အခန်း (၁၀၀၈)

မီးခိုးရောင်ဝတ်စုံနှင့် လူအိုကြီးက လက်မြှောက်သည်။ သူ၏ ဝါးကြိမ်က မရေမတွက်နိုင်သော ဝါးရွက်များကို ဆွဲယူပြီး ဆက်တိုက်လည်ပတ်လျက် ဓားချက်ကို ကာကွယ်သည်။

အနက်ရောင်ဝတ်စုံနှင့် လူအိုကြီးက တစ်ချက်လှုပ်ရှားပြီး နေရာမှ ပျောက်ကွယ်သွားသည်။

“ဘန်း”

ဓားအလင်းသည် ဝါးရွက်များနှင့် ထိတွေ့သွားပြီး ကြမ်းတမ်းစွာ ထိုးခွဲ၍ လူအိုကြီး၏ ဝါးကြိမ်နှင့် ရင်ဆိုင်သည်။

ဝါးကြိမ်က ဘန်းခနဲ ပေါက်ကွဲသွားသည်။ မီးခိုးရောင်ဝတ်စုံနှင့် လူအိုကြီးက ဖြူဖျော့နေသောမျက်နှာဖြင့် နောက်ဆုတ်လာသည်။

သူက နောက်ဆုတ်သွားသောအခါတွင် ဟန်မူယဲ့၏ ဓားအလင်းက ပျောက်ကွယ်သွားသည်။

ဟန်မူယဲ့က တည်ငြိမ်သောမျက်နှာထားဖြင့် ဓားထပ်မြှောက်သည်။

ထိုအချိန်တွင် ဟန်ချီက အော်ပြောလိုက်သည်။

“ဂရုစိုက် ....”

အနက်ရောင်ဝတ်စုံနှင့် လူအိုကြီးက ရုတ်တရက်ပေါ်လာပြီး ဓားနှစ်လက်ဖြင့် ဟန်မူယဲ့၏လည်ပင်းကို ဖြတ်တောက်ရန် ကြိုးစားသည်။

လျင်မြန်သည်။

ကြမ်းတမ်းသည်။

ထိုဓားချက်သည် ဟန်မူယဲ့၏ လခြမ်းကွေးဓားချက်နှင့် ယှဉ်နိုင်သည်။

“ဘုန်း”

ဟန်မူယဲ့က ဓားချက်ကို သတိထားမိပုံမရပေ။ သူက ဓားဖြင့် ဆက်ခုတ်ချသည်။

သို့သော် သူက ဓားဖြင့် ခုတ်ချလိုက်သောအချိန်တွင် တိတ်ဆိတ်စွာ ရှေ့သို့ ခြေတစ်လှမ်းတိုးသည်။

ထိုခြေတစ်လှမ်းသည် သူနှင့် ဓားနှစ်လက်ကို ဝေးကွာသွားစေသည်။

ခမ်းနားသော ဓားအလင်း၏အောက်တွင် မီးခိုးရောင်ဝတ်စုံနှင့် လူအိုကြီးက နောက်ဆုတ်လိုက်ရပြန်သည်။

အနက်ရောင်ဝတ်စုံနှင့် လူအိုကြီးက ဓားချက်လွဲချော်သွားပြီး ဆက်လက်တိုက်ခိုက်ရန် ပြင်ဆင်သည်။

သို့သော် ထိုအချိန်တွင် ဟန်မူယဲ့က ရှေ့သို့ ခြေတစ်လှမ်းပြန်တိုးပြီး ဓားဖြင့် ခုတ်ချသည်။

မီးခိုးရောင်ဝတ်စုံနှင့် လူအိုကြီးက နောက်ဆုတ်ရပြန်သည်။

ဟန်ချီက ထူးဆန်းသောမြင်ကွင်းကို မြင်နေရသည်။

ဟန်မူယဲ့က ဓားတစ်လက်ကိုင်ပြီး အကြီးအကဲနှစ်ယောက်ကို ရင်ဆိုင်နေသည်။

ဓားပညာကြောင့် နာမည်ကြီးသော အကြီးအကဲဖုန်းက ဟန်မူယဲ့ကို ထိအောင်မခုတ်နိုင်ခဲ့ပေ။

‘ဒါက ငါသိတဲ့ အကြီးအကဲကျူးနဲ့ အကြီးအကဲဖုန်းလား’

‘သူတို့နှစ်ယောက်က အင်အားစုတွေအားလုံးကို ဖိနှိပ်ခဲ့တာမဟုတ်ဘူးလား’

ဟန်ချီ၏အတွေးကို အာရုံခံမိသကဲ့သို့ နောက်ဆုတ်သွားသော မီးခိုးရောင်ဝတ်စုံနှင့် လူအိုကြီးက အသက်ပြင်းပြင်းရှူသွင်းသည်။

သူက ကျဆင်းလာသော ဟန်မူယဲ့၏ဓားချက်ကို ကြည့်နေပြီး လက်မြှောက်သည်။ ဝါးကြိမ်က ဆက်သွယ်သွားပြီး ပုံစံကွက်တစ်ခုကို ဖန်တီးသည်။

ဝါးကိုင်းများက တစ်လွှာပြီးတစ်လွှာ ချိတ်ဆက်သွားပြီး စိမ်းလန်းသော ဝါးရွက်ကို ထုတ်ဖော်သည်။

သူက ဟန်မူယဲ့၏ဓားချက်ကို အတင်းအကျပ်ခုခံရန် ကြိုးစားသည်။

သို့သော် သူက ခုခံရန် ကြိုးစားလိုက်သောအချိန်တွင် ထိတ်လန့်သွားသည်။

သူက ဦးတည်ချက်ပြောင်းလဲသွားသော ဟန်မူယဲ့၏ဓားချက်ကို မြင်ရသည်။

ဓားက နောက်သို့ ဦးတည်လိုက်သည်။

“ခလွမ် ....”

အနက်ရောင်ဝတ်စုံနှင့် အကြီးအကဲဖုန်းက ဓားချက်ကြောင့် လွင့်စင်သွားသည်။

ဖရိုဖရဲရေလက်ကြားကို ဓားနှစ်လက်ဖြင့် လွှမ်းမိုးခဲ့သော ကျွမ်းကျင်သူက ထိုဓားချက်ကို မခုခံနိုင်ခဲ့ပေ။

“ကောင်းတယ်”

ပေတစ်ထောင်အကွာတွင် ရပ်တန့်လိုက်သော အကြီးအကဲဖုန်းက တောက်ပနေသော မျက်လုံးများဖြင့် ပြောသည်။

သူက ဓားနှစ်လက်ကိုင်ထားပြီး ပျောက်ကွယ်သွားသည်။

ဟန်မူယဲ့က ညင်သာစွာပြုံးလိုက်ပြီး ဓားဖြင့် ကြမ်းတမ်းစွာ ခုတ်ချသည်။

“ခလွမ် ....”

မျက်နှာဖြူဖျော့နေသော အကြီးအကဲဖုန်းက ဓားချက်၏အောက်တွင် ပြန်ပေါ်လာပြီး ဓားနှစ်လက်ဖြင့် ခုခံလိုက်သည်။

“မဖြစ်နိုင်ဘူး ....”

သူက ဟန်မူယဲ့၏ဓားကို ထိတ်လန့်စွာ ကြည့်လိုက်သည်။ သူ၏ မွေးရာပါစွမ်းရည်က ထုတ်ဖော်ခံလိုက်ရသည်။

ဖရိုဖရဲရေလက်ကြားတွင် သူက မရေမတွက်နိုင်သော ကျွမ်းကျင်သူများကို ထိုနည်းစနစ်ဖြင့် သတ်ဖြတ်ခဲ့သည်။

သို့သော် ယနေ့တွင် သူ၏ ဓားနည်းစနစ်နှင့် မွေးရာပါစွမ်းရည်က အသုံးမဝင်ခဲ့ပေ။

“မဖြစ်နိုင်ဘူး”

သူက မယုံကြည်နိုင်စွာ အော်ဟစ်လိုက်ပြီး သွယ်လျသော ရွှေရောင်နကျယ်ကောင်အဖြစ် ပြောင်းလဲသွားသည်။ ထို့နောက် တောင်ပံဖြန့်ပြီး ဟန်မူယဲ့ကို ခုန်အုပ်သည်။

“အကြီးအကဲဖုန်းက အစစ်အမှန်ပုံစံကို ထုတ်ဖော်လိုက်ရပြီလား”

ဟန်ချီက တီးတိုးရေရွတ်သည်။

ဤနှစ်များတွင် သူက အကြီးအကဲဖုန်း၏ အစစ်အမှန်ပုံစံကို သုံးကြိမ်သာ မြင်ဖူးသည်။

အသွင်ပြောင်းထားသော လူအိုကြီးများက အစစ်အမှန်ပုံစံကို ဖော်ပြရန် မလိုလားကြပေ။

အကူအညီမဲ့နေသော အခြေအနေသို့ ရောက်မှသာ သူတို့က အစစ်အမှန်ပုံစံကို ဖော်ပြကြသည်။

“မဖြစ်နိုင်ဘူး။ သူက အရမ်းသန်မာလွန်းတယ်”

ဝါးရွက်များကို စုစည်းနေသော အကြီးအကဲကျိုးက စိတ်ရှုပ်နေသည်။

ဟန်မူယဲ့က လျင်မြန်စွာချဉ်းကပ်လာသော နကျယ်ကောင်ကိုကြည့်လိုက်ပြီး ဓားရှည်ကို သိမ်းသည်။

ထို့နောက် ခရမ်းရောင်ဓားတိုလေးတစ်ချောင်းကို ချက်ချင်းထုတ်ယူသည်။

“ရွှပ်”

သူက လက်ကို လှုပ်ရှားလိုက်ပြီး ပျောက်ကွယ်သွားသည်။ ထို့နောက် နကျယ်ကောင်၏ ဘယ်ဘက်တွင် ပြန်ပေါ်လာသည်။ ဓားတိုလေးက နကျယ်ကောင်၏ခါးတွင် ရွှေရောင်ဒဏ်ရာတစ်ခုကို ချန်ထားခဲ့သည်။

ထိုဓားချက်ကြောင့် အကြီးအကဲကျူးနှင့် ဟန်ချီက မျက်လုံးပြူးသွားသည်။

ရွှေရောင်နကျယ်ကောင်က တောင်ပံဖြန့်ပြီး လျင်မြန်စွာ နောက်ဆုတ်သည်။

သို့သော် ဟန်မူယဲ့က ဓားတိုလေးက လိုက်လာပြန်သည်။

“ရွှပ်”

နာကျယ်ကောင်က တုန်ခါသွားပြီး ဒဏ်ရာတစ်ခု ထပ်ရလိုက်သည်။

“ဝီ”

နကျယ်ကောင်က ကျယ်လောင်စွာ အော်ဟစ်လိုက်ပြီး တောင်ပံခတ်သည်။

“ရွှပ်”

ဓားတစ်ချက် ဖြစ်ပေါ်လာသည်။

“ရွှပ်”

နောက်ထပ်ဓားတစ်ချက် ဖြစ်သည်။

“ရွှပ် ....”

....

စုတ်ပြတ်နေသောအဝတ်များနှင့် အကြီးအကဲဖုန်းက လူအသွင်ပြောင်းပြီး ပြုတ်ကျလာသည်။ သူက ကြောက်ရွံ့နေသောမျက်နှာဖြင့် ဟန်မူယဲ့ကို ကြည့်လိုက်သည်။

“မင်းရဲ့ဓားက ဘာဖြစ်လို့ အရမ်းသန်မာနေတာလဲ”

သူ၏ ဓားနည်းစနစ်ကလည်း အလွန်ထူးခြားသည်။

သူ့စကားကို ကြားလိုက်ရသောအခါတွင် ဟန်မူယဲ့က ခေါင်းခါပြီး ဓားကိုသိမ်းသည်။

“လောကမှာ မရေမတွက်နိုင်တဲ့ ဓားကျင့်ကြံသူတွေ ရှိကြတယ်။ ကျွန်တော်က ၉၉%ကို ဖိနှိပ်နိုင်တယ်”

“ခွန်အားအရာမှာတော့ ကျွန်တော့်ထက်သန်မာတဲ့လူတွေ ရှိကြလိမ့်မယ်”

သူက အကြီးအကဲဖုန်းကို ကြည့်လိုက်ပြီး တည်ငြိမ်စွာပြောသည်။

“ခင်ဗျားရဲ့ဓားနည်းစနစ်က အရမ်းညံ့တယ်”

အကြီးအကဲဖုန်းက ဆွံ့အသွားသည်။

အကြီးအကဲကျိုးက ဝါးရွက်များကို လျင်မြန်စွာ ဖယ်ရှားလိုက်သည်။

ဟန်ချီက ပါးစပ်အဟောင်းသားဖြစ်နေသည်။

“ဘုန်း”

ဗလာနယ်မြေက ပျောက်ကွယ်သွားသည်။ စားပွဲပေါ်တွင်ရှိသော ကျားစေ့က ယခင်အတိုင်း ဖြစ်သည်။

သို့သော် အကြီးအကဲဖုန်း၏ အနက်ရောင်ဝတ်စုံက စုတ်ပြတ်နေသည်။

“အဟမ်း၊ တာအိုရောင်းရဲ့ ဓားနည်းစနစ်က အထင်ကြီးစရာပဲ”

အကြီးအကဲဖုန်းက စုတ်ပြဲသွားသောအဝတ်ကို ကြည့်လိုက်ပြီး ဟန်မူယဲ့ကို ကြည့်သည်။ သူ့ပခုံးများက အနည်းငယ် တုန်ခါနေကြသည်။

သူက ထိုဓားကျွမ်းကျင်မှုမျိုးကို စိတ်ကူးမကြည့်ရဲပေ။

တစ်ဖက်တွင်ရှိနေသော အကြီးအကဲကျိုးကလည်း ရှုပ်ထွေးသောမျက်နှာထားဖြင့် ညင်သာစွာ ခေါင်းညိတ်သည်။

ကျင့်ကြံခြင်းလောကတွင် ခွန်အားသည် အရေးအကြီးဆုံး ဖြစ်သည်။

ဟန်မူယဲ့က ကျွန်းပေါ်သို့ရောက်လာသောအချိန်တွင် တိုက်ခိုက်မှုကိုသာ ပြုလုပ်ခဲ့သည်။

လက်သီးချက်သည် ပြဿနာအများစုကို ဖြေရှင်းနိုင်သည်။

ဥပမာအနေဖြင့် ယခုအချိန်တွင် သူတို့က စားပွဲတွင်ထိုင်ပြီး လွတ်လပ်စွာ စကားပြောနိုင်သည်။

ဟန်ချီက ဟန်မူယဲ့နှင့်တွေ့ခဲ့သောအကြောင်းကို ပြောပြလိုက်သည်။

ဟန်မူယဲ့က ခွေသားရဲသွေးမျိုးဆက်ကို ပိုင်ဆိုင်ပြီး မိုးကြိုးလျှပ်စီးစွမ်းအားကို ထိန်းချုပ်နိုင်ကြောင်း ကြားလိုက်ရသောအခါတွင် အကြီးအကဲကျူးနှင့် အကြီးအကဲဖုန်းတို့၏ မျက်လုံးများက တောက်ပသွားကြသည်။

“ငါက မြေအောက်မြစ်ကနေထွက်သွားပြီး ကောင်းကင်ကပ်ဘေးနဲ့ ရင်ဆိုင်ဖူးတယ်”

အကြီးအကဲကျူးက အတိတ်ကို သတိရနေသောပုံစံဖြင့် ပြောလိုက်သည်။

“အဲဒီခံစားချက်က ....”

ကောင်းကင်ကပ်ဘေးသည် ထိုသို့ပင် ဖြစ်သည်။

လူတစ်ယောက်ကို တုန်ခါသွားစေနိုင်သည်။

ဟန်ချီက ဟန်မူယဲ့၏ဓားချက်ကို ပြန်ပြီး သတိရသွားသည်။ သူ့တစ်ကိုယ်လုံးကို လျှပ်စီးကြောင်းများဖြင့် ဝိုင်းရံထားပြီး မလှုပ်ရှားနိုင်ခဲ့ပေ။

တစ်ဖက်တွင် အကြီးအကဲဖုန်းက သိချင်စိတ်နှင့် စိတ်အားထက်သန်မှုကို ဖော်ပြနေသည်။

သူက မြေအောက်မြစ်မှ ထွက်မသွားဖူးပေ။

ဟန်မူယဲ့က မြေအောက်မြစ်သို့ ရောက်လာသည့် ရည်ရွယ်ချက်ကို ဖုံးကွယ်မထားခဲ့ပေ။

တစ်ခုသည် အင်မော်တ်တယ်ဘုရင်မင်ဟယ်၏ အမွေအနှစ်ဖြစ်ပြီး နောက်တစ်ခုက လီမူပိုင်ကို ရှာဖွေရန် ဖြစ်သည်။

အမှန်အတိုင်းပြောရလျှင် ထိုနှစ်ခုကို တစ်ခုတည်းအဖြစ် သတ်မှတ်နိုင်သည်။

“ပျောက်ဆုံးနေတဲ့ ကျင့်ကြံသူတွေကို ရှာချင်ရင်တော့ တော်ဝင်မြို့ကို သွားသင့်တယ်”

အကြီးအကဲကျူးက မျက်လုံးများကို မှေးကျဉ်းလိုက်ပြီး တီးတိုးပြောသည်။

“တော်ဝင်မြို့ရဲ့ ပထမအကြီးအကဲ ခယ်ရှို့အန်က ဝိညာဉ်ဖိနှိပ်ခြင်းအလံကို အသုံးပြုပြီး အင်မော်တယ်ဘုရင်ရဲ့ ရုပ်ခန္ဓာနဲ့ ဝိညာဉ်ကို သန့်စင်ချင်နေတယ်”

“တခြားကမ္ဘာတွေမှာ ပြန့်ကျဲနေတဲ့ သတင်းတချို့ကို အင်မော်တယ်ဘုရင်က ချန်ထားခဲ့တယ်။ တခြားသတင်းတွေကိုတော့ လူတွေကို ဆွဲဆောင်ဖို့ ခယ်ရှို့အန်က တမင်သက်သက် ဖြန့်ထားခဲ့တာပဲ”

ဟန်မူယဲ့၏ လက်ထဲတွင်ရှိသော သွေးဘိုးဘေးနှင့် သေခြင်းရှင်ခြင်းကို ပြောင်းလဲနိုင်သောသတင်းသည် တော်ဝင်မြို့မှ ဆင်းသက်လာသည်။

တော်ဝင်မြို့တွင် အင်အားစုနှစ်ခု ရှိသည်။

တစ်ဖွဲ့က ပထမအကြီးအကဲ ခယ်ရှို့အန်ကို ထောက်ခံပြီး အင်မော်တယ်ဘုရင်ကို သန့်စင်ချင်ကြသည်။

နောက်တစ်ဖွဲ့က အင်မော်တယ်ဘုရင်ကို ပြန်လည်ရှင်သန်အောင် ထောက်ပံ့ပေးချင်ကြသည်။

“ငါတို့ မြေအောက်မြစ်ရဲ့ သက်ရှိတွေက ဒီကနေ ထွက်မသွားနိုင်ဘူး”

အကြီးအကဲဖုန်းက ရှုပ်ထွေးသောမျက်နှာထားဖြင့် ပြောသည်။

ဤနေရာတွင်ရှိသော သက်ရှိများသည် အမျိုးမျိုးသော ကန့်သတ်ချက်များနှင့် နေထိုင်ရသည်။ သူတို့က မြေအောက်မြစ်တွင် အလွန်သန်မာသော်လည်း မြေအောက်မြစ်မှ ထွက်သွားလျှင် ခွန်အားလျော့ကျသွားလိမ့်မည်။

အကြီးအကဲဖုန်း၏ စကားအရ မြေအောက်မြစ်မှ ထွက်သွားလျှင် သူ၏ ပါရမီနှင့် ခွန်အားသည် ဆက်တိုက်လျော့ကျသွားလိမ့်မည်။

“မြေအောက်မြစ်သားရဲတွေနဲ့ တခြားသားရဲတွေအားလုံးက ချုပ်နှောင်ခံထားရတယ်”

“ငါတို့က ထွက်သွားချင်ပေမဲ့ ထွက်မသွားနိုင်ဘူး”

အကြီးအကဲကျူးက ဟန်မူယဲ့နှင့် ဟန်ချီကို ကြည့်လိုက်ပြီး ညင်သာစွာ ပြောသည်။

“တကယ်လို့ မင်းက ထွက်သွားနိုင်ရင် ထွက်သွားလိုက်ပါ”

“ခယ်ရှို့အန်က အင်မော်တယ်ဘုရင်ကို သန့်စင်ပြီးရင် ဒီကမ္ဘာရဲ့အုပ်ချုပ်သူ ဖြစ်လာလိမ့်မယ်။ အဲဒါဆိုရင် သူက လူတိုင်းကို သန့်စင်နိုင်လိမ့်မယ်”

တော်ဝင်မြို့တော်သည် အတုအယောင်တစ်ခုသာ ဖြစ်သည်။

သေခြင်းရှင်ခြင်းကို ပြောင်းလဲချင်သောလူသည် ဝိညာဉ်ဖိနှိပ်ခြင်းအလံ၏ ဝိညာဉ်စွမ်းအားကို အသုံးပြုပြီး အသက်စွမ်းအားကို လှုံ့ဆော်ရသည်။

ခယ်ရှို့အန်က သေခြင်းရှင်ခြင်းကို ပြောင်းလဲချင်လျှင် ဝိညာဉ်ဖိနှိပ်ခြင်းအလံကို တိုက်ရိုက်အသုံးချရန်သာ လိုအပ်သည်။

အလွန်လွယ်ကူသည်။

ဟန်မူယဲ့၏ မျက်နှာထားက လေးနက်သွားသည်။

သူက တော်ဝင်မြို့သို့ နောက်မှသွားရန် စီစဉ်ထားခဲ့သည်။ သို့သော် အကယ်၍ သူမသွားခဲ့လျှင် ခေါင်းဆောင်တောက်ရင်နှင့် တခြားလူများက ခံစားရလိမ့်မည်။

သူတို့က ဝိညာဉ်ဖိနှိပ်ခြင်းအလံ၏ စွမ်းအားကို လက်ခံလိုက်လျှင် လွတ်မြောက်ရန် ခက်ခဲသွားလိမ့်မည်။