အခန်း (၁၀၀၂)

“အဲဒါက အရိုးစားသားရဲပဲ။ မြေအောက်မြစ်သင်္ဘောကိုတောင် မှောက်ပစ်နိုင်တယ်”

စကားပြောလိုက်သောလူက အကြီးအကဲချူချန် ဖြစ်သည်။

စွမ်းအားများကို ဖိနှိပ်ခံထားရသော‌ မြေအောက်မြစ်တွင် ရုပ်ခန္ဓာကြံ့ခိုင်သော သားရဲများနှင့် ရင်ဆိုင်ရန် ခက်ခဲသည်။

အရိုးစားသားရဲသည် ဟွမ်ခြောက်၏လှံချက်ကြောင့် ဒဏ်ရာရသွားသော်လည်း မသေခဲ့ပေ။

ထိုသားရဲက ဆက်လက်ကူးခပ်လာပြီး မြေအောက်မြစ်သင်္ဘောကို ဝင်တိုက်သည်။

ဟွမ်ခြောက်က အော်ဟစ်လိုက်ပြီး ပျံထွက်သွားသည်။ ခေါင်းသုံးလုံးလက်ခြောက်ဖက် မိစ္ဆာပုံရိပ်က သူ့နောက်ကျောတွင် ရှိနေသည်။

သူက သွေးချီကို ထုတ်လွှတ်ပြီး သင်္ဘော၏ရှေ့တွင် ရပ်နေခဲ့သည်။

လက်ခြောက်ဖက်က လှံရှည်ကို ဆုပ်ကိုင်ထားပြီး ရွှေအလင်းဖြင့် တောက်ပလာစေသည်။

ဝိညာဉ်နှင့်သွေးချီကို အသုံးပြု၍ အင်မော်တယ်ရတနာကို အသက်သွင်းပြီး အဆုံးမရှိသောစွမ်းအားကို ထုတ်လွှတ်ခဲ့သည်။

လူတစ်ယောက်နှင့် လှံတစ်ချောင်းက မြေအောက်မြစ်သင်္ဘော၏ရှေ့တွင် ခိုင်မာစွာရပ်နေပြီး အရိုးစားသားရဲကို ရှေ့ဆက်တိုးမလာနိုင်အောင် တားဆီးထားသည်။

“အရမ်းသန်မာတာပဲ ....”

ကိုးထပ်မြောက်တွင် လူတစ်ယောက်က ရေရွတ်လိုက်သည်။

ထိုမြင်ကွင်းကြောင့် သင်္ဘောတစ်စင်းလုံးက အားပေးနေကြသည်။

“အစ်ကိုခြောက်က ခွန်အားကြီးတယ်”

အရိုးစားသားရဲနှင့် တိုက်ခိုက်နေသော ဟွမ်ခြောက်ကို ကြည့်လိုက်ပြီး လူအများက အော်ဟစ်နေကြသည်။

ထိုသားရဲက ကောင်းကင်အင်မော်တယ်ကိုပင် သတ်ပစ်နိုင်သည်။ အားကောင်းသောရုပ်ခန္ဓာကို ပိုင်ဆိုင်မထားလျှင် ထိုသားရဲကို တားဆီးနိုင်မည်မဟုတ်ပေ။

မြေအောက်မြစ်သည် ကျင့်ကြံသူများ၏ ကျင့်ကြံခြင်းကို ဖိနှိပ်ထားသည်။ ရုပ်ခန္ဓာမကြံ့ခိုင်သော ကောင်းကင်အင်မော်တယ်များက ဤနေရာတွင် နတ်ဘုရားဘုရင်များထက် အဆင့်နိမ့်ကြသည်။

စည်းမျဉ်းများကို နားလည်ထားသော ဟန်မူယဲ့က ဤတစ်ကြိမ်တွင် မတူညီသောအရာကို မြင်ခဲ့သည်။

သင်္ဘောပေါ်တွင်ရှိသော လူများက အော်ဟစ်လိုက်ကြပြီး ဟွမ်ခြောက်၏ခွန်အားက ပိုမိုမြင့်တက်လာသည်။

ဟွမ်ခြောက်က မလိုအပ်ပဲ ခွန်အားထုတ်ပြနေသည့်အတွက် အံ့အားသင့်ရန် မလိုတော့ပေ။ သူက တခြားလူများ၏ အားပေးမှုဖြင့် ခွန်အားကို စုစည်းနေသည်။

သို့သော် ထိုသို့ မဟုတ်သေးပေ။ ထူးခြားသောစွမ်းအားတစ်ခုကြောင့် သူက ခွန်အားများကို အလိုလျောက် စုစည်းလိုက်ပုံပေါ်သည်။

သို့မဟုတ် မိစ္ဆာပုံရိပ်ကြောင့် ဖြစ်နိုင်သည်။

ထိုအရာသည် ပူဇော်ခြင်းစွမ်းအားကို ရယူသော နတ်ဘုရားများ၏နည်းလမ်းနှင့် ဆင်တူသည်။

ဟွမ်ခြောက်၏ မိစ္ဆာပုံရိပ်က စုစည်းလာသောစွမ်းအားဖြင့် ပိုအားကောင်းလာသည်။

“တာအိုရောင်းရင်းဟွမ်ရဲ့ နည်းလမ်းတွေက တကယ်ထူးခြားတာပဲ”

ချူချန်က အပြုံးတစ်ခုနှင့်အတူ ပြောလိုက်ပြီး ဟန်မူယဲ့ကို လှည့်ကြည့်သည်။

သူက ဟန်မူယဲ့၏လှုပ်ရှားမှုကို မြင်ချင်မိသည်။

ဟန်မူယဲ့က ဟွမ်ခြောက်၏နောက်သို့ လိုက်နေသည်ဟု တခြားလူများက ထင်ကြသော်လည်း အရောင်းအဝယ်လုပ်ခဲ့သောအချိန်တွင် ထိုသို့မဟုတ်ကြောင်း သူတို့အားလုံးက နားလည်ခဲ့သည်။

ထို့အပြင် ဟန်မူယဲ့က ကောင်းကင်ဖျက်ဆီးဒူးလေးကို ပေါ့ပါးစွာ ထုတ်ယူခဲ့သည်။

သူတို့နှစ်ယောက်ကြားတွင် ဟန်မူယဲ့က ပိုမို၍ သက်တောင့်သက်သာရှိပြီး အေးဆေးသည်။

တိုက်ပွဲသည် ပြင်းထန်နေပြီး မြေအောက်မြစ်သားရဲများက ဆက်တိုက်ဝင်ရောက်လာကြသည်။

ဟန်မူယဲ့က လှုပ်ရှားရန် ရည်ရွယ်ချက်မရှိပေ။ ကိုးထပ်မြောက်တွင် အနက်ရောင်ဝတ်စုံနှင့် လူအိုကြီးနှစ်‌ယောက်က တစ်ယောက်ကိုတစ်ယောက် ကြည့်လိုက်ကြပြီး အောက်ဆင်းသွားသည်။

သူတို့က သွေးချီစွမ်းအားကို ထုတ်လွှတ်နေပြီး လက်နက်များကို ထုတ်ယူလိုက်ကြသည်။

“သတ် ....”

သူတို့က ကျယ်လောင်စွာအော်ဟစ်လိုက်ပြီး ရတနာနှစ်ခုကို အသက်သွင်းသည်။ ပေဒါဇင်ချီရှည်လျားသော ပုံရိပ်များ ဖြစ်ပေါ်လာသည်။

သူတို့နှစ်ယောက်က လှေဦးထိပ်သို့ ရောက်သွားသောအခါ လက်နက်၏ ပုံရိပ်များက မြစ်ပြင်ကို ရိုက်ချလိုက်သည်။

သားရဲနှစ်ကောင်က တိုက်ရိုက်သေဆုံးသွားသည်။

ထိုတိုက်ကွက်က ဟွမ်ခြောက်ထက် အားမနည်းပေ။

အရိုးစားသားရဲနှင့် ရင်ဆိုင်နေသော ဟွမ်ခြောက်က နောက်သို့လှည့်ကြည့်ပြီး ခပ်ဟဟရယ်သည်။

သူက ရုတ်တရက် လှံရှည်ကို ဆွဲထုတ်ပြီး လက်သီးဆုပ်သည်။

“ဘန်း”

သူ့နောက်တွင်ရှိသော ပုံရိပ်က လက်သီးဖြင့် ထိုးချသည်။

အရိုးစားသားရဲက တစ်ကိုယ်လုံးတုန်ခါသွားပြီး မျက်လုံးထဲတွင် နာကျင်မှုများဖြင့် ပြည့်နေသည်။

“ဘန်း”

“ဘန်း”

လက်ခြောက်ဖက်က တစ်လှည့်စီ လက်သီးထိုးနေပြီး အရိုးစားသားရဲက ရူးသွပ်စွာ ခန္ဓာကိုယ်ကို လှိမ့်ချလိုက်သည်။

သို့သော် ဟွမ်ခြောက်၏ ခြေထောက်များက တည်ငြိမ်နေပြီး လက်သီးချက်များက ဆက်တိုက် ကျဆင်းလာသည်။

အရိုးစားသားရဲက နာကျင်စွာအော်ဟစ်လိုက်ပြီး မြစ်ထဲသို့ တိုးဝင်သွားသည်။

ထိုသားရဲက ထွက်ပြေးသွားခဲ့သည်။

သတ်ဖြတ်မှုကိုသာ နားလည်သော ထိုသားရဲကပင် ထွက်ပြေးသွားသည်။

ကိုးထပ်မြောက်တွင် ချူချန်နှင့် တခြားလူများက ကြောင်အသွားကြသည်။

ကုန်းပတ်ပေါ်တွင် ကျင့်ကြံသူများက အားပေးနေကြသည်။

သို့သော် ခဏအကြာတွင် အားပေးသံများအားလုံး ဖြည်းဖြည်းချင်း တိတ်ဆိတ်သွားသည်။

ဟွမ်ခြောက်၏ ခန္ဓာကိုယ်က သွေးနီရောင်မြစ်ထဲတွင် ဖြည်းဖြည်းချင်း နစ်မြုပ်သွားသည်။

“အစ်ကိုခြောက်က အဆင်ပြေရဲ့လား”

“မကောင်းတော့ဘူး။ မြေအောက်မြစ်မှာ ဘယ်အရာမှ မလွင့်မျောနိုင်ဘူး”

“အစ်ကိုခြောက်က အချိန်မီမရှောင်နိုင်ခဲ့ဘူး”

ကုန်းပတ်ပေါ်တွင်ရှိသော လူများက တစ်ခုခုမှားယွင်းနေကြောင်း သတိထားမိသွားပြီး စိုးရိမ်နေကြသည်။

သားရဲများကို သတ်ဖြတ်လိုက်သော လူအိုကြီးနှစ်ယောက်က အသာအယာ ပြုံးလိုက်ကြသည်။

ဟွမ်ခြောက်က အားကောင်းသောသားရဲများနှင့် အလွန်အကျွံယှဉ်ပြိုင်မိသွားသည်။

“တာအိုရောင်းရင်းဟန်၊ တာအိုရောင်းရင်းဟွမ်က အဆင်ပြေမှာလား”

ချူချန်က ဟန်မူယဲ့ကို စိုးရိမ်စွာကြည့်သည်။

ဟန်မူယဲ့က မြေအောက်မြစ်တွင် လှုပ်ရှားနေသော စွမ်းအားများကို မြင်ရသည်။

“အစ်ကိုခြောက်က ပြန်လာနေပါပြီ”

ဟန်မူယဲ့က တည်ငြိမ်စွာပြောသည်။

“ဘန်း”

တိတ်ဆိတ်နေ‌သော ရေမျက်နှာပြင်က ပေါက်ကွဲထွက်လာသည်။

အရိုးစားသားရဲက ပြန်ပေါ်လာသည်။

သို့သော် ထိုသားရဲက ယခင်နှင့် မတူတော့ပေ။ အနက်ရောင်ချပ်ဝတ်ဖြင့် လွှမ်းခြုံခံထားရသည်။

ထိုချပ်ဝတ်က ဆူးချွန်များဖြင့်ပြည့်နေပြီး အလွန်ကြမ်းတမ်းသည်။

ဟွမ်‌ခြောက်က လက်တစ်ဖက်တွင် လှံရှည်ကို ကိုင်ထားပြီး အရိုးစားသားရဲ၏ခေါင်းပေါ်တွင် ရပ်နေသည်။ သူ၏ တခြားလက်တစ်ဖက်တွင် ရွှေရောင်ကြိုးတစ်ချောင်း ရှိနေပြီး အရိုးစားသားရဲ၏ ဦးခေါင်းကို ချည်နှောင်ထားသည်။

အရိုးစားသားရဲက မြေအောက်မြစ်တွင် လှုပ်ရှားလိုက်ပြီး ပတ်ဝန်းကျင်တွင်ရှိနေသော တခြားသားရဲများကို ရိုက်ထုတ်သည်။

ထိုသားရဲက ထိန်းချုပ်ခံလိုက်ရသည်။

သတ်ဖြတ်မှုကိုသာ နားလည်သော မြေအောက်မြစ်၏သားရဲက အမှန်တကယ်ပင် ထိန်းချုပ်ခံလိုက်ရသည်။

ဟွမ်ခြောက်က စိတ်ကျေနပ်စွာရယ်သည်။ သူက အရိုးစားသားရဲကို ထိန်းချုပ်ပြီး မြေအောက်မြစ်တွင် လွတ်လပ်စွာ သွားလာနေသည်။

သင်္ဘောပေါ်တွင်ရှိသော လူများက ကြောင်အသွားကြသည်။

“အရိုးစားသားရဲကို လူတစ်ယောက်က ထိန်းချုပ်လိုက်တာလား”

ချူချန်၏ဘေးတွင်ရှိသော အကြီးအကဲတစ်ယောက်က တီးတိုးရေရွတ်သည်။

ထိုဖြစ်ရပ်မျိုးသည် နှစ်သောင်းချီကြာအောင် မဖြစ်ခဲ့ပေ။

ယခင်က ပထမအကြီးအကဲသည် ဝိညာဉ်ဖိနှိပ်ခြင်းအလံဖြင့် မြေအောက်မြစ်၏သားရဲများကို ဖိနှိပ်ခဲ့သည်။ လူအများက သားရဲများကို ထိန်းချုပ်နိုင်ခဲ့သည်။

သို့သော် ပထမအကြီးအကဲနှင့် ဝိညာဉ်ဖိနှိပ်ခြင်းအလံ ပျောက်ကွယ်သွားသောအခါတွင် မြေအောက်မြစ်သားရဲများကို မည်သူမှ မထိန်းချုပ်နိုင်တော့ပေ။

ယခုအချိန်တွင် သားရဲများကို အသုံးပြုနိုင်သောလူက မြို့တော်၏ အဆင့်မြင့်ကျွမ်းကျင်သူများသာ ဖြစ်ကြသည်။

“တကယ်လို့ တာအိုရောင်းရင်းဟွမ်က တော်ဝင်မြို့မှာ နေခဲ့ရင် ....”

ချူချန်က ဟန်မူယဲ့ကို ကြည့်သည်။

‘သူတို့နှစ်ယောက်က ဘယ်သူတွေလဲ။ သူတို့က ဘာဖြစ်လို့ တော်ဝင်မြို့ကို ရောက်လာတာလဲ’

ဟန်မူယဲ့၏ကြွယ်ဝမှု၊ ဟွမ်ခြောက်၏ ခွန်အားတို့က ကြောက်မက်ဖွယ်ကောင်းသည်။

“ဘုန်း”

မြစ်ထဲတွင် ဟွမ်ခြောက်က အရိုးစားသားရဲကို ထိန်းချုပ်ဖြင့် လှံရှည်ဖြင့် တခြားသားရဲများကို မောင်းထုတ်နေသည်။

သင်္ဘောဦးထိပ်တွင်ရပ်နေသော ကျွမ်းကျင်သူနှစ်ယောက်က တစ်ယောက်ကိုတစ်ယောက် ကြည့်လိုက်ပြီး အကူအညီမဲ့စွာ ခေါင်းခါသည်။

ဟွမ်ခြောက်က အလွန်သန်မာသည်။ နှိုင်းယှဉ်နေရန် မဖြစ်နိုင်ပေ။

သင်္ဘောပေါ်တွင် အားပေးသံများဖြင့် ပြည့်နှက်နေပြီး သင်္ဘောက ရေလှိုင်းများကိုကျော်ဖြတ်၍ ရှေ့ဆက်သွားသည်။

ဟွမ်ခြောက်က ရှေ့တွင် လမ်းရှင်းပေးနေသောကြောင့် သင်္ဘောများက ပိုမိုလျင်မြန်လာကြသည်။

ဟန်မူယဲ့က ကိုးထပ်မြောက်မှ ဆင်းမသွားပဲ ပြတင်းပေါက်မှတစ်ဆင့် အပြင်ဘက်သို့ ကြည့်နေသည်။

သူက မြစ်ရေ၏ ပုံရိပ်များကို ကြည့်လိုက်ပြီး မဟာတာအိုနှင့် ပေါင်းစပ်နေသည်ဟု ခံစားရသည်။

သူက တခြားစွမ်းအားတစ်ခုနှင့် ထိတွေ့သွားသကဲ့သို့ အလွန်စွဲလမ်းဖွယ်ကောင်းသည်။

“ကံကောင်းခြင်းလား”

အင်မော်တယ်သခင်အဆင့်အထိ ကျင့်ကြံပြီး‌သောအခါတွင် ပုံရိပ်ယောင်ဆန်သော စွမ်းအားများက ကျင့်ကြံခြင်းလမ်းစဉ်ကို ဆုံးဖြတ်ပေးနိုင်သည်ဟု လီယွင်ကန်းက ပြောခဲ့သည်။

လီယွင်ကန်း၏စကားအရ ဟန်မူယဲ့က မဟာကံကောင်းခြင်းကို ပိုင်ဆိုင်ထားသည်။ ထို့ကြောင့် သူက လူသားကမ္ဘာသို့ ဟန်မူယဲ့နှင့်အတူ လိုက်လာခဲ့သည်။

ယခုအချိန်တွင် ဟန်မူယဲ့က မြေအောက်မြစ်၏ ရောယှက်နေသောစွမ်းအားများကို မြင်လိုက်ရပြီး ပိုမိုရှင်းလင်းစွာ နားလည်ခဲ့သည်။

အင်မော်တယ်သခင်အဆင့်ထက် မြင့်မားသော စွမ်းအားများက တိုက်ခိုက်နေကြသည်။ ထိုစွမ်းအားထဲတွင်ရှိသော သက်ရှိများက ကိုယ့်ကိုယ်ကိုယ် မထိန်းချုပ်နိုင်ကြပေ။

တစ်ဖက်တွင် သူက အရာအားလုံးကို ထွင်းဖောက်မြင်ပြီး အန္တရာယ်ကို ရှောင်တိမ်းနိုင်လျှင် ချောမွေ့သောလမ်းစဉ်ကို လျှောက်လှမ်းနိုင်လိမ့်မည်။

သူက တောက်ပနေသောမျက်လုံးများဖြင့် ရွက်တိုင်ဆယ့်ရှစ်ခုကို ကြည့်သည်။

ထိုရွက်တိုင်များက ရွှေအလင်းကို ထုတ်လွှတ်ပြီး တစ်ခုနှင့်တစ်ခု ဆက်သွယ်နေကြသည်။

ဆန်းကြယ်သောစွမ်းအားတစ်ခုက သင်္ဘောများကို လမ်းပြပေးနေပုံပေါ်သည်။

မြေအောက်မြစ်သင်္ဘောကို ထိန်းချုပ်ထားသောလူက သေချာပေါက် အင်မော်တယ်သခင်တစ်ယောက် ဖြစ်လိမ့်မည်။

မြေအောက်မြစ်သင်္ဘောက အင်မော်တယ်သခင်အဆင့် စွမ်းအားကို ထုတ်လွှတ်နိုင်လိမ့်မည်။

သင်္ဘောများက ဖရိုဖရဲရေလက်ကြားတွင် ဆက်လက်သွားလာနေခဲ့သည်။ သူတို့က သားရဲများနှင့် ရင်ဆိုင်ခဲ့ရသော်လည်း ကျော်လွှားနိုင်ခဲ့သည်။

အဘယ်ကြောင့်ဆိုသော် သင်္ဘောများက မြေအောက်မြစ်၏လွှမ်းခြုံမှုအောက်မှ ထွက်မသွားကြပေ။

သူတို့က မြေအောက်မြစ်၏ စွမ်းအားအောက်တွင် ရှိနေသ၍ တခြားစွမ်းအားများ၏ တိုက်ခိုက်မှုကို ခံရမည်မဟုတ်ပေ။

ထိုအရာသည် ကံကြမ္မာ၏ဆက်သွယ်မှု ဖြစ်ပုံရသည်။

“ဝူ ....”

နောက်တွင်ရှိသော သင်္ဘောတစ်စင်းက ခရာသံပေးလိုက်သည်။

ချူချန်နှင့် အကြီးအကဲများ၏ မျက်နှာထားက လေးနက်လာသည်။

ရွက်တိုင်ဆယ့်ရှစ်ခုက ဖြည်းဖြည်းချင်း ပြန့်ကားလာပြီး ရွှေအလင်းကို ထုတ်လွှတ်နေသည်။

သင်္ဘော ၁၈စင်းလုံးက ရွက်တိုင်ကို အပြည့်အဝ အသက်သွင်းလိုက်ကြသည်။

မျက်စိကျိန်းလောက်သော ရွှေအလင်းသည် ဆက်သွယ်သွားပြီး အလင်းလွှာတစ်ခုကို ဖန်တီးသည်။

ရွှေအလင်းတစ်ခုက ဟွမ်ခြောက်ဆီသို့ ကျရောက်သွားပြီး ရစ်ပတ်လိုက်သည်။

ဟန်မူယဲ့က အစိမ်းပုပ်ရောင်အငွေ့အသက်နှင့် ပြည့်နှက်နေသော ပတ်ဝန်းကျင်ကို မြင်လိုက်ရသည်။

သင်္ဘောများက မြေအောက်မြစ်စွမ်းအား၏ လွှမ်းခြုံမှုအောက်မှ ထွက်သွားတော့မည်ဖြစ်သည်။

“ဟူး ....”

ထူးဆန်းသောလေပြင်းများ တိုက်ခတ်လာကြသည်။