အခန်း (၁၀၂၆)

နတ်ဘုရားလောက၏ ပထမဆုံးရုပ်သေးရုပ် ....

ထိုစကားကြောင့် ခန်းဆောင်ထဲတွင်ရှိသော လူများက မျက်နှာထားက ပြောင်းလဲသွားကြသည်။

‌ရွှေမီးတောက်တို့က သိချင်နေကြသည်။ တာအိုတန်ခိုးရှင်ကြွယ်ခယ်နှင့် တခြားလူများက ထိတ်လန့်နေကြသည်။

“အကြီးအကဲကျူး၊ ဒါက ....”

တာအိုတန်ခိုးရှင်ကြွယ်ခယ် မပြောနိုင်ခင် ကျူးချန်က ရယ်လိုက်ပြီး လက်ကို ဝှေ့ယမ်းသည်။

“အဲဒါနဲ့ပတ်သတ်ပြီး မှားယွင်းနေတာ မရှိပါဘူး”

“ငါတို့ မဟူရာချပ်ဝတ်ဂိုဏ်းမှာ ရုပ်သေးရုပ်နှစ်ရုပ် ကျန်သေးတယ်။ တစ်ကြိမ်အသက်သွင်းရင် နတ်စွမ်းအားသလင်းကျောက်တစ်သောင်း ကုန်ကျတယ်။ ရုပ်သေးရုပ်တွေရဲ့တန်ဖိုးက အနည်းဆုံး နတ်စွမ်းအားသလင်းကျောက် တစ်သန်းပဲ”

တစ်ကြိမ်အသက်သွင်းလျှင် နတ်စွမ်းအားသလင်းကျောက်တစ်‌သောင်း ကုန်ကျသည်။

ထိုကုန်ကျစရိတ်မျိုးကို တတ်နိုင်သော အင်အားစုများ နတ်ဘုရားလောကတွင် သိပ်မရှိပေ။

ထိုအရာသည် နတ်စွမ်းအားသလင်းကျောက်များကို ဖြုန်းတီးနေခြင်း ဖြစ်သည်။

“နတ်စွမ်းအားသလင်းကျောက် တစ်သောင်းလား”

ဟန်မူယဲ့က တွန့်ဆုတ်နေပုံပေါ်သည်။

တာအိုတန်ခိုးရှင်ကြွယ်ခယ်က ထိုအသံကို ကြားလိုက်ရသောအခါတွင် ရင်ခုန်သွားသည်။

သူက ကျူးချန်ကို လေးစားစွာ ကြည့်လိုက်သည်။

ရရှိရန် ခက်ခဲအောင် ပြုမူနေခြင်း ဖြစ်သည်။

ထိုရုပ်သေးရုပ်နှစ်ရုပ်ကို ဝယ်ယူမည့်လူများ မရှိပေ။

တစ်ကြိမ်အသက်သွင်းရန်အတွက် နတ်စွမ်းအားသလင်းကျောက်တစ်သောင်း ကုန်ကျမည်။ မည်သူက ထိုကုန်ကျစရိတ်ကို တတ်နိုင်မည်နည်း။

ထို့အပြင် ရုပ်သေးရုပ်များ၏ တန်ဖိုးက နတ်စွမ်းအားသလင်းကျောက်တစ်သိန်း ဖြစ်သည်။ ထိုတန်ဖိုးဖြင့် အင်မော်တယ်ရတနာဆယ်ခုကို ဝယ်ယူနိုင်သည်။

ထိုရုပ်သေးရုပ်များကို မည်သူမှ ဝယ်ယူမည်မဟုတ်ပေ။

‘ငါတို့ မဟူရာချပ်ဝတ်ဂိုဏ်းမှာ ရုပ်သေးရုပ်မရှိတာမဟုတ်ဘူး။ မင်းက မဝယ်ယူနိုင်ရုံပဲ’

သူက ကူးသန်းရောင်းဝယ်ရေးခန်းဆောင်၏ အကြီးအကဲတစ်ယောက် ဖြစ်လာသည့်အတွက် အံ့အားသင့်နေရန် မလိုတော့ပေ။

ထိုနည်းလမ်းမျိုးက အမှန်တကယ်ပင် အထင်ကြီးစရာကောင်းသည်။

“နတ်စွမ်းအားသလင်းကျောက်တစ်သောင်းလား။ ငါကြည့်ပါရစေ”

ဟန်မူယဲ့က ဆုံးဖြတ်လိုက်ပုံရပြီး လက်မြှောက်၍ ရွှေသေတ္တာနှစ်လုံးကို ထုတ်ပေးသည်။

နတ်စွမ်းအားသလင်းကျောက်နှစ်သောင်း ဖြစ်သည်။

ကျူးချန်က လက်မြှောက်ပြီး ရွှေရောင်သေတ္တာကို တာအိုတန်ခိုးရှင်ကြွယ်ခယ်ဆီသို့ တွန်းပို့လိုက်သည်။ ထို့နောက် တီးတိုးပြောသည်။

“ဂိုဏ်းတူညီလေး၊ ကျေးဇူးပြုပြီး လျှို့ဝှက်နယ်မြေက ရုပ်သေးရုပ်နှစ်ရုပ်ကို ယူလာခဲ့ပါ”

သူတို့က ပိုလျှံနေသော နတ်စွမ်းအားသလင်းကျောက်များကို ခွဲယူနိုင်သည်။

သူက ရုပ်သေးရုပ်များကို သွားယူလိုက်ရုံဖြင့် များပြားသော နတ်စွမ်းအားသလင်းကျောက်များကို ရနိုင်သည်။ ထို့ကြောင့် တွန့်ဆုတ်နေရန် မလိုအပ်ပေ။

တာအိုတန်ခိုးရှင် ကြွယ်ခယ်က ခေါင်းညိတ်လိုက်ပြီး ခန်းဆောင်ထဲမှ ထွက်သွားသည်။

“တာအိုရောင်းရင်း၊ ငါတို့ မဟူရာချပ်ဝတ်ဂိုဏ်းမှာ တခြားရတနာတွေလည်း ရှိသေးတယ်။ ကြည့်ချင်လား”

ကျူးချန်က စားပွဲတွင်ထိုင်နေပြီး ပြုံးလိုက်သည်။

တာအိုတန်ခိုးရှင်ကြွယ်ခယ် ပြန်လာသောအခါတွင် ကျူးချန်က အနည်းဆုံး နတ်စွမ်းအားသလင်းကျောက်နှစ်သိန်း တန်ဖိုးရှိသော အရောင်းအဝယ်ကို ပြုလုပ်နိုင်ခဲ့သည်ဟု တပည့်တစ်ယောက်က ပြောသည်။

သူက ကျူးချန်ကို ပိုမိုအထင်ကြီးသွားသည်။

သူ့နောက်တွင် သစ်သားသေတ္တာနှစ်လုံးကိုင်ထားသော တာအိုတန်ခိုးရှင်နှစ်ယောက် ရှိနေသည်။

သူတို့နှစ်ယောက်လုံးက ရွှေအင်မော်တယ်အဆင့် ကျွမ်းကျင်သူများ ဖြစ်ကြသည်။

“သူတို့နှစ်ယောက်က လျှို့ဝှက်နယ်မြေရဲ့ အစောင့်အကြပ်တွေပဲ။ နတ်ဘုရားသတ်ဖြတ်ခြင်း ရုပ်သေးရုပ်တွေကို ထိန်းသိမ်းဖို့ တာဝန်ယူထားတယ်”

တာအိုတန်ခိုးရှင်ကြွယ်ခယ်က လက်မြှောက်၍ နောက်တွင်ရှိသော သေတ္တာသေတ္တာနှစ်လုံးကို ဖွင့်လိုက်ပြီး လက်ညှိုးညွှန်သည်။

“ဝီ”

သေတ္တာနှစ်လုံးက တုန်ခါနေကြသည်။

အနက်ရောင်ချပ်ဝတ် နတ်ဘုရားသတ်ဖြတ်ခြင်းရုပ်သေးရုပ် နှစ်ရုပ်သည် ခန်းဆောင်ထဲတွင် ပေါ်လာကြသည်။

ဟန်မူယဲ့က စိတ်လှုပ်ရှားနေသည်။

သူမျှော်လင့်ထားသည့်အတိုင်း နတ်ဘုရားသတ်ဖြတ်ခြင်းရုပ်သေးရုပ်များပင် ဖြစ်ကြသည်။

သင်္ချိုင်းအင်မော်တယ်မြို့တွင် နတ်ဘုရားသတ်ဖြတ်ခြင်းရုပ်သေးရုပ်က သုံးရုပ်ရှိကြောင်း ပြောပြခဲ့သည်။

တခြားရုပ်သေးရုပ်နှစ်ရုပ်သည် မဟူရာချပ်ဝတ်ဂိုဏ်းတွင် ရှိနေသည်။

ဟန်မူယဲ့က နတ်ဘုရားသတ်ဖြတ်ခြင်းရုပ်သေးရုပ်များကို ရယူရန် ဆုံးဖြတ်ခဲ့သည်။

ဤရုပ်သေးရုပ်နှစ်ရုပ်က သင်္ချိုင်းအင်မော်တယ်မြို့၏ ထောက်ပံ့မှုကို ရထားသော နတ်ဘုရားသတ်ဖြတ်ခြင်းရုပ်သေးရုပ်ကဲ့သို့ မသန်မာနိုင်သော်လည်း အင်မော်တယ်သခင်များနှင့် ယှဉ်နိုင်ကြသည်။

နတ်စွမ်းအားသလင်း‌ကျောက်များကတော့ အသုံးပြုရန်အတွက်သာ ဖြစ်သည်။

သူက နတ်စွမ်းအားသလင်းကျောက်များနှင့် ပတ်သတ်၍ စိုးရိမ်နေရန် မလိုအပ်ပေ။

“ဘုန်း”

နတ်ဘုရားသတ်ဖြတ်ခြင်းရုပ်သေးရုပ်များက တောက်ပသောအလင်းကို ထုတ်လွှတ်ပြီး တိတ်ဆိတ်နေကြသည်။

အားကောင်းသောစွမ်းအားတစ်ခုသည် ခန်းဆောင်ထဲတွင် ပျံ့နှံ့သွားသည်။

ဟန်ချီနှင့် ရှန်လင်းရွှမ်းက ဖြူဖျော့သွားသည်။

ရွှေမီးတောက်ကလည်း နောက်သို့ ယိုင်သွားသည်။

ဟန်မူယဲ့၏နောက်တွင် အကြီးအကဲဖုန်းနှင့် အကြီးအကဲကျိုးက ရှေ့တက်လာပြီး စွမ်းအားများကို ထုတ်လွှတ်လိုက်သည်။

သူတို့က အင်မော်တယ်သခင်အဆင့်သို့ မရောက်သေးပေ။ သို့သော် နှစ်ပေါင်းမရေမတွက်နိုင်အောင် စုစည်းထားသော သွေးမျိုးဆက်စွမ်းအားက အလွန်အားကောင်းသောကြောင့် သူတို့၏ တိုက်ခိုက်နိုင်စွမ်းကို ကျင့်ကြံဆင့်ဖြင့် မဆုံးဖြတ်နိုင်ပေ။

အထူးသဖြင့် အင်မော်တယ်ရင်းမြစ်ကမ္ဘာတွင် ဟန်မူယဲ့၏ ထောက်ပံ့မှုဖြင့် ကျင့်ကြံခဲ့သောကြောင့် အလွန်အားကောင်းလာသည်။

ယခုအချိန်တွင် သူတို့နှစ်ယောက်က အကြည့်ချင်းဖလှယ်ပြီး လှုပ်ရှားလိုက်ကြသည်။

အကြီးအကဲဖုန်းက နေရာတွင် ပျောက်ကွယ်သွားပြီး ဓားတိုတစ်လက်ကိုင်လျက် ပြန်ပေါ်လာသည်။ သူက နတ်ဘုရားသတ်ဖြတ်ခြင်းရုပ်သေးရုပ်ကို တိုက်ခိုက်လိုက်သည်။

လူအိုကြီးကျူးက လက်မြှောက်ပြီး မရေမတွက်နိုင်သော ဝါးရွက်များကို ဓားရှည်တစ်ခုအဖြစ် ဖွဲ့စည်းသည်။ ထို့နောက် ကျန်ရှိနေသော နတ်ဘုရားသတ်ဖြတ်ခြင်းရုပ်သေးရုပ်ကို ခုတ်ချသည်။

“ဝီ”

ရုပ်သေးရုပ်၏ မျက်လုံးများက ရွှေအလင်းဖြင့် တောက်ပလာပြီး လက်မြှောက်လိုက်သည်။

ပထမရုပ်သေးရုပ်က လက်ကို ထူးဆန်းစွာ နောက်ပြန်ထိုး၍ လူအိုကြီးဖုန်း၏ လက်ထဲတွင်ရှိသော ဓားကို ဆုပ်ကိုင်သည်။

“ရွှပ်”

ထိုဓားက ရုပ်သေးရုပ်၏ လက်မောင်းနှင့် ထိတွေ့ပြီး စူးရှသောအသံကို ထုတ်ပေးသည်။

ဒုတိယမြောက် ရုပ်သေးရုပ်က လက်မြှောက်ပြီး ဓားချက်ကို တားဆီးလိုက်သည်။

“ခလွမ်”

ဝါးရွက်ဓားက ရုပ်သေးရုပ်ကို ထိခိုက်မသွားစေခဲ့ပေ။

ဟန်မူယဲ့က ခပ်ဟဟရယ်လိုက်ပြီး လူအိုကြီးကျူးနှင့် လူအိုကြီးဖုန်းကို နောက်ဆုတ်လာစေသည်။ ထို့နောက် မေးလိုက်သည်။

“ဒီရုပ်သေးရုပ်နှစ်ရုပ်က ဘယ်လောက်လဲ”

‘ဘယ်လောက်လဲ’

တာအိုတန်ခိုးရှင်ကြွယ်ခယ်က ပြုံးလိုက်ပြီး လက်တစ်ချောင်းထောင်ပြသည်။

“ရုပ်သေးရုပ်တစ်ရုပ်ကို နတ်စွမ်းအားသလင်းကျောက် တစ်သန်းပဲ”

နတ်စွမ်းအားသလင်းကျောက်တစ်သန်းသည် မဟူရာချပ်ဝတ်ဂိုဏ်းကို နှစ်ပေါင်းများစွာကြာအောင် ထောက်ပံ့ပေးနိုင်သည်။

ထိုသလင်းကျောက်တစ်သန်းကို အရင်းပြု၍ ပိုမိုများပြားသော သလင်းကျောက်များကို ရှာဖွေနိုင်မည်။

အရေးအကြီးဆုံးအနေဖြင့် အရူးတစ်ယောက်ကသာ နတ်စွမ်းအားသလင်းကျောက်တစ်သန်းဖြင့် ရုပ်သေးရုပ်ကို ဝယ်ယူလိမ့်မည်။

တာအိုတန်ခိုးရှင်ကြွယ်ခယ်၏စကားကို ကြားလိုက်ရသောအခါ ခန်းဆောင်ထဲတွင်ရှိသော လူတိုင်းက ပြုံးလိုက်ကြသည်။

‘ငါတို့က ဈေးပြောလိုက်ပြီ။ မင်းက တတ်နိုင်ရဲ့လား’

“တာအိုရောင်းရင်း၊ အမှန်အတိုင်းပြောရရင် တခြားပစ္စည်းတွေကို ကြည့်လို့ရပါတယ်။ ဥပမာအနေနဲ့ မဟူရာချပ်ဝတ်ဂိုဏ်း သန့်စင်ထားတဲ့ အင်မော်တယ်ရတနာတွေပေါ့ ....”

တာအိုတန်ခိုးရှင်ကြွယ်ခယ်က အပြုံးတစ်ခုနှင့်အတူ ပြောလိုက်သော်လည်း ကျူးချန်က လက်မြှောက်ပြီး ဖြတ်ပြောသည်။

“ဂိုဏ်းတူညီလေးကြွယ်ခယ် ပြောလိုက်တဲ့ဈေးက အပိုအစိတ်အပိုင်းတချို့နဲ့ လက်နက်တွေအတွက် မပါသေးဘူး။ အားလုံးပေါင်းလိုက်မယ်ဆိုရင် အနည်းဆုံး ရုပ်သေးရုပ်တစ်ရုပ်အတွက် နတ်စွမ်းအားသလင်းကျောက် နှစ်သန်း ကျသင့်မယ်”

ကျူးချန်၏မျက်နှာထားက ထူးဆန်းနေပြီး ဈေးကို နှစ်ဆတင်လိုက်သည်။

တာအိုတန်ခိုးရှင်ကြွယ်ခယ်က ကြောင်အသွားပြီး ရွှေရောင်မျက်နှာဖုံးတပ်ထားသော ဟန်မူယဲ့ကို ကြည့်လိုက်သည်။ သူ့နှလုံးသားက တုန်ခါနေသည်။

ထိုလူက ရုပ်သေးရုပ်များကို အမှန်တကယ် ဝယ်ယူချင်ပုံရသည်။

နတ်ဘုရားသတ်ဖြတ်ခြင်း ရုပ်သေးရုပ်များသည် မဟူရာချပ်ဝတ်ဂိုဏ်း၏ အသန်မာဆုံး ရုပ်သေးရုပ်များ ဖြစ်ကြသည်။ သို့သော် ထိုရုပ်သေးရုပ်များကို မဟူရာချပ်ဝတ်ဂိုဏ်းက ဖန်တီးခဲ့ခြင်း မဟုတ်ပေ။

မဟူရာချပ်ဝတ်ဂိုဏ်း၏ တခြားရုပ်သေးရုပ်များအားလုံးကို ထိုရုပ်သေးရုပ်နှစ်ရုပ်အား အတုယူ၍ ပြုလုပ်ခဲ့သည်။

ကောင်းကင်ပြောင်းလဲခြင်းစံအိမ်ကဲ့သို့ ထိုရုပ်သေးရုပ်နှစ်ရုပ်သည် အမွေဆက်ခံထားသော ပစ္စည်းများ ဖြစ်ကြသည်။

နတ်ဘုရားသတ်ဖြတ်ခြင်း ရုပ်သေးရုပ်များကို ရောင်းချရန် ခွင့်ပြုမထားပေ။

ယခင်က ထိုရုပ်သေးရုပ်နှစ်ရုပ်ကို နတ်စွမ်းအားသလင်းကျောက် တစ်သန်းစီဖြင့် ရောင်းချရန် ကြိုးစားခဲ့သည်။ သို့သော် ဈေးနှုန်းကြောင့် ဝယ်ယူမည့်လူ မရှိခဲ့ပေ။

ဤတစ်ကြိမ်တွင် ဈေးဝယ်သူက အလေးအနက်ထားနေပုံပေါ်သည်။

ကံကောင်းစွာဖြင့် ကျူးချန်က ပါးနပ်ပြီး ဈေးမြှင့်လိုက်သည်။

ထို့ကြောင့် တစ်ဖက်လူက ဝယ်ယူနိုင်တော့မည်မဟုတ်ပေ။

“နတ်စွမ်းအားသလင်းကျောက် နှစ်သန်း ....”

ဟန်မူယဲ့က စဉ်းစားနေသည်။

“တာအိုရောင်းရင်း၊ ဒီရုပ်သေးရုပ်တွေကို ခွဲပြီးရောင်းမှာမဟုတ်ဘူး။ တကယ်လို့ ဝယ်ချင်တယ်ဆိုရင် နတ်စွမ်းအားသလင်းကျောက် လေးသန်း ပေးရလိမ့်မယ်”

ကျူးချန်က ခိုင်မာစွာပြောသည်။

ရုပ်သေးရုပ်များကို သယ်လာသော အစောင့်အကြပ်နှစ်ယောက်က တစ်ယောက်ကိုတစ်ယောက် ကြည့်လိုက်ပြီး ပြုံးသည်။

ကျူးချန်က ကိစ္စရပ်များကို ကောင်းမွန်စွာ ကိုင်တွယ်နိုင်သည်။

“နတ်စွမ်းအားသလင်းကျောက် လေးသန်း”

ဟန်မူယဲ့၏အသံက လေးနက်နေသည်။

သူက ခေါင်းခါပြီး နောင်တများဖြင့် လှည့်ထွက်သွားသည်။

ကျူးချန်က စိတ်သက်သာရာရစွာ သက်ပြင်းချလိုက်ပြီး တာအိုတန်ခိုးရှင်ကြွယ်ခယ်ကို လှည့်ကြည့်သည်။

တာအိုတန်ခိုးရှင်ကြွယ်ခယ်က ခေါင်းညိတ်လိုက်ပြီး ကျေးဇူးတင်ကြောင်းပြသည်။

ကျူးချန်က ဈေးမြှင့်ပြီး မပြောလိုက်လျှင် ရုပ်သေးရုပ်နှစ်ရုပ်က အမှန်တကယ်ပင် ရောင်းထွက်သွားနိုင်သည်။

“သခင်လေး၊ ကျွန်တော်တို့သွားမယ့်နေရာမှာ ဒီရုပ်သေးရုပ်တွေက လမ်းရှင်းပေးရင် ပိုပြီး လုံခြုံလိမ့်မယ်”

ဟန်မူယဲ့၏ဘေးတွင်ရပ်နေ‌သော ရွှေမီးတောက်က ပြောလိုက်သည်။

လှည့်ထွက်သွားရန်ပြင်နေသော ဟန်မူယဲ့က ရပ်တန့်သွားသည်။

“သခင်လေး၊ တကယ်လို့ ဒီရုပ်သေးရုပ်တွေနဲ့ဆိုရင် ကျွန်တော်တို့က ရတနာတွေ ပိုရနိုင်တယ်”

လူအိုကြီးဖုန်းက ပြောသည်။

“ဟုတ်တယ်။ ပြီးတော့ ဒီရုပ်သေးရုပ်တွေကို ပြန်ရောင်းလိုက်ရင်လည်း အရှုံးမရှိဘူး”

လူအိုကြီးကျူးက တီးတိုးပြောသည်။

“သခင်လေး၊ အဲဒီနေရာက အန္တရာယ်များတယ်”

ဟန်မူယဲ့က တုံ့ဆိုင်းစွာ ခေါင်းညိတ်လိုက်ပြီး ကျူးချန်ကို လှည့်ကြည့်သည်။

“နတ်စွမ်းအားသလင်းကျောက် လေးသန်းလား”

ကျူးချန်က ထိတ်လန့်နေသည်။

တာအိုတန်ခိုးရှင်ကြွယ်ခယ်က ကြောင်အသွားသည်။

ရုပ်သေးရုပ်များကို ယူလာသော အစောင့်အကြပ်နှစ်ယောက်က ဆွံ့အနေသည်။

“အဟမ်း၊ အလျင်မလိုပါနဲ့ တာအိုရောင်းရင်း။ ဂိုဏ်းချုပ်ကို သတင်းပို့လိုက်ပါအုံးမယ်”

ကျူးချန်က ခန်းဆောင်ထဲမှ ပြေးထွက်သွားသည်။

ခန်းဆောင်ထဲတွင်ရှိနေသော ကျင့်ကြံသူများ၏ မျက်နှာထားက ရှုပ်ထွေးနေကြသည်။

သူတို့က အရောင်းအဝယ်ကြီးတစ်ခုကို မြင်ချင်ကြသည်။ သို့သော် ရုပ်သေးရုပ်နှစ်ရုပ် အမှန်တကယ် ရောင်းထွက်သွားမည်ကိုလည်း စိုးရိမ်နေသည်။

ဟန်မူယဲ့က နေရာတွင်ရပ်နေပြီး ရုပ်သေးရုပ်နှစ်ရုပ်ကို ကြည့်သည်။

“နတ်စွမ်းအားသလင်းကျောက် လေးသန်းက ငါ့စုဆောင်းမှုတွေကို ကုန်ဆုံးသွားစေလိမ့်မယ်”

နှစ်နာရီအကြာတွင် ကျူးချန်က စိုးရိမ်စိတ်များနှင့်အတူ ပြန်ရောက်လာသည်။

“တာအိုရောင်းရင်း၊ ဂိုဏ်းချုပ်က နတ်စွမ်းအားသလင်းကျောက် လေးသန်းနဲ့ ရုပ်သေးရုပ်တွေကိုရောင်းဖို့ သဘောတူလိုက်တယ်။ ဒါပေမဲ့ အခြေအနေတစ်ခု ရှိတယ်”

“ရုပ်သေးရုပ်တွေကို ပြန်ရောင်းချင်ရင် မဟူရာချပ်ဝတ်ဂိုဏ်းကို ရောင်းပေးရမယ်”

ကျူးချန်က လက်သုံးချောင်းထောင်ပြသည်။

“ငါတို့က နတ်စွမ်းအားသလင်းကျောက် သုံးသန်းနဲ့ ပြန်ဝယ်မယ်”

ဟန်မူယဲ့က ခေါင်းညိတ်လိုက်သည်။

“ကောင်းပြီ”