်ကို ထွက်လာခဲ့ကြသည်။

ကောင်းကင်အရိပ်ဂိုဏ်းသည် အနောက်မြောက်ဘက်ရှိ ကြီးမားသော ဂိုဏ်းတစ်ခုဖြစ်သော်လည်း ရှေးဟောင်း လျှပ်စီးမြို့တော်လို ဤနေရာမျိုးတွင် သူ့နာမည်က အနည်းနှင့်အများပင် မရှိပေ။

ယခုအခါတွင် ရှေးဟောင်း လျှပ်စီးမြို့တော်သည် အစည်ကားဆုံး ဖြစ်​​နေပြီး အနယ်နယ်အရပ်ရပ်မှ အင်အားများကလည်း ဤနေရာတွင် စုရုံးနေ​ကြသည်။ လိပ်စာကို လိုက်ကြည့်ရင်း ကောင်းကင်အရိပ်ဂိုဏ်းရဲ့ နေထိုင်ရာ နေရာက အလွန်ဝေးကွာ​နေတာကို တွေ့လိုက်ရသည်။ ဂိုဏ်းချုပ်ယွင်ယင်က ရှက်ရွံ့စွာဖြင့် နှုတ်ဆက်ရန် ထွက်လာခဲ့သည်။

လုရွှမ်သည် သူမတွင် အကြီးအကဲ တစ်ယောက်ရဲ့ အရိပ်အယောင်မျိုး မရှိတာကို မြင်လိုက်ရသဖြင့် လုရွှမ်နှင့် သူ့အဖွဲ့သည် နတ်မီးနယ်ပယ်မှ အကြီးတန်းတစ်ဦးကို အမှန်တကယ်ပင် သတ်ပစ်ခဲ့ကြောင်း သူမ မယုံနိုင်ဖြစ်နေတာကို ရိပ်မိလေ၏။

"အဒေါ်ယွင်... ဒါက ကျွန်တော့်သူငယ်ချင်းတွေပါ"

လုရွှမ်က လူငယ်များကို ယွင်ယင်နဲ့ မိတ်ဆက်ပေးလိုက်သည်။

ဤလူငယ်လေးဦး၏ အမည်များကို ဂိုဏ်းချုပ်ယွင်ယင်လည်း နှစ်အတော်ကြာအောင် သဘောကျနေခဲ့သည်။ သူသည် အကြီးအကဲတစ်ဦးလို ပြုမူဝံ့ခြင်းမရှိဘဲ လူငယ်လေးဦးကို အလျင်အမြန် ကြိုဆိုခဲ့သည်။

ကောင်းကင်အရိပ်ဂိုဏ်းက သီးခြား ဥယျာဉ်တစ်ခုထဲတွင် တည်ရှိထားသည်။ ခြံဝင်းသည် ကြီးကြီးမားမား မဟုတ်ပေ။ ယွင်ယင် အပါအဝင် စုစုပေါင်း ကောင်းကင်ဘုံသခင် ခြောက်ဦး ရှိလေ၏။ ရှေးဟောင်း လျှပ်စီးမြို့တော်တွင် ထိုကဲ့သို့သော ခွန်အားမျိုးကို ရိုးရှင်းစွာ မရရှိနိုင်ချေ။

ဤနေရာ၌ ရက်အတန်ကြာ နေထိုင်ပြီးနောက် ကောင်းကင်အရိပ်ဂိုဏ်းရှိ လူတိုင်း၏ မောက်မာမှုသည် လုံးလုံးလျားလျား လျော့ကျသွားသည်။ ဖျက်စီးခြင်းနွယ်ပင် အသတ်ခံရကြောင်း ကြားသိရပြီးနောက်တွင် ဘယ်သူမှ ဒုတိယအတွေးကို မတွေးဝံ့​တော့ဘဲ ဂိုဏ်းချုပ်ယွင်ယင်ရဲ့ ညွှန်ကြားချက်ကို နာခံလာကြသည်။

လုရွှမ်သည် ​အောင်ရှင်းနှင့် နတ်သမီးကျင်းဟုန်တို့ကို လူငယ်​တွေနှင့် မိတ်ဆက်ပေးခဲ့သည်။ သူတို့အားလုံးသည် ငယ်ရွယ်သူများဖြစ်ပြီး တစ်ယောက်နှင့် တစ်ယောက် လျင်မြန်စွာ ပေါင်းသင်းနိုင်ကြသည်။

အောင်ရှင်းတို့ နှစ်ယောက်ဟာ ချစ်စရာကောင်းတဲ့ ရုပ်ရည်၊ ချစ်စရာကောင်းတဲ့ ကိုယ်ရည်ကိုယ်သွေးနဲ့ ထူးကဲတဲ့ အရည်အချင်းတွေ ရှိကြတာကြောင့် သူတော်စင် ရှန်ယီးရှောင်ဟဲနဲ့ လိရှောင်းတို့သည်ပင် စိတ်ပါလက်ပါ သဘောကျသွားခဲ့သည်။

လုရွှမ်သည် ထို​လူငယ်များစွာ၏ စရိုက်ကို နားလည်တာကြောင့် သူတို့အချင်းချင်း နားလည်စွာ လက်ထပ်နိုင်ခဲ့လျှင် လှပသော အရာ ဖြစ်လိမ့်လာမည်ဟု တွေးမိလေ၏။

လုရွှမ်နှင့် ယွင်ယင်တို့သည် ခဏလောက် စကားစမြည် ပြော​နေကြသည်။ ယွင်ယင်သည် သတင်းပေါက်ကြား​စေသော အကြီးအကဲကို သတ်ပြီးပြီဖြစ်လို့ လက်ရှိ ကောင်းကင်အရိပ်ဂိုဏ်းသည် သံစည်ကဲ့သို့ ပြေးလွှားနေပါ​ပြီ။

"မကြာသေးခင်က လူတော်တော်များများက ​နေရာအသီးသီးမှာ ပါဝင်ဖို့ ဂိုဏ်းပေါင်းစုံကို သီးသန့် ဆက်သွယ်နေကြတယ်... တချို့လူတွေလည်း ငါတို့ကို ဆက်သွယ်လာတယ်... အဒေါ် မင်းရဲ့ သဘောထားကို အရင်​မေးသင့်တယ်လို့ ထင်တယ်"

လအနည်းငယ် အတွင်းမှာပဲ လုရွှမ်ရဲ့ အမှတ်အသားဟာ ယွင်ယင်ရဲ့ မျက်လုံးထဲမှာ လုံးဝကွဲပြားသွားခဲ့သည်။ လုရွှမ်က မငြင်းဘဲ

“အဒေါ်ယွင် ကောင်းကင်အရိပ်ဂိုဏ်းက ခိုင်လုံမှု မရှိဘူး... ဘေးက ရှောင်နေတာ အကောင်းဆုံးပဲ အရင်က မန်ဟွမ်နတ်ဘုရား မျှော်စင်ကို ရနိုင်မယ်လို့ ထင်ခဲ့ပေမယ့် အခုတော့ ကျွန်တော် တွေးတောင် မတွေးချင်တော့ဘူး"

ယွင်ယင်သည် သူမ၏ ယခင် အတွေးများအတွက် ရှက်ရွံ့စွာ ပြုံးလိုက်လေ၏။ ပြင်ပကမ္ဘာကြီးက ဘယ်လောက် သြဇာကြီးမားတယ် ဆိုတာကို သူမ အမှန်တကယ် မသိခဲ့သလို သူမရဲ့ အားနည်းချက်များကိုလည်း သူမ မသိခဲ့ပေ။

"ဒါဆို တခြားလူကြီးတွေ ထွက်သွားဖို့ အမိန့်ပေးလိုက်ပါ... အတူတူ မသွားနဲ ဂိုဏ်းတစ်ခုလုံး နောက်ဆုတ်သွားတာမျိုး မပေါ်ပါစေနဲ့"

လုရွှမ်က ခဏရပ်ပြီးမှ ဆက်ပြောသည်။

"အဒေါ့်ကို ဆက်သွယ်လာတဲ့ ကျောက်စိမ်းပြားတွေ အားလုံးကို ကျွန်​တော့်ကို ပေးလိုက်...ကျွန်တော် သူတို့နဲ့ စကားပြောလိုက်မယ်"

ယွင်ယင်၏ မျက်နှာမှာ ပူပန်နေပုံရပြီး ရှက်ကိုးရှက်ကန်း အမူအရာများဖြင့် ပြည့်နှက်နေသည်။ သူ့ဂိုဏ်းမှာ ပြဿနာတစ်ခုရှိတာနဲ့ အငယ်တန်းလေးကို အကူအညီ တောင်းနေရတာ အနည်းငယ် ရှက်စရာ ကောင်းလေသည်။ သို့သော် လုရွှမ်က ပြုံးပြီး

"စိတ်မပူပါနဲ့ အဒေါ်ယွင်... ရှက်စရာ ဘာမှ မရှိပါဘူး... ကျွန်တော်ကျင်းဟုန်ကို ကျွန်​တော့်ညီမလိုပဲ ဆက်ဆံတယ်"

"ဒါဆို မင်းကို ဒုက္ခပေးမိပါပြီ"

"ရပါတယ်... စိတ်မပူပါနဲ့"

လုရွှမ်က ပြုံးပြီး ဆက်သွယ်ရေး ကျောက်စိမ်းပြား အားလုံးကို သိမ်းယူထားလိုက်သည်။

ယွင်ယင်လည်း လူငယ်တစ်စုနှင့် စကားမပြောနိုင်မှန်းသိ၍ ထွက်သွားလေသည်။ သို့သော်လည်း သူမ နှလုံးသားထဲမှာတော့ ခံစားချက်အရိပ်အမြွက် တချို့ ရှိနေပါ၏။ သူမက အသက်ကြီးနေပြီ ဖြစ်ပြီး ကမ္ဘာကြီးကို လူငယ်တွေက ကြီးစိုးနေမှန်း မသိလိုက်ဘဲ ဖြစ်နေသည်။

သူ့သမီးကို ငုံ့ကြည့်လိုက်တော့ သူမဟာ အနာဂတ်မှာ အခွင့်ကောင်းရှိသူလို့ မြင်တာကြောင့် ကျေနပ်စွာနဲ့ ထွက်သွားခဲ့၏။

"ငါတို့ အောင့်မိသားစုကို သွားကြည့်ရအောင်... ငါတို့ ဒီကို ရောက်တာ ​အောင့်မိသားစုဆီကိုတောင် မရောက်ဖူး​​သေးဘူး ဆိုရင် အချိန်ဖြုန်းတာပဲ ​မဟုတ်ဘူးလား?"

လိရှောင်းက အကြံပေးလိုက်သည်။ ဘာပဲဖြစ်ဖြစ် အခြေအနေ ပိုဆိုးလာမှာကို မကြောက်ပါဘူး။ အန္တရာယ်လာရင် ရင်ဆိုင်ဖို့ အသင့်ပဲလေ။ သူ့အကြံပြုချက်က လုရွှမ်ရဲ့ အတွေးအမြင်နဲ့လည်း ကိုက်ညီသည်။

အောင့်မိသားစု အိမ်တော်သည် ရှေးဟောင်း လျှပ်စီးမြို့တော်၏ အကျော်ကြားဆုံး ဧရိယာထဲတွင် တည်ရှိပြီး ၎င်းသည် မန်ဟွမ်နတ်ဘုရား မျှော်စင် ပေါ်လာမည့် နေရာဖြစ်ကြောင်းလည်း ကောလဟာလများ ထွက်ပေါ်နေသည်။

ဒီကောလဟာလကို ဘယ်သူ ဖြန့်တယ်ဆိုတာ မသိပေမယ့် ဒီကောလာဟလကို ဖြန့်တဲ့သူက အင်မတန် ဆိုးယုတ်တဲ့ နှလုံးသားရှိတယ် ဆိုတာတော့ သိသာပါ၏။

အောင့်အိမ်တော် တံခါးဝသို့ ရောက်သောအခါ အောင့်ယွဲ့ထံ ကျောက်စိမ်းပြားမှ အကြောင်းကြားလိုက်ရာ မကြာမီတွင် အောင့်ယွဲ့တစ်ယောက် အပြေးအလွှား ထွက်လာကာ လူတိုင်းကို ကြိုဆိုခဲ့သည်။ သူတို့ကို မြင်ရတာနဲ့တင်ကို သူမ အတော်လေး ဝမ်းသာသွားတာ ထင်ရှားပေသည်။

လက်ရှိကာလ တစ်လျှောက်လုံးတွင် ​အောင့်မိသားစုသည် နစ်မြုပ်တော့မည့် ဧရာမသင်္ဘောကြီး ဖြစ်လာပြီး တခြားသူများကလည်း အမြန်ဆုံး ထွက်ခွာသွားရန် စိတ်အားထက်သန်နေကြသည်။ ယခင်က စည်ကားသိုက်မြိုက်စွာ ရှိခဲ့သော်လည်း ယခုအခါ ​​​အောင့်မိသားစုနှင့် ဆက်ဆံရမည်ကို ကြောက်ရွံ့သောကြောင့် ဧည့်သည်တစ်ဦးတည်းပင် မရှိခဲ့ပေ။

"ဟားဟား... နတ်သမီးအောင့်ယွဲ့ ဒါ မင်းရဲ့သူငယ်ချင်း​တွေလား"