အခန်း (၉၈၈)

“ဝီ”

တုန်ခါသံနှင့်အတူ ရွှေရောင်ဓားတစ်လက်သည် ဟန်မူယဲ့၏ရှေ့တွင် ပေါ်လာသည်။

ထိုဓား ပေါ်လာသောအချိန်တွင် နဝမမြောက်အထပ်သည် နေအလင်းရောင်ဖြင့် ပြည့်နှက်သွားပြီး နွေးထွေးမှုနှင့် ခြောက်သွေ့မှုကို ထုတ်လွှတ်ပေးနေသည်။

ဟန်မူယဲ့က လေးနက်သောမျက်နှာထားဖြင့် ဓားကို သေချာဆုပ်ကိုင်လိုက်သည်။

သူက ဓားရိုးကို ကိုင်လိုက်သောအချိန်တွင် ဓားဆန္ဒကို တိတ်ဆိတ်စွာ ထည့်သွင်းပြီး မှတ်ဉာဏ်များကို ဖတ်ရှုခဲ့သည်။

“နေမင်းစုစည်းခြင်းဓားကို နှစ်တစ်သောင်း နေမင်းစုစည်းခြင်းကျောက်တုံးကနေ ဖန်တီးထားတယ်။ ဓားဖြစ်ပေါ်လာဖို့အတွက် နှစ်ပေါင်းသုံးထောင် အချိန်ယူခဲ့ပြီး နေမီးတောက်အင်းကွက် သုံးသောင်းကို ထွင်းထုထားတယ်”

“ဓားက ပေါင်သုံးထောင်လေးတယ်။ နေမင်းစုစည်းခြင်းရဲ့ အဓိပ္ပာယ်က ‌လောကမှာရှိတဲ့ အမှောင်ထုနဲ့ မကောင်းမှုကို ရှင်းလင်းပစ်ဖို့ပဲ”

ဟန်မူယဲ့၏စကားကြောင့် ရှေ့တက်လာပြီး ဓားယူတော့မည့် လီယွင်ကန်းက ရပ်တန့်သွားသည်။

သူက ဟန်မူယဲ့ကို ကြည့်လိုက်ပြီး အပြုံးတစ်ခုနှင့်အတူ ပြောသည်။

“ကောင်လေး၊ မင်းက အမြင်စူးရှတာပဲ။ ဆက်ပြောပါအုံး”

ဟန်မူယဲ့က အပြုံးတစ်ခုနှင့်အတူ ခေါင်းညိတ်လိုက်ပြီး ဓား၏ မှတ်ဉာဏ်ထဲတွင်ပါဝင်သော အကြောင်းအရာများကို ပြောပြလိုက်သည်။

သူက စကားပြောနေသောအချိန်တွင် ဓားဆန္ဒများကို ပြန်လည်ထုတ်ယူလိုက်သည်။

ဓားပိုင်ရှင်ဟောင်းသည် အင်မော်တယ်ကမ္ဘာ၏ အင်မော်တယ်သခင်တစ်ဦး ဖြစ်သည်။ သူက ဓားနည်းစနစ်များကိုလည်း လေ့ကျင့်ခဲ့သည်။

ယန်တင်းထျန်ဟု အမည်ရသော ထိုအင်မော်တယ်သခင်သည် လောင်ကျွမ်းနေမင်းဓားတာအိုကို ကျင့်ကြံသည်။ သူ့ခန္ဓာကိုယ်က နေတစ်စင်းအဖြစ် ပြောင်းလဲသွားပြီး သူ၏ ဓားက နေစွမ်းအားကို သယ်ဆောင်ထားသည်။ သူက ပြိုင်ဘက်ကင်းသည်ဟု ပြောနိုင်သည်။

သူက နောက်ထပ်ဓားတစ်လက်ကို သန့်စင်ရန် ရည်ရွယ်ထားသောကြောင့် ဤဓားကို ရောင်းချခဲ့သည်။

အကယ်၍ ထိုဓားကို ကောင်းမွန်စွာ သန့်စင်နိုင်လျှင် တန်ဖိုးမဖြတ်နိုင်သော ရတနာတစ်ပါး ဖြစ်လာလိမ့်မည်။

ကောင်းကင်နီ အင်မော်တယ်ကမ္ဘာ ....

မီးတောက်နီဓားဂိုဏ်း ....

ဟန်မူယဲ့က ထိုကမ္ဘာ၏နာမည်ကို မှတ်ထားလိုက်သည်။

သူ့အမြင်တွင် ထိုကမ္ဘာက အလွန်အားကောင်းပြီး ဖူယွီအင်မော်တယ်ကမ္ဘာထက် အဆပေါင်းများစွာ သာလွန်သည်။

သူက ဓားအမျိုးမျိုး၏ မှတ်ဉာဏ်များကို လေ့လာခဲ့ပြီး ဖူယွီအင်မော်တယ်ကမ္ဘာက အားနည်းသောကမ္ဘာတစ်ခုဖြစ်ကြောင်း သိထားခဲ့သည်။

တခြားအင်မော်တယ်ကမ္ဘာများတွင် ကမ္ဘာတစ်ခုလုံးကို ဖိနှိပ်နိုင်သော ရတနာများ ရှိကြသည်။ ထို့အပြင် ဒါဇင်ချီနေသော အင်မော်တယ်သခင်များလည်း စောင့်ကြပ်နေကြသည်။

တချို့အင်မော်တယ်ကမ္ဘာများကို နတ်ဘုရားကမ္ဘာက ထောက်ပံ့ပေးထားသည်။ တချို့ကမ္ဘာများတွင် နတ်ဘုရားကမ္ဘာ၏ ကျွမ်းကျင်သူများ ရှိနေကြသည်။

ဟန်မူယဲ့က ဓားကျိုးများမှတစ်ဆင့် အင်မော်တယ်ဘုရင်တချို့၏ လှုပ်ရှားမှုကို မြင်ခဲ့ရသည်။

“အကြီးအကဲက ဒီဓားကို သန့်စင်နိုင်ရန် ခွန်အားတိုးလာလိမ့်မယ်”

ဟန်မူယဲ့က အပြုံးတစ်ခုနှင့်အတူ ပြောလိုက်ပြီး ဓားရှည်ကို လီယွင်ကန်းဆီသို့ ပေးသည်။

ထိုအချိန်အတွင်း၌ သူက ဓား၏မှတ်ဉာဏ်များကို ဖတ်ရှုပြီး ဒါဇင်ချီသော ဓားနည်းစနစ်များကို နားလည်ခဲ့သည်။

ထို့အပြင် ဓားဆန္ဒသုံးရာကိုလည်း ရရှိခဲ့သည်။

ဓား၏တန်ဖိုးနှင့် ယှဉ်ကြည့်လိုက်လျှင် ဓားဆန္ဒသုံးရာက မပြောပလောက်ပေ။

သို့သော် အလကားရလာသော အကျိုးအမြတ် ဖြစ်သည်။

ဓားများသည် ဓားဆန္ဒကို အကန့်အသတ်ဖြင့်သာ စုဆောင်းထားနိုင်သည်။ အင်မော်တယ်ရတနာဓားအတွက် ဓားဆန္ဒငါးရာခန့်သည် အကန့်အသတ် ဖြစ်သည်။

ဓားဆန္ဒများကို ထည့်သွင်းရန်အတွက် အထူးဖန်တီးထားသော ရတနာများကသာ ပိုမိုများပြားသော ဓားန္ဒကို သိုလှောင်နိုင်လိမ့်မည်။

လီယွင်ကန်းက ဓားရှည်ကို ယူလိုက်ပြီး ညင်သာစွာ ပွတ်သပ်သည်။ သူက ပြုံးသည်။

“ကောင်းတယ်။ ကောင်းတယ်။ သန့်စင်တဲ့ယန်စွမ်းအားနဲ့ အင်မော်တယ်ရတနာဓားတစ်လက်ကို ရလာလိမ့်မယ်လို့ ငါထင်မထားခဲ့ဘူး။ ငါ့ရဲ့ ကျင့်ကြံဆင့်ကို စုစည်းပြီး အဆင့်တက်သွားနိုင်ပြီ”

သူက ဓားကို ယူလိုက်ပြီး အားကျနေသော မျက်လုံးများဖြင့် အလင်းလွှာကို ဆက်ကြည့်သည်။ ထို့နောက် သူက ခေါင်းခါလိုက်သည်။

“ငါဆက်မကြည့်နိုင်တော့ဘူး။ မဟုတ်ရင် ငါ့ရဲ့ တာအိုနှလုံးသား ပျက်စီးသွားလိမ့်မယ်”

သူက လက်ကိုဝှေ့ယမ်းလိုက်ပြီး လှည့်ထွက်သွားသည်။

အလင်းလွှာပေါ်တွင် အလွန်ကောင်းမွန်သော ရတနာများ ရှိနေသည်။

ဟန်မူယဲ့က အပြုံးတစ်ခုနှင့်အတူ အောက်ဆင်းသွားသော လီယွင်ကန်းကို ကြည့်နေခဲ့သည်။

နောက်ရက်များတွင် စုရှင်းဟယ်၊ နတ်ဘုရားဘုရင် ချီယုနှင့် ဓားစံအိမ်၏ ကျွမ်းကျင်သူများက တစ်ယောက်ပြီးတစ်ယောက် ရောက်လာကြသည်။

ဓားဘိုးဘေးမူယဲ့က စိတ်အားထက်သန်စွာဖြင့် သူတို့အတွက် ဓားများကို လဲလှယ်ပေးခဲ့သည်။

စုရှင်းဟယ်မှလွဲ၍ တခြားလူများက ဝိညာဉ်ရတနာဓားကို မတတ်နိုင်ကြသော်လည်း ဟန်မူယဲ့က စိတ်ရှည်စွာဖြင့် ဓားများ၏အကြောင်းကို ရှင်းပြခဲ့သည်။

ဓားဘိုးဘေးမူယဲ့က ဓားပညာရပ်တွင် အလွန်ကျွမ်းကျင်ပြီး ဓားများကို တိကျစွာ အကဲဖြတ်ပေးနိုင်သည်။

ဓားစံအိမ်၏ကျွမ်းကျင်သူများ ထွက်သွားသောအခါတွင် ဓားအကဲဖြတ်ခြင်းနှင့် ရောင်းဝယ်ခြင်းအကြောင်း သတင်းပြန့်သွားသည်။

ဓားစံအိမ်၏ အကြီးအကဲများ၊ ဂိုဏ်းခွဲမှူးများ၊ လက်ရွေးစင်တပည့်များက ဓားဆန္ဒတချို့ကို အသုံးပြုချင်ကြသည်။

သူတို့က ထိပ်တန်းအဆင့်ဓားများကို မတတ်နိုင်လျှင်ပင် မှော်ရတနာနှင့် အဆင့်မြင့်ဝိညာဉ်လက်နက်များကို လဲလှယ်နိုင်ကြသည်။

ဟန်မူယဲ့က အလျင်မလိုပေ။ ဓားအကဲဖြတ်ရန်၊ ဓားလဲလှယ်ရန် ရောက်လာသော လူများကို သေချာအကြံပေးခဲ့သည်။

ဟန်မူယဲ့က နှစ်တစ်ရာကြာသည်အထိ အံ့ဖွယ်ကိုးပါးဓားစံအိမ်ထဲမှ ထွက်မလာခဲ့ပေ။

သို့သော် အပြင်လူများ၏အမြင်တွင် သူက နတ်ဘုရားဘုရင်အဆင့်သို့ ရောက်သွားသည်။

သူ့ကို ဓားဘိုးဘေးဟု မခေါ်ကြတော့ပေ။

သူက အံ့ဖွယ်ကိုးပါးဓားစံအိမ်၏ ဓားထိန်း နတ်ဘုရားဘုရင် ဖြစ်သည်။

လူအများ၏အမြင်တွင် ထိုဘွဲ့ထူးက သူနှင့် အလွန်ကိုက်ညီသည်။

သူက အံ့ဖွယ်ကိုးပါးဓားစံအိမ်ကို ဦးဆောင်ထားပြီး ဓားအကဲဖြတ်ရန် ရောက်လာသော ဓားကျင့်ကြံသူများကို ကူညီပေးနေသည်။

သို့သော် ထိုနှစ်တစ်ရာအတွင်း၌ ဟန်မူယဲ့က သန်းချီနေသော ဓားဆန္ဒများကို စုစည်းနိုင်ခဲ့သည်။

ထိုဓားဆန္ဒများက အလွန်များပြားသောကြောင့် သူ၏ ခွေသားရဲခန္ဓာကိုယ်ကပင် ထိန်းသိမ်းမထားနိုင်တော့ပေ။

သူ့ခန္ဓာကိုယ်က ဓားဆန္ဒသုံးသန်းကိုသာ ထိန်းသိမ်းထားနိုင်သည်။

ကံဆိုးစွာဖြင့် သူ၏ ကမ္ဘာငယ်က နတ်ဘုရားကမ္ဘာတွင် ရှိနေသောကြောင့် ဓားဆန္ဒများကို သိုလှောင်ရန် မဖြစ်နိုင်ပေ။

သူက အဆုံးမဲ့ညီညွတ်ခြင်းဓားအိမ်ကို အင်မော်တယ်ရတနာအဖြစ် အဆင့်မြှင့်ခဲ့သည်။

ထိုဓားအိမ်ထဲတွင် ဓားတစ်သန်းရှိပြီး လေးနက်သောဓားဆန္ဒများကို ပျိုးထောင်ပေးနေသည်။

ထိုဓားအိမ်က ဓားဆန္ဒဆယ်သန်းကို သယ်ဆောင်ထားသည်။

သူက လိုအပ်သောအခါတွင် ထိုဓားဆန္ဒများအားလုံးကို တိုက်ရိုက် အသုံးချနိုင်သည်။

သူက ဓားဆန္ဒများကို သိုလှောင်ရန်အတွက် ဓားသေရည်အိုးကိုလည်း ဝယ်ယူခဲ့သည်။

ထိုသေရည်အိုးထဲတွင် ဓားဆန္ဒတစ်သန်းကို သိမ်းဆည်းထားနိုင်သည်။

လွန်ခဲ့သော နှစ်တစ်ရာတွင် အလွန်များပြားသော လူများက အံ့ဖွယ်ကိုးပါးဓားစံအိမ်သို့ ရောက်လာကြသည်။

မိစ္ဆာကလန်၏ ကျွမ်းကျင်သူ ရှန့်လင်းရွှမ်းက ဓားစံအိမ်၏ အပြင်ဘက်တွင် စောင့်ကြပ်နေသည်။

လုကောနှင့် ‌လေ့ကျင့်ရေးမှူးလင်းတို့လည်း ပြန်ရောက်လာပြီး ဓားစံအိမ်ကို အစီအစဉ်တကျဖြစ်အောင် ကူညီပေးနေသည်။

ဟွမ်ခြောက်က မကြာခဏ ပြန်လာတတ်သည်။ သို့သော် များသောအားဖြင့် အပြင်ဘက်တွင်သာ နေလေ့ရှိသည်။

ကောင်းချန်ကုန်းကလည်း ပြန်ရောက်လာပြီး ဓားစံအိမ်၏ တတိယထပ်တွင် နေထိုင်သည်။ ထိုနေရာတွင် နေထိုင်သော အကြောင်းပြချက်ကိုတော့ မသိရပေ။

သို့သော် သူက တစ်နှစ်တစ်ခါ ရှောင်ယွဲ့လီဆီသို့ အလည်သွားရသည်။ သူက ပြန်ရောက်လာသောအချိန်တွင် အတော်လေး စုတ်ပြတ်နေပုံပေါ်သည်။

ကျန့်တနျိုနှင့် တခြားလူများအပြင် ဓားစံအိမ်တွင် အမှန်တကယ် နေထိုင်သောလူများက အရက်သမားဖြစ်လာသော တင်းချွန်ကန်းနှင့် ဓားနည်းစနစ်များကို နှစ်သက်သော မော့ယွမ်တို့ ဖြစ်ကြသည်။

လီရှီရှီက ဟွမ်ကျစ်ဟူ၏ စစ်တပ်တွင် ဓားကျင့်ကြံသူတစ်သန်းကို အမိန့်ပေးနိုင်သော ခေါင်းဆောင်တစ်ဦး ဖြစ်နေသည်။

တစ်ဖက်တွင် တင်းချွန်ကန်း၏ ဓားနည်းစနစ်က ရပ်တန့်နေသောကြောင့် ဓားစံအိမ်သို့ ရောက်လာခဲ့သည်။

မော့ယွမ်ကိုတော့ ဟန်မူယဲ့က ဖိတ်ခေါ်ခဲ့သည်။

ဟန်မူယဲ့က မော့ယွမ်ဖန်တီးခဲ့သော ဓားတစ်သောင်းတို့အိမ်အပြန်နည်းစနစ်ကို မကြာခဏ အသုံးပြုလေ့ရှိသည်။

ယခုအချိန်တွင် ဓားကျင့်ကြံခြင်းနည်းစနစ်များ အလွန်ပေါများနေသောကြောင့် မော့ယွမ်က ထိုဓားနည်းစနစ်များကို သုံးသပ်ပြီး ကိုယ်ပိုင်ဓားနည်းစနစ်တွင် ပေါင်းစပ်ရန် ကြိုးစားနေသည်။

ထိုသို့ဖြင့် ဓားစံအိမ်၏ ကိုးထပ်လုံးတွင် စာအုပ်စင်များဖြင့် ပြည့်သွားသည်။

ထိုစင်များပေါ်တွင် သောင်းချီနေသော ကျောက်စိမ်းပေလွှာများ ရှိသည်။

ကျောက်စိမ်းပေလွှာတိုင်းတွင် အားကောင်းသော ဓားနည်းစနစ်ကို မှတ်သားထားသည်။

မော့ယွမ်က ထိုကျောက်စိမ်းပေလွှာများကို ဟာသအနေဖြင့် အနန္တကမ္ဘာဓားကျမ်းစာဟု ခေါ်လေ့ရှိသည်။

သို့သော် ထိုဓားနည်းစနစ်များသည် အမှန်တကယ်ပင် ကမ္ဘာအသီးသီးမှ ရောက်လာခဲ့သည်။

မော့ယွမ်က ထိုဓားနည်းစနစ်များအားလုံးကို မပေါင်းစပ်နိုင်သေးသော်လည်း သူ၏ ဓားတာအိုကျင့်ကြံခြင်းက အဆတစ်ရာခန့် တိုးတက်လာခဲ့သည်။ သူအသုံးပြုနေသော ဓားတစ်သောင်းတို့အိမ်အပြန် နည်းစနစ်ကလည်း လောကကို ဖျက်ဆီးနိုင်သည်။

ဟန်မူယဲ့ကပင် ထိုဓားနည်းစနစ်ကို လေ့လာကြည့်ခဲ့သည်။

....

ဝိညာဉ်လေးပါးကမ္ဘာ ....

လေဟာနယ်တွင် အက်ကွဲကြောင်းတစ်ခု ပေါ်လာသည်။

အဝါရောင်ဝတ်စုံနှင့် သက်လတ်ပိုင်းအရွယ်လူကြီးတစ်ယောက်က ရှေ့သို့ တစ်လှမ်းတိုးသည်။

သူက အင်မော်တယ်အလင်းကို ထုတ်လွှတ်နေပြီး အင်မော်တယ်ကျင့်ကြံသူတစ်ယောက်ဖြစ်ကြောင်း ဖော်ပြထားသည်။

သူ့နောက်တွင် အက်ကွဲကြောင်းထဲမှ ကျင့်ကြံသူများ တစ်ယောက်ပြီးတစ်ယောက် ထွက်လာကြသည်။

အပြာရောင်ချပ်ဝတ်နှင့် အင်မော်တယ်ကျင့်ကြံသူသုံးရာသည် ဝင်္ကပါဖွဲ့စည်းထားပြီး လေးနက်စွာ ရပ်နေသည်။

“ဂိုဏ်းတူအစ်ကိုချန်ရှု၊ ဟယ်ချူက ဂိုဏ်းတူတပည့်တွေကို ဦးဆောင်ပြီး ဒီနေရာကို ရောက်လာခဲ့တယ်”

မုတ်ဆိတ်မွေးများနှင့် တာအိုကျင့်ကြံသူ လူအိုကြီးတစ်ယောက်က တီးတိုးပြောသည်။

ရှေ့ဆုံးတွင်ရှိ‌နေသော ချန်ရှုက ခေါင်းညိတ်လိုက်ပြီး ပတ်ဝန်းကျင်ကို ကြည့်သည်။

“အင်မော်တယ်ဘုရင်မင်ဟယ် ချန်ထားခဲ့တဲ့ အင်မော်တယ်ရတနာကို ဟယ်ချူက ယူသွားတယ်။ ငါက သူ့အလောင်းကို မြင်ချင်တယ်”

သူက လက်ကိုဝှေ့ယမ်းလိုက်ပြီး အမိန့်ပေးသည်။

“ဟယ်ချူကိုရှာပြီး သတ်လိုက်”

“နားလည်ပါပြီ”

အပြာရောင်ချပ်ဝတ်နှင့် အင်မော်တယ်ကျင့်ကြံသူများက ပြိုင်တူပြောလိုက်ပြီး နေရာအနှံ့သို့ ထွက်သွားကြသည်။

အင်မော်တယ်အလင်းသည် လေဟာနယ်ကို ထိုးခွဲနေပြီး မရေမတွက်နိုင်သော သက်ရှိများက ထွက်ပြေးနေကြသည်။

လူသားကမ္ဘာ၏ ကျင့်ကြံသူများသည် အင်မော်တယ်ကမ္ဘာ၏ ကျင့်ကြံသူများကို မခုခံနိုင်ကြပေ။

သတ်ဖြတ်မှု ဖြစ်သည်။

ရက်တစ်ရာအကြာတွင် သတင်းများကို စုဆောင်းနိုင်ခဲ့သည်။

ဟယ်ချူနှင့် တခြားလူများက ဤကမ္ဘာသို့ ဆင်းသက်လာခဲ့သော်လည်း ဤနေရာတွင် မရှိတော့ပေ။

သူတို့နှင့်အတူ သန်းဆယ်ချီသော စစ်တပ်နှင့် နတ်ဘုရားဘုရင်များလည်း ပါသွားသည်။

အစိမ်းရောင်ဝတ်စုံနှင့် ချန်ရှုက မျက်မှောင်ကြုတ်သည်။

“အင်မော်တယ်ရင်းမြစ်ကမ္ဘာလား”

“ဟယ်ချူက သန်းချီနေတဲ့စစ်တပ်ကို ဦးဆောင်ပြီး ထွက်သွားတယ်။ နှစ်တစ်ရာကြာသည်အထိ ပြန်ရောက်မလာခဲ့ဘူးလား”

အပြာရောင်ချပ်ဝတ်နှင့် တာအိုတန်ခိုးရှင်တစ်ဦးက ခေါင်းညိတ်လိုက်ပြီး ပြောသည်။

“ဒီပုရွက်ဆိတ်တွေက အရမ်းကြောက်လန့်နေကြတယ်။ သူတို့က လိမ်ညာရဲမှာမဟုတ်ဘူး”

“ကျွန်တော်တို့က လျှို့ဝှက်နည်းစနစ်နဲ့ သူတို့ရဲ့ဝိညာဉ်ကို ရှာကြည့်ပြီးပါပြီ။ အချက်အလက်တွေက မှန်ကန်ပါတယ်”

“ဂိုဏ်းတူအစ်ကို၊ ဟယ်ချူနဲ့ တခြားလူတွေက အင်မော်တယ်ရင်းမြစ်ကမ္ဘာကို သိမ်းပိုက်ပြီး နတ်ဘုရားဘုရင်မင်ဟယ်ရဲ့ အမွေအနှစ်နဲ့ပတ်သတ်တဲ့ သတင်းကို ရှာတွေ့သွားတာပဲ ဖြစ်လိမ့်မယ်”

တခြားလူများကလည်း ခေါင်းညိတ်လိုက်ကြသည်။

ထိုအကြောင်းပြချက်ကြောင့် ဟယ်ချူနှင့် တခြားလူများက အဆက်အသွယ်ဖြတ်တောက်ပြီး နှစ်တစ်ရာကြာသည်အထိ ပြန်မလာခြင်း ဖြစ်လိမ့်မည်။

ထိုစကားကို ကြားလိုက်ရသောအခါတွင် ချန်ရှု၏မျက်လုံးများက အေးစက်စွာ တောက်ပသွားသည်။

“ဟမ့်၊ အဲဒါဆိုရင် ငါက အင်မော်တယ်ရင်းမြစ်ကမ္ဘာကို နင်းချေပြီး ဟယ်ချူနှင့် တခြားလူတွေကို တူးထုတ်ပစ်မယ်”

အင်မော်တယ်အလင်းသည် လေဟာနယ်ကို ထိုးဖောက်သွားသည်။

တာအိုတန်ခိုးရှင်ချန်ရှုက အင်မော်တယ်ကျင့်ကြံသူသုံးရာကို ဦးဆောင်ပြီး ကောင်းကင်ရင်းမြစ်ကမ္ဘာဆီသို့ ထွက်လာသည်။

သူတို့၏နောက်တွင် ဝိညာဉ်လေးပါးကမ္ဘာမှ သန်းဆယ်ချီသောကျင့်ကြံသူများ ပါလာကြသည်။

သူတို့ကို အတင်းအကျပ် ဆင့်ခေါ်ပြီး စုစည်းခဲ့သည်။

တာအိုတန်ခိုးရှင်ချန်ရှု၏စကားအရ သူတို့က စစ်မြေပြင်ကို ရှင်းလင်းပေးရမည်။