အခန်း (၉၉၅)

အစိမ်းပုပ်ရောင်ကျောက်ဆောင်ပေါ်တွင် အဖြူရောင်ဝတ်စုံနှင့် အမျိုးသမီးတစ်ယောက် မတ်တပ်ရပ်နေသည်။

“အစ်မ၊ ဘယ်သူပါလာတာလဲ ကြည့်လိုက်အုံး”

ခယ်ယန်က အော်ပြောသည်။

အမျိုးသမီးကျင့်ကြံသူက ခပ်ဖွဖွရယ်လိုက်ပြီး ဟွမ်ခြောက်ကို ကြည့်သည်။

ဟွမ်ခြောက် ခံစားချက်များနှင့် ညင်သာစွာ ခေါင်းညိတ်ပြသည်။

“ခယ်ရွှယ်၊ မတွေ့ရတာ ကြာပြီပဲ”

အမျိုးသမီးကျင့်ကြံသူက ခေါင်းညိတ်လိုက်ပြီး ဟန်မူယဲ့ကို ကြည့်သည်။

သူမက ဟန်မူယဲ့ကို မှတ်မိနေပြီး နှုတ်ဆက်သည်။

“အစ်ကိုဟန်ပဲ။ အစ်ကိုဟန်က အရင်အတိုင်း ခံ့ညားနေတာပဲ”

‘သူမက ငါတို့ကို သိနေတာပဲ’

‘အဲဒါဆို ဟွမ်ခြောက် ငါတို့နဲ့ ဘာဖြစ်လို့ မိတ်ဆက်မပေးခဲ့တာလဲ’

ဟန်မူယဲ့က လှည့်ကြည့်လိုက်သောအခါ ဟွမ်ခြောက်က အကြည့်လွှဲသည်။

ကျွန်းပေါ်တွင် ခယ်ယန်နှင့် ခယ်ရွှယ်အပြင် ကလန်သားတစ်ထောင်ခန့်လည်း ရှိနေသည်။

ခယ်ရွှယ်၏ပြောစကားအရ မြေအောက်မြစ်လှေသမားမျိုးနွယ်သည် မြေအောက်မြစ်ကို စောင့်ရှောက်ရန် တာဝန်ရှိသည်။

နှစ်တစ်သိန်းတိုင်းတွင် မြေအောက်မြစ်က လှိုင်းထန်လာပြီး လှေသမားများက မြေအောက်မြစ်ကို ချော့မြှူပေးရသည်။

ထို့အပြင် သူတို့က မြေအောက်မြစ်၏ အားကောင်းသောသားရဲများကိုလည်း အမဲလိုက်ရသည်။

“မြစ်အတွင်းပိုင်းမှာ မြေအောက်မြစ်တော်ဝင်မြို့တော် ရှိတယ်။ အဲဒီကိုသွားဖို့ဆိုရင် လှေသမားတစ်ယောက်က လိုက်ပို့ပေးမှရမယ်”

“ရှင်တို့ လိုက်ရှာနေတဲ့လူက တော်ဝင်မြို့တော်ကို ရောက်သွားတာပဲ ဖြစ်ရမယ်”

ခယ်ရွှယ်က ဟန်မူယဲ့၏ ကျောက်စိမ်းတံဆိပ်ပြားကို ကြည့်လိုက်ပြီး ပြောသည်။

မြေအောက်မြစ်၏ တော်ဝင်မြို့တော်သည် သေခြင်းရှင်ခြင်းအား ပြောင်းလဲပေးနိုင်သည့် လျှို့ဝှက်ချက်ကို ဆုပ်ကိုင်ထားသည်။

အဆုံးမဲ့ဝိညာဉ်ပင်လယ်ထဲမှ လိုချင်သောလူကို ပြန်ဆင့်ခေါ်နိုင်သည်ဟုလည်း ပြောကြသည်။

ကျင့်ကြံခြင်းလမ်းစဉ်၏ အဆုံးသတ်သို့ရောက်နေသော ကျင့်ကြံသူများက ပြန်လည်မွေးဖွားခြင်းကို ရှောင်လွှဲလိုသောကြောင့် ထိုနေရာတွင် အသစ်စတင်ရန် ကြိုးစားကြသည်။

တန်ဖိုးတစ်ခု ပေးလိုက်လျှင် ယိုယွင်းနေသည့် ရုပ်ခန္ဓာနှင့်ဝိညာဉ်ကို ဖယ်ရှားပြီး ပြန်လည်နုပျိုနိုင်သည်ဟု ပြောကြသည်။

ထိုကြောင့် လီမူပိုင်က တော်ဝင်မြို့တော်တွင်ရှိနေရန် အခွင့်အရေးများသည်။

တော်ဝင်မြို့တော်သို့သွားရန် ခဏစောင့်ရမည်ဟု ခယ်ရွှယ်က ပြောခဲ့သည်။ သင်္ဘောကြီးတစ်စင်းက ရွက်လွှင့်လိမ့်မည်။

ဟန်မူယဲ့က ကျွန်းပတ်ဝန်းကျင်ကို လျှောက်ကြည့်နေသောအချိန်တွင် ဟွမ်ခြောက်က ရက်တချို့ကြာသည်အထိ ပျောက်ကွယ်သွားခဲ့သည်။

ကျွန်းပေါ်တွင် အပြင်လူများလည်း ရှိနေကြသည်။ သူတို့က ဈေးနှုန်းတစ်ခုပေးပြီး တော်ဝင်မြို့တော်သို့ သွားနိုင်ရန် စောင့်ဆိုင်းနေကြသည်။

ထိုလူများက သတ်မှတ်ထားသော ကျောက်တုံးအိမ်များတွင်သာ အနားယူနိုင်ကြသည်။

ဟန်မူယဲ့က တစ်ချက်သွားကြည့်ခဲ့သည်။ အများစုက ကျင့်ကြံဆင့် မတိုးတက်နိုင်သော သက်တမ်းကုန်ခါနီး မိစ္ဆာကျင့်ကြံသူများ ဖြစ်ကြသည်။

ထိုလူများထဲတွင် အိုမင်းနေသော ကျင့်ကြံသူနှစ်ယောက်လည်း ရှိသည်။

သူတို့က ကျွန်းပေါ်တွင် လွတ်လပ်စွာလျှောက်သွားနိုင်သော ဟန်မူယဲ့ကို မြင်လိုက်ရသောအခါတွင် အလွန်မနာလိုဖြစ်နေကြသည်။

“ဟန်လေး၊ ဝိညာဉ်ချေဖျက်အလံကို ဘယ်လိုသန့်စင်တာလဲ သိချင်နေတယ်မဟုတ်လား”

“သွားကြစို့။ ခယ်ရွှယ်က မင်းကိုပြမယ်လို့ သဘောတူလိုက်တယ်”

ဟွမ်ခြောက်က တက်ကြွစွာပြန်ပေါ်လာပြီး ဟန်မူယဲ့ကို ဆွဲခေါ်သွားသည်။

သူတို့က ကျွန်း၏ ကျောက်တုံးစံအိမ်သို့ ရောက်သွားသောအခါ ဟန်မူယဲ့က အလယ်တွင်ရှိသော ကျောက်တုံးစင်မြင့်တစ်ခုကို မြင်လိုက်ရသည်။

စင်မြင့်ပေါ်တွင် အစိမ်းပုပ်ရောင်သန်းနေသော ကြည်လင်နေသည့်တောင်ပံတစ်စုံကို ဖြန့်ထားသည်။

အမှောင်သားရဲ၏ တောင်ပံတစ်စုံ ဖြစ်သည်။

ထိုတောင်ပံက မြစ်ထဲတွင်မြင်ခဲ့သော အမှောင်သားရဲထက် ပိုကြီးသည်။

အဖြူရောင်ဝတ်စုံနှင့် ခယ်ရွှယ်က ရွှေအပ်တစ်ချောင်းကို ကိုင်ထားပြီး စင်မြင့်၏ဘေးတွင် ရပ်နေသည်။

ရွှေအပ်တွင် ရွှေချည်ကြိုးကို တပ်ဆင်ထားသည်။ သို့သော် ထိုချည်ကြိုးက သူမ၏ခန္ဓာကိုယ်နှင့် ဆက်သွယ်နေသည်။

“ဝိညာဉ်ကို ကြိုးမျှင်အနေနဲ့ အသုံးချတာလား”

ဟန်မူယဲ့က အနည်းငယ် အံ့အားသင့်သွားသည်။

ဝိညာဉ်ကို ကြိုးတစ်ချောင်းအဖြစ် စုစည်းရန် လွယ်ကူသော်လည်း ဆက်တိုက်ထိန်းသိမ်းထားရန် ခက်ခဲသည်။

လူတိုင်းက မူလဝိညာဉ်ဓားများကို မစုစည်းနိုင်သကဲ့သို့ ဖြစ်သည်။

ခယ်ရွှယ်က ခေါင်းညိတ်လိုက်ပြီး လက်မြှောက်သည်။ ရွှေအပ်က တောင်ပံကို ထိုး‌ဖောက်သွားသည်။

ယခုအချိန်တွင် တောင်ပံက အစိမ်းရောင်အလင်းဖြင့် တောက်ပသွားပြီး ရွှေရောင်အပ်ချည်ဖြင့် ချုပ်နှောင်ခံလိုက်ရသည်။

“တောင်ပံတစ်ခုလုံးကို ဝိညာဉ်နဲ့ လွှမ်းမိုးထားရမယ်။ ရှေ့နဲ့နောက်မှာ တောင်ပံဆယ်ခုနဲ့ လွှမ်းခြုံထားရမယ်”

“ရွှက်တိုင်တစ်ခုဖြစ်လာဖို့ အနည်းဆုံး ဒီလိုတောင်ပံမျိုး ငါးခုလိုတယ်”

“အဲဒီသင်္ဘောကို မြင်လိုက်ရင် ဒီရတနာက ဘာဖြစ်လို့ ထောင်ချီနေတဲ့ခရီးသည်တွေကို သယ်ဆောင်နိုင်တာလဲ နားလည်သွားလိမ့်မယ်”

သူမက ဝိညာဉ်ကို အပ်ချည်အဖြစ် အသုံးပြုပြီး တောင်ပံကို ဆက်တိုက်ချုပ်နေသည်။ တောင်ပံများက သူမ၏ဝိညာဉ်စွမ်းအားကို ဝါးမြိုနေသောကြောင့် သူမ၏မျက်နှာက ဖြူဖျော့လာသည်။

သူမက ရပ်တန့်လိုက်ပြီး ရွှေရောင်ဝိညာဉ်ပုတီးစေ့ကို ထုတ်ယူသည်။

ပုတီးစေ့က သူမ၏လက်ထဲတွင် အရည်ပျော်ပြီး ခန္ဓာကိုယ်ထဲသို့ ဝင်ရောက်သွားသည်။

ရွက်တိုင်တစ်ခု ရလာရန်အတွက် လိုအပ်မည့်ဝိညာဉ်စွမ်းအားနှင့် အချိန်ကို စိတ်ကူးကြည့်ရန် ခက်ခဲသည်။

သို့သော် ရွက်တိုင်ကို သန့်စင်ခြင်းသည် ဝိညာဉ်ကို လေ့ကျင့်ရန်အတွက် အလွန်အထောက်အကူဖြစ်သည်။

“မင်းတို့မျိုးနွယ်ရဲ့ ဝိညာဉ်စွမ်းအားထိန်းချုပ်မှုနဲ့ ဒီနေရာကနေ ထွက်သွားရင် သေချာပေါက် နာမည်တစ်ခုရလိမ့်မယ်”

ဟန်မူယဲ့က ရုတ်တရက် ပြောလိုက်သည်။

ခယ်ရွှယ်က ဝိညာဉ်ချည်မျှင်ကိုသာ ထုတ်ပြနေခြင်းမဟုတ်ပေ။

သူမက ဝိညာဉ်စွမ်းအားကို အသေးစိတ်ကျစွာ ထိန်းချုပ်နိုင်သည်။ တိုက်ပွဲတွင် အလွန်သန်မာသော ဝိညာဉ်စွမ်းအားကို ပိုင်ဆိုင်မထားလျှင် ရန်သူများက မြေအောက်မြစ်လှေသမားကလန်၏ တိုက်ခိုက်မှုတစ်ခုကိုပင် ခုခံနိုင်ကြမည်မဟုတ်ပေ။

သို့သော် မြေအောက်မြစ်လှေသမားကလန်၏ ကလန်သားအားလုံးက ထိုသို့ ကောင်းမွန်သော ဝိညာဉ်စွမ်းအားကို ပိုင်ဆိုင်မထားကြပေ။ ခယ်ရွှယ်ကသာ ရွက်တိုင်များကို သန့်စင်နိုင်သည်။

“ထွက်သွားရမှာလား”

ခယ်ရွှယ်က ဟန်မူယဲ့ကိုကြည့်လိုက်ပြီး ဟွမ်ခြောက်ကို ဆက်ကြည့်သည်။

“အစ်ကိုခြောက်ကလည်း ဒီလိုပြောခဲ့တယ်”

“ဒါပေမဲ့ ဒါက ကျွန်မတို့ရဲ့ ကံကြမ္မာပဲ”

ခယ်ရွှယ်က ခေါင်းခါလိုက်ပြီး အဝေးတစ်နေရာသို့ ကြည့်သည်။

“သင်္ဘောရောက်လာတော့မယ်။ ရှင်တို့ အခုထွက်သွားလို့ရပြီ”

“အစ်ကိုခြောက်၊ အချိန်ရှိရင် ကျွန်မကို လာတွေ့လို့ရပါတယ်”

ထိုအသံက အနည်းငယ် ခါးသီးနေပုံပေါ်သည်။

ဟွမ်ခြောက်က သက်ပြင်းချလိုက်ပြီး ခေါင်းညိတ်သည်။ ထို့နောက် ကျောက်တုံးစံအိမ်ထဲမှ ထွက်သွားသည်။

“အမှန်အတိုင်းပြောရရင် ကျွန်တော့်အစ်မကို ခေါ်သွားလို့ရပါတယ်”

ကျောက်တုံးစံအိမ်၏အပြင်ဘက်တွင် ခယ်ယန်က ဟွမ်ခြောက်ကို ကြည့်လိုက်သည်။

“ကျွန်တော်ကလည်း ရွက်တိုင်တွေကို သန့်စင်နိုင်တယ်”

“မင်းက မြေအောက်မြစ်ကို ဖိနှိပ်နိုင်ပြီလား”

ဟွမ်ခြောက်က ခယ်ယန်ကို ကြည့်လိုက်သည်။

ခယ်ယန်က ကြောင်အသွားပြီး စိတ်ပျက်နေပုံပေါ်သည်။

သူ၏ ကျင့်ကြံဆင့်က မြေအောက်မြစ် လှိုင်းထန်လာသောအချိန်ကို မဖိနှိပ်နိုင်သေးပေ။

အကယ်၍ မြေအောက်မြစ်ကို မဖိနှိပ်နိုင်လျှင် သူတို့၏ကျွန်းက ဝါးမြိုခံရလိမ့်မည်။

“မြေအောက်မြစ်လှေသမားတွေက မြေအောက်မြစ်မှာ နေထိုင်ပြီး မြေအောက်မြစ်ရဲ့အကာအကွယ်ကို ရထားတယ်။ တခြားလူတွေက သူတို့ကို အန္တရာယ်မပြုနိုင်ဘူး”

“တကယ်လို့ ဒီနေရာကနေ ထွက်သွားရင် မရေမတွက်နိုင်တဲ့ မိစ္ဆာကျင့်ကြံသူတွေက သူတို့ကိုတိုက်ခိုက်ပြီး ဝိညာဉ်ကို ဝါးမြိုကြလိမ့်မယ်”

ဟွမ်ခြောက် သွေးမြစ်ကိုကြည့်လိုက်ပြီး ညင်သာစွာပြောသည်။

မြေအောက်မြစ်သည် ဝိညာဉ်စွမ်းအားနှင့် သွေးစွမ်းအားမှလွဲ၍ တခြားစွမ်းအားများကို ဖိနှိပ်ထားသည်။ မိစ္ဆာကျင့်ကြံသူများက ဤနေရာတွင် မြေအောက်မြစ်လှေသမားများကို မယှဉ်နိုင်ကြပေ။

သို့သော် သူတို့က မြေအောက်မြစ်မှ ထွက်သွားလျှင် မိစ္ဆာကျင့်ကြံသူများက မရေမတွက်နိုင်သော နည်းလမ်းများဖြင့် သူတို့ကို သတ်ဖြတ်နိုင်သည်။

ခယ်ရွှယ်ပြောခဲ့သည့်အတိုင်း ကံကြမ္မာပင် ဖြစ်လိမ့်မည်။

“မဖြစ်နိုင်တာတော့ မဟုတ်ဘူး”

ဟန်မူယဲ့က တီးတိုးပြောသည်။

သူက ဆက်မပြောပေ။

သူက အင်မော်တယ်ဘုရင်မင်ဟယ်၏ မှတ်ဉာဏ်တချို့ကို ရထားပြီး လျှို့ဝှက်ချက်များကို သိနေသည်။

အကယ်၍ သူက အင်မော်တယ်ဘုရင်မင်ဟယ်၏ အမွေအနှစ်ကို ရခဲ့လျှင် မြေအောက်လှေသမားများက ဤနေရာမှ ထွက်သွားနိုင်လိမ့်မည်။

“ဝူ ....”

မြစ်ထဲမှ ခရာသံထွက်လာသည်။

ပေသုံးထောင်ရှည်လျားပြီး ပေငါးရာကျယ်ဝန်းသော သင်္ဘောကြီးတစ်စင်း ပေါ်လာသည်။

ပေတစ်ထောင်ရှည်လျားသော ရွက်တိုင်ဆယ့်ရှစ်ခုသည် ရွှေအလင်းကို ထုတ်လွှတ်နေသည်။

အနည်းဆုံး အထွတ်အထိပ်အဆင့် အင်မော်တယ်ရတနာ ဖြစ်သည်။

ထိုရွက်တိုင်ဆယ့်ရှစ်ခုက အင်မော်တယ်သခင်၏ ဝိညာဉ်ကိုပင် ဖမ်းဆီးနိုင်လိမ့်မည်။

မြေအောက်မြစ်တွင် ထိုရတနာမျိုး ရှိနေလိမ့်မည်ဟု ဟန်မူယဲ့က ထင်မထားခဲ့ပေ။

အကယ်၍ ထိုရတနာမျိုး မရှိလျှင်လည်း မြေအောက်မြစ်ကလန်သားများက ရှင်သန်နိုင်မည်မဟုတ်ပေ။

“မြေအောက်မြစ်သင်္ဘောကို စီးနင်းပြီး သေခြင်းရှင်ခြင်းကို ပြောင်းလဲနိုင်မယ့် တော်ဝင်မြို့တော်ကို သွားနိုင်တယ် ....”

မီးခိုးရောင်ဝတ်စုံနှင့် လူအိုကြီးတစ်ယောက်က ကျောက်တုံးစံအိမ်ထဲမှ ထွက်လာပြီး စိတ်လှုပ်ရှားစွာ ပြောသည်။

သူ့ခန္ဓာကိုယ်၏ ယိုယွင်းမှုများကို သိသာစွာ မြင်နိုင်သည်။

ကောင်းကင်နှင့်လူသား၏ ပျက်စီးခြင်းငါးပါးကပ်ဘေး ဖြစ်သည်။

လူသားအင်မော်တယ်အဆင့် အတားအဆီးကို ချိုးဖျက်ရန် ကျရှုံးသွားသော ကျွမ်းကျင်သူတစ်ဦး ဖြစ်သည်။

သူက ပျက်စီးခြင်းငါးပါးကပ်ဘေးနှင့် ကြုံတွေ့နေရပြီး သက်တမ်းကုန်ဆုံးရန် နီးကပ်လာသည်။

ကျောက်တုံးစံအိမ်တွင်ရှိသော ကျင့်ကြံသူများက တစ်ယောက်ပြီးတစ်ယောက် အပြင်ဘက်သို့ ထွက်လာပြီး ဖြည်းဖြည်းချင်း နီးကပ်လာသော မြေအောက်မြစ်သင်္ဘောကို မျှော်လင့်ချက်များနှင့် ကြည့်လိုက်ကြသည်။

“သွားကြစို့။ ကျွန်တော်က ခင်ဗျားတို့ကို သင်္ဘောပေါ်အထိ လိုက်ပို့မယ်”

ခယ်ယန်က တီးတိုးပြောသည်။

သင်္ဘောကြီးက ဆယ်မိုင်အကွာတွင် ရပ်တန့်သွားသည်။

ခယ်ယန်က လှေကိုထိန်းချုပ်ပြီး ဟန်မူယဲ့တို့အပြင် ကျွန်းပေါ်တွင်ရှိသော လှေသမား ၂၃ယောက်ကို သင်္ဘောဆီသို့ လိုက်ပို့ခဲ့သည်။

သင်္ဘောကို စီးနင်းရန်အတွက် ထိုကျင့်ကြံသူများက ဝိညာဉ်ကျောက်တုံး၊ အင်မော်တယ်ကျောက်တုံး၊ ဝိညာဉ်ပုတီးစေ့နှင့် တခြားရတနာများကို ပေးဆောင်ရန် လိုအပ်သည်။

ခယ်ယန်၏စကားအရ ဝိညာဉ်ကျောက်တုံး သန်းသုံးဆယ်ခန့် ကုန်ကျသည်။ ထိုဈေးနှုန်းကို ကောင်းကင်အဆင့် ကျင့်ကြံသူများသာ တတ်နိုင်ကြသည်။

သို့သော် ဘဝတစ်လျှောက်လုံး စုဆောင်းရန် လိုအပ်သည်။

သင်္ဘောစီးမည့် ကျင့်ကြံသူများက ကုန်းပတ်ပေါ်တွင်ရပ်နေသော အနက်ရောင်ဝတ်စုံနှင့်လူများကို နာခံမှုရှိစွာ အခကြေးငွေ ပေးလိုက်ကြသည်။

ထိုအနက်ရောင်ဝတ်စုံနှင့် လူများက အလွန်အားကောင်းပြီး အနည်းဆုံး ကောင်းကင်အင်မော်တယ် လေဟာနယ်လမ်းကြောင်းအဆင့်တွင် ရှိသည်။

သို့သော် သူတို့က အစစ်အမှန်လူသားများနှင့် မတူပဲ ရုပ်သေးရုပ်များကဲ့သို့ တောင့်တင်းနေသည်။

ခယ်ယန်က ကုန်းပတ်ပေါ်သို့ ရောက်လာသောအခါ သင်္ဘောဦးထိပ်တွင် ရပ်နေသော မီးခိုးရောင်ဆံပင်နှင့် လူအိုကြီးကို စကားအနည်းငယ် ပြောလိုက်သည်။ ထိုလူအိုကြီးက ‌ခေါင်းညိတ်လိုက်ပြီး ဟန်မူယဲ့နှင့် ဟွမ်ခြောက်ကို ကြည့်သည်။

“ကောင်းပြီ။ သူတို့ရဲ့ ခရီးစရိတ်ကို ပယ်ဖျက်လိုက်မယ်”

လူအိုကြီး၏စကားကြောင့် ပတ်ဝန်းကျင်တွင်ရှိနေသော လူများက ပင့်သက်ရှိုက်လိုက်ပြီး အားကျနေကြသည်။

ဝိညာဉ်ကျောက်တုံး သန်းသုံးဆယ်သည် အလွန်တန်ဖိုးရှိသည်။

“အစ်ကိုခြောက်၊ ဂရုစိုက်ပါ”

ခယ်ယန်က သင်္ဘောပေါ်မှ ဆင်းသွားသောအခါ လက်နှစ်ဖက်ကို ဆုပ်ကိုင်လိုက်ပြီး နှုတ်ဆက်သည်။

ဟွမ်ခြောက်က ဝေးကွာသွားသော ခယ်ယန်၏လှေကို ကြည့်နေသည်။

“အရင်အချိန်တွေကို ပြန်တွေးမိရင် တကယ်လွမ်းမောစရာပဲ”

သူက တီးတိုးရေရွတ်ပြီး တစ်ဖက်သို့ လှည့်ကြည့်သောအခါတွင် ဟန်မူယဲ့၏ ထူးဆန်းသောအကြည့်နှင့် ရင်ဆိုင်လိုက်ရသည်။

ပေသုံးထောင်ရှည်လျားသောသင်္ဘောက ဖြည်းဖြည်းချင်း ရွေ့လျားလာသည်။ ဟန်မူယဲ့နှင့် ဟွမ်ခြောက်က သန့်ရှင်းသော အခန်းကို ရထားသည်။

အခန်းထဲတွင် မိစ္ဆာကျင့်ကြံသူနှစ်ယောက်လည်း ရှိနေသည်။

တစ်ယောက်က ကျင့်ကြံခြင်းလမ်းဆုံးပြီး သက်တမ်းကုန်ခါနီးဖြစ်‌နေသော ကောင်းကင်အဆင့်ကျင့်ကြံသူ ဖုန်းရီ ဖြစ်သည်။ နောက်တစ်ယောက်က မြေအောက်မြစ်၏ တော်ဝင်မြို့တော်တွင် အခွင့်အရေးရှာဖွေချင်သော သူတော်စင်တစ်ဝက်အဆင့် ကျင့်ကြံသူ ရှစ်ယွမ် ဖြစ်သည်။

သေဆုံးခါနီးဖြစ်သောကြောင့်ထင်သည် ဖုန်းရီက စကားများသည်။

တစ်ဖက်တွင် တာအိုတန်ခိုးရှင်ရှစ်ယွမ်က သိပ်စကားမပြောပေ။

ဖုန်းရီက လွန်ခဲ့သောခြောက်လတွင် ဤသင်္ဘောကို စီးနင်းခဲ့သည်။ ဤသင်္ဘောက မြေအောက်မြစ်တွင် လှည့်ပတ်သွားလာနေသည်။

သင်္ဘောတွင် အဆင့်ကိုးဆင့်ရှိပြီး သူတို့အားလုံးက တတိယအဆင့်တွင် ဖြစ်ကြသည်။

ပိုမြင့်သောအဆင့်တွင် နေချင်လျှင် မြင့်မားသောကျင့်ကြံဆင့် သို့မဟုတ် ပိုများသောငွေကို ပေးချေရန် လိုအပ်သည်။

ကိုးဆင့်မြောက်တွင် ကောင်းကင်အင်မော်တယ်အဆင့်၏ အသန်မာဆုံးကျင့်ကြံသူများ ရှိနေသည်ဟု ပြောကြသည်။