စောင်း

လီလင် သူ့လက်ဖဝါးကို ဖွင့်လိုက်သောအခါ တောက်ပြောင်နေတဲ့ သူ့လက်ဖဝါးပေါ်မှာ ရွှေရောင်အလင်းတန်းတွေ လင်းလက်သွားသည်။ တခဏလောက်​ကြာတော့ လူတိုင်းရဲ့ ခန္ဓာကိုယ်ကို သန့်စင်ပြီး အစွမ်းထက်တဲ့ တွေးခေါ်မှုစွမ်းအားများ ဝင်ရောက်လာသလို ခံစားလိုက်ရသည်။

လူတိုင်း ထိတ်လန့်တုန်လှုပ်သွားကာ ကျင့်ကြံသူ များစွာထဲမှ တန်ခိုးကြီးသော ရောင်ဝါများ ထွက်ပေါ်လာပြီး သူတို့၏ လူသတ်ချင်သည့် ရောင်ဝါများ မြင့်တက်လာသည်။ တချို့က ကွင်းအလယ်၌ ရပ်နေသော လီလင်ထံကို အရှိန်အဝါတွေ ထုတ်ပစ်လိုက်ကြ၏။

လီလင်၏ ခန္ဓာကိုယ်သည် လေထဲတွင် လှုပ်ရှားနေပြီး လူတိုင်း၏ ဝိညာဉ်စွမ်းအားများကို လုံးဝလျစ်လျူရှုထားသည်။

"အားလုံး သည်းခံပေးကြပါ"

လီလင်က ပြုံး၍ ပြောလိုက်သည်။ ထိုစဥ် သူ့လက်ဖဝါးထဲရှိ အရာဝတ္တု၏ အလင်းတန်းများ အားနည်းသွားကာ အမှန်တကယ် စောင်းတစ်လတ် ဖြစ်ကြောင်း ရှင်းရှင်းလင်းလင်း မြင်လာရသည်။ ကြိုးငါးချောင်းသည် ပေါ့ပါးစွာ ယိမ်းနွဲ့နေပြီး ကျက်သရေ အနည်းငယ်ရှိသော စွမ်းအင်များမှာ ၎င်းကြိုးများမှ ပွင့်ထွက်လာသည်။

လီလင်သည် စောင်းပေါ်တွင် သူ၏ မှော်အစွမ်းများကို ထိန်းထားတာ ဖြစ်ကောင်းဖြစ်နိုင်သော်လည်း ယခုအချိန်တွင် အနည်းငယ် ရိုးရိုးရှင်းရှင်းနှင့် သာမန်ဆန်ပုံ ပေါက်နေပါသည်။ သို့သော် စိတ်ဝိညာဉ် အတွေးဖြင့် ယခင်အတက်အကျများကို တွေ့ကြုံပြီးနောက် စောင်းကို ဘယ်သူမှ လျှော့မတွက်ဝံ့ကြပေ။

အဆုံးတွင် ၎င်းက နောက်ဆုံးကျန်သော ရတနာဖြစ်သောကြောင့် ဤစောင်းသည် လျှို့ဝှက်ဆန်းကြယ်သော ဇာစ်မြစ်နှင့် ထူးကဲသော မှော်အစွမ်းများ ရှိကြောင်း ထင်ရှား​သည် မဟုတ်လော။

"ဟာဟား.... ဒီစောင်းက ဘာလဲဆိုတာ တချို့လူတွေ ခန့်မှန်းမိကြမယ်လို့ ထင်ပါတယ်"

"အကြီးအကဲလီကို မေးပါရစေ... အဲဒါက ကမ္ဘာ့ရတနာလား"

"ကမ္ဘာ့ရတနာ" ဟူသော စကားလုံး ပေါ်လာသည်နှင့် တပြိုင်နက် လူတိုင်း ရူးသွပ်သွားကြသည်။ လူတိုင်းက ကျယ်လောင်စွာ အော်ငေါက်တာတွေပင် မပြုနိုင်​တော့ဘဲ စိတ်ဝိညာဉ် စွမ်းအားများ အချင်းချင်း ရောယှက်ကာ ပြင်းထန်သော လေပြင်းများ လှုပ်ခတ်လာစေတဲ့အထိ ထိုင်တောင် မထိုင်နိုင်ကြပေ။

လီလင်၏ ခန္ဓာကိုယ်ထဲမှ စိတ်ဝိညာဉ်စွမ်းအား ပမာဏ အများအပြား ရုတ်တရက် ထိုးထွက်လာသည်။ ထိုစွမ်းအားက အလွန် အစွမ်းထက်လှသည်။ ဤစိတ်ဝိညာဉ် စွမ်းအားများ လွင့်ထွက်လာသောအခါ လူတိုင်း ထုတ်လွှတ်နေသော အလင်းတန်းများက ပင်လယ်ပြင်မှ လှိုင်းလုံးလေးများ ကဲ့သို့ တိုက်ရိုက် ကြေမွသွားခဲ့သည်။

"အားလုံးပဲ စိတ်ရှည်ကြပါ!"

လီလင်က ဒါဟာ ဒုတိယအကြိမ် သတိ​ပေးတာဖြစ်လို့ သူ့လေသံက ပိုလေးနက်လာသည်။ ထို့အပြင် ယခုအချိန်တွင် သူ့အငွေ့အသက်ကြောင့် ဘယ်သူမှ ဂုဏ်ယူဝံ့ကြွားခြင်း မပြုဝံ့တော့ပေ။ မျှော်စင်နယ်ပယ်မှ သခင် တချို့ပင်လျှင် လီလင်ရဲ့ စိတ်ဝိညာဉ်စွမ်းအားက ဘယ်လောက်တောင် ကြောက်စရာ ကောင်းလဲဆိုတာ ရှင်းရှင်းလင်းလင်း သိမြင်နိုင်သူများ ဖြစ်ကြပါသည်။

လုရွှမ်၏ နဖူးမှလည်း ချွေးများ စီးကျလာသည်။ သူ၏စိတ်ဝိညာဉ် အတွေးက အားကောင်းနေပါ​ပြီ။ သူ့အဆင့်မှာ အနည်းငယ် နိမ့်နေသေးသော်လည်း ရက်စက် ကြမ်းကြုတ်သော စိတ်ဝိညာဉ်၏ အရိပ်အမြွက်ကို သူ ရိပ်မိနိုင်သည်။

ဤလူသည် သန်မာလွန်းလှသည်။ ယှဥ်ကြည့်လိုက်ရင် သူက မွေးကင်းစ နွားသငယ်ကဲ့သို့ပင် ဖြစ်ကာ ကျားများကို အမှန်တကယ် မကြောက်ရွံ့ဘဲ မနေရဲချေ။

မြင်ကွင်း တစ်ခုလုံးသည် တခဏချင်း လေးနက်လာခဲ့သည်။ လူတိုင်း၏ မျက်လုံးများသည် လောဘစိတ်များ ပြည့်နှက်နေသေးသော်လည်း အားလုံးက လီလင်၏ အစီအမံများကို ငြိမ်သက်စွာ နာခံကြသည်။

"ကမ္ဘာကြီးက ပိုကြီးကျယ်လေ ရတနာတစ်ခုမွေးဖွားဖို့ ခက်ခဲလေလေဆိုတာ လူတိုင်းသိပါတယ်.... ဘာကြောင့်လဲဆိုတော့ ကမ္ဘာကြီးရဲ့အသက်ကို ဆုံးရှုံးလုနီးပါးဖြစ်ပြီး ပြန်လည်ရှင်သန်ဖို့ အချိန်အကြာကြီး အချိန်ယူရမယ်လေ...ရတနာတစ်ခု မွေးဖွားရင် အဲဒီနေရာက သန့် ရှင်းပြီး မကောင်းတာတွေကို တွန်းလှန်နိုင်တယ်..."

လူတိုင်းက အထပ်ထပ်အခါခါ ခေါင်းညိတ်ပြကြသည်။ ကမ္ဘာ့ရတနာများသည် အမှန်ပင် ဤကဲ့သို့ပင် ဖြစ်သည်။ သန္ဓေတည်ရန် လွယ်ကူလေလေ ၎င်း၏ စွမ်းအားသည် အားနည်းလာလေလေ ဖြစ်သည်။ သန္ဓေတည်ရန် ခက်ခဲလေလေ အားကောင်းလေလေ ဖြစ်သည်။

ထို့ကြောင့် တချို့သော ကမ္ဘာငယ်လေးများသည် ကမ္ဘာ့ရတနာကို မွေးဖွားပေးနိုင်သော်လည်း တချို့သော ကမ္ဘာကြီးများ၊ အထူးသဖြင့် ပိုမိုအားကောင်းသော ကမ္ဘာကြီးများတွင် ကမ္ဘာ့ရတနာ မွေးဖွားလာရန် အလွန်ခက်ခဲပါသည်။

လုရွှမ်သည် ဤပြဿနာကို ​စော​စောကတည်းက တွေးထားပြီးသား ဖြစ်သည်။ တောင်တစ်သောင်းကမ္ဘာကို ကယ်တင်ဖို့ ကမ္ဘာ့ရတနာကို ရှာဖွေနေတဲ့ စိတ်ကူးမှာ အလွန်ခက်ခဲခဲ့ပြီး မအောင်မြင်သေးပေ။ ယခုအခါ ထိုကမ္ဘာငယ်လေးက ပျက်စီးလုနီးပါး ဖြစ်နေပြီဖြစ်သည်။

"ဒီစောင်းက ရှေးခေတ် ဂီတလောကရဲ့ အလွန်ဝေးကွာတဲ့ ကမ္ဘာငယ်လေးကနေ ဆင်းသက်လာတာပါ.... ဒါကို နှစ်ပေါင်း တစ်သိန်းကျော် သန့်စင်ခဲ့တာ နောက်ဆုံးမှာတော့ စောင်းလောကရဲ့ ရတနာတစ်ပါးကို မွေးဖွား​ပေးခဲ့တယ်..."

"တိကျတဲ့စွမ်းအားက ဘာလဲ ဆိုတာတော့ လူတိုင်း ကြုံဖူးကြမှာပါ....ရိုးရိုးသားသား ပြောရရင် ကျုပ်တို့ရဲ့ အင်အားကြီး၉ခုကလည်း ရယူချင်ပေမယ့် တစ်ခုပဲရှိတော့ ဘယ်လိုဖြန့်ဝေရမလဲ ဆိုတာ ပြဿနာဖြစ်လာပြီ.... လေလံတင် ရောင်းချလိုက်ရင် အမြင့်ဆုံး စျေးနှုန်းနဲ့ ရရှိမှာ ဖြသ်သလို ရရှိတဲ့ငွေတွေကလည်း အဓိက အင်အားစု ကိုးခုကြားတွင် အညီအမျှ ခွဲဝေပေးမှာပါ.... ဒါက ကျုပ်တို့အကြားက ပြဿနာတွေကို ပပျောက်စေမှာ"

လီလင်က တကယ်ကို ဟာသလုပ်ပြပြီး လူတိုင်းက ရယ်မောစေလိုက်ကာ အားလုံးကလည်း အရမ်းစိတ်လှုပ်ရှားလာကြသည်။

ဒီကမ္ဘာ့ရတနာကို ဘယ်လိုနည်းနဲ့ကြောင့် အင်အားကြီး ကိုးခုက မထိန်းသိမ်းထားတာလဲလို့ အရင်က အံ့သြနေခဲ့ကြတာ။ ဒီအကြောင်းတွေကို ကြားတော့ အားလုံးလည်း သဘောပေါက်သွားကြသည်။

အမှန်စင်စစ် ယနေ့ ကြယ်တစ်သောင်းကမ္ဘာ၏ တည်ငြိမ်သော ဖွံ့ဖြိုးတိုးတက်မှုသည် အဓိကအင်အားစု ကိုးခု၏ ​​အပြန်အလှန် ပူးပေါင်းဆောင်ရွက် မှုအပေါ်၌ မူတည်နေ​လေသည်။ တစ်ယောက်နဲ့ တစ်ယောက် ပါဝင် ပတ်သက်နေနိုင်ပေမယ့် အခှတော့ ဟန်ချက်ညီသွားပါပြီ။

သို့သော် ဤကမ္ဘာရတနာ၏ အသွင်အပြင်သည် အင်အားကြီးကိုးခု၏ ချိန်ခွင်လျှာကို ချိုးဖျက်သွားနိုင်သည်။ ကမ္ဘာ့ရတနာကို မည်သူမဆို ရယူမည်ဆိုပါက ၎င်းတို့၏ စွမ်းအားသည် အလွန်တိုးမြင့်လာမည် ဖြစ်သည်။ ဟန်ချက်ပျက်သွားပါက တောင်တစ်သောင်းကမ္ဘာ၏ ဆုတ်ယုတ်မှုအစ ဖြစ်လာနိုင်သည်။

အင်အားကြီး ကိုးခုသည် ၎င်းတို့၏ စိတ်နှလုံးအတွင်းက လောဘဇောကို နှိမ်နှင်းထားနိုင်ခဲ့ပြီး ကမ္ဘာ့ရတနာကို လေလံတင် ရောင်းချရန် စွမ်းဆောင်နိုင်ခဲ့သည်။ ယင်း အမှန်တရားကို လူတိုင်း နားလည်ကြသော်လည်း အနည်းငယ် မကျေနပ် ဖြစ်နေကြသေးသည်။

"ဒီစောင်းရဲ့ သီးခြားဂုဏ်သတ္တိတွေကို ကျုပ် အစီရင်ခံ​တော့မှာ မဟုတ်ဘူး.... စောင့်ဆိုင်း​နေတဲ့ ဝယ်ယူသူတွေက သူတို့ဘာသာ စုံစမ်းနိုင်ပါတယ်... ဒီစောင်းရဖို့ ဆယ်နှစ်လောက် အချိန်ယူရပြီး အချိန်အတော် ကြာအောင် ငြင်းခုံခဲ့ကြပေမယ့် သူ့အစွမ်းအစ အကြောင်း ဆယ်ပုံတစ်ပုံအောက်ပဲ ရှာဖွေနိုင်ခဲ့တယ်... ဒီစောင်းကို ဘယ်သူက ဝယ်ယူသွားနေပါစေ စောင်းရဲ့ အားသာချက် အားနည်းချက်တွေကို တခြားသူတွေ သိမှာကို စိုးရိမ်စရာ မလိုပါဘူး"

"အမှန်အတိုင်း ပြောရမယ်ဆိုရင် အကြီးအကဲလီ...ကမ္ဘာ့ရတနာတွေကို လေလံတင် ရောင်းချနိုင်ခဲ့တဲ့အတွက် အကြီးအကဲကို အရမ်း ချီးကျူးမိပါတယ်.... ဒါပေမဲ့ ကျွန်တော်တို့မှာ အချက်အလက် လုံလောက်စွာ မရှိတာ လုံလောက်တဲ့ သလင်းကျောက်တွေ ယူဆောင်လာခဲ့မိတာ မဟုတ်ဘူး ဆိုရင် ဘာလုပ်သင့်လဲ"

လီလင်က ပြုံးပြီး ပြောလိုက်သည်။

"ဒီသူငယ်ချင်းလေး ပြောတာ မှန်တယ်... အမှန်တော့ ကျုပ်တို့က ခင်ဗျားတို့ကို မဝယ်စေချင်လို့ သတင်း မဖြန့်ခဲ့တာ"

လူတိုင်း ရုတ်ရုတ်သဲသဲ ဖြစ်သွားခဲ့ရသည်။

ထိပ်တန်းအဆင့် အရေးကြီးဧည့်သည် အခန်းမှ ဆူညံသံတစ်ခု ထွက်လာသည်။

"လီမိသားစုရဲ့ အကြီးအကဲက ကြယ်တစ်သောင်းကမ္ဘာ တစ်ခုလုံးနဲ့ အနီးနားက ကမ္ဘာငယ်လေးမှာရှိတဲ့ ထူးခြားတဲ့ စွမ်းအားရှင် တချို့ကို ကမ္ဘာ့ရတနာ လေလံပွဲအကြောင်း အကြောင်းကြားထားပြီးသားပါ... ကျွန်တော်တို့က ဝယ်ယူရာမှာ အဓိက တွန်းအားပဲ... ကောင်လေး မင်း ဝယ်ချင်တယ်ဆိုရင် မင်းမှာ ငွေရေးကြေးရေး အရင်းအနှီးရှိလား မင်းမှာ ခွန်အားတွေ ရှိလား? သာမန် လူတစ်ယောက်က အပြစ်မရှိဘဲ သူ့လက်ထဲမှာ ကျောက်စိမ်းတစ်လုံးကို ကိုင်ဆောင်ရင် အပြစ်ရှိသွားမယ် ဆိုတာ နားမလည်ဘူးလား?"

"ဟမ့်... ငါမင်းကိုပြောလိုက်မယ်... ဒီကမ္ဘာ့ရတနာ လေလံပွဲကို ဒီလူတွေ ဘာလုပ်ရမှန်း မသိရင် သီးသန့် ဖယ်ထားသင့်တယ်"

တခြားအခန်းတစ်ခုမှ အသံတစ်သံလည်း ထွက်ပေါ်လာသည်။ အရင်က မေးခွန်းမေးတဲ့ လူက ထပ်မပြောတော့ပေ။ ထပ်ပြန်ပြောရင် ကိုယ့်ကိုကိုယ် အရှက်ရ​စေမိလိမ့်မယ်။

လီလင်က ပြုံးပြီး ပြောလိုက်သည်။

"ကျုပ် ဘာကြောင့် ဒီလိုလုပ်ရတာလဲ ဆိုရင် အားလုံး ဘေးကင်းဖို့ပဲ... ကမ္ဘာကြီးရဲ့ ရတနာက ကောင်းပေမယ့် အသက်က ပိုအရေးကြီးတယ်လေ ဒါပေမဲ့ လာကြည့်တဲ့သူတိုင်းက ကျုပ်တို့ ထန်းယွမ် လေလံအိမ်ရဲ့ ဧည့်သည်ပါပဲ... ကမ္ဘာ့ရတနာ လေလံပွဲကို ကျင်းပမယ့်ပွဲမှာ အားလုံးကို ဖယ်ထားနိုင်ပါတယ်.... ဒီမှာရှိတဲ့သူတွေက ပိုက်ဆံ မလောက်ပါဘူး ဆိုပေမယ့် သူတို့က ထန်းယွမ်လေလံအိမ်ရဲ့ တန်ဖိုးရှိတဲ့ ဧည့်သည်တွေ ဖြစ်နေမှာပါ!"

ကျယ်လောင်သော လက်ခုပ်သံများနှင့် အော်ဟစ်သံများ ညံသွားခဲ့သည်။ လီလင်၏ စကားလုံးများသည် လူတိုင်း၏ နှလုံးသားကို ထိမိသွားကာ နွေးထွေးပြီး တန်ဖိုးထားခံရကြောင်း ချော့မော့လိုက်သလို ခံစားလာရစေသည်။

"ကောင်းပြီ အဓိပ္ပာယ်မရှိတာ​တွေ အများကြီး မပြောတော့ဘူး... ဒီလေလံပွဲရဲ့ နောက်ဆုံး ရတနာကို အခုလေလံတင် ရောင်းချနေပါပြီ... စျေးနှုန်းက သန်း ၁၀၀... လေလံတစ်ခုစီက ၁၀သန်း ထက် မနည်းရပါဘူး စလိုက်ကြရအောင်!"

လက်ရှိ ရှိနေသူတိုင်း ရင်တထိတ်ထိတ်ဖြင့် မနေနိုင်မထိုင်နိုင် ဖြစ်လာကြသည်။ ယခင် မှော်လက်နက်ကို ၁.၈ ဘီလီယံဖြင့်သာ ရောင်းချခဲ့သည်။ ယခု ကမ္ဘာ့ရတနာကို ရောင်းချလိုက်ရာ စျေးနှုန်းသည် ၁၀သန်း ဖြစ်ပြီး ကွာခြားချက်မှာ အမှန်တကယ်ပင် ကြီးလှ၏။

ဒါပေမဲ့ စျေးကြီးတယ်လို့ ဘယ်သူမှ မထင်ပါဘူး။

"သန်း ၁၃၀!"

"သန်း ၁၅၀!"

ပမာဏက တစ်မဟုတ်ချင်း မြင့်တက်သွားသည်။