အခြားသူများ၏ကိစ္စတွင် ဝင်စွက်ဖက်ခြင်း

ထွက်ခွာသွားသောငရဲကိုးထပ်ဓားမာစတာ၏နောက်ကျောကို ကြည့်ရင်း အသိအမှတ်ပြုသောအကြည့်တစ်ခုက ထန်ရှု၏မျက်လုံးများထဲ၌ ထွက်ပေါ်လာသည်၊ သို့သော် သူ၏နောင်တရသောအမူအရာက ပိုသိသာလေ၏။ သူက အမှားတစ်ခု လုပ်ခဲ့ချင်လုပ်ခဲ့နိုင်သည်။ သို့သော် မည်သို့ပင်ဆိုစေကာမူ ငရဲကိုးထပ်ဓားမာစတာနှင့် ထပ်မရှုပ်တော့ရန် ထန်ရှုက ဆုံးဖြတ်ခဲ့သည်။

“ကောင်းပြီလေ၊ စကြတာပေါ့”

ထန်ရှုက ထရပ်ပြီး ကြယ်မျက်ရည်ကို ကောင်းကင်ဘုံစံအိမ်အသုံးအဆောင်ပစ္စည်းထဲသို့ ပြန်ထည့်ကာ တိုက်ပွဲပမ်နှင့်အတူ မင်စံအိမ်မှ ထွက်လာခဲ့သည်။ ကြယ်ငေးစံအိမ်သို့ ပြန်ရောက်လာပြီးနောက် သူက ချက်ချင်း အမိန့်ထုတ်လိုက်၏ “အပြင်ကို ရောက်နေတဲ့ မဟာထန်အင်ပါယာရဲ့အဖွဲ့ဝင်တွေအားလုံး ချက်ချင်း ပြန်လာရမယ်…”

နှစ်ရက်ကြာပြီးနောက် သိုင်းညဝံပုလွေကို လုပ်ကြံရန် သွားသော အထွတ်အထိပ်အုပ်ချုပ်သူနှင့်ပင်လယ်လမ်းဘုရင်တို့အပါအဝင် မဟာထန်အင်ပါယာ၏အဖွဲ့ဝင်တွေအားလုံးက ပြန်ရောက်လာ၏။ အပြင်ဘက်တွင် ကူးယန်အာနှင့်တိုက်ပွဲပမ်တို့သာ ကျန်နေပြီး ကျန်လူအားလုံးက ကြယ်ငေးစံအိမ်မှ ပျောက်ကွယ်ကာ ကောင်းကင်ဘုံစံအိမ်အသုံးအဆောင်ပစ္စည်းထဲသို့ ဝင်ရောက်ခဲ့ကြသည်။

သူက သူ့လူများကို ခေါ်ကာ ထွက်ခွာသွားသည်ကို ငရဲကိုးထပ်ဓားမာစတာက သိလောက်မည်ကို ထန်ရှုက ကောင်းကောင်းသိ၏။ သူက တစ်နေရာတွင် ပုန်းကာ သူတို့ထွက်သွားသည်ကို စောင့်ကြည့်နေရန်ပင် ဖြစ်နိုင်၏။

ကောင်းကင်ဘုံပိုက်ကွန်အင်မော်တယ်ပိုင်နက်။

နေရာလပ်တည်နေရာရွှေ့ပြောင်းရေးအစီအရင်မှ ထွက်လာပြီးနောက် ထန်ရှုက ပတ်ဝန်းကျင်ကို ကြည့်လိုက်သည်၊ သတ်ဖြတ်ခြင်းဆန္ဒအနည်းငယ်ကို အာရုံခံမိ၏။ ဤနေရာရှိ အင်မော်တယ်စစ်သားများကို ဂရုမစိုက်ဘဲ သူက ကူးယန်အာနှင့်တိုက်ပွဲပမ်တို့နှင့်အတူ ထွက်လာခဲ့၏။

“ငါတို့တွေ လမ်းမှားကို သွားနေသလိုပဲ၊ ဆရာသခင်”နေ့တစ်ဝက်ကြာ ပျံသန်းပြီးနောက် ပတ်ဝန်းကျင်ကို လေ့လာရင်း ကူးယန်အာက ရုတ်တရက် ပြောလိုက်သည်။

“မမှားဘူး”ထန်ရှုက ပြော၏ “ကောင်းကင်ဘုံပိုက်ကွန်အင်မော်တယ်ပိုင်နက်က ကျယ်ပြောလွန်းတာကြောင့် ဒီပိုင်နက်ကို လှည့်ပတ်ကြည့်ဖို့ ငါ ပြင်ဆင်ထားပြီးပြီ။ ဒီနေရာမှာ ရှာတွေ့နိုင်တဲ့ ပစ္စည်းကောင်းအချို့ ရှိတယ်၊ အနာဂတ်မှာ ဒီနေရာကို ပြန်လာဖို့ ငါ စီစဉ်ထားတယ်”

သံသယအကြည့်တစ်ခုက ကူးယန်အာ၏မျက်လုံးများထဲတွင် လက်သွားကာ အသံကူးပြောင်းလျက် မေးလိုက်၏ “ဘာကို ဆိုလိုတာလဲ၊ ဆရာသခင်”

အသံကူးပြောင်းလျက် ထန်ရှုက ပြန်ဖြေ၏ “အင်မော်တယ်ကမ္ဘာကို ငါတို့တွေ ရောက်လာတာ မကြာသေးဘူး၊ ဒါပေမယ့် ကစ်သီနဲ့ကြယ်မျက်ရည်တို့နဲ့ ဆုံတွေ့ခဲ့တယ်။ ဒါက ငါတို့နဲ့ နီးကပ်တဲ့လူတွေက အင်မော်တယ်ကမ္ဘာရဲ့နေရာတိုင်းမှာ ပြန့်ကျဲနေတယ်လို့ ဆိုလိုတာပဲ။ သူတို့က အခု အန္တရာယ်ဖြစ်နေလောက်တယ်၊ ဒါကြောင့် ဖြည်းဖြည်းချင်း သွားရင်း လမ်းတစ်လျှောက်မှာ ငါတို့ရဲ့အကူအညီကို လိုအပ်တဲ့သူတွေကို ရှာဖွေရမယ်”

“သူတို့ကို ရှာတွေ့ပြီးရင် ဘာလုပ်မှာလဲ”ကူးယန်အာက ကမန်းကတန်းမေးလိုက်သည်။

“သူတို့က ငါတို့ရဲ့အနီးကပ်ဆုံးလူတွေမဟုတ်ရင် ကူညီပဲ ကူညီမယ်။ ငါတို့နဲ့အတူ မခေါ်သွားဘူးပေါ့”ထန်ရှုက ပြန်ဖြေ၏။

နောက်သုံးလအတွင်း ထန်ရှုက ကူးယန်အာနှင့်တိုက်ပွဲပမ်တို့နှင့်အတူ ကောင်းကင်ဘုံပိုက်ကွန်ပိုင်နက်၏နေရာတိုင်းသို့ ရောက်ရှိခဲ့သည်။ လိုအပ်သောကျင့်ကြံခြင်းအရင်းအမြစ်များကို ဝယ်ယူသည်ကလွဲပြီး သူတို့၏အသိများကို ရှာမတွေ့ကြသေးပေ။

ထို့ကြောင့် သူတို့သုံးယောက်က အခြားအင်မော်တယ်ပိုင်နက်တစ်ခုဆီသို့ ခရီးစတင်လိုက်သည်။ သူတို့က အခြားအင်မော်တယ်ပိုင်နက်သို့ ရောက်သောအခါ မြင့်မြတ်ငှက်ဂိုဏ်းမှလူအချို့နှင့် သူ၏နောက်လိုက်ဖြစ်ခဲ့သူအချို့ကို တွေ့လိုက်၏။ အတိုချုပ်အားဖြင့် ခရီးတစ်လျှောက်တွင် သူ့လက်အောက်ရှိလူများစွာက ရန်သူများ၏လိုက်လံဖမ်းဆီးနှိပ်စက်မှုကို ခံနေရသည်ကို သိလိုက်ရ၏။ မြင့်မြတ်ငှက်ဂိုဏ်း၏လက်ရှိအနေအထားနှင့် ပတ်သက်၍လည်း သူက မေးမြန်းခဲ့သည်။

ဂိုဏ်းက အတော်လေးဒုက္ခရောက်နေသည်။ မြင့်မြတ်ငှက်ဂိုဏ်းက သူတို့၏အထွတ်အမြတ်မြေအထိ ပြန်ဆုတ်ခဲ့ပြီး လက်ရှိတွင် ဂိုဏ်း၏ခံစစ်ကာကွယ်ရေးအစီအရင်ကို ကာကွယ်ရန် အန္တိမအဆင့်ကျွမ်းကျင်သူနှစ်ယောက်အပေါ်သာ မှီခိုနေရသည်။

ထို့ပြင် ထန်ရှု၏သစ္စာရှိနောက်လိုက်အချို့က မြင့်မြတ်ငှက်ဂိုဏ်းနှင့် ပူးပေါင်းကာ ရန်သူများကို တိုက်ခိုက်ခဲ့ကြသည်။ အချို့က အင်မော်တယ်ကမ္ဘာရှိ နေရာအချို့တွင် ပုန်းနေကြ၏။

သစ်သားစိမ်းအင်မော်တယ်ပိုင်နက်။

နှင်းဖြူရောင်သားရဲလေးကောင်က ရွှေရောင်မြင်းရထားတစ်စီးကို ဆွဲကာ သွားနေလျက်ရှိသည်။ မြင်းရထားပေါ်တွင် ပုံရိပ်နှစ်ခုက တင်ပျဉ်ခွေထိုင်လျက် ကျင့်ကြံနေပြီး သူတို့ဘေးနားရှိ တောင့်တင်းသန်မာသောလူတစ်ယောက်က ပတ်ဝန်းကျင်ကို အဆက်မပြတ်လေ့လာစောင့်ကြည့်နေသည်။

သူတို့က ထန်ရှု၊ ကူးယန်အာနှင့် အစောင့်တာဝန်ကျနေသူတိုက်ပွဲပမ်တို့ပင် ဖြစ်၏။

သစ်သားစိမ်းအင်မော်တယ်ပိုင်နက်၏ရှစ်ဆယ်ရာခိုင်နှုန်းကို တောအုပ်များ၊ တောင်တန်းများဖြင့် လွှမ်းခြုံထားသည်။ ပိုင်နက်၏ကျန်နေရာများတွင် ရေကန်နှင့်ပင်လယ်များ ပါဝင်သည်။ ငြိမ်းချမ်းမှုကို ချစ်မြတ်နိုးသော နတ်သူငယ်မျိုးနွယ်က သစ်သားစိမ်းအင်မော်တယ်ပိုင်နက်ရှိ ကြီးမားသောကုန်းမြေတစ်ခုတွင် နေထိုင်၏။

အုံး…

ကြောက်စရာကောင်းသောအရှိန်အဝါတစ်ခုက အဝေးမှ ပေါက်ကွဲထွက်လာပြီး ရွှေရောင်မြင်းရထားအထိ ရောက်ရှိလာသည်။

ထန်ရှုနှင့်ကူးယန်အာတို့က တစ်ပြိုင်နက်တည်း မျက်စိဖွင့်လိုက်ကြ၏။ အံ့အားသင့်သောအကြည့်တစ်ခုနှင့်အတူ သူတို့က ထိုအရှိန်အဝါရှိရာဉီးတည်ဘက်သို့ ကြည့်လိုက်ပြီး ထန်ရှုက မျက်မှောင်ကြုတ်လျက် ပြော၏ “ဘာဖြစ်တာလဲ။ ငါ့အမြင်အာရုံက အဲအထိ မရောက်ဘူး”

“ငါလဲ ဘာမှ မမြင်ရဘူး”ကူးယန်အာက ခေါင်းခါယမ်းလိုက်သည်။

တိုက်ပွဲပမ်လည်း ဘာမှမပြောပေ၊ သူလည်း ဘာဖြစ်သည်ကို မသိမှန်း သိသာပေ၏။

ခဏတုံ့ဆိုင်းသွားပြီးနောက် ထန်ရှုက ပြောလိုက်သည် “တိုက်ပွဲက ငါတို့မမြင်နိုင်တဲ့အကွာအဝေးမှာ ဖြစ်ပွားနေတာပဲ၊ ဒါပေမယ့် သူတို့ရဲ့အရှိန်အဝါကို ဒီနေရာကနေ အာရုံခံလို့ရတယ်။ ဒါက ပြီးပြည့်စုံခြင်းအင်မော်တယ်တွေကြား တိုက်ပွဲဖြစ်နေတယ်လို့ ဆိုလိုတယ်။ အဲကို တစ်ချက်သွားကြည့်ရအောင်”

တိုက်ပွဲပမ်က အနည်းငယ် ခေါင်းညိတ်ကာ တိမ်ဖောက်သားရဲလေးကောင်ကို အမိန့်ပေးလိုက်၏ “မြန်မြန်သွားကြစမ်း…”

တိမ်ဖောက်သားရဲများက အားကောင်းသော အင်မော်တယ်သားရဲများဖြစ်ကြပြီး တစ်ယောက်ချင်းစီက သာမန်အင်မော်တယ်တစ်ယောက်နှင့် ယှဉ်နိုင်သည်။ ရွှေရောင်မြင်းရထားအသုံးအဆောင်ပစ္စည်းနှင့်ပါ တွဲလိုက်လျှင် နှစ်ခုစလုံးက အလွန်မြင့်မားသောဈေးနှုန်းတစ်ခုရှိသည်။ သူကသာ အင်မော်တယ်ပိုင်နက်အချို့တွင် ရတနာအချို့ ရှာတွေ့ပြီး အင်မော်တယ်သလင်းကျောက်များနှင့် မလဲလှယ်နိုင်ခဲ့လျှင် ထန်ရှုက သူတို့ကို ဝယ်နိုင်မည်မဟုတ်ပေ။

မိနစ်အနည်းငယ်ကြာပြီးနောက် တိုက်ပွဲမြင်ကွင်းက သူတို့သုံးယောက်၏မျက်စိရှေ့သို့ ထွက်ပေါ်လာ၏။ နက်ရှိုင်းသောတောအုပ်အထက်တွင် သစ်တောနတ်သူငယ်အနည်းငယ်ကို သန်မာသောလူကြီးလေးယောက်က တိုက်ခိုက်နေကြသည်။

“နဂါးကလန်လား”

ထန်ရှုနှင့်ကူးယန်အာတို့က အကြည့်ချင်း ဖလှယ်လိုက်ကာ နှစ်ယောက်သား ခေါင်းရှုပ်သွားကြသည်။

သစ်တောနတ်သူငယ်များက နဂါးကလန်နှင့် အမြဲတမ်းဆက်ဆံရေးကောင်းရှိသည်။ နတ်သူငယ်များ၏အန္တိမအဆင့်ကျွမ်းကျင်သူနှင့် နဂါးကလန်၏အန္တိအဆင့်ဘိုးဘေးတို့က အကောင်းဆုံးမိတ်ဆွေများဖြစ်ကြပြီး သူတို့၏ခင်မင်ရင်းနှီးမှုကို အင်မော်တယ်ကမ္ဘာတစ်ခုလုံးက သိကြ၏။ ဒါပေမယ့် အခု သစ်တောနတ်သူငယ်တွေနဲ့ နဂါးကလန်က တိုက်ခိုက်နေပါလား။ အတော်လေးရှားပါးတဲ့မြင်ကွင်းတစ်ခုပဲ။

တစ်ချိန်တည်းတွင် နှစ်ဖက်စလုံးက ထန်ရှုတို့သုံးယောက်အဖွဲ့ချဉ်းကပ်လာသည်ကို တွေ့၏။ နဂါးကလန်သားလေးယောက်က နတ်သူငယ်များကို နောက်ဆုတ်ရန် ဖိအားပေးလိုက်ပြီးနောက် သူတို့၏ပင်မခန္ဓာကိုယ်ကို ထုတ်ဖော်လိုက်ကြသည်။ လျှပ်တစ်ပြက်အတွင်း သူတို့လေးယောက်က မီတာရာချီရှည်သောဧရာမငွေရောင်နဂါးများအဖြစ်သို့ ပြောင်းလဲသွားခဲ့ကြ၏။

“ဆန်ဒိုယာ၊ လုမီနက်အင်မော်တယ်ကိရိယာကို လွှဲပေးလိုက်ပါ၊ အဲလိုဆိုရင် မင်းတို့ကို ငါ သွားခွင့်ပေးနိုင်မယ်…မဟုတ်လို့ကတော့ ဒီနေရာမှာ အပြင်လူတွေ ရှိတယ်ဆိုရင်တောင် မင်းတို့အားလုံးကို ငါ သတ်ရလိမ့်မယ်”သတ်ဖြတ်ခြင်းအရှိန်အဝါကို ထုတ်လွှတ်ရင်း ငွေနဂါးများထဲမှ တစ်ကောင်က ပြောလိုက်၏။

သစ်တောနတ်သူငယ်များက အဖိနှိပ်ခံထားရမှန်း သိသာသည်။ သူတို့အများစုက ဒဏ်ရာရရှိထားကြ၏။ ငွေနဂါး၏တောင်းဆိုချက်ကို ကြားပြီးနောက် တောင်ပံဖြန့်ထားသည့် အရပ်မြင့်မားသောသစ်တောနတ်သူငယ်က ရှေ့သို့ ခြေလှမ်းအနည်းငယ်တိုးလျက် ပြောလိုက်၏ “လုမီနက်အင်မော်တယ်ကိရိယာက ငါတို့သွေးနတ်သူငယ်မျိုးနွယ်ရဲ့အကာအကွယ်အသုံးအဆောင်ပစ္စည်းပဲ။ နင်က ငါတို့မျိုးနွယ်တစ်ခုလုံးကို သုတ်သင်ရင်တောင် ငါတို့က ပေးမှာ မဟုတ်ဘူး။ အောင်ရှန်း၊ နင်က နဂါးကလန်ရဲ့အကြီးအကဲတစ်ယောက်ဖြစ်ပြီး ငါတို့သွေးနတ်သူငယ်မျိုးနွယ်ရဲ့အကာအကွယ်အသုံးအဆောင်ပစ္စည်းကို လုရဲတာလား။ ငါတို့မျိုးနွယ်စုနှစ်ခုကြားမှာ စစ်ပွဲတစ်ခုကို ဖြစ်စေချင်တာလား”

အောင်ရှန်းဟုအမည်ရသောငွေနဂါးက နှာခေါင်းရှုံ့လိုက်သည် “မင်းတို့ရဲ့သွေးနတ်သူငယ်မျိုးနွယ်စုတစ်ခုတည်းနဲ့ ငါတို့မျိုးနွယ်နှစ်ခုကြားမှာ စစ်ပွဲတစ်ခုဖြစ်ပေါ်စေဖို့ မလုံလောက်ဘူး။ ဒါ့အပြင် သွေးနတ်သူငယ်တွေက အရေအတွက်အားဖြင့် ပိုပိုနည်းလာတယ်။ ငါ့ခန့်မှန်းတာ မှန်ရင် လက်ရှိ မင်းတို့ကလန်ဝင်တွေရဲ့အရေအတွက်က တစ်ရာမကျော်တော့ဘူးမလား။ မင်းတို့ရဲ့ကလန်မှာ လုမီနက်အင်မော်တယ်ကိရိယာကို ချန်ထားတာက လုံးဝဖြုန်းတီးမှုတစ်ခုပဲ၊ ဒါကြောင့် ငါ့ကို လွှဲပေးလိုက်ပါ၊ ဒါမှ ငါက ခရမ်းနတ်သူငယ်ကလန်ရဲ့မင်းသမီးကို ပျော်ရွှင်အောင် လုပ်ပေးနိုင်မှာ”

အောင်ရှန်းကို မုန်းတီးစွာ ကြည့်လျက် ဆန်ဒိုရာက ဒေါသတကြီး အော်လိုက်၏ “အရင်က ငါတို့ရဲ့သွေးနတ်သူငယ်ကလန်မှာ လူအမြောက်အများရှိခဲ့ပြီး ငါတို့က တော်ဝင်မိသားစုကလွဲပြီး သစ်တောနတ်သူငယ်တစ်ခုလုံးရဲ့အသန်မာဆုံးမျိုးနွယ်ဖြစ်ခဲ့တယ်။ အဲအချိန်တုန်းက မင်းတို့ရဲ့နဂါးကလန်ကတောင် ငါတို့ကို ဖော်လံဖားခဲ့ရတာမလား။ နင်က ဒါကို မေ့နေပြီလား။ ဒါက နင်တို့နဂါးမျိုးနွယ်ရဲ့သဘာဝအစစ်အမှန်လား”

ဆန်ဒိုရာ၏စကားကို ကြားပြီး အောင်ရှန်းက ဒေါသထွက်သွားသည်။ သူ၏ကြီးမားသောဉီးခေါင်းက ထန်ရှုဘက်သို့ ချက်ချင်း လှည့်ကာ အော်ပြောလိုက်၏ “ငါတို့ရဲ့ကိစ္စမှာ ဝင်မပါဖို့ မင်းတို့ကို အကြံပေးချင်တယ်။ မဟုတ်လို့ကတော့ မင်းတို့က နဂါးကလန်ရဲ့ရန်သူတွေ ဖြစ်သွားရလိမ့်မယ်…”

ထန်ရှုက နှာခေါင်းရှုံ့ကာ သူ့ကို လုံးဝလစ်လျူရှုလိုက်သည်။ သူက ဆန်ဒိုရာကို ကြည့်ကာ ကျယ်လောင်စွာ မေးလိုက်၏ “ဟေး၊ မင်းတို့ရဲ့သွေးနတ်သူငယ်ကလန်က လူဉီးရေတစ်ရာအောက်ပဲ ရှိတော့တယ်လို့ ငါ ကြားတယ်။ အဲဒါ အမှန်ပဲလား”

ဆန်ဒိုယာက ထန်ရှုထံ အကြည့်ပြောင်းကာ နက်ရှိုင်းသောအသံနှင့် ပြန်ဖြေ၏ “ဒါ အမှန်ပဲ၊ ငါတို့သွေးနတ်သူငယ်ရဲ့ကလန်သားမရေမတွက်များစွာက တိုက်ပွဲထဲမှာ သေသွားခဲ့ကြတယ်။ ဒါပေမယ့် ငါတို့ထဲက တစ်ယောက်ယောက် အသက်ရှင်နေသရွေ့ အနာဂတ်မှာ ငါတို့ရဲ့မျိုးနွယ်စုကို ပြန်မြင့်တက်အောင် လုပ်နိုင်မှာပါ”

“ဟာ၊ သွေးနတ်သူငယ်တွေက သစ်တောနတ်သူငယ်တွေရဲ့တိုက်ပွဲအရူးတွေလို့ နာမည်ကြီးတယ်။ တကယ်တော့ မင်းတို့က သစ်တောနတ်သူငယ်တွေရဲ့အသန်မာဆုံးမျိုးနွယ်စုပဲ။ ဒါပေမယ့် နှစ်သောင်းအနည်းငယ်အတွင်းမှာ မင်းတို့ရဲ့သွေးနတ်သူငယ်ကလန်က ဒီလိုအခြေအနေဆိုးဝါးနေလိမ့်မယ်လို့ ဘယ်သူက ထင်ထားခဲ့မှာလဲ။ ငါ ထင်တာ မှန်ရင် အခု သွေးနတ်သူငယ်ကလန်ကို နတ်သူငယ်မျိုးနွယ်ကနေ ဖယ်ထုတ်လိုက်ကြပြီမလား”

ဆန်ဒိုယာ၏အမူအရာက အလွန်အမင်း အရုပ်ဆိုးသွားသည်။ သူမက သွေးနတ်သူငယ်ခေါင်းဆောင်ဖြစ်ပြီး သူမတို့၏လက်ရှိအခြေအနေကို ကောင်းကောင်းသိသည်။

လက်ရှိအခြေအနေက ဆိုးသည်၊ အတော်လေး ကြောက်စရာကောင်းလှသည်။

သူမက တစ်ခုကိုတော့ ကောင်းကောင်းသိသည်။ လုမီနက်အင်မော်တယ်ကိရိယာကို လုယူရန်အတွက် အောင်ရှန်းနှင့်ဒီအမှိုက်လေးကောင်က သူတို့ကို တိုက်ခိုက်လာခဲ့သည်။ နတ်သူငယ်များ၏တော်ဝင်မိသားစုက ဤအကြောင်းကို သိရမည်၊ သို့သော် သူတို့က မကူညီလာဘဲ မျက်စိပိတ်နားပိတ်နေခဲ့သည်။ သူတို့၏သဘောထားက လုံးဝသိသာပေ၏။

ထန်ရှုက အနည်းငယ် ပြုံးလိုက်သည်၊ ဆန်ဒိုရာ၏အမူအရာကို ကြည့်ခြင်းအားဖြင့် ပြဿနာများကို သူက မြင်နိုင်၏။ သူ့အတွေးများက လှုပ်ရှားသွားကာ သူက ပြုံးလျက် ပြောလိုက်၏ “ဒါနဲ့ ငါတို့က ဖြတ်သွားဖြတ်လာတွေ၊ အခြားသူတွေရဲ့ကိစ္စတွေမှာ ဝင်စွက်ဖက်ရတာ ပျင်းရိတဲ့သူတွေပဲ။ ဒါပေမယ့် ဒုက္ခရောက်နေတဲ့သူတွေကို ကူညီဖို့လဲ ငါတို့အတွက် ပြဿနာမရှိပါဘူး။ မင်းရဲ့နာမည်က ဆန်ဒိုရာနော်။ မင်းရဲ့သွေးနတ်သူငယ်မျိုးနွယ်က ဒီနေရာမှာပဲ မွန်းပိတ်ပြီး နေနေမယ့်အစား ဒီနေရာက ထွက်သွားပြီး အခြားတစ်နေရာရာမှာ ခိုလှုံလိုက်ပါလား”

ဆန်ဒိုရာက ထန်ရှုကို တစ်ချက်ကြည့်ကာ မေးလိုက်သည် “ရှင်က ဘယ်သူလဲ”

“ငါက မဟာထန်အင်ပါယာရဲ့ဧကရာဇ်ပဲ။ မင်းက ငါ့ကို မဟာထန်ကောင်းကင်ဘုံဧကရာဇ်လို့ ခေါ်လို့ရတယ်”ထန်ရှုက ပြုံးကာ ပြန်ဖြေ၏ “မင်းတို့ရဲ့သွေးနတ်သူငယ်မျိုးနွယ်စုက ငါနဲ့အတူ ထွက်သွားဖို့ ဆန္ဒရှိတယ်ဆိုရင် မင်းတို့ကို ငါ့ရဲ့မဟာထန်အင်ပါယာမှာ နေဖို့ ခွင့်ပြုတယ်”

ဆန်ဒိုယာက ခဏစဉ်းစားလိုက်ပြီးနောက် ခေါင်းခါယမ်းလျက် ပြောလိုက်၏ “သစ်သားစိမ်းအင်မော်တယ်ပိုင်နက်က နတ်သူငယ်တွေရှင်သန်ဖို့အတွက် သင့်တော်တဲ့နေရာတစ်ခုပဲ။ ပြီးတော့ ရှင့်ဆီက စကားအနည်းငယ်လောက်နဲ့ ငါတို့ကို သိမ်းသွင်းနိုင်မယ်လို့ ဘာကြောင့် ထင်ရတာလဲ။ ထွက်သွားလိုက်ပါ။ ရှင်တို့ရဲ့အကူအညီကို မလိုအပ်ဘူး”

ထန်ရှုက ရယ်လိုက်သည်၊ ထို့နောက် သူက အထွတ်အထိပ်အုပ်ချုပ်သူနှင့်ပင်လယ်လမ်းဘုရင်တို့ကို ကောင်းကင်ဘုံစံအိမ်အသုံးအဆောင်ပစ္စည်းထဲမှ ယူထုတ်လိုက်၏။ အောင်ရှန်းနှင့်အခြားနဂါးများကို လက်ညှိုးထိုးလျက် သူက အမိန့်ပေးလိုက်သည် “သူတို့ကို ဒီနေရာက ကန်ထုတ်လိုက်ပါ။ သူတို့က မထွက်သွားချင်ဘူးဆိုရင် သတ်လိုက်ပါ”

အောင်ရှန်းက ကြောက်ရွံ့သွားကာ ကြိမ်းဝါးလိုက်သည် “မင်းရဲ့နာမည်က မဟာထန်ကောင်းကင်ဘုံဧကရာဇ်မလား။ မင်းက တကယ်ပဲ ငါတို့ရဲ့ကိစ္စကို ဝင်စွက်ဖက်ချင်တာလား”